THE SEASON OF ADVENT B

FIRST SUNDAY OF ADVENT

Shundaha ghokutanga ghoMataterero

FIRST READING

Thitoya thokutanga Jes 63:16-17; 64, 1:3-8

Mumbapira dhaMuporofeta Jesaya

Owe, Fumu, yowe ghothinda gho Wihetu, Mushuturi wetu ne dyo Dina dyoye dyo thihuru-huru. Pamurandu munye ghuna kutumwayerera tuthiye ndhira dhoye. Ndani kundeka mitjima dhetu mukukuyapa we? Wakona kuthighuka, muthiñeke thawapikoye no mumako gha wayora.

Ñanyi wa kukoke no kuyandhurura diwiru ndani no kushuruka. Oku shime poghudi, marunndu mbo ghana yengumuka.

Mbadi ko matwi gha mbo gha yuva, no meho temba dyo ghaparitha nyambi ghombango kenge keheyu gho ku kurupera mumwendi. Wakunga wa haparitha muthiraro ndani no kutura mayira ghoye mumaghano ghawo. Wa patire apa twa karire twayiharuri; twa dhiyamine mukukara twanyathi ghoye.

Twa karire yira murume ghokudhira kukena, ngeshi mbadiko ghuhunga kukwetu ne yira thitere thodidhiro thikuma. Twaheya kukona kupepumuka yira mahako ndani maharwero ghetu kukona kutupepumuna yira mupepo, mbadiko ghokukona ku kumonekitha ku Dina dyoye ngambi kukuyeyura eshi ngwa kukona gha kare yira we. Wondekire rupara roye kukwetu ndani wa tupire maharwero ghetu no kughayeyura kungcamu dhomaharwero ghetu. Ndani pano, yowe Fumu wetu, no yowe Wihetu; atwe ne twamuve, owe ne gho muvareki, twahe kwatuvareka munyara dhoye.

Mañando ghaNyambi

Responsoria Psalm

Dimbokatji Ps. 80:2-3. 15-16. 18-19.

R:

Nyambi ghomukangcamu dhodhihe ninge tupare karo muthiraro no wimane ghu tu ghamwene!

Tegherere ne ghomudithi waIsragheli owe wa koneka hanahoka waJosefu yira mutanga, owe wa hungumana peghuru dhawaKerubimu, tu hokokere! Hokore ngcamu dhoye kudiko dyaEfraghumu, naBenyameni naManase, wiye no tu ghamwene!

R:

Nyambi gho…

Gho Nyambi ghomukangcamu dhodhihe tu thetuke kutunderera mudiwiru no fere karo ñeke dipya dino dyovinyu, mushimbe no mu yangate. Ninge yikare ndhika, eyi wa tapire ghothinda no nyara dhoye, thitondo thovinyu ethi wa tapekire ghothinda.

R:

nyambi gho…

Ghonyonone dyoko dyoye pawanu wa watororire, no kudiko di dyakufumaneka. Munyima, po mbo tu dhira kuyakunuka kukoye twe. Ninge tu pare, ndani po mbo tu kugha dina dyoye.

SECOND READING

Thitoya thoghuwadi 1 Kor. 1:3-9

Mumbapira dhokutanga dhaMupostoli Paghulusi kwawaka Korinte.

Atwe kuna kutaterera Fumu Jesusi Kristusi mu kumukugha

Ñeke no thiraro kukwenu thaNyambi gho wihetu naFumu Jesusi Kristusi! Na kutumera Nyambi wange pano kukwenu kuthiñeke thi gha mu pa mwaKristusi Jesusi. Yoyishi mumwendi gha mu tungeka Nyambi mukehe thinu. Thikuma ne muyitapa yoñando no muyidimuka. Mbudhi dhaKristusi, dha thikera thikuma mumwenu. Eshi mudhire kuyawa no kamanana temba kuyitapa yo ñeke. Amwe mudi nomataterero ghokuyara ghurura, kumahokokero ghaHekudyetu Jesusi Kristusi. No aye ne yo ghana mwimanena kate paghuhura. Eshi mwa kupire murandu mudiyuwa di mbo gheya Hekudyetu Jesusi Kristusi. Nyambi ne ghahungama, oyu ghamwitha eshi mukupakerere pofotji naMwanendi Kristusi Jesusi ghoHekudyetu.

Mañando ghaNyambi

Gospel Acclamation

Hallelujah Ps. 84:8

Ninge ghu tupe ruhakitho roye rondhika, ghoFumu tu parithe nomaghamweno ghoye.

