FIRST SUNDAY OF ADVENT A

Shundaha ghokutanga ghoAdvent

FIRST READING

Thitoya thokutanga Jes 2:1-5

Mumbapira dha muporofeta Jesaya

Nyambi mbo ghana pakerera pofotji matunga ghomahe muthiraro mudiwiru dyaNyambi.

Thirota thaJesaya ghomwana Amosi tha hamene kwaJuda naJerusalema. Mumayuwa ghokughutho dirundu dyoTembeli dhaFumu mbo dinemana kupitakana marundu ghomahe, mbo di na pu kuyeyura kupitakana yimbandaghuru. Matunga ghomahe mbo ghaneya, hanu hokupira manomora nawo mbo haneya, no mbo hana ghamba eshi: “Mwiye, mu tu yende kudirundu dyaFumu, kuTembeli dhaNyambi waJakopu gha katuhonge mayira ghendi eshi natwe ngo tu yende mundhira dhoghushemwa; muragho mbo ghuna shwagha muSiyoni, no kudyango dyaFumu muJerusalema.

Aye mbo ghana tapathana ngcamu kumatunga ghomahe no kupangura mukatji kawanu hohengi; mbo hana pirura yimende yawo yikare yipururo, nokupirura maghonga ghawo gha kare mupondo dhodhifupi. Ditunga mbadi mbo dirwitha ditunga dimweya, mbadi mbo gha kara ko karo makudewero ghoyita. Owe ndhugho dhaJakopu, wiye, ninge tu yendere muthishe thaFumu.

Mañando ghaNyambi

Responsorial Psalm

Dimbokatji Ps 121:1-2.4-5.6-9.

R:

Ame na shambererire apa ha ni ningire eshi: “Wiye na tu yende kundhugho dhaFumu.”

Ame na shambererire apa ha ni ningire eshi: “Wiye na tu yende kundhugho dhaFumu.” Ene pano, mumoye tudi twe we Jerusalema!

Jerusalema ne dhombara dhi dha tanarire kushokeka,

R:

Ame na shambererire….

Oku gha konganena mako, agha mako ne ghaFumu. Oghu ne ghomuragho wa waIsragheli, mukufumaneka dina dyaFumu pano. Omu no mo gha pangwera no mo tetera ndhango Fumu. Fumu ghomwanahoka waDavita.

R:

Ame na shambererire…

Mu raperere eshi Jerusalema gha wane thiraro, nawa ha mu haka, ha tunge muthiraro. Thiraro ngo thikare mumatete ghoye, thiraro mumatungo ghoye.

R:

Ame na shambererire…

Ene mu dina dyawayendhange nawahakwa wange, yo na kukupera thiraro. Pamurandu ghondhugho dhaFumu Nyambi wetu, yo na kukuraperera eshi, mbo yina rogho kukoye.

SECOND READING

Thitoya thoghuwadi Rom. 13:11-14

Mumbapira dha mupostoli Paghulusi kwawa kaRoma

Nako ne dhina kokera

Muyitende yi, yoyi muna dimuka eshi na panye dhidi nako. Mwakona keho kupinduka yoyishi, nako dhomakomweneno ghetu ne dhina kokera, kupiterera ruvedhe ruya twapirukire. Ghuthiku ne ghuna piti. Tamba dive diyuwa. Mu tu shagheke noyirughana yomakokore. Gho tu kuyenge noyitwa yomunyenge.Tu pare thiwana thika di tuna paranga mutenyamwiru. Wa kara po ghudakwi nodishawana, kadi wakupira ghukushuki, yipara yoyimango, kupira marwanamvo no kupira nya. Eyi ne kadi kemo. Mu kuyenge mwe Hekudyetu Jesusi Kristusi. No mwa tokomena thikuma yirumbera yoyimango eshi yi mu shambererithe.

Mañando ghaNyambi.

Gospel Acclamation

Halleluja! Ps. 85:8

Ninge ghu tupe ruhakitho roye rondhika, ghoFumu tu parithe nomaghamweno ghoye.

Halleluja

Evangelium Mtt. 24:37-44

Marundwerero ghoyitjanga yaMateghusi

Pinduke ghukare ghuna kuroyithera.

Jesusi gha ghambiri kwa wakathishongero wendi eshi: Thika di ya karire mumayuwa ghaNogha, kemo mbo yi kara karo pamwiyero waMwanamunu. Yoyishi mumayuwa gha kughutho ghodivavure, hanu hadire no kunwa no kukuyeka, kate mudiyuwa di gha peramine Nogha mudyato. Ene mbadi ha karire nodighano eshi yinye yi di po, kate dyeyire divavure di wa kundumune po wahe. Kemo mbo yi kara karo pamwiyero waMwanamunu. Ndani mbana kara hawadi mudipya kuyirughana, ghofotji mbana mu shimbi, ghumweya ne mbana mu thighi. Hakamadi hawadi mbana tu, yofotji mbana mu shimbi, ghumweya ne mbana mu thighi.

Mu rawe ne keho, yoyishi mbadi muna dimuka eshi, diyuwa munye mbo gheya Hekudyetu. Ene mu dimuke: Ngo gha dimukire thindashandhugho eshi munako munye dhoghuthiku sho gheye mwidhi, ngo gha rewire. No ngo mbadiko thi tha shinyihire mundhugho dhendi. Yodigho muyinu yofotji yi, namwe mu kwinduke. Yoyishi Mwanamunu, mbo gha neya munako dhi mwa dhira kudimukera mwe.

Mañando ghoEvangelium.

SECOND SUNDAY OF ADVENT

Shundaha ghoghuwadi ghoAdvent.

FIRST READING

Thitoya thokutanga Jes. 11:1-10

Mumbapira dha muporofeta Jesaya

Makuruperero gho kaye ko thiraro

Ene mbo kana hoko katondoghana pathithiki thaJesse, nokatondoghana ka mbo ka nemi mbuyo pamidhi dhendi.

Mupepo waFumu mbo ghuna kara papendi: Gho ghu ne mupepo ghoghunyanyami no ghokutjwathanitha, no mupepo ghomaghano no ghongcamu, nomupepo ghokudimukitha nowoma ghokwaFumu.

Ene mbadi ghapangura kuyinu yo thitunu meho ghendi, no mbadi mbo ghatapa mirandu koyi ghana kuyuva nomatwi ghendi ene aye kupangura no ghushemwa ghokupira mandorwera no kutapa mapangwero mwene kwawahepwe.

Ňando dhendi ne mutagha gho kupumuritha haringi-ringi no mbangwiriro dhendi dhareta yifa

kwawayiharuri. Ghughungami mbo ghuna kara mukata ghombunda dhendi; nomakurupero ghendi ne mbo ghana kara mukata ghomayonga ghendi.

Dimbungu mbo dina di pofotji nondjwighana, no ndhogho mbo ghana ka gomba pofotji noñomboghana. No ndana nonyimeghana mbo yina kupakerera pofotji nopurwana ghomununu. Na murumeghana ne mbo ghana yi ditha. Ngombe nodidjidjikwe mbo yina dyera pofotji, no nyime mbo ghana di muhonyi yira puru.

No kambututu mbo kana vughavughera kudikwina dyothipidi, no mukurwana ye ne mbo gha nengeneka dyoko dyendi mudikwina dyonoka. Ene nothofotji temba thi mbo thi tokotitha ghumweya, ngambi kumuyipitha kuno, kudirundu dyange dyodiheya dyokupongoka; yoyishi muve mbo ghuna yara yidimukitho yaFumu, thika di gha fika rundanda rodikuruviya.

Mañando ghaNyambi.

Responsorial Psalm

Dimbokatji Ps 72:1-2.7-8.12-13.17

R:

Mumayuwa ghendi muragho mbo ghuna karako no thiraro kate mbo kadhimane kaghonda.

Honge ne kehoFumu, ghoNyambi eshi gha raghure popamahimeno ghoye, honge Fumu mukutenda ghuhunga, thika di gha ghuna kuyihima We, eshi mbo gha tetere ndhango dhodhihunga, kudiko dyoye no kureta ghuhunga kwawakakunyanda.

R:

Mumayuwa ghendi…

Roghithe ghupanguri ghokumuragho wendi, no tape roruhe, fiyaghudhi kukwendi. Gha kone kuraghura, kate kudikuruviya, kutunda kurware rushokuru, kate kumatunga ghokayenda.

R:

Mumayuwa ghendi…

Yoyishi Aye, mbo ghana ghamwena hahepwe awa mba kumbera maghamweno, ene ye mbo ghana fera ñeke hakashu nawakakunyanda, no mbo ghana ghamwena moyo dhawahepwe.

R:

Mumayuwa ghendi…

Ninge havuruke roruhe dina dyaFumu, no fuma dhendi dhirepe oku shime ha di shenyena diyuwa kemo sho gha kughe marudhi ghupanguri wendi, no kughumenyamenyena!

SECOND READING

Thitoya thoghuwadi Rom. 15:4-9

Mumbapira dha mupostoli Paghulusi kwawakaRoma.

Kristus ne yomukomononi ghohanu wahe.

Yoyishi yi ya karire muYitjanga pakare-kare, yatwe ha yitjangerire kukutuhonga. Eshi, pamadhidhimekero nomatjimapero, tu kare nomakurupero ghokuyara. Ngo gha mupe Nyambi ghodivetu-vetu dyomadhidhimekero nomatjokedhero ghoyoyihe eshi mukupakerere pofotji. Thika di gha yihima Kristusi. Po sho mu kone kukupakerera kanwa kofotji ghukugha Nyambi, Wiha Hekudyetu Jesusi Kristusi. Mukutamburethane ne keho. Thika di gha mu tamburire namwe Kristusi, kudifumanekero dyaNyambi. Eyi na kuninga ne yino. Kristusi gheyire pamurandu waWajuda, nag ha kare mupika. Aye gha kone kuwayarithera ghushemwa waNyambi. Pamaturekero agha ha tamburire hakerekandongo wetu pakare. aye gheyire karo eshi, marudhi ghamweya, gha fumaneke Nyambi kuthiñeke thendi, thika di ha yitjanga eshi “Yo sho ni kukughere kughutho ghomarudhi, no padikuto dyoDina dyoye, na kukwimbera dimbo dyomakughero dyomupisalemi.”

Mañando ghaNyambi.

Gospel Acclamation

Halleluja Luk. 3:4.6

Mu roghithe ndhira dhaFumu; mu mu ghorwero mayira, nawanu wahe mbana mono makomweneno agha mbo gha tunda kwaNyambi.

Halleluja

Evangelium Mtt. 3:1-12

Marundwerero ghoyitjanga yaMateghusi

Mu piruke, ghuFumu ghodiwiru ne pepi ghudi.

Mumayuwa gha ko kutanga kuyaghura Johannesi ghoMukadiyoghero mumamboreya ghaJudeya, no gha ningire eshi: Mu piruke, yoyishi ghuFumu ghodiwiru ne pepi ghu di.”

Aye ne yoyu gha yaghurire muporofeta Jesaya apa gha ningire eshi: “Diywi dina kwitha mumamboreya: Mu roghithe ndhira dhaFumu, mum u ghorwere mayira ghendi.”

Johannesi yu ghavatire yitere yoyikihu ghongameno nongwama mumbunda dhendi. Yidya yendi ne dimba nowiki ghomuka. Mumayuwa ghogho, Jerusalema naJudeya yomuhe nomukunda ghoghuhe waJordani wa kongoshire kukwendi. Nawo ha tongononine maharwero ghawo no ha pwire kuyogha muJordani.

Apa gha monine eshi wingi waWafarasayi naWasadusayi, kukwendi hana kwiya eshi gha wa yoghe, gha wa tongwerire eshi: mwayiyoka mwe, yidye ghana mu nyanyamitha mu tjire ghukenya ghushokuru? Mwime mbuyo dhokuneghadha eshi muna piruka. No mwa ghayara mumwenu mwathinda ghuninga eshi: Atwe twakara naAbrahamu ghoWihetu, yoyi ame na kumutongwera ngeno: Nyambi gha kona kutenda mawe gha kare hana Abrahamu. Kamo nako kare nga ka rara pamidhi dhoyitondo. Kehe thitondo thokudhira kwima mbuyo dhodhiwa, hana kuthiyeya no kuthivukumena mumudiro. Ame na kumuyogha yoyi muna piruka, ene yu mbo gheya munyima dhange, gha kara nongcamu kupiterera me. Name mbadi nafumana kushutura makuha ghendi. Aye mbo ghana mu yogho naMupepo ghoKupongoka nomudiro. Munyara dhendi mo thi di thipuritho, no mbo ghana kenitha thindanda thendi roruheya no kutera tumbi wendi mukashete. Ene mungu, mbo ghana ghu tumekera mumudiro ghushidhimana.

Mañando ghoEvangelium.

THIRD SUNDAY OF ADVENT

Shundaha ghoghuhatu ghoAdvent

FIRST READING

Thitoya thokutanga. Jes. 35:1-6.10

Mumbapira dha muporofeta Jesaya

Kwiya ghana kwiya Nyambi thinda gha kuna tughamwene.

Muninge mamboreya no ditunga dyorukukutu mbo yi shamberere, no mashesha gha shogherere, no gha pune yira mitemo ghothiwe mwene,

Ninge mitemo dhikare yira, nomashogherero nomayumbaghukero. Yoyishi thishe thaLibanoni ne hana thimupa, no yikunyenga yaKarmeli naSharoni. Nawo mbo hana mono ghusheghenya waFumu, no yikuyenga yaNyambi wetu!

Mu tanarithe mako ghomakashu, no mu yendithe manwi ghokupundadhoka. Mu tongwere hakakuyumbaghuka mutjima eshi ha tanare no ha yapa!

Mu mone eshi Nyambi wenu kwiya ghana kwiya nonyinya no ngcamu dhendi nomadhimithero ghawo, ene thinda mbo gha neya kukunamushutura.”

Munyima, meho ghawakunga mbo ghana yandhuruka, no matwi ghawayipurupuru mbo ghana thituka: No muka kuteghena mbo ghana shamba yira ngurungu; no marudimi ghokukakatera mbo ghana humwerera. Yoyoshi meyu kushwagha ghana kushwagha mumamboreya, no kupoposhera mumashesha.

No muve ghokushekesha mbo ghana kara mo meyu, no ditunga dyorukukutu mbo ghana kara mo mavetuvetu ghomeyu. No mumararo ghawambwawa no mu ha turumutherire mbo muna meni muhonyi nombu nombare.

Mbo pana kara ndhira dhodhikuru, no ndhira dhi mbo ha toya eshi ndhira dhoKupongoka. Mundhira dhi mbadi mbo mu yenda hakakupira ghukushuki; ene dhawo hakushuki vene awa ghokuyendaghura mundhira dhi, ngambi hayero mbadi mbo ha yongara.

Mbadi mbo gha kara mo nyime, no yishereka temba yokwiya mo, no kuyiwana mo temba. Ene shime ngwa awa hapwa kukomonona wa ha kona kuyendaghura mo. Ene awa gha komonona Fumu, mbo hana huka kuSiyoni norwimbo royishamberera; no ghupendhighana ghororuheya mbo ghuna kara pamitwi dhawo: Awo mbo hana wana ghupendhighana no yishamberera, ene yitokota no yindundumena mbo yina wa tundu.

Mañando ghaNyambi.

Responsorial Psalm

Dimbokatji Ps. 146:6-10.

R:

Wiye, Fumu, no ghu tu ghamwene.

Fumu yo gha kara nomatawero kuroruheya, aye gha kara roruhe makurupero, aye gha neghedha ghuhunga kwawakakunyanda, no gha pwedhumuna hakakufa ndhara. Fumu gha komonona hakañotwa,

R:

Wiye, Fumu…

No gha monitha hakunga, Fumu gha ghamwena wa hana kupetha.

No Fumu gha haka hahunga, aye gha kunga hanumaghana, no gha ghamwena hathighana nawadidhi,

R:

Wiye, Fumu…

Ene ye gha pititha mayira ghawakakushwena Nyambi. Fumu gha raghura kuroruhe. Owe Siyoni, Nyambi ghoye gha raghura kutunda kwawanahoka kate kwawaneghani.

SECOND READING

Thitoya thoghuwadi Jam.5:7-10

Mumbapira dhamupostoli kwaJakobus

Mwayongaritha makurupero ghenu, yoyishi meyero ghaFumu ne tamba ghakumoneke.

Mukuture, mwayendhange, kate pa mbo gheya Fumu. Mughayare handjimi: Eshi ngepi di hana tatereranga mbuyo dhomumuve kate ku mbo gheyera mvura! Namwe keho mwakona kutaterera; mwayongaritha makurupero ghenu, yoyishi meyero ghaFumu ne tamba ghakumoneke. Mwatenda ñanani mukatji kenu mwathinda, mwayendhange, mwakutwara kumbangwero mwathinda; mupanguri tamba mukamumone oyu ghana kumutaterera pamakoghoro. Thitamenedhi thenu, mwayendhange, ngeshi ha mu tapa oku munakutura, mushimbe thawaporofeta awa hana ghambanga muDina dyaFumu.

Mañando ghaNyambi.

Gospel Acclamation

AHaleluja Luk. 4:18

Mupepo waFumu papange ghu di.

Yoyishi aye gha ni wetha ni yuvitha hahepwe mbudhi dhodhiwa.

Halleluja!

Evangelium Mtt. 11:2-11

Marundwerero ghoyitjanga yaMateghusi

Yowe yu wa yuka eshi wa kwiye ndi, endi tu taterere ghumweya?

Johannesi gha yuvire mudorongo yoyiheya yi gha tendire Jesusi. Ko kutuma kwendi mushongwe nawakathishongero wendi ha ka mwipure eshi: “Yowe yu wa yuka eshi wa kwiye ndi, endi tu taterere ghumweya?”

Jesusi ha wa hutha eshi: “Mu yende mu ka mu tongwere Johannesi eyi muna kuyuva no kumona. Hakunga kumona hana kumona karo, hakakukakatera maghuru kuyenda hana kuyenda, hakayiñondwe yi na wa kushuka, hayipurupuru kuyuva hana kuyuva, hafu kutumuka hana kutumuka, hahepwe kuna kuyuva mbudhi dhodhitowi. Ene mukafighadhimukakudhira kutamangera mumwange.”

Apa ha tundire po hayitumi waJohannesi, ho gha tangire Jesusi kughamba nawanu yokwaJohannesi ghuninga eshi: “Nye yi mwa yenderire mu ka mone mumamboreya? Ku kambu kokupunga-punga kumupepo ndi? Kadi kemo, ene nye mwa yenderire, mu ka mone, murume ghokuvata yitere yo difuno ndi? Kadi kemo, awa hokuvata yitere yodifuno ne, kuwawana mumarombe ghoghufumu. Ene nye ne keho mwa yenderire mukamone? Kukamona muporofeta ndi? Ghuhunga, shemwa na kumutongwera mwe, yokupiterera muporofeta: Oyu yoyu ha tjangerire eshi: “Mone, na kukutumena mukamushongwe wange, yo mbo gha kuroghithera ndhira kumwiyero ghoye.”

“Shemwa na kumutongwera, mwawakapamuve, mbadiko yu gha shamuruka kupiterera Johannesi ghoMukadiyoghero. Ene yu gha mbirupa mughufumu ghodiwiru, yo mukakupiterera ye.

Mañando ghoEvangelium.

FOURTH SUNDAY OF ADVENT

Shundaha ghoghune ghoAdvent

FIRST READING

Thitoya thokutanga. Jes. 7:10-14

Mumbapira dhamuporofeta Jesaya

Mbuyama ne namwanendi ghadi.

NaFumu gha ghambire shime naAhasi, no gha ningire eshi: “Ku kumberere ghothinda thidimukitho kwaFumu Nyambi ghoye. Shurukere mwawakamwishi, endi ngambi dhine kundaghandagha.” Ene Ahasi gha huthire eshi: “kadi kemo,” “mbadi sho ni kumbere, na shwena kuyereka Fumu.”

Ene Jesaya gha huthire eshi: “Mu tegherere mwe, mwanahoka waDavita! Shemwa mbadi muna ghaya kutokotitha hanu, eyi muna kutokotithera karo Nyambi wange ndi? Yoyi muna shwena kukumbera, yo mbo ghamupera thinda Fumu thidimukitho. Atho ne thino,mumone, mbuyama mbo ghana remi, no mbo ghana shamuruka katughuru, ho mbo ha mu tee shi Imanuwele, dina edi dina kuninga eshi, “Nyambi ne netu ghadi.”

Mañando ghaNyambi.

Responsorial Psalm

Dimbokatji Ps. 24:1-6

R:

Ninge ghengene Fumu! Yoyishi yoFumu ghomukangcamu dhodhihe.

Yoyiheya yi ya tunga pakaye no yoyiheya yi ya tunga pakaye, yoyiheya yaFumu. Yoyishi yo gha pakire rundanda mudikuruviya no gha ru nganganine mumeyu.

R:

Ninge ghe…

Yidye ghokukona kudhina kudirundu dyaFumu, no dye ghokukona kemana mudiyugho dyendi dyokupongoka? Yoyu ghokukushuka nyara dhendi no ghomutjima ghoghukenu, noyu gha shwena mbango, no kadi wa kwedha mbango.

R:

Ninge ghe…

Oyu ghokenge yo, mbo ghana wana makandadhekero kwaFumu, naNyambi ghomughamweni wendi, mbo ghana mu hokwera ghuhunga. Hakakutenda mahimeno ghendi no kumukarera, awo ne hanahoka waJakopu.

SECOND READING

Thitoya thoghuwadi Rom. 1:1-7

Mumbapira dhamupostoli Paghulusi kwawakaRoma

KwaPaghulusi dhina kutunda, ghomupika Kristusi Jesusi. Oyu hetha ghakare mupostoli, no hamupongora mukuyuvitha Mbudhi Dhodhiwa edhi ghakuruperithire Nyambi kupitera mwawaporofeta wendi mumatjangwa. Mbudhi dhi ne dhokuhamena kwaMwanendi. Mughunu ghapwire kushamuruka mudiko dyaDavita. Pamuvumbukero wendi, gha mu neghedhire Mupepo ghoKupongoka eshi aye ne Mwana Nyambi oyu ghapwa kuyenga nongcamu. Aye ne Jesusi Kristusi ghoHekudyetu. Papendi na wanena ñeke eshi, ni kare nomupostoli, mukatji komarudhi ghawahayidena waheya. Mukuninga hanu wahe hawane matawero padifumanekero dyoDina dyendi no kuwapa ghutawedhi ghokukwendi. Namwe momudi muno, no mwapwa kwitha karo eshi, mu kare hakaJesusi Kristusi. No kwaWakaroma wahe wa ghahaka Nyambi, nawa hapwa kwitha eshi, ha kare hapokoki wendi, Nyambi ghoWihetu naHekudyetu Jesusi Kristusi ghamutumene thiñeke nothiraro thendi.

Mañando ghaNyambi.

Gospel Acclamation

Halleluja Mtt. 1:23

Mbuyama mbo ghana kara mudira no mbo ghana reta katughuru mukaye no mbo hana mu tie shi Emanuwele. Kuninga eshi, “Nyambi ne netu gha di.”

Halleluja!

Evangelium Mtt. 1:18-24

Marundwerero ghoyitjanga yaMateghusi

Jesus ghapwire kushamuruka mwaMaria oyu gha karire mbandeki dhaJosefu, ghomwana Davita.

Apano kuna kuranda ko mbudhi dhomushamurukero waJesusi Kristusi. Oku shime ha kwandekerera haJosef naMaria ghoNyina Jesusi, awo nokukuyeka temba, ko kukara ghuremu. Ghuremu ghu, wa tundire kwaMupepo ghoKupongoka. Josef ghombandeki dhendi, gha karire muhunga no gha shwenine kumuhokora. Gha ghayarire eshi gha muthighe mughudhindo. Oku shime ha ghayandhara, ko kumuhokokera muengeli waFumu muyirota ghuninga eshi: “Josef ghomwana Davita, wa yapa kumughombotha Maria ghomunu ghoye. Yoyishi eyi yi mu di, kwaMupepo ghoKupongoka ya tunda. Mbo ghana reta katughuru mukaye, gho mbo ghu mute eshi Jesusi. Aye yo mbo gha komonona diko dyendi kumaharwero ghadyo.” Yoyiheya yi ya hokokire eshi, dhi rikanye ñando dhaFumu edhi gha ghambire pamuporofeta wendi eshi: “Mbuyama mbo gha kara mudira no mbo ghana reta katughuru mukaye no mbo hana mu tie shi Imanuwele.”

Dina dina kuninga eshi: “Nyambi netu”. Apa gha pindukire Josef muturo, ha tendi thika di gha yi mu rawerire muengeli waFumu no gha ghombothire mukamadi wendi. Ene mbadi gha mu pirukerire oku mbadi ghana shamuruka mwanendi mukaye. Ko kumuta kwendi eshi Jesusi.

Mañando ghoEvangelium.

CHRISTMAS DAY

Evening Mass 25 December

Dimisa dyorunguro.

FIRST READING

Thitoya thokutanga Jes.62:1-5

Mumbapira dha muporofete Jesaya

Fumu gha kumenyanyamenyine.

Pamurandu waSiyoni mbadi mboni ghamba no pamurandu waJerusalema no mbadi mboni porera, kate mbo ghupwe ghuhungami wendi yira thishe no ghukomononi wendi yira ramba ghokutumbuka.

No mako mbo ghana mono ghuhungami ghoye no hafumu wahe mbo hana mono difumanekero dyoye, no mbo ghuna wana dina dyodipya edi gha kuta Fumu.

No mbo ghuna kara thipuna thokuyenga munyara dhaFumu no tuku ghoghufumu ghomunyara dhaNyambi.

Mbadi mba kuta karo mukanyima, no ditunga dyoye mbadi mbaditoya eshi muthitu.

Ene mbana muti, Muketethi wange noditunga dyoye mukuruperi, yoyi Fumu ne gha kumenyamenyena no ditunga dyoye ne mbo dina kara noyishamberera.

Yoyishi thika di dya yenganga ditjaha mushengeteya kemo dyo mbo ha kukurupera hanoye noyira mukawenga oyu ghana kughombotha kemo mbo gha shamberera Nyambi kukoye.

Mañando ghaNyambi.

Responsorial Psalm

Dimbokatji. Ps.84:2-3, 5-6, 9-10

R:

Ngepi dina haka matungo ghoye we, Fumu

Ngepi dina haka matungo ghoye, ghoFumu ghoMukangcamu dhodhihe. Amen a kara nodirura dyodikuru thikuma, dyokutenbeli waFumu, nomoyo wange ghoghuhe, na hima kuyumbaghuka kwaNyambi ghomuyumi. Ya rogha kwawanu wa ha tunga munghugho dhoye: Yoyishi mbadi gha hana kuporera pakukugha

R:

Ngepi dina…

Ya rogha kwawanu wa ha wana ngcamu dhawo muMoye. Fumu Nyambi ghomukangcamu dhodhihe yuve ndapero dhange, tegherere ghoNyambi waJakopu! GhoNyambi, tetuke kwafumu ghomukungi wetu pake yu wa wethire kwishi dhomaghamweno ghoye.

SECOND READING

Thitoya thoghuwadi. Act.13:16-17.22-25

Mumbapira dhoYitenda yaWapostoli

Paghulusi ne yo kanonga kaKristusi ghomwana Davita. Apa ghakakumine Paghulusi ku Antioch mu Pisidia, Ko kwimana Paghulusi, gha warave nonyara thiwana ghuninga eshi: “MwaIsragheli, namwe mwayapa Nyambi mutegherere! Nyambi ghodiko dino dyaIsragheli, yo gha tororire hakerekandongo wetu, no ghawa tendire diko dyodikuru, apa ha karire yira hanu maghana muEgiptena. Gha wa tundithire mo nodyoko dyendi dyongcamu.

Eyi gha mu tundithire Nyambi muthirughana thendi, ko kutapa Davita gha kare fumu wawo, kukwendi gha ningire Nyambi eshi, nawana Davita ghomwana Jesse, Murume gha nitwa kumutjima wange. Yo mbogha rundurura yirughana yange.”

Mwawanahoka wamurume yu mo mbo gha tumba Nyambi Jesusi, gha kare mushuturi wawaIsragheli, thika di gha yi wa turekerire.

Kughutho ghomwiyero waJesusi, Johannesi yoghethire diko dyodihe dyaIsragheli kumapirukero no kudiyoghero.

Ene pa gha kokerire Johannesi pepi noyipara yendi, gha ningire eshi, yamedye muna kunighayara mwe? Ame ne kadi yame ye. Mu mone munyima dhange ghana kwiya. Name temba mbadi nafumana kushutura makuha ghendi.”

Mañando ghaNyambi.

Gospel Acclamation

Halleluja

Mbo ghuna kara ghuhura gho yi harura yokaye. No mughamweni wetu yo mbo gha kare Fumu wetu.

Halleluja.

Evangelium. Luk.3:23-38

Marundwerero ghoyitjanga yaLukasi.

Mashimurukero ghaJesus Kristus.

Apa gha tangire Jesusi thirughana thendi, oku ye nomyaka dhendi makumi mahatu. No gha karire thika dig ha mu ghayarire eshi, mwana Josefu, mwana Eliya, mwana Matana, mwana Levi, mwana Meligiya mwana Janayi, mwana Josefu, mwana Matiyasi, mwana Amosi, mwana Nahumu mwana Esili, mwana Nagayi, mwana maghata, mwana Matatiyasi, mwana Semeyini, mwana Serurubabeli, mwana Seghalitiyeli, mwana Neri, mwana Meligi, mwana Adidi, mwana Kosama, mwana Elimadama, mwana Eri, mwana Josuwa, mwana Eliyeseri, mwana Jorimi, mwana Matati, mwana Levi, mwana Simeghoni, mwana Juda, mwana Josef, mwana Jonama, mwana Eliyakimu, mwana Melegha, mwana Menna, mwana Matata, mwana Natati, mwana Davita, mwana Isayi, mwana Obeti, mwana Boghasi, mwana Salomoni, mwana Nagisoni, mwana Aminadabu, mwana Adimini, mwana Arini, mwana Hesironi, mwana Peresi, mwana Juda, mwana Jakopu, mwana Isaka, mwana Abrahamu, mwana Tera, mwana Nahoru, mwana Serugu, mwana Rehu, mwana Pelegi, mwana Heberi, mwana Sala, mwana Kenani, mwana Aripagasadi, mwana Semu, mwana Nogha, mwana Lamegi, mwana Metusalaka, mwana Henongo, mwana Jeredi, mwana Mahalaleli, mwana Kenani, mwana Enosi, mwana Seti, mwana Adami, mwana Nyambi.

Mañando ghoEvangelium.

Mass at Midnight

Dimisa dyoghuthiku.

FIRST READING

Thitoya thokutanga Jes.9:2-6

Mumbapira dhamuporofete Jesaya

Mwanuke ne ha na mu tupa.

Diko edi dya kara mumakokore dina mono thishe thishokuru,

edi dyatunga mumvura ghokufa, thawa sheghenyena thishe.

Yowe wa vuritha diko, wa kuruperitha thiraro thawo, awo ne hana shamberera kughutho ghorupara roye yira munu ghokushamberera, munu pakukesha, yira munu ghokushamberera pakukutapera ghushwa.

Yoyishi djoko edhi wa wa dimbekire, no katondo aka kawendamine pamapeghe, mahumbithero ghawahayi ghuna wawo ghuna yi tunditha po yira mudiyuwa dyaMidiani.

Yoyishi kehe dikuha dyomushurundate edi dina kupita ghudjatera, no thitere ethi thinapu kuyowa mumanyinga, yitere yawo yoyihe mbo yinapu kutumekera.

Yoyishi mwanuke ne yatwe ha mu shamurukera, katughuru ne hamutupire , no ghuFumu ghoghuheya ne padipeghe dyendi mbana muti eshi, Muteturi, Mupanguri Nyambi ghongcamu, Wiha ghororuheya Fumu ghothiraro.

Kate ku mavurithero ghoghuFumu wendi no kate kuthiraro thokupira ghuhura pathipuna thaDavita no kughufumu wendi mu kuwana no mu kuyitanaritha mughuwa noghuhunga,

Kutunda pano kate kuroruheya. Ghutoghoro waNyambi ghoFumu ghotushumba gho mbo ghu yitenda.

Mañando ghaNyambi.

Responsorial Psalm

Dimbokatji Ps.1-2a; 2b; 3; 11-12; 13(Ps.96)

R:

(Luk.2:11) Dyarero ghuna pu kushamuruka mukaruviya Kristus ghoFumu.

Mwimbe kate kudifumanekero dyaNyambi dimbo dyodipya, Mwimbe kughutho waFumu, muve ghoghuhe! Mwimbe kate kudifumamanekero dyaFumu. Mukughe dina dyendi.

R:

Dyarero ghana pu…

Ninge dishamberere diwiru nomuve, ninge dikuruviya di pughume nongcamu dhadyo dhodhihe. Ninge muthitu ghushamberere noyoyihe eyi ya kara mo. Ndani mbo yi shamberera yitondo yomudiputa.

Kughutho ghorupara rwaFumu mbo gha neya kukupangura kaye,

mbo ghana pangura kaye mughuhungami nomako kumakurupero ghendi.

R:

Dyarero ghana pu…

SECOND READING

Thitoya thoghuwadi Titus 2:11-14

Mumbapira dhamupostoli Paghulus kwaTitusi

Thiñeke thaNyambi tha hokokire kwawanu wahe.

Thiñeke kutuhonga tu thiye ghumango, madovo ghopakaye no kutuhonga tukare thiwana no ghuhunga muno mukaye.

Muruvedhe mu tudi mumataterero, mumakurupero ghoyipara no mahokokero ghomwiyero waNyambi wetu shokuru no Mukomononi wetu Jesusi Kristusi.

Oyu gha ku tapire pamurandu wetu gha tu kushukithe tu kare diko dyendi thinda ghomutoghoro mukurughana yoyiwa.

Mañando ghaNyambi

Gospel Acclamation

Halleluja Luk.2:10:11

Muengeli gha wa tongwerire eshi: Mwa yapa mumone eshi na kumuretera mbudhi dhodhiwa, edhi mbo dhi shambereritha waheya.

Dyarero ghana pu kumushamuruka Mushuturi ku dighumbo dyaDavita. Aye ne Kristusi ghoFumu.

Halleluja

Evangelum Luk.2:1-14

Marundwerero ghoyitjanga yaLukasi.

Dyarero ghana pu kumushamurukera mukaruvigha.

Mumayuwa gha ko kuragha fumu shokuru Augustinusi muragho eshi hatjange mena ghawapikendi wahe.

Agha matjangero ghokutanga gha karire oku Sirinusi komisare waSiraya. Waheya hayendire haka tjangithe mena ghawo keheyu kudighumbo dyodiko dyendi.

NaJosefu naye ghayendire ko.Gha tundire mudighumbo dyaNasareti dyomuditunga dyaGalileya no gha yendire kuditunga dyaJudeya, kuBetlehema kudighumbo dyaDavita, yoyishi ye gha karire mwapa Davita, no mwana hoka wendi.

Na mbandeki dhendi Maria oyu ghakarire ghuremu mudira, gha yendire pofotji nendi kuditjango.

Apa ha karire mo ko kurikanya mayuwa gho kushamuruka kwendi. Gha shamuruka mwana ghokatughuru gho mbendi dhendi, hamudhingi no mahina nokumurangeka muwato ghokudyera ngombe, yoyi mbadi ha wanine maturo mudighumbo.

Pamukunda ghodighumbo ne pa karire hakakuditha awa hakungire mitanga dhawo paghuthiku. Kokuhokoka Muengeli waFumu, nothishe thaNyambi ko kuwarwedhimena. Awo ne kokutukuwa thikuma.

Muengeli gha watongwerire eshi: “Mwayapa mumone eshi na kumuretera mbudhi dhodhiwa, edhi mbo dhi shambereritha waheya.

Dyarero ghana pu kushamuruka Mushuturi mudighumbo dyaDavita.

Aye ne Kristusi ghoFumu Thokumu dimukitha mwene thino eshi, muna kawana kakeke kokupwa kudhinga nomahina no kurara muwato ghokudyera ngombe.

Ko kuhokoka kwaMuengeli yu tushumba tomudiwiru otu twa shogherire Nyambi pofotji ghuninga eshi: Difumanekero kwaNyambi muwiru nothiraro pamuve kwawanu awa ghamenyamenyena ye.”

Mañando ghoEvangelium

Early Morning Mass

Dimisa dyomathikuthiku

FIRST READING

Thitoya thokutanga Jes.62:11-12

Mumbapira dhaMuporofeta Jesaya

Jone mushuturi ne ghana kumu.

Mumone Fumu ne ghana kuyuva kate kughuhura ghokaye.

Tongore mbara dhaSioni ghukomononi ghoye mbo ghu neya

Ndjambi dhendi ne kukoye no kughutho wendi. Mbo na wa ti eshi diko dyokupongoka,diko edi dya pwa kukomonona. Jerusalema mbana muti eshi mbara edhi gha karaNyambi,edhi mbo gha dhira kuthigha.

Mañando ghaNyambi.

Responsorial Psalm

Dimbokatji. Ps.1-6, 11-12

R:

Thishe thina kuturwedhimena dyarero “yoyishi Fumu ne ha na mu tu shamurukera.

Nyambi ne Fumu ninge kashamberere kaye; ninge yirudhi yoyihe yishamberere. Diwiru dina kuyuvitha ghunongo waFumu, nomako ghomahe ghana kumona dikuto dyendi.

R:

Thishe thina kuturwedhimena dyarero yoyishi Fumu ha na mu tu shamurukera.

Thishe thina kuhokokera kwawanongo noyishamberera kwawakushuki mitjima. Mwahunga mushamberere mwaFumu, no mukughe dina dyendi dyokupongoka dyoku pira kuvurama.

R:

Thishe thina ku tu rwedhimena…

SECOND READING

Thitoya thoghuwadi Titus 3:4-7

Mumbapira dhaMupostoli Paghulus kwaTitusi

Pathiñeke thendi ghatu ghamwenine.

Ene pa wa tu hokokerire ghunongo waNyambi ghoHekudyetu ghomukomononi wetu, gho wa tu paritha kadishi. payitenda yendi yoyiwa, ene ghunongo wendi vene yo gha tu paritha.padiyoghero omu gha tu shamuruka paruwadi Mupepo ghokupongoka yu gha tu pa yirama yoyipya.

Mupepo ghoKupongoka yu Nyambi ha mu tu shuruthera mwaHekudyetu Jesusi Kristusi ghomukomononi wetu. eshi gha tu hungeke muthiñeke thendi eshi twa kukare twapingi ghomoyo ghororuheya oghu tuna kutaterera.

Mañando ghaNyambi.

Gospel Acclamation

Haleluja Luk.2:15-20

Difumanekero kwaNyambi muwiru nothiraro pamuve kwawanu awa gha menyamenyena ye.

Halleluja

Evangelium Luk.2: 15-20

Marundwerero ghoyitjanga ya Lukasi.

Apa gha wa thighire Muengeli gha huke kudiwuru, ko kughamba- thana haka kuditha eshi: “Tu yende ku Bethlehema tu ka momne eyi yina hokoka ko no yi ghana tudimukitha Fumu.”

Ha tambukire ko no ha ka wanine Maria naJosef na mwanuke gho kurara muwato. Apa ha mu monine, ko kuthimwetwedha eyi gha wa tongwerire muengeli yokwamwanuke yu.

Ene waheya wa hayuvire mbudhi dhi kwa wakakuditha hatetukire yo mañando ghawo. Maria gha pungurire mañando ghomaheya gha, no kughavuruka mumutjima wendi. Hakakuditha ha hukire ghukugha thika di ha yi wa tongwerire.

Mañando ghoEvangelium

Mass During the Day

Dimisa dyomutenya

FIRST READING

Thitoya thokutanga Jes.52:7-10

Mumbapira dhamuporofeta Jesaya

Mahurero ghokaye mbo gha na mono makomweneno ghaNyambi wetu.

Ngepi kughuwa pa kumona munu ghana kureta mbudhi dhodhiwa, mbudhi dhothiraro!

Aye ghana kuyuvitha Nyambi no ghana kutongwera kwaSiyoni!

Mwingene mushogherere nomushamberere thikuma mwayimbanda ghuki waJerusalema.

Fumu mbo ghana rughanitha ngcamu dhendi dhokupongoka kughutho ghomako ghomahe, noghuhura ghokaye mbo ghu na mono makomweneno.

Mañando ghaNyambi.

Responsorial Psalm

Dimbokatji Ps. 98:1; 2-3ab; 3cd; 4; 5-6

R:

Ghuhura ghoghuhe ghokaye wa monine makomweneno ghaNyambi wetu.

Mwimbe dimbo dyodipya kate kumakughero ghaFumu,yoyishi gha tendire yitetu dyoko dyendi dyorudyo dyokupongoka edi dya mughamwenine.

R:

Ghuhura ghoghuhe ghokaye…

Fumu ghaneghedhire makomweneno ghendi, ghuhunga wendi gha ghu hokorire kughutho ghomeho ghomako. Aye ne gha ghayarire kughunongo wendi no makurupero ghokundhugho dha Isragheli.

R:

Ghuhura ghoghuhe ghokaye…

Ghuhura ghoghuhe ghokaye wa monine makomweneno ghaNyambi wetu. Mushamberere kughutho waFumu, kaye kokahe mwingene no mu mwimbere maPisalemi!

R:

Ghuhura ghoghuhe ghokaye…

Membo gho maPisalemi nothivandjero, no kuhumwerera tukadikadi,

Mu shogherere nomarumbendo mushamberere kughutho ghorupara rwaFumu Nyambi.

R:

Ghuhura ghokaye ghoghuhe…

SECOND READING

Thitoya thoghuwadi Hebr.1:1-6

Mumbapira kwawakaHeburayi

Nyambi ne ghambire netu mwamwanendi.

Pakare-kare Nyambi nga ghambanga nawakuru wetu rorwingi pamihingo dhokukutjaka-tjaka mutunwa twawaporofeta.

Ene muno mumaruvedhe ghano ghokuhurera, kuna kutu tongwera Mwanendi, oyu ghana ningire Nyambi ghakare mupingi ghoyoyiheya omu ka kara kaye kokahe.

Ghukenu waNyambi ghororuheya, gho wa mukenitha ghupongoki waNyambi mungcamu dhodhihe.

Mwana mu gha kurithire dina dyendi kupita haengeli

Nyambi mbadi gha tongorire kwakehe muengeli wendi eshi: Owe ne gho Mwanange dyarero nakureta.Ndi eshi, ame mbo na kara noWiho, Mbo ghuna kara mwanange.” Apa gha tumine Nyambi mwanendi pakaye,gha ghambire eshi: Haengeli wahe waNyambi ha mu kanderere.”

Mañando ghaNyambi.

Gospel Acclamation

Halleluja.

Diyuwa dyokupongoka dinatuyandhurikera dyarero, mwiye mwamako no mu kanderere kwaFumu,dyarero thinaghu thishe pakaye thothikuru.

Halleluja.

Evangelium John.1:1-18

Marundwerero ghoyitjanga yaJohannesi.

Ñando dha karire munu.

Pakutanga dha karire Ñando, no Ñando dhine Nyambi thinda.

Ghakarire pamutango naNyambi. Papendi yapwire kuvareka yoyihe no mbadiko thi tha pwire kutenda kupira ye.

Mumwendi wa karire moyo, no moyo wa karire munyenge wawanu.

Mumnyenge ghuna kumunekera makokore, makokore mbadi gha konine kudhimitha munyenge.

Pa karire murume oyu ghapwire kutuma kwaNyambi. Dina dyendi ne Johannesi.

Ghe yire kukunongonona munyenge eshi, wahe ngoha ghu dimuke no kughutawa.

Aye thinda mbadi gha karire munyenge, ene gha konine kunongonona munyenge.

Munyenge ghoshemwa ghokukona kumunekera kehe munu wa karire mukwiya pakaye, mbadi kamudimukire .

Gheyire kuyimuna yendi, hakadiko dyendi ne mbadi hamu- tamburire.

Ene wahewa hamutamburire ni hamu tamburire kuduna dyendi.

Gha wa pire ngcamu dho kukara hanaNyambi

Ne mbadi hakarire hana Nyambi pamushamurukero ghokudi Wihe vene. Nyambi thinda yo gha karire wihawo.

Ñando dhakarire munu no dha tungire pakatji ketu.

Atwe twa monine ghuFumu wendi, ghufumu wendi yira Mwana ghopithendi oyu gha tunda mwawihe gha yara thiñeke thoghushemwa.

Johannesi ghana kunongonona ye, no ghana kukuyerera ghuninga eshi: Yodighe yu na mu tongwerire eshi, oyu ghana kwiya munyima dhange ghanipiterera me yoyishi yomutangotango,ndani me. Mughuhunga wendi twa tambura twahe marudhi ghoñeke.

Nyambi gha tapira muragho kwaMosesi, ñeke noghushemwa yeyire mwaJesus Kristusi.

No ghofotji temba yu gha monine Nyambi panganyi. GhoNyambi thinda gho Mwanendi ghopithendi gho Nyambi thinda oyu gha karire nendi no gha munongonona.

Mañando ghoEvangelium

HOLY FAMILY

Sunday after Christmas

Shundaha gho pakatji komayuwa kwoko nomahatu ghodifeste dyoKrismisa.

Didhiko dyoKupongoka

FIRST READING

Thitoya thokutanga Ecc. 3:2-6. 12-14

Mumbapira dha Ecclesiasticus.

Keheyu ghokuyapa Fumu gha fumaneka hakuru wendi.

Fumu gha fumaneka Wihe mwawanendi, no gha shimba ngcamu dhaNyina no gha dhi tapa kwawanendi.

Keheyu gho kukutekera Wihe ghana kupwa kuthigherera maharwero ghendi, keheyu gho kufumaneka Nyina aye ne yira yu ghana kushamberera yinu yoyingi.

Oyu ghokufumaneka Wihe mbo ghana shamberera naMwanendi ghopithendi, mbo ghana mu yuverera mudiyuwa pa kuraperera.

Kuhenga mbo kuneya papendi yu ghokufumaneka wihe, keheyu ghokufumaneka Nyina kuna kuneghedha ghutawedhi kwaNyambi. Mwanange, wakona kughamwena wiho paghukurupe wendi, mbadi wakona kumutokotera muyira parayipara yendi. Ngambi ku ghana kasha maghano ghendi, wakona kumuneghedha yikaritha yoyihunga, mbadi wakona kumuyakunutha kungcamu noghundjewa-ndjewa ghoye; ghuhungambi ghokwawiho mbadi mbo tughuvurama ene mbo tuna ghukungu no kuthigherera maharwero ghoye.

Mañando ghaNyambi.

Responsorial Psalm

Dimbokatji Ps. 128: 1-5.

R:

Ya rogha kwamunu yu ghokukarera Fumu, no kutanda mahimeno ghendi.

Kandadheke wa ghokukarera Fumu, mbuyo dhomunyara dhoye mbo dhina kushambereritha, nowe shamberere no mbo ghuna fiyaghuka.

R
Ya rogha….

Mbukamadi ghoye, mundhugho dhoye gha kara yira thitondo thovinyu thoghuyeghave, no hanoye hohatutughuru, ha dhingumutwedha thidyero thoye.

R:

Ya rogha…

Mone, kemo dyo ghana kupwa kukandadheka murume yu gha karera Fumu. Ninge gha kukandadheke Fumu kutunda muSiyoni, mumayuwa ghomahe ghomoyo ghoye.

SECOND READING

Thitoya thoghuwadi. Kol. 3:12-21

Mumbapira dhamupostoli Paghulus kwawakaKolose

Yipara yo padidhiko naFumu.

Amwe mwadiko edi ghatorora Nyambi, mwapongoki wendi no gha muhaka thikuma. Yodigho mwa kona kupara thiwana pofotji. Mu kuyuve, mu kumbirupithe, mu kare noghunongo noghudhughutjima. Mu kare ghudhidhimeka no mu kuthigherere, ngeshi ghumweya oku gha nepitha muyendhendi. Thika di gha mu thigherera Fumu, namwe kemo dyo sho mu tende karo mukuthigherera hayendhenu. Muyinu yoyihe yi, thothikuru pone eshi, mwa kona kukuhaka pofotji. Edi dyodinungo dimwa ku kwata pofotji mumakupakerero ghokuyara. Thiraro thi gha tapire Kristusi thitunge mumitjima dhenu, no pamurandu gho kemo yo ha mwithera pofotji eshi, mu kare yipo yoyirama yofotji mukupara pofotji muthiraro. Mukarange no matumero roruheya. Muninge eshi, mbudhi dhaKristusi pa ghutungi wadho ngo dhiwane ghuturo mumwenu. Mukuhonge no mukuhangathane noghunyanyami ghoghuhe.

Mumitjima dhenu, mwa kona kwimba matumero mumipisalemi, membo ghomakughero no membo ghoKupongoka kwaNyambi kudifumanekero dyendi. No yoyiheya yi muna kughamba no kutenda, muyighambe no muyitende muDina dyaHekudyetu Jesusi no mu tumere Nyambi Wihe paPendi.

Mwambuyama, mu kare ghutawedhi kwawatutughuru wenu, thika di ya rikanya kwawanu wa ha tawa mwaFumu. Mwarume namwe, mwa kona kuhaka hakamadi wenu no mwa wa rwera difupa.

Amwe mwana, mu kare noghutumanithi kwawawihenu muyinu yoyihe. Yoyishi dyo gha yihimena kwawanuke wa ha tawa muMwendi.

Mwawiha, mwa shana kehe pano murandu kwawana eshi wangu hapire mukakuwakorera.

Mañando ghaNyambi.

Gospel Acclamation

Halleluja Kol. 3:15.16

Thiraro thi gha tapire Kristusi, tha kona kunegha yiparitha yenu;

Mbudhi dhaKristusi dha kona kuyarera nughutungi wadho mumwenu.

Halleluja!

Evangelium Mt. 2:13-15.19-32

Marundwerero ghoyitjanga yaMateghusi

Tumbure mwanuke naNyina ghu tjirere muEgiptena.

Apa hahukire hafumu hahatu, gha hokokire muengeli waFumu kwaJosefu muyirota ghuninga eshi: “Pinduke no ghu tumbure Mwanuke naNyina ghu tjirere kuEgiptena no mukakare koko kate mbo ni kutongwere, yoyishi Herodesi ghana kara nodighano dyokushana mwanuke no gha mu paghe.”

Ha pinduka Josef mughuthiku ghogho no gha shimbire mwanuke nanyina no ha yendire kuEgiptena. Ko gha ka karire kate kufa Herodesi eshi, yi rikanye eyi gha ghambire Fumu pamuporofeta eshi: “MuEgiptena mo netha Mwanange.”

Munyima dhokufa kwaHerodesi, ko kuhokoka muengeli waFumu muEgiptena kwaJosef muyirota no gha ningire eshi: “Pinduke no shimbe mwanuke nanyina no ghu huke kuditunga dyaIsragheli, yoyishi hanu wa hana shanine moyo wamwanuke ne hafa keho.” Ko kupinduka kwendi no gha shimbire mwanuke nanyina ha huke kuditunga dyaIsragheli. Apa gha yuvire eshiArgelaghusi ne mupanguri mudyango dyawihe Herodesi, gha yapire kuyenda ko. Ene apa gha mu rawerire Nyambi muyirota, ko kuyenda kwendi kuthiko thaGalileya. Ha ka kuma ko. No gha ka tungire mudighumbo dyodina dyoNasareti. Eshi yi rikanye kemo eyi gha ghambire muporofeta ngeno: Mbo hana mutoyo eshi muka Nasareti.

Mañando ghoEvangelium.

Mary Mother of God 1^st January

Diyuwa dyo Mwaka ghoghpya ne difeste dya mbuyama ghokukushuka Maria ghonyina Nyambi.

FIRST READING

Thitoya thokutanga. Num.6:22-27

Mumbapira dho Numeri

Mbo ha netha dina dyange kwawana Isragheli, mboa na wa kandadheka.

Fumu ne gha ghambire no gha ningire kwaMosesi eshi; Ghambe naAroni eshi: “Kemo dyo sho mu kandadheke hana Isragheli pakuwatongwera eshi: Fumu, mbo ghana kandadheka no mbo ghana kukungu. Fumu no mbo ghana kurwedhimena rupara rwendi no mbo ghana kufera ñeke. Fumu mbo ghana kapura rupara rwendi kukoye no mbo ghana kupa thiraro. Kemo dyo shoni dimbeke dina dyange ko hana Isragheli, ndani po mbo niwa kandadheka.

Mañando ghaNyambi.

Responsorial Psalm

Dimbokatji PS.67:2-3; 5; 6, 8

R:

Nyambi ngo ghatu fereňeke no kutukandadheka.

Nyambi ngo gha tu fereñeke no kutukandadheka, ngo ru tu rwedhimene rupara rwendi! Podigho eshi hanu hopakaye hadimuke ndhira dhoye no ha yuvithe makomweneno ghoye mumako ghomahe.

R:

Nyambi ngo gha…

Mako mbo ghana kara noyishamberera yoyikuru , yoyi wa pangura we mako mughuhunga no kuwatwara pakaye.

R:

Nyambi mbo gha…

Moko mbo ghana kukughu we Nyambi, mako mbo ghana kukukghu.

Nyambi mbo ghana tukandadheka noghuhura ghoghuhe gho pakaye mbo ghuna mu yapa.

R:

Nyambi mbo gha…

SECOND READING

Thitoya thoghuwadi. Gal 4:4-7

Mumbapira dhaMupostoli Paghulusi kwawakaGalese

Nyambi gha tumine mwanendi oyu gha pwire kushamuruka mwambuyama.

Mwayendhange, apa rwa rikanyine ruvedhe Nyambi gha tumine mwanendi, aye ne mukamadi gha mushamurukire, oyu gha rikanyithire no muragho, eshi gha komonone awa wa monine muragho nokuwa pirura hakare hana Nyambi. Mukuneghedha eshi amwene mwana Nyambi , Nyambi gha tumine mudhimu wendi wamwanendi mumitjima dhenu.mudhimu oghu ghuna kukuyerera eshi:” Tate, tate wange. Podigho eshi mbadi ghomupika karo ghomwana, no ngeshi ghomwana no ngogho mupingi waNyambi mwaKristusi.

Mañando ghaNyambi.

Gospel Acclamation

Halleluja Hebr1:1

Pa karekare Nyambi nga ghambanga nawakerekandongo wetu pamihingo dhokukutjaka- tjaka, mutunwa twawa porofeta ene muno mumaruvedhe ghano ghokuhurerera Aye kuna kutu- tongwera mwanendi, Oyu gha ninga Nyambi ghakare mupingi gho yoyihe omu kakara kaye kokahe

Halleluja.

Evangelium. Luk. 2:16-12

Marundwerero ghoyitjanga yaLukasi.

Ha tambukire ko nohaka wanine mwanuke gho ku rara muwato.

Apa ha mumonine kokutanga kuthimwetwedha eyi gha wa tongwerire muengeli. Yokwamwanuke yu, ene waheya wa hayuvire mbudhi dhi kwawakakuditha, hatetukire yomañando ghawo.

Maria gha pungurire mañando ghomaheya gha, nokughavuruka mumutjima wendi. Hakakuditha hahukire ghukugha Nyambi nokushogherera kuyoyi he eyi hayuvire nokumona thika di ha yi watongwerire. Munyima dho mayuwa kwoko nomahatu pakurikanyitha nako dhokumukeña, ha mu tire dina dyendi eshi, Jesusi. Dina di gha mutire muengeli kughutho gho ngayero dhaNyina.

Mañando ghoEvangelium

SECOND SUNDAY AFTER CHRISTMAS A, B, C

Shundaha ghoghuwandi munyima dhodifesite dyoKristmasa.

FIRST READING

Thitoya thokutannga. Sr.24:1-4, 12-16 (Gr.1-2, 8-12

Mumbapira dha Sirag

Mumaghano ghaNyambi dya karire diko dyaNyambi edi dya pwire kutorora.

Maghano ghana kukukugha ghothinda mukatji kodiko dyendi pakumukutekera. Mumbongarero dhaNyambi kuyandhurura ye kanwa kendi no kughutho ghotushumba twendi otu tuna kumukugha.

Po ghanirawerire muvareki ghoyoyihe nomuvareki wange gha tungekire matungo ghange, no gha ghambire eshi wa kona kutunga mwaJakopu nomuIsragheli wa kona kupungwera mo yipinga yoye.”

Kuroruheya ghani varekire kate,no kuroruheya mbadi mbo ni thigha.

muTabernakal ghokupongoka mona kamukanderire kughutho wendi no dyo na ka tungire muSioni.

Mumbara dho dhiwa, eyi ya hamenine ku kwange thiraro nomuJerusalema mwa karire ghutungi wange.

No na kamine mudhi mudiko dyodifumanekero, mudyemba dyaFumu dyo yipinga yendi.

Mañando ghaNyambi.

Responsorial Psalm

Dimbokatji. Ps.147:12-13,14-15,19-20

R: (John) 1:14

Ñando dha karire munu no dha tungire pakatji ketu.

Ngambi Halleluja owe Jerusalema. Kughe Fumu owe Jerusalema ,owe Siyoni kughe Nyambi ghoye! Ghana kukandadheka mayira ghoye, gha kandadheke hanoye mughutho ghoye.

R:

Ñando……

Oyu ghana kutapa thiraro kumirurwani dhoye no kukwirukitha nomavumbukero mwene. Oyu ghana kutuma marawero ghendi pakaye noñando dhendi ne kutambuka thikuma.

R:

Ñando…

Kuna kushwayitha mañando ghendi kwaJakopu, yihonga yendi no miragho dhendi ne kwaIsragheli

SECOND READING

Thitoya thoghuwadi Ef.1:3-6, 15-18

Mumbapira dha mupostoli Paukusi kwawaka Efesusi

Aye gha tu kungire no kutushimba tukare twanendi mwaJesusi.

Gha fumane Nyambi noWiha Fumu wetu Jesusi Kristusi oyu gha tukandadhekire kumipepo dhodhiheya dho kupongoka mudiwiru mwaKristusi, thika kenge di twa mutororire kughutho ghokaye mughupongoki no kukara kughutho wendi muruhakitho mukupira ghurema. Mu kukunga kwendi gha tu shimbe tukare twanendi mwaJesusi Kristusi. Mu ghuwa ghomahimeno ghendi.

Kate kudifumanekekero nomakughero ghothiñeke thendi agha gha kuhatera kumatorwero ghenu ghokutawa Fumu Jesusi noruhakitho oru mwa haka mwa hapongoki wahe. Yo na dhirire kutura Nyambi mumwenu.

Ame na kumwirukitha mumandapero ghange pakukumbera.Eshi Nyambi ghoJesusi Kristusi eshi ngo ghamupe mupepo oku pakughu muhokwera Nyambi mu mu dimuke.

Ame kumuraperera eshi gha ferere no gha kapuke, mumone thishe thendi amwe karo mudimuke makurupero agha gha mwithera nomatawero ghomakuru agha ghapingithire hapongoki wendi.

Mañando ghaNyambi.

Gospel Acclamation

Halleluja 1Tim. 1: 1-18

Eyi ne mbadi yakukona munu eshi yihoreka yokwaNyambi. gha yi dimuke.”

Halleluja

Evangelium John.1:1-18

Marundwerero ghoyitjanga ya John.

Ñando dha karire munu no dhatungire pakatji ketu.

Pakutanga Ñando, Ñando dha tungire naNyambi noÑando dhi ne Nyambi thinda. Gha karire pamutango naNyambi.

Papendi yapwire kuvareka yoyihe no mbadiko thi thokutenda kupira ye. Mumwendi wa karire moyo wa karire munyenge wa wanu. Munyenge ghuna kumuneka makokore no makokore mbadi gha konine kudhimitha munyenge. Pa karire murume oyu gha pwire kutuma kwaNyambi, Dina dyendi ne Johannesi. Gheyire kukunongonona munyenge eshi, wahe ngo haghu dimuke no kughutawa.

Aye thinda mbadi gha karire munyenge ene gha konine kunongonona munyenge. Munyenge ghoshemwa ghokukona kumuneka ku kehe munu wa karire mukwiya pakaye.

Ghakarire pakaye no kaye kapwire kutenda papendi, ene kaye, mbadi kamudimukire.

Gheyire kuyimuna yendi, ene haka diko dyendi mbadi ha mu tamburire.

Ene wa he wa hamutamburire no ha mu tawire kudina dyendi, gha wa pire ngcamu dho kukara hana Nyambi .

Ne mbadi ha karire pamushamurukero ghoghuwiha vene. Nyambi thinda yogha karire wihawo. Ñando dha karire munu no dha tungire pakatji ketu. Atwe twa monine ghufumu wendi yira mwa mwana ghopithendi oyu gha tunda mwaWihe gha yara thiñeke thoghushemwa.

Johannesi ghana kumunongonona ye no ghana kukugherera ghuninga eshi: yodiye yu namutongwerire eshi, ghoyu ghana kwiya munyima dhange, gha nipiterera me yoyiyshi yomutangotango, ndani me. Mughuhunga wendi twa tambura kemo twahe marudhi ghothiñeke.

Nyambi gha tapire muragho gho kwaMosesi ñeke no ghushemwa yeyire mwaJesusi Kristusi.

No yofotji temba yu gha monine Nyambi panganyi.ghoNyambi thinda mwanendi gho pithendi oyu gha karire mumwendi, yo gha ni nongonone.

Mañando ghoEvangelium

SUNDAY AFTER 6 JANUARY

THE EPIPHANY OF THE LORD

Diyuwa dyawaFumu hahatu.

FIRST READING

Thitoya thokutanga. Jes.60:1-6

Mumbapira dha muporofeta Jesaya

Jerusalema Thitata thothipya thokaye.

Pinduke, muneke kokuhe yoyishi thishe thoye ne thineya, no difumanekero dyaFumu ne kuna kuku sheghenyena, ngambi kenge shi ghuthiku shime wangumbwerekedhera kaye no dikokore pawanu.

Mako ghamwe mbo ghana kara makokore , ene papoye mbo thina kusheghenyena thishe thaFumu, ghunyanyami ghomumwendi mbo ghu na kara kukoye.

Mako mboghaneya kumunyenge ghoye n wafumu kumakya thiku ghoye gho murughura.

Kapuke meho ghoye no kenge mumbadi dhoye; wahe kuna kukongana nokwiya kukoye, hanoye gho tutughurughana ho kayenda, hashengeteya hana wereka mumighongo ghuwa pakera thinga thothikuru.

Muyishwagha meho yi mbo ghuna kuru no munyenge, no mutjima ghoye mbo ghuna tutuma ghushamberera ghutungi ghomako no mbana ghukuretera kutunda thambodiya dhodikuruviya oku mba tunderera hatungi.

Mangameno kutunderera kuMidiani no Elfa mbana tunderera kuSkeba, mbana reta mangondo no mungongwera hanu mbana yuvitha mbudhi dhoyishamberera eyi gha tendire Fumu.

Mañando ghaNyambi.

Responsorial Psalm

Dimbokatji Ps.72:2; 7-8 10-11; 12-13

R:

Fumu mbo ghana kukanderera mako ghomahe pakaye.

Mbo ghana pangura hanu ghoye nawakakunyanda mughuhunga.

Mumayuwa ghendi mbo kuna pupana ghunongo nothiraro kate mbo ka pireko kaghonda. No mbo ghana tungu kutunda kudikuruviya kate kurware, kate kughuhura ghokaye.

R:

Mako ghomahe…

Hafumu homuTarsisi no homuyirudhi mbana tapa ghushwa haFumu hoSkeba mbana reta diketo. Hafumu wahe mbo hana munyongamena kughutho wendi, mako mbo ghana mukarera.

R:

Mako ghomahe…

Yoyishi mbo ghanetha hakakunyanda awa hana kunyanda maghamweno, nawakakunyanda awa hapira mughamweni.

Mbo ghana ferañeke hahepwe, nawakakunyanda, no mudhimu dha kakunyanda mba ghana dhiparitha

R:

Mako ghamahe…

SECOND READING

Thitoya thoghuwadi Efs. 3:2-3a, 5-6

Mumbapira dhaMupostoli Paghulusi kwawaka Efesusi

Yina shwagha keho eshi ha hayidena nawo, hapingi ho yi ha w a kuruperitha.

Meshi mwayuva eshi Nyambi ghani kuruperitha ñeke dhendi eshi nidhi muyuvithere. Nyambi ghani torwera thihoreka thendi eshi, gha thini dimukithe muyimona. Pathihoreka thi mbadi gha thi hokwerire hanu, ene pañanyi-ñanyi ghana thihokora Nyambi mupepo wendi kwawapostoli wendi hokupongoka nawa porofeta.

Thihoreka thine thino: Mbudhi dhoyishemberera edhi dha pakerera hahayidena nawaJuda mwaJesusi Kristusi, wahe hawane makandadhekero gha Nyambi.Wahe hawana memba ghoyirama yofotji, ene makuruperithero agha hawa toghedhera mwaKristusi Jesusi kwa tunda muMbudhi Dhodhiwa.

Mañando ghaNyambi.

Gospel Acclamation

Halleluja Mtt.2:2b

Yoyishi twe nga tu mono ditungwedhi dyendi mudiva yo tu neyera na tu mu kanderera.

Halleluja

Evangelium. Mtt.2:1-21

Marundwerero ghoyitjanga yaMateghusi.

Atwe kudiva tuna tundu kukukanderera Fumu.

Jesusi gha pwire kushamuruke muBethlehema mumayuwa gha fumu Herodesi. Munyima dhomushamurukero wendi ko kukuma muJerusalema awa hamonine ditungwedhi hafumu hokudiva, no hepurire eshi, kupi nga hamushamurukera Fumu waWaJuda? Yoyishi nga tumono ditungwedhi dyendi yotuneyera na tumukanderere.

Apa gha yiyuvire fumu Herodesi nawaJerusalema waheya, ha tutukwire thikuma.

Ko kukongwedha kwendi haprisiteri hohakuru na wakamarukwaro gha wepure eshi, kupi mbo hamu shamurukera Kristusi.

Ha mu hutha kwagho eshi muBethlehema muJudeya, yoyishi kemo yapwire kutjanga kwawa porofeta eshi: Owe Bethlehema gho ditunga dyaJuda, kadi ghomumbiru pakatji ka wa raghuri waJuda. Yoyishi mumoye mo mbo gha shwagha mukamiti oyu mbo gha kara mudithi gho diko dyange dyaIsragheli. Munyima Herodesi ghethire hamoni ghoditungwedhi mughudhindo nokuwepura eshi, muthivaka munye dya hokokire ditungwedhi di.

Ha wa tumu muBethlehema nomañando eshi, muyende mukamushane thiwana mwanuke, ene ngeshi mukamuwane ho mwakunayinidimukithe.

Name hona kukone kuyenda nikamukanderere.” Pa kumana kuyuva yaFumu kokufunguruka kwawo, ene mumone kuditungwedhi di ha monine, dya wa twarire kate kashishwama pandhugho edhi gha karire mwanuke.

Apa hamonine ditungwedhi di ne hashambererire thikuma.

Ko kwingena kwagho mundhugho no hawanine Maria naMwanuke, ho hatongamenine kokumukanderera. Ha rongorora yikutu yawo no hamu kundire noghushwi ghuno, mangondo, mingongwera , nomira.

Yoyishi Nyambi ghawa shingire muyirota eshi, mbadi hakona kuhuka kwaHerodesi. Ko kuhuka kwawo nondhira dhadho-nadho kuditunga dyawo.

Mañando ghoEvangelium

THE BAPTISM OF THE LORD

Shundaha ghoghukwoko noyofotji munyima dhoMwenge Difeste dyoDiyoghero dyaHekudyetu

FIRST READING

Thitoya thokutanga Jes. 42:1-4.6-7

Mumbapira dha muporofeta Jesaya

Mupikange ne yu na kughamwena, ghomutorori wange yu wa menyamenyena mudhimu wange.

Fumu kuninga ghana kuninga eshi, “Mupikange ne yu na kughamwena, ghomutorori wange yu wa menyamenyena mudhimu wange; no na paka papendi mupepo wange, aye mbo ghana tapathanitha ghuhunga kumako ghomahe. Aye mbadi mbo gharumuka ngambi kukugherera, no diywi dyendi mbadi mbo ha di yuva mumikara. Kambu ko kutjoka mbadi mbo gha katjora naye, no ramba ghokudhimana mbadi mbo gha mu dhimitha. No mbo ghana tapathanitha ghuhunga mumakurupero. Aye mbadi mbo gha dhimitha, no kuhupura temba, kughutho ghokurikanyitha ye ghuhunga pakaye; no yirudhi nayo kutaterera yina kutaterera yihonga yendi.”

Kemo dyo ghana kughamba Fumu Nyambi. Oyu gha varekire mawiru no gha gha tapathanithire, no gha pakarire muve no yoyihe yi ya kara po, no gha paritha waheya wa ha tunga po, ho gha tapa mupepo wendi kwawa ha yendaghura po. Aye Fumu, na kwitha mughuhungami; gho na kukukwata padyoko dyoye no kukukunga; gho na kukutapa we ghu kare ghundambo ghoghupya ghodiko; no ghu kare munyenge kumako ghomahe, mukuyandhurura meho ghawakunga, kutapa horo kwawakañotwa nowahe wa hatunga mudikokore dyodorongo.

Mañando ghaNyambi.

Responsorial Psalm

Dimbokatji Ps. 29:1-4.9-10.

R:

Nyambi mbo ghana kandadheka hanu muthiraro

Mu mu kughe Fumu, mwamawiru! Mu mu kughe Fumu yongcamu dhendi no dikuto dyendi! Mu mu kughe Fumu, kudikuto dyoDina dyendi! Mu fumbamene kughutho waFumu, pamuhokokero ghokupongoka!

R:

Nyambi mbo…

Karungu-rungu kodiywi dyaFumu ne, parware kana kushwagherera.

Oyu ne Nyambi ghomukangcamu, yo ghana kudikititha mupepo, Fumu thinda yo ghana kara pameyu ghashokuru! Diywi dyaFumu ne dyangcamu, no dya yara ghufumu.

R:

Nyambi mbo…

Diywi dyaFumu, dina kututukwitha mupara kuwoma, yoyishi ghuna pirura muthitu. Mumarombe ghendi hana kuyoghomoka waheya eshi: “Yina vuru!” Fumu ne, pamashandjiva gha hungumana, yira Fumu gha hungumana po roruhe.

SECOND READING

Thitoya thoghuwadi Act. 10:34-38

Mumbapira dho yitenda yaWapostoli

Fumu gha mu wethire naMupepo ghoKupongoka.

Ko kuhutha Petrusi pañando no ghaningire eshi: “Yashemwa, ndani na kutjwathana eshi, Nyambi ne mbadi ghatenda makutjakero, ene mu kehe diko, gha tambura hanu wa ha mu kutekera, na wa ha tenda ghuhunga. Mwa yidimuka eshi, Nyambi gha tumine ňando dhendi kudiko dyaIsragheli. Eshi mbudhi dhothiraro edhi gha retire Jesusi Kristusi. Oyu Jesusi ne Fumu ghokokuheya no kwawaheya. Mwa dimuka karo eyi ya hokokire, muditunga dyaJudeya yomuhe. Ya tangererire muGalileya kuyuvitha munyima dhodiyoghero dyaJohannesi. Karo mwa dimuka yaJesusi ghomukaNasareti eshi, Nyambi gha mu wethire naMupepo ghoKupongoka no gha mu pire ngcamu. Gha yendaghurire, no gha tendire kokuhe yirughana yoyikuru. No gherukithire waheya wa ha karire mungcamu dhashatani. Yoyishi Nyambi, nendi gha karire.

Mañando ghaNyambi.

Gospel Acclamation

Halleluja Mk. 9:8

Munyima ha di wa fiki divuyi. Ko kushwa gha diywi mudiwiru eshi: “Oyu ne yoMwanange ghomuhakwa, kukwendi sho mu tawe.”

Halleluja

Evangelium Mtt. 3:13-17

Marundwerero ghoyitjanga yaMateghusi

Diyoghero dyaJesus

Mumayuwa ghogha, ko kutunda Jesusi muGalileya gha yende kwaJohannesi kuJordani eshi gha ka mu yoghe. Ene Johannesi gha yerekire kukanana ghuninga eshi: “Ghuhunga ne ngo yowe sho ni yoghe. Owe ne ho ghuneya kukwange kemo?”

Ghuhunga ghu kone kuyitenda, yoyishi pamuhingo ghuno pos ho tu rikanyithe ghuhunga ghoghuhe waNyambi. Munyima ko kumutawedha. Jesusi ghapwire kuyogha no gha kandukire mumeyu. Kapupi kamanana ko kuyandhuruka diwiru, naJohannesi ghamonine Mupepo waNyambi yira dikutji no wa terembire peghuru dhendi. Karo pa karire diywi dyokutunda mudiwiru edi dyaningire eshi: “Oyu ne yoMwanange ghomuhakwa, yo na menyamenyena.”

Mañando ghoEvangelium.

ASH WESDNESDAY

Ghuhatu ghomututwi.

FIRST READING

Thitoya thokutanga Joel. 2:12-18

Mumbapira dhamupofeta Joel.

“Ene ñanyi-ñanyi, Nyambi dyo ghana kughamba, mwiye kukwange no mitjima dhenu dhodhihe, kudhirerekedha, kudirera no kukema. Muninge mitjima dhenu dhindundumene mbadi shimudjadjure yishupata yenu, no mupiruke kwaNyambi shime, aye munongo no ghakara ruhakitho, gha mbirupitha ghupata wendi, ghayara thiñeke noye ghakurughithera mukukuthighura.

Yidye gha dimuka eshi: Mbadi mbo gha kuthighura karo, mbadi mbo ghatapa, no mbadi gha kuthigha makandadhekero thika di ghatapathana ndupu dhomuyambo no yinwa yo kwaFumu Nyambi wenu.

Mushighe mapori muSiyoni no murawere hanu hadhirerekedhe, mwithe mukoshi no mukongwedhe hanu pofotji, mupake hakuru hakare pofotji, muture hanuke ha kare pofotji ngambi hambiru awa hana kuyamwa.

Muninge katughuru ghokuyeka ghathiye mararo ghendi nombuyama dikorogho dyendi. Pakatji komengeneno no altare, ninge hapristeri endi hakareripo waFumu, hayeghemene. Waninge ha ghambe eshi, “parithe hapikoye, Fumu! No watenda hakakukuyora hakare thinu thothihonyi, ñando dhodhimango kumako, ‘Kupi ghadi Nyambi wawo?’ ” Ndani Fumu ghodifupa kumuve wendi, po mbo ghafera thiñeke kwawanu wendi.

Mañando ghaNyambi.

Responsorial Psalm

Dimbokatji Ps.50:3-6.12-14.17

R:

Ghu ni fere ñeke Nyambi popaghukuru ghoghunongo ghoye.

Dhimithe mirandu dhange muthiñeke thoye thothikuru! Ghu ni kushukithe kumaharwero, gho ghu yoghe ghuyi wange! Kemo, na dimuka mirandu dhange no na kundhundha roruheya maharwero ghange. Ku koye keho na harura, gho na tendi ghuyi mumeho ghoye.

R:

Ghu ni fere…

Nipe mutjima ghoghukushuki ghoNyambi, tendurure mudhimu wange no ghu ni tanarithe. Wa ni thindeka kughutho ghoye, no wa ni tunditha mupepo ghoye ghoKupongoka! Ni wanithe karo yishamberera, yoyu gha shutukire papoye, ho ninge ni kukarere karo nomakutapero ghokukoye. Gho fumu, nipe Mañando ghokuyuvitha fuma dhoye.

SECOND READING

Thitoya Thoghuwadi 2 Kor. 5:20-6:2

Mumbapira dhoghuwadi dhamupostoli Paghulusi kwawaka Korinte.

Atwe ne twayitumi waKristusi; Nyambi yo gha tu tororwera, no yikumbera eyi twatenda muDina dyaKristusi ne eshi: tukushemwathanithe naNyambi.

Nyambi gha mu tendire thiharuri mudyango dyetu, gha kone kututhigherera mumakupakerero ghetu naKristusi. Yira twakakurughana pofotji mwaNyambi, tuna kumutongwera mudimuke eshi, thiñeke thaNyambi mbadi mwa thiwana nyara-nyara. Aye ngeno ghana kughamba: Munako dhodhihunga na kuyuvire, no mudiyuwa dyomaghamweno, na kughamwenine.

Mone nako dhino ne dhodhihunga. Apa no ne dyodiyuwa dyomaghamweno.

Mañando ghaNyambi.

Gospel Acclamation Ps. 50:12.14

Makughero kukoye, ghoKristusi, Fumu ghoparo ghororuheya

Nipe mutjima ghoghukushuki ghoNyambi, tendurure mudhimu wange no ghu ni tanarithe. Ni wanithe karo yishamberera, yoyu gha shutukire paPoye.

Makughero kukoye, ghoKristusi, Fumu ghoparo ghororuheya

Evangelium. Mt 6:1-6 16-18

Marundwerero ghoyitjanga ya Mateghusi.

Ngeshi oku muna kughamwena hahepwe, oku muna kuraperera, no oku muna kudhirerekedha

Jesusi gha ghambire, kwawakathishongero wendi eshi: “Mukoneke mwaneghedha yitenda yoyiwa kughutho wawanu eshi ha yi mone; ngo mbadi sho mu wane yiruwera yenu kwaWihenu ghomudiwiru.

Ninge eshi oku muna kughamwena hahepwe, mwashigha mumapori. Eyi ne hana kuyitenda hakadifumanekero mumasinagoge nomumikara dhomayira eshi ha wa kughe hanu. Shemwa na kumutongwera: Awo ne kare ha yongaritha yiruwera yawo. Ame kuna kumutongera eshi; kadi kemo ngeshi ku ghuna haka kutapa thinu kwawahepwe, rumoho roye mbadi rwa kona kudimuka eyi runa kutenda rudyo. Kemo sho yi kare yitenda yoye yoyihunga mughudhindo, Wihenu ghokumona yokunda, mbo ghana muruwera.

Kemo shime, ngeshi ku ghuna kuraperera, wa kara yira hakadifumanekero. Awo ha haka thikuma kwimana mumasinagoge nomumashonga ghomikara kuraperera eshi ha kone kuwamona hanu.

Shemwa na kumutongwera: Ndjambi dhawo ne kare dha yongara. Kadi kemo ngeshi ku ghuna kuraperera, yende kungonda dhoye no raperere kwaWiho oyu ghakara mudyango diya dyoghudhindo no Wiho kumona yokutenda mughudhindo mbo ghana kuruwerera.

Ngeshi ku muna kudhirekedha, mwafudhakana marupara ghenu yira hakadifurumeko. Awo hana kukuthitaghura marupara ghawo eshi, ha wa dimuke hanu eshi kudhireredha hana kudhirerekedha.

Ghushemwa nakumutongwera eshi; yiruwera yawo ne kare yapwa. Ene ngeshi ku ghuna kudhirerekedha, kuwethe maghadhi kumutwi ghoye no yoghe rupara roye. Eshi gha dhire kukudimuka ghumweya kuyidhirerekedha yoye. Shimwengwa Wiho oyu ghokumona yoyihe eyi hatendanga mughudhindo no Wiho ghokumona eyi hatendanga yomughudhindo mbo ghana kuruwera.

Mañando ghoEvangelium.

FIRST SUNDAY OF LENT A

Shundaha ghokutanga ghomakuporero.

FIRST READING

Thitoya thokutanga Gen. 2:7-9.3:1-7

Mumbapira dhaGenesis

Mavarekero no maharwero gho hakerekandongo wetu hokutanga.

Fumu Nyambi ghombire mukafumu no rukunga romuve, no gha mu hetherire muñu ghomoyo mumayuru ghendi, murume po ghatamekire kupara. Fumu Nyambi ghatendire thikwinino muEdena, kudiva; no ghaturire mo murume oyu ghombire. Gho gha kurithire yitondo yokumarudhi ghomaheya, ya monekire ghuwa ngambi kuyidya. Pakatji kodipya gha kunine po thitondo thomoyo, thitondo thi thokudimuka ghuwa no ghuyi.

Thiyoka tha karire ghuringi-ringi kupitakana kehe thino thivareka thomumuthitu thi gha varekire Fumu Nyambi. Thiyoka thepurire mukadhi eshi, “Nyambi gha mu tongwerire shemwa eshi mbadi mwa kona kudya yima yokehe thino thitondo thomudipya ndi?” Mukadhi ghahuthire ku thiyoka eshi, “Twa kona kudya yima yo kehe thino thitondo thomudipya, shimengwa thitondo thopakatji kodipya. Nyambi gha ningire eshi mbadi twa roghera kudya yima yokuthitondo thiya thopakatji kodipya, endi ngambi kuthikwata thitondo thi; ngo yifa yenu.” Thiyoka thahuthire eshi, “Ngambi kuthidya mbadi mbo mufa. Eyi gha thi shingekera Nyambi, yoyishi gha dimukire eshi oku muna di ko ñanyi gha kuyandhuruke meho ghenu, keho ngeshi kuthidya, gho mwa ku kare thika Nyambi, no kudimuka ghuwa no ghuyi.”

Munyima gho ghamonine mukadhi eshi thitondo thine thiwa kuthidya, no thirumberire no meho ghendi; yashemwa thitondo thi netho thirumbera thamunu thokumuwanitha maghano. Ko kutumbura mbuyo dhatho gha dye no gha tapire kwakatughuru wendi naye gha dire. Popo gho ha dimukire, eshi thiheha ha di ko kutumbura kwawo mahako ghoghukuyu havate.

Mañando ghaNyambi.

Responsorial Psalm

Dimbokatji Ps. 51:3-6.12-14.17

R:

Ghunifere ñeke Nyambi, popaghukuru ghoghunongo ghoye, dhimithe mirandu dhange muthiňeke thoye thothikuru!

Ghunifere ñeke Nyambi, popaghukuru ghoghunongo ghoye, dhimithe mirandu dhange muthiñeke thoye thothikuru! Ghu ni kushukithe kumaharwero, gho ghu yoghe ghuyi wange!

R:

Ghu ni…

Kemo na dimuka mirandu dhange no na kundhundha roruheya maharwero ghange. Ku koye keho na harura, ghona tendi ghuyi mumeho ghoye.

R:

Ghu ni…

Nipe mutjima ghoghukushuki ghoNyambi, tendurure mudhimu wange no ghu ni tanarithe. Wa ni thindeka kughutho ghoye, no wa ni tunditha Mupepo ghoye ghoKupongoka!

R:

Ghu ni….

Ni wanithe karo yishamberera, yoyu gha shutukire paPoye, ho ninge ni kukarere karo nomakutapero ghokuKoye. GhoFumu, nipe mañando ghokuyuvitha fuma dhoye.

SECOND READING

Thitoya thoghuwadi. Rom. 5:12-19

Mumbapira dhamupostoli Paghulusi kwawakaRoma.

Adamu naKristusi

Shime karo yino: Pamunu yofotji dyeyire diharwero mukaye, no padiharwero ne kufa. Kemo dyo yayeranine yifa mwawanu wahe. Yoyi wahe ha harurire. Diharwero dya karire kare mukaye kughutho ghokutapa muragho. Ene diharwero, mbadi ha di ghayaranga ngeshi ku mbadiko muragho. Ngambi kemo kufa kwatungire kutunda twaAdamu, kate kwaMosesi. No kwawanu awa ha dhirire kuharura pamuhingo ghofotji, thika di gha reghire Adamu. Pano poghadi makuyuvero pakatji kaAdami no Yu mbo gheya. Keho noyitapa yothiñeke, kadi pofotji nomareghero. Yofotji gha fire pawanu hohengi. Thiñeke thaNyambi ne, nothitapa thamunu yofotji, Jesusi Kristusi, oyu gheyire gha dhi vurithe kwawengi. Thitapa thaNyambi ne kadi yira diharwero dyamunu yofotji, weyire po ghughadhi, ho wa retire matetero. Ene pamirandu dhodhingi, pa tundire thitapa thoñeke, gho tha retire ghuhunga. Pamareghero ghamunu yofotji. Ene payofotji Jesusi Kristusi, shime kuwana wingi. Oyu gha tambura wingi ghothiñeke nothitapa thoghuhunga, mbo ghana para no mbo ghana tungu.

Thika di gheyire matetero kwawanu wahe pamunu yofotji. Kemo karo tha retire thitenda thoghuhungami, ghuhunga no moyo kwawahe. Kenge wa twarire ghuthururu wayofotji kwawengi, ha kare hayiharuri, kemo dyo mbo ghutwara ghutawedhi wamunu yofotji, hengi kughuhunga.

Mañando ghaNyambi.

Gospel Acclamation Mtt. 4:4

Makughero kukoye, ghoKristusi, Fumu ghoghuparo ghororuheya

Munu kadi wa kupara ghuroto keho, ene pakehe ñando edhi dhina kushwagha mukanwa kaNyambi.

Makughero kukoye, ghoKristusi, Fumu ghoghuparo ghororuheya

Evangelium Mt. 4:1-11

Marundwerero ghoyitjanga yaMateghusi

Jesusi mbadi gha dire mayuwa makumi mane mukakumuyereka gheyire.

Ko kumuyenditha Jesusi Mupepo mumamboreya gha ka mu yereke Shatani. Mbadi gha dire mayuwa makumi mane nomithiku makumi mane. Munyima ghafire ndhara. Mukakumuyereka gheyire kukwendi no ghamutongwere eshi: “Ngeshi ngo ghoMwana Nyambi, ninge mawe gha gha thitunuke ghuroto.” Ene Ye gha mu huthire eshi: “Ya pwa kutjanga eshi: “Munu kadi wa kupara ghuroto keho, ene pakehe ňando edhi dhina kushwagha mukanwa kaNyambi.”

Popo ko kunutwara Shatani karo kumbara dhokupongoka no gha mwimekire kushungu-shungu dhotembeli, no gha mu tongwerire eshi: “Ngeshi ngo ghoMwana Nyambi, reghe mwishi! Ya pwa kutjanga eshi: “Mbo ghana kurawera haengeli wendi, awo mbana kushimbera panyara dhawo, eshi did hire kupunduka dipadhi dyoye kudiwe.” Jesus gha mu tongwerire eshi: “Ya pwa kutjanga eshi: “Wa yereka Fumu Nyambi ghoye.”

Munyima Shatani ha mu twara karo kudirundu dyodire, ko kamuneghedha ghutungi ghokaye noghuwa wako ghoghuhe, no gha ningire kukwendi eshi: “Yoyiheya yin a kuyikupa ngeshi ghutongamene kukwange no kunikandadheka.” Ene Jesus gha mu tongwerire eshi: “Finyaghuke Shatani, yoyi ya pwa kutjanga eshi: “Fumu Nyambi ghoye yo sho kanderere, no ghu mu karere pithendi.” Ndani ghana kumuthigha Shatani. Munyima heyire haengeli ha mu kunge.

Mañando ghoEvangelium.

SECOND SUNDAY OF LENT

Shundaha ghoghuwadi ghomakuporero

FIRST READING

Thitoya thokutanga. Gen. 12:1-4

Mumbapira dhaGenesis

Methero ghaAbrahamu, Wiha ghohanu waNyambi.

Fumu ghaningire kwaAbrahamu eshi, “thiye ditunga dyoye na wapoye, no dighumbo dyawiho, ghuyende kuditunga di sho ni kuneghedhe. Na kukupa hanahoka hohengi, gho wa ha kukara diko dyodikuru. Ñanyi na kupake dina dyoye mufuma dhodhikuru, gho na kukukandadheka nofiyaghudhi dhodhikuru. No mbo na kandadheka oyu mbo gha ku kandadheka, no mbo na tapa thikuto koyu mbo gha kukuta, mudina dyoye mbo ghana pu kukandadheka mako ghomahe.”

Ko kufunguruka Abrahamu ghayende thika di ghamutongwerire Fumu.

Mañando ghaNyambi.

Responsorial Psalm

Dimbokatji Ps. 33: 4-5.18-20.22

R:

GhoFumu, kare nongcamu dhoye ghomughamweni wetu, yoyishi mumoye twa paka makurupero ghetu.

Yoyishi yina kuhokoka yi ghana kuninga Fumu, no yoyihe yi ghana kutenda ne, ya tanara. Aye ne gha haka ghuhunga no ghuwa, yidimukitho yaFumu yomakurupero ghoruhakitho rwendi, ya yara kaye kokahe.

R:

GhoFumu, kare….

Oyu ne Hekudyetu, yo gha kunga waheya hakakumukarera, nawa ha kurupera ngcamu dhendi. Yo ghokuwaghamwena kuyifa, no kukunga moyo dhawo kudiyerenge. Tu taperere paFumu: Mbo ghana tu ghamwena no kutukunga.

R:

GhoFumu, kare….

GhoFumu, kare nongacamu dhoye ghomughamweni wetu, yoyishi mumoye twa paka makurupero ghetu.

SECOND READING

Thitoya thoghuwadi. 2 Tim. 1:8-10

Mumbapira dhoghuwadi dhamupostoli Paghulusi kwaTimoteghusi

Makurupero gho Mbudhi Dhodhiwa

Mbadi wa kona kufa honyi, mukunongonona Hekudyetu, kukwange me ne nakara muñotwa nuDina dyendi. Karo kondjere Mbudhi Dhodhiwa nongcamu edhi gha kupa Nyambi. Aye yo gha tu ghamwena no gha titha eshi, tu kare pofotji nendi. Eyi mbadi ghayitendire popayitenda yetu. Ene kumahimeno ghendi thinda, no ñeke dhendi thinda, no ñeke dhororuheya edhi ghatupire mwaKristusi Jesusi. Ñeke dhino ne dhatuhokokera pamwiyero waMushuturi wetu Kristusi Jesusi. Aye ne gha withire ngcamu dhokufa. No paMudhi Dhodhiwa, po gha ni hokorire moyo ghokudhira kufa.

Mañando ghaNyambi.

Gospel Acclamation Mt. 17:5

Difumanekero no makughero kukoye, ghoKristusi

Diywi ha di shwagha mudivuyi eshi: “Oyu ne yoMwanange ghomuhakwa, yon a menyamenyena. Mutegherere kukwendi.” Difumanekero no makughero kukoye, ghoKristusi

Evangelium Mtt. 17:1-9

Marundwerero ghoyitjanga yaMateghusi

Rupara rwendi rwa twedhimine yira diyuwa.

Munyima dhomayuwa kwoko nodyofotji, gha shimbire Jesusi haPetrusi naJakobusi naminendi Johannesi kudirundu dyodire, no ha ka karireko pithawo. Ko gha ka thitunukerire kuthitunu meho thawo. Rupara rwendi rwa rwedhimine yira diyuwa. No yivata yendi, ya kenaghanine yira thishe. Kapupi ko kuhokoka kukwawo Mosesi naEliya no ha ghambaghurire naJesus.

Petrusi ha ningi kwaJesusi eshi: “Fumu, kuwa kuno tudi. Ngeshi ghuna haka, ho ni tende kuno yishashara yihatu: thofotji ne thoye, thofotji thaMosesi nothofotji thaEliya.” Oku shime gha karera mukughamba, ko kuwangambwera dyumbudye dyodivuyi dyokutwedhima. Diywi ha di shwagha mudiwiru eshi: “Oyu ne Mwanange ghomuhakwa, yu na menyamenyena. Mu tegherere kukwendi.” Pakuyiyuva hakathishongero wendi, ha yapire thikuma kate kuwa pamuve. Ene Jesusi gha henyine kukwawo gha wa nyunge eshi: “Mwimane, mwa yapa.” Eyi hana kukapuka, mbadi hana kumona po karo ghumweya, shimwengwa Jesusi pithendi.

Pakushuruka kudiwiru, ha wa shingi Jesusi eshi: “Eyi muna mono mbadi ya kutongora kwaghumweya, kughutho ghokuvumbuka Mwanamunu mwawafu.”

Mañando ghaNyambi.

THIRD SUNDAY OF LENT

Shundaha ghoghutu ghomakuporero

FIRST READING

Thitoya thokutanga. Ex. 17:3-7

Mumbapira dhaExodus

Tupe meyu tunwe.

Ene hanu, ha ka fire dinota thikuma kuya, no ha tokotire kwaMosesi ghumutongwera eshi, “Nye wa tu dhirutherire muEgiptena we, eshi na ghu tu paghe kudinota, twe nawanetu no yimuna yetu?” Mosesi gho gha kandererire Nyambi eshi, “Nye sho ni tende nawanu wa? Kushamuna hana kunishamuna, no hana shana kunipagha nomawe.” Nyambi gha huthire kwaMosesi eshi, “Shwaghe mwawanu wa, ghu yende nawakamiti waIsragheli, no shimbe mutagha munyara dhoye, ghoghu wa ramburithire parware rwaNeli, no ka yende. Mone ame mbo na ka kutaterera padirundu dyaHoreb. Wa kona kupumura padiwe; no mbo ghana shwagha mo meyu, eshi ha kone kunwa hanu.” Na Mosesi gho gha tendire kemo, mumeho ghawakamiti waIsragheli. Gho ghatire dyango eshi Massa, kuninga eshi, “Kuyereka” noMeriba, kuninga eshi, “Kutokota” yoyishi hana Isragheli ha tokotire kukwendi no ha yerekire Nyambi, no ha ningire eshi, “Fumu ne pakatji ketu ghudi ndi endi mbadipo.”

Mañando ghaNyambi.

Responsorial Psalm

Dimbokatji Ps. 95:1-2.6-9

R:

Dyarero ñanyi mutegherere kudiywi dyendi: “Mwa kukuta mitjima dhenu.”

Mwiye na tu yumbaghuke kufuma dhaFumu, mu tu humwerere kudiwe, oku twana wana twe maghamweno. Mu yu yende kuKwendi noghushamberera, gho tu mu humwerere nomembo ghomatumero.

R:

Dyarero…

Mwiye na tu kuvame, tu neghedhe fumu kughutho wendi, mwiye na tu kotame, mwiye na tu tongamene kughutho waFumu ghoMuvareki wetu, Aye ne Nyambi wetu, atwe twadiko dyendi, mutanga wendi, ndjwi dhendi, edhi ghana kukorera panyara dhendi.

R:

Dyarero…

Ngeshi ngo muna haka kutegherera kudiywi dyendi dyarero! Mwa kukuta mitjima dhenu yira dhokuMeriba, no yira mudiyuwa dyokuMassa mumamboreya, oku hana ha ka ni yudhaghurire hakerekandongo wenu no kuniyereka, ngambi kenge di ha monine eyi na tendire.

SECOND READING

Thitoya thoghuwadi. Rom. 5:1-5.5-8

Mumbapira dhamupostoli Paghulusi kwawakaRoma.

Ruhakitho rwaNyambi gharutura mumitjima dhetu paMupepo ghoKupongoka ghu ghatupire.

Yoyi twa hungama mumatawero, yo twa wanena thiraro kwaNyambi paHekudyetu Jesusi Kristusi. Papendi twa wanine twe matawero no ndhira dhohoro, kate kuthiňeke thi tudi natho. Gho tuna kushamberera karo kumakurupero ghetu, kudifumanekero edi gha tu turekera Nyambi. Ene kadi yoyi pithayo keho. Atwe twshamberera karo mumaghukukutu ghetu. Yoyi twadimuka eshi: maghukukutu, gha reta ghudhughutjima. No ghudhughutjima wareta ghushemwa ghomatawero. Ghushemwa ghomatawero ne, wa reta makurupero. Makurupero kadi wakufa honyi. Yoyishi gha tapire ruhakitho rwendi paMupepo ghoKupongoka mumitjima dhetu, Mupepo yu ne yo gha tapire. Apa twa pirire ngcamu, gha fererire Kristusi hakakudhira kutawa mwa Nyambi, munako dhi dhapwire kutureka kare. Munu kadi wa kukona kutapa moyo wendi nyara-nyara. Ngambi muhunga naye, kadi kukona. Shemwa kwamunu ghomuhunga mbo ghana tjimapa kufa. Ene Nyambi gha tu neghedha ruhakitho rokukwetu, paKristusi yu gha tu fererire. Oku shime twayiharuri.

Mañando ghaNyambi.

Gospel Acclamation Jn. 4:42.15

Difumanekero kukoye, ghoKristusi, yowe Ñando dhaNyambi

Fumu, ghushemwa owe ne ghoMukomononi ghokaye; Nipe meyu ghokupara, eshi ngo mbo nidhire kufa karo dinota.

Difumanekero kukoye, ghoKristusi, yowe Ñando dhaNyambi

Evangelium. Jn.4:5-42

Marundwerero ghoyitjanga yaJohannesi

Ko kukuma kwendi mudighumbo dimweya dyaSamaria, dina dyadyo ne Sigari, pepi nothiko ethi gha tapire Jakopu kwamwanendi Josef. No dithima dyaJakopu dya karire popo, Jesusi ne gha yendire gha ka hungumane kudipimbo dyodithima, yoyishi gha twamine thikuma kuruyendo. Nako dhi ne dhamuviri dhoghukwoko noghofotji parunguro.

Heya mukamadi ghomukaSamaria gha mu ningire eshi: “Nye yokunirombera meyu we Mujuda, ame ne no mukaSamaria?” Hajuda nokamanana temba ha haka kukupakerera nawakaSamaria.

Ha mu hutha Jesusi eshi: “Ngo wa dimuka yi gha tapa Nyambi, endi ngo ghuna dimuka yu ghana kukukumbera eshi: “Ni peko twiya ni new, ngo ghuna mukumbera Ye, gha kupe meyu ghomoyo.” Mukamadi gha mu tongwerire eshi: “Hekudyange owe ne ghuna piri thivetitho nodithima ne didhungi; kupi keho sho ghu wane meyu ghomoyo? Nowe karo, mbadi wa piterera wihetu Jakopu, oyu gha tu pire dimithima di, omu nganwanga ye nawanendi noyimuna yendi?”

Jesusi gha mu huthire eshi: “Yomuhe oyu ghokunwa meyu gha mbo ghana fu karo dinota. Ene yu ghokunwa meyu gha mbo ni mu pa, mbadi mbo fa karo dinota kuroruheya. Meyu gha mbo ni mu pa, mbo ghana kara mumwendi divetu-vetu dyomeyu ghokupoposha, no kumupa moyo ghororuheya.” Ha mu hutha mukamadi eshi: “Hekudyange, ghu nip e meyu gha eshi ni dhire kufa karo dinota. No ni shwene kughurumuka karo kuno kukuveta meyu.” Jesusi gha mu tongwerire eshi: “Yende ghu kethe didhiko dyoye kuno.” Mukamadi gha mu dimbwererire eshi: “Na pira murume me.”

Jesusi gha mu tongwerire eshi: “Ghuna ghamba ghuhunga eshi: “Na pira murume me.” Yoyi pakutanga wa karire noharumr kwoko, oyu ghu di nendi ne kadi ghoye. Ghushemwa ghuna ghamba.”

Ame wamukamadi eshi: “Hekudyange, kumona na kukumona me eshi, ghomuporofeta we. Haporofeta wetu ha kanderangire kwaNyambi padirundu dino. Amwe ne mwaninga eshi, dyango dyokkukanderera Nyambi ne, muJerusalema.”

Ha mu hutha Jesusi eshi: “Mukamadi, tawe kukwange. Kwiya dhina kwiya nako edhi mbo mu dhira kukanderera kwaTate nopano padirundu temba no muJerusalema temba. Amwe muna kukanderera eyi mwadhira kudimuka, atwe tuna kukanderera eyi tuna kudimuka. Yoyishi, maghamweno gha tunda mwaWajuda. Ene dhina kwiya nako, ava, edhi dhina kara po. Edhi mbo ha kanderera hakaghushemwa Tate mwaMupepo no mughushemwa. Yoyi Tate gha hima hanu hokumukanderera kemo. Nyambi ne Mupepo, noyu ghana kumukanderera, gha mu kanderere mwaMupepo no mughushemwa.”

Ko kumuhutha mukamadi eshi: “Na dimuka eshi, kwiya ghana kwiya Mesiya, oyu sha toye karo eshi, Kristusi. Apa gha kwiya, ñanyi gha kutudimukithe yoyihe.”

Jesusi gha mu huthire eshi: “Yoyame yu, na kughamba noye.”

Kapupi kamanana, ko kwiya hakathishongero wendi, no ha tetukire eshi, aye ne kughamba ghana kughambaghura namukamadi. Ene noyofotji temba ghepurire Fumu eshi: “Nye ghuna kushana?” Ngambi eshi: “Nye ghuna kughambawera nendi?”

Mukamadi gha thighire kandimbe kendi no gha yendire kudighumbo gha ka tongwere hanu eshi: “Mwiye na mu ka mone murume, oyu ghana ni tongwera yoyiheya yin a tenda. Shemwa kadi yoKristusi ya ndi?” Hanu hashwaghire mudighumbo no ha yendire kwaJesusi.

Kambiru-mbiru, ko kunuthineneka hakathishongero wendi eshi: “Muhongi dye tango kamanana.”

Aye gha wa tongwerire eshi: “ Ame na kara noyidya yokudya, eyi mwa dhira kudimuka mwe.” Ha ghambathana hakathishongero wendi eshi: “Ngandji ghana mu retera yokudya ndi?”

Jesusi gha wa tongwerire eshi: “Yidya yange ne, kutenda mahimeno gho Yu gha ni tuma no kuyaritha yirughana yendi. Mbadi muna kuninga mwe eshi: “Shime tughonda tune ho wiye mukesho ndi? Mu mone na kumutongwera, mukapuke no mum one muthipembe eshi, mapya ne ghana hakwera kunukesho. Pañanyi-ñanyi, mukamukesho ghana kuwana ndjambi dhendi, no ghana kukongwedha mukesho kumoyo ghororuheya, eshi mukakukuna namukamukesho, ha shamberere pofotji. Yoyishi, yighamba yino: “Ghushemwa mukakukuna, no ghumweya mukakukesha.” Ame ne na mu tumine kukukongwedha mukesho oghu mwa dhira kurughana. Hamweya wo ha rughanine, amwe ne ho muna kukesha mukesho ghoyirughana yawo.”

Hengi hopawakaSamaria homudighumbo di, ha tawire kwaJesusi kughushemwa ghomañando ghamukamadi, agha gha nongononine eshi: “Ghana ni tongwera yoyiheya yin a tenda.” Apa heyire hakaSamaria kukwendi, ha mu thinenekire eshi, gha kare tango kukwawo. Naye gha ghondhire mayuwa mawadi kukwawo.

No shime hengi thikuma hatawire mumwendi kumañando ghendi, agha gha tongorire; no ha ningire kwamukamadi eshi: “mbadi tuna kutawera thikuma pamurandu ghoyithimwetwedha yoye, yoyishi twathinda tuna mu kuyuvera, no tuna dimuka shemwa eshi, aye ne yoMukomononi ghokaye.”

Mañando ghaNyambi.

FOURTH SUNDAY OF LENT

Shundaha ghoghune ghomakuporero

FIRST READING

Thitoya thokutanga 1 Sam. 16:1.6-7. 10-13

Mumbapira dhokutanga dhaSamuel

Davita ha mu wethire shi Fumu waIsragheli.

Ko kughamba Fumu kwaSamuel eshi: “Yarithe nyiha dhoye maghadhi ho yende. Ame kuna kukutuma kwaJesse muBethlehema, yowe na torora nothinda ghukare ghoFumu mukatji kawanange.” Apa ghaka kumine Samuel, gha ka wanine Eliyab eshi yofumu aye gha ghayarire eshi, “Shemwa Fumu gha mu wetha yu gha nemana kughutho wendi” ene Fumu gha tongwerire Samuel eshi, “Kengurure thishwi thendi endi mudhimba wendi ame ne na mushwena; Nyambi ne mbadi gha kengururanga thika di gha kengururanga munu; munu kukengurura thishwi ene Fumu ye ne kukengurura mutjima wamunu.” Jesse gha neghedhire hanendi kwoko nohawadi kwaSamuel, ko kughamba Samuel kwaJesse eshi, “Keho ghohanuke wa wana ndi?” Aye ko kuhutha eshi, “Poghadi yofotji ghana piri po, ghomumbiru; ghana piti ghana kaditha ndjwi.” Ko kughamba Samuel kwaJesse eshi: “Mu mutumene; mbadi sho tu hungumane tudye kate ghakahuke.” Jesse gha mu tumenine, murumeghana ghomuwa, meho ghomakenu noyiparitha yoyiwa. Ko kughamba Fumu eshi, “Wiye, muwethe, yo na torora.” Munyima, Samuel gha shimbire dinyiha dyomaghadhi ko kumuwetha oku gha nemana nohakurwendi; Mupepo waFumu wa karire mwaDavita nowatungire mumwendi kutunda mudiyuwa diya.

Mañando ghaNyambi.

Responsorial Psalm

Dimbokatji. Ps. 23.

R:

Funu ne mudithi wange, mbadiko thi na kunyanda.

Fumu ne mudithi wange, mbadiko th na kunyanda. Aye ghana ku ni turumuthitha, mumadyero ghomwengerere. Ghana ku ni twara kukakuro, oku kudi thiraro. No ghana kunipa ngcamu dhodhipya.

R:

Fumu ne..

Ghana kunitwara mumayira ghomahunga, kudikuto dyoDina dyendi.

Ngambi kun a kuyenda mughundhungi ghomakokore mbadi mbo ni yapa, yoyishi nange ghu di ghoFumu. Na kara nondjewa-ndjewa munyara dhoye.

R:

Fumu ne…

Ni hungumeke kudiyumbu, oku pakuninungurukera wa ha ni dhimba.

Ghuna kunitambura yira mugenda ghodikuto no ghuna ni yaritha noyishamberera.

R:

Fumu ne…

Ghunongo ghoye no ruhakitho roye, mbo yina kara nange mumoyo wange ghoghuhe. No mbo na kakara mundhugho dhaFumu, kate paghuhura ghomayuwa.

SECOND READING

Thitoya thoghuwadi. Ef. 5:8-14

Mumbapira dha mupostoli Paghulusi kwahakaEfesusi

Wimane mukufa naKristus yo mbo gha munekera moyo ghoye.

Pakare amwe ne mwadikokore, pashadyarero apa mudi, mwaFumu ne muna kara mwamunyenge. Mu kare yira hanu homunyenge. Mu munyenge moyatunda yoyihe yoyiwa no yoyihunga no ko wakara ghushemwa. Mu kwipure roruhe eshi, ngwa poyidi yinu yi ghamenyamenyene Fumu. No mwa rughana pofotji kwawanu yirughana yomumakokore, eyi ya dhira kureta mbuyo. Eyi ne mu yinyathe. Yoyishi, honyi thikuma kughamba kuyinu yawathururu, eyi hana kutenda mughudhindo. Ene yoyiheya yina kukara muthishwaghameho, pakuyishwayitha kumunyenge. No ngeshi thinu thina hokoka, tho thakara mumunyenge. Yo dina kuninga dimbo eshi:

“Pinduke, we ghuna rara, no wimane mukufa, naKristusi yo mbo gha munekera moyo ghoye.”

Mañando ghaNyambi.

Gospel Acclamation Jn. 8:12

Difumanekero kukoye, ghoKristusi, yowe Ñando dhaNyambi

Yame munyenge ghokaye, dyoghana kughamba Fumu. Oyu ghokunikutha mbadi mbo gha yendaghura mumakokore, ene mbo ghana wana munyenge ghokutapa moyo.

Difumanekero kukoye, ghoKristusi, yowe Ñando dhaNyambi

Evangelium Jn. 9:1- 41

Marundwerero ghoyitjanga yaJohannesi.

Mukunga naye gha yendire gha ka kuyoghe thinda, no gha ka hukire ghukenga.

Apa gha pitire Jesusi, ko kumona kwendi murume oyu gha karire mukunga kutunda kumushamurukero wendi. Hakathishongero wendi ha mwipurire eshi: “Hekudyetu, yidye gha harurire, yoyu ndi, endi hawihe nanyina?”

Jesusi gha wa huthire eshi: “Naye temba mbadi gha harurire, nawihe nanyina temba mbadi ha harurire. Ene gha kara mukunga, eshi mba mone yitenda yaNyambi mumwendi. Oku shime wa karera mutenya, tu kone kutenda yitenda yo Yu gha ni tumine. Ko kwiya ghuthiku, omu sho gha dhire kukona kurughana noyofotji temba. Oku shime mukaye Me, Yame munyenge ghokaye.”

Munyima dhokughamba kemo, ko kuthipera kwendi mate pamuve ghombe ghuma, noghuma ghu, gha ghu rambire pameho ghamurume ghomukunga, no ghaningire kukwendi eshi: “Oyu gha pwa kutuma.” Naye gha yendire gha ka kuyoghe, no ghakahukire ghukenga.

Hakamaparaghumbo nendi awa ha mu monine pakutanga eshi shamukumberedhi, ha ningire eshi: “Kadi yomurume ghokakumbera ghuhungumano yu ndi?”

Hamweya hopapawo ha ningire eshi: “Yodiye yu!” Ene hamweya ha ningire eshi: “kupitura vene ha kupitura namurume ya.”

Thinda gha huthire eshi: “Yame no.” Awo ha mwipurire eshi: “Ngepi di ghana hungama meho ghoye ne?”

Aye eshi: “Munu ghodina dyoJesusi, yo gha nombu kaghumaghana, ho ghana ka ramba pameho ghange no ghana ni ngi eshi: “Yende kuSiloghami ghu ka kuyoghe,” Name ho na yendi ni ka kuyoghe, yon a kumona!” Kupi gha di ye,” dyo hamwipurire. Aye gha wa huthire eshi: “Kadi wa kudimuka.” Munyima hanu ha twarire murume yu gha karire mukunga pakutanga kwaWafarasayi. Eyi na karire mudiyuwa dyoSabata, aoa ghombire Jesusi ghuma no gherukithire meho gha murume yu. Hafarasayi nawo ha mwipurire eshi, ngepi di ghana kono kumona.

Aye gha wa huthire eshi: “Ghuma ghana ramba pameho ghange, ho na ka kuyogha yon a kumona.” Hamweya hopaWafarasayi, ha ghambire eshi: “Munu yu ne mbadi gha tunda kwaNyambi, yoyishi mbadi gha haka Sabata.” Awo hamweya ha ghambire eshi: “Ngepi di ghokutenda thiharuri, yitetu yokemo?” Apa po gha karerire makutjakero mukatji kawo. Gho ha ghambire karo kwamukunga eshi: “Owe ne nye ghuna kuninga kukwendi? Yoyishi gha nerukitha meho ghoye.”

Ame wendi eshi: “Muporofeta.”

Hajuda mbadi ha tawire eshi, mukunga gha karire, kate hethire hawihe nanyina no ha wepure eshi: “Oyu ne yomwanenu oyu mwaninga shemwa eshi, mughukunga gha pwire kushamuruka ndi? Ngepi ghana kumona paňanyi-ňanyi?”

Hawihe nanyina ha huthire eshi: “Tuna dimuka eshi mwanetu no gha pwire kushamuruka mughukunga. Ene edi ghana kumona paňanyi-ňanyi, kadi yakudimuka twe. Noyu gha nerukitha meho ghendi, natwe temba kadi ya dimuka. Mu muwipure thinda aye ne mukuru, gha kona kughamba thinda.” Eyi ha yi ghamberire hawihe nanyina, ha yapire kwaWajuda. Yoyi haJuda ha manine kughambathana eshi, kehe yu ghokutunumeka eshi, Jesusi ne yoKristusi, gha pwa kushinga musinagoge. Yo ha ghamberire hawihe nanyina eshi: ‘Aye ne mukuru, mu mwipure thinda.”

Hajuda hethire karo paruwadi murume yu, no ha mu tongwerire eshi: “Tape dikuto kwaNyambi; atwe twa dimuka eshi murume ya ne thiharuri.” Po gha ningere eshi: “Ngambi ngo thiharuri, kadi ya dimuka me. Ene thinu thofotji na thi dimuka shemwa: na karire nomukunga, pan one kumona nakumona.”

Awo ha mwipurire eshi: “Yidye ghana tendi noye?

Ngepi dig ha nerukitha meho ghoye?” Aye gha wa huthire eshi: “Na mana kuyimutongwera pakutanga, amwe ne mbadi muna ni tegherera. Nye sho mu yi yuvere karo? Amwe ne mbadi mwa haka kukara hakathishongero wendi?”

Ko kumuhendathana kwawo no ha ningire eshi: “Owe ne ghomukathishongero wendi. Atwe, twakathishongero waMosesi. Twa dimuka eshi, Nyambi naMosesi gha ghambire, ene murume yu mbadi twa dimuka eshi kupi ku gha tunda.”

Ye, eyi ne ghuyi,” dyo gha huthire kukwawo. “Amwe ne mbadi mwa dimuka ku gha tunda, ene yo gha nerukitha meho ghange. Atwe twa dimuka eshi, Nyambi mbadi gha tegherera kwawayiharuri. Ene ngeshi yu gha yapa Nyambi no kutenda mahimeno ghendi, ghana kumuyuva Nyambi. Twa tunga ngundu mbadi twayuva eshi, ghumweya ne gherukithire meho gho yu, ha shamurukire mughukunga. Murume yu ngeshi mbadi gha tunda kwaNyambi, mbadi gha kona kutenda thinu.”

Awo ha mu hutha eshi: “Owe, shime hakushamurukera ne mumurandu, yo ghuna kwimanena eshi ghu tu honge twe ndi?” dya mu hutherire wo. Munyima ko kumutjidha kwawo.

Jesusi gha yuvire eshi, Hajuda hana mu tjidha murume yu. Apa gha mu wanine gha mwipurire eshi: “Wa tawa mwaMwanamunu ndi?” Aye gha huthire eshi: “Kumona ghuna kumumona. Yoyu ghuna kughamba nendi.” Ame wamurume eshi: “Na tawa, Fumu!” ha mu kanderera kwendi. Jesusi gha mu tongwerire eshi: “Eyi neyera Me pano pakaye, kukudimukitha hanu eshi, hakunga ne ha mone, hakakumona ne hakare hakunga.”

Hafarasayi hamweya awa ha karire nendi, ha yi yuvire no ha mu tongwerire eshi: “Atwe ne kadi twakunga!” Jesusi gha wahuthire eshi: “Ngo mwakunga, ngo mbadi mwa kara nomurandu; ene mwe kuninga muna kuninga eshi: “Kumona tuna kumona.” Yodigho,mu kare nomurandu.

Mañando ghoEvangelium.

FIFTH SUNDAY OF LENT

Shundaha ghoghukwoko ghomakuporero

FIRST READING

Thitoya thokutanga. Ez. 37:12-14

Mumbapira dhamuporofeta Ezakiel

Mbo na tura mupepo wange mumoye, no mbo ghuna para.

Fumu gha ghambire eshi: “Ame kuna kuyenda ni ka yandhurure mayendo ghenu; eyi na tamba ne kumutunditha mumayendo, mbo na mutwara kuditunga dyaIsragheli. No mbo munadimuka shi ame ne noFumu, apa mbo ni yandhurura mayendo ghenu no kumutunditha mumayendo, mwe mwaguva wange. Mbo na tura mupepo wange mumwenu, no mbo muna para, mbo na kamutungitha muditunga dyenu dyokakoghatji; ho mbo mudimuke shi ame ne, noFumu, oyu gha ghambire no yu gha tendire-dyo ghana kughamba Nyambi.

Mañando ghaNyambi.

Responsorial Psalm

Dimbokatji. Ps. 130

R:

KwaFumu kwa kara ruhakitho rorukuru no makomweneno ghendi ne gha ghushemwa.

Mughudhungi na kudira kukoye, ghoFumu, ni tegherere Hekudyange, yuve kudiywi dyomaghamweno ghange.

R:

KwaFumu……

Ngeshi ngo kenge kumaharwero ghetu ghoFumu, ngo dye sho gha pare shime? Ene kukoye kwa kara mathigherero yo ha kukareranga roruhe.

R:

KwaFumu…

Ame na kurupera mwaFumu, no makurupero ghange, gha kara paPendi, name kutaterera na kutaterera marikanyithero ghoñando dhendi. Ame, Fumu na kutaterera, kupiterera mukungi ghomurughura, nawakungi hopamathikuthiku.

R:

KwaFumu……

GhoIsragheli, taterere paFumu, yoyishi kwaFumu, kwa kara ruhakitho rorukuru, no makomweneno ghendi ne gha ghushemwa. Aye pithendi yo mbo gha komonona Israeli, kumaharwero ghendi ghomahe.

SECOND READING

Thitoya thoghuwadi. Rom. 8:8-11

Mumbapira dhamupostoli Paghulusi kwawakaRoma.

Mupepo wendi oghu wa tumunine Jesusi mwawafu, mbo ghuna tungu mumwenu.

Awa wa rawera ghunu ghodiharwero, mbadi ha kona kutenda mahimeno ghaNyambi. Amwe mbadi wa kumurawera yikara yoyimango paghunu wenu. yopaMupepo ndani. Yoyi Mupepo waNyambi ne, mumwenu watunga. No ngeshi ghumweya ha piri Mupepo waKristusi, aye mbadi gha kundama kwaKristusi. Yoyi gha kara Kristusi mumwenu, yow a tapa Mupepo moyo kukwenu pamurandu ghoghuhunga. Ngambi kenge ha yi tungwera yirama kukufa pamurandu ghomaharwero. Yoyishi Mupepo wendi oghu wa tumine Jesusi mwawafu, mbo ghuna tungu mumwenu.no yoYu gha tumine Kristusi mwawafu, yo mbo gha tumuna yirama yenu paMupepo wendi ghu wa tunga mumwenu.

Mañando ghaNyambi.

Gospel Acclamation Jn. 11:25.26

Difumanekero no makughero kukoye, ghoKristusi

Yame muvumbukero no moyo, dyo ghana kughamba Fumu. Oyu ghokutawa muMwange, mbo ghana para ngambi hafu.

Difumanekero no makughero kukoye, ghoKristusi

Evangelium. Jn. 11:1-45

Marundwerero ghoyitjanga yaJohannesi.

Yame muvumbukero no moyo.

Murume ghodina dyoLasarusi, gha korwire. Ghakarire muBetaniya, mudighumbo dig ha tungire Maria naminendi Marta. Oyu Maria ne, yomukamadi yu gha wethire mapadhi ghaFumu nomunde, no gha kuyurire huki dhendi. Mukatjitju Lasarusi ne mukurwerndi. Hañamba wa, ha tumine ghumweya kwaJesus gha ka mu tongwere eshi: “Fumu, muhakwa ghoye ne tjitju.”

Apa gha yi yuvire Jesusi gha ningire eshi: “Yikorwa yin e mbadi yina kutamba kukufa, ne yina kuhokora ngcamu dhaNyambi, no mo sho gha pwere kufumaneka Mwana Nyambi.”

Na Jesus, gha hakkire haMarta naminendi naLasarusi. Shime gha yuvera kenge yo eshi Lasarusi ne tjitju, ha kara kwendi shime mayuwa mawadi, mudyango dyodyo gha karire. Munyima ghatongwerire hakathishongero wendi eshi: “Mu tu yende tu huke kuJudeya.”

Hakathishongero ha ningire kukwendi eshi: “Muruti, popano pashañanyi-ñanyi nga shana kukupagha Hajuda, ho ghuna kushana kuhuka ko karo?”

Ha hutha Jesusi eshi: “Nane mbadi gha kara maviri dikumi nomawadi mudiyuwa ndi? Ngeshi hayendi ghumweya pamutenyamwiru, mbadi ghana kupundaghuka, yoyishi kumona ghana kumona munyenge ghokaye kano. Ene ngeshi ha yendaghura ghumweya mughuthiku, ghana kupundaghuka, yoyi ghana piri munyenge.” Ndani ghana kuwatongwera eshi: “Muhakwa wetu Lasarusi ne ghana rara, kuyenda na kuyenda ni ka mu pindhuthe.”

Hakathishongero ha mu tongwerire eshi: “Fumu, ngeshi kurara ghana rara, ñanyi gha ka kare ndjewa-ndjewa.”

Ene Jesusi gha ghambire yoyifa yaLasarusi, awo ha ghayarire eshi, yoturo vene ghana kughamba. Ko kuyiwatuywera Jesusi eshi: “Lasarusi ne ghana fu.

Ene kuyihima yenu, na shamberera yoyishi na piri po, ndani pos ho mu kone kutawa mumwange. Ene mwiye tu yende kukwendi.”

Tomasi oyu ha toyire karo eshi: Mwanaghomayovu, gha ningire kwawakathishongero hamweya eshi: “Mu tu yende tu ka fe nendi.”

Apa gha ka kumine ko Jesusi, gha ka wanine eshi Lasarusi ne mayuwa mane ghana kara mumbira. Betaniya gha karire pepi naJerusalema, ngwa muhanyamo ghomakilimeteri mahatu. No wingi waWajuda heyire kwaMarta na Maria, na ha wa hengaghure kuyifa yamukurwawo.

Pakuyuva Marta eshi Jesusi ne ghana kumu, ko kumutjngawera. Maria, gha thigharire mundhugho. Marta gha ningire kwaJesusi eshi: “Fumu, ngo po wa karire pano, ngo mbadi gha fire mukurwange. Ene na dimuka nothinda eshi, Nyambi ghana kukupa yoyihe eyi sho mu kumbere.”

Jesusi gha mu huthire eshi: “Mukuroye ghana kuvumbuka mwawafu.”

Marta gha mu tongwerire eshi: “Na yi dimuka eshi mbo ghana vumbuka mudiyuwa dyoghuhura.”

Ha mu tongwera Jesusi eshi: “Yame muvumbukero no moyo. Oyu ghokutawa muMwange, mbo ghana para ngambi ha fu. No yomuhe ghokupara no kutawa muMwange, mbadi mbo gha fa kuroruheya. Ghuna yi tawa ndi?”

“Kemo Hekudyange” dyo gha mu huthire: “Na tawa shemwa eshi yowe Kristusi, ghoMwana Nyambi oyu gha yuka pithendi eshi mbo gheye mukaye.”