Hallelujah

Evangelium Mark.13:33-37

Marundwerero ghoyitjanga yaMarkusi

Jesusi gha ghambire kwa wa kathishongero wendi eshi: “Mukoneke, murawe no murapere, yoyi mbadi mwadimuka eshi, munako munye mbo yi kara yi. Ya kara yira kwamunu ghomuruyendo oyu ghana thighi ndhugho dhendi no kutapa mahimeno kwawapendi eshi ha rughane yoyihe.

Mukakukunga thero gha mu rawerire eshi, gha rawe. Mu rawe ne, yoyi mbadi munadimuka eshi, munako munye gha kwiya thinda shandhugho parunguro ndi, endi pakatji koghuthi, endi pakwiya ngondovoro endi murughura. Ene gha mu wana eshi, muna rara pakwiya mughudhindo. Eyi na kumutongwera mwe, kawaheya na kuyitongwera eshi: Mu rawe!”

Mañando ghoEvangelium

SECOND SUNDAY OF ADVENT

Shundaha ghoghuwadi ghoMataterero

FIRST READING

Thitoya thokutanga Jes 40:1-5. 9-11

Mumbapira dha muporofeta Jesaya

Muroyithe mayira ghaNyambi

Mutundithe haguva wange, muwatundithe, dyo ghana kughamba Nyambi wenu.

Kuyighamba mu mutjima waJerusalema ndani po ghamwitha eshi, ruvedhe rwendi royirughana ne runapu, maharwero ghendi ghanapu kuthigherera kukoyi ghana wana kutunda munyara dhaNyambi mahumbithero gho ghuwadi kuyiharura yoyihe eyi gha harura. No diywi kwitha dina kwitha eshi: “Muroghithe mayira ghaFumu mumamboreya; no mu ghorore mayira ghaNyambi wetu mumamboreya.” Kehe kadhamenena mbo kana pu kumbandawera, nomarundu ghomahe noyimbandaghuru mboyina pu kudya-dyangedha; ninge mawe ghokumbadi dhomarundu gha kare ghofotji, ndani mangengera ghomahe ghakuwane, no difumanekero dyaNyambi mbo hana divuruka no yitenda ya murume mbo hana yimono, eyi kuna kutunda mukanwa kaNyambi yende kumarundu ghomare, noyishamberera no kuyuvitha muSiyoni no ghukakuyerere no diywi dyodikuru, ghushamberera no kuyuvitha muJerusalema ka kuyerere no kuyapa temba, kaghambe muthitata thawaJuda eshi Nyambi wenu ne yuno. Apano Nyambi ghana kwiya nongcamu, dyoko dyendi dyakunga yinu yoyiheya kukwendi.

Ndjambi dhendi kwakara kukwendi, yiwana yoyihe yo ndjambi dhendi kwayendanga kukwendi. Aye kwakara yira yoyu gha dithanga ndjwi dhendi thiwana, nokudhitura ndjwighana pofotji mudyoko dyendi no kudhikwaterera kumbadi dhodyere dyendi no kudhingunga thiwana-thiwana.

Mañando ghaNyambi

Responsorial Psalm

Dimbokatji Ps.85:9-14

R:

Ninge ghu tu pe ruhakitho roye rondhika, ghoFumu tuparithe no maghamweno ghoye.

Ame ne na ha ka kutegherera, koyi ghana kughamba Fumu Nyambi, yoyishi ñando dhendi ne, dha reta thiraro kudikuto dyendi no kwawa hana kumukarera ghukurupera. Ene mbadi hakona karo kupemuka. Yashemwa, yiwana ne pepi yidi, kwawa hana kumukarera: Aye mbo ghana hokora yiparitha yendi yongcamu, muditunga dyetu.

R:

Ninge…

Ruhakitho nondhika mbo yina kuwana, ghuhungami no thiraro, mbo yina ku kwatathana, makurupero mbo ghana vetaghuka mu muve, ene ghuhungami mbo ghuna shuruka mudiwiru.

R:

Ninge…

Fumu mbo ghana tapa thiyaghudhi, no ditunga dyetu ne mbo dina tapa yipokora yadyo. Ghuhungami mbo ghuna pitera kughutho wendi, no kuroyitha ndhira kumwiyero wendi.

SECOND READING

Thitoya thoghuwadi 2 Pet.3:8-1

Mumbapira dhoghuwadi dhaMupostoli Petrusi.