Apa gha manine kughamba yi, gha yendire gha kethe minendi Maria ghu mu hohotera eshi: “Muruti ne po gha di pano, yowe ghana kwitha.” Pakuyiyuva, ko kumatuka kwendi wangu gha yende kukwendi. Jesusi mbadi ghengenine shime mudighumbo, gha karire shime popo padyango gha mu hanganine Marta. Apa ha yi monine Hajuda wa ha karire mundhugho kwaMaria, ha mu hengaghure no ghana matuka wangu gha shwaghe, ha mu kuthire munyima dhendi yoyi ha ghayarire eshi, ghana piti kumbira gha ka dire.

Pakukuma Maria padyango dig ha karire Jesusi no pakumumona, ha ghu kwendi kumapadhi ghendi no gha ningire eshi: “Fumu, ngo po wa karire pano, ngo mbadi gha fire mukurwange.”

Pakuyimona Jesusi eshi, Maria naWajuda wa heyire nendi, kudira hana kudira, ko kuyumbuka kwendi thikuma no gha ndundumenine. Hepura kwendi eshi: “Kupi ku nga mu muvumbeka?”

Awo ha mu huthire eshi: “Fumu, wiye no mone.” Jesusi gha dirire. Hajuda ha ghambire eshi: “Mum one eshi ngepi dig ha mu hakire!”

Hamweya hopapawo ha ningire eshi: “Aye yu gherukithire meho ghamukunga ne, ngo mbadi gha konine kutenda eshi, murume no ne mbadi gha kona kufa ndi?”

Jesusi gha yumbukire karo thikuma, apa gha kumine kuthipiro. Tha karire thodikurungoma no ha yeghekire kuthero diwe. Haningi Jesusi eshi: “Mu gharumine ko diwe.”

Marta ghomina mufu gha ningire eshi: “Fumu, kare ngoro. Yoyishi din one dyodiyumbu dyoghune.”

Jesusi gha ghambire kukwendi eshi: “Mbadi na mana kuyikutongwera eshi ngeshi ghu tawe, ghuna kumona ngcamu dhaNyambi muthitunumeho ndi?”

Munyima ha tundithire diwe. Ha kapuka Jesusi kuwiru no gha ningire eshi: “Tate na kukutumera yoyi ghuna ni yuverera. Na dimuka eshi wa ni yuvereranga roruheya, eyi na kuyikumbera ne pamurandu ghombunga dhawanu edhi dhina kudhingi pano, no dhi kone kutawa eshi yowe wa ni tumine.”

Apa gha manine kughamba kemo, ko kukugherera kwendi nodiywi dyodikuru eshi: “Lasarusi, shwaghe kuno!” Mufu ne ko kushwagha. Moko ghendi nomapadhi gha pwa kudhingera nomahina ghothipiro, no mutwi wendi wa pwa kudhingera notuku. Haningi Jesusi kwawanu eshi: ‘Mu yi mu shuture gha kone kuhuka kudighumbo.”

Mañando ghoEvangelium.

HOLY WEEK A

THE PASSION OF OUR LORD JESUS CHRIST

PASSION SUNDAY (Palm Sunday)

Shundaha gho makindhu.

Thivike thokupongoka.

Evangelium.

Mtt. 21:1-11

Marundwrero ghoyitjanga yaMateghusi

Gha fumane yu ghana kwiya muDina dyaFumu!

Apa ha kumine pepi naJerusalema naBethfage, pakukokera kudirundu dyondhwe, ha tumu Jesusi hakathishongero hawadi kughutho, no kuwatongwera eshi: “Mu yende kudighumbo diya dina mu tamba, ene apa sho mu kengene mo, muna ka wana thidongo thokughangerera nothidongighana pambadi dhatho. Mu ka thi shuture, ho mu ka yirete kukwange. Ngeshi gha ka ghambe ghumweya kukwenu thinu, mu ka mu huthe eshi: “Fumu ghana kuyinyanda, ñanyi gha ka yi huthe wangu.”

Ya karire kemo eshi yighamba yamuporofeta eyi gha ningire eshi: “Tongwere mbara Siyoni eshi: Mone, Fumu ghoye kuna kwiya kukoye, aye ne ghakufupipitha no ghana dhini pathidongi, pathidongighana ne murongerero.”

Hakathishongero hawadi ha yendire, no ha ka tendire thikakenge di gha wa rawerire Jesusi. Ko ka reta kwawo thidongi nothidongighana, munyima ha yarire pakudhina yitere yawo, ko kudhina po Jesusi. Dihenda dyombunga dhodhikuru, ha yarire myaye dhawo mundhira. Hamweya ha tjorire mite dhoyitondo no kudhiyara mundhira. Hanu wa ha piterere kughutho waJesusi, nawa ha mu randire munyima, ha tangire kushogherera eshi:

“Ghusho kwaMwana Davita!

Gha fumane yu ghana kwiya muDina dyaFumu!

Ghusho mumawiru.”

Apa ghengenine Jesusi muJerusalema, ko kukukiña-kiña mbara dhodhihe. Awa ha tunga mo hepurire eshi: “Murume munye yu?”

Mbunga dha huthire eshi: “Oyu ne yomuporofeta Jesusi waNasareti muGalileya.”

Mañando ghoEvangelium.

Padimisa

FIRST READING

Thitoya thokutanga. Jes.50:4-7

Mumbapira dha muporofete Jesaya.

Mbadi na korekire rupara rwange kuyitokota, na dimuka eshi mbadi mbo ni fa honyi

Fumu ghomuraghuri gha ni tongwerire eyi sho ni ghambe, eshi ni kone kutanaritha yipara yange. Nga ni pindukanga kehe mathikuthiku eshi ni yuve eyi sho gha ni tongwere. Fumu ne gha yandhurire Matwi ghange mbadi na kanunithire no mbadi na tundire kukwendi. Na tapire mughongo wange kwawakakunipumura no na tapire matama ghange kwawakakuteta ghuhuki. No mbadi na shingire ha ka kunishwahura no kunithipera mate murupara. Yoyi Nyambi ghoFumu ne ghana kunivatera; yo na kudhira kuwana dihudhi yodigho na tenda rupara rwange yira thitina no na dimuka eshi mbadi mbo ni fa honyi.

Mañando ghaNyambi.

Responsorial Psalm

Dimbokatji. Ps 22 8-9; 17-20; 23-24

R:

Nyambi wange, Nyambi wange nye ghuna ni mwagherera kemo?

Wahe wa hana kunimona, hana kunisherera; hana kundjumbura miromo no kupungapunga mutwi ghuninga shi yi tape mwaFumu!

Gha mu ghamwene gha mu shuture: Gha mu menyamenyena sha!

R:

Nyambi wange, Nyambi wange...

Mbunga dhoyitenda yoyiyi dhina ni dhingi yira mbwa dhi dhina ni dhingi. Yishokora yange ne kukona kuyimona.

R:

Nyambi wange, Nyambi wange...

Hana kutapera yitere yange no hana pepera po fungufungu. Hekudyange, wa ni yakunuka! Wiye tambuke no ni ghamwene.

R:

Nyambi wange, Nyambi wange...

Ñanyi na kuthimwetwedhe yitenda yoye kwawapange. Amwe mwa yapa Fumu mu mu fumaneke! Hanahoka wahe haJakopu mu mu fumaneke!

SECOND READING

Thitoya thoghuwadi. Filip.2:6-11

Mumbapira dhamupostoli Paghulusi kwawakaFilipi.

Gha kumbirupitha thinda yo gha mu kutekera Nyambi

Ngambi kenge gha karire Nyambi, muyikara yaNyambi, mbadi gha thinenekire mungcamu eshi gha kare yira Nyambi. Ene ye gha kumbirupithire, munyima gha karire yira thighana mu kumona munu vene. Aye gha kumbirupithire kare kuyifa yokuthikurushe.

Pamurandu gho yi, gha mu yeyure thikuma Nyambi, no gha mu tire dina edi dya piterera mena ghomahe.

Eshi wahe ha tongamene dina dyaJesusi, homudiwiru, hopamuve, no homwishi. Kehe munu gha dimuke eshi Jesusi Kristusi ne Fumu, mu kufumaneke Nyambi Wihe.

Mañando ghaNyambi.

Gospel Acclamation Filip.2:8-9

Difumanekero no makughero kukoye, ghoKristusi

Kristusi gha karire ghutawedhi kate kukufa, yifa yokuthikurushe podigho gha mu yeywera Nyambi no gha mu pire dina dyokupiterera mena ghomahe.

Difumanekero no makughero kukoye, ghoKristusi

Evangelium Mt.26:14-27:66

Yinyanda yaFumu Jesusi Christusi kutwara mwa Mupongongi Mateghusi.

N Ko kuyenda mukathishongero yofotji ghopawashadikumi nohawadi, oyu

ha toyire eshi Judas Iskariyoti kwawapristeri hohakuru, no gha ningire

eshi,

O Yinye yi sho mu nipe, apa sho ni mu hokwere Jesusi?

N Awo ko kumuruwera kwawo, masherenyi makumi mahatu, kutunda po, gha shanine kambenene mwene ko kumuhokora Jesus. Mudiyuwa dyokutanga, dyomaghuroto ghothuthuñunyi, heyire hakathishongero kwaJesus ha mwipure eshi,

C Kupi ghuna haka ku sho tu kakuroghithere, ghu ka dyere ko makuyarekero ghoPaska?”

N Ha hutha Jesus eshi:

J Mu yende mumbara, ñanyi mu ka wane ghumweya ho mu ka mu tongwere eshi: “Muhongi ghana kuninga eshi: “Nako dhange ne pepi. Mundhugho dhoye, mo na kushana kukuyarekera nawakathishongero wange, mukuyarekero ghoPaska.”

N Hakathishongero ha tendire thika di gha wa rawerire Jesus, no ha rongathanine makuyarekero ghoPaska. Parunguro gha hungumanine Jesus mudyango dyendi kuthidyero, pofotji nawashadikumi nohawadi. Oku ye pakudya, gha ningire eshi:

J Shemwa na kumutongwera: Yofotji ghopapenu, ghana kunihokora.”

N Awo ha ndundumenine thikuma, no ha tangire kwipudhura yofotji kuyofotji eshi:

C Kadi yame Fumu?”

N Ha hutha Ye eshi:

J Yoyu ghana kuverera nange ghuroto mukaronga, yo sho gha ni hokore. Mwanamunu ghana kuyenda gha kafe, thika di ha yi mu tjangera. Ene mawe, kwamunu yu ghana kuhokora Mwanamunu. Hasha kwamunu , ngo mbadi gha pwire kushamuruka.”

N Judas ghomunyathi wendi gha ningire eshi:

O Ngwa yame, Muhongi?”

N Jesus ha hutha eshi:

J Thika di ghuna kuyighamba!”

N Oku shime hadi, ha tumbura Jesus ghuroto no kukumbera makandadhekero. Munyima gha ghu yondorire no kughutapa kwawakathishongero wendi nomañando eshi:

J Mu tumbure mudye, eyi ne yirama yange.”

N Ko kutumbura kwendi thinwitho, no pa gha manine kutumera nondapero, gha thi wa pire ghuninga eshi:

J Mu nwe mu mwahe, yoyishi agha ne manyinga ghange, manyinga ghoghundambo ghoghupya, agha mbo gha notokera hengi kate kumathigherero ghomaharwero. Na kumutongwera eshi: Kutunda pano mbadi mbo ni nwa karo vinyu, kate mudiyuwa di mbo ni nwa nenu vinyu mughufumu waTate.”

N Apa ha manine kwimba dimbo dyodifumanekero, ko kushwagha ha yende kudirundu dyondhwe. Ko kuninga Jesus kukwawo eshi:

J Mughuthiku ghuno, muna kunimwagha mwaheya. Yapwa kutjanga eshi: “Mbo na pagha mudithi,

nondjwi dhomumutanga wendi,

mbo dhina pu kuharanganya.”

Ene munyima dhomuvumbukero wange, mbo na mu piterera kuGalileya.”

N Po gha ghamberire Petrusi kukwendi eshi:

O Ngambi ngo ha kumwaghe wahe, ame nokamanana temba mbadi na kona kukumwagha.”

N Ha ningi Jesus kukwendi eshi,

J Shemwa na kukutongwera: Mughuthiku ghuno, kughutho ghokwigha ngondovoro, ghuna kunihamura paruhatu.”

N Petrusi ha ningi kukwendi eshi,

O Ngambi ngo ni fe noye, shemwa mbadi na kona kukuhamura!”

N Hakathishongero hamweya, nawo kemo ha ningire. Munyima gheyire Jesus nawakathishongero wendi, kudyango di ha tire eshi Getsemani; no gha ningire kukwawo eshi:

J Mu hungumane pano, tango ni yende ni ka raperere.”

N Ha shimbi kwendi Petrusi nawana Sebedeghusi hawadi. Ko kutanga kwendi kundundumena no kuguva no gha ningire kukwawo eshi:

J Na kasha yira ni fe. Mu kare pano nomurawo nange.”

N Ko kuhenya kamanana gha ka tongamene no kukunyumeka rupara rwendi pamuve, ghurapera eshi:

J Tate wange, ngo ghuhunga ngo ghuni kerukithe thinwitho thoyinyanda thino. Wa yi tenda thika di na kuhima me, ene kuyihima yoye keho.”

N Ko ka huka kwendi kwawakathishongero, no kuwawana hana rara, Ha ningi kwaPetrusi eshi:

J Mbadi mwa kona kurawa nange thitunde thofotji ndi? Mu rawe nomurapere, maghana sho mwingene mumayerekero. Mudhimu ne ghuna himi, yirama ne yina kasha.”

N Paruwadi gha yendire gha ka raperere eshi:

J Tate wange, ngeshi mbadi sho thi ni keruke thinwitho thoyinyanda thi, oku mbadi , yihima yoye keho!

N Eyi gha ka thighukire, kuna wa wana karo muturo, yoyishi pamurandu ghokukotha po gha remwenine meho ghawo. Ko kuwathigha karo pithawo, no gha yendire gha ka rapere paruhatu mañando ghofotji. Ndani gha ka huka kwawakathishongero no kuwatongwera eshi:

J Shime ha mu rara no kuturumutha ndi? Nako ne dhineya. Mwanamunu, kuna kumutapa munyara dhawakamaharwero. Mwimane, tu yende. Mu mone, murume yu ghana kunihokora ne pepi ghadi.”

N Mu kapupi koko oku shime ha ghamba Jesus, ko kwiya Judasi yofotji ghopawashadikumi nohawadi. Pofotji nendi, dya karire dikuta dyawanu hohengi, awa ha pwire kutuma kwawapristeri hohakuru nawamayami hodiko noyimende nomiramu. Munyathi, gha ghambire nawarume wa yothidimukitho. Gha ningire eshi:

O Oyu sho ni cumite yodiye. Mu mu kwate!”

N Ko kutamba kwendi kwaJesus ghuninga eshi:

O Ghurumere, Muhongi,

N Ha mu cumita. Ene Jesus gha ningire kukwendi eshi:

J Hewa tende thi ghu nayera kukuthitenda!”

N Ko kumupindurukera kwawo kughutho, ha mu gahukere Jesus no kumukwata. Yofotji wa wa ha karire naJesus, ko kunyenya thimende thendi gha thi pweyure. Ha yeyi kwendi mupika mupristeri shokuru no kukeshura ditwi dyendi. Ha ningi Jesus kukwendi eshi:

J Huthe thimende thoye muthirungo thatho. Yoyishi waheya wa hana kushwamuna thimende, mbana fu kuthimende. Endi ghuna kughayara eshi, ngeshi ha ni kumbera kwaTate maghamweno pañanyi-ñanyi ne, mbadi gha kona kuniroghithera tumbimba twawaengeli tokupitera dikumi notuwadi ndi? Ngeshi ngo kemo sho yi kare ne, ngo ngepi sho yi rikanye yitjanga yi ya ninga eshi, yi kone kukara pamuhingo ghu?”

N Ya karire yi, pa gha ningire Jesus kumbunga eshi:

J Eyi muna nyandera yokwiya noyimende nomiramu eshi na mu ni kwate yira noshondoro ne nye? Diyuwa nodiyuwa na hungumanine mutembeli no kuhonga hanu, ene mbadi mwa ni kwatire.

N Ene yoyiheya yi yina hokoka eshi, yi rikanye yitjanga yawaporofeta.” Ko kumuyepeka mo hakathishongero wendi wahe, no ha tjirire.

Hanu wa ha mu kwatire Jesus, ha mu twarire kwaKayifasi ghomupristeri shokuru, oku ha kukongawedherire hakamarukwaro nawamayami. Petrusi gha mu kutha-kuthire kokayenda, kate gha kengenine mumarombe ghamupristeri shokuru. Hengena gha ka hungumane kwawakakukunga, pakukengerera edi sho yi yende. Hapristeri hohakuru nondhango dhodhihe, ha yerekire kushana ghushupi ghombango kwaJesus eshi ha kone kumupagha. Hengi hashupi hombango wa heyire kughutho, ene nokamanana temba thi ha konine kuwana mumwendi. Kambiru-mbiru ko kupita karo kughutho hawadi ghuninga eshi:

O Murume yu gha ningire eshi: “Na kona kudhingununa dhi tembeli dhaNyambi, no kudhitendurura mumayuwa mahatu.

N Ko kwimana mupristeri shokuru gha mwipure eshi:

O Mbadi ghuna kukumburura nokamanana temba ndi? Ngepi yoyinongonona yi hana kukuretera wa hanu?

N Ene Jesus ne kupira noñumbu. Mupristeri shokuru gha ningire kwendi eshi:

O Na kuwedherera kwaNyambi ghomuyumi ghu kone kututongwera eshi: Yowe Kristus ghoMwana Nyambi ndi?”

N Jesus gha huthire eshi:

J Thika di ghuna yi ghamba. Karo na kumutongwera eshi: Kutunda pano mbo muna mono Mwanamunu oku ghana hungumana kurudyo rwaMukangcamu dhodhihe, no mbo muna mumono apa mbo gheya mumayuwa ghodiwiru.”

N Ko kupayura mupristeri shokuru yivata yendi ghuninga eshi:

O Ghana shamuna Nyambi. Nye sho tu nyandere karo hashupi? Muna yuvu ñanyi-ñanyi mañando ghodishamu dyokwaNyambi. Yinye muna kughayara pañanyi-ñanyi mwe?”

N Awo ha hutha eshi:

C Gha wane kufa!”

N Ko kumuthipera kwawo mate murupara no kumupumura nodikonye; Hamweya ha mu ngcamburire no ha ningire eshi:

C Owe ne yowe muporofeta, Kristus! Tu tongwere eshi, dye ghana kupumura?”

N Petrusi gha hungumanine muditete panunda, apa gheyire mukamadighana ghomukareri kukwendi ghuninga eshi:

O Nowe karo wa karire naJesus ghoMukagalileya.

N Ene ye gha hamurire kughutho wawahe eshi:

O Mbadi na dimuka eyi ghuna kughamba we.”

N Ko kuyenda kwendi kudikorogho dyoditete. Ha ka mu mona karo mukadhi kareri ghumweya no gha ningire kwa wa hemanine po eshi:

O Murume yu, gha karire naye naJesus ghoMukanasareti.”

N Petrusi gha hamurire karo wedha eshi:,

O Mbadi na mu dimuka murume yu me!”

N Kapupi kamanana, ko kwiya kwaPetrusi harume wa hemanine po ghuninga eshi:

C Yashemwa, nowe karo ghowawo. Munu ne kukona kuyiyuva kurughambithitho roye.”

N Ko kutanga kwendi kutukadhana no kwedha eshi:

O Ava me, mbadi na mu dimuka murume yu!”

N Ghufupi podigho popo, ko kwigha ngondovoro. Ko kuvuruka Petrusi eyi gha ningire Jesus eshi: “Kughutho ghokwigha ngondovoro, ghuna kunihamura paruhatu.” Ko kushwagha kwendi panunda no gha ka dirire thikuma. Murughura pamathiku-thiku, ko kukununga hapristeri hohakuru wahe nawamayami hodiko eshi ha paghe Jesus. Ko kumughanga kwawo no ha mu twarire ha mu tape kwaPilatus, ghomuraghuri. Apa gha monine Judas ghomunyathi eshi, Jesus ne kukufa hana mu pangwera, ko kukwera kwendi. Ha hutha kwawapristeri hohakuru no kwawamayami masherenyi makumi mahatu, no kuwatongwera eshi:

O Na harura. Pakuhokora munu ghokupira murandu.”

N Ene wo ha mu huthire eshi:

C Nye sho tu tende nayo twe? Eyi yinu yoye.”

N Ko kuvukumena Judas manyinga mutembeli, no gha tjirire gha ka kumine thinda. Hapristeri hohakuru, ha torire manyinga no ha ningire eshi:

C Mbadi yapwa kufundhwera eshi, tu gha pake muthikesha thoghushwi, yoyishi gha ne manyinga ghothinyinga.

N Munyima ha kuyuvire ha ghure thirwa kwamumbi ghotunyungu, no ha tende mo mambira ghawanumaghana. Yo ha thi toyera thirwa kate no dyarero eshi, thirwa thothinyinga. Kemo dha rikanyine ñando dhamuporofeta Jeremiya edhi dha ninga eshi: “Awo hana kutumbura marandi mahatu, thika di ha yi kuyuvire Hairsragheli muparo dhawo eshi, dyo sho gha pite. Awo ne ko kughaghura thirwa thamumbi ghotunyungu. Kemo dyo gha yi ni rawera Fumu.” Jesus ha mu twarire kwamuraghuri, aye ne gha mwipurire eshi:

O Yowe fumu waWajuda ndi?”

N Ha hutha Jesus eshi:

J Thika di ghuna kuyighamba.”

N Ene yokumupambeka murandu hapristeri hohakuru nawamayami, mbadi gha huthire ko. Ko kuninga Pilatus kukwendi eshi:

O Mbadi ghuna kuyuva kuyoyiheya yi hana kukurundera ndi?

N Ene Jesus, mbadi gha mu kumburire kumañando gha nokamanana temba, kate gha tetukire thikuma muraghuri. Muraghuri gha karire noyikara eshi mu kehe difeste dyoPaska, kuwashutwera hanu mukadorongo yofotji kumahimeno ghawo. Munako dhi, gha karire mudorongo yu gha pupanine ghodina dyoJesus Barabasi. Apa ha pongire hanu pofotji, ha wepura Pilatus eshi:

O Yidye yu muna haka oyu sho ni mu shutwere: Jesus Barabasi ndi, endi Jesus yu ha toya eshi Kristus?”

N Eyi ghana kuhungumana Pilatus mudipuna dyondhango, ko kumutumena mbudhi mukamadi wendi eshi:

O Perere poye eshi, ghu tende thinu namunu yu ghokupira murandu. Yoyi mughuthiku ghodyarero ne na mu rotera yirota yoyimango.”

N Munyima popo hapristeri hohakuru nawamayami, ko kuyundhaghura mbunga eshi ha shuture Barabasi no ha paghe Jesusi. Muraghuri ko kuwepura eshi:

O Yidye yu muna haka oyu sho ni mu shutwere?”

N Awo ko kuhutha eshi:

C Barabasi.

N Ha ningi Pilatus kukwawo eshi:

O Nye ne keho sho ni tende naJesus yu ha toya eshi Kristus?”

N Ko kukushomonona waheya eshi:

C Ghu mu pamarere kuthikurushe!”

N Ha wepura kwendi eshi:

O Murandu munye gha tenda?

N Ene wo pakukushomonona shime thikuma eshi:

C Ghu mu pamarere kuthikurushe!’

N Pilatus gha yi monine eshi mbadiko yi sho yi ghamwene, no maghana sho gha kare po memañanyeno. Ko kukumbera meyu no gha yoghire nyara dhendi kughutho ghombunga ghuninga eshi:

O Yame ghokukanga eshi murandu kumanyinga ghamurume yu. Mwakona kuyidimuka mwathinda.”

N Mbunga dhodhihe dha huthire eshi:

C Manyinga ghendi gheye kukwetu no kwawanetu!”

N Pilatus gha wa shutwerire Barabasi, ene Jesus ghamu tapire ha mu mwashure no ha mu pamarere kuthikurushe. Kutunda po, hamashurundate wamuraghuri ko kumutwara Jesus kudighondho dyamuraghuri, no hakayita wahe ha mu dhingire. Ko kumushutaghura yivata yendi, no ha mu kavire mwaye ghoghukihu. Munyima ha dhingire ñata dhomighunga no ha dhi mukurekire kumutwi nokatondo munyara dhorudyo rwendi. Ko kumusherera kwawo pakutongamena kughutho wendi ghuninga eshi:

C Ghurumere, fumu waWajuda!”

N Ko kumuthipera kwawo mate, no kumurambura katondo pamutwi. Apa ha manine kumusherera, ha mu shuturire mwaye no ha mu vatekire karo yivata yendi. Ndani hana kumutwara ha ka mu pamarere. Eyi hana kushwagha, ko kuwana kwawo murume ghodina dyoSimoni ghomukaSirene. Ha mu thinenekire gha mu kurekitheko Jesus thikurushe thendi. Ko kukuma kwawo kudyango di ha tire eshi Golgota, kuninga eshi dyango dyokateneghere. Ko kumupa kwawo vinyu ghokuvunga nonduru gha nwe. Ene pa gha yi yerekire, gha shwenine kuyinwa. Ndani hana kumupamarera no kukutapera yivata yendi ha tendere po fungu-fungu. Munyima ko kuhungumana ha mu kunge. Peghuru dhomutwi wendi, ha tjangire ko yokumurunderitha eshi: ‘Oyu ne Jesus, Fumu waWajuda. Pofotji nendi ha pamarerire po haringi-ringi hawadi. Yofotji kurudyo noyofotji kurumoho rwendi. Hanu wa ha pitire po, ha mu shamunine Jesus thikuma. Ha pungapungire mitwi dhawo ghuninga eshi:

C Owe ghokudhingununa tembeli no kudhitendurura mumayuwa mahatu! kughamwene ghothinda sha, ngeshi ngo ghoMwana Nyambi no ghu kwambure kuthikurushe!”

N Kemo karo nawo hapristeri hohakuru nawakamarukwaro nawamayami, dyo ha mu shererire ghuninga eshi:

C Hawo-nawo, gha ghamwenine, thinda ne kadi wa kukona kukughamwena. Aye ne fumu waIsraeli! Gha kwambure kuthikurushe, ndani natwe po sho tu tawe mumwendi. Gha tjimapire paNyambi, gha mu ghamwene ne keho Nyambi, ngeshi ngo mumwendi gha kara maghuwa ghomahe. Roruheya gha ningangire eshi: Aye ne Mwana Nyambi!”

N Pamuhingo ghogho, dyo ha mu shamunine nawo haringiringi hawadi wa ha pamarerire nendi pofotji. Kutunda mutwekatji, kwa karire dikokore muditunga dyodihe, ho ya karire kate kuthitengeyuwa. Pathitengeyuwa, ko kukugherera Jesus thikuma eshi:

J Eli, Eli lema sabagtani?”

N Kuninga eshi: “Nyambi wange, Nyambi wange, nye ghuna ni mwagherera kemo?” Hamweya wa ha karire po ha mu yuvire no ha ningire eshi:

C Eliya ghana kwitha.”

N Yofotji ghopapawo, gha dhondokire gha ka tjure ngcokwe kukatondo no gha ka tuwire muvinyu ghomasheshe, gha mu poporithe ko. Ene hamweya eshi:

C Tango, tu mone eshi ngwa ghana kwiya Eliya gha mu ghamwene.

N Munyima ko kukugherera karo Jesus thikuma, ko kufa keho.

N Kapupi popo, ko kuyatuka dikehe dyongonda dhotembeli mukatji, kutunderera kuwiru kate pamuve. Muve wa kiñine nomawe ghandadhokire. Mambira gha yandhurukire, nawakakutawa hohengi ha vumbukire mwawafu. Ha thighire yipiro no munyima dhomuvumbukero waJesusi, hengenine mumbara dhokupongoka, no ha hokokire kwawanu hohendi. Apa gha yi monine mukamiti wawakayita nawamashurundate, awa ha kungire nendi Jesus, kumakiñeno ghomuve no yoyiheya yi ya hokokire po, ha yapire thikuma no ha ningire eshi:

C Murume yu, gha karire shemwa Mwana Nyambi.”

N Pa karire karo hakamadi hohengi awa hemanine kokayenda no kukengerera. Awo ne wo ha kuthire Jesus kutunderera kuGalileya no kumukarera. Pakatji kawo, gha karire Maria Magdalena, naMaria ghonyina Jakobusi naJosef no nyina hana Sebedeghusi. Pakughomboka diyuwa, ko kwiya murume ghomutungi. Oyu ne Josef ghomukaArimateya. Naye thinda gha karire mukathishongero waJesus. Gha yendire kwaPilatus gha ka kumbere mwimba waJesusi. Pilatusi naye gha raghurire eshi ha kone kughumupa. Josef gha dhamunine mwimba no gha ghu dhingire mumahina ghomakenu. Munyima gha ghu rangekire mumbira dhodhipya, edhi gha tjokire mumawe. Kuthero dhombira, gha gharumwenenine ko diwe dyodikuru no gha tundire po gha ka yende. Maria Magdalena naMaria ghumweya, awo po ha karire no ha hungumanine kughuhunga ghombira. Mudiyuwa dyokuranda ko munyima dhodiyuwa dyoGhukwoko, ko kwiya hapristeri hohakuru naWafarasayi kwaPilatus, ha mu tongwere eshi:

C Mukadikuto, tuna vuruka eshi apa gha karire ghuyumi ya mukambango, gha ningire eshi: “Munyima dhomayuwa mahatu, mbo na vumbuka mwawafu.” Tape ne keho marawero eshi, mbira dhi dhi kare nomakungero ghomayuwa mahatu, ngwa maghana sho heye hakathishongero wendi ha mwidhe mo no kuthimwetwedha kwawanu eshi: “Ghana vumbuka mwawafu. Munyima mbango dhoghuwadi, ngo mbo dhina kukuta thikuma kupiterera dhokutanga.”

N Pilatus gha wa huthire eshi:

O Hakungi ne wo, mu yende mu ka kunge thiwana mbira thika di mwa kona.”

N Nawo ha yendire no ha ka pakire thinongononitho, padiwe dyokuthero dhombira no kuthighara ko hakakukunga.

Short form

The Passion of our Lord Jesus Christ According to Matthew

Mat. 27:11-54

Jesusi ha mu twarire kwamuraghuri, aye ne gha mwipurire eshi:

“Yowe fumu waWajuda ndi?” ha hutha eshi: “Thika di ghuna kuyighamba.”

Ene yokumupambeka murandu hapristeri hohakuru nawamayami, mbadi gha

huthire ko.

Ko kuninga Pilatus kukwendi eshi: “Mbadi ghuna kuyuva kuyoyiheya yi hana

kukurundera ndi?”

Ene Jesus, mbadi gha mu kumbururire kumañando gha nokamanana temba, kate

gha tetukire thikuma muraghuri.

Muraghuri gha karire noyikara eshi mu kehe difeste dyopaska, kuwashutwera

hanu mukadorongo yofotji kumahimeno ghawo. Munako dhi, gha karire mudoro-

ngo yu gha pupanine ghodina dyoJesus Barabasi. Apa ha pongire hanu pofotji, ha

wepura Pilatusi eshi: “Yidye yu muna haka oyu sho ni mushutwere: Jesus

Barabasi ndi, endi Jesus yu ha toya eshi Kristus?” Yoyishi gha yi dimukire eshi

munya hana mu tapera.

Eyi ghana kuhungumana Pilatusi mudipuna dyondhango, ko kumutumena

mbudhi mukamadi wendi eshi: “Perere poye eshi, ghu tende thinu namunu yu

ghokupira murandu. Yoyi mughuthiku ghodyarero ne na mu rotera yirota

yoyimango.” Munyima popo hapristeri hohakuru nawamayami, ko kuyundhaghu-

ra mbunga eshi ha shuture Barabasi no ha paghe Jesus. Muraghuri ko kuwepura

eshi: “Yidye yu muna haka oyu sho ni mu shutwere?” Awo ko kuhutha eshi:

“Barabasi.”

Ha ningi Pilatusi kukwawo eshi: “Nye ne keho sho ni tende naJesus yu ha toya

eshi Kristus?” ko kukushomonona waheya eshi: “Ghu mu pamarere kuthikuru-

she!” Ha wepura kwendi eshi: “Murandu munye gha tenda?”

Ene wo pakukushomonona shime thikuma eshi: “Ghu mu pamarere kuthikuru-

she!”

Pilatusi gha yi monine eshi mbadiko yi sho yi ghamwene, no maghana sho gha

kare po memañanyeno. Ko kukumbera meyu no gha yoghire nyara dhendi kughu-

tho ghombunga ghuninga eshi: “ Yame ghokukanga eshi murandu kumanyinga

ghamurume yu. Mwa kona kuyikudimukera mwathinda.” Mbunga dhodhiheya

dha huthire eshi: “Manyinga ghendi gheye kukwetu no kwawanetu!”

Pilatus gha wa shutwerire Barabasi, ene Jesus ghamu tapire ha mu mwashure no

ha mu pamarere kuthikurushe.

Kutunda po, hamashurundate wamuraghuri ko kumutwara Jesus kudighondho

dyamuraghuri , no hakayita wahe ha mu dhingire. Ko kumushutaghura yivata

yendi, no ha mu kavire mwaye ghoghukihu. Munyima ha dhingire ñata dhomi-

ghunga no ha dhi mu kurekire kumutwi wendi nokatondo munyara dhorudyo

rwendi. Ko kumusherera kwawo pakutongamena kughutho wendi ghuninga eshi:

“Ghurumere, fumu waWajuda!’ Ko kumuthipera kwawo mate, no kumurambura

katondo pamutwi. Apa ha manine kumusherera, ha mu shuturire mwaye no ha

mu vatekire karo yivata yendi. Ndani hana kumutwara ha ka mu pamarere.

Eyi hana kushwagha, ko kuwana kwawo murume ghodina dyoSimoni ghomuka-

Sirene. Ha mu thinenekire gha mu kurekitheko Jesus thikurushe thendi. Ko kuku-

ma kwawo kudyango di ha tire eshi Golgota, kuninga eshi dyango dyokateneghe-

re. Ko kumupa kwawo vinyu ghokuvunga nonduru gha nwe. Ene pa gha yi yere-

kire, gha shwenine kuyinwa.

Ndani hana kumupamarera no kukutapera yivata yendi ha tendere po fungu-

fungu. Munyima ko kuhungumana ha mu kunge. Peghuru dhomutwi wendi,

ha tjangire ko yokumurunderitha eshi: “Oyu ne Jesusi, Fumu waWajuda.” Pofotji

nendi ha pamarerire po haringi-ringi hawadi. Yofotji kurudyo noyofotji kurumo-

ho rwendi. Hanu wa ha pitire po, ha mu shamunine Jesus thikuma. Ha pungapu-

ngire mitwi dhawo ghuninga eshi: “Owe ghokudhingununa tembeli no kudhite-

ndurura mumayuwa mahatu!” Kughamwene ghothinda sha, ngeshi ngo gho-

Mwana Nyambi no ghu kwambure kuthikurushe!”

Kemo karo nawo hapristeri hohakuru nawakamarukwaro nawamayami, dyo ha

mu shererire ghuninga eshi: “Hawo-nawo, gha ghamwenine, thinda ne kadi wa

kukona kukughamwena. Aye ne fumu waIsraeli!” Gha kwambure kuthikurushe,

ndani natwe po sho tu tawe mumwendi. Gha tjimapire paNyambi, gha mu gham-

wene ne keho Nyambi, ngeshi ngo mumwendi gha kara maghuwa ghomahe.

Roruheya gha ningangire eshi: “Aye ne Mwana Nyambi!” Pamuhingo ghogho,

dyo ha mu shamunine nawo haringi-ringi hawadi wa ha pamarerire nendi pofotji.

Kutunda mutwekatji, kwa karire dikokore muditunga dyodihe, ho ya karire kate

kuthitengeyuwa. Pathitengeyuwa, ko kukugherera Jesus thikuma eshi:

“Eli, Eli, lema sabagtani?” kuninga eshi: “Nyambi wange, Nyambi wange, nye

ghuna ni mwagherera kemo?” hamweya wa ha karire ha mu yuvire no ha ningire

eshi: “Elina ghana kwitha.” Yofotji ghopapawo, gha dhondokire gha ka tjure

ngcokwe kukatondo no gha ka tuwire muvinyu ghomasheshe, gha mu popori-

thire ko. Ene hamweya eshi: “Tango, tu mone ngwa ghana kwiya Eliya gha mu

ghamwene.” Munyima ko kukugherera karo Jesus thikuma, ko kufa keho.

Kapupi popo, ko kuyatuka dikehe dyongonda dhotembeli mukatji, kutunderera

kuwiru kate pamuve. Muve wa kiñine nomawe ghandadhokire. Mambira gha

yandhurukire, nawakakutawa hohengi ha vumbukire mwawafu. Ha thighire yi-

piro no munyima dhomuvumbukero waJesusi, hengenine mumbara dhokupo-

ngoka, no ha hokokire kwawanu hohengi. Apa gha yi monine mukamiti wawaka-

yita nawamashurundate, awa ha kungire nendi Jesusi, kumakiñeno ghomuve no

yoyiheya yi ya hokokire po, ha yapire thikuma no ha ningire eshi: “Murume yu,

gha karire shemwa Mwana Nyambi.”

HOLY THURSDAY: CHRISM MASS

Ghune muthivike thokupongoka.

Dimisa dyomawethero ghomaghadhi

FIRST READING

Thitoya thokutanga. Jes.61:1-3a, 6,8b-9

Mumbapira dha muporofete Jesaya.

Nyambi ne gha ni wethire no gha ni tumine nitware mbudhi dhoyishamberera kwawahepwe, no kuwapa maghadhi ghokupongoka.

Mupepo waNyambi ne nange ghu di, yoyishi Fumu gha ni wethire ni rete mbudhi dhoyishamberera kwawahepwe. Gha ni tumine mukupakerera mitjima dhawakamadovo, mu kuretera mashutwero gha hakadorongo no kuroghithera hakañotwa dhira.

Mu kwato mwaka gho yu gha menyamenyena Fumu nodiyuwa dyonyinya dyaNyambi wetu, mu kuhengaghure hakayitokota.

Mu kufundwera hakayitokota homuSiyoni eshi mbana wana mawethero ghomututwi. Ene mwe mbana mu ti haruti waFumu, kukwenu mbo hana mutoyo eshi, mwapika Nyambi! Na shwena kukara ghundambo nawashondoro hoyitenda yoyimango.

Nawakerekandongo nawo mbana wa dimuka mako nowanahoka mumako ghomahe wahe awa hana kunamona, eshi diko dyaFumu Nyambi dyokupwa kukandadheka.

Mañando ghaNyambi.

Responsorial Psalm

Dimbokatji. Ps. 89: 21-22; 25-27

R:

GhoFumu na himi kwimba ghunongo ghoye kuroruheya.

Na wanine mupika Davita oyu gha karire nange gho na mu wethire maghadhi ghoKupongoka. Hanyathi mbadi mba mukona, hakakudhira kutawa mwaNyambi mbadi mba mu witha.

R:

GhoFumu na himi...

Makurupero ghange noghunongo wange mbo yina kara nendi, no dina dyange, mbo dhina yeyuka nyiha dhendi. Aye ne yodighe yombo gha ni toya eshi: Yowe Tate Nyambi wange, diwe dyomakomweneno ghange.

R:

GhoFumu...

SECOND READING

Thitoya thoghuwadi. Ap.1;5-8

Mumbapira dha Apocalypse. (Yihokora)

Gha tu tenderire haruti nawaFumu waNyambi

Na Jesusi Kristusi mushupi ghoshemwa ghowa havumbuka mwawafu. Aye karo ne yomuraghuri ghoFumu wawakapamuve.

Jesusi Kristusi gha tu haka yo gha tu komonona nomanyinga ghendi kumaharwero ghetu pakutufera. Aye gha tu ninga eshi tu kare ghuFumu nawaPristeri, tu karere Nyambi Wihe. Difumanekero nongcamu yi kare ya Jesusi Kristusi kuroruhe nororuheya! Amen. Mu mone aye mbo gha neya mumavuyi. Waheya mbo hana mu mono nawa ha ku horeka mbana mu mono. Mako ghomahe ghopakaye mbana mudiri Amen. Ame yame Omega matangero nomahurero, dyo ghana kuninga Fumu Nyambi, Oyu gha di po noyu ghakarire po noyu mbo gheya mungcamu dhodhihe.

Mañando ghaNyambi.

Gospel Acclamation Jes. 61: 1( Luk 4:18)

Makughero kukoye, ghoKristusi, Fumu ghoghuparo ghororuheya

Yoyishi aye gha ni wetha ni yuvithe hahepwe mbudhi dhodhiwa.

Gha ni tuma eshi nitongwere hakañotwa mashutwero, no ni monithe hakunga ho ni pake mundjewa-ndjewa hakakutokota.

Makughero kukoye, ghoKristusi, Fumu ghoghuparo ghororuheya

Evangelium. Luk. 14:16-21

Marundwerero ghoyitjanga yaLukasi.

Mupepo waFumu papange ghudi.

Ha ka kuma karo kwendi munasareti, omu gha kurerire, no thika di wakarire muhingo wendi, gha yendire mudiyuwa dyoSabata kuSinagoge. Pakwimana gha toye yoyitjanga, ko kumupa kwawo rukwaro rokupeta rwamuporofete Jesaya. Ha ruyandhurura no gha wanine pa ha tjanga eshi: Mupepo waFumu papange ghu di yoyishi aye gha ni wetha ni yuvithe hahepwe mbudhi dhodhiwa.

Gha ni tuma eshi ni tongwere hakañotwa mashutwero, no ni monithe hakunga. Pakuyuvitha mwaka ghothiñeke waFumu.

Apa gha fikire rukwaro, ko kurutapa kwendi kwamupika, munyima gha yendire gha ka hungumane. No meho ghawahe awa ha karire muSinagoge, gha nungurukire papendi. Ho gha tangire kuwatongwera eshi: Yitjanga yi muna yuvu dyarero pañanyi-ñanyi ne yina pu kurikanyitha.

Mañando ghoEvangelium.

HOLY THURSDAY

Ghune ghokupongoka.

Evening Mass of the Lord’s Supper

Thitoya thothivaka thoPaska.

FIRST READING

Thitoya thokutanga. Ex.12:1-8, 11-14

Mumbapira dha Exodusi. (Mashwaghero)

Fumu gha ghambire kwaMosesi naAroni eshi: Kaghonda ka ne ka mu karera koghokutanga; mumwaka. Mutongwere mbunga dhodhihe dhaIragheli ghuninga eshi: Mumayuwa dikumi ghokaghonda kano, ha kona kutumbura kehe yu ndjwi mudiko dyawo, ndjwighana ghopadidhiko dyawo.

Ene ngeshi didhiko dimbiru kundjwi yu, ha kone kwitherako mundambo ghodiparaghumbo nawo ha kutapere mu kutwara muyipo ghondjwi yu. Mwa kona kushana ndjwi ghondjewa-ndjewa, ene thikare thikungweghana thomwaka ghofotji.

Mwa kushimbe ndjwi ngambi ñombo. Mwa kona kuyitureka kate mumayuwa dikumi nomane gho kano kaghonda, nothigongi thombunga dhodhihe dhawaKriste homuIsragheli, ha kona kuyipagha parunguro. Ha kona kushimbako manyinga no ha kona kughukunya-kunya kumbadi dhothero no pawiru mumayugho mu ha kudyera.

No ha kona kudya nyama yu mughuthiku ghofotji, oyu ha kupona pamudiro no ha kumudye noghuroto ghothuthuňunyi no ha kona kuyidya noyiterekitha yokushamberera.

Kemo dyo mwa kona kuyidya mwa kona kukuwanga mumambunda ghenu, mwa kona kuvata makuha kumapadhi ghenu, no mamburo ghenu ne munyara dhenu. Mwa kutambukithe kudya yo paska waFumu. Yoyishi ame na kuyenda muditunga dyaEgiptena ghuthiku ghoghuhe no na kapagha hambedi wahe homuditunga dyaEgiptena, hanu noyiyama. No na ka pa mahumbithero kwawanyambi hombango homuEgiptena, ame Fumu. Ene manyinga ghana kukara thidimukitho thenu mumayugho omu mu di ngeshi pa sho ni ka wane manyinga ňanyi ni ka mu piterere ene mbadiko eyi sho yi ka mwipithe apa sho ni ka mwashure hakaEgiptena. No diyuwa dino dyakona kumukarera diyuwa dyomakurupero. No mwa kona kwimba yira difeste dyokudikuto dyaFumu. Mwa kona kudimbanga mwahanahoka kuroruhe.

Mañando ghaNyambi.

Responsorial Psalm

Dimbkatji. Ps.116:12-13,15 1Kor 10:16

R:

Thinwitho thi tuna kukandatheka ne ghomakurupero nomanyinga ghaKristusi.

Nye sho ni tupwere Fumu? Kughutho wendi ghokukwange? Mbo na reta kwaFumu vinyu ghondupu, mu kumutumera mumakomweneno ghendi.

R:

Thinwitho thi…

Ngepi kuyitokota yaFumu ngeshi ha fu po mupikendi yofotji! Ame ne no mupikoye Fumu , na kukarera thika di gha kukarerire nawe. Wa ni komononine kuyifa

R:

Thinwitho thi...

Mbo na kupa ndupu dhomatumero no kukutupwera mandapero. Mbo na tapa makughero ghange kwaFumu mu kukara mudiko dyendi dyokuroruheya.

R:

Thinwitho thi…

SECOND READING

Thitoya thoghuwadi 1 Kor 11:23-26

Mumbapira dhaMupostoli Paghulusi kwawakaKorinte.

Kehe pa no mbo mu dya, mbo mu nwa, mbo muna yuvitha yifa yaFumu

Mwayendhange: Yoyishi na tamburire Fumu oyu na mu reterire namwe, eshi Fumu Jesusi mughuthiku ghu ha hetire, gha tumburire ghuroto no apa gha manine kutumera ha ghu yondora ghuninga eshi: Mu tumbure mudye yoyirama yange. Mbo mu yi tende namwe kukunivuruka. Karo kemo gha tumburire thinwitho munyima dhokudya, nomañando eshi: Thinwitho thi ne thoghundambo ghomupya, manyinga ghange mu yi tende, roruhe ngeshi oku muna kunwa mo, kate kunivuruka. Yoyishi roruhe oku muna kudya ghuroto ghu, no kunwa thinwitho thi, muna kuyivuruka yifa yaFumu kate mbo gha keye.

Mañando ghaNyambi.

Gospel Acclamation Jn. 13:34.

Makughero no difumanekero kukoye, Hekudyetu Jesusi Kristusi

Muragho ghoghupya na kumupa. Mu kuhake pofotji, thika di na mu haka me kemo sho mu kuhake namwe karo. Kemo ghana kughamba Fumu.

Makughero no difumanekero kukoye, Hekudyetu Jesusi Kristusi

Evangelium. Jn.13:1-15

Marundwerero ghoyitjanga yaJohannesi.

Aye ne gha karire kare paghuhura

Kughutho ghokuyungayungero membero ghodifeste dyoPaska, gha dimukire Jesusi eshi; dhi neya nako dhokutunda ye pano pakaye no kuhuka kwaWihe. Ghahakire hendi awa ha karire muno mukaye.

No ruhakitho rwendi gha ru horekire kate pakahero karo. Jesusi gha karire kuthidyero nawakathishongero wendi. Shatani ye kare ngeya muyighayara yaJudasi Iskariyoti, eshi gha mu hete Jesusi. Jesusi gha dimukire eshi: Wihe gha tapire yoyihe munyara dhendi, no gha tunda kwaNyambi no mbo ghana huka kwaNyambi. Munyima ghamanine kuthidyero no gha shupurire mwaye wendi, ho gha tumburire mukata gha ghu kughange.

Gho gha pingwererire meyu pakaronga kokuyoghera, no gha tangire kuyogha mapadhi ghawakathishongero wendi, ho gha kuyurire mukata oghu gha kughangire. Pakukuma kwaSimoni Petrusi, hepura Petrusi kukwendi eshi; Fumu ghuna haka kuyogha mapadhi ghange ndi? Jesusi gha mu huthire eshi eyi na ku tenda mbadi sho yi tjwathane pañanyi-ñanyi ene mbo yi ghuna yi tjwathana munyima. Petrusi gha ningire kukwendi eshi: Mbo ku fere eshi kuyogha mapadhi ghange we! Po gha mu tongwerire Jesusi eshi: Ngo mbadi sho ku pakerere nange. Simon Petrusi gha ningire eshi: Fumu , kadi mapadhi keho, ene nomoko norupara rwange karo. Ha mu hutha Jesusi eshi: Oyu ghana kuyoghana gha nyanda karo shime kuyogha mapadhi ghendi, yoyishi ghana kenenena. Amwe muna keni pañanyi-ñanyi gha mu hokore. Yo gha ghamberire eshi mbadi muna kenenena mwaheya. Apa gha manine kuyogha mapadhi ghawo waheya, gha kavatire karo mwaye wendi no gha hungumanine gha wa tongwere eshi: Muna yitjwathana eyi na mu tendi ndi?

Amwe muna kunitoya eshi muhongi noFumu, ene yina muhungamena. Yoyishi yame yu. Ngeshi ngoyame Fumu wenu nomuhongi wenu, gho na yogho mapadhi ghenu, mwa kona namwe kuyoghathana mapadhi ghenu. Yoyi na mupa thitamenedhi no thika di na tendi me kukwenu, kemo dyo mbo mutenda namwe.

Mañando ghoEvangelium.

GOOD FRIDAY CELEBRATION OF THE LORD PASSION

Ghukwoko Ghokupongoka

Manyandero ghaFumu

FIRST READING

Thitoya thokutanga. Jes.52:13-53:12

Mumbapira dha muporofete Jesaya

Ha mu tjitjupithire pamaghuyi ghetu

Dimbo dyoghune dyamupika Fumu. Fumu ghana kughamba eshi: Mupikange mbo ghana kono thirughana thendi no mbo ghana yeyuka kudikuto dyodikuru.

Hanu hohengi ha tutukwire apa ha mumonine; thishwi thendi tha monekire munu. Pañanyi-ñanyi mako ghomengi ghana kumutetuka. Yidye ghana tawa koyi hana tu yuvitha? No kwadye dina hokokera dyoko dyaFumu? Gha karire mahimeno ghaNyambi eshi mwanendi gha kure yira dimbuto dyomudhi dyomumuve ghorukukutu. Mbadi gha kununekire no kukuroghitha temba, mu kuyuvitha yokukwendi. Twa mu shamunine no twa muyakunukire, gha karire munu ghokunyanda no gha fumanine muyikorwa. No yofotji temba oyu gha konine kumuyundhera mbadi twa mu thoterire gha karire yira thimango. Oyu gha shimbire yinyanda notjitju dhetu, Wahe hopapetu ha karire yira ndjwi dhokuyongara, kehe yu gha yendire ndhira dhendi thinda ene Fumu ne gha withire maghuyi ghetu ghomahe. Ha mu tjitjupithire ngambi kenge ha muyakunukire no aye mbadi gha yahukire kanwa kendi yira ndjwighana yu ghana kuyenda kudyango dyomapayero no yira ndjwi ghothipuru-puru kughutho wa wakakukurura ndjwi, mbadi gha yahukire. Ha mu twarire no ha mu pangwerire kukufa. Ha mu twarire kukufa pa maharwero ghetu. Ha ka muturire nawakamaharwero, ha mu vumbekire noghutungi, yoyi mbadi gha tendire yoyiyi noghumango mbadi wa karire mukanwa kendi. Nyambi ghana kughamba eshi: Pamahimeno ghange gha nyandire, yifa yendi ya karire muyambo ghomakomweneno. Kemo dyo mbo ha mona wa hamutundakana no mbo ghana para kuroruheya no mumwendi mbo thina kono mo thitambo thange. Munyima dhoyipara yokunyanda kwendi, mbo ghana shamberera karo mbo ghana dimuka eshi mbadi gha kunyanda karo nyara-nyara.

Mupikange ghomundambo yu na menya-menyena, muyinyanda yawanu hohengi mbo ghana wa thigherera. No kemo mbo gha tapa dyango dyodikuto dyomukatji kawamanduna no mbo ghana wana ngcamu dhokutapitha ghushwi. Pamahimeno ghendi gha tapire moyo wendi no gha yakunuthire yinyanda ya wayi. Gha tumburire dyango dyawayiharuri no gha wa rapererire eshi ha wa thigherere mirandu thawo.

Mañando ghaNyambi.

Responsorial Psalm

Dimbokatji. Ps. 31:2,6, 12-13, 15-16, 17, 25

R:

Tate, munyara dhoye na kutapa mudhimu wange.

Mumoye ghoFumu nakunda no mba na fa honyi. Ni shuture

mughunongo ghoye. Munyara dhoye na kutapa mudhimu wange.

Yowe wa ni shuturire Nyambi ghomakuporero

R. Tate, munyara dhoye...

Kehe yu gha ni vuramine ngambi kenge di na fire, ame ne yira nothinu thokumwagha. Ame na kuyuva hanyathi hohengi hana kuhohota, yitutukwa ne mumbadi dhange yi di. Awo ne hana kukuyonga yokukwange no hana kukuyonga eshi ha ni paghe

R:

Tate munyara dhoye...

Ame kehe pano na karanga mumaghamweno ghoye ni ghamwene kwawanyathi wange nawahakakunikutha-kutha. Mone mupikoye ghomunongo ni ghamwene muruhakitho roye roruheya

R:

Tate...

Ninge rupara roye rushenyene kwamupikoye ni shuture mughunongo. Mu tanare no mu tanarithe mitjima dhenu waheya wa hana kutanarera mwaFumu!

SECOND READING

Thitoya thoghuwadi. Herb. 4, 14-16, 5:7-9

Mumbapira kwawaHeburayi.

Gha tapire ghutawedhi kwahe awa ha karire ghutawedhi kukwendi gha karire murughani ghomukaruvigha rokuroruheya

Thika di ghadi Jesusi eshi Mwana Nyambi, mwayendhange: ruvedhe ru tu di namuPristeri Shokuru, tu koñotwedhe ne keho matawero ghetu, agha twa nongonona. Atwe mbadi twa kara namuPristeri ghomukuru oyu ghokupira kuthotera ghukashu wetu, yoyishi naye kwa muyerekire yira twe, ene mbadi gha tenda murandu. Tu yende keho nomutjima dhetu dhodhihe kuthipuna thoghufu thaNyambi ghothiñeke tu ka wane ñeke dhi tu ghamwene, popa tuna dhi nyandera. Mumayuwa ghoyipara yendi gha ghambire Jesusi kwaNyambi mandapero, makwambero nomakughero ghomakuru nomahodhi, eshi gha muparithe muyifa eshi gha mu yuve mughoma wendi kwaNyambi. Ngambi kenge gha karire Mwana, gha mu hongire ghutawedhi mukunyanda. Apa ghana rikanyithire yoyihe, yo gha karera mureti ghoyoyihe yawahamudimuka.

Mañando ghaNyambi

Gospel Acclamation Filip. 2:8-9

Difumanekero no makughero kukoye, ghoKristusi

Kristusi gha kumbirupithire thinda pakutambura yifa, yifa yopathikurushe podigho gha mu kutekerire Nyambi no kumupa dina dyokupiterera mene ghomahe.

Difumanekero no makughero kukoye, ghoKristusi

Evangelium. John.18:1-40

Passion of Our Lord Jesus Christ according to St. John

Manyandero gha Jesus Kristus. Thikadi ghatjangire Johanesi ghoKupongoka.

Manyandero ghaHekudyetu Jesusi Kristusi.

N. Apa gha manine kughamba Jesusi yi, kokutjinaghana muronga waKedroni. Kodya karerire dipya ho ghengenine mo Jesusi nawakathishongero wendi, Ene Judasi ghomunyathi wendi gha dimukire dyango di yoyishi rwingi gha yendangire mo Jesusi nawakathishongero wendi. Judasi gha shimbire mbunga dhawamashurundate nawakareripo mbunga dhawaPristeri hohakuru nawaFarasayi. Awo ha ka kumineko nominyenge noyitwa. Jesusi gha dimukire yoyihe eyi sho yiye kukwendi, ho gha henyine kughutho ghawepure eshi:

J Yidye muna kushana?

N Awo ha mu huthire eshi:

C Jesusi ghomukaNasareti tuna kushana.

N Ha wa hutha eshi:

J Yame no.

N Judasi ghomunyathi wendi naye ghemanine papawo. Apa gha wa tongwerire eshi: Yame no, ko kuhuka kangaranyima ha we pamuve. Ko kuwepura karo eshi:

J Yidye muna kushana?

N Awo eshi

C Jesusi ghomukaNasareti tuna kushana.

N Jesusi gha wa tongwerire eshi

J Na mana kuyimutongwera eshi yame no. Ngeshi yame muna kushana mu thighe hanu wa ha di nange ha yende.

N Kemo dyo sho dhi rikanye ňando edhi gha ghambire pakutanga eshi: Pawa wa ni pire mbadi na yongarithire po noyofotji temba.

Simon Petrusi oyu gha karire nothimende gha keshurire ditwi. Dyorudyo dyamupika muPristeri shokuru. Dina dyamupika yu ne Malkusi. Ko kuninga Jesusi kwamuPristeri eshi:

J Shwameke thimende thoye muthirungo thatho. Thinwitho thoyinyanda thi gha ni pire Tate ne, mbadi sho ni thi nwe ndi?

N Munyima mbunga dhawamashurundate namukamiti wawo, nawakareri ghomuragho wawaJuda, ha mu kwatire Jesusi no ha mu wangire. Pakutanga ha mu twarire kwaAnnasi yoyi yo gha karire hemwenya Kayifasi, oyu gha karire mumwaka muPristeri shokuru. Oyu Kayifasi yo gha tapire dighano kwaJuda eshi hasha kufera munu ghofotji diko. Simon Petrusi namukathishongero ghumweya ne hamu kuthire Jesusi. Mukathishongero yu ne gha kudimukire namuPristeri shokuru.

No ghenge nine pofotji naJesusi mumarombe ghamuPristeri shokuru. Ene Petrusi panunda gha karire kuthero. Mukathishongero yu gha kudimukire namuPristeri shokuru gha shwaghire no gha ghambire namukakukunga thero no ghengenenine Petrusi. Mukadhipika yu gha kungire thero gha ningire kwaPetrusi eshi:

O Kadi yowe ghumweya gho pawakathishngero wamurume yu ndi?

N Aye gha huthire eshi:

O Vame kadi yame.

N Mupika yu nawakareri muragho hemanine ha ka kukangure kumudiroghu ha koñererire yoyi kwa karire mepo.

Petrusi ghemanine nawo pofotji gha ka kukangure naye. Mupristeri shokuru hepudhura Jesusi, yawakathishongero wendi noyoyihonga yendi. Jesusi gha mu huthire eshi

J Muyitunumeho na yi ghambire nawanu. Na wa hongire roruhe muSinagoge nomuTembeli omu ha ku kongwedhire haJuda wahe, no mbadi nayighambire mughudhindo. Nye ghuna kunipwendhera Wipudhure wa ha yuvire yi na wa tongwerire. Awo ne ha dimuka yi na wa tongwerire.

N Apa gha yi manine Jesusi kuyighamba kemo, ko kumungcambura mupika ghumweya yu ghemanine po no gha ningire eshi:

O Kemo dyo dyo kuhutha we kwamuPristeri shokuru ndi?

N Jesusi gha mu huthire eshi

J Ngeshi ngo ghuyi na ghamba, shimurure yoghuyi. Ene ngeshi ngo ghuhunga ne nye ghuna kuningcambwera?

N Annasi gha mu tumine kwamuPristeri shokuru Kayifasi oku shime gha mu ghangera. Simon Petrusi ghemanine karo gha kakukangure.

Awo ha ningire kukwendi eshi:

O Owe ne kadi yowe ghumweya ghopawakathishongero wendi ndi?

N Aye gha hamurire no gha ningire eshi:

O Vame kadi yame!

N Yofotji ghopawapika muPristeri shokuru, ghomwapa ghoyu gha keshurire Petrusi ditwi dyendi, gha ningire kukwendi eshi:

O Mbadi na kumono nowe nendi mudipya ndi?

N Petrusi gha hamurire popo ko kwigha ngondovoro. Ko kumutunditha kwawo Jesusi kwawa Kayifasi no ha mu twarire kumarombe ghomupanguri. Oghu ne murughura pamathikuthiku. Hathinda mbadi ha konine kwingena mumarombe, maghana sho ha kare muthidhira thokupira kudya makuyarekero ghopaska. Pilatusi gha shwagherire no gha wepurire eshi:

O Murandu munye muna mwingenekera yu murume muno?

N Awo ha mu huthire eshi:

C Ngo kadi thiharuri, ngo kadi tuna mu kuretera.

N Ha ningi Pilatusi kukwawo eshi:

O Mu mu tumbure no mu ka mu pangure thika mumuragho wenu.

N Hajuda ha mu huthire eshi:

C Twapira ngcamu dhokutetera ghumweya kukufa.

N Eyi ya hokokire kemo eshi dhi rikanye ñando dhaJesusi edhi gha ningire apa gha neghire eshi yifa munye mbo gha fa. Hengena karo Pilatusi mu marombe ghendi, no ghethire Jesusi ghamwipure Jesusi eshi:

OYowe Fumu wawaJuda ndi?

N Jesusi gha muhuthire :

J Ghothinda ghuna kuyighamba yi ndi? Endi hamweya hana yi kutongwera yokukwange?

N Pilatusi gha mu huthire eshi:

O Ame ne kadi nomuJuda! Diko dyoye nohaPristeri ghoye hohakuru, wo hana kutapa kukwange. Nye wa tenda?

N Jesusi gha dimbururire eshi:

J Owe ne ghoFumu ndi?

N Ha hutha Jesusi eshi

J ghothinda ghuna kuyighamba, noFumu ame ne ni kone kunongonona yoghushemwa. Yo na pwera kushamuruka yo neyera pano pakaye. Kehe yu ghatawa kughushemwa gha tegherere kukwange.

N Pilatusi gha mwipurire eshi:

O Nye ghushemwa?

N Apa gha manine kughamba kemo karo kwawaJuda no gha wa tongwerire eshi:

O Mbadi na kuwana murandu mumwendi. Amwe ne mwa kara nomuhingo ghokumushutwera ghumweya pa kehe difeste dyopaska. Muna haka ni mu shutwere Fumu wawaJuda ndi?

N Ko kwandadhoka kwawo eshi:

C Kadi yu Barabasi ndani!

N Ene Barabasi gha karire shondoro.

Ha mutapa Pilatusi Jesusi ha mu mwashure. Hamashurundate ha thetire ñata dhomighunga, no ha dhi kurekire kumutwi wendi. Ha mu kavire mwaye ghoghukihu no handadhokire ghumuhenyena ghuninga eshi:

C Ghurumere fumu wawaJuda!

N No roruhe kengeyo pakumungcambura. Pilatusi gha shwaghire karo panunda no gha ningire kwawaJuda eshi:

O Mu mone kushwaghitha nakughumu shwaghithera, po sho mu dimuke eshi: Yame ghokukanga eshi kuwana murandu mumwendi.

N Jesusi gha shwaghire panunda noñata dhomighunga nomwaye ghoghukihu.

Ha ningi Pilatusi kukwawo eshi:

O Munu po ndi?

N Apa ha manine haPristeri hohakuru nawakareri hodhango handadhokire eshi:

C Ghu mu pamare kuthikurushe! ghu mu pamare kuthikurushe!

N Pilatusi gha ningire eshi

O Mu mu tumbure no mu mu pamare, yoyishi mbadi na kuwana murandu mumwendi.

N Hajuda ha mu tongwerire eshi:

C Atwe twa kara nomuragho wetu, nomuragho wetu gha fe vene. Yoyi ghana kutendi thinda mwana Nyambi.

N Pakuyiyuva Pilatusi gha yapire karo thikuma. Hengena karo mumarombe ghendi no ghepurire Jesusi eshi:

O Kupi wa tunda we?

N Jesusi ne mbadi gha mu huthire noňumbu temba.

Ko kuninga Pilatusi kukwendi eshi

O Mbadi ghuna kuhuka kukwange ndi? Mbadi wa dimuka eshi me ne na kara nomahimeno ghokukushutura nomahimeno ghokukupamara ndi?

N Ha mu hutha Jesusi eshi:

J Mbadi wa kara nongcamu kukwange, ngeshi mbadi ha kupa ngcamu kuwiru. Yodigho ghana ni tapa me kukoye, ghana kara nomurandu ghokupiterera thikuma.

N Kutunda po gha yendire Pilatusi eshi gha ka mu thighe, Ene haJuda hakoñotwedhire eshi:

C Ngeshi ghu mu thighe ngo kadi ghomuhakwa shokuru.

N Pakuyiyuva Pilatusi yoyiheya yi, ko kuwathigha kwendi Jesusi panunda no gha ka hungumanine padipuna dyondhango di ha tire thumbe thomawe mumataneno, muThiheburayi eshi: Gabata. Agha ne gha karire makwindukero ghopaska, no rwa karire ruvedhe roviri kwoko nodhofotji pamathikuthiku.

Ha ningi kwawaJuda eshi:

O Fumu wenu ne no!

N Awo ne hadhondokire eshi:

C Mu shwaghithe! Mu shwaghithe po! Mu pamarere.

N Pilatusi gha wepurire eshi:

O Nipamarere Fumu wenu ndi?

N Hapristeri hohakuru ha huthire eshi:

C Mbadi twa kara noFumu twe, shimengwa Fumu shokuru keho.

N Yodigho payipura yawo, ko kumuwapa eshi ha ka mupamarere.No gha shwaghire gha yende kudyango dyokatenere, thika di ha di toya muThiheburayi eshi: Golgata. Ko ha ka mu pamarerire kuthikurushe, pofotji nohanu hawonawo, Kehe yu kumutara waJesusi aye mukatji. Pilatusi gha tjangire po karo thikurutjanga pathikurushe.

Ghatjangire po eshi, ‘Jesusi ghomukaNasareti Fumu wawaJuda.’

Wingi wawaJuda ha toyire thikurutjanga thi, yoyishi dyango di ha mu pamarere Jesusi dya karire pepi nombara. Thikurutjanga tha karire muThiheburayi nomuThilatina nomuThihirika.

Hapristeri wawaJuda ha ningire kwaPilatusi eshi:

C Wa tjanga po eshi Fumu wawaJuda!

N Pilatusi gha wa huthire eshi:

O Eyi yina pu kutjanga -yina pu kutjanga.

N Apa gha manine mashurundate kumupamarera Jesusi ko kutumbura mwaye wendi ha ghu kutetawere muyipindhi yine, kwakehe yu ne thipindhi. Ha tumburire karo thitere thendi thokwishi. Atho tha pirire mukungo kuwiru kate pamuve. Ha ghambathana kwawo eshi

C twa thi payura.

Mwiye tokere po hanga eshi yidye sho gha tumbure.

N Ya karire eshi yirikanye eyi ya ninga eshi: Ha kutaperire yivata yange, nothokwishi ha pepere po wera.

Eyi ne yo ha tendire hamashurundate. Pathikurushe thaJesusi hemanine po karo Nyina namina nyina naMaria, ghomuna Kleghofasi, naMaria Magdalena. Pakumona Jesusi nyina, namukathishongero yu gha hakire thikuma ha nemana kukwendi, gha ningire kwaNyina eshi:

J Nawe mwanoye no.

N Munyima gha ningire kwamukathishongero eshi:

J Nyoko ne yo.

N Kutunda mudiyuwa di mukathishongero gha shimbire nyina kundhugho dhendi.

Munyima gha dimukire Jesusi eshi yinarikanya yoyiheya, gha ningire eshi

J Nafu dinota.

N Pakarire thitere thokuyara vinyu gho masheshe.

Hamashurundate ha tjurire ngcokwe kukatondo no ha mu turire muvinyu ghomasheshe ha mu porithe ko. Apa gha manine Jesusi kupopora vinyu ghomasheshe, gha ningire eshi:

J Yina rikanya .

N Ko kukoteka mutwi wendi no gha hurangedhire muňu wendi.

Edi diyuwa dyoghukwoko. Ene haJuda mbadi ha hakire eshi yirama yendi pathikurushe muSabata. Yoyishi Sabata ne dya karire diyuwa dyodikuru. Yo hepwerire kwaPilatusi eshi hanu wa ha namba payikurushe hapwe kutjoraghura maghuru ghawo no ha wa tundithe po.

Ko kwiya hamashurundate no ha tjoraghure maghuru ghamukakutanga, ndani ghoghuwadi oyu hambire naJesusi.

Ene pa ha henyine kwaJesusi no kumona eshi ghana fu, mbadi ha tjorire maghuru ghendi. Ghumweya ghopawamashurundate gha tuyurire matji dhendi nodighonga popo vene ko kundendesha mo manyinga nomeyu. Oyu gha yi nongononine, nomanongweneno ghendi ne ghaghushemwa.

No gha dimukire eshi ghushemwa ghana kughamba, namwe mukone kutawa. Ya karire kemo yi kone kurikanya eshi: No thishokora temba mba tjora papendi. Thitjanga thimweya thaghamba karo shi: Mbana dighamena koyu ha twire. Nomunyima dhoyinu yi, Josef ghomukaArimateya oyu gha karire mukathishongero waJesusi, ghokwawaJuda no ghepurire kwaPilatusi kushimba mwimba wa Jesusi. Pilatusi gha mu tawedhire. Josefu gha yendire no gha ka kurire mwimba wendi. Nikodemusi oyu gha yendire thikandho thimwe ghuthiku waJesusi, naye gheyire no gha shimbire munde ghokuvunga vunga nokathira nomira, ho ya karire ngwa maliteri makumi kwoko. Awo ha tumburire mwimba waJesusi no ha ghu wethire nothende gho gha dhingire nomahina, thika di thakarire thitjo thawaJuda ngeshi ku hana kuvumbeka ghumweya. Padyango di ha mu pamarerire Jesusi, pa karire dipya no dipya di ne mbira dhodhipya, edhi ha dhirire kuvumbekamo ghumweya panganyi.

Mo ha vumbekire Jesusi, nodiyuwa dyoSabata waWaJuda dya karire, mbira nadho dha karire pepi.

HOLY SATURDAY

This night is one of the Vigil for the Lord. The ceremony is arrainged in four parts.

A brief service of Light

Liturgy of the Word in which the Church recalls the wonderfull things God has done for his people.

New members of the Church are baptised and Baptism vows are renewed.

The whole Church is called to the table which the Lord prepared for his people through his death and resurrection.

THE EASTER VIGILI

DURING THE NIGHT

PART TWO: LITURGY OF THE WORD.

FIRST READING

Thitoya thokutanga. Gen.1:1-2:2

Mumbapira dho hakaGenesis

Pakutanga Nyambi gha varekire diwiru nomuve. No muve wa karire thivunganyi no nyara-nyara; no makokore gha dimbamine pakaye ko kahe. Mupepo waNyambi wa temberire peghuru dhomeyu. Ko kuninga Nyambi eshi: Kukene. ho kwa kenine. Ko kumona Nyambi eshi: thishe ne thina rogho. Nyambi ne gha tendire mayakunukero ghothishe nomakokore. No gha tire Nyambi thishe eshi diyuwa no makokore gha gha tire eshi ghuthiku.No kwa karire runguro no mathikuthiku, mu diyuwa dyo kutanga.

Nyambi gha ningire shi: Thikarepo thifikitho pakatji komeyu nomeyu no thitende mayakunuthero ghomeyu kumeyu. Kokutenda Nyambi thifikutho nomeyu ghokwishi dhothifikitho ghayakunuthire kumeyu kumeyu ghopeghuru dhothifikitho. Nyambi ghatire thifikitho shi diwiru. No rwakarire runguro nomathiku-thiku mudiyuwa dyoghuwadi kokuninga Nyambi shi: Ghapoposhe meyu ghomwishi dhodiwiru mudyango dyofotji, dhikone kutjimbuka ndundu. No yakarire kemo. Kokuta ndundu shi kaye nomapoposhero ghomeyu gha ghatire shi, dikuruvigha. Kokuyimona Nyambi shi, yinarogho. Haningi Nyambi shi: Muve ghuhokithe muhonyi no mahako no yitonda yokwima. Hayikara kemo. Kokuyowera kwagho meyu, kokuhoka mahako no kokukara yitondo nombuyo dhayo. Kokuyimona Nyambi shi, yinarogho. No rwakarire runguro no mathiku-thiku mudiyuwa dyo ghuhatu. Kokuninga Nyambi eshi ghakare mashanyi ku diwiru gha yakunuthe mutenya no ghuthiku yidimukitha yivaka yo mayuwa no myaka. Eshi yirwedhimange mu diwiru no yitape thishe pakaye. Ghoyakarire kengeno. Kokutenda kwendi Nyambi mashani mawadi ghomakuru. Dishanyi dyo dikuru dyo kurwedhima mutenya, Dyo dimbiru dyo kurwedhima ghuthiku, no nungwedhi nadho karo. No Nyambi gha yipakire kuthifikitho dhomuve no pakurwedhima ghithiku no mutenya, yiyakunuthe mutenya no ghuthiku. Gho ghayi monine Nyambi shi: Yinarogho. Norwakarire runguro no mathiku-thiku mudiyuwa dyoghune. Nyambi gha ningire shi: dhiyare thi mumeyu no yinyunyi muwiru. Kokutenda Nyambi yiyama yoyikuru yomudikuruviya noyishereka yoyiyumi yokukara meyu kumarudhi kumarudhi, no yinyunyi yomando kumarudhi kumarudhi gho ghayi monine Nyambi shi yinarogho.

Nyambi ghayikandadhekire no gha ningire shi: Yereke no yivure noyiyarithe meyu gho mudikuvigha no yinyunyi yopamuve yivure.

No rwakarire runguro nomathiku-thiku mudiyuwa dyoghukwoko.

No gha ghambire Nyambi shi: Muve ghushwayithe yingandji yoyiyumi kumarudhi kumarudhi. Yiyama no ghurondodhi ghokukokawa pamuve noyishereka yo mumuthitu kumarudhi kumarudhi. Gho ya karire kemo. No Nyambi gha tendire yishereka kumarudhi no ghurondodhi ghoghuhe ghokukokawa pamuve kumarudhi kumarudhi. No Nyambi gha yi monine shi yinarogho.

Kokuninga kwendi shi: Tutende munu po pathishwi thetu no panungu dhetu, gharawerire thi dhomudikuruviya noyinyunyi (yomuwiru no yiyama yopamuve ghoghuhe noghurondodhi ghokukokawa pamuve.

No Nyambi gha tendire munu kunungu dhendi, gha mu tendire nungu dhaNyambi murume namukamadi, no Nyambi gha wakandadhekire no gha ningire kukwawo shi: Mukare rwererko nomuvure nomuyarithe kaye, mukamune no murawere thi dhomudikuruvigha no kuyinyunyi yomuwiru noghurondodhi ghokukokawa pamuve. No Nyambi gha ghambire shi: Mone, namupa yidya eyi yakara muhonyi gho pamuve ghokureta mbuyo no yitondo yoyihe yokukara no mbuyo kumarudhi kumarudhi, yomboyi kara yidya yenu, ene kuyishereka yoyihe yopamuve noyinyunyi yomuwiru noghurondodhi gho ghuhe ghokukokawa pamuve oghu wakara mudhimu ghoghuyumi, nokuyipa muhonyi gho wiyu yoyidya yoyidya yayo. Ghoyakarire kengeyo. Kokumona Nyambi yoyihe, eyi gha tendire eshi yinarogho thikuma. No rwakarire runguro nomathiku-thiku mudiyuwa dyo ghukwoko noghofotji. Kemo yapwire diwiru nomuve noyiyenga yayo.

No Nyambi gha rikanyithire yirughana yendi mudiyuwa dyoghukwoko noghuwadi no gha turumuthire mudiyuwa dyoghukwoko no ghuwadi muyirughana yendi eyi gha tendire).

Mañando ghaNyambi.

Reponsorial Psalm

Dimbokatji. Ps. 104 or 103:1-2.5-610.12-14.24.35

R:

Tume Mupepo ghoye, ghoHekudyetu, no tendurure kaye kakare ghupya.

Shogherere Fumu ghomudhimu wange. Fumu ghoNyambi wange :Owe ghomukuru thikuma. Yowe wakara no ghufumu ghoruvigha. Yowe washupata thishe yira thivata thoye.

R:

Tume Mupepo...

Aye gha dhekire muve ghutanare ghudhire kukunyunga-nyunga kuroruheya. Owe wafikire muve yira thivata thogho. No meyu ghemanine kumituya dhomarundu.

R:

Tume Mupepo...

Aye ghaningire mavetu-vetu ghatunde mumuve noghapoposhe mumbirikatji dhomarundu. Kukwawo yatunga yinyunyi yo muwiru. Mumite yina kuyuvitha diywi dyawo.

R:

Tume Mupepo...

Aye kunakwotekitha marundu no meyu ghokushwagha muwiru no muve ghunakuyengi nombuyo dhopangcamu dhoyirughana yoye.

Ghana kumenitha muhonyi, yidya yawayishereka, noyitondo yombuyo yidya yawanu. Ghana kumenitha tumbi ghokumenitha yidya.

R:

Tume Mupepo...

Yirughana yoye yingi thikuma, ghoHekudyetu. Yoyishi mwayitendire noghunyanyami ghoghukuru. Kaye kayara noyivareka yoye. Ghukughe Nyambi ghomudhimu wange.

SECOND READING

Thitoya thoghuwadi. Gen.22: 1-18

Mumbapira dhoGenesis

Apa dha kuminemo nako, ko kumuyereka Nyambi Abrahamu. Gho gha ningire kukwendi eshi, “Abrahamu! Abrahamu!” ghatawire eshi, “Po ni di pano.”

Ko kuninga Nyambi eshi, “Tumbure mwanoye yofotji ghomuhakwa, Isaka, gho ghu yende kuditunga dyoMoriya. Ghu ka mu yambe muyambo yira ghokukoñerera, padirundu di sho ni kuneghedhe.”

Popo Abrahamu ko kuroghitha murughura, no kurongera thidongi thendi, nohapikendi hawadi, namwanendi Isaka, no ha yendire pofotji nawo. Gho gha shimbire thitungu thoyikunyi yomuyambo, ghemanine po gha yendire kuditango dig ha mu neghedhire Nyambi. Mudiyuwa dyoghuhatu, gho gha yeyurire Abrahamu meho ghendi, no gha monine dyango kayenda ne ndi di di. Ko kuninga kwendi kwawapikendi eshi, “Mu thighare pano no thidongi. Ame namwanange kuyenda tuna kuyenda kuya tu ka kanderere, ndani pos ho tu ka mu hukere.”

Abrahamu gha dhamunine yikunyi yomuyambo, no gha yi kambekire padipeghe dyamwanendi Isaka, no gha shimbire mudiro nomoko munyara dhendi. Mughuwadi wawo ko ka yenda pofotji. Ko kughamba Isaka nawihe Abrahamu eshi, “Tate.” Aye gha mu huthire eshi, “Yame no, mwanange ndi.” Naye ko kuninga eshi, “Mudiro ne ghuno no yikunyi, ene kupi gha di ndjwighana ghomuyambo?” Abrahamu gho gha huthire eshi, “Mwanange, Nyambi thinda ñanyi gha tape ndjwighana ghomuyambo ghokukoñerera.” Munyima ho ha ka yendire mughuwadi wawo pofotji. Apa ha kumine padyango dig ha mu neghedhire Nyambi, ko kuyungayungera Abrahamu thinyaku, no gha pakire po yikunyi. Munyima gho gha ghangire mwanendi Isaka, no gha mu kambekire pathikunyi peghuru dhoyikunyi. Ko kushwamuna thimende munyara dhendi eshi gha paghe mwanendi. Keho muengeli waNyambi oyu gha mwithire mudiwiru, gho gha ningire eshi, “Abrahamu! Abrahamu!” Gho gha tawire eshi, “Wa kambeka nyara pamwanoye; no wa mu tenda thinu nokamyandhumyandhu kukwendi. Yoyi pañanyi na dimuka eshi owe new a yapa Nyambi, yoyishi mbadi ghuna shweneka mwanoye ghofotji kukwange.”

Aye gha kapukire Abrahamu, ko kumona kwendi ndjwi ghomurume, oyu ghana kwaterera munyiha muthipumbu. Abrahamu, gha yendire ko gha ka shimbe ndjwi, nag ha yambe mudyango dyamwanendi. Na Abrahamu gho gha tire dyango die shi, “Ethi ne thitapa thaNyambi.” Kemo dyo hana kuninga pashadyarero eshi, “Padirundu dyaNyambi po mbo tu yi wanena.” Ko kwitha muengeli waNyambi paruwadi kwaAbrahamu kudiwiru. No gha ningire eshi, “Na ku kwedhera nothinda, dyo ghana kughamba Fumu, yoyishi ghuna tendi kwamwanoye ghopithendi oyu wa dhira kunishwenenka, eshi mbo na ku pa fiyaghudhi dhodhikuru, nawanahoka woye, mbana vuru yira nungwedhi dhokudiwiru nodiheke dyomumbambeko dhodikuruviya. Nohanahoka woye mbana yoro makorogho ghawanyathi wawo. No mbo ghana pu kukandadheka mako ghomahe ghopakaye, yoyishi ghuna tegherera kudiywi dyange.”

Mañando ghaNyambi

Responsorial Psalm

Dimbokatji. Ps.16:5.8-11

R:

Mbadiko thothiwa shimengwa kwaNyambi.

Hekudyange, yowe mukakunirera nomoyo wange. Yoyiheya yi nakutambura, kukoye yatunda. Fumu ne, kughutho wange gha kara roruhe, mbadi mbo ni pundadhoka, yoyishi nange gha kara roruheya.

R:

Mbadiko thothiwa...

Yona kushamberera nokushogherera no mbadi na ku kudhekera.

Hekudyange, wa ni tapa kukufa. Wa tawa eshi mupikoye ghomakurupero ne, ghakume mumbira .

R:

Mbadi...

Yowe ghuna kunihonga edi sho ni pare. Kukoye ne kwayara yishamberera . Eyi ghuna kutapa, yarogha roruhe.

THIRD READING

Thitoya thoghuhatu. Ex.14:15-15;1

Mumbapira dhaExodusi.

Mumayuwa gha gha ningire Nyambi kwaMosesi eshi: Nye ghuna ku ni kumberera? Tongwere hanaIsragheli eshi hafunguruke hayende.

Owe ghuyeyure mburo dhoye no ghuneghe dyoko kudikuruvigha no ghuditete pakatji eshi hana Isragheli hakone kutjinaghana pamuve ghoghukukutu. Ghumone, Ame ňanyi ni kukutithe mitjima dhawaEgiptena, eshi hakone kuwakutha, Ame na haka kuneghedha ngcamu dhange kwaFaragho no kwawakayita wendi wahe, kumatemba ghendi nawakatukambe wendi. NoEgiptena ñanyi hadimuke eshi Ame ne Nyambi, pakukuhokora ngcamu dhange kwaFaragho no kwa wakayita wendi no kwawakamatemba no hakatukambe.

No muengeli waNyambi oyu gha yendire kughutho ghombunga dhaIsragheli, ghatundire kughutho noghahukire kunyima dhawo.

Divuyi nadyo dyatundire kughutho nodyana, dimbamine munyima dhawo. Kemo divuyi dyakarire pakatji kombunga dhawaEgiptena no mbunga dhawaIsraeli. Divuyi dyakarire po makokore nodyakenithire ghuthiku, kumutara wawakaIsragheli, nodyapakire makokore kumutare wawaEgiptena, eshi ghuthiku ghoghuhe hadhire kukuwana. Munyima Mosesi ghaneghedhire dyoko dyendi kudikuruviya Nyambi gha ningire dingundunga dyodikuru ditundithe meyu ghuthiku ghoghuhe no dyakukutithire dikuruviya no meyu ghakuyakunukire pakare mupowa pakatji.

No hanaIsragheli hatjinaghanine mukatji kodikuruvigha pamuve gho ghukukutu kurudyo rwawo no kurumoho. HaEgiptena hawatjidhire ghuwakuthakutha

Tukambe totuhe twa Faragho , matemba ghendi no hakatukambe hangenine mudikuruviya.

Paruvedhe romurughura Fumu mumudiro no mudivuyi, ghangenine kwawakayita waEgiptena no ghawa tendire didhongi. No gha tendire makosho ghomatemba ghawo hapatamenemo nohawanine ghukukutu pakuyenda kughutho.

Kokughamba haEgiptena eshi: tutjire tuwa thighe haIsragheli yoyishi Nyambi kuna kuwarwera. Podigho Fumu gha ghambire kwaMosesi eshi: Ghonyonone dyoko dyoye kudikuruvigha eshi meyu ghapuke ghamanithe haEgiptena no matemba ghawo nohakatukambe wawo. Na Mosesi gha ghonyononine dyoko dyendi kudikuruviya no dikuruvigha dya mbandaghukire no meyu ghapukire mudyango dyagho, pakukya diyuwa haEgiptena hatjirire no hakuhangani ne nomeyu. Kemo gha manithire Nyambi haEgiptena no meyu mudikuruviya. Apa gha pukire meyu mudyango dyagho, ghaminithire matemba ghawo, hakatukambe waFaragho no hakayita wendi wahe wahatjinaghanine padikuruvigha no ghofotji temba ghopapawo oyu ghathigharirepo. Ene hanaIsragheli hatjinaghanine mudikuruviya pamuve gho ghukukutu.

No meyu gha karire kumbadi dhawo thikadikuma kurudyo rwagho no kurumoho. Kemo Nyambi gha shuturire mudiyuwa di haIsragheli munyara dhawaEgiptena. Haisragheli hamonine mwimba dhawaEgiptena thambodiya dhodikuruviya. Karo haIsragheli hamonine yongcamu eyi ghatendire Nyambi, no dhatawire mwaNyambi no kwaMosesi mupikendi. Podigho ghembire Moses no hanaIsragheli dimbo dyo difumanekero kwaNyambi. No dimbo edi hembire ne dino: Nahaka kwimba difumanekero kwaNyambi yoyishi mukuru thikuma. Aye ghanaminitha hakatukambe waFaragho mudikuruviya.

Mañando ghaNyambi.

Responsorial Psalm

Dimbokatji. Ex 15:1-5. 17-18

R:

Mutwimbe kudifumanekero dya Nyambi, yoyishi aye ne mukuru thikuma.

Mosesi ghembire dimbo dino kudifumanekero dya Nyambi kwawana Isragheli, no ghembire ngeno: Na haka kwimba kudifumanekero dya Nyambi, yoyishi aye ne mukuru thikuma. Tukambe nawakayita ghana yiminitha mudikuviya. Nyambi ngcamu dhange no dighumbo dyange. Aye gha kara mukakunighamwena. Aye Nyambi wange, mumwendi yakara yishamberera yange . Nyambi wa wawihetu, ghaye tuna kumukugha.

R:

Mutwimbe...

Nyambi ne mukayita, Nyambi dina dyendi.ghaye ghana minitha

matemba nohakayita waFaragho mudikuruvigha. No hakakutwetha kurwa wendi hanadhama mudikuruvigha dyodikuru.

R:

Mutwimbe...

Mangumbi ghomeyu ghana wa dheki. Hanadhama mumapenga yira mawe. Gho Hekudyetu rudyo roye rupwe kukutekera pangcamu dharo. Rudyo roye ghoNyambi, runakuthaghunyuna hañore.

R:

Mutimbe...

Owe ghuna kuwareta no kutura muditunga dyomarundu dyo yipinga yoye, dyango dyoye, ghoNyambi, edi wakuroyithera ghothinda eshi dikare dyango dyoye dyororuheya dyango dyokupongoka edi watenda gho thinda no nyara dhoye, ghoNyambi. Nyambi mbo ghana raghura kuroruhe no roruheya.

FOURTH READING

Thitoya thoghune. Jes.54:5-14

Mumbapira dha muporofete Jesaya.

Pano muvareki ghoye yoshoghakare didhiko dyoye di na dyendi ne Hekudyoye ghomunongo, mupongoki waIsragheli ne yo mushuturi ghoye. Yira mukamadi ghokuyongara no kutokota kumudhimu kemo ghana ku kwitha Nyambi, yira mukamadi ghomushengeteya mukamadi yu gha karire no di shamu kemo dyo gha ghambire Nyambi. Mbadi nakushamuna muruvedhe runo, pamurandu ghoruhakitho rushokuru ñanyi no ni kushimbe karo. Pamurandu ghoghupata yo nondekera rupara rwange kukoye.

No paruhakitho rorukuru yo na ku kufera ñeke, Dyo ghana kughamba Nyambi, ghomupongoki wenu.

Pano ni di ne kuninga yira mumayuwa gha na karire naNogha apa nedhire eshi meyu gha Nogha mbadi mbo gha rowedha karo kaye.

Pano na kwedha ghupata wange kukoye eshi mbadi mbo ni tenda ghuyi ghu na tendire karo, Ene marundu ku kuyakunuka no yi mbanda ghuru ku kunyunga-nyunga ene ruhatho rwange kukoye mbadi mbo rukuthigha no pamakuyuvero gho ruhakitho rwetu mbadi mbo rukunyunga-nyunga, dyo ghana kughamba oyu ghana ku kufera ñeke.

Mañando ghaNyambi.

Responsorial Psalm

Dimbokatji. Ps. 29:2, 4-6, 11-13

R:

Mbo na kufumaneka kuroruhe.

Nahaka kuvitha fuma dhoye ghoFumu, yoyishi yowe wani ghamwena no mbadi washambereritha hañore dhange pa pange. GhoFumu, yowe waniyokorire kwawaka mwishi, ho wa ni hutherire moyo wange, apa na tambire ku kufa. Amwe mwakarera Fumu ghutjimapa.

R:

Mbo...

mwimbere dikuto dyendi, no mu fumaneke dina dyendi dyoKupongoka! Ghu ghadhi wendi, shemwa wa kapupi kamanana, ene ghuhunga wendi, wakuroruheya. Peghundha parunguro, nomahodhi nga ni kara pamathiku-thiku ne ,kuheka nakuhe-heka karo.

R:

Mbo...

GhoFumu, tegherere no ni fere ñeke! Ni ghamwene ghoFumu! Muthidiro na karire, ene wa ni kinithire muyishamberera. Wa ni shupurire yivata yange yothidiro, no wa ni shupekire yivata yodifeste. Yodigho mbo ne mbera dikuto dyoye, no mbadi mbo ni porera. Hekudyange noNyambi wange, mbo na kufumaneka kuroruheya!

FIFTH READING Jes 55:1-11

Thitoya thoghukwoko

Mumbapira dhaMuporofeta Jesaya

Dyo ghana kughamba Nyambi shi: Mwahe mwe muna kufa dinota mwiye kumeyu! Amwe muna piri manyinga namwe mwiye, mwiye, no mutambure mavumbukiro no mu dye: Mwiye, no kuruwera temba no paro temba,mwiye na munwe vinyu no manhwe! Nye munakurughanithera manyinga ghenu kuyinu yonyara-nyara kudhira kugharughanitha kughuroto, no yitambura yenu yomumayuwa dyoyemana mukumurikanyena mu ni tegherere me no mbo muwane yinu yoyiwa eyi mbo mu dya no kushamberera.

Mwiye kukwange no mudheghetere thikuma, mutegherere, no mbo muwane yipara. Ñanyi mbo ni tendurure makuyuvero ghetu kuroruheya, mughuwa dyo na kuruperithire Davita. Thika di na mu tendire gha kare mushupi kwawanu, nomupiterithi no muraghuri gho matunga, mbo ghuna moneka kumatunga gha wa dhirire kumona, no matunga gha wa dhirire kumona mbo ghana tambukerera kukoye.

Pamurandu ghomaghuwa ghaFumu ghoye, ghomupongoki waIsragheli: oyu mbo gha kufumaneka. Shane Nyambi oku yene no kumuwana temba, mwithe oku ye ne pepi gha di. No ninge hayiharuri awa hathigha ndhira dhendi, nomurume ghothiharuri oyu ghana kughayarera no muninge ghapiruke kwaNyambi muthi ñeke, no kwaNyambi wetu, oyu ghana kutapa mathiyerero.

No yighayara yange mbadi yo yighayara yoye, no mayira ghange mbadi ghomayira ghoye Nyambi ghana kuyighamba.

Diwiru ne dire kupitakana kaye yo yina kukarera shime mayira ghange ne mare kupitakana mayira ghoye no yighayara yange ne yire kupitakana yighayara yoye. Kemo ngeshi mvura no ndaghu dhina ghu muwiru mbadi wa kuhuka oku mbadi yina vetera kaye.

No kutapa ghuyaghave ndani no ku kuritha no kutapa mbuto kwawakakukuna no kumupa ghuroto gha dye no mañando ghana kushwagha mukanwa kange mbadi wakahuka nyara-nyara kukwange no kudhira kushimba yi na shana no kawana yi namushanena

Mañando ghaNyambi.

Responsorial Psalm.

Dimbokatji. Ps.12:2-6

R:

Fumu ne ghapungura mataterero ghetu.

GhoFumu, ngo ghamwene yoyishi mbadi karo muporothi, no mbadiko munu ghomakurupero. Hanu ne kwangera hana kukwangera, no kuna kukupemukitha, payikuhongaghura yawo. Ene fumu, mbo ghana tunditha po yihongaghura yoyihe, nawayaghuyu tunwa,

R:

Fune...

Awa hana kuninga eshi:” Mumarudimi ghetu, modhakara ngcamu dhetu. Miromo dhetu, ghomaghamweno ghetu. No mbadi tuna kutongamena kwamunu.” Fumu ye ne pakuninga eshi:” hakashu ne kuna kuwapetha hahepwe ne kuna kuwatokotitha. Yo na kwingenena po name, no kutapa maghamweno koyu ghana kunyanda.”

SIXTH READING

Thitoya thoghukwoko noyofotji. Bar 3:9-15, 32-4:4

Mumbapira dha Muporofete Baruch.

Yuve, we Isragheli, kumuragho ghoyipara tegherere, no kuhonge shi nye ghana kutongora maghano pashanye we Isragheli ghuna kukarera muditunga dya wakañore dhoye, no ghuna kuruparera mumuve ghopanunda no ghuna kuyareka yoyimango nawafu.

Nowa tawa mumowa hakara nomangcamu, yoyishi washamuna ndhugho dhoyipara. Ngowa yendire mundhira dhaNyambi, ngowa parire muthiraro kuroruhe. No kuhonge eshi ngepi maghano, no kuhonge eshi ngepi di gho kukara ghunyanyami, no ngepi gho kukara nongcamu ndani no kutjwathana: Eyi wa kona karo kudimuka shi ngepi ghure ghomayuwa, no yipara, no ngepi thishe thomeho no thiraro. Yidye ghawanine oku ghatunga, yidye ghengenine mundhugho dhendi dhomapungwero? Ene yu gha dimuka yoyihe yo gha mu dimuka, washimba maghano ghendi ghomahe yo gha tenderire kaye mumaruvedhe ghomahe, ndani ghamuturire gha kare mapadhi mane.

Gha tumine thishe ghothayendire, no gha mwithire, kokumukutha no ghoma, nungwedhi ne kumoneka no ghushamberera ngeshi runakumu mo ruvedhe: Ngeshi ghana dhitha, dhina kuhutha eshi yatwe no, no dhina kumoneka kwamuvareki, yodiye yo Nyambi wetu, mbadiko gho kupituritha nendi.

Gha shimba maghano ghomahe, no ghadhikuruperithire kwamupikendi Jakopu, no kwaIsragheli yu gha hakire thikuma, yoghana mushanena na moneke pakaye no kuyendaghura pofotji na watutughuru.

Edhi ne dho mbapira dhomuragho waNyambi, muragho ghu wemanena po kuroruhe, awa hakumutungeka ho mbo ha mu thigherera kate ku kufa. Piruke munyima Jakopu, dyo ghana kughamba yende nendi omu sho thi sheghenye ne thishe. No wa tapa ghuyaghave ghodifumanekero dyoye kwawamwe, no matawero ghoye kwawanu mbadi ghoye. Pamurandu ghoghupongoki waIsragheli, eyi ghatushane ni ne Nyambi yo gha shwayithire kukwetu.

Mañando ghaNyambi.

Responsorial Psalm

Dimbokatji. Ps.19:8-11

R:

Yihokora yaFumu ne yaghushemwa

Ňando dhaFumu ne dhayara: No dha tapa moyo. Yihonga yaFumu ne yamakurupero: Ya tapa ghunyanyami, kwawa hadhira kuyitwayera. Miragho dhaFumu ne dhanegha matambo: No dha reta yishamberera.Yiraghura yaFumu, Ya kena: No ya tapa maghano.

R:

Yihokora…

Yihima yokukarera Fumu, yiwa no ya tanara kuroruhe. Ethi gha ghatura Fumu ne thihunga: No keheyu gho papawo ne muhungami. Awo ne hapiterera mangondo, ngambi ghukuru ghowingi wagho mangondo, ghuwa wagho kupiterera wiki, ngambi mere ghomuthindana.

SEVENTH READING

Thitoya thoghukwoko noghuwadi. Ez. 36:16-28

Mumbapira dhaMuporofeta Ezakigheli.

Mbo na mu tjakera no meyu ghomawa no mbo na mupa mitjima dhodhipya.”

Ñando dha Nyambi dheyire kukwange ghuninga: Owe mwana munu hakadiko dyaIsragheli apa ha tungire muditunga dyawo, hadidhirurire payikara yawo no payitenda yawo. Yitenda yawo yakarire kughutho wange yira makukoshakoshero ghoyu ghana kara kuthidhira. Podigho nawa monithire nyinya dhange pamurandu gho kunotawera manyinga muditunga dyange, nopakudishamuna nawa nyambi wagho ghombango.

Ame nawatapire kumarudhi gha gho nawo, no gha tapathanine mumatunga, no na wapangurire payikara yawo no payitenda yawo.

Apa hakumine kumatunga oku ha yendire, hakadhirurire dina dyange, dyo kupongoka pakuwa ghambera shi: Hanu wane haka diko dya Nyambi, ene Nyambi ne gha watundithire mo muditunga dyendi. Na tjitjupire kumutjima wange padishwahu edi hashamunine dina dyange dyokupongoka hakaIsragheli mumbunga dhawahayidena omu ha karire. Podigho na tongwerire haka diko dyaIsragheli eshi: Ngeno ghana kughamba Fumu Nyambi: Ame mbadi na kurughana mudina dyenu amwe mwakadiko dyaIsragheli, ene pamurandu ghodina dyange dyoKupongoka edi mwashwahurire mukatji komako omu mwakara. Ame mbona fumaneka dina dyange dyoKupongoka edi dya pwa kushwahura mukatji komako, odi mwashwahura mukatji kawo. No mako mbo ghana dimuka shi amene no Nyambi apa nakukuneghedha mumwenu kughutho wawo, eshi ame ne no mukakupongoka. Ame mbo na dimukitha mumako no kumu kongwedha mutunde mumatunga ghomahe no mbadi namutwara kuditunga dyenu. Ndani po mbo ni mu tjakera no meyu ghomawa eshi mu kone kukushuka kuyinu yodidhiro yoyihe eyi mwatendire, no mbo na mutunditha kwawaNyambi hombango. Mbo na mupa mutjima ghoghupya, no maghano ghomapya mwimi dhenu, mbo na tunditha mumwenu mutjima ghoghukukutu yira diwe, no mbo na mupa mutjima ghoghunongo. Karo mbo namupa Mupepo wange no mbo na muningi muyendaghure mumiragho dhange no mutende marawero ghange namwe mbo munatungu muditunga edi na tapire kwawakerekandongo wenu, Amwe mbo munakara mwakadiko dyange, name mbo na kara no Nyambi wenu.

Mañando ghaNyambi.

Responsorial Psalm

Dimbokatji. Ps.42:3, 5.4 2:3.4

R:

Yira yu ghana kurura kumeyu kemo nakurura kukoye we Nyambi.

Ghunu wange ghoghuhe kwaNyambi ghuna kurura, kwaNyambi ghomuyumi. Mwaka munye na kuhokoka karo kughutho waNyambi?

R:

Yira…

Ngeshi ha ni mono di ghuna ku ni runduka moyo wange, nakughayara eshi, ngepi di na korerire kumatungo ghaNyambi, ho na shwayire kughutho ghotushumba niyende kundhugho dhendi, ghushogherera no mbunga dhi dhembire difeste, dhakughire no dimbo dyodikuto

R:

Yira...

Tume thishe thoye noghushemwa ghoye eshi, oyu ghana kuniyenditha, gha ni tware kudirundu dyoye dyoKupongoka no kumatungo ghoye!

R:

Yira...

Ningeneke kuthinyaku thaNyambi, Nyambi yu na hima kushamberera no kushogherera, gho ni kone kukufumaneka no thihumba ghoNyambi, ghoNyambi wange.

( Munyima kokuranda ko.)

EPISTOLA:

Mumbapira dhaMupostoli Paghulusi kwawakaRoma Rom. 6:3-11

Endi mbadi mwadimuka shi twahe atwe hayoyera mwaJesusi Kristusi eshi hatuyogha mukufa kwendi ndi?

Twapwire kuvumbeka pofotji nendi pa diyoghero mukufa eshi thika kenge di Kristusi gha vumbukire mwawafu mughufumu ghongcamu dhaWihe. Kuninga eshi natwe karo kemo sho tukone kupara mumoyo gho ghupya.

Yoyishi twa kupakerera Nendi muyifa yendi. Shemwa dyo mbo tu kara Nendi karo pamuvumbukero wendi. Atwe twa dimuka shemwa eshi mukuru wetu, pofotji naKristusi gha mu pamarire ku thikushe. Yi kone kutunda po yikara yo maharwero. Yodigho, atwe ne kadishime twapika diharwero. Munu yu gha fire, gha shutuka ku diharwero nongacmu dha dyo. Atwe twa fire pofotji naKristusi.

Yo twa tawera eshi, mbo tuna para Nendi pofotji twa dimuka twathinda eshi, Kristusi gha vumbukire mwawafu, no mbadi mbo gha kona karo kufa kufa gha pira ngcamu kuKwendi. Aye gha fire kehe pano no roruheya kudiharwero dyo kufa. Pañanyi-ñanyi kupara ghana ku para Ye kwaNyambi. Yodigho, namwe mudimuke kemo eshi, mwafire mudiharwero. KwaNyambi ne moyo. Yoyishi mwe, pofotji na Kristusi Jesusi mudi.

Mañando ghaNyambi.

Reponsorial Psalm

Dimbokatji. Ps.117:1-2.16-17.22-23

R:

Halleluja, halleluja, halleluja!

Mumukughe Fumu mwamarudhi ghomahe, mumukughe mwamako ghomahe, yoyishi ruhakitho rwendi rokukwenu ne rwa tanara, ndhika dhaFumu dhoghushemwa ne dha pira ghuhura!

R:

Halleluja...

Fumu ne muwithi, Fumu ne ghatenda yitenda yongcamu! Ame mbadi mbo nifa, mbo na para, no mbo na nongonona yitenda yaFumu

R:

Halleluja...

Diwe di ha mwayire hashokeki, shemwa dyodina kara diwe dyo dishonga. Eyi ne, Fumu gha yi tendire, no ya karire thitetu mumeho ghetu!

R:

Halleluja...

Evangelium. Mtt. 28:1-10

Marundwerero ghoyitjanga yaMateghusi.

Munyima dhoSabata Mushundaha pakuva diyuwa, ko kuyenda Maria Magdalena naMaria ghumweya ha ka kenge kumbira. Kambiru-mbiru, ko kukara makiňeno ghomakuru ghomuve. Muengeli waFumu gha shurukire mudiwiru, no gha yendire kumbira gha gharumune ko diwe no gha hungumanine po. Mwiyero wendi, wa karire yira mwethero ghomushoro no yivata yendi ya kenaghanine yira makerekeshe. Kuwoma ghokukwendi, hakungi ha tutumine thikuma no ha karire yira hafu. Ko kuninga muengeli kwawakamadi eshi: ‘Mwa yapa. Na dimuka eshi Jesusi yu ha pamarire muna kushana. Mbadimo muno, ghana vumbuka thika kenge di gha ningire.’ Mu henye kuno na mu mone: ‘Dyango di gha rarire ne di ya.’ Mu yende wangu no mu ka tongwere hakathishongero wendi: ‘Ghana vumbuka mwawafu no ghana kumupiterera kuGalileya. Ko sho mu ka mu mone.’ Yo neyera na ni mu tongwere. Noyishamberera yoyikuru. Ko kudhondoka kwawo ha ka yi tongwere hakathishongero.

Popo vene ko kwimana Jesusi kughutho wawakamadi no kuwarumeritha. Nawo ha henyine kukwendi no kukwata mapadhi ghendi, ha mu kanderere. Jesusi ha ningi kukwawo eshi: ‘Mwa yapa. Mu yende mu ka tongwere haminange eshi ha yende kuGalileya, ko sho ha ka ni mone.’

Mañando ghoEvangelium.

EASTER SUNDAY

MASS OF THE DAY A

Dimisa muShundaha ghoPaska.

FIRST READING

Thitoya thokutanga. Yit. 10:34,37-43

Mumbapira dhoYitenda yaWapostoli.

kokuwaghambitha Petrusi eshi, mwadimuka karo eyi ya hokokire, muditunga dyaJudeya yomuhe. Ya tangerire muGalileya kuyuvitha munyima dhodiyoyero dyaJohanesi. Karo mwa dimuka yaJesusi ghomukaNasareti, eshi Nyambi gha muwethire noMupepo ghoKupongoka no gha mu pire ngcamu.

Gha yendaghurire no gha tendire kokuhe yirughana yoyikuru.

No gherukithire waheya wa ha karire mungcamu dhashatani yoyishi Nyambi nendi gha karire.

Atwe ne twatunonga ghoyoyihe, eyi ghatendire muditunga dyaWaJuda nomuJerusalema. Awo ha mu paghire no papendi ha mwambire kuthikurushe. Ene Nyambi gha mu tamburire mudiyuwa dyoghuhatu mwawafu no gha mu hokorire. Kadi kudiko dyodihe ene kukwetu twe gha tororire Nyambi eshi tu kare twashupi ghoyinu yi. Yatwe ya twashupi, twadire no kunwa nendi, munyima dhomuvumbukero wendi mwawafu. Aye ghaturawererire eshi tuyuvithe yi kwawanu no kuwatongwera eshi Nyambi ghamutororire ghakare mupanguri wawahe, wawayumi nawafu.

Papendi ha nongonona haporofeta wahe eshi, ghokutawa mumwendi, ghana kuwana mathigherero ghomaharwero mudina dyendi.

Mañando ghaNyambi.

Responsorial Psalm

Dimbokatji. Ps.118:1-2.16-17.22-23

R:

Fumu ne gha tenda yitenda yongcamu.

Mu mukughe Fumu, yoyishi aye ne munongo, no ruhakitho rwendi ne rwa pira ghuhura! Isragheli gha kona kunongonona eshi: Ruhakitho rwendi ne rwa pira ghuhura.

R:

Funu ne…

Fumu ne muwithi, Fumu ne gha tenda yitenda yongcamu. Ame mbadi mbo ni fa, mbo na para no mbo na nongonona yitenda yaFumu.

R:

Fumu ne…

Diwe di hamwayire hashokeki, shemwa dyo dina kara diwe dyodishonga. Eyi ne Fumu gha yi tendire, no gha karire thitetu mumeho ghetu!

SECOND READING

Thitoya thoghuwadi. Kol.3:1-4

Mumbapira dha mupostoli Paghulusi kwawaka Kolose

Ngeshi pofotji mwa vumbukire naKristusi, mu shane yinu yomudiwiru, oku gha kara Kristusi no gha hungumana kurudyo rwaNyambi. Mu ghayare yinu yomudiwiru, kadi yopamuve.

Yoyishi mwa fire no moyo wenu wapwa kundeka pofotji naKristus mwaNyambi. Apa mbo gha hokoka Kristusi ghomoyo wenu, namwe mbo muna hokoka pofotji nendi mughuFumu.

Mañando ghaNyambi.

Gospel Acclamation

Halleluja. 1 Kor.5:7-8

Krisyusi ne ghakarire muyambo wetu ghoPaska, mutuninge keho twimbe difeste di dyaFumu.

Halleluja

Evangelium. John. 20:1-9

Marundwerero ghoyitjanga yaJohannesi.

Murughura pamathiku mushundaha, oku shime ka karera ka vundu- vundu heya Maria Magdalena kumbira no gha wanine diwe dyokumbira dina pu kugharumuna ko. Ko kutjira kwendi kwaSimon Petrusi no kwamukathishongero oyu gha hakire thikuma Jesusi, gha ka wa tongwerire eshi hana mana kutunditha Fumu mumbira, no mbadi tuna mudimuka eshi kupi hana mu paka.

Ko kushwagha Petrusi namukathishongero ghumweya yu, ha yende kumbira. Mughuwadi wawo hadhondokire pofotji, ene mukathishongero ghumweya yu gha pitererire Petrusi mukutjiara no gha ka tangire kakuma kumbira. Apa gha kokokire mo gha mono kwendi mahina gha, ghana pundumana.

Ene mbadi hengenine mo Munyima dhendi heya Simon Petrusi aye ne hengenine mumbira no gha monine mo mahina vene, no tuku yu gha vivire Jesusi kumutwi wendi.

Tuku yu mbadi gha karire pamahina ghamweya, ne gha karire pamutara ghopithagho, oku gha pwa kupeta. Po ghengenine mumbira mukathishongero yu gha tangire kukuma kumbira, no gha tawire pakuyimona. Yoyishi mbadi ha tjwathanine yitjanga eshi, Jesusi ne gha mboghanavumbuka mwawafu.

Mañando ghaEvangelium.

THE SEASON OF EASTER

SECOND SUNDAY OF EASTER A

Shundaha ghoghuwadi ghoPaska.

FIRST READING

Thitoya thokutanga Act. 2:42-47

Mumbapira dhoYitenda yaWapostoli

Wahe wa ha tawire ha karire pofotji, no ha munine yoyiheya mumakupakerero

Ha kutapire nomitjima dhawo dhodhihe, kuyihonga yawapostoli no mumayereneno ghofotji nawakungi, no mumakupakerero ghomumakuyerekero ghokuyondora ghuroto nomumandapero.

Hapostoli ha tendire yitetukitho yoyingi no yidimukitho, no wahe yaw a yarire nothiremeko. Wahe wa ha tawire ha karire pofotji, no ha munine yoyiheya mumakupakerero. Nawo ha tokomenine kughuritha mapya ghawo no ghugavo wawo. No manyinga gha, ha kutaperire thika kenge dig ha nyanderire yomuhe. Kehe diyuwa ha tanarire mukukupakerera wahe pofotji mutembeli. Kutunda ndhugho yenda ndhugho, ha kuyarekire mughundambo. Yidya yawo ha yi dire noyishamberera mughukumbirupitha, no ghukugha Nyambi. Diko dyodihe dya wa hakire. NaNyambi gha wedherire kehe diyuwa hanu wa hapwire kughamwena, kuthivarero thombunga dhawatawi.

Mañando ghaNyambi.

Responsorial Psalm

Dimbokatji Ps. 118:2-4.13-15.22-24

R:

Mu mu kughe Fumu, yoyishi aye ne munongo, ruhakitho rwendi rwa pira ghuhura!

Hana Isragheli hanongonona eshi: “Ruhakitho rwendi ne rwapira ghuhura.” Hana Aroni hanongonona eshi: “Ruhakitho rwendi ne rwa pira ghuhura.” Hakakukarera Fumu, hanongonone nawo eshi: “Ruhakitho rwendi ne rwapira ghuhura.”

R:

Mu mu kughe…

Hañore dhange ha shanine kunithaghurura no kunipagha,

ene Fumu gha ni ghamwenine. Fumu yomatanarero ghange no ngcamu dhange. Aye ne yo gha ni parithire! Muyuve kutuyoghototo tomumatende ghawakakuwitha eshi: “Fumu ne gha tenda yitenda yongcamu,

R:

Mu mu kughe..

Diwe di ha mwaghire hashokeki, shemwa dyo dina kara diwe dyodishonga. Eyi ne, Fumu gha yi tendire, no ya karire thitetu mumeho ghetu! Edi, dyodiyuwa dig ha tendire Fumu, mu tu humwerere no tu shamberere.

SECOND READING

Thitoya thoghuwadi. 1 Pet. 1:3-9

Mumbapira dhokutanga dhaMupostoli Petrusi.

Pathiñeke thendi thothikuru, gha tu pire moyo ghoghupya pamuvumbukero waJesusi Kristusi mwawafu

KwaNyambi ghoWiha Hekudyetu Jesusi Kristusi, ko dyatunda difumanekero dyodihe. Pathiñeke thendi thothikuru, gha tu pire moyo ghoghupya pamuvumbukero waJesusi Kristusi mwawafu.

Apa no ne nomakurupero ghomayumi tudi nagho, payiyora yokudhira kupwa no yoghukushuki no yokudhira kwaña, eyi ha mu pungwera namwe karo mudiwiru. No yoyi mwa tawa, yo gha mu pungwera naye Nyambi nongcamu dhendi thiwana fiyaghudhi, edhi ha mu roghithera nuyihokoka yomudiyuwa dyoghuhura. Mushamberere mwe kuyinu yino, ngambi kenge di ghana haka Nyambi kumuyereka munako dhodhimbiru nomayerekero ghomengi. Matawero ghenu gha kara mudyo thikuma kupiterera mangondo, ghokukona kudhongonoka. Ngambi makushwero ghomangondo nagho nomudiro ha gha monanga pakutanga. No ghushemwa ghomatawero ghenu, nagho karo kukona kughayereka eshi, ghu kare nomakughero nofuma nodikuto kumwiyero waJesusi Kristusi. Aye ne mwa mu haka, ngambi kenge di mwa dhira kumumona. Pakutawa mumwendi, ngambi oku mbadi muna kumumona pashañanyi-ñanyi, kare mwayerana kuruvigha rothitambo thomatawero ghenu. Eyi no, kuyaritha muna kuyiyaritha mo noyishamberera yoyiwa yishikumburura.

Mañando ghaNyambi.

Gospel Acclamation

Halleluja Jn. 20:29

Ha mu tongwera Jesusi eshi: “Ghuna tawa keho yoyi ghuna ni mono? Hakaruvigha hakakudhira kumona, ene ha tawa.”

Halleluja!

Evangelium. Jn. 20:19-31

Marundwerero ghoyitjanga yaJohannesi.

Jesusi ghengenine, munyima dhomayuwa kwoko nomahatu

Mushundaha yu parunguro, ha kukongwedhire hakathishongero pofotji. Ngambi kenge ha yandherire yero, pamurandu ghowoma ghokwaWajuda, ghengenine Jesus no ghemanine pakatji kawo no gha ningire kukwawo eshi: “Thiraro thi kare nenu!” pakumana kughamba kemo, ko kuwaneghedha kwendi makandeke ghendi nomatji dhendi. Hakathishongero ha shambererire thikuma pakumona Fumu.

Ha wa tongwera karo eshi: “Thiraro thi kare nenu! Thika dig ha ni tumine Tate, kemo dyo na kumutuma namwe.” Munyima dhokughamba kemo, ko kuwahetherera eshi: “Mu tambure Mupepo ghoKupongoka! Ngeshi mbo mu thigherere hanu maharwero ghawo, ghana pu kuwathigherera, naNyambi temba mbadi mbo gha wa thigherera.”

Tomasi yofotji ghopawashadikumi nohawadi, oyu ha toyire karo eshi Didimusi, mbadi gha karire papawo apa gheyire Jesusi. Hakathishongero hamweya, ha mu tongwerire eshi: “Tuna mono Fumu!” Ene ye gha wa huthire eshi: “Ngeshi mbadi sho ni mone yitombo yomamboha mumakandeke ghendi, no kutjura munwe wange mu yitombo yomamboha no kwingeneka dyoko dyange muthitombo thendi thomumatji, ngo mbadi sho nit awe nokamanana temba.”

Thivike thomunyima ko kukukongwedha karo hakathishongero waJesusi pofotji, naTomasi naye po. Karo ngambi kenge ha tjaperire yero, gha kumine Jesusi no ghemanine pakatji kawo no gha ningire eshi: “Thiraro thi kare nenu!” Munyima gha ningire kwaTomasi eshi: “Rete munwe ghoye kuno, no kenge kumakandeke ghange, no rete dyoko dyoye no ghu di ngeneke mumatji dhenge. No wa tamangera shime mumatawero, ene ghu tawe!”

Tomasi gha ningire kukwendi eshi: “Hekudyange noNyambi wange!”

Ha mu tongwera Jesus eshi: “Ghuna tawa keho yoyi ghuna ni mono? Hakaruvigha hakakudhira kumona, ene ha tawa!”

Na Jesusi gha tendire shime yitetukitho yoyingi, eyi na dhira kutjanga murukwaro runo kuthitunumeho thawakathishongero wendi. Ene yitetukitho yino, hayitjanga eshi mukone kutawa eshi Jesusi ne yoKristusi, Mwana Nyambi, no pakutawa mukone kuwana moyo mudina dyendi.

Mañando ghoEvangelium.

THIRD SUNDAY OF EASTER

Shundaha ghoghuhatu ghoPaska.

FIRST READING

Thitoya thokutanga. Act. 2:14. 22-33

Mumbapira dho yitenda yaWapostoli

Ya kanganine thikuma eshi gha kare muñotwa dhokufa.

Mudiyuwa dyo Pendekoste Petrusi, ghemanine mudyango dyawapostoli dikumi noyofotji no gha yaghurire kwawanu eshi: “MwaJuda, namwe mwahe mwe mwa tunga muJerusalema. Na kumutjwathanitha eyi ya hokoka. Mutegherere koyi sho ni tongore.

MwaIsraghelite, mu teghere kumañando ghano!

Nyambi gha mu dimukithire Jesusi ghoMukanasareti, payitenda yongcamu noyitetukitho noyidimukitho, eyi gha mu tendithire Nyambi mumwenu. Eyi ne mwa yi dimuka mwathinda. Nyambi gha yi nungire no gha yi rikanyithire, kughutho pakumutapa kukwenu. Amwe ne mwa mu tapire kwawaringi-ringi, ha mu pamarere kuthikurushe no mwa mu paghire. Ene Nyambi gha mu tumunine mwawafu. No papendi thinda gha mu shuturire mutjitju dhokufa. Ya kanganine thikuma eshi gha kare muñotwa dhokufa.

Kukwendi gha ghambire Davita eshi: “Ame na monanga Fumu roruheya kughutho wange. Kurudyo rwange gha di, no mbadi mbo ni hambadhoka. Yo ghuna kushamberera mutjima wange no rudimi rwange kuna kundakura.

Shemwa, na kara nomakurupero ghomakuru eshi yirama yange ne mbo yina para.

Yoyishi mbadi mbo ni mwagherera mwawafu, karo mbadi mbo tawa eshi mupikoye ghomatjimapero ne mbo gha dhongonoke. Yowe wa ni honga mayira ghomoyo, ghukara po ghoye, mbo ghuna ni yaritha noyishamberera.”

Mwayendhange, yakerekandongo wetu Davita, kuna kuyimupathwerera thiwana: Gha fire no ha mu vumbekire. No mbira dhendi, netu dhi di pano. Ene muporofeta gha karire. No gha dimukire eshi, Nyambi gha mwedherire nomaturekero eshi yofotji ghopawanahoka wendi, mbo ghana hungumana padipuna dyendi. Yo gha monenine muvumbukero waKristus kughutho no gha ningire eshi: “Mbadi ha mu mwaghererera mwawafu, no yirama yendi kadi ya kwora.”

Nyambi gha tumunine Jesusi mukufa, eyi yatwe twatunonga twayo. Gha pwire kuyeyura kurudyo rwaNyambi, no gha tamburire Mupepo ghoKupongoka, oyu gha mu turekerire Wihe no gha mu tu shurutherire. Aye ne yoyu muna kumona pañanyi-ñanyi, no kumuyuva.

Mañando ghaNyambi.

Responsorial Psalm

Dimbokatji. Ps. 16:1-2. 5. 7-11

R:

Tu neghedhe, ghoFumu, ndhira dhomoyo.

GhoNyambi, ngo ni tambure mumaghamweno ghoye, mondo na kushana kuKoye. Na ningire kwaHekudyange eshi: “No ghoye me, mbadiko thokuniroghera, shimengwa kuKoye.

R:

Tu neghedhe...

Hekudyange, Yowe mukakunirera nomoyo wange. Yoyiheya yi na kutambura, kuKoye ya tunda. Mbo na mu kughu Hekudyange, oyu ghana ni kumitha kuyidimuka yoyihunga, Fumu ne, kughutho wange gha kara roruhe, mbadi mbo ni pundadhoka, yoyishi nange gha kara roruheya.

R:

Tu neghedhe..

Yo na kushamberera no kushogherera no mbadi na kukudhekera.

Hekudyange, wa ni tapa kukufa. Wa tawa eshi mupikoye ghomakurupero ne, gha kume mumbira. Yowe ghuna kunihonga edi sho ni pare. Kukoye ne kwa yara yishamberera. Eyi ghuna kutapa, ya rogha roruhe.

SECOND READING

Thitoya thoghuwadi. 1 Pet. 1:17-21

Mumbapira dhokutanga dhaMupostoli Petrusi.

Ngeshi hamumunongonona eshi Wihenu, oyu ghana kutetera ndhango yomuhe mukupira makutjakero, mu pare ne keho mufuma kuKwendi munako edhi muna kukara ghugenda pano pakaye. Mwa dimuka namwe eshi, mbadi mwa pwire kukomonona noyinu yokukona kupwa. Yira yikuvo ngambi mangondo, agha mwa yora nyara-nyara no gha pira makomweneno ghohoro. Karo amwe, ha mu shutura nomanyinga ghokupira murandu eshi, ghaKristus, Ndjwighana shiwana murandu no thitambo temba. Aye ne gha kara po kare kughutho ghokuvareka kaye. Ene pamurandu wenu, po gheyera munako dhino dhohuhura. paPendi po mwa tawera mwe mwaNyambi, oyu gha mu tumunine mukufa no gha mu pire fuma. Yo gha tanarera matwero ghenu no makurupero ghenu paNyambi.

mañando ghaNyambi.

Gospel Acclamation

Halleluja Luk. 24:32

Ha ghambathana kwawo eshi: “Mbadi dhina yumbaghuka mitjima dhetu apa tuna ghambaghura nendi mundhira,

Halleluja!

Evangelium Lk. 24:13-35

Marundwerero ghoyitjanga yaLukasi.

Ha mu dimukire apa gha yondorire ghuroto

Mudiyuwa dyodyo, ko kukara hawadi mundhira ha yende kuEmaghusi, dighumbo dyomuhanyamo ghomakilometeri dikumi nomawadi pepi naJerusalema. Awo ha karire mundhira ghukuvureka yoyinu yi ya hokokire. Oku shime ha karera mukukuvureka no kuthinganyeka-thinganyeka mahimeno ghawo, ko kuwakokerera Jesusi thinda, no gha yendire pofotji nawo. Ene meho ghawo mbadi gha tjinunine kumudimuka. Ho gha wepurire eshi: “Yinye yi muna kudhegheterera no kuyenda ghukuvureka?” Awo ne ko kwimana nomarupara ghotoko-toko. Yofotji ghopapawo ghodina dyoKleghofasi, ghokudhira kudimuka eyi nga yi hokoka mumayuwa ghaya ghana tundu ko ndi?”

Ko kuwepura kwendi eshi: “Yinu munye?” Awo ha mu huthire eshi: “Yinu yokwaJesusi ghomukaNasareti, muporofeta ghongcamu mumaňando nomuyitenda kughutho waNyambi nawanu. Oyu ha yandjire hapristeri wetu hohakuru nawakamuragho wawo, pakumutetera ndhango dhokufa no kumupamarera kuthikurushe. Atwe twa kuruperire eshi, aye ne yomukakukomonona HaIsragheli. Ene yoyiheya yi, dyarero ne dyodiyuwa dyoghuhatu kutunda pa ya hokokire yinu yi. Karo hakamadi hamweya hopapetu, hana tu tokotitha. Yoyishi murughura hana yendi kumbira, ene mbadi hana ka wana mo mwimba. Apa hana ka tunda ko, hana na tu tongwera eshi muyumi. Hamweya hopapetu nawo ko hana yendi kumbira, no hana tu tongwera thika di hana ghamba hakamadi, Aye ne mbadi hana ka mu mona mo.”

Aye ha wa tongwera eshi: “Mwathuta mwe no mwakadirombatjima! Mbadi muna kutawa yoyihe eyi ha tongorire haporofeta ndi? Kristusi ne kadi wa kunyanda muyinu yi, ndani po mbo ghengena muthishe thendi ndi?” Munyima gha tangire kuwatjwathanitha kutunderera kwaMosesi, nawaporofeta noyitjanga yoyiheya kuyinu yokuhata kukwendi.

Apa ha kokerire kudighumbo di ha tambire, aye gha yendire yira wa kupiterera. Awo ne ko kumuthineneka ghuninga eshi: “Kare kukwetu, yoyishi tamba runguro nodiyuwa ne dina tokera.” Naye gha tawire no ghengenine gha ka kare nawo. Pakukara nawo kuthidyero, gha tumburire ghuroto no gha tumerire, gha ghu yondorire no gha ghu wa taperire. Popo, ko kuvishuka meho ghawo no ha mu dimukire. Aye ne ko kudhongonoka kumarupara ghawo. Ha ghambathana kwawo eshi: “Mbadi dhina yumbaghuka mitjima dhetu apa tuna ghambathana nendi mundhira, no apa ghana tu tjwathanitha yitjanga ndi?”

Ko kufunguruka kwawo wangu popo ha huke kuJerusalema. Ko ha ka wanine hashadikumi noyofotji nawamweya pofotji. Awa ha ka wa tongwerire eshi: “Yashemwa Fumu ne nga vumbuka no nga kuhokora kwaSimoni.”

Nawo ko kuwatongwera eyi ha monine mundhira no ngepi di gha kudimukithire kukwawo pakuyondora ghuroto.

Mañando ghoEvangelium.

FOURTH SUNDAY OF EASTER.

Shundaha ghoghune ghoPaska.

FIRST READING

Thitoya thokutanga. Act. 2:14. 36-41

Mumbapira dho yitenda yaWapostoli.

Nyambi yo gha tendire Jesusi gha kare Kristusi

Mudiyuwa dyoPendekoste Petrusi, nawasha dikumi noyofotji no ha yaghurire kwawanu eshi: “mwaJuda, namwe mwahe mwe mwa tunga muJerusalema. Na kumutjwathanitha eyi ya hokoka. Mu tegherere koyi sho ni tongore.

Isragheli yomuhe gha tanare no gha dimuke eshi shemwa: Nyambi yo gha tendire Jesusi yu mwa pamarerire, gha kare Kristusi!”

Pakuyiyuva yi hanu, ha dhegheterire thikuma mumitjima dhawo. No hepurire kwaPetrusi no kwawapstoli hamweya eshi: “Nye sho tu tende mwayendhetu?”

Ko kuwahutha Petrusi eshi: “Mu piruke no mupwe kuyogha muDina dyaJesusi eshi, ghapwe kuthigherera maharwero ghenu. No mbo muna tambura Mupepo ghoKupongoka yira thitapa. Yoyishi ethi gha tureka Nyambi ne thenu, no thawanenu no thawahe wa ha kara kayenda, nawahe wa mbo ghetha Fumu Nyambi kukwendi.”

Karo Petrusi gha nongononine nomañando ghomengi, no kuwatjokedha eshi: “Mupwe kughamwena mukatji kawanu hokupeghuha.”

Awa ha tawire kumañando ghendi, ha pwire kuyogha no thitara thawa ha pwire kuyogha mudiyuwa di, tha karire mayovi mahatu, hawedherere kwawatawi hamweya.

Mañando ghaNyambi.

Responsorial Psalm.

Dimbokatji Ps. 23:1-6.

R:

Fumu ne mudithi wange, mbadiko thi na kunyanda.

Fumu ne mudithi wange, mbadiko thi na kunyanda. Aye ghana ku ni turumuthitha, mumadyero ghomwengerere. Ghana ku ni twara kukakuro, oku kudi thiraro. No ghana kunipa ngcamu dhodhipya.

R:

Fumu ne..

Ghana ku ni twara mumayira ghomahunga, kudikuto dyoDina dyendi.

Ngambi ku na kuyenda mughudhungi ghomakokore, mbadi mbo ni yapa, yoyishi nange ghu di ghoFumu. Na kara nondjewa-ndjewa munyara dhoye.

R:

Fumu ne..

Ni hungumeke kudiyumbu, oku pakuninungurukera wa ha ni dhimba

Ghuna kunitambura yira mugenda ghodikuto no ghuna ni yaritha noyishamberera.

R:

Fumu ne..

Ghunongo ghoye no ruhakitho roye, mbo yina kara nange mumoyo wange ghoghuhe. No mbo na kakara mundhugho dhaFumu, kate paghuhura ghomayuwa.

SECOND READING

Thitoya thoghuwadi. 1 Pet. 2:20-25

Mumbapira dhokutanga dhaMupostoli Petrusi.

Ngeshi ha mu humbitha mwe oku muna reghi, fumwa munye mbo mu wana oku muna yikakatera yoyo? Ene mukukara ghudhughutjima muyinyanda yenu, oku ghuhunga muna kutenda, mwa wana ñeke dhaNyambi. Shemwa payinu yino namwe mwapwa kwitha ko. Yoyishi naye Kristusi gha mu nyanderire no gha mu pire thitamenedhi karo eshi, mu kone kukutha ndhira dhendi.

Aye ne mbadi gha tendire murandu no mbadiko ñando dhombango.”

Apa ha mu shamunine, aye ne mbadi gha huthire dishamu, apa gha nyandire, aye ne mbadi gha kunyanganyine, ene gha thighire yoyiheya koYu gha pangura ghuhunga.

Aye thinda gha shimbire mirandu dhetu muyirama yendi kuthikurushe. Opo, po twa fera kumirandu no twa tumuka paghuhunga. Payitombo yendi po mwa pwire kwirukitha mwe.

Amwe ne mwa yongarire yira ndjwi, apa no ne muna huka kwaMudithi wenu no mukungi ghomoyo dhenu.

Mañando ghaNyambi.

Gospel Acclamation

Halleluja. Jn. 10:14

“Yame mudithi ghomunongo. Na dimuka ndjwi dhange, no ndjwi dhange, dha ni dimuka nadho Me,

Halleluja!

Evangelium. Jn. 10: 1-10

Marundwerero ghoyitjanga yaJohannesi.

Ame ne Yame dikorogho dyondjwi

Jesusi ghaghambire kwaJuda eshi: “Ghushemwa na kumutongwera: Oyu ghokudhira kwingena mudikorogho dyothikora thondjwi, ene ye ne ghana kureghera pambadi, oyu ne mwidhi no shondoro. Oyu ghana kwingena mudikorogho, yomudithi ghondjwi. Aye ne ghana kumuyandhwerera mukakukunga thero, no ndjwi dhina kutegherera kudiywi dyendi. Ndani ghana kwitha ndjwi dhendi pamena ghadho, no ghana kudhishwayitha. Pakushwayitha ndjwi dhendi, ghana kudhipitera kughutho no ndjwi dhina kumukutha, yoyi dha dimuka diywi dyendi. Adho mbadi dha kona kukutha wayenaye, dhina kumuyapa yoyi mbadi dha dimuka diywi dyawayenaye.” Thighanekeritho thino, tho gha ghambire nawo Jesusi. Ene mba di ha thi dimukire eshi, yinye ghana kushana kughamba nawo Jesusi. Munyima gha ghambire shime Jesusi eshi: “Shemwa na kumutongwera. Ame ne Yame dikorogho dyondjwi. Waheya wa heyire kughutho wange, wo hedhi nawashondoro; ene ndjwi, mbadi dha wa teghererire. Ame ne Yame dikorogho, ngeshi hengena ghumweya papange, mbo ghana pu kughamwena. Mbo gha nengena no kushwagha, no kuwana madyero. Mwidhi ghana kwiya vene kukwidha no kupagha no kuharaňanya. Ame ne neyire eshi, na ha wane moyo no nidhivurithe.

Mañando ghoEvangelium.

FIFTH SUNDAY OF EASTER.

Shunda ghoghukwoko ghoPaska.

FIRST READING

Thitoya thokutanga. Act. 6:1-7

Mumbapira dhoYitenda yaWapostoli.

Mumanako gha, apa havurire hatawi, ya karire yinyeghenye pakatji kawakakughamba Thihirika naWakathiheburayi. Eshi hadidhi wawo, hapwe kukorera kehe diyuwa. Hapostoli dikumi nohawadi, ko kwitha kwawo hakakutawa wahe pofotji no kuwatongwera eshi: “Mbadi ya rikanya eshi, tu yongarithe mayuvithero ghoñando dhaNyambi, mu kutanarithea yikorera. Apano mwayendhange, mu torore mukatji kenu harume kwko nohawadi, hoyikara mwene. Awa ha yara naMupepo ghoKupongoka, noghunyanyami eshi ha wa pake muthirughana thino. Atwe ne mbo tu tape ghukoneka wetu ghoghuhe kumandapero, no mughukarera ghoñando.”

Yihima yi, ya wa rogherire hatawi wahe no ha tororire Stefanusi. Murume ghomatawero ghokuyara no gha yarire naMupepo ghoKupongoka. Karo kemo ha tororire shime Filipusi, Progorusi, Nikaroni, Timoni, Parmenasi, naNikolaghusi yu gha tundire ku Antiyokiya noyu gha tundire pakutanga mughuhayidena, kate kuGhujuda. Ko kuwatwara kwawapostoli. Awo ha wa rapererire no kuwakambeka manyara. Ñando dhaNyambi dha tapathanine kughutho. No thivarero thawakathishongero homuJerusalema tha tanarire thikuma. Karo wingi wawo hapristeri hakutapire mumatawero.

Mañando ghaNyambi.

Responsorial Psalm

Dimbokatji. Ps.33:1-2.4-5.18-19

R:

GhoFumu, kare nongcamu dhoye ghomughamweni wetu, yoyishi, mumoye twa paka makurupero ghetu.

Mwahunga, mu shamberere mwaFumu, namwe mwahungami, mu mwimbere dimbo dyodifumanekero! Mu mu fumanekenoyikitara Fumu, mu mu shikere payihumba.

R:

GhoFumu.....

Yoyishi yina kuhokoka yi ghana kuninga Fumu, no yoyihe yi ghana kutenda ne, ya tanara. Aye ne gha haka ghuhunga no ghuwa, yidimukitho yaFumu yomakurupero ghoruhakitho rwendi, ya yara kaye kokahe.

R:

GhoFumu...

Oyu ne Hekudyetu, yo gha kunga waheya hakakumukarera, nawa ha kurupera ngcamu dhendi. Yo ghokuwaghamwena kuyifa, no kukunga moyo dhawo kudiyerenge.

SECOND READING

Thitoya thoghuwadi. 1 Pet. 2:4-9

Mumbapira dhokutanga dhamupostoli Paghulusi

Yoyishi, amwe karo mwadiko di dyapwa kutorora, mbunga dhoghupristeri dhodhifumu

Hekudyetu ne diwe dyomoyo, edi ha nyatha hanu. Ene Nyambi gha di torwera kudyango dyodikuto. Mwiye yira mwamawe ghomoyo, ha mu tende ndhugho dhoKupongoka. Omu sha kare hapristeri hokupongoka no kuyamba miyambo dhokupongoka, paJesusi Kristusi edhi gha menya-menyena Nyambi. Yodigho ya ninga muYitjange eshi:

“Mum one,

Ame ne diwe dyodishonga na kupaka muSiyoni edi na torwera mudyango dyodikuto.

Oyu ghokutawa muMwendi, mbadi mbo gha fa honyi.

Amwe mwa tawa ne, mwa yerana kufuma dhi. Ene kwawa ha dhira kutawa, gha tamba kukwawo mañando ghano eshi:

“Diwe di ha mwagha hakakumba shemwa dyo dina kara mudishonga.”

No karo eshi:

“Dyodiwe di ghana kupunduka munu no dyodimuwe di dya kukuwitha.”

Awo ne kupundadhoka hana kupundadhoka, yoyishi ha thururu kuñando. Eyi ne dyo gha yi wa himenine Nyambi.

Yoyishi, amwe karo mwadiko di dyapwa kutorora, mbunga dhoghupristeri dhodhifumu, diko edi gha kupongwera Nyambi kukwendi, diko dyaNyambi thinda, diko edi dya yuvithire yitenda Yendi yomakomweneno, yoyu gha mu tundithire mumakokore nothishe thendi thothitetu.

Mañando ghaNyambi.

Gospela Acclamation

Halleluja. Jn. 14:6

Ha mu hutha Jesusi eshi: “Yame ndhira noghushemwa nomoyo. Noyofotji temba ghokukuma kwaTate shimengwa paPange.

Halleluja!

Evangelium. Jn. 14:1-12

Marundwerero ghoyitjanga yaJohannesi.

Yame ndhira noghushemwa nomoyo

Jesusi ghaghambire kwawakathishongero wendi eshi: “Mwa tokota. Mu tawe mwaNyambi, gho mutawe karo muMwange. Mundhugho dhaTate, moghadi matungo ghomengi. Ngo kadi kemo, ngo nye yi na mutongwerire eshi kuna kuyenda ni kamuroghithere mango? No ngeshi nayendi ni ka muroghithere mango, mbo na ka huka na ni mu shimbe, mukatunge oku na kara Me. Namwe mwa dimuka ndhira dhodyango di na kuyenda Me.” Ko kughamba Tomasi eshi: “Fumu, mbadi tuna dimuka eshi kupi ghuna kuyenda, ngepi di sho tu dimuke ndhira dhokuya?”

Ha mu hutha Jesusi eshi: “Yame ndhira noghushemwa nomoyo. Noyofotji temba ghokukuma kwaTate shimengwa paPange. Ngeshi mwa ni dimuka Me, ngo mwa dimuka naTate naye. Kutunda pano mwa mu dimuka no kumona muna kumumona.”

Filipusi ghaningire kukwendi eshi: “Fumu, tu neghedhe Wiho, gho yi rikanye kukwetu.”

Jesusi gha mutongwerire eshi: “Amen ne kare na kara nenu, ene kadi wa kunidimuka we Filipusi? Oyu ghana kumona Me, Tate ghana kumona. Ngepi di sho kone kuninga eshi: “Tu neghedhe Wiho? Mbadi ghuna kutawa eshi ame ne mwaTate na kara, na Tate ne muMwange gha kara ndi? Mañando gha na kughamba nenu, mbadi na kughamba muMwange nothinda, kwaTate yu gha kara muMwange no kutenda yirughana yendi papange. Mu tawe ne mumwange. Ngambi ngeshi kadi kemo, mu tawe mumwange thikuma payirughana yothinda.

Yashemwa na kumutongwera: Oyu ghokutawa mumwange, mbo ghana tendi naye yinu yin a kutenda me. No mbo ghana tendi yinu yokupiterera yino yoyishi ame ne kwaTate na kuyenda.

Mañando ghaNyambi.

SIXTH SUNDAY OF EASTER

Shundaha ghoghukwoko noyofotji ghoPaska

FIRST READING

Thitoya thokutanga. Yit. 8:5-8.14-17

Mumbapira dhoYitenda yaWapostoli.

Filipusi ghayendire mumbara dhaSamaria gha kayuvithe mo Kristusi. Apa ha yuvire hanu yitetukitha yaFilipusi, no kumumona ku ghana kuyitenda, ko kumutegherera thiwana noghukoneka kuyiyaghura yendi. Mipepo dhodhimango dha shwaghire mwawanu hohengi, ghu kugherera thikuma. No hengi hakakughara nawayihwere, ha pwire kwirukitha. Mudighumbo di, mwa karire yishamberera yoyikuru.

Apa ha yuvire hapostoli muJerusalema eshi, hanu homuSamaria ne hana tawa kuňando dha Nyambi, ko kutuma ko kwawo haPetrusi naJohannesi. Awo ha yendire no ha ka rapererire hanu eshi ha kone kutambura Mupepo ghoKupongoka. Yoyishi, Mupepo oku mbadi gheya kwayofotji ghopapawo. Ha pwire kuyogha vene muDina dyaFumu Jesusi. Hapostoli ha wa kambekire nyara no ha tamburire Mupepo ghoKupongoka.

Mañando ghaNyambi.

Responsorial Psalm

Dimbokatji. Ps. 66:1-7.16.20

R:

Mu shogherere kudifumanekero dyaNyambi, mwakaye mwahe!

Mu shogherere kudifumanekero dyaNyambi, mwakaye mwahe!

Mu mwimbere kudifumanekero dyoDina dyendi, no mu mupe fuma dhi dha tamba! Mu nongonone kughutho waNyambi eshi:

“Ngepi thitetu thoyirughana Yoye! Ngcamu dhoye ne dhikuru, no hañore dhoye kughutho ghoye hana kumbaranda.

R:

Mu shogherere…

Hanu wahe, ha kona kukotamena kughutho ghoye, no ha kona kwimbera difumanekero dyoye, no kudifumanekero dyoDina dyoye, ha kona kukwimbera.” Mwiye na mu yuve, eyi gha tenda Nyambi, mwiye na mu yuve, kuyitenda yendi yongcamu mukatji kawanu:

R:

Mu shogherere..

Aye gha pirurire dikuruviya, di kare muve ghorukukutu, diko dyendi, dya yendire nomapadhi parware ru rwa pwererire. Ho twa shambererire thikuma kuKwendi, oyu gha raghura roruhe pangcamu dhendi.

R:

Mu shogherere..

Mwiye na mu tegherere, mwakareri mwaheya waNyambi, na haka kumutongwera eyi gha ni tendera: Rupu vene na kughererire kuKwendi, ene ngwa, pamiromo dhange pa karire dimbo dyomakughero. Ngo na karire nomurandu mumutjima wange, ngo mbadi gha ni yuvererire Fumu.

R:

Mu shogherere…

Nyambi gha teghererire, no gha ni yuvererire ndapero dhange! Gha fumane Nyambi, oyu gha ndhira kunishwenena ndapero dhange, no kuniyumena temba makurupero ghange.

SECOND READING

Thitoya thoghuwadi. Pet. 3:15-18

Mumbapira dhamupostoli Paghulusi.

Aye ha mu paghire yira munu, ene paMupepo gha karire muyumi.

Mumitjima dhenu ghukare mo ghupongoki no fumwa dhokwaKristusi ghoFumu. Mu kwinduke roruhe kumahuthero gha kehe yu ghana kumwipura matjwathanithero ghomoyo wenu. ene muyitende mumakukongwedhero, nomumakutekero ghokwaNyambi. Mu koneke eshi yihima yenu ne yiroghe ndani, eshi awa, kemo hana kumushwahura muyikara yenu yoyiwa yomwaKristusi, hafe honyi, yoyishi ha mu nyandeka.

Ngeshi ngo ghomahimeno ghaNyambi eshi, mukone kunyanda, yoyishi ghuhunga muna kutenda. Eyi ne hasha mukunyanda kemo, kupiterera muktenda ghuyi. Naye Kristusi karo gha nyandire parofotji kumaharwero, mukakupira murandu, kwawayiharuri, mukutwara mwe kwaNyambi. Aye ha mupaghire yira munu, ene paMupepo ghamutumunine kumoyo.

Mañando ghaNyambi.

Gospel Acclamation

Halleluja. Jn. 14:23

Ko kumuhutha Jesusi eshi: “Mukakunihaka, ghana kukunga maňando ghange mumutjima wendi, naTate ghana ghana kumuhaka no mbo tuna yendi kukwendi no kutunga nendi.

Halleluja!

Evangelium. Jn. 14:15-21

Marundwerero ghoyitjanga yaJohannesi.

Jesusi ghaghambire kwawakathishongero wendi eshi: “Ngeshi mwa ni haka, ngo mbo munatendi yirughana yange. Mbo na kumbera kwaTate, aye mbo ghana mu tumena Mughambwereri ghumweya, oyu mbo gha kara nenu kuroruheya, eshi Mupepo ghoghushemwa. Hakaye mbadi ha kona kumutambura, yoyi mbadi hana kumumona no kumudimuka temba. Ene mwe mwa mu dimuka, yoyi nenu gha kara no mbo ghana tungu mumwenu.

Mbadi mbo ni mu thigha yira hathighana, mbo ni neya karo kukwenu. Shime kapupi kamanana mbadi sho ha ni mone karo hakaye, amwe ne muna kunimona. Yoyi kupara na kupara, namwe mbo muna para.

Mudiyuwa di, mbo muna dimuka eshi Ame ne mwa Tate na kara, namwe muMwange, name mumwenu. “Oyu gha kara noyiraghura yange no kuyitenda, yo gha ni haka. No yu ghokunihaka, mbo ghana mu haka naye Tate. Name mbo na muhaka no mbo na kuhokora kukwendi.”

Mañando ghoEvangelium.

THE FEAST OF THE ASCENSION OF THE LORD A

Difeste dyoMudhineno waJesusi Kristusi.

FIRST READING

Thitoya thokutanga. Yit.1:1-11

Mumbapira dhoYitenda yaWapostoli.

Owe Theofiliyusi, mumbapira dhange dhokutanga na tjangire mo yoyiheya eyi gha tendire Jesusi Kristusi no yi gha hongire kutunda pakutanga kate pamudhineno wendi ghokudiwiru. Kughutho ghomudhineno wendi, gha rawerire paMupepo ghoKupongoka harume wag ha tororire eshi hapostoli.

Munyima dhokufa kwendi, gha wa neghedhire yidimukitho yoyingi eshi, Ye ne muyumi. Mumayuwa makumi mane, gha hokokangire kehe pano kukwawo, no gha ghambangire nawo yokughufumu waNyambi. Apa gha karire nawo rumweya kuthidyero, gha wa tongwerire eshi: “Mwa tunda mo muJerusalema, ene mu taterere tango yitapa eyi gha mu toyedhera Tate, thika di mwa yuvire kukwange. Johannesi ne nomeyu gha yoghangire. Ene mwe, mumayuwa ghomapu mbo muna yogho naMupepo ghoKupongoka.”

Apa ha kukongwedhire parumweya karo, ha mwipurire Jesusi eshi: “Hekudyetu, dhonako dhino sho ghutumene karo ghufumu waIsragheli ndi?”

Ko kuwahutha kwendi eshi: “Eyi ne kadi yenu, yokudimuka manako no yivata eyi gha paka po thinda Tate nongcamu dhendi. Amwe ne mbo muna tambura ngcamu dhaMupepo ghoKupongoka, apa mbo gheya kukwenu. No mbo muna kara mwatunonga twange hokuJerusalema, no muditunga dyodihe dyaJudeya no dyaSamaya, kate kuyiyeghekamuto yokaye.”

Apa gha manine kughamba kemo, ko kudhina kwendi kudiwiru, oku wo pakumumona. Divuyi dya mu ngambwerire eshi ha dhire kumumona shime. Oku shime ha dhini, awo pakumudighamena ghumunungurukera. Popo vene, ko kuwemanena harume hawadi hoyivata yoyikenu. Awo ha ningire kukwawo eshi: “Mwakagalileya, nye mu nemanena ghudighamena kemo kudiwiru? Jesusi yu ghana tundu kukwenu no ghana dhini kudiwiru, kemo mbo gha ka huka thika di muna mono ghana kudhina kudiwiru.”

Mañando ghaNyambi.

Responsorial Psalm.

Dimbokatji. Ps. 47:2-3.6-9.

R:

Nyambi gha yende muyishamberera, Fumu ghayende ghumushikera mapori.

Mu kanderere nyara dhenu mwamako mwahe, mu shogherere kudikuto dyaNyambi nomaywi ghoyishamberera. Yoyishi kwaFumu ghoMukakupiterera ko dyeya difumanekero.

R:

Nyambi…

Nyambi gha yende muyishamberera, fumu gha yende ghumushikera mapori. Mughe Nyambi, mu mu kughe nomipisalemi, mum u kughe Fumu wetu, mum u kughe nomupisalemi!

R:

Nyambi…

Nyambi ne Fumu ghokaye kokahe, mumwimbere dimbo. Nyambi fumu ghomarudhi no gha kara padipuna dyendi dyokupongoka.

SECOND READING

Thitoya thoghuwadi. Efs. 1:17-23

Mumbapira dhaMupostoli Paghulusi kwawakaEfesusi

Na rapereranga eshi, Nyambi waHekudyetu Jesusi Kristusi, Wiha ghodiko dyodiheya. Gha tapa ghunyanyami kukwenu paMupepo no gha mu hokwerire eshi, amwe ne mwa mu dimuka shemwa. Ame na kumukumbera eshi, gha kuvishure mupepo ghomeho ghenu, mu kone kudimuka methero ghomakurupero ghenu, no ghutungi munye ghu mwa kuyora, oghu ha turekera hatawi. No ngepi ghukuru ghongcamu dhendi dhi dha rughana mumwetu twatawi. Edhi dhongcamu dhofotji dhi dha rughana pangcamu dhendi. Edhi gha rughanithire apa gha tumunine Kristusi mwawafu, no dhi gha mu kuñumekire kurudyo rwendi mudiwiru. Oyu ne gha piterire makuto ghomahe nomangcamu ghomahe, ngcamu noghuraghuri no kehe ghufumu ghu ghuna kuraghura, kadi ghonoko dhino keho ene no ghu ghonako dhokughutho. Kwishi dhendi gha tura Nyambi yoyihe. Aye gha mu yeyura kughutho ghoyoyihe, no gha mu paka gha kare yomutwi ghongirishe. Nkirishe ne yirama yendi, mayeraneno gha, gha rikanyithera muyivareka yoyiheya.

Mañando ghaNyambi.

Gospel Acclamation.

Halleluja. Mtt. 28:19.20

Mu yende kumarudhi ghomahe, no mu ka tende hanu hakathishongero wange. Ame ne nenu ni di mayuwa ghomahe, kate paghuhura ghokaye.”

halleluja!

Evangelium. Mt. 28:16-20

Marundwerero ghoyitjanga yaMateghusi.

Kukwange ha tapa ngcamu dhodhihe mudiwiru nopamuve

Hakathishongero dikumi noyofotji, hayendire kuGalileya kudirundu dig ha wa rawerire Jesusi eshi, ko sho ha yende. Apa ha mu monine, ha mu kandererire ngambi kenge ha tamangerire hamweya. Jesusi gha henyine pepi no gha wa tongwerire eshi: “Kukwange ha tapa ngcamu dhodhihe mudiwiru nopamuve. Mu yende kumarudhi ghomahe, no mu ka tende hanu hakathishongero wange. Mu ka wa yoghe muDina dya Wihe no dyaMwana no dyaMupepo ghoKupongoka. Mu ka wa honge mu kukwata yoyiheya yin a mu rawera. No mu dimuke eshi: Ame ne nenu ni di mayuwa ghomahe, kate paghuhura ghokaye.”

Mañando ghoEvangelium.

SEVENTH SUNDAY OF EASTER

Shundaha ghoghukwoko noghuwadi ghoPaska

FIRST READING

Thitoya thokutanga. Act. 1:12-14

Mumbapira dhoYitenda yaWapostoli.

Wahe ha karire pofotji ghukoñotwedha mumandapero no ghukumbera

Ko kuhuka kwawo kuJerusalema, kutunda kudirundu edi ha tae shi dyondwe pepi no mbara. Muhanyeno ghokukona kuyenda Hajuda muSabata popamuragho wawo. Apa ha kumine mumbara, ko kudhina kwawo kungonda dhokuwiru, oku ha karangire roruhe awa twat a eshi: Petrusi, naJohannesi, Jakobusi naAndreyasi, Filipusi naTomasi, Bartolomeghusi, naMateghusi, Jakobusi ghomwana Alfeghusi, Simoni ghomutanavu naJudasi ghomwana Jakobusi. Waheya ha karire pofotji ghukoñotwedha mumandapero no ghukumbera, pofotji nawakamadi omu gha karire naye Maria ghonyina Jesusi nawaminendi.

Mañando ghaNyambi.

Reponsorial Psalm

Dimbokatji. Ps. 27:1.4. 7-8.

R:

Ngo mbadi na tawire eshi, mbo na ka mona ghuhunga waFumu, mutunga dyawayumi.

Fumu ne munyenge wange no mughamweni wange, oyu sho ni yape ne dye?

R:

Ngo mbadi…

KwaFumu ne thinu thofotji na kumbera ko, ethi ne mbo na thi kuthu: eshi, mumoyo wange ghoghuhe, mbo na tungu mundhugho dhendi, ho mbo ni ka wane mo ghuhunga wendi, no kuyivuruka mutembeli wendi.

R.

Ngo mbadi..

Tegherere kukwange ghoFumu, ngeshi na kwitha, ni yuverere no ni fere ñeke. Na kuvuruka yi wa ningire eshi: “Mu ni shane oku ni di po!”

SECOND READING

Thitoya thoghuwadi. 1 Pet. 4:13-16

Mumbapira dhokutanga dhaMupostoli Petrusi.

Mwakaruvigha mwe muna kupwa kunyatha muDina dyaKristusi

Mu shamberere vene muyinyanda yaKristusi, eyi mwa yerana. Yoyishi, po mbo mu yara namwe karo noyishamberera yoyikuru pamwiyero wendi mughufumu. Mwakruvigha mwe muna kupwa kunyatha muDina dyaKristusi. Eyi ne kunegha yina kunegha eshi, Mupepo ghoghufumu, wendi, ghoMupepo waNyambi oghu ghudi papenu. Ngeshi ha nyanda yofotji ghopapenu, mbadi ya kona kukara eshi aye ne mupaghi, endi mwidhi ngambi thiharuri endi muheti. Ene ngeshi ha nyanda ghumweya aye ne mukriste, mbadi gha kona kufa honyi kuyinu yi. Kuninga eshi eyi gha karera nodina di, gha kona kufumaneka Nyambi.

Mañando ghaNyambi.

Gospel Acclamation

Halleluja. Jn. 14:18

Mbadi mbo ni mu thigha yira hathighana, mbo ni neya karo kukwenu.

Halleluja!

Evangelium. Jn. 17:1-11

Marundwerero ghoyitjanga yaJohannesi.

Tate, fumaneke Mwanoye

Apa gha manine Jesusi kughamba yi, gha kumburire meho ghendi kudiwiru no gha ningire eshi: “Tate nako ne dhi neya, fumaneke Mwanoye, naye Mwanoye, naye Mwanoye gha kone kukufumaneka Nowe. Owe wa mu pire mahimeno ghokwawanu wahe eshi, gha tape moyo ghororuheya kwawa wa mu pire. Oghu ne ghomoyo ghororuheya eshi, ha kudimuke we Nyambi ghoyofotji no ghoghushemwa. NaJesusi yu wa tumine. Ame na kufumanekire pamuve, pakurikanyitha yirughana yi wa nip ire eshi ni yi tende. Apa no Tate, ghu ni kundeke nodifumanekero dyokukoye, difumanekero edi na wanine oku no kukara po temba kaye.

Na hokokire Dina dyoye kwawanu awa wa nip ire mukaye. Ha kari hoye ene wa wa tapire kukwange no ha kwatire ñando dhoye nomitjima dhawo. Ñanyi-ñanyi, hana dimuka eshi yoyiheya yi wa nip ire ya tunda kukoye, yoyishi mañando gha wa nip ire, kukwawo nag ha tapire. Nawo ha gha tamburire no ha dimukire thiwana-thiwana eshi, kukoye na tundire no ha tawa eshi Yowe wa ni tumine.

Na kuwaraperera. Ene mbadi na kuraperera kaye, wowa wa nip ire yoyishi hoye. Waheya wa ha kara hange, ha kara hoye. Noyu gha kara ghoye, wange karo, no na kupwa kufumaneka papawo. Mbadi na kukara rure mukaye. Kukoye na kwiya. Ene wa hana kukara shime mukaye. “Tate ghokupongoka, ghu wa kunge muDina dyoye edi wa ni pa eshi ha kare yira yofotji thika twe.

Mañando ghoEvangelium.

THE FEAST OF PENTECOST SUNDAY

Vigil Mass

Difeste dyoPendekoste. Dimisa dyorunguro.

FIRST READING

Thitoya thokutanga. Gen. 11:1-9

Mumbapira dho hakaGenesisi

Pa kare-kare, hakakaye waheya ha ghambire ndimi dhofotji vene nomañando ghofotji. Apa ha dhirukire ha yende kudiva, ko ka kuma kwawo kudiyana muditunga dyaSinari, no ha ka tungire mo.

Ko kughambathana waheya pofotji eshi, “Mwiye! Tumbe yitina gho tu yi koñerere thikuma mumudiro.” Nawo hombithire yitina yo kukoñerera no matapa. Ko kuninga kwawo eshi, “Mu ninge twa ku tende mbara nomushoke gho katwa kate padiwiru. No twa kute dina eshi maghana mbo tu harañanya karo mukaye.” Ko kushuruka Nyambi pamuve nag ha mone mbara nomushoke ghu na tendire harukungu. Ko kuninga Fumu eshi, “Mone! ñanyi-ñanyi ne diko dyofotji, no ghano ne matangero ghoyitenda yawo. No mbadiko thi mbo wa kanga ethi ha ghayara eshi mbo ha thi tende. Tu wa shurukere, tu ka vungavunge ndimi dhawo, eshi kehe yu gha dhire kukona kuyuva ndimi dhaghumweya.”

Kutunda po Fumu gha wa tapathanithire mukaye kokahe, nawo mbadi ha tendire karo mbara. Yodiyo dina dyo dighumbo ha di tire eshi, “Babeli” eshi, “Kuvungavunga” – yoyishi Fumu gha kuwatapathanitha mukaye kokahe.

Mañando ghaNyambi.

Responsorial Psalm

Dimbokatji. Ps. 104: 1-2.24.27-30.35

R:

GhoFumu, tume Mupepo ghoKupongoka no ghu tendirure kaye.

Fumu, Nyambi wange, owe ghomukuru thikuma, wapwa kuyenga noghufumu ghoghuwa, ha wapwa kudhinga nothivata thothishe.

Yowe wa tombire thifikitho thodiwiru thi kare yira tende,

R:

GhoFumu....

GhoFumu, yinu yoyingi wa tendire, muve, wa yara koyi wa tendire We, ene shemwa, yoyiheya mughunyanyami wa yi tendire.

Yoyiheya yi, ya kara Koye, no wa yi panga yidya munako dhayo.

R:

GhoFumu....

Owe ghuna kutapa muňu ghomoyo, nagho ghuna kukara po, ngambi mumuve karo, wa hokithamo moyo ghoghupya. Dikuto dyaFumu di pire mahurero. Mu ninge yi mu shambererithe Fumu yirughana yendi.

SECOND READING

Thitoya thoghuwadi. Rom. 8: 22-27

Mumbapira dhaMupostoli Paghulusi kwawakaRoma.

Twa dimukire eshi, yivareka yoyihe kutonga yina kutonga pañanyi-ñanyi thikuma kumataterero. Ene mbadi yivareka pithayo keho. Natwe karo twe twa tambura Mupepo yira yitapa yokutanga kwaNyambi, kemo tuna kutanga natwe. Atwe twa dimuka eshi Nyambi mbo ghana dimukitha eshi gha tu komwenena horo dhetu. Atwe twa para, no twa kurupara maghamweno. Thokumona munu, mbadi gha thi kurupera shime kuyinu yi ghana kumona? Ene ngeshi ha tu kurupera koyi tuna kudhira kumona, ghudhughutjima tuna kutaterera. Mupepo netu ghudi karo mughukashu wetu. Atwe mbadi tuna dimuka yinye no ngepi di sho tu raperere. Ene Mupepo ghothinda ghuna kuhema kumatangero gha, mukupira kushwagha po ñando. Na Nyambi yu gha dimuka mitjima dhawanu, yo gha dimuka thitambo thaMupepo. Yoyishi Aye gha kuhema pamahimeno ghaNyambi kwawatawi.

Mañando ghaNyambi.

Gospel Acclamation

Halleluja. Jn.7: 37

Wiye, Mupepo ghoKupongoka, yarithe mitjima dhawatawi ghoye nowape munyenge ghoruhekitho.

Halleluja!

Evangelium. John. 7: 37-39

Marundwerero ghoyitjanga yaJohannesi.

Paghuhura ghodiyuwa dyodikuru dyodifeste, ghemanine Jesusi no gha kughererire nodiywi dyodikuru eshi: “Oyu ghana fu dinota, gheye kukwange gha nwe! Oyu ghokutawa mumwange thi ka di ya ghamba Yitjanga, mbo ghana poposha marware ghomoyo mwimi dhendi.” Yinu yi, gha ghambire kwaMupepo, yoyi hanu wa hokutawa mumwendi, mbo ha tambure Mupepo. Mupepo ye oku shime mbadi gha shuruka, yoyishi Jesusi oku mbadi hana mu kutekera shime.

Mañando ghoEvangelium.

PENTECOST SUNDAY A

Shundaha ghoPendekoste.

Mass during the Day

FIRST READING

Thitoya thokutanga.

Yit .2: 1-11

Mumbapira dhoYitenda yaWapostoli.

Apa dya rikanyine diyuwa dyo difeste dyo Pendekoste ha karire waheya pofotji mundhugho. Kapupi kamanana, kokutunda mavuma muwiru gho kuninga yira dingundunga. No gha vurire mudyango dyo diheya di ha karire. Gho ha monine thinu thokuninga yira maretha ghomudiro no thatapathanie kwa yomuhe gho papawo. Waheya hayarire naMupepo ghoKupongoka,no hatangire kughamba madimi ghagho-nagho, thika kenge gha yi wa pire Mupepo ghoKupongoka. muJerusalema, mwa karire haJuda ho hahunga, awa ha tundire mumarudhi ghomahe gho pakaye.

Apa ha yuvire hanu mavuma, ko kukongosha mbunga dho dhikuru pofotji. Ene pa hayuvire eshi keheyu gho papagho ndimi dhendi ghana kughamba, mbadi ha dimukire eshi ngepi di ha nayi wana. Ko kuyoghotera no ghutetuka waheya ghuninga eshi awa hanu hana kughamba eshi waheya hakaGalileya. Ngepi di ghana kukuyuvera kehe yu gho papetu ndimi dhendi thinda? Twa kaPartesi, Megerisi naWaelamite nawa hatunga muMesopotamiye, HakaJudeya naKapadosiye, muPontusi naAsia. HaFrigiya, naPamufiliya HakaEgiputena no dihenda dya Libiya Kuserene nawanu ho kutunda kuRoma, haJuda nawahayidena awa ha tumbura matawero gha waJuda, hakaKretan no hakaArabiya. Twaheya kuna kuyuva, edi hana kuyaghura mumandimi ghetu twathinda, yinu yothitetu eyi ghatendire Nyambi.

Mañando ghaNyambi.

Responsorial Psalm

Dimbokatji. Ps.103:1,24,29-31.34

R:

Ame na haka kushogherera Fumu.

Na haka kushogherera dina dyendi dyoKupongoka, no yo yihe eyi ni di nayo. Ame na haka kushogherera Fumu no mbadi mbo ni muvurama kothinu thofotji, payitenda yendi yoyiwa.

R:

Ame na…

Aye, yo gha ni thigherera maharwero ghange ghomahe, no yo ghanirukitha kuyikorwa yange yoyihe.

SECOND READING

Thitoya thoghuwadi. 1 Kor. 12:3-7.12-13

Mumbapira dhokutanga dhaMupostoli Paghulusi kwawakaKorinte.

Noyofotji temba yu gha kona kughamba eshi: “Jesusi ne Fumu,” shimengwa paMupepo ghoKupongoka ghana yimupa.

Poghadi shemwa makutjakero ghoyitapa yoñeke.

Makutjakero ghoyikarera. Ene Fumu yofotji yu ghana kurawera. Poghadi makutjakero ghomarughaneno ghongcamu. Ene Nyambi yofotji yu gha paka yoyihe mwawahe.

Kwakehe yu ha tapa thirughanitha thaMupepo kughutungi wawahe.

Thika di ya kara yirama yofotji yoyingi, kemo dyo ya kara yoyihe pofotji, ngambi kenge di yengipa ya kara yofotji. Kemo naye Kristusi. paMupepo yofotji, twa karire twe yirama yofotji paDiyoghero. Ngambi haJuda endi haHirika, mupika ngambi mukakakoghatji. Twaheya hatupire Mupepo eshi tunwe.

Mañando ghaNyambi.

Gospel Acclamation.

Halleluja

Wiye, Mupepo ghoKupongoka, yarithe mitjima dhawatawi ghoye nowape munyenge ghoruhekitho.

Halleluja

Evangelium. John. 20:19-23

Marundwerero ghoyitjanga yaJohannesi.

Thika di gha ni tumine Tate, kemo dyo na kumutuma namwe

Mushundaha yu parunguro, ha kukongwedhire hakathishongero pofotji. Ngambi kenge ha yandherire dikorogho dyongonda, pamurandu ghowoma ghokwawaJuda. Jesusi gheyire no ghemanine pakatji kawo no ghaningire kukwawo eshi: “Thiraro thi kare nenu!” pakumana kughamba kemo, ko kuwaneghedha kwendi makandeke ghendi nomatji dhendi. Hakathishongero ha shambererire thikuma pakumona Fumu.

Ha wa tongwera karo eshi: “Thiraro thi kare nenu! Thika di gha ni tumine Tate, kemo dyo na kumutuma namwe.” Munyima dhokughamba kemo, ko kuwahetherera eshi: “Mu tambure Mupepo ghoKupongoka! Ngeshi mbo mu thigherere hanu maharwero ghawo, hapwa kuwathigherera, kwaNyambi. Awa mbomudhi kuwathigherera mirandu, naNyambi temba mbadi mbo ghawa thigherera.”

Mañando ghoEvangelium.

SUNDAY AFTER PENTECOST

THE MOST HOLLY TRINITY

Shundaha munyima dhoPendekoste. Difeste dyomwimbero waNyambi Mwahatu Yofotji.

FIRST READING

Thitoya thokutanga. Ex. 34:4-6.8-9

Mumbapira dhaExodusi.

Mosesi ghadhinine kudirundu dyaSinayi pamathiku-thiku noyikwere yiwadi yomiragho munyara dhendi, thika di gha yimurawerire Fumu. Na Fumu gha shurukire mudivuyi, Mosesi gho ghemanine pambadi dhendi, no ghethire dina dyaFumu. Ene apa gha pitire Fumu papendi, gha kughererire Fumu eshi, “Hekudyange, Hekudyange, ghoNyambi ghomukathiñeke no ñeke, ghomudhughutjima, ghomunongo no ghomakurupero;

Mosesi gho gha tongamenine pamuve no gha kuvamine ghukumbera eshi, Fumu, ngeshi na kupitakana, ninge Fumu wange gheye netu, ghushemwa, na ku kukumbera. Awo ne hayiharuri, ene tu thigherere yitenda yetu nomaharwero ghetu, tushimbe tukare twakakukuyora.”

Mañando ghaNyambi.

Responsorial Psalm

Dimbokatji. Dan. 3:52-56.

R:

Roruhe dikare difumanekero nomakughero kuKoye.

Wa pwa kukandadheka, ghoFumu Nyambi ghoWihetu.

R:

Roruhe dikare difumanekero nomakughero kuKoye.

Difumanekero kuDina dyoye dyoKupongoka.

R:

Roruhe dikare difumanekero nomakughero kuKoye.

Wa pwa kukandadheka muTembeli dho difumanekero dyoye.

R:

Roruhe dikare difumanekero nomakughero kuKoye.

Wa pwa kukandadheka kuthipuna thodiwiru dyoye.

R:

Roruhe dikare difumanekero nomakughero kuKoye.

Wa pwa kukandadheka kwawa ha kutha mayira ghoye.

R:

Roruhe dikare difumanekero nomakughero kuKoye.

Wa pwa kukandadheka kughufumu ghodiwiru.

SECOND READING

Thitoya thoghuwadi. 2 Kor. 13:11-13

Mumbapira dhoghuwadi dhaMupostoli Paghulusi kwawakaKorinte.

Shime ne mwayendhange, tuna kumushwera yishamberere, no mukoñotwedhe mukukura no yipara mwene. Mu tambure makoghawero. Mu kare pofotji no mu pare muthiraro. Nyambi ghoruhakitho nothiraro mbo ghana kara nenu!

Mukurumerithange, nodicumitero dyoGhukriste. Hana mu rumeritha wahe ha kara waNyambi. Thiñeke thaFumu Jesusi Kristusi noruhakitho rwaNyambi, mumakupakerero ghoMupepo ghoKupongoka, yikare nenu mwahe.

Mañando ghaNyambi.

Gospel Acclamation.

Halleluja. Yit. 1:8

Difumanekero kwaWihe, nokwaMwana, nokwaMupepo ghoKupongoka, oyu gha kara noyu gha karire noyu mbo gheya mukangcamu dhodhihe.

Halleluja!

Evangelium. John. 3:16-18

Marundwerero ghoyitjanga yaJohannesi.

Jesusi ghaningire kwaNikodemusi eshi: Yoyishi Nyambi, ghahakire thikuma kaye yoghataperire Mwanendi ghopithendi. Podigho shi kehe yu ghokutawa mumwendi, mbadi mbo ghayongara, ene mbo ghana wane moyo ghororuheya. Nyambi mbadi ghatumine Mwanendi kukupangura kaye, ene kaye kawane maghamweno mumwendi mumwendi. Mbadiko ghokutawa mumwendi oyu mbatetera ndhango; ene ghokushwena kutawa, kare ghapwa kutetera ndhango, yoyishi ghashwena kutawa mwaMwana Nyambi ghopithendi.

Mañando ghoEvangelium.

THURSDAY AFTER TRINITY SUNDAY A

THE BODY AND BLOOD OF CHRIST

Difeste dyoYirama no Manyinga ghaKristusi

FIRST READING

Thitoya thokutanga. Deut. 8:2-3.14-16

Mumbapira dhaDeuteronomi.

Gha mu korerire nomana agha mwadhirire kudimuka nohakerekandongo wenu temba

Mosesi gha ghambire nombunga eshi: “Muvuruke shi ngepi di ghamu raghurire Fumu wenu Nyambi mumwaka makumi mane mumamboreya, kumukunga, kumuyereka no kudimuka mwimi dhomitjima dhenu- eshi amwe ne kukona kukutha muragho dhendi ndi endi mbadi wakudhikutha. Gha mu kungire, gha mu tendire mukare mundhara, gha nu korerire nomana agha mwadhirire kudimuka nohakerekandongo wenu temba, mukumutjwathanitha eshi munu ne mbadi wa kukona kupara ghuroto pithagho ene munu ne kukona kupara kuyinu yoyihe eyi yina kutunda mukanwa kaFumu.

“Mbadi mwakona kuvurama Fumu Nyambi wenu oyu gha mu shwayithire muditunga dyaEgiptena, mutunde mughupika: oyu gha mu kungire mumamboreya, ditunga dyomatwetwe, mange, nodinota; padyango di dyodinota gha mu reterire meyu agha gha tundire mudiwe dyodikukutu; oyu gha mu korerire nomana yu gha dhirire kudimuka hakerekandongo wenu.”

Mañando ghaNyambi.

Responsorial Psalm

Dimbokatji. Ps. 147:12-15.19-20

R:

Owe Jerusalema, fumaneke Fumu!

Owe Jerusalema, fumaneke Fumu! Kughe Nyambi ghoye, ghoSiyoni!

Aye gha tanaritha mikorotji dhomakoghoro ghoye, no gha kandadheke wa ha tunga mo,

R:

Owe….

Aye gha tapa thiraro muditunga dyoye, no gha kukorera nombuto mwene. Ngeshi ha tapa thiraghura kukaye thina kupwa kurughanitha wangu.

R:

Owe…

Aye gha yuvitha ñando dhendi kwaJakopu, miragho dhendi no yiraghura ne kwaIsragheli. Eyi ne gha tendire kukehe marudhi, awa ha dhira kudimuka miragho dhendi.

SECOND READING

Thitoya thoghuwadi. 1 Kor. 10:16-17

Mumbapira dhokutanga dhaMupostoli Paghulusi kwawakaKorinte.

Thinwitho thomatumero, ethi tuna kutumeritha Nyambi ne, ghomakupakerero no manyinga ghaKristusi ndi? Ghuroto oghu tuna kuyondora ne, ghomakupakerero noyirama yaKristusi ndi? Ghushemwa ghu eshi, ghodigho ghuroto ghofotji ghu ngambi ngepidi twakara twengi, twahe twakara thirama thofotji. Yoyishi, twahe kukuyarekera kughuroto ghofotji.

Mañando ghaNyambi.

Gospel Acclamation

Halleluja. Jn. 6:51-52

Yame ghuroto ghoghuyumi ghu wa shurukire mudiwiru. Ngeshi ha di ghumweya kughuroto ghuno, mbo ghana para kuroruheya.

Halleluja!

Evangelium. John. 6:51-58

Marundwerero ghoyitjanga yaJohannesi.

Yirama Yange ne yidya yoshemwa, nomanyinga Ghange ne yinwa yoshemwa

Jesusi ghaghambi kwawaJuda eshi: “Yame ghuroto ghoghuyumi ghu wa shurukire mudiwiru. Ngeshi ha di ghumweya kughuroto ghuno, mbo ghana para kuroruheya. Ghuroto ghu ne, yirama yange eyi mbo ni tapa eshi, mbo ka pare kaye.”

Ko kukukanana Hajuda eshi: “Ngepi di sho gha kone kututapera nyama dhendi kukudhidya twe?”

Gha watongwera Jesusi eshi: “Kemo, yashemwa na kumutongwera: Ngeshi mbadi mbo mu dya yirama yaMwanamunu no kunwa manyinga ghendi, mwa pira moyo mumwenu. Oyu ghokudya yirama yange no kunwa manyinga ghange, ghana kuwana moyo ghororuheya, no mbo na mu tumuna mwawafu mudiyuwa dyoghuhura. Yoyishi yirama Yange ne yidya yoshemwa, nomanyinga Ghange ne yinwa yoshemwa. Oyu ghokudya yirama Yange no kunwa manyinga Ghange, ghana kukara mumwange, name mumwendi. Thika di gha ni tumine Tate ghomukamoyo, no thika di na kupara muMwendi, kemo dyo mbo gha para mukakunidya Me. Ghuroto ghuno wa shurukire mudiwiru, mbadi wa kara thika mana yu ha dire hakerekandongo wenu. awo ha dire ene ha fire. Oyu ghokudya ghuroto ghuno, mbo ghana para kuroruheya.”

Mañando ghoEvangelium.

Friday after the second Sunday of pentecost

THE SACRED HEART OF JESUS. A

FIRST READING

Thitoya thokutanga. Deut. 7:6-11

Mumbapira dhaDeuteronomi.

Papenu gha paka mutjima wendi Fumu no gha mu torora

Ko kutongwera Mosesi mbunga eshi: “Yamwe mwanu gha kandadhekire Fumu Nyambi; yamwe yu gha tororire Fumu Nyambi wetu mu kare mwapikendi mwawanu pakaye.

“Ngeshi papenu gha paka Fumu mutjima wendi no gha mu torora, mbadi yoyishi mwa pwire kutura patjangwa: Ene mwa karire mwatorori mwahanu wahe. Muruhakitho rokukwenu nokupungura makuruperitho agha mwedhire kwawihenu eshi Fumu yo gha mutundithire pamoko ghendi no gha mu komononine mutunde mughupika, mungcamu dhafumu Faragho muEgiptena. Mwa kona keho kudimuka eshi Fumu Nyambi wenu ne Nyambi ghoghushemwa, Nyambi ghomatawero oyu gha kara ghushemwa kughundambo wendi no kughunongo wendi kwawanahoka mayovi hokughutho awa mbo ha mu haka no kukutha miragho dhendi, ene awa ho kukuhumbitha mumwagho hathinda gho ha mu nyenga; aye ghana kumuninga gha rughane mahumbithero ghendi. Amwe mwa karera po kukutha nokukenga miragho noyikaritha eyi nakumupa dyarero.”

Mañando ghaNyambi.

Responsorial Psalm

Dimbokatji. Ps. 103: 1-4.6-8. 10.

R:

Ene ruhakitho rwaFumu, mbadi mbo rupwa, kwawa ha mu karera.

Ame na haka kushogherera Fumu, na haka kushogherera Dina dyendi dyokupongoka, no yoyiheya eyi ni di nayo. No mbadi mbo ni vurama ko thinu thofotji, payitenda yendi yoyiwa.

R:

Ene...

Aye yo gha ni thigherera maharwero ghange ghomahe, no yo gha nirukitha kuyikorwa yange yoyihe, noyo gha ni ghamwena kumbira, ho gha ni yenga noruhakitho nothiňeke.

R:

Ene..

Fumu gha tenda ghuhungami no ghuhunga, kwawahe awa hana kudheka. KwaMosesi gha dimukithire mahimeno ghendi kwaIsragheli ne gha karire nodighano, dyo yi gha himine kutenda.

R:

Ene..

Fumu ne mukathiňeke no mukaňeke, mughudhughutjima no gha yara ruhakitho. Aye mbadi ghana kutenda netu popamaharwero ghetu, no mbadi ghana kutuhuthera popoghuyi wetu.

SECOND READING

Thitoya thoghuwadi. 1 John. 4:7-16

Mumbapira dhokutanga dhaMupostoli John.

Ruhakitho ne kwaNyambi rwa tunda

Mwahakwa, mwa tawa kwakehe yu ghokumutongwera eshi, aye ne gha kara noMupepo waNyambi. Yoyishi pañanyi-ñanyi ne hengi haporofeta hombango ha di mukaye. Ene mu rondonone keheyu eshi, mupepo wendi ne mwaNyambi wa tunda ndi? Pano po sho mu dimukere Mupepo waNyambi eshi: Kehe yu ghana kunongonona eshi, Jesusi ne shemwa yoKristusi yu gha pirukire munu. Ho gha kara noMupepo ghu wa tunda kwaNyambi. No kehe yu ghokudhira kunongonona yaJesusi, mbadi gha kara noMupepo ghu wa tunda kwaNyambi. Oyo ne gha kara Mupepo ghoñore dhokwaKristusi. Mupepo ghu mwa yuva eshi mbo ghu neya, ghoghu ghu di mukaye. Mwanange homwahakwa, amwe ne kwaNyambi mwa kundamena. No mwa witha kare haporofeta hombango, yoyishi mumwenu gha kara mukakupiterera oyu ne shadipinyi yu gha kara mukaye . awo ne hakakaye no eyi hana kughamba yakaye no kaye kukwawo kana kutegherera. Atwe ne twakaNyambi. Noyu gha dimuka Nyambi kukwenu ghana kutegherera. Noyu gha dhira kukara waNyambi mbadi ghana kutegherera kukwetu. Payinu yino, po twa kona kuyakunuthera mipepo.

Mwahakwa, tu kuhake. Yoyishi ruhakitho ne kwaNyambi rwa tunda. No kehe yu gha kara noruhakitho, yomwana Nyambi no gha dimuka Nyambi. Oyu gha pira ruhakitho, mbadi gha dimuka Nyambi. Yoyi Nyambi ne yoruhakitho. Muyinu yino mo gha tu hokwera Nyambi ruhakitho rwendi eshi: Pakutuma Mwanendi ghopithendi mukaye tu kone kuwanamoyo paPendi. Ruhakitho roshemwa ne runo: kadi ruhakitho rokwaNyambi. Ene ruhakitho ru gha tu neghedha pakututumena Mwanendi, yira mashemwithanitho ghomaharwero ghetu. Mwahakwa, tu kuhake natwe karo. Noyofotji temba yu gha mona Nyambi. Ene ngeshi ha tu kuhaka, ghana kukara Nyambi mumwetu no yihima yoruhakitho rwendi, yina kuyarera mumwetu. Yodigho tu dimuke eshi muMwendi tudi, naye mumwetu. Yoyishi, Mupepo wendi gha tu tumena. Natwe twa yimona no twa yinongonona eshi Wihe gha tumine Mwana gha kare Mughamweni ghokaye. Oyu ghokunongonona eshi, Jesusi ne Mwana Nyambi Nyambi gha kara mumwendi, naye mwaNyambi gha kara. Natwe twa dimuka ruhakitho rwaNyambi rokukwetu no twa ru tawa. Nyambi ne ruhakitho, noyu gha kara muruhakitho mwaNyambi gha kara naNyambi mumwendi gha kara.

Mañando ghaNyambi.

Gospel Acclamation

Halleluja. Mt. 11:29

Mu kukambeke djoko dhange no mu kuhongere kukwange. Yoyishi ame ne nomukamutjima ghoghuporothi.

Halleluja!

Evangelium. Mtt. 11:25-30

Marundwerero ghoyitjanga yaMateghusi

Ame ne nomukamutjima ghoghuporothi

Munako dhi ghaningire Jesusi eshi: “Na kukugha we Tate, Fumu ghodiwiru noghomuve yoyishi wa horekire yinu yi kwawanyanyami no kwawakakukuhonga, no wa yi hokorire kwawanu vene. Kemo Tate, yoyishi ghomahimeno ghoye ghomawa muthiñeke. Tate gha ni pa yoyiheya yi, ene noyofotji temba gha dimuka Mwana, shimengwa Wihe, no karo eshi mbadiko yu gha dimuka Wihe, shimengwa Mwana noyomuhe mbo ghana yi mu hokwera Mwana. Mwiye kukwange mwahe mwakakutwama namwe ha dimbeka, ame ne mbo na mu pa maturumuthero. Mu kukambeke djoko dhange no mu kuhongere kukwange. Yoyishi ame ne nomukamutjima ghoghuporothi no ghokukufupipitha no mbo muna wana maturumuthero muyitenda yenu. Yoyishi djoko dhange ne dhotu, nomupango wange ne ghuredhu.

Mañando ghoEvangelium.

SECOND SUNDAY IN ORDINARY TIME A

Shundaha ghoghuwadi ghomumwaka.

FIRST READING

Thitoya thokutanga. Jes. 49:3. 5-6

Mumbapira dha muporofeta Jesaya.

Ame ne na kutenda eshi ghu kare ghomunyenge ghomako; no ghu kare mupongoki wange kate kumahurero ghokaye

No ghaningire Fumu kukwange eshi: “Owe Isragheli ne ghomupikange; omu na kufumanekera nothinda.” Na pwire kufumaneka kughutho waNyambi, Nyambi wange dha karire dhongcamu dhange.

Pañanyi-ñanyi Fumu kuninga ghana kuninga eshi, yu gha ni tendire kutunda kungayaro dhange, eshi ni kare no mupikendi, eshi ni mu huthere Jakopu, no ni mu kongwedhere diko dyaIsragheli.

Fumu gha ningire eshi: “Eyi ne yirughana yoyipu kukoye eshi ghu kare ghomupikange, no kuhonga mako ghaJakopu, no kuhutha wa ha thigharire muIsragheli.

Ame ne na kutenda eshi ghu kare ghomunyenge ghomako; no ghu kare ghomughamweni wange kate kumahurero ghokaye.”

Mañando ghaNyambi.

Responsorial Psalm

Dimbokatji. Ps. 40: 2. 4.7-10.

R:

Nyambi wange, kutenda mahimeno ghoye, thothirumbera thange thokutanga.

GhoFumu, ame ne na rurire kumaghamweno ghoye. Naye gha fumberire kukwange, no gha yuvire yikumbera yomaghamweno ghange. Gha pakire dimbo dyodipya mukanwa kange, edi ne dya kudifumanekero kwaNyambi wetu.

R:

Nyambi wange….

Mbadi wa haka muyambo ghokupagha, ngambi ghoyidya, edi ghokukoñerera, ngambi ghomaharwero mbadi wa ghu kumbera, eyi wa hima We ne ghutawedhi. Yo na ghamberire eshi: ‘Ni neya, thika di ha yi ni tjangerire pakare-kare, murukwaro rokupeta.

R:

Nyambi wange…

Nyambi wange kutenda mahimeno ghoye, thothirumbera thange thokutanga, ňando dhoye ne moyo wange ghoghuhe.” Naghambire noyishamberera yoyikuru muthigongi eshi: “Yowe wa ni shutura.”

SECOND READING

Thitoya thoghuwadi. 1 Kor. 1:1-3

Mumbapira dhokutanga dhaMuposotli Paghulusi kwawakaKorinte.

Ñeke no thiraro kukwenu thaNyambi ghoWihetu naFumu Jesusi Kristusi

Yame Paghulusi, oyu ghapwa kutorora kumahimeno ghaNyambi, gha kre mupostoli waKristusi Jesusi, namuyendhendi Sostenesi.

Kwawambunga dhaNyambi hoMukorinte, awa gha pongorire no wa hetha eshi ha kare hahati wendi. No karo kwawahe ngambi ku ha di kwakonako. Awa hetha Dina dyaJesusi Kristusi ghoFumu wawo no Hekudyetu. Ñeke no thiraro kukwenu thaNyambi ghoWihetu naFumu Jesusi Kristusi!

Mañando ghaNyambi.

Gospel Acclamation

Halleluja. Jn. 1:14.12

Ñando dha karire munu no dha tungire pakatji ketu. Ene wahe wa ha mu tamburire no ha tawire kuDina dyendi, gha wa pire ngcamu dhokukara hana Nyambi.

Alleluya!

Evangelium. John. 1:29-34

Marundwerero ghoyitjanga yaJohannesi.

Oya ne yoNdjwighana waNyambi ghokutumbura maharwero ghawanu

Mudiyuwa dyokuranda ko, apa ghamonine Johannesi, Jesusi ghana kwiya kukwendi no gha ningire eshi: “Oya ne yoNdjwighana waNyambi ghokutumbura maharwero ghawanu. Oyu ne yon a tongorire eshi: “Munyima dhange mbo gha neya murume yu gha ni piterera, yoyishi yomutango ndani me.” Ene mbadi namudimukire name temba eshi yidye Yu. Ame ne neyire kukuyogha nomeyu, ni mu dimukithe Ye kwawaIsragheli.”

Johannesi gha rundururire shime manongweneno eshi: “Na monine Mupepo yira dikutji ghuna kushuruka mudiwiru, ha wa temberire papendi. Name mbadi na mu dimukire pakutanga eshi yidye Yu. Ene Nyambi yu gha ni tumine kukuyogha nomeyu, yo gha ni tongwerire eshi: ‘Oyu mbo ghu mona ghuna tembera Mupepo papendi, yoghokuyoghitha noMupepo ghoKupongoka.” Na yi monine nothinda yon a kunongonona eshi: Aye ne Mwana Nyambi.”

Mañando ghoEvangelium.

THIRD SUNDAY IN ORDINARY TIME

Shundaha ghoghuhatu ghomumwaka.

FIRST READING

Thitoya thokutanga. Jes. 8:23-9:3

Mumbapira dha muporofeta Jesaya.

Mayuwa ghaya ghana kapita Fumu gha komononine ditunga dyaZebulun noditunga dyaNaphtali, ene mumayuwa kughutho mbo ghana tapa difumanekero mundhira dhodikuruviya thambo diya dhaJordani, kuyirughana yomatunga.

Diko di dya yendaghurire mumakokore, dya monine thishe thothikuru nawa ha tungire muditunga dyomumumvure ghokufa awo ne thawa sheghenyenine thishe. Owe wa vuritha diko, no wa kuritha yishamberera yawo.

Awo ne kushamberera hana kushamberera kughutho ghorupara roye, no kushamberera hana kushamberera yira munu yu ghana kushamberera pamukesho, no yira munu yu ghana kushamberera pakuwatapera eyi hana kungura muyita.

Yoyishi djoko dhi dha wa dhekire nothitondo thi ha wa pumurithire pamighongo dhawo, tha pemukithire mayira ghawakakuwamwashura. Ene we, Fumu, wa yi tjodhaghurire thika di ya karire mudiyuwa dyawakaMidiyani.

Mañando ghaNyambi

Responsorial Psalm

Dimbokatji. Ps. 27: 1. 4.13-14.

R:

Fumu ne munyenge wange no mughamweni wange.

Fumu ne munyenge wange no mughamweni wange; oyu sho ni yape ne dye? KwaFumu ne thinu thofotji na kumbera ko, ethi ne mbo na thikuthu: eshi, mumoyo wange ghoghuhe, mbo na tungu mundhugho dhendi, ho mbo ni ka wane mo ghuhunga wendi, no kuyivuruka muTembeli wendi.

R:

Fumu ne…

Ngo mbadi na tawire eshi, mbo na ka mona ghuhunga waFumu, muditunga dyawayumi! Taterere kwaFumu! Tanare no tjimape!

Kemo, taterere kwaFumu!

SECOND READING

Thitoya thoghuwadi. 1 Kor. 1:10-13.17

Mumbapira dhokutanga dhaMupostoli Paghulusi kwawakaKorinte.

Ame na kummkumbera mwayendhange mwahe, muDina dyaHekudyetu Jesusi Kristusi eshi, mwahe mukare pofotji. No pa kara makuyakunukero pakatji kenu. Mu kununge pofotji muyikara yofotji no muyighayara yofotji. Ame na kughamba yinu yi mwayendhange. Yoyishi Hakakoloye ha ni thimwetwedherire eshi, mbadipo makuyuvero pakatji kenu. Po na kuningera me eshi, ghumweya kughamba ghana kughamba eshi: “Ame ne waPaghulusi.” Ghumweya eshi: “NoMukaapolosi me” Ghumweya eshi: “Ame ne waKristusi.” Oyu Kristusi nene, ne muyipindhi ha mu tetaghura ndi? Paghulusi ne ha mu mupamarera mwe ndi? Endi mudina dyaPaghulusi ha mu yoghera mwe?

Kristusi mbadi gha ni tumine kukuyogha keho, ene ni yuvithe karo mbudhi dhodhiwa. Keho kadi nomañando ghoghunyanyami. Yoyishi maghana shod hi yongare ngcamu dhothikurushe thaKristusi.

Mañando ghaNyambi.

Gospel Acclamation

Halleluja. Mtt. 4:23

Ko kuyendaghura kwendi muGalileya yomuhe, no gha hongire hanu mumasinagoge ghawo, no gha wa yuvithire mbudhi dhoghufumu no gherukithire kehe thikorwa noyinyanda yoyihe yodiko.

Halleluja

Evangelium. Mtt. 4:12-23

Marundwerero ghoyitjanga yaMateghusi.

Gha ka kuhorekire muKafarnaghumu shime gha hokwera mukuyenda ko kumbumba shi kemo sho yi rikanye eyi gha ghambire muporofeta Jesaya

Apa gha yuvire Jesusi eshi, Johannesi ne ghana mu paka Herodesi mudorongo, ko kuyenda kwendi kuGalileya. Ene mbadi gha karire nako tango muNasareti. Gha ka kuhorekire muKafarnaghumu kudikuruviya, muthiko thaSebuloni naNafitali. Kemo sho yi rikanye eyi gha ghambire muporofeta Jessya eshi:

“Owe ditunga Sebuloni, nowe ditunga Naftali, kudikuruviya nothambodiya dhaJordani, Galileya omu ha tunga hahayidena!

Diko edi dya tunga mumakokore, dina mono thishe thishokuru awo ha para mumumvure ghokufa, thina wa yandhurukera thishe.”

Kutunda po ko kutanga Jesusi kuyaghura no gha ningire eshi: “Mu piruke, yoyishi ghufumu ghodiwiru ne pepi ghu di.”

Diyuwa dimweya apa gha yendhaghurire Jesusi kumbadi dhodikuruviya dyaGalileya, ha mono kwendi hanu naminendi: Simoni, oyu ha tire karo Petrusi, naminendi Andreyasi. Awo ku hana kuvukumena dikwe mudikuruviya, yoyi ha karire harutegha thi. Ha ningi kukwawo eshi: “Mwiye kuno! Na mu tu yende pofotji no mbo na mu tendi mwarutegha hanu.”

Nawo ko kuthigha wangu makwe no ha mu kuthire munyima apa gha yendire shime kughutho, ko kumona kwendi karo hanu naminendi hamweya. Jakobusi ghomwana Sebedeghusi naminendi Johannesi. Awo ha karire muwato nawihawo, oku hana kuroghitha makwe ghawo. Jesusi gha wthire, nawo ha thighire wato nawihawo wangu no ha mu kuthire.

Ko kuyendaghura kwendi muGalileya yomuhe, no gha hongire hanu mumasinagoge ghawo, no gha wa yuvithire mbudhi dhoghufumu no gherukithire kehe thikorwa noyinyanda yoyihe mukatji kawanu.

Mañando ghoEvangelium.

FOURTH SUNDAY IN ORDINARY TIME

Shundaha ghoghune ghomumwaka.

FIRST READING

Thitoya thokutanga. Zep. 2:3;3:12-13

Mumbapira dha muporofeta Zefaniya.

Mushane mwahe Fumu, aye ne mukomononi ghokaye, oyu gha rongeka yoyihe yoyiwa; mushane ghuhunga, nomakumbirupitho:

Ngwa mbo muna wana mondo mudiyuwa dyoghupata waFumu.

Mukatji kenu mbo na thighi nokukomonona hanu wa hana kukutha miragho dhange, awa mbo ha thighara muIsragheli mbo hana shana mondo mudina dyaFumu.Mbadi mba yipitha karo, mbadi mba tongora karo ghumbango; no marudimi ghomurandu mbadi mba kara karo mutunwa twawo. Ene mbana kono kudya nokuturumutha no mbadiko yu mba wa henerera karo.

Mañando ghaNyambi.

Responsorial Psalm

Dimbokatji. Ps. 146:7-10.

R:

Hakaruvigha awa ha kudimuka eshi hahepwe kughutho waNyambi, yoyishi wawo ghufumu ghodiwiru.

Aye gha neghedha ghuhunga kwawakakunyanda, no gha pwedhumuna hakakufa ndhara. Fumu gha komonona hakañotwa.

R:

No gha monitha hakunga. Fumu, gha ghamwena wa hana kupetha.

No Fumu, gha haka hahunga. Aye gha kunga hanumaghana, no gha ghamwena hathighana nawadidhi.

R:

Ene Ye gha pititha mayira ghawakakushwena Nyambi. Fumu gha raghura kuroruhe. Owe Siyoni, Nyambi ghoye gha raghura kutunda kwawanahoka kate kwawaneghani.

SECOND READING

Thitoya thoghuwadi. 1 Kor. 1:26-31

Mumbapira dhokutanga dhaMupostoli Paghulusi kwawakaKorinte.

Mughayare vene mwayendhange eshi, ngepi di mwa karire apa ha mwithire. Thika di ha ghayara hanu, mbadi pa karire hakakukuhonga hohengi, ngambi hatungi hohengi, ngambi hakamakuto hohengi. Ene yi ya kara yithuta pakaye, gha yi torora Nyambi eshi, ha fithe honyi hakakukuhonga. Hakashu hopakaye ghawa torora Nyambi ha fithe honyi hakangcamu. Nawa hapirire dikuto pakaye ngambi kupira dina, karo kemo wa ha kara nyara-nyara, ghawa torora Nyambi eshi, ha dhongonone thi tha kara thinu. Yodigho, mbadiko yu gha kara nothinu ethi shot hi mu fumanekithe kughutho waNyambi. Matumero kwaNyambi eshi mwe ne mwa kupakerera naKristusi Jesusi. Aye gha tu karerire ghunya-nyami ghu wa tunda mwaNyambi eshi: mathigherero, ghupongokithi no mashutwero. Yodigho thika di ha yitjanga eshi: “Oyu ghana kukukutekera, gha kukutekere mwaFumu.”

Mañando ghaNyambi.

Gospel Acclamation

Halleluja. Mtt. 11:25

Na kukukugha we Tate, Fumu ghodiwiru noghomuve, yoyishi wa hokorire yinu yi kwawanyanyami no kwawakakukuhonga, no wa yi hokorire kwawanu vene.

Halleluja!

Evangelium. Mtt. 5: 1-12

Marundwerero ghoyitjanga yaMateghusi.

Hakaruvigha awa ha kudimuka eshi hahepwe

Apa gha monine Jesusi mbunga dhawanu, ko kudhina kwendi kudirundu. Pakuhungumana, heyire hakathishongero wendi kukwendi, no gha tangire kuwahonga.

“Hakaruvigha awa ha kudimuka eshi hahepwe kughutho waNyambi, yoyishi wawo ghufumu ghodiwiru.

Hakaruvigha hakakutokota, yoyi mbana wa hengaghura.

Hakaruvigha haturumiki, yoyi mbana wana ditunga edi ha wa turekera.

Hakaruvigha hakakufa ndhara nodinota mughuhunga wawo, yoyi mbana wekutitha.

Hakaruvigha hakathiňeke, yoyi mbo hana wa neghedha thiňeke.

Hakaruvigha awa ha kushuka mumutjima, yoyi mbo hana mono Nyambi.

Hakaruvigha hakakutenda thiraro,

Yoyi mbo hana wa toyo hana Nyambi.

Hakaruvigha awa ha mona rupetho payitenda yawo yoyihunga, yoyishi wawo ghufumu ghodiwiwru.

Mwakaruvigha mwe ngeshi hana kumushamuna no kumukutha-kutha no kumurundera yoyimango muDina dyange. Mu shamberera no mu shogherere, yoyishi ghushwi wenu ghomudiwiru ne ghukuru.

Mañando ghoEvangelium.

FIFTH SUNDAY IN ORDINARY TIME

Shundaha ghoghukwoko ghomumwaka.

FIRST READING

Thitoya thokutanga. Jes. 58:7-10

Mumabpira dha muporofeta Jesaya.

Thishe thoye mbo thina sheghenya yira kuva kodiyuwa

Dyo ghana kughamba Fumu eshi: ghuyondwere ko ghuroto yu ghana kufa ndhara nawakakunyanda no kwingeneka mundhugho hayirendarendi hokupira mayugho ndi? Mu vateke hakathiheha no wa shwena kundeka yirama yoye. Ndani mbo thi sheghenye yira kuva kodiyuwa no yitombo yoye mbo yi neruka wangu, no ghuhunga ghoye ne mbo ghuna kukungu. Mbo ghu netha no Nyambi ne mbo ghana kutawa; mbo ghuna mwitha no mbo ghana kutawa eshi: “Yame no.” Ngeshi mbo tundithe po djoko hakakunyanda, no kunegha munwe no kughamba ghushemwa kwaNyambi. Kwikutitha hakandhara no kuhengaghura awa ha di muyinyanda ha wane mahengawero, ngo mbo thina sheghenyena thishe thoye mumakokore ghakare mutwekatji.

Mañando ghaNyambi.

Respnsorial Psalm.

Dimbokatji. Ps. 112: 4-9.

R:

Thishe thina kusheghenya mumakokore kwawahunga, kwawakathiñeke nawahungami.

Thishe thina kusheghanya mumakokore kwawahunga kwawakathiñeke nawahungami. Mukaruvigha oyu ghokutapa no kufera ñeke,

ghokurongeka mirandu dhendi mughuhunga.

R:

Thishe thina…

Yoyishi mbadi mbo gha wa, muhunga, mbo ghana kara mudighano dyokuroruheya. Mbadi wa kuyapa mbudhi dhodhiyi; matawero ghendi ne ghangcamu no kukurupera mwaNyambi.

R:

Thishe thina…

Aye mbadi gha kudhekera no kyapa temba aye ne gha kara noghushemwa ghokumyaghedha hakañore dhendi. Ghana kutapa yitapa kwawahepwe, no ghuhungami wendi ne mbadi mbo ghu w ambo ghana kara ngcamu no kumukutekera.

SECOND READING

Thitoya thoghuwadi. Kor. 2:1-5

Mumbapira dhaMupostoli Paghulusi kwawakaKorinte.

Amen e neyire mu kukara mushupi no mu kuyuvitha eshi Kristusi ne ha mupamarerire

Kukwangeko me, mwayendhange, apa neyire kukwenu na ni mu yuvithe thithithatero thokuyara thoghushemwa waNyambi. Mbadi neyire nomañando ghomakuru, ngambi yitwetha yokupiterera. Ame ne mbadi neyire nodighano dyokughamba nenu yayo-nayo, shimengwa yokwaJesusi Kristusi yu ha pamarerire. Ame na dimukire ghukashu wange nowoma ghoghukuru noghututkwa apa neyire kukwenu mbudhi dhi na yuvithire dho dhina mu tawitha. Kadi muyitwetha no muyighamba mwene, ene pangcamu dhothirughana thaMupepo. Yodigho, matawero ghenu maghana ghemana mughunya-nyami wawanu, ene pangcamu dhaNyambi.

Mañando ghaNyambi.

Gospel Acclamation.

Halleluja. Jn. 8:12

Parumweya gha ghambire Jesusi kwawanu eshi: “Yame munyenge ghokaye. Oyu ghokunikutha, mbadi mbo gha yendaghura mumakokore, ene mbo ghana wana munyenge ghokutapa moyo.”

Halleluja!

Evangelium. Mtt. 5:13-16

Marundwerero ghoyitjanga yaMateghusi.

Yamwe munyenge ghokaye

Jesusi gha ghambire kwawakathishongero wendi eshi: “Amwe ne mwamungwa ghomuve, ene ngeshi ghuna hamupa mungwa ne no nye sho gha ghu tove munu, ghu kare mungwa mwene? Ghumango vene keho. Hasha kughumwaghera panunda, ha ghu djata-djate hanu.

Yamwe munyenge ghokaye. Mbara kadi dha kukona kundeka, ngeshi ku dha tenama padirundu.

Karo kemo shi minyenge dhenu dhakona kumunekera kuthitunu meho thawanu yoyishi awo pakumona yirughana yenu hakone kutapa

dikukufumanekero kwaWihenu ghomudiwiru.

Mañando ghoEvangelium.

SIXTH SUNDAY IN ORDINARY TIME

Shundaha ghoghukwoko noyofotji ghomumwaka.

FIRST READING

Thitoya thokutanga. Eccle. (Sirag) 15:15-20

Mumbapira dhaSirag.

Aye ne mbadi gha rawerire hanu eshi ha harure

Ngeshi muna shana, mwakona kukwata miragho dhendi nowe kukona kuyitjwathanitha eshi: Ghu tende mahimeno ghendi. Ngeshi wa kurupera papendi, mbo ghuna para mughushemwa. Mudiro no meyu ha yikupa kughutho ghoye, ghonyonone dyoko dyoye koyi wa rumbera. Kughutho wamunu ne moyo no kufa, kuyinu yoyihe yi gha rumbera, mbo hana yimupa. Kamwaghamwagha ghunyanyami waFumu mukangcamu no mukakumona yoyihe.

Meho ghaNyambi ne ghana kumona yirughana yendi no yitenda yakehe yu. Mbadi gharawerire hanu eshi haharure no mbadi ghapire mangcamu kwawakaghumbango, no mbadi ghana kufera ñeke kwawakakutenda yinu yokupira ngcamu endi ko yu ghadhira kuhokora yoghudhindo.

Mañando ghaNyambi.

Responsorial Psalm

Dimbokatji. Ps. 119:1-2. 4-5. 17-18.33-34.

R:

Hakaruvigha hakakuyendaghura mumiragho dhaNyambi!

Mukaruvigha mukakukunga hashupi wendi, aye gha shana mitjima dhodhihe.

R:

Hakaruvigha…

Yowe wa tapire marawero ghoye tug ha kunge mumakuruperero. Kenithe mayira ghange ene ghukukutu kukugha marawero ghoye.

R;

Hakaruvigha…

Tende ghuhunga kwamupikoye, eshi ni kone kupara ndani mbo ni kunga ňando dhoye. Yandhurure meho ghange eshi ni kone kumona yitetu yomuragho ghoye.

R:

Hakaruvigha..

Hekudyange ni honge ndhira dhomiragho dhoye, eshi ni kone kukunga miragho dhoye kate paghuhura. Ni pe ko maghano eshi ni kunge miragho dhoye, kukona kudhikunga mitjima dhodhihe.

SECOND READING

Thitoya thoghuwadi. 1 Kor. 2:6-10

Mumbapira dhokutanga dhaMupostoli Paghulusi kwawakaKorinte.

Nyambi ne gha paka po ghunyanyami ghokuroruheya kate kudifumanekero dyetu

Shemwa yi tuna kuyuvitha ne yaghunya-nyami. Ene kwawa ha yidimuka keho. Ndani ghunyanyami ghu ne, kadi wakaye kano ngambi hapanguri hokaye kano. Awo ne karo ha tunda po pano. Eyi tuna kuyuvitha ne ghunyanyami waNyambi. Ghushemwa ghothithithatero ghu wapwa kundeka no ghu gha pakire po Nyambi kuroruhe kudifumanekero dyetu. Noyofotji temba muraghuri ghokaye kano yu gha ghu dimukire ghunyanyami ghuno. Ngo ha ghudimukire, ngo mbadi ha pamarerire Fumu ghomukadikuto. Ene thika di yapwa kutjanga eshi: ‘Eyi dya kumona diho no yi dya dhirire kuyuva ditwi,” no yi yadhira kutwa kumutjima wamunu, Nyambi ne gha yiroghithera koyu gha mu haka.

Kukwetu gha yi dimukithire Nyambi paMupepo. Yoyishi Mupepo wa rondonona yinu yoghudhungi ghoyoyihe. Ngambi yoghudhungi waNyambi.

Mañando ghaNyambi.

Gospel Acclamation. Mtt. 11:25

Halleluja

Na kukukugha we Tate, Fumu ghodiwiru noghomuve, yoyishi wa hokorire yinu yi kwawanyanyami no kwawakakukuhonga, no wa yi hokorire kwawanu vene.

Halleluja

Evangelium. Mtt. 5:17-37

Marundwerero ghoyitjanga yaMateghusi.

Kemo ya pwire kughamba kwawanu hopakare; ene name kuna kuyimutongwera

Jesusi gha ghambire kwawakathishokero wendi eshi: “Mwaghayara eshi neyire kukushutura muragho ngambi haporofeta. Mbadi neyire kukushutura ene kukurikanyitha yoyiheya. Ghushemwa na kumutongwera yi: Diwiru no muve mbo yinapu, kumuragho waNyambi ne mbadi mbo ka tunda ko nokamyandhu-myandhu temba oku mbadi na rikanyitha yoyiheya me. Oyu ghokushutura kumuragho ngambi kambiru-mbiru na kuhonga kemo hanu, mbo hana piri dikuto mughufumu ghodiwiru. Yoyi na kumutongwera eshi: Ngeshi mbadi sho ghupiterere ghuhunga wenu kughuhunga wawakamarukwaro nawaFarasayi, ngo mbo mukufere eshi ko kwingena mughufumu ghodiwiru.”

Mwayuva edi ya ghamba kwawakuru eshi: “Wa pagha; no kehe mukakupagha mbana mu twara kundhango.”

Ene na kumutongwera eshi: Kehyu ghokupatera muyendhendi, gha pwa kutetera kare ndhango. Karo kehe yu ghokumangopitha muyendhendi kumandengure, ghana kupwa kutetera kundhango dhishokuru. Noyu ghokushwahura muyendhendi eshi ghodibotwa, ghna kupwa kutetera mudirara dyo mudiro.

No ku ghuna twara ndhupu dhoye kualtare munyima ghuna kuvuruka eshi thinu pakatji koye namuyendhoye, thi thighe tango popo paaltare no ghu yende tango ghu katende thiraro namuyendhoye, pos ho ka huke na ghu tupure thitapa thoye.

Ngeshi ku ghuna tendi murandu kwamuyendhoye, ghu kwinduke wangu kukuyuva namuyendhoye oku shime mwa karera mundhira dhokundhango. Maghana sho gha kutware kwamupangure, namupanguri sho gha kutape kwawamaporitha, nawo maghana sho ha kupake mutorongo. Shemwa na kukutongwera: Mbadi wa kona kushwagha mo oku mbadi ghuna mana kuruwera kasende kohura.

Mwa yuva edi ha ninga eshi: “mbadi wakona kutjora mayekero.” Ene me na kumutongwera eshi: kehe yu ghokukengururra mukamadi nokumurumbera, ghana tjoro mayekero nendi mumutjima wendi. Ngeshi ha di kutemaghuritha diho dyoye dyorudyo, di korongoremo no ghu di tundithe papoye ghu dimwaghe. Yoyishi hasha papoye kutunda po thipo thofotji, kadi yira wa kumwagherera yirama yoyiheya mudirara. Endi ngeshi ha di kuharuritha dyoko dyoye dyorudyo, di tete ko no ghu di mwaghe. Yoyishi hasha kukoye ngeshi ha thi tundu po thipo thofotji kuyirama yoye, kadi yira wa kuyimwagherera mudirara.

Apa ya ninga eshi: “Kehe yu ghana kuyakunuka kwamunu wendi, gha mu pe ndani mbapira dhomakuyakunukero.” Ene na kumutongwera eshi: Yomuhe ghokukuyakunuka namunu wendi, pamurandu ghoruhonda, ghana tjoro mayekero. Noyu ghokukuyeka namukamadi ghokukuyakunuka naghumweya, ghana tjoro naye mayekero.

“Shime mwa yuva karo kwawakuru di ha ninga eshi: “mbadi wa kona kwedha mbango, no yi wedha kwaFumu, ghu kone kuyikutha.” Ne, na kumutongwera eshi: Perere poye eshi wedhe, nokudiwiru temba, yoyishi dyodipuna dyaNyambi. Nokumuve temba, yoyishi dyodimbaro dyendi. NokuJerusalema temba, yoyishi dhombara dhaFumu shokuru. Karo perere poye eshi wedhe kumutwi ghoye, yoyishi mbadi wa kona kutenda kahuki kofoftji ka kare kekenu ngambi keru. Ngo mutawe vene eshi kemo ngambi kadi kemo. Yoyishi wingi wayo yi, mughuyi yina kushwagha.

Mañando ghoEvangelium.

SEVENTH SUNDAY IN ORDINARY TIME

Shundah ghoghukokwo noghuwadi ghomumwaka.

FIRST READING

Thitoya thokutanga. Lev. 19:1-2.17-18

Mumbapira dha Levitikusi.

Hake hayendhoye thika kenge di wa kuhaka ghothinda

Gha ghamberire Fumu kwaMosesi eshi: Tongwere mbunga dhodhihe dhawanaIsragheli eshi: Ha pongoke yoyishi ame Fumu ghoNyambi wenu ne na pongoka.

Mbadi wa kona kunyenga muyendhoye mumtjima ghoye. Wakona kushutuka no kumutongwera, muyendhoye mirandu dhendi, mundhira dhi mbadi mboghukara no mirandu ghothinda. Mbadi wakona kuhutha ghuyi kwamuyendhoye, no mbadi wakona kukara no ghumbango kwawana ghodiko dyoye. Wa kara ghukore nothinyenganyi kudiko dyoye, ene hake muyendhoye thika kenge di wa kuhaka ghothinda. Yame Fumu Nyambi ghoye.

Mañando ghaNyambi.

Responsorial Psalm

Dimbokatji. Ps. 103: 1-4. 8. 10.12-13.

R:

Fumu gha kara nothiňeke thishokuru.

Kughe Fumu ghomudhimu wange! Yoyihe yi ya kara mumwange yi kughe dina dyendi dyokupongoka! Kughe Fumu ghomudhimu wange, no wa vurama ko eshi ngepi ghuhungami wendi.

Fumu gha kara…

Fumu ghana kunithigherera maharwero ghange, no ghana kwirukitha yikorwa yange yoyihe. Ghana kunitunditha kumbira no kunikandadheka noruhakitho nothiňeke.

R:

Fumu gha kara..

Fumu ne mukathiňeke noruhakitho, rupu gha tapanga gha yara noruhakitho rokuroruhe. Mbadi gha tu mwashuranga popayitenda yetu no kutufikitha temba kumaharwero nokumaghuyi ghetu. Yira kayenda ko kudiva kutunda kuditokera, kemo kayenda ko kenge ghana kudhongonona mirandu dhetu. Thika di ghana feranga wihamunu hanendi ñeke, kemo dyo gha feranga naye Nyambi ñeke awa ha mukutekera.

SECOND READING

Thitoya thoghuwadi. 1 Kor. 3:16-23

Mumbapira dhokutanga dhaMupostoli Paghulusi kwawakaKorinte.

Yoyihe ya hamena kukwenu, ene mwe ne mwa hamena mwaKristusi naKristusi ne mwaNyambi

Mbadi mwa yidimuka eshi, mwatembeli waNyambi mwe ndi, no Mupepo waNyambi ne mumwenu wa tunga? Ngeshi munu ha ghambaghura tembeli waNyambi, naNyambi mbo ghana mu dhongonona. Yoyishi tembeli waNyambi ne gha pongoka, no tembeli yu ne yoyamwe. Mbadiko yu gha kona kukwangera thinda. Ngeshi ha ghayara ghumweya ghopapenu eshi ye ne munyanyami muyinu yopakaye. Mu thighe gha kare muthuta eshi, mbo gha kone kukara munu ghomunya-nyami shemwa. Yoyishi ghunya-nyami ghokaye kano, kwaNyambi ne ghuthuta. Yapwa kutjanga eshi:

“Aye ghana kukwata hanya-nyami ghunya-nyami wawo.”

Muthipidhi thimweya eshi:

“Fumu gha dimuka yindhundha yawanya-nyami no gha yidimuka eshi yapira mudyo.”

Yodigho, gha kutanawera ghumweya pawanu. Yoyiheya yin e ya kara yenu. Ngambi Paghulusi, ngambi Apolosi, ngambi Kefasi, ngambi kaye, ngambi moyo, ngambi yoñanyi-ñanyi, ngambi yokughutho, yoyiheya yenu. Ene mwe, mwakara waKristusi, naKristusi ne mwaNyambi.

Mañando ghaNyambi.

Gospel Acclamation.

Halleluja. 1 Jn. 2:5

Ene kehe yu ghokukunga ñando dhaKristusi mumwendi wa yara ruhakitho rwaNyambi.

Halleluja!

Evangelium. Mtt. 5:38-48

Marundwerero ghoyitjanga yaMateghusi.

Mu hake hañore dhenu

Jesus gha ghambire kwawakathishongero wendi eshi: Mwa yuva edi ya ninga eshi: “Diho kudiho, diyegho kudiyegho.” Ene na kumutongwera eshi: Mwa koñomeka munu ghomupata. Ngeshi ha kungcambura ghumweya ditapa dyorudyo, mu pirwere karo ditama dimweya. No ngeshi ghumweya ha shana kukutwara kundhango, no ghana shana kukuhurura thokwishi, mu pe karo thopeghuru. No karo ghumweya ha kuthineneka eshi, ghu mu shimbere thinu thendi kilometeri yoyofotji, thi mu shimbere we kilometeri mawadi. Mu pe yu ghana kukukumbera thinu, no wa yumena mukakukuyadhima.

Shime mwa yuva ya ninga eshi: ‘Hake muyendhoye no ghu dhimbe ñore dhoye. Ame ne na kumutongwera eshi: Mu haka hañore dhenu, no mu raperere hakakumukutha-kutha. Kemo sho mu kare hana Wihenu ghomudiwiru. Aye gha sheghenyithera diyuwa dyendi kwawamango nokwawahunga. No gha rokitha mvura wendi kwawakakutenda ghuwa nokwawakakwipitha. Yoyishi ngeshi ha mu haka keho wa ha mu kaha ne, yiruwera munye sho mu wane po?

Mbadi hana tendanga haketethi nawo kemo ndi? Endi ngeshi ha mu rumeritha hayendhenu keko, nye muna kutenda yokupiterera hamweya? Mbadi hana kutenda hahayidena nawo kemo ndi? Mu kare mwahunga thika di ghahungama Wihenu ghomudiwiru.

Mañando ghoEvangelium.

EIGHTH SUNDAY IN ORDINARY TIME

Shundaha ghoghukwoko noghuhatu ghomumwaka.

FIRST READING

Thitoya thokutanga. Jes. 49:14-15

Mumbapira dha muporofeta Jesaya.

Mbadi mbo ni kuvurama

HakaSiyoni haningire eshi: Nyambi ne ghana tu thighi! Ghana tu vurama! Nyambi ghana kuhutha eshi: “Kukona kuvurama mukamadi kambututu kendi ndi no kudhira temba kuhaka mwanuke yu ghana shamuruka? Ngambi ngo ghavurame mukamadi mwanendi ghamukange kukorera mwanendi ghomumukogha wend, ame ne mbadi mbo ni mu vurama.

Mañando ghaNyambi.

Responsorial Psalm.

Dimbokatji. Ps.62:2-3.6-9.

R:

Ghu kare thipore ghomudhimu wange kate kwaNyambi.

Yodighe pithendi yo ghana kunighamwena no kunikunga; Aye ne yomughamweni wange mbadi mbo ha kona kuniwitha. Aye pithendi yodiwe nomughamweni wange, maturo ghodiwe dyange; mbadi mbo ni pundaghuka thikuma.

R:

Ghu kare..

Aye pithendi yo ghana kunighamwena no kunikunga aye ne yomughamweni wange mbadi mbo ha kona kuniwitha. Ghupongoki wange nodikuto, ya kara kwaNyambi; aye ne no mughamweni wange ghongcamu: “Aye ne yomondo ghange.

R:

Ghu kare..

Mu kurupere mwaNyambi maruvedhe ghomahe, mu muthimwetwedhere maghukukutu ghenu, aye yomondo ghetu.

Mu kurupere kehepano papendi mwakadiko, mu shuture mitjima dhenu kughutho ghorupara rwendi!

SECOND READING

Thitoya thoghuwadi. 1 Kor. 4:1-5

Mumbapira dhokutanga dhaMupostoli Paghulusi kwawakaKorinte.

Hanu hakona kutughayarera eshi atwe ne twapika Kristusi. No hayendithi wa ha tapire yithithatero yaNyambi. Kwamuyendithi ya kara eshi shimengwa yu ha kurupera. Ene kukwange, mbadiko no kamanana temba makurupero ghopapenu, ghokutetera ngambi ndhango dhodipuna dyopathinaghunu. Karo no mbadiko karo thi thina kupetha maghano ghange. Ene mbadi yina kuninga karo eshi me ne ha yi ni fundhwera. Yodigho mbadi mwa kona kutetera kughutho, oku mbadi gha neya Fumu. Oyu mbo gha reta yinu yokunda muthishe no kuhokora yighayara yomumitjima kwaNyambi. Agha mbo gha tunda kwamunu thinda.

Mañando ghaNyambi.

Gospel Acclamation.

Halleluja. Jn. 17:17

Wa pongwera kukoye paghushemwa. Ñando dhoye ne ghushemwa.

Halleluja!

Evangelium. Mtt. 6:24-34

Marundwerero ghoyitjanga yaMateghusi.

Mwa kudhekera yopeghundha

Jesus gha ghambire kwawakathishongera wendi eshi: Mbadiko yu gha kona kurughanena hafumu hawadi. Aye ghana kudhumba ghumweya pamweya, no kufumaneka ghumweya. Ngambi ghana kutawa kwaghumweya no kunyatha ghumweya.

Yodigho na kumutongwera me: Mwa kudhekera ngambi yoyirama yenu eyi sho mu shupate. Moyo ne mbadi wa piterera yidya nane! Endi yirama ne mbadi ya piterera yivata? Mu mone kuyinyunyi: Ayo mbadi ya kuna no mbadi ya pokora no mbadi ya ghungura. Wihenu ghomudiwiru yo gha yi kunga. Amwe ne mbadi mwa yi piterera ndi? Endi po mu di mukatji kenu, yidye ne ghokukona kuwedherera moyo wendi kamanana pamurandu ghoyikudhekera yendi.

No nye muna kukudhekera kuyivata? Mu koneke eshi ngepi di dhina kumena mitemo dhomumuthitu: Mbadi dhina kutwama no mbadi dhina kuruka yivata. Ne na kumutongwera eshi: Ene ngambi kenge gha tungire Salomoni, mbadi gha kuyengire thika mutemo ghofotji. Ngeshi ha yengi Nyambi kemo muhonyi ghomumuthitu, oghu ghuna kukara po dyarero nokupeghundha ne hana kughutumekera. Ngepi keho di sho mu vateke ne mwe, amwe mwakamatawero ghomambiru?

“Yodigho mwa kudhekera no kuniga eshi: Nye sho tu dye endi nye sho tu new ngambi nye sho tu vate.

Yinu yoyiheya yin e ya kushana hakakupira matawero. Wihenu ghomudiwiru, gha dimuka eshi mwa nyanda yoyiheya yi. Yodigho mwandenge, mu shane tango pakutanga ghofumu waNyambi noghuhunga wendi, ndani po mbo gha mu pa yoyiheya yino. Mwa kudhekera yopandere, yoyishi dyopeghundha nadyo no yadyo. Kehe diyuwa dya kara nomaghukukutu ghadyo.

Mañando ghoEvangelium.

NINTH SUNDAY IN ORDINARY TIME

Shundaha ghoghukwoko noghune ghomumwaka

FIRST READING

Thitoya thokutanga. Deut. 11:18.26-28.32

Mumbapira dhaDeuteronomi

Dyarero na mu pa matorwero ghopakatji komakandadhekero nothikuto

Ko kughamba Mosesi kudiko ghuninga eshi: “Mu pungure mañando ghange mumitjima, nomumidhimu dhenu nomudhimu wange pofotji dhi kare thidimukitho panyara dhenu no dhi kare thikumba thokahungupara mukatji komeho ghenu. Mu mone dyarero na mu pa matorwero ghopakatji komakandadhekero nothikuto. Makandadhekero ne ngeshi kutegherera kumiragho dhaFumu Nyambi wenu edhi na mu rawera dyarero; no thikuto ne ngeshi mbadi wa kutegherera kumiragho dhaFumu Nyambi edhi na murawera dyarero ene kutunda mundhira edhi na murawera dyarero, no kuyenda munyima dhawanyambi hawo-nawo mwadhira kudimuka. Mwakona kukutha no kukwata dhodhihe miragho edhi namupa dyarero.

Mañando ghaNyambi.

Respnsorila Psalm.

Dimbokatji. Ps. 31:2-4.17.25

R:

Ghu kare ghodiwe dyomondo ghange.

Ni yuve ni kunge keho! Kare ghomondo ghange mu kunighamwena; ghomughamweni wange ghokunikunga. Yowe mondo nomughamweni wange; ni raghure no nit ware thika di wa yi kuruperithire. Ni tundithe kuthiraha ethi ha ni tegha, ni ghamwene kumaghukukutu.

R:

Ghu kare…

Kuna kukwitha me ghoNyambi wa ni shwahura. Ngo shwahure hokudhira kutawa momoye ngo ha yende thipore kumaňando ghawahafa. Mu kare ngcamu mu kare noghutjima, mwahe mwe muna kukurupera mwaNyambi.

SECOND READING

Thitoya thoghuwadi. Rom. 3:21-25.28

Mumbapira dhaMupostoli Paghulusi kwawakaRoma

Munu kuhungama pamatawero kadi payirama yomuragho

Ene pano ghuhunga ghu ghatapa Nyambi gha ghu hokora, ne kadi pathina muragho. Eyi ne ya ghu nongonona muragho nawaporofeta. Oghu ne ghoghuhunga ghopamatawero mwaJesusi Kristusi. Ghuhunga ghu gha tapa Nyambi kwawatawi wahe. Eyi ne yapira makutjakero. Yoyishi wahe ha harurire, no mbadi ha yerena kughufumu waNyambi oghu gha turekerire munu. Ene wa hana kuwana thiñeke nyara-nyara mughuhunga pamakomweneno ghaKristusi Jesusi. Aye gha mu tapire Nyambi eshi gha kare muyambo pamanyinga ghendi, agha gha shemwithanithire hakakutawa. No muyinu yino, po gha neghedhire Nyambi eshi, Aye ne mukaghuhunga. Yino ya kona kukara kemo, yoyishi Aye ne mbadi gha mwashurire wangu maharwero mughudhughutjima wendi. Yighayara yetu, kehe munu ngo gha hungame mumatawero, mbadishi pakutenda eyi waturawera muragho.

Mañando ghaNyambi.

Gospel Acclamation

Halleluja. Jn 14:23

Ko kumuhutha Jesusi eshi: “Mukakunihaka, ghana kukunga mañando ghange mumutjima wendi, naTate ghana kumuhaka no mbo tuna yendi kukwendi no kutunga nendi.

Halleluja!

Evangelium. Mt. 7:21-27

Marundwerero ghoyitjanga yaMateghusi.

Ndhugho dhi ha tendire pamawe no ndhugho dhi ha tendire paruheke

Jesus gha ghambire kwawakathishongero wendi eshi: Mbadi yomuhe ghokuniga kukwange eshi: “Hekudyange, Hekudyange, ho mbo ghengene mudiwiru, shimengwa ghokutenda ndani mahimeno ghaTate ghomudiwiru. Hengi mba ninga kukwange mudiyuwa die shi: “Hekudyange, Hekudyange, mbadi twa yaghurire muDina dyoye ndi, nomuDina dyoye twa shwaghithithire hashatani, nomuDina dyoye twa tendire yitetukitho yoyingi?” po mbo ni wa tuywera eshi: “Shime ni shemwa eshi kumudimuka. Mu yakunuke kukwange mwe mwa regha muragho waNyambi.”

Yomuhe ghokuyuva mañando ghange ghano no kughatenda, ku kona kumurikanyitha namurume ghomaghano ghokutendera ndhugho dhendi padiwe.

Ko kuhotoka dihuru-huru dyomvura, divavure ha diya, dipepo dya dhudhumukire kundhugho dhi. Ene mbadi gha yundukire nokamanana temba. Yoyishi kashemandhugho, ka tenamine padiwe. No kehe yu ghokuyuva mañando ghange ghano, no mbadi ghana kughakutha, gha kona kukughanekera kwamukamandengure yu gha shokekera ndhugho dhendi pamuve ghodivegheya. Dihuru-huru dya hurukire divavure dya poposhire, dipepo dya dhudhumukire kundhugho dhi no kudhiyundura no kudhimbandawera.”

Mañando ghoEvangelium.

TENTH SUNDAY IN ORDINARY TIME

Shundaha ghodikumi ghomumwaka

FIRST READING

Thitoya thokutanga. Hos. 6:3-6

Mumbapira dhaMuporofeta Hoseya.

Ame ne na menyamenyena muruhakitho no mbadi mumuyambo

Mutuyi dimuke na mu tu kuthe mu kudimuka Hekudyetu ndhira dhendi ne dhaghushemwa yira kuwa kodiyuwa mbo gha neya kukwetu yira mvura, yira dikurahoke edi dina kuvetera kaye. Nye sho ni tende noye we Efraim nye sho ni tende noye we Juda? Mu kuyimona nee shi ruhakitho rwenu ne yira mavuyi ghomathiku-thiku, no yira mbundu edhi dhina kudhinguruka murughura. Yo na wa tetawerire mwawaporofeta, na wa paghire nomañando ghokanwa kange, mapangwero ghoye mbo ghana shwagha yira mushoro. Yoyishi me ne menyamenyena muruhakitho mbadi mumuyambo, no muyidimuka yaNyambi kupita mumuyambo ghokukoñerera.

Mañando ghaNyambi.

Responsorial Psalm

Dimbokatji. Ps. 50. 1.8. 12-15.

R:

Kehe yu ghokuthoteritha ndhira dhendi mbo muna vigharitha ghupongoki waNyambi.

GhoNyambi ghomukangcamu, Fumu ghana kughamba; ghana kwitha kaye kokahe kutunda kudiva kate ditokera.

Kumuyambo dhoye ne mbadi na kudhikumwashwera, ene miyambo dhoye dhokukoňerera ne kehe pano kughutho wange.

R:

Kehe yu..

Mu ninge yitapa yomatumero yi kare muyambo kwaNyambi, no mu tape kwamukangcamu yoyihe yi mwa kuruperitha.

SECOND READING

Thitoya thoghuwadi. Rom. 4:18-25

Mumbapira dha mupostoli Paghulusi kwawakaRoma.

Gha pwire kutanaritha mumatawero no gha tapire dikuto kwaNyambi

Apa papirire makurupero, Abrahamu ye ne ghatawire no gha kurupererire shime. No kemo dyo gha karire wiha ghomarudhi ghomengi, thika di ha yi mu turekerire eshi: “Dyo mbo ha kara hanahoka ghoye.” Matawero ghendi mbadi gha kasha. Ngambi kenge gha dimukire eshi ye ne mukuru-kuru. Yoyishi gha karire nomyaka dhokukuma kudithere dyofotji-naSara gha kuruparire naye kate gha dhirire kureta hana. Aye mbadi gha tamangerire kumaturekero ghaNyambi. Ene difumanekero kwaNyambi. Aye gha dimukire karo thiwana eshi, Nyambi gha kara nongcamu dhokutenda thi gha tureka. Eyi ne yo gha mu hungamekuthire. Ngeshi kuninga eshi, kukwendi pithendi ha tapire ghuhunga, ngo mbadi papendi pithendi ha yitjanga. Ene nomudina dyetu twahe karo gha kuyirikanyithera. Atwe twa tawa mwaNyambi yu gha tumunine Jesusi ghoHekudyetu mwawafu. Aye ha mu tapire pamurandu ghomaharwero ghetu. No ha mu tumunine eshi tu kone kuhungama.

Mañando ghaNyambi.

Gospel Acclamation.

Halleluja. Luk. 4:18

Mupepo waFumu papange ghu di yoyishi aye gha ni wetha ni yuvithe hahepwa mbudhi dhodhiwa.

Halleluja!

Evangelium. Mt. 9:9-18

Marundwerero ghoyitjanga yaMateghusi.

Mbadi neyire kukwitha hahunga ne hakamaharwero ndani

Oku shime ha runduruka Jesusi kuyendaghura kemo, ko kumona kwendi murume ghodina dyoMateghusi ghana hungumana mundhugho dhodiketo, no gha ningire kukwendi eshi: “Ni kuthe!” Naye ghemanine no gha mu kuthire. Jesusi gha yendire gha ka dye mundhugho dhendi. Haketethi hohengi nawakamaharwero, heyire ha dye pofotji nawakathishongero waJesusi. Apa ha yi monine Hafarasayi, ha ningire kwawakathishongero wendi eshi” “Nye ghana kudyera Muhongi wenu pofotji nawaketethi nawakamaharwero?” ene Jesusi gha yi yuvire no gha ningire eshi: “Oyu gha kara ndjewa-ndjewa, mbadi gha nyanda nganga, mukatjitju ndani. Mu yende mukakuhonge edi ya ninga yi: “Na haka thiñeke, kadi muyambo.” Yoyishi mbadi neyire kukwitha hahunga, ne hakamaharwero ndani.”

Mañando ghoEvangelium.

ELEVENTH SUNDAY IN ORDINARY TIME

Shundaha ghodikumi noyofotji ghomumwaka.

FIRST READING

Thitoya thokutanga. Ex. 19:2-6

Mumbapira dhaExodus (Mashwaghero)

Mbo muna ni karera mwapristeri ghoghufumu nodiko dyokupongoka

Kutunda muRephidim haIsragheli mumamboreya hafungurukire karono pakakumine mumamboreya ghaSinayi, hatendire mwara pakwamba matende ghawo. No Isragheli ghakarire padirundu.

Ene Mosesi gha dhinine padirundu ghayende kwaNyambi, no Fumu ghamwithire padirundu ghaningi eshi: “Kemo dyo sho katongore kudighumbo dyaJakopu nokwaIsragheli: Namwe mwathinda mwayikumonenine eyi na tendire kwawakaEgiptena no na mu shimberire pamando no na mu retire kukwange. Ngeshi ngo mu tegherere thikuma kudiywi dyange no kukoneka ghundambo wange mbo muna kara mwange mumako ghomaheya, yoyishi kaye kokahe ne kange. No mbo muna ni karera mwapristeri hoghufumu nodiko dyokupongoka.

Mañando ghaNyambi.

Responsorial Psalm

Dimbokatji. Ps. 100: 2-3.5.

R:

Atwe ne twadiko dyendi nomadyero ghondjwi dhendi.

Mu mwimbere Nyambi mwakaye kokahe! Mu mukanderere Nyambi noyishamberera; mwiye kughutho wendi nomembo ghoyishamberera!

Mwa vurama eshi Fumu ne yoNyambi. Yo gha tu tenda natwe ne twa hamena kukwendi, atwe twandjwi dhendi, nomawe ghendi.

R:

Atwe ne…

Yoyishi Fumu ne muwa noruhakitho rwendi ne rwakuroruheya nomakurupero ghendi ne ghakuroruheya kutunda kwawakerekandongo kate kwawanahoka.

SECOND READING

Thitoya thoghuwadi. Rom. 5:6-11

Mumbapira dha mupostoli Paghulusi kwawakaRoma.

Oku twe shime mbadi tuna wana haghamweno, ghafererire Kristusi hakakudhira kutawa mwaNyambi, munako dhi dhapwire kutureka kare. Munu, kadi wa kukona kutapa moyo wendi nyara-nyara. Ngambi muhunga naye, kadi ya kukona. Shemwa, kwamunu ghomuhunga mbo ghana tjimapa kufa. Ene Nyambi gha tu neghedha ruhakitho rokukwetu, paKristusi yu gha tu fererire. Oku shime twayiharuri. Yoyi twa hungama pamanyinga ghendi, yo yina karera ngeno eshi, paPendi mbo tupwa kughamwena karo kumahumbithero ghaNyambi. Kuninga eshi, apa twa karire shime twakaňore, payifa yaMwanendi. Keho ne kadi yoyi pithayo keho. Atwe karo tuna shamberera thikuma mwaNyambi, paHekudyetu Jesusi Kristusi. Papendi yu twawanine makushemwithanitho.

Mañando ghaNyambi.

Gospel Acclamation

Halleluja. Mk. 1:15

Eshi: “Nako ne dhina rikanya, no ghufumu waNyambi ghuna kokera. Mu piruke no mu tawe kumbudhi dhodhiwa.”

Halleluja!

Evangelium. Mtt. 9:36-10:8

Apa gha monine mbunga, gha dhi fererire ñeke thikuma, yoyi dha karire yira hakakukumwaghadhara no yira ndjwi dhokupira mudithi wadho. Ko kuninga kwendi kwawakathishongero wendi eshi: Mukesho ne ghukuru, havereki ne hapu. Mukumbere kwaFumu ghothinda shamukesho, eshi ghatume havereki kumukesho wendi.

Jesusi ghethire hakathishongero wendi dikumi nohawadi, no ghawapire ngcamu dhokushwaghitha mipepo dhodhimango no kehe thikorwa nodihamba dyodiheya.

Mena ghawapostoli dikumi nohawadi ne ghano: Mukakutanga ne Simoni oyu hatire karo eshi Petrusi, naminendi Andreyasi, Jakobusi mwana Sebedeghusi, naminendi Johannesi, Filipusi na Bertolomeghusi, Tomasi naMateghusi ghomuketethi, Jakobusi ghomwana Alfeghusi, naTadeghusi, Simoni ghomununeki, naJudas Iskaliyoti oyu ghahokorire Jesusi.

Jesusi ghatumine hashadikumi nohawadi nomarawerero ghano: Mbadi mwa kona kuhambukera mundhiradhawahayidena, mbadi mwa kona kwingena mudimaghumbo dyawakaSamaria. Muyende vene kundjwi dhokuyongara dhodiko dyaIsragheli. Muyende mukayuvithe eshi: GhuFumu ghodiwiru ne ghuna kokera.

Mukerukithe hakakukorwa, muka tumune hafu, mu ka kushukithe hakayiñondwe no mu ka shwaghithe hashatani. Amwe ne nyara-nyara muna yi tambura yi, kemo sho mu ka yi tape namwe nyara-nyara.

Mañando ghoEvangelium.

TWELFTH SUNDAY IN ORDINARY TIME

Shundaha ghodikumi noghuwadi ghomumwaka.

FIRST READING

Thitoya thokutanga. Jer. 20:10-13

Mumbapira dhaMuporofeta Jeremiya.

Aye ne gha komononine midhimu dhawakakunyanda munyara dhawapata

Po gha ghamberire Jeremiya eshi: “Na yuvire ndimi dhawahothi mu yape kokuhe! Mu mu shivanene no mbo tuna mu shivanena! Kwawanu wahe awa ha tunga muthiraro, hana kuthetuka kudihudhi dyange, ghuninga eshi: Ngwa ghana kuwa tongwera ghumbango, ndani po twa kumuyendera nonyinya dhodhikuru. Ene Fumu ne pepi nange ghadi, aye ne dipenda dishokuru, hakakunitaparara ne mbohaghu no mboyina wakanga. Hana kwimana ghufa honyi yoyi hana shwava, no ha di nodishwahu dyodikuru dyo kudhira kuvurama. Ene Fumu ghombunga oyu gha yerekanga hahunga, oyu gha monanga mathigho nomutjima, ninge ni mone di ghuna kutenda nyinya dhoye kwawanyathi wange, na tapa ditotot dyange munyara dhoye. Mwimbere Fumu, mum u kughe Nyambi gha komononine hahunga munyara dhawayi.

Mañando ghaNyambi.

Responsorial Psalm

Dimbokatji. Ps. 69:8-10. 14.17. 33-35

R:

Ghu ni yuvere mughukuru ghoghunongo ghoye Hekudyange.

Na shwahuka mumahimeno ghoye, yoyi honyi he dhina fiki rupara rwange. Na karire ghugenda kwawayendhange no mbadi ha ni dimukire hayendhange. Yoyishi ghutoghoro ghondhugho dhoye ne ghuna ni di, dishamu di ha kushamunine ne yina wera papange.

R:

Ghu ni..

Ene me ko, mbo na kuraperera Hekudyange, ni yuvere paghukuru ghoruhakitho roye, yoyishi wa paka makurupero ghoye mukukunga.

Ghu ni yuvere Hekudyange, mu ghukuru ghoruhakitho roye rokuroruhe.

R:

Ghu ni…

Ngeshi ha yi mone hakakunyanda yi, ñanyi ha shamberere awa hana kukarera Nyambi mbo muna hupura. Fumu ne gha tegherera kwawakakunyanda no mbadi gha vurama hakadorongo. Mu kughe Nyambi mwakadiwiru nomwakapamuve, dikuruviya noyoyihe eyi ya kara mo.

SECOND READING

Thitoya thoghuwadi. Rom. 5:12-15

Mumbapira dha mupostoli Paghulusi kwawakaRoma.

Eyi ne mbadi yira yitenda yoyiyiy, yira yitapa yoňeke

Shime karo yino: pamunu yofotji dyeyire diharwero mukaye, no padiharwero ne kufa. Kemo dyo yengenine yifa mwawanu wahe. Yoyi wahe ha harurire.

Diharwero dya karire kare mukaye kughutho ghokutapa muragho. Ene diharwero, mbadi ha di ghayaranga ngeshi ku mbadiko muragho. Ngambi kemo kufa kwatungire kutunda kwaAbrahamu, kate kwaMosesi. No kwawanu awa ha dhirire kuharura pamuhingo ghofotji, thikadi gha reghire Adami. Pano poghadi makuyuvero pakatji kaAdami no Yu mbo gheya. Keho noyitapa yothiñeke, kadi pofotji nomareghero. Yofotji gha fire pawanu hohengi. Thiñeke thaNyambi ne, nothitapa thamunu yofotji, Jesusi Kristusi, oyu gheyire ghathivurithe kwawengi.

Mañando ghaNyambi.

Gospel Acclamation

Halleluja. Jn. 1:14.12

Ñando dha karire munu no dha tungire pakatji ketu. Ene wahe wa ha mu tamburire no ha tawire kuDina dyendi, gha wa pire ngcamu dhokukara hana Nyambi.

Halleluja

Evangelium. Mtt. 10:26-33

Marundwerero ghoyitjanga yaMateghusi.

Jesusi gharawererire hashadikumi nohawadi nomañando ghano eshi: Yodigho eyi mbadi mwakona kuyitapa kwawanu. Mbadiko thokunda ethi mbo thidhira kuhokoka, no mbadiko thoghudhindo, ethi mbo ha dhira kudimuka. Eyi na kumutongwera mumakokore, mu yi tongore mwe kuthishe. No yokumuhohotera mukutwi, mu yi yaghurure pamituya mumapori. Mwa yapa kwamukakupagha yirama, ene mu yape mukakudhira kukona kupagha mudhimu. Ene muyape thikuma pakutanga mukakushinya yirama nomudhimu no kuyimwaghera mudirara.

Mandjunge mawadi ne kadi wa kughaghura nosende yofotji ndi? Ene nodyofotji temba dyokuwera pamuve, oku nomahimeno gha Wihenu po temba. Papenu, ngambi huki dhopamutwi dhapwa kutara mbadi mwa kona kuyapa. Amwe ne mwa piterera mandjunge ghomengi.

Kehe yu ghokuninongonona kwawanu, name mbo na mu nongonona kwaTate ghomudiwiru. Ene yu ghokunihamura kwawanu, name mbo na ka muhamura kwaTate ghomudiwiru.

Mañando ghoEvangelium.

THIRTEENTH SUNDAY IN ORDINARY TIME

Shundaha ghodikumi noghuhatu ghomumwaka.

FIRST READING

Thitoya thokutanga. 2 King. 4:8-11.14-16

Mumbapira dhoghuwadi dhawaFumu

Oyu ne katughuru ghokupongoka waNyambi muninge ghengene

Diyuwa dimwe, gha pitererire Elisha kuShunemu, oku ghakarire mbuyama ghomutungi. Gha muraghire mbuyama yu. No maruvedhe ghamweya pa nga pitereranga ghayende kuShunemu, nga hambukeranga kukwendi gha dye nendi pofotji mukandi.

No gha ningi kwakatughuru wendi eshi: Na dimuka shemwa eshi yu murume ghana kwiyanga pano kehe pa, ghapongoka. Ninge tu tende kandhughoghana pamutuya, no tu pake mo thidyero, ghudidi noramba, nag ha karange mo pakunatuhungeritha. Apa gha ka hukire Elisha diyuwa dimwe kuShunemu, gha yendire gha ka turumuthere mundhugho dhi. Po ghapwerire Elisha kwaGehazi eshi: “Nye sho ni tende namukamadi yu?” ha hutha Gehazi eshi: “Kemo ne aye ne mbadiko mwana, nakatughuru wendi gha kurupara.”

Haningi eshi: Mwithe gheye kuno, “Elisha ne ghamwithire. Gheyire no ghemanine muthero, ko kuninga Elisha kukwendi eshi muruvedhe runo mwakomwa ne mbo ghuna reri mwanuke munyara dhoye.”

Mañando ghaNyambi

Responsorial Psalm.

Dimbokatji. Ps. 89:2-3. 16-19.

R:

Na shana kwimba ghunongo waFumu kuroruheya.

Na dimuka eshi ghunongo ghoruhakitho roye ne mbo runa kara po kuroruheya, makurupero ghoye ne gha kara po ghororuheya yira diwiru. Wa ningire eshi na tendire ghundambo no yu na tororire, na kuruperithire mupikange Davita.

R:

Na shana..

Ghuna kutupa ngcamu dhokukona hayendhetu muruhakitho roye ghuna kutu pa yishamberera yokukona hayendhetu. Yowe Fumu wa torora mukungi wetu, yowe Nyambi ghokupongoka waIsragheli wa tu pa fumu. Muyihokora pakare wa tongorire kwawapikoye eshi: “Na tapire mbatero kwamushurundate wange ghokupupana na tapire thipuna ko yu na tororire gha tunde kwawanu.

SECOND READING

Thitoya thoghiwadi. Rom. 6:3-4.8-11

Mumbapira dhaMupostoli Pghulusi kwawakaRoma.

Endi mbadi mwadimuka eshi, twahe twapwa kuyogha mwaKristusi Jesusi eshi. Twapwa kuyogha mukufa kwendi ndi? Padiyoghero, twapwire kuvumbeka pofotji Nendi mukufa. Eshi thika kenge dig ha vumbukire Kristusi, mwawafu mughufumu ghongcamu dhaWihe. Kuninga eshi, natwe karo kemo sho tu kone kupara mumoyo ghoghupya. Atwe twafire pofotji naKristusi. Yo twa tawera, mbo tuna para Nendi pofotji. Twa dimuka twathinda eshi, Kristusi gha vumbukire mwawafu, no mbadi mbo gha kona karo. Kufa ghapira ngcamu kukwendi. Aye ghafire kehe pano no roruhe kudiharwero dyokufa. Pañanyi-ñanyi, kupara ghana kupara Ye mwa fire mudiharwero. KwaNyambi ne moyo. Yoyishi mwe, pofotji naKristusi Jesusi mudi.

Mañando ghaNyambi.

Gospel Acclamation.

Halleluja. 1 Pet. 2:9

Yoyishi, amwe karo mwadiko di dyapwa kutorora, mbunga dhoghupristeri dhodhifumu, diko edi gha kupongwera Nyambi kukwendi, diko dyaNyambi thinda, diko edi dya yuvithire yitenda Yendi yomakomweneno, yoyu gha mu tundithire mumakokore nothishe thendi thothitetu.

Halleluja!

Evangelium. Mt. 10:37-42

Marundwerero ghoyitjanga yaMateghusi.

Ghokudhira kushimba thikurushe thendi, mbadi gha ni fumaneka. Gho kutambura mwe, yame ghana tambura

Jesus gharawererire hashadikumi nohawadi nomañdo ghano eshi: “Oyu ghokuhaka wihe ngambi nyina, kupiterera Me, mbadi gha fumana eshi gha kare wange, oyu ghokuhaka mwanendi ghokatughuru ngambi ghomukamadighana kupiterera Me, mbadi gha fumana eshi gha kare wange. Oyu ghokudhira kushimba thikurushe thendi no kunikutha, mbadi gha fumana eshi gha kare wange. “Oyu ghokuhaka kukunga moyo wendi, mbo ghuna mu yongara. Noyu ghokuyongaritha moyo wendi pamurandu wange, mbo ghana ghu wana.

“Oyu ghokumutambura mwe, Yame ghana tambure. Noyu ghokunitambura Me, ghana tambura Tate yu gha ni tumine. Oyu ghokutambura muporofeta paghuporofeta wendi, mbo ghana wana yiruwera yamuporofeta. Noyu ghokutambura muhunga mughuhunga wendi, mbo ghana wana yiruwera yamuhunga. Kemo karo oyu ghokutapa kopi ghomeyu ghomatenda kwayofotji ghopawanuke wo, yoyishi mukathishongero wange, aye shemwa na kumutongwera eshi, mbo ghana wana ndjambi dhendi.”

Mañando ghoEvangelium.

FOURTEENTH SUNDAY IN ORDINARY TIME

Shundaha ghodikumi noghune ghomumwaka.

FIRST READING

Thitoya thokutanga. Sag. 9:9-10

Mumbapira dha muporofeta Sakaria

Mone Fumu ghoye ghana kwiya kukoye mumakumbirupithero.

Dyo ghana kughamba Fumu: Shamberere thikuma ghombara dhaSiyoni! Shamberere ghombara dhaJerusalema! Fumu ghoye muhunga noye ne mukakukona yoyihe; ghana kumbirupitha no ghana dhini, pathidongighana ethi ha dhira kudhina rumwe.

No mbo na tunditha matemba ghoyita muEfraimi notukambe, no mandamba ghoyita ne mbo gha nap u kudhimitha. Ndani po mbo gha yuvitha thiraro kumako, noghufumu wendi ne mbo ghuna kara kutunda kudikuruviya kate kudikuruviya, no kutunda kuRware rorukuru kate kughuhura ghokaye.

Mañando ghaNyambi.

Responsorial Psalm

Dimbokatji. Ps. 145: 1-2.8-11. 13-14

R:

Na shana kukugha dina dyoye dyodikuru ghoNyambi noFumu wange; Na shana kukutumera kuroruhe nororuheya.

Na shana kukutumera kehe diyuwa; Nyambi ne mukaruhakitho nothiñeke, mbadi gha tapanga wangu no gha ghayara ruhakitho rokuroruheya. Aye ne muhunga kwakehe yu no gha kara nothiňeke koyoyihe yi gha vareka.

R:

Na shana..

GhoFumu yivareka yoye yoyihe, mbo yina kukughu nohanu ghoye wahe, mbana ghamba ngcamu dhoghufumu ghoye no kukutongwera ngcamu dhoye,

R:

Na shana…

Muragho ghoye ne wakuroruhe nowe yowe Fumu kuroruhe. Nyambi ghana kughamba wa ha di mumaghukukutu ghana kupindutha hokuwa.

SECOND READING

Thitoya thoghuwadi. Rom. 8:9. 11-13

Mumbapira dha mupostoli Paghulusi kwawakaRoma.

Ngeshi ngo mu paghe yirughana yoyirama pamudhimu, mbo muna para

Amwe mbadi wa kumurawera yikara yoyimango paghunu wenu. yopaMupepo ndani. Yoyi Mupepo waNyambi ne, mumwenu watunga. No ngeshi ghumweya hapiri Mupepo waKristusi, aye mbadi gha kundama kwaKristusi. Yoyishi Mupepo wendi oghu wa tumunine Jesusi mwawafu, mbo ghuna tungu mumwenu. No Yu ghatumunine Kristusi mwawafu, yo mbo gha tumuna yirama yenu paMupepo wendi ghu watunga mumwenu.

Yodigho ne, mwayendhange, mbadi yanyandiwa kukwetu eshi tukuthe yipara yo mbadi pathina mupepo. Ngeshi mwe mwaparanga yira kemo mwafundhwera kufa, ene ngeshi paMupepo muhuritha mapemukithero ghoyirama ngo mbomunatungu.

Mañando ghaNyambi.

Gospel Acclamation

Halleluja. Mtt. 11:25

Munako dhi gha ningire Jesusi eshi: “Na kukukugha we Tate, Fumu ghodiwiru noghomuve, no wa yi hokorire kwawanu vene.

Halleluja!

Evangelium. Mtt. 11:25-30

Marundwerero ghoyitjanga yaMateghusi.

Ame ne nomukamutjima ghoghuporothi noghokukumbirupitha

Munako dhi gha ningire Jesusi eshi: “Na kukukugha we Tate, Fumu ghodiwiru noghomuve, yoyishi wa horekire yinu yi kwawanyanyami no kwawakakukuhonga, no wa yi hokorire kwawanu vene. Kemo Tate, yoyishi ghomahimeno ghoye ghomawa muthiñeke.

Tate gha ni pa yoyiheya yi, noyofotji temba gha dimuka Mwana, shimengwa Wihe, no karo eshi mbadiko yu gha dimuka Wihe, shimengwa Mwana, noyomuhe mbo ghana yi mu hokwera Mwana. Mwiye kukwange mwahe mwakakutwamwa namwe na dimbeka, amen e mbo na mu pa maturumuthero. Mu kukambeke djoko dhange no mu kuhongere kukwange. Yoyishi ame ne nomukamutjima ghoghuporothi no ghokukufupipitha no mbo muna wana maturumuthero muyitenda yenu. Yoyishi djoko dhange ne dhotu, nomupango wange ne ghuredhu.”

Mañando ghoEvangelium

FIFTEENTH SUNDAY IN ORDINARY TIME

Shundaha ghodikumi noghukwoko ghomumwaka.

FIRST READING

Thitoya thokutanga. Jes. 55:10-11

Mumbapira dha muporofeta Jesaya.

Mvura ne kutapa eshi kaye ne kawane yidya

Kemo ghana kughamba Fumu: “Yira mvura no mbundu yina kushuruka mudiwiru, mbadi wakuhuka oku mbadi yina tjakera kaye, no kukatenda kakurithe pakukapa mbuto dhokukuna no ghuroto ghokudya; ene ñando dhina kutunda mukanwa kange mbadi mbo dhi kahuka nyara-nyara oku mbadi dhina rikanyitha mahimeno ghange no kukumithamo yi nadhirawera eshi nodhitende, ene mbo dhina roghitha nomuyoyihe yi nadhitumena.”

Mañando ghaNyambi

Responsorial Psalm

Dimbokatji. Ps. 65: 10-14.

R:

Mbuto dhimweya ne dha wererire mughuyaghave no dha retire mukesho ghowingi.

Yowe wa dhingurire no wa dip ire yinu yoyingi. Yowe wa tungekire thikuma kapupo kaNyambi ne ka yara meyu. Yowe wa roghitha mavumbukiro ghawo. Kemo yowe wa roghitha ditunga. Yowe wa tuma mvura ghomwingi gha rokere mumapya no wombeka mbuto nomeyu, yowe wotitha muve nomvura no yowe wa kuritha mbuto.

R:

Mbuto dhimweya..

Madyero ghoye ne wa gha yaritha noyimuna, nomarundu ne gha yara yishamberera. Mapya ne wa gha rikanyitha ndjwi nomango ghomukatji komarundu ne gha yara mavumbukiro. Kehe thi thina kukugherera no kwimbera yighamberera.

SECOND READING

Thitoya thoghuwadi. Rom. 8:18-23

Mumbapira dhaMupostoli Paghulusi kwawakaRoma.

Yivareka yina kutaterera nodirurra payinu eyi mbo gha hokora Nyambi kwawanendi

Ame na kughayara shemwa eshi, kunyanda ku tuna kunyanda ne mbadi kwapiterera ghufumu waNyambi oghu mbo gha tu pa kughutho. Yivareka yina kutaterera ghurura thikuma eshi, hadye w ambo gha tenda Nyambi hanendi. Yivareka ya kutapa kukunyanda, ene kadi payihima yayo. Yoyi Nyambi thinda gha yitawa. No karo thinda gha tapire maturekero ghomakurupero. Yivareka mbo yina komonoka yathinda kughupika wayo, oghu wa pira horo, eshi mbo yi kare muhoro dhi dha fumanena hana Nyambi.

Kutunda kumatangero kate popano twadimuka eshi yivareka yoyihe yatonganga kuthinu thofotji thokureta hana, ene mbadi yivareka pithayo, ene twaheya atwe twawana mbuyo dhokutanga dhaMupepo, natwe kuna kutonga mwishi oku twe shime hatuutaterera yirama yetu yikakare muhoro.

Mañando ghaNyambi.

Gospel Acclamation

Halleluja. Jn. 6:68

Ha mu hutha Simon Petrusi eshi: “Fumu, kwadye sho tu yende? Yowe wa kara nomaňando ghokutapa moyo ghororuheya.

Halleluja!

Evangelium. Mtt. 13:1-23.

Marundwerero ghoyitjanga yaMateghusi.

Mukuni gha yendire gha ka kune

Mudiyuwa dyodyo, gha shwaghire Jesusi mundhugho, no ghayendire kudikuruviya gha ka hungumane. Mbunga dhodhikuru dha mu pokamenine dhi mu pongere, kate gha peramine muwato gha ka hungumane. Ene hanu wahe hemanine muwato kurungengera. Ko kuwathimwetwedhera kwendi maghenekero ghomengi no gha ningire eshi: “Mukuni, gha yendire diyuwa dimweya gha ka kune. Oku shime ha yendi kukukuna, ku kumuwa mbuto dhimweya mundhira. Yinyinyu yeyire no ya dhi komongorire. Dhimweya dha wererire pamawe ghomayarara, apa wa dhirire kukara muve ghowingi. Ho dha menine wangu yoyishi muve ne mbadi wa karire ghudhungi. Apa dya sheghenyenine po diyuwa dha kwayukire no yoyi dha pirire midhi, ho dha kukuterire. Dhimweya dha wererire mumakona. Makona gha dhi ngambwerire no gha dhi fikire. Mbuto dhimweya dha wererire mughuyeghave no dha shimbire magavo mwene. Digavo dimweya manona dithere, dimweya manona makumi kwoko nodyofotji, no dimweya manona makumi mahatu.

“Oyu gha kara nomatwi gha tegherere.”

Hakathishongero heyire kukwendi no ha mwipurire eshi: ‘Nye ghuna kutenderanga mumaghanekero, ngeshi pakughambaghura nawanu we?” Aye gha wa huthire eshi: “Kukwenu ha yi mupa eshi mu dimuke thithithatero thoghufumu ghodiwiru. Kukwawo ne mbadi ha yi wa pa. yoyishi yu gha wan ambo hana mu vurithera ko. No yu gha pira, mbo hana mu tepwera ko kamanana. Payinu yino, po na kughamberanga nawo mumaghanekero. Yoyishi kukenga, ene mbadi hana kutegherera no kutjwathana temba. Ku kwawo mbo yina hokoka yipumba yamuporofeta Jesaya eyi ya ninga eshi:

“Amwe ne mbo muna yuvu, ene kadi ya kutjwathana, no mbo muna ndjwanguruka mu kenge ene kadi ya kumona.

Yoyishi mitjima dhodiko dino, dha ndumangera: awo ha thindamena matwi ghawo, no ha yandhera meho ghawo, no kukona kuyuva temba nomatwi ghawo nomitjima dhishi kono kutjwathana eshi ha piruke, name temba ni dhire kuwerukitha.”

Ene meho ghenu mwe gha fighaghudhi, kumona ghana kumona no matwi ghenu kuyuva ghana kuyuva. Shemwa na kumutongwera: Haporofeta hohengi nawakakutawa, awa ha hima kumona yi muna kumona ene mbadi ya kumona. No ha hima shemwa kuyuva eyi muna kuyuva, ene mbadi ha yi yuva.

Mutegherere eshi ngepi ghana kuninga maghanekero ghamukuni yu: shatani ghana kwiya kwakehe yu ghokuyuva ñando dhoghufumu waNyambi. Ene mbadi ghana kughutjwathana. Popo ye, ghana kutunditha mumutjima eyi ha kuna mo. Edhi ne dhodhi ha kunine mundhira. Murume yu gha kunine karo mbuto dhendi pamambarawe, oyu ne yoyu ghokuyuva ñando no kudhitambura ghushamberera. Ene dha pira mudhi mumwendi, no mbadi dhina kudhighama mumwendi. Ngeshi ha kwiya mapethero nomaghukukutu, ghana kuwa wangu-wangu. No dhi dhokukuna mughurugha, yoyu ghokuyuva ñando ene yikudhekera yomoyo no yiyedhaghura yoghutungi yina kumungambwera ñando, no mbo dhina piri mbuyo.

No dhi ghakunine mughuyaghave, yoyu ghokuyuva ñando no kudhitjwathana, dhina kwima mbuyo no kureta ghushuka mwene. Pamweya dithere, pamweya makumi kwoko nodyofotji, pamweya makumi mahatu.

Mañando ghoEvangelium.

SIXTEENTH SUNDAY IN ORDINARY TIME

Shundaha ghodikumi nokwoko noyofotji ghomumwaka.

FIRST READING

Thitoya thokutanga. Wis. 12:13. 16-19

Mumambapira dho maghano.

Yowe wa tapanga mapirukero munyima ghomaharwero

Mbadiko karo nyambi kumbadi dhoye oyu ghana kukoneka hamweya, ghokukona kuneghedha eshi we ne ghuyi wa panguranga. Yoyishi ngcamu dhoye ne matangero ghoghuhunga; no ghushemwa eshi we new a kara nongcamu kuyoyiheya nodyoditoto edi wa kutekerera yoyihe. Yowe ghuna kutapa ngcamu dhoye ngeshi oku yina kutamangera yikara yongcamu dhoye, no owe ne kumwashura awa ha dimuka maghuyi ghawo.

Ngambi kenge sho tunge we mungcamu dhoye, pangure nomayakunuthero no u raghure pamahanganeno ghomakuru. Yoyishi yowe wa kara nongcamu ngeshi ku ghuna himi. Muyirughana yokenge, wa hongire diko dyoye eshi yirughana yawahunga ne yaghunongo yowe wa pinduthire hanu munyima dhomaharwero mbo muna wana mathigherero.

Mañando ghaNyambi.

Responsorial Psalm

Dimbokatji. Ps. 86:5-6.9-10.15-16

R:

Yoyishi owe Hekudyetu ne ghomuwa noghomukakuthigherera.

Yoyishi owe Hekudyetu ne ghomuwa noghomukakuthigherera no wa yara noruhakitho kwawa hana kukuraperera. Hekudyange ni yuvere ndapero dhange no yuve diywi dyange dyothiremeko edi na kukugha kukoye eshi ghu ni ghamwene.

R:

Yoyishi…

Mako ghomaheya gha wa vareka, bmo gha na kutongamena mbo hana kughu ghukuru ghoye. Yowe mukangcamu wa tenda yitetukitho yowe pithoye ghoNyambi.

R:

Yoyishi owe..

Ene we, Fumu ne ghomukathiñeke noruhakitho, yowe pithoye ghoghudhughutjima kehe pano, ghuhungami nomakurupero. Ni thetuke no ni fere ñeke ni tanarithe, no ni kunge yoyishi na kukukarera thika di gha tendire nawe.

SECOND READING.

Thitoya thoghuwadi. Rom. 8:26-27

Mumbapira dhaMupostoli Paghulusi kwawakaRoma.

Mupepo ghothinda ghuna kutunongwenena muyirumbera yetu yokudhira kughamba

Mupepo netu ghudi karo mughukashu wetu. atwe mbadi tuna dimuka yinye no ngepi di sho tu raperere. Ene Mupepo ghothinda ghuna kuhema kumatangero gha, mukupira kushwagha po ñando. NaNyambi yu gha dimuka miyjima dhawanu, yo gha dimuka thitambo thaMupepo. Yoyishi Aye gha kuhema pamahimeno ghaNyambi kwawapongoki.

Mañando ghaNyambi.

Gospel Acclamation.

Halleluja. Mtt. 11:25

Munako dhi gha ningire Jesusi eshi: “Na kukukugha we Tate, Fumu ghodiwiru noghomuve, no wa yi hokorire kwawanu vene.”

Halleluja!

Evangelium. Mtt. 13: 24-43

Marundwerero ghoyitjanga yaMateghusi.

Muthighe yi kure pofotji kate kumukesho

Jesusi ko kuwaghanekera karo maghanekero ghamweya eshi: “Ghufumu ghodiwiru, wa pitura yira munu ghokukuna mbuto mwene mudipya dyendi. Oku shime ha rara hanu, ko kwiya mukañore dhendi, gha kune ghurugha mumbuto dhendi no gha tundire po gha ka yende. Apa dha kurire mbuto no kutanga kushema magavo, ghurugha nagho wa yangumukire. Hapika ndjimi heyire no ha mu tongwerire eshi: “Mukadikuto, mbadi wa kunine mbuto mwene mudipya dyoye ndi? Kupi ghuna tundu ghurugha?” Aye gha wa huthire eshi: “Eyi ne yitenda yamukañore.” Hapika ha ningire kukwendi eshi tu ka ghudhure mo ndi?” Kadi kemo dyo gha ningire, ngeshi ngo mu ka ghudhure mo, sho mu ka dhurerere nombuto. Mu thighe yi kure pofotji kate pamukesho. Pamukesho mbo na tongwera hakakukesha eshi: “Mukongwedhe tango ghurugha no mu ghange pofotji ho mu ghu tumekere. Mbuto ne mud hi tware kuthindandara.”

Ha wa tongwera karo maghanekero ghamweya eshi: “Ghufumu ghodiwiru, wa pitura karo yira munu ghokukuna dimbuto dyoghutata mudipya dyendi. Dimbuto di, dimbiru thikuma pamarudhi ghombuto dhodhihe. Ene pakukura kwadyo, dina kupiterera yitapeka yoyihe yomudipya mughukuru, no dina kukara ditondo kate kutendera yinyunyi kumite dhadyo yitunguru.”

Shime gha wa tongwera karo maghanekero ghano: “Ghufumu ghodiwiru wa pitura yira mukamadi ghokukosha mushungwa gha ghu haheke mukaronga kashokuru, kate wa kuhaherere.”

Yinu yoyihe yi gha yi hongire Jesusi hanu mumaghanekero. Ngo mbadiko maghanekero ngo mbadi gha wa hongire. Kemo yirikanye, eyi gha ningire muporofeta eshi: “Amen e mbo na rughanitha nomaghanekero oku na kughamba.

Mbo na dimukitha yokunda kutunda kumatangero.” Kutunda po ko kuyakunuka Jesusi kwawanu, gha huke kukwawo. Hakathishongero wendi heyire kukwendi no ha ningire eshi: “Tuna kanderera ngo tu tjwathanithe ghurugha ghomudipya.”

Jesusi gha huthire eshi: “Mukakukuna mbuto mwene ne, Mwanamunu. Dipya ne kaye. Mbuto mwene ne, hakaghufumu. Ghurugha ne, yoyimami yaMuyi. Mukañore yu gha kunine ghurugha ne Shatani. Mukesho ne ghoghuhura ghokaye. Hakakukesha ne haengeli.

Thika di hana kukongwedha ghurugha pofotji no kughutumekera, kemo dyo mbo yi kara paghuhura wendi, awo ne mbana tjidha mughufumu wendi wahe wa ha pemukitha hamweya na wa shinyi homuragho, no mbo hana wa vukumena mudirara dyomudiro. Mo mbo ha ka dira nomakwetjurangaghayegho. No hahunga mbo hana hokoka kughutho waWihawo yira thishe thodiyuwa.

“Mukamatwi ghategherere.

Mañando ghoEvangelium.

SEVENTEENTH SUNDAY IN ORDINARY TIME

Shundaha ghodilumi no kwoko noghuwadi ghomumwaka.

FIRST READING

Thitoya thokutanga. 1 King. 3:5. 7-12

Mumbapira dhokutanga dhawaFumu.

Ghuna rumbera maghano ghoye ghothinda

Oku muGibeyoni gha hokokire Fumu ghuthiku muyirota kwaSalomo no gha muningire Nyambi eshi: Rumbere eyi sho ni kupe.”

Po gha huthire Salomo eshi Hekudyange Nyambi wange yowe wa pakire mupikoye gha kare fumu mudyango dyaTate Davita ene me ne nomwanuke, mbadi na dimuka kushwagha no kwingena mo.

No mupikoye ne mukathi kodiko edi wa tororire, diko dyodikuru dyo kudhira kutara ngambi kuvarera mu wingi wawo.

Mu pe mupikoye mutjima ghothipore ghokughamba thiwana mudiko dyoye, pakuyakunuka pakatji koghupata noghuhunga, yoyishi ngo dye gha kuraghura diko dyoye dyoditungi.

Ya roghire mumeho ghaNyambi eshi Salomo gha yi rumberire. Nyambi gha mu tongwerire eshi: Yoyi ghuna tendi muyerekero ghano no mbadi ghuna rumbera mayo ghokupara kuroruhe no mbadi ghuna rumbera ghutungi nomoyo dhawanyathi hoye ene ghuna rumbera moyo mukutheka mirandu. Dyo na kutenda name mu kukutha ñando dhoye. Mone, kuna kukupa maghano nomutjima ghomaghano, eshi ame kuna kukupa maghano agha ghadhira kuwana ghumwe panganyi no gha mbo gha dhira kuwana ghumwe munyima dhoye.

Mañando ghaNyambi.

Responsorial Psalm

Dimbokatji. Ps. 119:57. 72. 76.77. 127-130

R:

Ngepi di na haka miragho dhoye!

Na dhi ghayaranga diyuwa dyodihe. GhoFumu ne yowe na haka, kuna kukuruperitha mu kukara ghutawedhi nomiragho dhoye. Miragho dhi wa tapire ne dha kara nomudyo thikuma kukwange kupiterera manyinga ghomahe, ghomuditunga.

R:

Ngepi di..

Ninge ruhakitho roye rokuroruhe runihengeghure; thika kenge di wa nikuruperithire nomupikoye. Ninge thiñeke thoye thi niyere no ngo mbo na para yoyishi miragho dhoye ne ruvigha rwange.

R:

Ngepi di..

Na haka marawero ghoye ghomahunga, kupita mangondo kupita mangondo ghomotu thikuma. Kemo karo na kukutha yineghedha yoye yoyihunga, na nyengi yitenda yoyimango.

R:

Ngepi di…

Yihonga yoye ne yathitetu, na kukara noghutawedhi kukwayo nomutjima wange ghoghuhe. Yitjwathanitha yoyihonga yoye, ya tapa thishe nay a reta ghutungi kwawakakudhira kutwetha yinu.

SECOND READING

Thitoya thoghuwadi. Rom. 8:28-30

Mumbapira dhaMupostoli Paghulusi kwawakaRoma.

Gha tu rongekire pakutanga eshi tu rikanye kunungu dhaMwanendi

Pano tudi twa dimuka eshi Nyambi ne, gha rughanitha ghuhunga koyu gha mu haka. Oyu ghapwa kwitha pamahimeno ghendi. Awa ha pwire kutorora pakare, ghawa rikanyitha pofotji naMwanendi. Kemo dyo sho gha wane. Awa gha himenine koyi, nawo ha pwire kwitha karo. Nawa ghethire Ye, gha-wa rongeka. Ghakuyarekra nawo difumanekero dyendi.

Mañando ghaNyambi.

Gospel Acclamation

Halleluja. Jn. 15:15

Mbadi na kumutoya shime eshi mwavareki, yoyishi muvareki ne kadi wa kudimuka eyi ghana kutenda hekudyendi. Ame ne kuna kumutoya eshi mwahakwa wange, yoyi na mu dimukitha yoyiheya yin a yuvire kwaTate.

Halleluja!

Evangelium. Mtt. 13:44-52

Marundwerero ghoyitjanga yaMateghusi.

Ha ghuritha kwendi yoyihe eyi gha karire nayo ko kughura kwendi dipya

Jesusi gha ghambire kwawakathishongero wendi eshi: “Ghufumu ghodiwiru, wa pitura karo yira ghushwi ghokuvumbeka mudipya. Ngeshi kughuwana ghumweya, ene mufighaghudhi dhendi ghana ka ghuritha yoyiheya yi gha wana no kughura dipya di. Ghufumu ghodiwiru, wa pitura karo yira mughurithi yu ghana kushana dikwarara dyodiwa. Ngeshi ku ghana wana dikwarara mwene, ghana ka ghuritha yoyiheya yi gha wana, no kughuritha dikwarara di.

Shime karo, ghufumu ghodiwiru wa pitura yira dikwe dyokutegha mudikuruviya, no kuteghura mo thi dhomarudhi ghomahe. Apa dya yarire, ko kudikokera kwawo parukuma no kutorwera thi mwene muthikuma, dhodhiyi ne kudhimwagha. Kemo mbo yi kara paghuhura ghokaye. Haengeli mbana yendi no kutjikura hayi mwawanongo, no kuwamwaghera mudirara. Mo mbo ha ka dira nomakwetjurangaghayegho.

Muna tjwathana yinu yoyiheya yi ndi? Ko kuhutha woe shi: “Ndhi.” Ko kuwatongwera kwendi eshi: “Kemo gha kara kehe mukamarukwaro oyu ghana kukuhonga yoghufumu ghodiwiru, gha pitura yira thindasha ndhugho oyu ghana kuhokora yopaghugavo wendi yoyipya no yoyikuru-kuru.”

Mañando ghoEvangelium.

EIGHTEEN SUNDAY IN ORDINARY TIME

Shundaha ghodikumi nokwoko noghuhatu ghomumwaka.

FIRRST READING

Thitoya thokutanga. Jes. 55:1-3

Mumbapira dha muporofeta Jesaya.

Mwiye na mudye

Kemo ghana kughamba Fumu eshi: “mwiye kahe yu ghana kufa dinota meyu ne ghano! Mwiye mwe mwa pira manyinga ghokughuritha mavumbukire ghokudya. Mwiye mughure vinyu nomanhwe yonyara-nyara. Nye mu kupungwera manyinga ghenu kuyinu yokudhira kwikuta? Nye muna kupungwera manyinga ghenu oku pakufa ndhara? Mu nitegherere thiwana no mu tende yi na kumutongwera no ngo ňanyi mwa kudye yidya yoyiwa yokupita yidya yoyihe. Mu nitegherere keho mwa[ikange no mwiye kukwange; mwiye kukwange no mbo muna wana moyo! Mbo na tendi ghundambo nenu ghokuroruhe no mbo na mu pa makandadhekero gha na kuruperithire Davita.

Mañando ghaNyambi.

Responsorial Psalm

Dimbokatji. Ps. 146: 8-9; 15-16;17-18

R:

Hekudyetu yowe ghuna kughonyonona nyara dhoye no kutwikutitha.

Nyambi ne mukaruhakitho nothiñeke, mbadi gha tapanga wangu no gha yara ruhakitho rokuroruhe. Fumu ne muhunga kwayomuhe no gha fera ñeke yoyihe eyi gha vareka.

R:

Hekudyange..

Yinu yokupara yoyihe, kuna kukengerera ghukurupera kukoye, no ghuna wa panga yidya apa hana yi nyandanga. Yowe ghuna kuwapa yidya yoyingi no kuwekutitha no kuhengaghura hakakunyanda.

R:

Hekudyange …

Nyambi ne muhungami muyirughana yendi yoyihe, mukathiñeke mumayira ghendi ghomahe. Fumu ne pepi gha di nawa hanakumwitha, nodirura.

SECOND READING.

Thotoya thoghuwadi. Rom. 8: 35.37-39

Mumbapira dhaMupostoli Paghulusi kwawakaRoma.

Mbadiko thivareka ethi mbo thi yakunuka kuruhakitho mwaNyambi oru mwa kara mwaKristusi

Yidye ne yu sho gha kone kutuyakunutha kuruhakitho rwaKristusi? Kunyanda ndi, endi ndundumera, kukutha-kutha, ndhara, wira, endi maghukukutu ngambi dimende? Ene yinu yoyiheya yi, twa yi piterera twakakuwitha, papendi yu gha tu haka. Yino na yidimuka shemwa eshi, mbadiko kufa, endi moyo, endi haengeli, endi mangcamu, endi yopañanyi-ñanyi endi yokughutho, endi ngcamu. Endi ghure endi ghudhungi, ngambi kehe thivareka mbadi tha kona kutuyakunutha kuruhakitho rwaNyambi. Ruhakitho run e, mwaKristusi Jesusi ghoHekudyetu rwa kara.

Mañando ghaNyambi

Gospel Acclamation

Halleluja. Mtt. 4:4

Ene Ye gha mu huthire eshi: “Ya pwa kutjanga eshi: “Munu kadi wa kupara ghuroto keho, ene pakehe ňando edhi dhina kushwagha mukanwa kaNyambi.”

Halleluja!

Evangelium. Mtt. 14:13-21

Marundwerero ghoyitjanga yaMateghusi.

Apa gha yi yuvire Jesusi, yoyifa yaJohannesi, ko kutunda po kwendi nowato ghakakare kudyango dyothipore dyopithendi. Hanu hayiyuvire no hashwaghire mumaghumbo hamukuthe. Pakukanduka muwato hamono kwendi mbunga dhodhikuru dhawanu. Ko kuwafera ñeke thikuma no gherukithire hakakukorwa mukatji kawo. Pakutjatjamena diyuwa, heyire hakathishongero wendi kukwendi ha mutongwere eshi: “Dyango dino ne dyamamboreya, karo dina tokera. Tume hanu hahuke ha kakone kaghura yidya mumikunda.”

Ene Jesusi ghawa huthire eshi: “Mbadi yi sho hayendere, muwape yamwe ethi shohadye”

Awo haningire kukwendi eshi: “Atwe ne nomaghuroto kwoko no tudi nothi dhiwadi keho.”

Jesusi ghaningire eshi: “Muyirete kuno.” Ko kurawera kwendi mbunga dhihungumane pamwengerere. Ha tumbura kwendi maghuroto kwoko nothi dhiwadi, ko kudighamena kwendi kuwiru no kuyikandadheka. Munyima ghayondorire ghuroto no ghaghupire hakathishongero wendi, nawo haghutaperire hanu. Hanu wahe hadire no harikanyine. Ko kukongwedha kwawo yigonyo-gonyo yomaghuroto yi ya thigharire ko muyikore dikumi noyiwadi. Pakarire yira mayovi kwoko gha watutughuru wa hadire, kupandha ko hakamadi nawanuke wa hadhirire kutara ko.

Mañando ghoEvangelium.

NINETEENTH SUNDAY IN ORDINARY TIME

Shundaha ghodikumi no kwoko noghune ghomumwaka.

FIRST READING

Thitoya thokutanga. 1 King. 19:9. 11-13

Mumbapira dhokutanga dhawaFumu.

Wimane padirundu kughutho ghorupara rwaFumu

Eliya ghayendire mudingurungoma moghakararire momo ghuthiku ghoghuhe.

No ñando dhaNyambi dheyire kukwendi. No gha ghambire eshi yende ghukemane padirundu kughutho ghorupara rwaFumu, no mone eshi Fumu ne gha pitererire oku mupepo ne kuna kupunga nokupayaghura mawe kughutho waFumu, mumupepo mbadi mwa karire Fumu. Munyima dhomakiñeno ghomuve, wa karire mudiro no mumudiro mbadi mwa karire Fumu. Munyima dhomudiro, kweyire kupughuma komeyu ghomatenda. No pa yi yuvire Eliya gha kudhingerire mwaye wendi no gha hukire gha kemane mumukara ghodingurungoma.

Mañando ghaNyambi.

Responsorial Psalm

Dimbokatji. Ps. 85: 9-14.

R:

Ninge tu mone ghunongo ghoye ghoFumu no tu pe ghupongoki ghoye!

Shemwa aye ghana roghitha mu kukunge awa hana kumukutekera, no kukunga kwendi ne mbo kuna thighaya muditunga dyetu. Shemwa ghupongoki wendi ne pepi ghu di kwawa hamuyapa eshi difumanekero dyendi ne di kare muditunga.

R:

Ninge..

Ghunongo nomakurupero, yina kukuhangana; ghuhunga nothiraro yina kukuncumita. Makurupero ghana kutapathana mukaye, noghuhunga ghu na kututoperera mudiwiru.

R:

Ninge tu..

Karo ghana kutapa Nyambi ghuhunga noditunga dyetu ne dina kureta mbuyo dhadyo. Ghuhunga ghuna kuyenda kughutho wendi.

SECOND READING.

Thitoya thoghuwadi. Rom 9:1-5

Mumbapira dha mupostoli Paghulusi kwawakaRoma.

Matorwero ghaIsragheli kwaNyambi

Mumakupakerero naKristusi, ame na kughamba ghushemwa. Mbadi na kughamba mbango. No yioghayara yange paMupepo ghoKupongoka, yina kunongonona pofotji nange. Eshi poyidi yitokota yiyikuru thikuma yo kehe pano kumutjima wange, kwawayendhange, hakadiko dyange hoshemwa. Ngo na kukuta nothinda, ngo na yakunuka kwaKristusi. Ngeshi ku yina waroghera. Awo haIsraghelite.

Awo gha wa tamburarire Nyambi yira hanendi no ghawa yeranithire mughufumu wendi. Nawo ghanungire ghundambo, no ghatapire kukwawo muragho noyikarera yomutembeli nomaturekero. Ndunderero dhawo ne kwawakerekandongo wawo. No mumwawo ne Kristusi yu ha shamurukire yira munu yirama nomanyinga – Aye ne Nyambi no ghayeyuka peghuru dhoyinu yoyihe, gho ha fumaneka kuroruheya! Amen.

Mañando ghaNyambi.

Gospel Acclamation

Halleluja. Lk. 19:38

No hembire eshi: “Gha fumane Fumu Oyu ghana kwiya muDina dyaNyambi; thiraro mudiwiru no difumanekero kwaNyambi mumawiru!”

Halleluja!

Evangelium. Mtt. 14:22-33

Marundwerero ghoyitjanga yaMateghusi.

Ni rawere niye kukoye pameyu

Jesusi ghaningire hakathishongero ha perame muwato, ha mu tjinaghanithe kuthambadiya, oku ye pakuragha hanu ha huke kumaghumbo. Apa gha manine kutuma hanu, ko kudhina kudirundu pithendi gha ka rapere. Parunguro pithendi gha karire ko. Apa wa kokerire wato makilometeri ghomapu pepi nodiya, ko kughutjimbaghura mangumbi, yoyishi dipepo dya karire ko. Murughura mudiyuwa dyokuranda ko, ko kwiya kwawakathishongero wendi ghuyenda pameyu. Pakumumona hakathishongero wendi ku ghana kuyenda padikuruviya, ko kuyapa kwawo thikuma ghuninga eshi: “Thirumba thi!”

Pawoma, ha tangire kukugherera. Ene Jesusi gha ghambire nawo wangu no gha ningire eshi: “Mu tjimape, Yame no. Mwa yapa.”

Kokuninga Petrusi kukwendi eshi: “Fumu, ngeshi ngo Yowe shemwa, ni rawere ni yende pameyu niye kukoye.”

Jesusi gha ningire eshi: “Wiye!” Petrusi gha kandukire muwato no gha yendire pameyu kate kuhenya pepi naJesusi. Ene apa gha monine ngcamu dhodipepo, ko kuyapa kwendi no gha tangire kudhama no gha kughererire eshi: “Fumu, ni ghamwene!”

Jesusi gha mu kwatire padyoko wangu no gha mu kokire ghu-mutongwera eshi: “Ghomukamataweroghana we, eyi ghuna kutangera kutamangero ne nye?”

Ko kuperama kwawo muwato, nomupepo wa turire. Harume wa ha karire muwato, ha tongamenine kughutho wendi no haningire eshi: “Owe ne shemwa ghoMwana Nyambi.”

Mañando ghoEvangelium.

TWENTITH SUNDAY IN ORDINARY TIME

Shundaha ghomakumi mawadi ghomumwaka.

FIRST READING

Thitoya thokutanga. Jes. 56:1. 6-7

Mumbapira dhaMuporofeta Jesaya.

Mbo na reta hana wawakamatunga ghagho-nagho padirundu dyange dyokupongoka

Kemo ghana kughamba Fumu eshi mukunge ghuhunga nomughukarere, yoyishi ghupongoki wange ne pepi ghu di nomahokwero ghoghuhunga wange.

Nawakamatunga wa hakupakerire naNyambi eshi ha mu karere nokuhaka Dina dyendi, mu kukara hapikendi-kehe yu gha haka sabata gha mu shwahura, nawa hanunga ghundambo nange.

Mbo wa twara kudirundu dyange dyokupongoka, no mbo na wa pa thiraro thi wa toware mundhugho dhange dhomandapero. Miyambo dhawo dhokukoñerera nomiyambo dhawo dhokupaghera po yiyama dhina kuroghera paaltare, yoyishi ndhugho dhange, mba na dhi totyo mako ghomahe ndhugho dhomandapero.

Mañando ghaNyambi.

Responsorial Psalm.

Dimbokatji. Ps. 67:2-3.5-6.8

R:

Mbo dina kukughu diko, we Nyambi mako ghomahe mbo ghana kukughu.

Tu fere ñeke Nyambi no tu kandadheke, ninge rupara roye rutusheghenyene! Eshi ha dimuke hanu wahe hopakaye ndhira dhoye, no ha dimuke ghupongoki ghoye mumako ghomahe.

R:

Mbo dina..

Mako mbo ghana shamberera thikuma yoyishi we ne kupangura mako ghuhunga no kutwara mako pakaye.

R:

Mbo dina..

Mbo dina kukughu diko we Nyambi mako ghomahe mbo ghana kukughu. Nyambi ne mbo ghana tu kandadheka noghuhunga ghoghuhe ghokaye mbo ghana mu yapa.

SECOND READING

Thitoya thoghuwadi Rom. 11:13-15.29-32

Mumbapira dhaMupostoli Paghulusi kwawakaRoma.

Yitapa yothiñeke nomethero ghaNyambi ne ya pira maharwero pamurandu waIsragheli

Ninge nimutongwere mwe mwahayidena thinun thino. Thikadi nakara no nomupostoli wawahayidena, name dyo na kutamba kuthirughana thange. Mukuninga eshi ni tende nya kwawange, hamweya ne ni ghamwene ndani. Ngeshi ngo hapwa kumwagha mumakushemwethaneno ghokaye. Nye sho yipire po kumatambwero ghawo?

Ngeshi ha tapa Nyambi parofotji thiñeke thendi no kuwetha, mbadi ya kukona kuyihutha karo Ye.

Pakutanga ne mwahayidena mwa karire. Mwa karire ghuthururu, po gha mu fera ñeke Nyambi. Kemo dyo yidi karo kwaWajuda. Yoyishi Nyambi ghapaka muñotwa, paghuthururu. Ene kuhokoka eshi nawo kuwana thiñeke waheya.

Mañando ghaNyambi.

Gospel Acclamation

Halleluja. Mtt. 4:23

Ko kuyendaghura kwendi muGalileya yomuhe, no gha hongire hanu mumasinagoge ghawo, no gha wa yuvithire mbudhi dhoghufumu no gherukithire kehe thikorwa noyinyanda yoyihe yodiko,

Halleluja!

Evangelium. Mt. 15:21-28

Marundwerero ghoyitjanga yaMateghusi.

Mukamadi matawero ghoye ne makuru

Ko kufunguruka Jesusi muGenesareti ghayende kuthiko thaTayire no kuSidoni. Munyima mukamadi ghomuKanaghani oyu ghatungire muthiko thi, ghamuturukerire pawangu gheye kukwendi. Hakugherera kwendi rwingi eshi: “Ghunifere ñeke Fumu, Mwana Davita! Mwanange ghomukamadi, kunyandeka ghana kumunyandeka shatani. Ene Jesusi mbadi ghamuhuthire. Ko kumuhenyena hakathishongero wendi ha mukumbere eshi: “Mutongwere ghashwaghe po, yoyishi kuna kuyoghotera.”

Jesusi ghahuthire eshi: “Ame hanituma kundjwi dhokuyongara dhodiko dyaIsragheli vene.” Ene mukamadi yu ghatongamenine kughutho wendi ghuninga eshi: “Fumu, ghuni ghamwene!”

Aye ghamutongwerire eshi: “Kadi ghuhunga kutumbura yidya yawanuke no kuyimweghera kumbwa dhomudighumbo.

Mukamadi ghaningire eshi: Yashemwa Fumu. Ene mbwa nadho, dhina dyanga ghufefere ghokukukumuka kuthidyero thahekudyawo.”

Jesusi ghamuhuthire eshi: “Mukamadi, matawero ghoye ne makuru no yihima yoye ne yina kupwa kuyaritha.” Kutunda pa kapupi popo, ko kwiruka mukamadighana.

Mañando ghoEvangelium.

TWENTY-FIRST SUNDAY IN ORDINARY TIME

Shundaha ghomakumi mawadi noyofotji ghomumwaka.

FIRST READING

Thitoya thokutanga. Jes.22:19-23

Mumbapira dhaMuporofeta Jesaya.

Mbo na paka tjapi dhondhugho dhaDavita padipeghe dyendi

Kemo ghana kughamba Fumu kwaSebena oyu ha tungeka kumarombe: Mbo na kutunditha muthirughana thoye. No mudiyuwa di mbo netha mupikange Eliyakim, ghomwana Hilkiya; no mbo na mu vateka yitere yoye no mbo na muwanga muya ghoye nongcamu dhoye, mbo na dhi mupa munyara dhendi, no mbo ghana kara wiha wawa ha tunga muJerusalema nohakadighumbo dyaJuda. Mbo na paka tjapi dhondhugho dhaDavita padipeghe dyendi, no aye mbo ghana yandhurura ko, mbadiko munu oyu mbo gha yandhururako aye mbo ghana yandhera no mbadiko yu mbo gha yandhurura ko. Mbo na mu nyetedha mo yira katjangitho ka kana kakatera mudyango dyoko, no mbo na mu neghedha muthipuna thodikuto thawihe.

Mañando ghaNyambi.

Responsorial Psalm

Dimbokatji. Ps. 138:1-3.6.8

R:

Ghunongo ghoye ghoFumu ne kate kuroruheya.

Wa yi tambura yirughana yomunyara dhendi. Ñanyi ni kughe nomutjima wange ghoghuhe, mbo na kara nawaengeli twa kukwimbere membo ghomakughero kudifumanekero dyoye. Mbo na tongamena kumarombe ghoye ghokupongoka.

R:

Ghunongo ghoye..

Mbo na kughu Dina dyoye noghunongo ghoye nomahimeno ghomakurupero ghoye; yoyishi wa yeyura dina dyoye pakudikuritha.

Diyuwa din a kwithire, wa ni yuvire wa ni tanarithire nongcamu dhoye mumudhimu wange.

R:

Ghunongo ghoye..

Yoyishi Fumu ne gha piterera waheya no ghana kumona makumbirupithero nawakadihuna ne gha wa dimukera kokayenda. Ghunongo ghoye ghoFumu kate kuroruheya, wa yi tambura yirughana yomunyara dhendi.

SECOND READING.

Thitoya thoghuwadi. Rom. 11:33-36

Mumbapira dhaMupostoli Paghulusi kwawakaRoma.

Papendi nomumwendi nonendi yinu yoyihe

Ngepi ghudhungi ghoghutungi no ghunya-nyami no ghudimuki waNyambi?

Ngepi ne ghukukutu ghoyipangura yendi, ngepi ghukukutu ghomayira ghendi ghashimono! Yidye yu gha dimua yihima yaFumu? No yidye ngambera dhendi?

Yidye ghana kumuneghedha thinu, kate kumupambeka eshi mbo gha thitendurure?” Mumwendi no paPendi no kate kuKwendi, ko yakara yinu yoyiheya. Kukwendi ghufumu kate kuroruheya! Amen.

Mañando ghaNyambi.

Gospel Acclamation.

Halleluja. Jn. 63: 68

Mañando ghoye ghoHekudyetu, ghamudhimu nomoyo, yowe wa kara nomañando ghokuroruhe.

Halleluja!

Evangelium. Mtt. 16:13-20

Marundwerero ghoyitjanga yaMateghusi

Apa gha kumine Jesusi muthiko thaSesareya-Filipi, ghepurire hakathishongero wendi eshi: “Ngepi di hana kuninga hanu eshi: Mwanamunu ne nane dye?” ko kuhutha woe shi: “Hamweya kuna kuninga eshi Johannesi ghoMukadiyoghero, hamweya eshi Eliya, hamweya eshi Jeremiya endi ghumweya ghopawaporofeta.”

Ko kuwepura Jesusi eshi: “Amwe ne ngepi di muna kuninga, ngo Yame dye?” ha mu hutha Simon Petrusi eshi: “Yowe Kristusi ghoMwana Nyambi ghoMuyumi.”

Jesusi gha mutongwerire eshi: “Ghomukafighudhi we Simoni ghomwana Jona. Yoyishi kadi hanu hana yi kuhokwera, ene Tate ghomudiwiru. Na kukutongwera eshi: Yowe Petrusi, no padimuwe di mbo na tendi po ngirishe dhange nomangcamu ghawakamwishi mbadi mbo gha kona kudhiwitha. Mbo na kupa matjapi ghoghufumu ghodiwiru. No ethi mbo ghanga pamuve mbo thina pu kughanga mudiwiru, ethi mbo shutura pamuve mbo thina pu kushutura mudiwiru.”

Munyima gha shingire Jesusi hakathishongero wendi eshi, mbadi ha kona kutongora kwaghumweya eshi ye ne Kristusi.

Mañando ghoEvangelium.

TWENTY-SECOND SUNDAY IN ORDINARY TIME

Shundaha ghomakumi mawadi noghoghuwadi ghomumwaka.

FIRST READING

Thitoya thokutanga. Jer. 20:7-9

Mumbapira dhaMuporofeta Jeremiya.

Ñando dhaFumu ne dha ni mbiruperire

Hekudyange yowe wa ni shimbire no neyire noye, wa karire ngcamu thikuma no wa ni konine kuniwitha, no na karire noghundambo diyuwa dyodihe wa ha ni shwahurire. Yoyishi kehe pano oku na kughamba me ne na kona kukugherera, na kona kwitha ngcamu nokunyanda! Yoyishi ñando dhaFumu ne dha ni karerire ghumbiru nodishamu mudiyuwa dyodihe. No ngeshi ni ghambe eshi mbadi mbo ni mughayara no kughamba temba madina dyendi, ho yi kare mumutjima wange yira mudiro ghokwekeshera, ghokuyandhera muyishokora yange. Na kutwamithire eshi ni yi thighe, ene mbadi na konine.

Mañando ghaNyambi.

Responsorial Psalm.

Dimbokatji. Ps. 63:2-6. 8-9.

R:

Mudhimu wange kuna kufa dinota kukoye Hekudyange noNyambi wange.

GhoNyambi, yowe Nyambi wange, yowe na kushana mudhimu wange ghuna kufa dinota, yirama yange yina kurura kukoye muditunga dyorukukutu thikuma dyo kupira meyu.

R:

Mudhimu wange…

Kemo na kumonine mughupongoki ghoye, mu kumona ngcamu dhoye nomakughero ghoye. Yoyishi ghunongo ghoye ne hasha yira moyo miromo dhange ne dhi kukughe.

R:

Mudhimu wange….

Kemo dyo mbo ni kukugha mumoyo wange ghoghuhe, mbo dhina

yeyuka nyara dhange mudina dyoye. Yira oku na rara mughudidi, na kuvurukanga, na kughayaranga mughure ghoghuthiku ghoghuhe.

R:

Mudhimu wange…

Yoyishi yowe wa karire mughamweni wange, mbo na shamberera mumvure ghomondo ghoye. Mudhimu wange wa ramatera kukoye; dyoko dyorudyo roye dina kunighamwena.

SECOND READING.

Thitoya thoghuwadi. Rom. 12:1-2

Mumbapira dhaMupostoli Paghulusi kwawakaRoma.

Mu neghe yirama yenu eshi muyambo ghoghuyumi

Apa no na kumutongwera mwayendhange, muyedhekere thiñeke thothikuru thaNyambi. Eshi, mukutape mwathinda kwaNyambi ghuyumi no yira miyambo dhokupongoka, edhi dha mu roghera Ye. Ethi thothinu thothihunga, thokukarera Nyambi no mwa kona kuthirughanitha. Mwa kurikanyitha nokaye kano kayara maharwero. Ene ghuhunga, Nyambi ngo ghapirure maghano ghenu kughupya. Ndani po mbo mu kona karo kudimuka eshi, nye mahimeno ghaNyambi agha ghatamba kughuwa kughutho wendi. No nye ghatambura mukuyarerera.

Mañando ghaNyambi.

Gospel Acclamation.

Halleluja. Eph. 1:17.18

Na rapereranga eshi, Nyambi waHekudyetu Jesusi Kristusi, Wiha ghodiko dyodiheya. Gha tape ghunyanyami kukwenu paMupepo no gha hokwere eshi, amwe ne mwa mu dimuka shemwa.

Halleluja!

Evangelium. Mt. 16:21-27

Marundwerero ghoyitjanga yaMateghusi.

Ngeshi ghumweya ghana haka kunikutha, ghakufupipithe thinda, no gha shimbe thikurushe thendi gha ni kuthe

Kutunda pa, ha dimukitha Jesusi hakathishongero wendi thiwana eshi gha kone kuyenda kuJerusalema, no mbo ghana ka nyanda kwawamayami no kwawapristeri hohakuru no kwawakamarukwaro. Mbo hana mu pagha no mudiyuwa dyoghuhatu mbo ghana vumbuka mwawafu.

Ko kumuthighurura Petrusi pambadi no gha tangire kumukoghaghura eshi: “Ngo gha kone Nyambi kuyishinga, Hekudyange! Ngo mbadi ya kona kukuhokokera.”

Ene Jesusi gha pirukire kwaPetrusi no gha mu tongwerire eshi: “Kughutho wange, Shatani! Kurunga ghuna kunirungerera we. Yoyishi mbadi wa ghayara yi gha hima Nyambi, shimengwa yi ha hima hanu.

Ko kuninga Jesusi kwawakathishongero wendi eshi: “Ngeshi ghumweya ghana haka kunikutha, gha kufupipithe thinda, no gha shimbe thikurushe thendi gha ni kuthe. Yoyishi oyu ghokuhaka kukunga moyo wendi, ghuna kumuyongara. Ene yu ghokuyongaritha moyo wendi papange, mbo ghana ghu wana. Yinye sho yi mu ghamwene munu ngambi ha with a kaye kokahe, ene moyo wendi ne ghana yongaritha, ngambi thinye sho gha tape munu kukutjindjitha moyo wendi? Yoyishi Mwanamunu, ghana kuyenda no kwiya mughufumu waWihe nawaengeli wendi. Munyima po mbo nagha ruwera kehe yu popayitenda yendi.

Mañando ghoEvangelium.

TWENTY THIRD SUNDAY IN ORDINARY TIME

Shundaha ghomakumi mawadi no ghoghuhatu ghomumwaka.

FIRST READING

Thitoya thokutanga. Ez. 33::7-9

Mumbapira dhaMuporofeta Ezakiel.

Ngeshi mbadi wa kushinga mukakuharura mbo na shana manyinga ghendi kunyara dhoye

Dyo ghana kuninga Fumu eshi Mwana Munu na kupakire ghutakamithe ndhugho dhaIsragheli; no ngeshi ho yuvu ñando mukanwa kange, wa kona kuwashinga ghu wa kandwere kumutara wange. Ngeshi ha ni ghamba kwawakakushwena Nyambi eshi: Owe wa dhira kutawa, mbo ghuna fu, ene we ne mbadi wa kuwashinga eshu ghu wa thighure, ngo mbo ghana wa pagha ene manyinga ghawo ne ku gha shana kunyara dhoye. No ngeshi ho shingi mukaghuyi eshi gha piruke ene mbadi ghana kuthigha eshi gha piruke, mbo gha na fera mughuharuri ene moyo ghoye ne mbo ghunapu kughamwena.

Mañando ghaNyambi.

Responsorial Psalm.

Dimbokatji. Ps. 95: 1-2. 6-9.

R:

Dyarero ngeshi mu yuve diywi dyendi mwa ndundumena mitjima dhenu.

Mwiye tu shamberere kate kudifumanekero dyaFumu, dyodiwe dyoghupongoki wetu! mu ninge tu hangane rupara rwendi nomakughero, tu mu shamberere nomembo ghomakughero.

R:

Dyarero ngeshi..

Mwiye tu raperere no tu fumbamene; tu tongamene kughutho waFumu no twe ne twadiko dyomadyero ghendi nondjwi dhomunyara dhendi. Mawe, ngo mu tegherere vene dyarero kudiywi dyendi!

R:

Dyarero ngeshi…

Mwa ndudndumenitha mitjima dhenu yira kenge di mwa karire muMeriba, yira thika di mwa karire mudiyuwa dyaMassa

mumamboreya. Omu ha ni yerekire hakerekandongo wenu, ha ni yerekire ngambi kenge ha monine yirughana yange.

SECOND READING.

Thitoya thoghuwadi. Rom. 13:8-10

Mumbapira dhaMupostoli Paghulusi kwawakaRoma.

Mwakara nomirandu kwamunu, shimengwa mukuhakathane. Yoyishi oyu ghokuhaka muyendhendi, ghana rikanyitha muragho. Miragho dhodhihe ne dhino eshi: “Wa tjora ghurugho, wa pagha , wedha, wa rumbera,” ngambi ngo poghudi muragho ghumweya. Dhodhiheya dha kara mumuragho ghofotji ghuno eshi: “Hake muyendhoye thika di wa kuhaka ghothinda. Ruhakitho ne mbadi rwa tenda ghuyi kwamuyendha. Yo rwa karera ruhakitho eshi marikanyithero gho kehe muragho.

Mañando ghaNyambi.

Gospel Acclamation

Halleluja. Jn. 17:17

Wa pongwera kukoye paghushemwa. Ňando dhoye ne dhaghushemwa.

Halleluja

Evangelium. Mt. 18:15-20

Marundwerero ghoyitjanga yaMateghusi.

Jesusi gha ghambire kwawakathishongero wendi eshi: “Ngeshi ku ghana shinyi muyendhoye thothiyi kukoye, yende ghu ka mu koghaghure oku mudi pithenu mwawadi. Ngeshi ha kutegherera, ghuna mu with a muyendhoye. Ene ngeshi mbadi ghana kutegherera, shimbe ko karo yofotji ngambi hawadi pofotji noye. Yoyishi eyi sho mu ghambe, yi katanarere pawashupi hawadi ngambi kumbunga. No ngeshi twa ndundu, ka yi tongore kumbunga. No ngeshi nawambunga temba mbadi ghana kuwayuva, mu yendithe nowe thihayidena no thika muketethi. Ghushemwa na kumutongwera: Eyi muna kughanga pamuve, mbo yina pu kughanga no mudiwiru, no yi muna kushutura pamuve, mbo yina pu kushutura muDina dyange, Name nawo nidi.” Mañando ghoEvangelium.

TWENTY –FOURTH SUNDAY IN ORDINARY TIME

Shundaha ghomakumi mawadi noghune ghomumwaka.

FIRST READING

Thitoya thokutanga. Eccle. 27: 30-28:7

Mumbapira dhaSirag.

Thigherere muyendhoye ghuyi wend, no kemo ngeshi ku ghuna kuraperera, po mbo gha pwa kuthigherera maghuyi ghoye

Ghupata no yitokota nayo karo yinu yi ne yiyi, mukakudhira kukarera Nyambi ne yo gha yi tambura yi.

Oyu ghokukara nonyinya, mbo ghana dhi wana kwaNyambi no maghuyi ghendi ghomahe mbo ghana kara mdighano dyendi. Thigherere ghuyi wamuyendhoye no kemo ngeshi ho raperera, po mbo gha pwa kuthigherera maghuyi ghoye. Ngeshi munu ha paka ghukore kwamuyendhendi, mbo ghana shana merukitho kwaNyambi. Yira kwamunu thinda mbadi gha kara noñeke, no gha kona kukuraperera kumaharwero ghendi thinda ndi? Aye ngeshi hondeka munu ghupata munyama, yidye gha kumuthigherera maghuyi ghendi? Ghayare kumaharwero no thighe ghukore, ghayare ku mudhimithero no yifa no thighe kuharura. Ghayare kumiragho no wa patera muyendhoye no ghayare ku ghundambo waShokuru no ghuyeyure kate kumbira. Mu yakunuke kumvo, no ngo mbo muna para mukupira maharwero, yoyishi munu ghomupata, kufudha mvo. Mukamaharwero, kureta mushushu mukatji kawayendhendi no mukatji kothiraro ne kureta mo ye thinyenganyi.

Mañando ghaNyambi.

Responsorial Psalm

Dimbokatji. Ps. 103: 1-4. 9-12

R:

Fumu ne mukathiñeke nomukaruhakitho, mbadi gha patanga wangu.

Ghu kughe Fumu ghomudhimu wange, no yoyihe yi ya kara mwishi dhange yi kughe dina dyendi dyokupongoka. Ghu kughe Fumu ghomudhimu wange no wa vurama ko kamwe koyirughana yendi.

R:

Fumu ne…

Fumu ghana kuthigherera maghuyi ghoye ghomahe, no kwirukitha yikorwa yoye yoyihe. Ghana kukukomonona kumbira no kukukandadheka noruhakitho no thiňeke.

R:

Fumu ne…

Mbadi gha koña yihumbitha; no mbadi gha patanga kuroruhe. Mbadi gha tu mwashweranga pamaharwero ghetu no kukoňa temba maghuyi ghetu.

R:

Fumu ne..

Yira ndagha-ndagha dhodiwiru kutunda pamuve, dyo wa kara ghukuru ghoruhakitho rwendi kwawa ha mu fumaneka. Yira kayenda kokudiva kutunda kuditokera, dyo ka kara kayenda ka wa tundithanga we maharwero ghetu.

SECOND READING

Thitoya thoghuwadi. Rom. 14:7-9

Mumbapira dhaMupostoli Paghulusi kwawakaRoma.

Nyambi tu pare ndi tu fe twapa waFumu

Noyofotji temba ghopapetu ghokukona kukuparitha thinda, no mbadiko yu ghokukufera thinda. Ngeshi ku tuna kupara, kudifumanekero dyaFumu tuna kupara no ngeshi ha tu fu, kudifumanekero dyaFumu tuna kufera. Ngambi ngo tu pare ngambi ngo tu fe, atwe ne twa kara kwaFumu. Payinu yino, po gha fererire Kristusi no gha karire karo muyumi. Eshi gha kare Fumu wawafu nawayumi. Ene we, nye ghuna kutetera muyendhoye? Nowe, nye ghuna kushamwena muyendhoye? Twahe mbo tuna hokoka kughutho ghodipuna dyaFumu.

Mañando ghaNyambi.

Gospel Acclamation.

Halleluja. Jn. 6:68

Ha mu hutha Simoni Petrusi eshi: “Fumu, kwadye sho tu yende? Yowe wa kara nomañando ghokutapa moyo ghororuheya.

Halleluja

Evangelium. Mtt. 18:21-35

Marundwerero ghoyitjanga yaMateghusi.

Heya Petrusi kwaJesusi gha mwipure eshi: “Fumu, rungatji sho ni thigherere muyendhange oku ghana shinyi kukwange? Kate kurukwoko noruwadi ndi?” ha mu hutha Jesusi eshi: “Kutongwera na kukutongwera eshi, kadi rukwoko noruwadi keho, ene makumi kwoko nomawadi, rukwoko noruwadi. Po ha ghu rikanyithera ghufumu ghodiwiru pofotji nafumu, oyu ghana kuyuvu nawaguva wendi kukuwadimukitha mukudi wawo. Apa gha tangire kurondonona, ko kumuretera kwawo yu gha karire nomukudi ghomarandi mayovi. Ene mbadi gha konine kughuruwera. Po gharawerire fumu eshi ha mu ghurithe ye nemunu wendi nohanendi noyoyiheya yi gha wana. Murume yu, gha furumanine kughutho wendi no gha kandererire eshi: “Ngo ni peko tango karuvedhe, mbo na ruwera yoyiheya.” Fumu gha mu dhekerire ñeke, ha mu thighi gha ka yende no gha dhimithire mukudi.

Eyi gha shwayire munu yu, ko kuwana muyendhendi oyu gha karire nomurandu kukwendi ghomarandi ghomapu. Ko kumufinyata kwendi gha mu kame pamudyu ghu mu tongwera eshi: “Tape mukudi ghoye! Muyendhendi yu gha kuvamine kughutho wendi no ghukuhema eshi: “Hewa ni yake ko karuvedhe, mbo na kuruwera.” Aye ne mbokapwe, ko kumukoka-koka popo gha mu tware mudorongo kate gha kuruwere murandu wendi.

“Apa ha yi monine hayendhendi yi ya hokokire, ha tokotire thikuma no ha ka thimwetwedhire yoyiheya yi ya hokokire kwafumu wawo. Fumu gha tumine ha ka mu rete no gha ningire kukwendi eshi: “Ghomuringi-ringi we! Mirandu dhodhiheya dhiya na kuthigherera, yoyishi ghuna ni kanderera. Mbadi wa kona kudhekera ňeke muyendhoye, kenge di na kudhekera ñeke me ndi?” Fumu gha fudhakanine thikuma, ho gha mu tapire ha mu shinye kate gha kuruwere murandu ghoghuhe.

“Kemo mbo gha tenda nenu naye, Tate ghomudiwiru, ngeshi kehe yu kadi wa kuthigherera muyendhendi mumutjima.”

Mañando ghoEvangelium.

TWENTY-FIFTH SUNDAY IN ORDINARY TIME

Shundaha ghomakumi mawadi noghoghukwoko ghomumwaka.

FIRST READING

Thitoya thoghuwadi.

Mumbapira dhamuporofeta Jesaya. Jes. 55:6-9

Yighayara yange ne mbadi yoyenu

Mushane Fumu popo ghadi po; Mumwithe popa ghadi popepi.

Ha shwaghe mundhira dhendi hakakudhira kumukarera no hapata ha shwaghe muyighayara yendi, no ha piruke kwaFumu, ndani po mbo gha wa fera ñeke paNyambi, yoyishi gha thighereranga wangu. Yoyishi yighayara yange ne mbadi yoyenu, nomayira ghenu ne mbadi ghoghange. Yira ndagha-ndagha dhodiwiru kutunda pamuve kemo dyo wa kara ghure ghomayira ghange gha pita ghenu noyighayara yange nayo kemo noyenu.

Mañando ghaNyambi.

Responsorial Psalm

Dimbokatji. Ps. 145: 2-3. 8-9. 17-18.

R:

Fumu ne pepi gha di nawahe wa hana kumwitha.

Na himi kukutumera kehe diyuwa Hekudyange, mbo na kukughu kuroruhe nororuheya. Nyambi ne mukuru no gha pwa kufumaneka, no ghukuru wendi new a tumba kare.

R:

Fumu ne..

Fumu ne mukaruhakitho nothiňeke mbadi gha patanga wangu no gha yara ruhakitho rokuroruheya. Fumu ne muwa kwayomuhe no gha fera ňeke yivareka yendi yoyihe.

R:

Fumu ne..

Fumu ne muhungami mumayira ghendi ghomahe no muyirughana yendi.

SECOND READING

Thitoya thoghuwadi. Fil. 1:20-24. 27.

Mumbapira dhaMupostoli Paghulusi kwawakaFilipusi.

Mumwange Kristusi ne moyo wange

Edi ne dyodirura dyange dyodikuru. No makurupero eshi, mbadiko thi mbo nitenda ethi mbo thi ni fitha honyi. Ame na himi karo pashañanyi-ñanyi no thika roruhe no ghutjimapa mumoyo wange ghoghuhe, mukufumaneka Kristusi mumoyo wange no mukufa. Yoyishi, mughuyumi kukwange ne yoKristusi. Mukufa kwange ne moyo ghororuheya. Ngeshi kun a kupara, na kona kurunduruka nokamwagha-mwaghe koyirughana. Ethi sho ni kone kutorora, mbadi tha kudimuka me. Ame ne matamanyi nidi: Na ruru kuyenda kutja no kukara naKristusi. Yoyishi, thothokupiterera thikuma. Ene muyihima yenu, thokupiterera thikuma ne nipare.

Thinu thothikuru ne thino eshi, yipara yenu yikununge pofotji nombudhi dhaKristusi. Ngeshi mbo niye, mbo na na yimono nothinda. Ngambi ngeshi mbadi mbo ni kona kwiya, mbo na na yuvu mukurwera matawero muMbudhi Dhodhiwa dhaKristusi.

Mañando ghaNyambi.

Gospel Acclamation.

Halleluja. Luk. 19:38

No ghembire eshi: “Gha fumane Fumu. Oyu ghana kwiya muDina dyaNyambi; thiraro mudiwiru no difumanekero kwaNyambi mumawiru.”

Halleluja!

Evangelium. Mtt. 20:1-16

Marundwerero ghoyitjanga yaMateghusi.

Endi yidi diho dyoye yoyi na kara me nomuhunga

Jesusi gha ghambire kwawakathishongero wendi eshi : “Ghufumu ghodiwiru wapitura yira thindashadipya, oyu ghana kuyenda pamathiku-thiku gha ka shane havereki homudipya dyendi. “Apa gha manine kukuyuva nawo yokuwaruwera ndjambi dhawo, ko kuwatuma ha ka rughane mudipya dyendi. Muviri dhoghukwoko noghune, gha yendire karo no gha ka wanine hamweya ha nemana panunda nyara-nyara. Ha wa tongwera kwendi eshi: “Mu yende namwe mu ka rughane mudipya dyange, yoyiredhu ñanyi na kumuruwere.” Nawo ko kayenda. Pamutwekatji no pathitengeyuwa gha yendire karo kudipya dyendi no gha ka tendire thika dyodyo. Pakutegha mukunyi diyuwa, gha yendire ko karo no gha ka wanine wa ha nemana po, ha ningi kukwawo eshi: “Nye mu nemanena pano diyuwa dyodiheya nyaranyara?” Awo ha mu huthire eshi: “Yoyishi mbadiko yu ghana tu kutu kuyirughana.” Mu yende namwe mu ka rughane mudipya dyange, dyo gha wa ningire.

“Parunguro gha ningire thindashadipya kwamurughani wendi eshi: “With havereki no wa tapere ndjambi dhawo. Ho tangerere kwawakanyima, paghuhura ne hakakutanga.”

“Awa heyire pakutegha mukunyi diyuwa, ha henyine ko no ha wanine keheyu popandjambi dhodiyuwa di. Awa ha tangire kwingena muyirughana pakutanga, ha ghayarire eshi hana kutambura wingi. Ene yi hana kukuma kurufo rwawo, nawo ko kuwana keheyu ndjambi dhodiyuwa di. Ko kutumbura kwawo manyinga no ha tangire kukoghaghura thindashadipya ghuninga eshi: “Awa hakamunyima ne viri dhofotji hana rughana. Owe ne ho ghuna kuwapa ndjambi pofotji netu twe tuna rughana thikuma diyuwa dyodihe mudiyotha.”

Ene ye gha huthire kwaghumweya ghopapawo eshi: “Mundenge mbadi na kutenda thothiyi noye. Mbadi ghuna kuyuvu nange kundjambi dhodiyuwa dyodi vene ndi? Tumbure manyinga ghoye no ghu yende kudighumbo. Na himi kutapa kwawakamunyima pofotji yira kukoye. Mbadi na kona kutenda nomanyinga ghange thika di na himi ndi? Endi kukoye ne nya yoyi na kara nomuhunga?”

“Kemo mbo ha kara hakamunyima wo hakakutanga, no hakakutanga ne wo hakanyima.”

Mañando ghoEvangelium.

TWENTY-SIXTH SUNDAY IN ORDINARY TIME

Shundaha ghomakumi mawadi noyofotji ghomumwaka.

FIRST READING

Thitoya thokutanga.

Mumbapira dhaMuporofeta Ezakiel. Ez. 18:25-28

Ngeshi ha piruka mukakudhira kukarera Nyambi kughumango wendi, mbo ghana paritha mudhimu wendi

Kemo ghana kuninga Fumu: Ene shime muna ninganga eshi ndhira dhaFumu ne mbadi dhiwa. Yuve we ndhugho dhaIsragheli! Mbadi dhiwa nane ndhira dhange? Mbadi may inane mayira ghenu ndi? Ngeshi hahunga ha tunda kughuhunga wawo no kutanda ghuyi, ha fera mughuyi wendi ghu ghana tendi. No ngeshi ha piruka mukakudhira kukarera Nyambi kughumango wendi, no kutenda ghuhunga mbo ghana paritha mudhimu wendi. Ghana yi mono no ghana piruka gha thighe ghuyi ghu gha tenda, mbo ghana para shemwa no mbadi mbo gha fa.

Mañando ghaNyambi.

Responsorial Psalm.

Dimbokatji. Ps. 25:4-9.

R:

Ghayare Fumu thiñeke thoye.

Fumu ni honge mayira ghoye gha ni dimukithe. Ni honge kupara yipara yoye yoghushemwa, yowe Nyambi wange yu ghana kunikunga. Na kuraperanga kehepano mumoye. Ghayare Fumu ghuhungami ghoye noruhakitho roye rokuroruhe oru wa negha kare.

R:

Ghayare Fumu..

Ni thigherere maharwero ghange nomaghuyi ghange ghopawanuke. Ni ghayare mughuhunga nomuruhakitho roye rokuroruhe.

R:

Ghayare Fumu.

Yoyishi Fumu ne muhungami nomuwa, ghana kuhonga yiharuri yondhira dhawo dhi sha kuthe. Ghana kutwara hakakunyanda mundhira dhodhihunga. No kuwahonga mahimeno ghendi.

SECOND READING

Thitoya thoghuwadi. Fil. 2:1-11

Mumbapira dhaMupostoli Paghulusi kwawakaRoma.

Yino yikaritha yi kare mumwenu eyi ya karire karo mwaKristusi

Ngeshi mwa wana mahengawero mwaKristusi. Nomatjokedhero ghomuruhakitho, makurupero ghopaMupepo, no mu kuhakathane ho mu pare pofotji. Mu rikanyithe keho yishamberera yange pakukupakerera pofotji: muruhakitho rofotji mumutjima ghofotji. Mwa kutendera yenu mwathinda, ngambi kukununeka, ene mukukumbirupitha, gha kone ghumweya kukutekera muyendhendi kupiterera thinda. Kadi yomuhe ghopapenu yu gha kona kukukutekera thinda. Ene gha kutekere hamweya karo.

Yighayara yenu yi kare pofotji mumwenu, thika di yakara karo mwaKristusi Jesusi.

Oyu gha karire muthishwi thaNyambi, yipara yendi yarikanyine kwaNyambi, mbadi gha kupambekire kughunyambi.

Ene Aye, gha kumbirupithire apa gha karire muthishwi thoghhupika no gha karire munu vene. No apa gha hokokire mughunu, thinda gha kumbirupithire pakukara ghutawedhi kate kukufa, kemo, kufa ku kwapathikurushe. Yodigho Nyambi gha mu kutekerire karo thikuma no gha mu pire Dina dyokupiterera mena ghomahe, eshi muDina dyaJesusi, yomuhe ghomudiwiru no ghopamuve gha kuvame manwi, no kehe rudimi runongonone eshi: “Jesusi Kristusi ne Fumu!” kudifumanekero dyaNyambi Wihe.

Mañando ghaNyambi.

Gospel Acclamation

Halleluja. Jn. 14:23

Ko kumuhutha Jesusi eshi: “Mukakunihaka, ghana kukunga mañando ghange mumutjima wendi, naTate ghana kumuhaka no mbo tuna yendi kukwendi no kutunga nendi.

Halleluja

Evangelium. Mtt. 21:28-32

Marundwerero ghoyitjanga yaMateghusi.

Nyambi ghothiraro ne mbo ghana kara nenu

Jesusi gha ghambire kwawaruti hohakuru nawamayami eshi: “Nye muna kughayara mwe pano? Pa karire murume nohanendi hoharume hawadi.” Ko kuyenda kwendi kwamukurwamunu gha mu tongwere eshi: “Mwanange, yende ka rughane dyarero mudipya.” Aye ha mu hutha eshi: “Na shwena!” munyima ko kukwera kwendi no gha yendire. Murume yu gha yendire karo kwaghumweya, no gha mu tongwerire thika dyodyo. Aye gha huthire eshi: “Ghuhunga tate,” ene mbadi gha yendire. Yidye ghopawawadi oyu gha tendire yi gha himine wihawo?” Awo eshi: “Mukakutanga.”

Ko kuninga Jesusi kukwawo eshi: “Shemwa na kumutongwera: Haketethi nawakamadi horungu, mbo ha nengena kughutho wenu mughufuma waNyambi. Yoyishi Johannesi, gheyire kukumuneghedha ndhira dhodhihunga, ene mbadi nu tawire. Awo haketethi nawakamadi horwiho ne ha mu tawire. Ngambi nga pa mwa yi monine, mbadi mwa kwerire munyima no kumutawa.”

Mañando ghoEvangelium.

TWENTY- SEVEN SUNDAY IN ORDINARY TIME

Shundaha ghomakumi mawadi nokwoko noghuwadi ghomumwaka.

FIRST READING

Thitoya thokutanga. Jes. 5:1-7

Mumbapira dhaMuporofeta Jesaya

Dipya dyaFumu ghombunga ne ndhugho dhaIsragheli

Ninge nimbere muhakwa wange dimbo; dimbo dyamuhakwa wange dyodipya! Muhakwa wange ne gha karire nodipya padirundu dyoghuyeghave. Gha pirurire muve wadyo no gha tunduthire no mawe, no gha di tapekire noyitondo yovinyu, gha tendire mo kataratara komakengero mwishi dhadyo no gha yuwire no ditenga; gha ghayarire eshi mbo di nemi mandjembere ghomawa, ene dyemine mandjembere ghomasheshe. Pañanyi-ñanyi mwakaJerusalema no mwakaJudeya, mu pangure pakatji kange no dipya dyange. Thinye karo thi thina thighara kudipya dyange ethi na dhirire kutenda me? Pashanye na tatererire eshi dime mandjembere ghomawe ene keme mandjembere ghomasheshe? Tango ni mu pe thidimukitho ethi sho ni ka tende nodipya dyange: Ñanyi ni ka shwayithe ko ruthito rwange romighunga, eshi di kwapwe kudhimitha no mbadi dhadyo dhi dha difugha, kuna ka dhiyoghaghura eshi dya kupwe kudyata-dyata. Mbo na ditoperera noghurugha. Mbadi mbo ni ghuhokorora ngambi kughuteta, ene kuthigha dhi candere mo mighunga no shosho; no mbo na tjayera mavuyi eshi mbadi wa kurokera mo mvura. Yoyishi dipya dyaFumu ghombunga ne ndhugho dhaIsragheli, no hanu homuJudeya ne yoyitondo yovinyu yi gha tapekire mo. Gha wa ghayarerire eshi ha tende yoyiwa, ene wo ne ko kupagha. Gha wa ghayarerire eshi ha tende yoyihunga, ene miyambo dhawo dhoyiyama dha kughererire kuyipangura.

Mañando ghaNyambi.

Responsorial Psalm

Dimbokatji. Ps. 80:9. 12-16. 19-20

R:

Dipya dyovinyu waFumu ne ndhugho dhaIsragheli.

Thitondo thovinyu wa thi tundithire muEgiptena, yowe wa tjidhire mo hanu no kuthitapeka mo. Gha tapathanithire mite dhatho kate kudikuruviya no midhi dhatho ne kate kurware.

R:

Dipya dyo…

Yinye wa dhingwenenine ruthito rombadi dhadyo, eshi yomuhe yu ghana kupoghoroka p one gha kone kwidha mandjembere ghapo?

Ngidi dho kuhokomoka mudiputa kuthidyata-dyata no yishereka ne kuthidya.

R:

Dipya dyo..

ghoNyambi ghomukangcamu, tu hukere, tu thetuke mudiwiru no tu kenge, no thotere pathitondo thovinyu thi, kare mukungi ghothi dya tapekire dyoko dyoye dyorudyo, no kwamurumeghana yu wa kurithire ghothinda.

R:

Dipya dyo..

Mbadi mbo tu tunda kukoye karo tu parithe no mbo tuna kukughu. Tu huthe Fumu Nyambi ghomukangcamu tu neghedhe ňeke dhoye no ngo mbo tuna para.

SECOND READING

Thitoya thoghuwadi. Fil. 4:6-9

Mumbapira dhaMupostoli Paghulusi kwawakaFilipi.

Nyambi ghothiraro ne mbo ghana kara nenu

Mwakudhekera kuyinu yimweya. Ene muyuvithe dirura dyenu pamandapero nomakuhemeno nomatumero kwaNyambi. Nothiraro thaNyambi thi thapiterera maghano ghomahe, mbo thina kara mumitjima dhenu nomuyighayara yenu mwaKristusi Jesusi.

Karo mwayendhange, yoyiheya yoghushemwa, yoyiheya yoghuhunga, yoyiheya yokukushuka, yoyiheya yoyiwa, yoyiheya yomudikuto, ngambi yi hahaka hanu noyi hafumaneka-ngambi yoghutumanithi endi yinu yomakughero- amwe mwa kona kuyighayadhara thiwana. No yi mwa kuhongire kukwange no yi mwa yuva no kumona, mwa kona kuyirughanitha. NaNyambi yu gha tapa thiraro, mbo ghana kara nenu.

Mañando ghaNyambi.

Gospel Acclamation.

Halleluja. Jn. 15:15

Mbadi na kumutoya shime eshi mwavereki, yoyishi muvereki kadi wa kudimuka eyi ghana kutenda hekudyendi. Ame ne kuna kumutoya eshi mwahakwa wange, yoyi na mu dimukitha yoyiheya yin a yuvire kwaTate.

Halleluja

Evangelium. Mtt. 21:33-43

Marundwerero ghoyitjanga yaMateghusi.

Gha kutire ko handjimi hamweya kudipya dyendi dyovinyu

Jesusi ghaningire eshi: “Mu tegherere shime kumaghanekero. Pa karire mutungi yu gha tendire dipya, no gha di thitire noruthito romawe. Ha tjuku thikameno, no kumbadi dhatho gha shokekire ko, kataratara komakungero. Munyima ko kupaka ko handjimi, no gha yendire kuruyendo. Apa dha rikanyine nako dhomukokoro ghombuyo, ko kutuma kwendi hamweya ghopawapika wendi, ha ka mu retere ko dihenda dyombuyo. Ene handjimi ha kwatire hapika wa, yofotji ha mu pumura no ghumweya ha mu pagha, ndani ghumweya ha mu nyetedha mumawe. Thinda shadipya ko kutuma karo hapika hamwe kupiterera hokutanga. Ene handjimi ha wa tendire thika dyo. Paghuhura gha tumine ko mwanendi ghughayara eshi: “Shemwa ňanyi ha ka mu yape mwanange.” Handjimi pa ha monine mwanendi, ha ghambathanine eshi: “Oyu ne yomukakuyora. Mwiye tu mu paghe, ho tu tumbure yiyora yendi. Ko kumukoka kwawo no kumuvukumena panunda dhodipya no kumupagha. “Pa ka huka keho thindashadipya ne, ngepi keho sho gha tende nawandjimi wa?

Awo ha mu hutha eshi: “Aye ghana kushinya hanu wa hohamango noyifa yoyimango, no kutapa dipya kwawandjimi hamweya, hokumureteranga mbuyo munako dhi dha rikanya po.”

Ko kuwatongwera Jesusi eshi: “Kare mwa toya muyitjanga eshi: “Diwe di ha mwaghire hombi, shemwa dyo dina kara diwe dyodishonga. Ene thitetu mumeho ghetu.” Yodigho na kumutongwera eshi: Ghufumu waNyambi mbana ghu mu kungura no kughutapa kudiko di mbo di ka para mbuyo dhagho.

Mañando ghoEvangelium.

TWENY-EIGHTH SUNDAY IN ORDINARY TIME

Shundaha ghomakumi mawadi nokwoko no mahatu.

FIRST READING

Thitoya thokutanga. Jes. 25:6-10

Mumbapira dhaMuporofeta Jesaya.

Fumu ghana kuroghitha difeste, no ñanyi gha kukuyure diyuywa dyomarupara ghomahe.

Fumu ghotushumba ñanyi gha kuroghithe difeste dyomako ghomahe pano padirundu dyaSiyoni. Difeste dyoyidya yoyiwa. Mbo ghana tunditha po divuyi dyoyitokota edi dya ndhenderera mako ghomahe. Fumu ghomako ghomahe mbo ghana dhimitha kufa kuroruhe! Mbo ghana kuyura mahodhi ghomarupara no kutunditha po makumbirupithero gha ha nyandire hanu wendi mukaye kokahe. Fumu thinda ghana yi ghamba! Apa ya kuhokoka yi, kehe yu mbo ghana ningi eshi: “Oyu ne yo Nyambi. “Oyu twa kurupera mumwendi oyu gha tu komonona. Yoyishi nyara dhaNyambi ne mbo dhina turumuthera padirundu dino.

Mañando ghaNyambi.

Responsorial Psalm

Dimbokatji. Ps. 23: 1-3. 3. 4-6

R:

Mbo na kara mundhugho dhaFumu mumayuwa ghomoyo wange ghomahe.

Fumu ne mudithi wange na kara nothinu thothihe ethi na wana. Ghana kunigombitha muthighombo mwene no kunitwara kumeyu ghomatenda ghokukendhumuka ni kakungcavure. Ghana kutendereritha mudhimu wange.

R:

Mbo na..

Ghana kunitwara mundhira dhoghuhungami mumahimeno ghodina dyendi. Ngambi ngo ni yende mumakokore, mbadiko thi thokuyapa Hekudyange, yoyishi nange ghu di. Muramu nomburo dhoye yina kunighamwena.

R:

Mbo na..

Ghuna kuroghitha thidyero kughutho ghorupara rwange; oku ha na kunimona hanyathi wange rupara norupara, ghuna kudoweka mutwi wange nomaghadhi, ghuna kunitambura yira mugenda ghodikuto no kuyaritha kopi wange kate pamiromo.

R:

Mbo na..

Na dimuka eshi ghuhunga noruhakitho roye mbo yina kara mumoyo wange; nondhugho dhoye mbo dhina kara matungo ghange ghomayuwa ghomoyo wange ghoghuhe.

SECOND READING

Thitoya thoghuwadi. Fil. 4:12-14. 19-20

Mumbapira dhaMupostoli Paghulusi kwawakaFilipi.

Na kona kutenda thothihe moyu gha ni tanaritha eshi Kristusi.

Ame ne na dimuka kunyanda no na dimuka eshi nye ruvigha: Yoyiheya yi na kumonena me: mukukara mumakuta endi mukufa ndhara, muruvigha, ngambi mukunyanda. Ame ne na kona yoyihe papendi Yu gha nipa ngcamu. Karo mwe mwa tendire ghuhunga pakunighamwena mumaghukukutu ghange. No Nyambi wange mbo ghana mupa ruvigha mu kehe thinyanda thenu thika mukamwagha-mwaghe kendi, mughutungi ghomwaKristusi. Difumanekero kwaNyambi wetu noWihetu kate kuroruheya! Amen.

Mañando ghaNyambi.

Gospel Acclamation.

Halleluja. Jn. 1:12.14

Ñando dha karire munu no dha tungire pakatji ketu. Atwe twa monine ghufumu wendi, yira waMwana ghpithendi oyu gha tunda mwaWihe, gha yara ñeke noghushemwa.

Halleluja!

Evangelium. Mtt. 22: 1-14

Marundwerero ghoyitjanga yaMateghusi.

Jesusi gha ghambire karo nawanu mumaghanekero. Gha ningire eshi: “Ghufumu ghodiwiru, wa pitura yira fumu yu gha roghitherire mwanendi mukandi.

Ghatumine hapikendi, ha kethe wa ha pwire kuragha kumukandi. Ene ha shwenine kwiya ko. Munyima kokutuma karo hapika hamweya nomarawero eshi: “Mu ka wa tongwere wa hana pu kuragha: Diyumbu ne dina rogho, mapuru ghange noditimbe, yina pu kupagha no yoyiheya yina kumenena mo. Mwiye kumukandi.” “Ene wa ha pwire kuragha mbadi ha yi thoterire. Ghumweya gha yendire kuthirwa thendi, no ghumweya kuyirughana yendi. Hamweya ha purundundire hapikendi no kuwashinya no kuwapagha. Fumu gha patire no gha tumine hamashurundate wendi, ha ka paghe wa hapaghi no ha ka tumekere mbara dhawo.

“Haningi kwawapikendi eshi: “Yoyiheya yina pu kurongathana kumukandi. Ene wa hana pu kuragha, mbadi yina wa roghera. Mu yende ko keho mumahangayira, ho mu kethe hanu wahe was ho mu ka hangane, kumukandi.” Hapika nawo ha yendire mumakuhangano ha kokwedhire hanu wahe wa ha wanine, hamango nawahunga. Ko kuyara ditara-tara dyomukandi kwawagenda.

“Apa ghengenine fumu, ha mono kwendi murume yu gha dhirire kushupata yivata yomukandi, no gha ningire kukwendi eshi: “Mundenge, ngepi di ghunengena muno yokupira yivata yomukandi?” murume yu, mbadi wa kukona kuhutha. Ko kuninga fumu kwawakareri wendi eshi: ‘Mu mu ghange kumoko ghendi no kumapadhi, ho mum u vukumene panunda mudikokore. Ko sho ha ka direre nomahumangayegho.” Yoyishi, hengi hapwa kwitha, ene hapwa kutorora.”

Mañando ghoEvangelium.

TWENTY-NINTH SUNDAY IN ORDINARY TIME

Shundaha ghomakumi mawadi nokwoko noghune ghomumwaka.

FIRST READING

Thitoya thokutanga. Jes. 45:1.4-6

Mumbapira dhaMuporofeta Jesaya

Tumbure dyoko dyorudyo rwaKores mu kumwaghera diko kughutho wendi.

Kemo ghana kughamba Fumu kwamuwethi wendi, kwaKores, oyu na tumbura dyoko dyendi dyorudyo mu kumwaghera mako kughutho wendi, ame ne pakushupura yitere yawafumu yodifuno, eshi ha mu yandhwerere mathero, nomayira ne mbadi mbo gha pwa kuyandhera. Pa Jakopu ghomupikange, naIsragheli ghomutorori wange, na kwitha padina; na kupa dina dyodikuto ngambi kenge di wa ni dhirire kunidimuka panganyi. Yame Fumu no mbadiko karo Nyambi yu gha kara kumbadi dhange. Kuna kukupa ngcamu dhange dhi wa nyanda, ngambi kenge di wa dhira kunidimuka panganyi. Na kuyitenda yi eshi kehe yu gha ni dimuke kutunda kumavero ghodiyuwa kate kumatokerero eshi mbadiko karo Nyambi ghumwe kumbadi dhange.

Mañando ghaNyambi.

Responsorial Psalm.

Dimbokatji. Ps. 96: 1. 3-5. 7-10

R:

Tape dikuto nongcamu kwaFumu.

Mwimbe dimbo dyodipya kudifumanekero dyaFumu, mu mwimbere Fumu mwakaye kokahe. Mu pupanithe difumanekero dyendi, noyitetu yendi mumako ghomahe.

R:

Tape dikuto..

Yoyishi Fumu ne mukuru no gha fumana thikuma; aye ne gha fumana kwawanyambi wahe. Yoyishi hanyambi ghomako ghomahe ne

hanyambi hoghumbango, ene Fumu gha varekire diwiru.

R:

Tape dikuto..

Mu kughe Nyambi mwanu mwahe hopakaye, mu kughe ngcamu dhodifumanekero dyendi. Mu fumaneke dikuto dyodina dyaFumu, mu rete muyambo mundhugho dhendi.

R:

Tape dikuto..

Mu fumbamene kughutho wamupongoki ngeshi kuna kushwagha, mum u tumere mwakaye kokahe! Tongore kumako ghomahe eshi Nyambi ne Fumu! Mbo ghana pangura mako mughuhunga.

SECOND READING

Thitoya thoghuwadi. 1 Thes. 1: 1-5

Mumbapira dhokutanga dhaMupostoli Paghulusi kwawakaTesalonika.

Kuna kupungura matawero ruhakitho nomakurupero ghenu mumaghano ghetu.

Edhi dhina kutunda kwaPaghulusi, Silvanusi naTimoteghusi. Kumbunga dhaWakatesalonika, edhi dha kundama kwaNyambi Wihetu naHekudyetu Jesusi Kristusi. Ñeke nothiraro yaNyambi Wihetu, naHekudyetu Jesusi Kristusi yi kare nenu!

Mwayendhetu, atwe tu kone kumutumera Nyambi kehe pano kukwenu. Karo eyi ne ghuhunga. Yoyishi matawero ghenu, kuvura ghana kuvura. Noruhakitho rokwawayendhenu ruvure roruhe. Yo tuna kughambera ghukutanaghura papenu mumambunga ghomahe ghaNyambi. Gho tuna kuthimwetwedha yomatjimapero no yomatawero ghenu, no yomarupetho ghenu no muyinyanda yoyihe eyi mudi nayo.

Yoyiheya yin e thineghedhitho thoghuhunga, thondhango dhaNyambi. Eshi, aye ne ghamununeka pañanyi-ñanyi.

Mañando ghaNyambi.

Gospel Acclamation.

Halleluja. Jn. 17:17

Wa pongwera kukoye paghushemwa. Ñando dhoye ne dhaghushemwa.

Halleluja!

Evangelium. Mtt. 22:15-21

Marundwerero ghoyitjanga yaMateghusi.

Mu tape kwafumu yi ya kara yafumu, no kwaNyambi eyi ya kara yaNyambi.

Ko kukunungathana Hafarasayi eshi, ha mu yereke Jesusi nodipwero. Ha tumu kwawo hayihongwana yawo naWaherodiyane hamweya, ha ka mu tongwere eshi: “Muhongi, twa dimuka eshi, owe ne ghomukaghushemwa. Watjimapa mughushemwa no wa neghedha hanu ndhira dhaNyambi, no mbadi ghuna kuthotera yawanu, yoyishi mbadi wa tokomena kughunu wamuguva. Tu tongwere di ghuna kughayara we: Ghuhunga kuketa diketo kwafumu shokuru ndi, endi kadi kemo?

Ene Jesusi gha monine ghumbango wawo no gha wa tongwerire eshi: “Mwakadifurumeko! Yinye muna kuniteghera dikoñoto? Mu ni neghedhe dinyinga di hana ketithanga diketo.”

Ko kumuretera kwawo dinyinga, ha wepura kwendi eshi: “Wadye ghu mtwi nodina yi yidi po?” Awo ha mu huthire eshi: “Yafumu shokuru.”

Mañando ghoEvangelium.

THIRTIETH-SUNDAY IN ORDINARY TIME

Shundaha ghomakumi mahatu ghomumwaka.

FIRST READING

Thitoya thokutanga. Ex. 22:20-26

Mumbapira dhaExodus (Mashwaghero)

Ngeshi kupetha hadidhi, mbo na kupatera.

Kemo ghana kughamba Fumu: Wa kudhekera karo mugenda no kumupetha temba, yoyishi mwa karire mwagenda muEgiptena. Mbadi mwa kona kupetha hadidhi ngambi hathighana. Ngeshi ha mu pethi pakehe muhingo, ame Fumu ngo mbo na wa tawa pakunitha kumaghamweno. No ngo mbo na mu pagha namwe muyita eshi hakamadi wenu ha kare hadidhi nohanenu ha kare hathighana. Ngeshi ghuna tapa mukudi kwakehe muhepwe ghopapange, wa mu tenda yira mukakutheka mukudi ghomanyinga no mbadi wa kona kumuwedherera ko. Ngeshi ghana shimbi mwaye waghumweya, eshi yitapa, wa kona kuthihutha kughutho ghokutokera diyuwa. Yoyishi thothi ha thihuru thoghakufika, tho gha vateka yirama yendi. No ngeshi ha nitha, mbo na mu tawa yoyishi me nomukathiňeke.

Mañando ghaNyambi.

Responsorial Psalm.

Dimbokatji. Ps. 18: 2-4. 47.51.

R:

Na haka thikuma Fumu mukangcamu dhange.

Na haka thikuma Fumu mukangcamu dhange. Fumu ne yodiwe dyange diwe dyomaturo ghange nomughamweni wange.

R:

Na haka..

Fumu ne Nyambi wange diwe dyokoyu nondanga; thingandekitho thange nonyiha dhange dhomoyo ghoshemwa, diwe dyange dyomaturo.

R:

Na haka..

Kuna kwitha Fumu ghomakughero ghoshemwa, no na kupwa kukomonona kwawakañore dhange.

R:

Na haka..

Fumu ne muyumi! Mu mukughe mughamweni wange! Mu pupanithe ghukuru waNyambi oyu ghana kunikunga. Ghana kunegha makomweneno ghomakuru kwafumu wendi no kunegha ghuhunga kwamuwethi wendi.

SECOND READING.

Thitoya thoghuwadi. Thes.1: 5-10

Muna piruka kwawanyambi hoghumbango, mu karere Nyambi no kutaterera Mwanendi.

Yoyishi mbudhi dhi twa mu yuvithire mbadi dheyire kukwenu nomañando vene. Ene nongcamu nopaMupepo ghoKupongoka, no pamanongweneno ghetu ghokuyara. Amwe mwa dimuka karo eshi, ngepi di twa mu rughanenine. Namwe mwa kuthire thitamenedhi thetu no mwa karire mwakathishongero waFumu. Mumaghukukutu ghomahe, amwe ne mwa tamburire ňando dhi dha tunda kwaMupepo ghoKupongoka noghushamberera. No kemo dyo mwa karire mwe thitamenedhi kwawatawi wahe homuMasedoniya no homuAgaye. Matunderero ghoñando dhaFumu, edhi hana kuyuvitha muMasedonoya no muGaye, kukwenu gha tunda. No kokuhe gha yukathana matwero ghenu kwawanu. Atwe mbadi twa nyanda kughamba ko karo yinu yoyingi. Yoyishi hanu hathinda hana kuyithimwetwedha eshi, ngepi di mwana tu tamburire no ngepi di mwa thighire hanyambi hombango eshi, mu piruke no mu karere Nyambi ghokuyumi no ghoghushemwa. Namwe eshi kutaterera muna kutaterera kudiwiru Mwanendi Yu gha vumbukire mwawafu. Oyu mbo gha tu ghamwena kundhango dhi mbo dhiya.

Mañando ghaNyambi.

Gospel Acclamation.

Halleluja Jn 14:23

Ko kumuhutha Jesusi eshi: “Mukakunihaka, ghana kukunga mañando ghange mumutjima wendi, naTate ghana kumuhaka no mbo tuna yendi kukwendi no kutunga nendi.

Halleluja!

Evangelium. Mtt. 22:34-40

Marundwerero ghoyitjanga yaMateghusi.

Apa ha yuvire Hafarasayi eshi, Jesusi ne ghana yandhera Hasadusayi, ko kukukongwedha kwawo pofotji. Yofotji ghopapawo ghomukamuragho, gha mu yerekire mumashendende nomepwero eshi: “Muhongi, muragho munye ghokupiterera mumiragho?”

Ha mu hutha Jesusi eshi: “Hake Fumu Nyambi ghoye nomutjima ghoye ghoghuhe nomudhimu ghoye ghoghuhe nomaghano ghoye ghomahe. Oghu ne gho ghokupiterera no-ghoghokutanga. No ghoghuwadi ghokupitura ghu ne ghuno: Hake muyendhoye thika kenge di wa kuhaka ghothinda. Mumiragho dhiwadi dhino, mo wa kara muragho ghoghuhe waMosesi noyihonga yawaporofeta.”

Mañando ghoEvangelium.

THIRTY- FIRST SUNDAY IN ORDINARY TIME

Shundaha ghomakumi mahatu noyofotji ghomumwaka.

FIRST READING

Thitoya thokutanga. Mal. 1:14-2:2. 8-10

Mumbapira dhaMuporofeta Malaki.

Mundhira ghudi; ghuna ningitha hohengi hapiruke kuyihonga yoye.

Fumu shokuru kuna kughamba eshi, Yame Fumu ghomukuru, Dina dyange ne ha di yapa mumatunga ghomahe. Fumu shokuru kuna kughamba eshi, pañanyi-ñanyi, mwe mwapristeri, ethi thikoneka ne thenu. Ngeshi mbadi sho mutegherere, ngeshi mbadi sho mu yi wane mumitjima dhenu mukufumaneka Dina dyange, mbo na tumena yoyimango papenu mukuhanyaghura makandadhekero ghenu. Mundhira ghudi; ghuna ningitha hohengi hapiruke kuyihonga yoye. Wa hanyaghurire ghundambo wa Levi, dyo ghana kughamba Fumu shokuru. Ame pamathighukero ghange na ku tendi ghu kare ghomuyi no ghoshatani kughutho ghohanu wahe futo yoyi wa dhirire kukutha ndhira dhange ene wa neghedhire yikaritha yoyihunga muyirughana yoye.

Atwe ne mbadi Wihetu yofotji ndi? Mbadi Nyambi yofotji gha tu varekire ndi? Pamurandu munye ne keho, tuna kureghera matawero mumwetu twa thinda, no kunyatha ghundambo wa wakerekandongo wetu.

Mañando ghaNyambi.

Responsorial Psalm.

Dimbokatji. Ps. 131

R:

GhoFumu, ture mudhimu wange kukoye muthiraro.

Makununekero no dihuna, ya ni pira ghoFumu. No mbadi na kukudhekera kuyinu yoyikuru eyi ya piterera maghano ghange.

R:

GhoFumu..

Ame na wana maturumuthero no thiraro. Thika di gha wana mwanuke yishamberera kwanyina, kemo dyo na wana name yishamberera.

R:

GhoFumu..

GhoIsragheli, taterere paFumu, pashadyarero no kuroruheya.

SECOND READING.

Thitoya thoghuwadi. 1 Thes. 2:7-9.13

Mumbapira dhokutanga dhaMupostoli Paghulusi kwawakaTesalonika.

Twa patire kutapa kukoye mbadi mbudhi dhodhiwa pithadho ene yoyiheya yomupara yetu.

Ngambi kenge di twakonine kumurawera yinu yoyihe yira twapostoli waKristusi. Twa karire noruhakitho noghunongo kukwenu, yira mukamadi yu ghana kushewa hanendi. Pakumuhaka mbadi twa mu reterire Mbudhi Dhodhiwa pithadho keho, ene twa tapire moyo dhenu karo papenu. Yoyishi twa mu hakire. Yoyi mu vuruke mwayendhetu, eshi ngepi di twa rughanine thikuma no di twa hupire kayuwa. Atwe twa rughanine mutenya noghuthiku, tu dhire kunyeghenyitha ghumweya ghopapenu, apa twa mu yuvithire mbudhi dhaNyambi.

Tuna kumutumera Nyambi roruhe kuyinu yi, eshi mbudhi dhaNyambi dhi mwa yuvire kukwetu, mwa dhi tambura no mwa dhi wana, mumanongweneno eshi, kadi mañando ghawanu, ene maňando ghaNyambi.

Mañando ghaNyambi.

Gospel Acclamation

Halleluja. Mtt. 23:9. 12

Karo mbadiko yu mwakona kutoya pano pamuve eshi wihenu, yoyishi yofotji keho Wihenu, oyu ne Wihenu ghomudiwiru.

Halleluja!

Evangelium. Mtt. 23:1-12

Marundwerero ghoyitjanga yaMateghusi.

Mbadi hana kutenda yi hana kughamba.

Kutunda po, ko kutongwera Jesus mbunga nawakathishongero wendi eshi: “Hakamarukwaro naWafarasayi, ha kara nongcamu dhokupiraghura muragho waMosesi. Amwe ne mu tende no mu kwate yoyiheya yi sho ha mu tongwere. Ene thitamenedhi thawo, mbadi mwa kona kuthikutha. Yoyishi hathinda nawo mbadi hana kutenda yi hana kughamba. Awo hana kughangadheka mipango dhodhiremu, no kudhikambadheka payifudhi yawanu.

Hathinda mbadi hana kukundama ko nokanyehe temba eshi ha ghamwene. Yoyiheya yi hana kutenda, hana kuyitenda eshi ha wa mone hanu. Hana kukughanga mighagha dhodhiyaghuyu mumitwi dhawo, no kupaka mararami kughuhura ghoyivata yawo. Karo ha haka mango ghomakuto pamakuyarekero ghomumafeste, nomumango ghokughutho mumasinagoge. No ha haka kuyuva marumeritho ghawanu mumikara no kuwatoya yira hahekudya.

“Ene mwe, kadi wa kukutoya eshi mwahekudya, yofotji keho Thihongwa wenu, mwaheya ne mwamina. Karo mbadiko yu mwa kona kuyoya pano pamuve eshi wihenu, yoyishi yofotji keho Wihenu ghomudiwiru. Mbadi mwa kona kukutoya eshi mwakamiti, yoyishi yofotji Mukamiti wenu: eshi Kristusi.

“Ene mukakupiterera pakatji kenu, yo sho gha kare mukakumukarera. Mukakukununeka thinda, mbo ghana shwahuka, no mukakukushwahura thinda, mbo hana muyeyura.

Mañando ghoEvangelium.

THIRTY-SECOND SUNDAY IN ORDINARY TIME

Shundaha ghomakumi mahatu noghuwadi ghomumwaka.

FIRST READING

Thitoya thokutanga. Wis. 6:12-16

Mumbapira dhoGhunyanyami.

Ghunyanyami ne kughuwana awa hana kughushana.

Ghunyanyami ne ghukenu, mbadi wa kudhimana. Awa ha mu haka ne kukona kumumona wangu-wangu, awa hana kumushana kukona kumuwana Aye kuhutha wangu kwawa hana kumunyanda, aye ku kudimukitha kukwawo. Mbadi mbo ghuwana maghukukutu ngeshi ha ghu kengerera mumwendi; mbo ghuna muwana ghana hungumana padikoghoro dyoye.

Ngambi ku ghuna kumughayara aye ne kukutjwathana; mughayare, no yighayadhara yoyimango mbo yina kutundu wangu. Aye kushana wa ha mu kurupera no kuneghedha ghunongo wendi kukwawo ngeshi ku hana kuyendaghura, endi ngeshi ku hana kughayara kunamuwana.

Mañando ghaNyambi.

Responsorial Psalm.

Dimbokatji. Ps. 63: 2-8.

R:

Yowe na kushana, Nyambi ghoNyambi wange, kuKoye na kurura.

Yowe na kushana, Nyambi ghoNyambi wange, kuKoye na kurura.

No paPoye na kukukuterera yira rukukutu romuditunga edi dya pira meyu.

R:

Yowe na…

Na haka kukara mundhugho dhoye dhokupongoka, eshi mbo ni ka wanene mo ngcamu dhoye no ghufumu ghoye. Makurupero ghoruhakitho roye ne, gha piterera moyo, eyi ne yo mbo ni kukughera.

R:

Yowe na…

Ame ne mbo na kukughu mumoyo wange ghoghuhe, no mbo na yeyura moko ghange, kudifumanekero dyoDina dyoye. Thika din a vigharanga, yitapa yoye yoyiwa, kemo mbo ni kufumaneke roruhe, nokanwa koyishamberera.

R:

Yowe na…

Ngeshi ha ni kuvuruka paghudidi wange, no kundhundha ghundhungi ghoye mughuthiku, na kudimuka eshi: Yowe mughamweni wange, munyima na kushogherera, kumakungero ghomumando ghoye.

SECOND READING

Thitoya thoghuwadi. 1 Thes. 4:13-18

Mumbapira dhokutanga dhaMupostoli Paghulusi kwawakaTesalonika

Nyambi ne mbo ghana tambura awa hafera mwaJesusi.

Mwayendhange mbadi tuna haka eshi mwa dimuka oyi yahokokanga kwawafu. Namwe karo mbadi mbo mu tokota yira hapira makurupero. Atwe twa tawa shemwa eshi, Jesusi ne ghafire no gha vumbukire karo. Kemo dyo tuna kutawa karo eshi, Nyambi mbo ghana tumuna hafu wa ha tawa muMwendi pofotji naJesusi. Kumanithera tuna kumumanithera yi gha ghambire Fumu. Atwe tudi ghuyumi, mbadi mbo tu piterera hafu pamwiyero waFumu. Apa mbo gheya marawero nodiywi dyamuengeli shokuru nodipori dyaNyambi, po mbo gha shuruka thinda Fumu mudiwiru. Awa ha fire naKristusi, wo mbo ha vumbuka pakutanga.

Munyima atwe tudi ghuyumi, po mbo ha tu twara pofotji nawo mumavuyi mudiwiru, tu kakuhangane naFumu no mbo tu katunge roruheya naFumu. Mukuhengaghure pofotji nomañando ghano.

Mañando ghaNyambi.

Gospel Acclamation.

Alleluja. Mtt. 24: 42. 44

Mu rawe ne keho, yoyishi mbadi muna dimuka eshi, diyuwa munye mbo gheya Hekudyenu.

Halleluja!

Evangelium. Mtt. 25: 1-13

Marundwerero ghoyitjanga yaMateghusi.

Mwenga yu ghana kwiya! Mu mu tjingawere.

Jesusi ghatongwerire maghanekero kwawakathishongero eshi: “Ghufumu ghodiwiru, ndani mbo ghukara yira hakamadighana wa ha tumburire maramba ghawo ha kataterere mwenga. Hakwoko mbadi ha karire nomaghano, nokwoko hakarire nomaghano. Hayero ha shimbire maramba ghawo, ene mbadi ha shimbire nomaghori. Oku hanyanyami hana shimbi maramba ghawo nomaghori pambadi. Oku shime mukawenga ko kayenda ghadi, ko kukotha kwawo no kupothomokera muturo.

“No pakatji koghuthiku, ghakarire methero eshi: “Mwenga yu ghana kwiya! Mu mutjingawere!” Ko kupinduka hakamadighana wahe no kuroghitha maramba ghawo. Hayero haningi kwawanya-nyami eshi: “Mutupeko maghori ghenu, yoyishi kuna kudhimana maramba ghetu.” Ene hanya-nyami ha huthire eshi: “Ava ko, mbadi sho gharikanye kukwetu no kukwenu. Muyende vene kuthitora mukakughurere maghori.”

“Oku shime ha yendera hayero kukughura maghori, ko kuna kuma mwenga. Awa ha roghithire ghawo, hengenine pofotji namwenga kumukandi no kutjapera thero.

“Munyima heyire hakamadighana hamweya witha eshi: “Fumu, Fumu, tu yandhwerere!” Ene mwenga gha huthire eshi: “Na kumutongwera eshi: Mbadi na mu dimuka!”

“Murawe ne, yoyishi mbadi mwa dimuka diyuwa nonako, edhi mbo yi hokoka yi.

Mañando ghoEvangelium.

THIRTY-THIRD SUNDAY IN ORDINARY TIME

Shundaha ghomakumi mahatu noghoghuhatu ghomumwaka.

FIRST READING

Thitoya thokutanga. Pro. 31:10-13.19-20.30

Mumbapira dho Mathaghano.

Mbuyama ghomuhunga – Yidye gho ku kona kumuwana

Mbuyama ghomuhunga – Yidye gho ku kona kumuwana?

Aye gha pitakana paro dhoyinu yoyihe. Mumwendi gha paka mutjima wa mukatughuru wendi, mumwendi mbadimo yiwanamo yoyipu. Aye kureta maghuwa muyipara yendi yoyihe mbadi maghuyi. Kehe pano ye kukara nothirughana thoyifumaghura. Aye kurughana yirughana nomoko ghendi.

Aye kukambeka moko ghendi papothi ghana kufuma, no moko ghendi ko kutanga kukwata thonga. Aye ghakambeka moko ghendi pawahepwe, no gha yandhurura moko ghendi kwawa ha gha shana. Yighayara ne yoyipemukitha, noghuwa ne dihenda; mbuyama ghomunyanyami ne yo gho kukona kukugha. No mumupe ndjambi dhendi koyi gha rughanena, ninge yirughana yendi yineghedhe fuma dhendi pamakoghoro dyothitata.

Mañando ghaNyambi.

Responsorial Psalm.

Dimbokatji. Ps. 128:1-5.

R:

Ya rogha kwamunu yu ghokukarera Fumu.

Ya rogha kwamunu yu ghokukarera Fumu, no kutenda mahimeno ghendi! Mbuyo dhomunyara dhoye mbo dhina kushambereritha, nowe shamberere no mbo ghuna fiyaghuka.

R:

Ya rogha…

Mukamadi ghoye, mundhugho dhoye gha kara yira thitondo thovinyu thoghuyeghave, no hanoye hohatutughuru, ha dhingumutwedha thidyero thoye, yira kayweghana!

R:

Ya rogha..

Mone, kemo dyo ghana kupwa kukandadheka murume yu gha karera Fumu. Ninge gha kukandadheke Fumu kutunda muSiyoni, eshi mbo kone kumona kuruvigha rwaJerusalema, mumayuwa ghomahe ghomoyo ghoye.

SECOND READING

Thitoya thoghuwadi. 1 Thes. 5:1-6

Mumbapira dhokutanga dhaMupostoli Paghulusi kwawakaTesalonika.

Mbadi mwakona kututaterera eshi, tutjange yinu kukwenu, mwahakwa, kunako no yivaka no pa mbo yihokoka, mbadi twa nyanda shime eshi, tu yimutjangere mwayendhange. Mwa yidimuka eshi diyuwa dyaFumu, mbo di neya muthivindjwera, yira mwidhi mughuthiku. Apa mbo ha ghamba hanu eshi: “Yoyiheya ne nyiki no thiwana yidi.” Popo mbo kuna wa mbandukera kunyanda, yira mukamadi yu ghana kunyatitha. No mbadiko yu, mbo gha yokoka mo. Ene mwe, mwayendhange, mbadi muna kupara eshi mudhire kudimuka eshi, diyuwa di, mbo dina mu mbandukera yira mwidhi. Amwe ne mwana munyenge no mwana diyuwa, atwe ne kadi twana ghuthiku no makokore temba. Mbadi twakona kurara yira kenge di ghararanga keheyuno. Tu kothoroke no tu kukongore.

Mañando ghaNyambi.

Gospel Acclamation.

Halleluja. Jn. 15:4.5

Amwe mu kare muMwange, Name mumwenu. Oyu ghokukara muMwange, Name mumwendi, ghana kwima mbuyo dhodhingi.

Halleluja

Evangelium. Mtt. 25:14-30

Marundwerero ghoyitjanga yaMateghusi.

Jesusi kokuyighamba yi mumaghanekero eshi: “Shime ya kara karo yira kwamurume yu, ghana kushana kuyenda muruyendo. Ha kongwedha kwendi hapikendi pofotji no kuwatapera ghushwi wendi. Kwayofotji ghamupire manyinga kwoko ghomangondo, ghoghuwadi ghamupire mawadi noghoghuhatu ghamupire dyofotji. Aye gha tapire kwa kehe yu popamaghano ghendi, ko kuyenda kwendi muruyendo.

“Oyu gha tamburire manyinga kwoko ghomangondo, gha tangire wangu popo kugharughanitha, ha wanena po karo makwoko. Kemo karo noyu gha wanine mawadi: gha wanenine po karo mawadi. Ene mupika yu gha wanine dinyinga dyofotji, gha kumbire dikumbo mumuve, no gha horekire mo manyinga ghahekudyendi.

“Munyima dhonako dhodhihe, ha ka huka hekudya wawapika wa no gha tendire paro nawo. Oyu gha tamburire manyinga kwoko ghomangondo, gheyire no gha retire karo kwoko ghamweya ghuninga eshi: “Mukadikuto, manyinga kwoko ghomangondo wa ni pire, gha mweya karo kwoko ghano gha na wanena po.” Ko kuninga hekudyendi kukwendi eshi: “Yiwa kemo, mupika ghomuhunga noghomatjimapero. Koyoyimbiru wa tjimapire, no na kukutumba koyoyingi. Wiye muyishamberera yange.”

“Ko kwiya ghumweya ghomanyinga mawadi ghomangondo eshi: “Mukadikuto, manyinga mawadi ghomangondo wa ni pire. Agha no, nomawadi gha na wanena po.” Hekudyendi gha mu tongwerire eshi: “Yiwa kemo, owe ne ghomuhunga nomupika ghomatjimapero. Koyoyipu wa tjimapire, ho na kukutumba koyoyingi. Wiye muyishamberera yange.” Munyima gheyire yu gha wanine dinyinga dyofotji dyomangondo ghuninga eshi: “Mukadikuto, na na kudimuka eshi we ne ghomurume ghomukukutu, oyu ghana kukesha eyi wa dhira kukuna, no kukokora eyi wa dhira kutapeka. Yoyishi na yapire yo na ka vumbekerire dinyinga dyoye mumuve. Dinyinga dyoye ne dino na ka hutha.”

Hekudyendi gha mu tongwerire eshi: “Ghothimango! Ghothiva we! Owe new a dimukire eshi, ame ne kukesha yin a dhira kukuna no kukokora yin a dhira kutapeka? Ngo wa twarire manyinga ghange kubanga, pakuhuka kwange, ngo na wanena po yiwedherera. Mu mu kungure dinyinga no mu tape koyu gha di nodikumi. Yoyishi kwayomuhe ghokuwana , mbana yi mu vurithera no mbo ghana wana kamwagha-mwaghe. Ene yu gha pira, mbana mu kungura ghumbiru ghu gha di nagho. No mu vukumene mupika ghokupira thighamwena mudikokore dyodidhungi panunda. Kosho ha kadire nomahumangayegho.”

Mañando ghoEvangelium.

Our Lord Jesus Christ, Universal King A

(Last Sunday of Ordinary Time)

Shundaha ghomakumi mahatu noyine – Difeste dyaKristusi ghoFumu.

FIRST READING

Thitoya thokutanga. Ez. 34:11-12. 15-17

Mumbapira dha muporofeta Ezakiel.

Kwenu mwe, mwandjwi dhange, mbo na pangura mukatji kondjwi no ndjwi.

Fumu gha ghambire ngeno eshi: “Kuna kuyenda ni ka shane ndjwi dhange no kadhipakera thinga. Thika di gha shana mudithi ndjwi dhendi edhi dhayongarire no kudhipaka pofotji shime karo, dyo mbo gha dhi shimba kengeyo kumango ghokukutjaka-tjaka, oku dhakuharanganyena mudiyuwa dyomakokore nokawiwi koyihuna yoyikuru. Ame ñanyi mbo ni dhi shwayithemo mumatunga omu dhidi.

Ňanyi mbo ni dhi ture pofotji nokadhishwayitha mumatunga ghomaparaghumbo. No kudhitura pofotji no yame no thinda nakudhiditha ndjwi thange, ňanyi mbo ni dhi shanene dyango dyo kuturumuthera, dyo ghana kughamba Fumu. Edhi dhayongarire ňanyi na kudhishane, edhi dha tjwayuka ňanyi na kudhirete, edhi dha remana ñanyi na kudhidhinge. Mbona kungu dhokununa nodhondjewa-ndjwa. Mbona kara mukungi ghoshemwa kukwadho.”

Fumu gha ghambire ngeno eshi: “Kwenu mwe, mwandjwi dhange, mbona pangura mukatji kondjwi no ndjwi, pakatji kondjwi dhodhirume no yikungwe.”

Mañando ghaNyambi.

Responsorial Psalm.

Dimbokatji. Ps. 23:1-3. 5-6.

R:

Fumu ne mudithi wange, mbadiko thi na kunyanda.

Aye gha ni turumuthitha, mumadyero ghomwengerere.

Ghana ku ni twara kukakuro, oku kudi thiraro. No ghana kunipa ngcamu dhodhipya.

R:

Fumu ne..

Ni hungumeke kudiyumbu, oku pakuninungurukera wa ha ni dhimba.

Ghuna kunitambura yira mugenda ghodikuto no ghuna ni yaritha noyishamberera.

R:

Fumu ne..

Ghunongo ghoye no ruhakitho roye, mbo yina kara nange mumoyo wange ghoghuhe. No mbo na kakara mundhugho dhaFumu, kate paghuhura ghomayuwa.

SECOND READING

Thitoya thoghuwadi. 1 Kor. 15:20-26.28

Mumbapira dhokutanga dhaMupostoli Paghulusi kwawakaKorinte.

Mbo ghana tapa mbara kwaFumu Nyambi ghoWihe; podigho eshi Nyambi ngo mbo gha rikanye kokuhe

Ene pano Kristusi ne ghapwa kutumuna mwawafu, no yomukakutanga mwawafu. Thika di kweyire kufa mwamunu, dyo weyire muvumbukero wawafu nagho karo kwamunu. Kenge di ha kunungire wahe mukufa naAdami, kemo dyo mbo ha tumuka wahe mwaKristusi. Ene gha kara po makurando: Mukakutanga ne Kristusi. Keho pamwiyero waKristusi ne, wowa ha karire hendi. Munyima mbo gha neya mahurero, apa mbo gha tapa ghuFumu kwaNyambi ghoWihe. Ngeshi ku ghana mana kuhanyaghura po yikara nomarawero ghomahe nomangcamu. Ghakona kuraghura yira Fumu kate mbo gha mu withere Wihe hañore dhendi. Mukañore ghoghuhunga yu mba hanyaghura ne kufa.

No ngeshi mbo ghawithe Mwana yoyihe, Naye mbo ghana kutapa kwaWihe yu gha mu withera yoyihe. Eshi kemo mbo ghakara Nyambi muyoyihe.

Mañando ghaNyambi.

Gospel Acclamation

Halleluja Mk. 11:10

Ghu fumane ghuFumu waNyambi, oghu ghuna kwiya muDina dyaHekudyetu, Hosana mumawiru!

Halleluja

Evangelium. Mt. 25:31-46

Marundwerero ghoyitjanga yaMateghusi.

Ndhango dhoghuhura

Jesusi gha ghambire kwawakathishongero wendi eshi: “Apa mbo gheya Mwanamunu mughufumu wendi, nawaengeli wendi wahe, mbo ghana hungumana padipuna dyoghufumu wendi. Mako ghomaheya, mbana gha kongwedha kughutho wendi, no mbo ghana yakunutha hanu, thika di ghana kuyakunutha mukakuditha ndjwi kuñombo. Ndjwi mbo ghana dhimeka kurudyo, noñombo ne kurumoho.

Po mbo gha ninga Fumu, kwawakakwimana kurudyo rwendi eshi: “Mwiye mwe gha kandadheka Tate! Mu tumbure ghutungi yira yiyora. Eyi ne yapwa kumuroyithera kutunda kumatangero ghokaye. Yoyishi na fire ndhara amwe ne mwa ni pire thokudya. Na fire dinota, amwe ne mwa ni pire thokunwa. Na karire mugenda, amwe ne mwa ni pire maturo. Na fire wira, amwe ne mwa ni vatekire. Na korwire, amwe ne mwa ni korwithire. Mudorongo na karire, amwe ne mwa ni dhingurire.”

Munyima mbana mwipura wa ha tendire mahimeno ghaNyambi eshi: “Fumu, kupi twa kumonine nondhara, ho twa kukorerire, ngambi ku ghuna kufa dinota, ho twa kupire thokunwa? No kupi twa kumonine mughugenda, ho twa kupire maturo, ngambi muwira ho twa kuvatekire? Kupi twa kumonine kuyikorwa ngambi mudorongo ho twa kudhingurire?”

Ndani po mbo gha wahutha Fumu eshi: “Shemwa na kumutongwera: Thika di mwa yitendire!” Fumu mbo ghana ningi kwawakarumoho rwendi eshi: “Mu finyaghuke, mu tunde kukwange, mwakathikuto! Mu yende kumudiro ghororuheya, oghu gha kuroghithera Shatani nawaengeli wendi! Yoyishi na fire ndhara, ene mbadi mwa ni pire thokudya. Nafire dinota, ene mbadi mwa ni pire thokunwa. Na karire mughugenda, mbadi mwa nipire maturo. Nafire wira, mbadi mwa ni vatekire. Nakorwire no na karire mudorongo, mbadi mwa ni dhingurire.”

Awo ne mbana hutha eshi: “Fumu, kupi twa kumonine nondhara, ngambi nodinota, ngambi mughugenda, ngambi muwira, ngambi muyikorwa, ngambi mudorongo, ho twa shwenine kukughamwena?” Aye mbo ghana wa wa hutha eshi: “Thika di mwadhirire kuyitenda kwayofotji ghopawange wano, no kukwange temba mbadi mwa yi tendire.” Mbo hana yendi kumamwashwero ghokuroruheya, ene hahunga ne kumoyo ghororuheya.”

Mañando ghoEvangelium.