Atwe kuna kutaterera diwiru dyodipya no kaye kokapya

Thinu thofotji ne, mbadi mwakona kuthivurama, mwahakwa: Yoyishi kwaFumu, diyuwa dyofotji ne yira myaka diyovi, myaka diyovi ne yira diyuwa dyofotji. Fumu, mbadi gha kara maranga mukurikanyitha matoyedhero ghendi. Thika di hana kuyighayaranga hanu hamweya. Mbadi kemo, aye mudhughutjiama kukwenu. Yoyishi, aye ne ghahima eshi mbadiko papenu yu mbo gha yongara. Karo gha haka eshi ngo ha kona kupiruka wahe. Ene diyuwa dyaFumu, mbo dineya muvindwera yira mwidhi. No mudiyuwa di mbo dina dhongonoka diwiru nomudikitero ghoghukuru. Mashani gho mudiwiru mbo ghana runguna no mbo gha naña. Muve no yoyiheya yi yakara po mbo yina dhongonoka ene apa mbo yipwa yinu yoyiheya yi mwakona kuyapa Nyambi thikuma, no kukutapa kukwendi mumoyo wenu ghoghuhe. Mu pare mughutaterera eshi diyuwa dyaNyambi ne dina kumu, no mukwinduke kudiyuwa edi mbo dyaña diwiru kumaretha no pakuhoghoroka mashani ghodiwiru. Ene twe diwiru dyodipya tuna kutaterera no muve ghoghupya eyi gha tu toyedhera Nyambi, omu mbo ghu kara ghuhungami. Yodigho, mwahakwa oku shime gha mu taterera yinu yi mwa kona kutoghoropa eshi mu pire murandu no kamyandhu-myandhu temba, kughutho waNyambi, no mu pare pofotji Nendi muthiraro.

Mañando ghaNyambi

Gospel Acclamation

Hallelujah Luk. 3:4.6

Thika kenge di yapwire kutjanga murukwaro rwamuporofeta Jesaya eshi: “Diywi dina kwitha mumamboreya eshi: “Muroyithe ndhira dhaFumu; mu mu ghorwere mayira. Nawanu wahe mbana mono makomweneno, agha mbo ghatunda kwaNyambi.”

Hallelujah!

Evangelium Mark. 1:1-8

Marundwerero ghoyitjanga yaMarkusi.

Muroyithe mayira ghendi

Matangero ghombudhi dhaJesusi Kristusi ghoMwana Nyambi. Thika kenge di dhapwire kutjanga kwamuporofeta Jesaya eshi: “Mone, na kutuma mukamushongwe ghombudhi dhange kughutho ghorupara roye, oyu mbo gha kuroyithera ndhira dhoye mumamboreya dina kwitha diywi eshi: Muroyithe ndhira dhaFumu, no mughorore mayira ghendi. Johanesi gheyire no gha tangire kuhonga hanu mumamboreya eshi: “Mupiruke no muwane diyoghero. Kemo sho gha mu thigherere Nyambi maharwero ghenu.” Ko kuputa ditunga dyodihe dyawa Juda nawakaJerusalema hayende kukwendi. No wahe gha wa yoyire murware rwaJordani, oku hana kwera maharwero ghawo Johanesi gha vatire thikumba thongameno, no gha ku ghangire ngwama mumbunda dhendi. Yidya yendi ne dimba no wiki ghomuka. Ko kuyaghura kwendi eshi: “Munyima dhange mbo gha neya mukangcamu ghokupiterera me. Name temba mbadi na Fumana eshi ni fumbere no ni shuture tukanda tomakuha ghendi. Ame na mu yoghire no meyu, aye ne mbo ghana muyogho naMupepo ghoKupongoka.”

Mañando gho Evangelium

THIRD SUNDAY OF ADVENT

Shundaha ghoghuhatu ghoMataterero

FIRST READING

Thitoya thokutanga Jes. 61: 1-2.10-11

Mumbapira dhaMuporofeta Jesaya

“Mupepo waNyambi ghoHekudyetu ne papange ghu di, yoyishi Fumu ghana ni kandadheka me, ghana ni tumu eshi no ni tape mbudhi kwawahepwe, mukutura mutjima dhetu pofotji edhi dhakukuta.”

Kuyuvitha thiraro no kushwayitha hakañotwa mumadorongo, kuyuvitha mwaka ghohoro kwaHekudyange nahafa no kushamberera kwaHekudyange, no mudhimu wange ghuna kushamberera kwaNyambi, yodigho gha ni vateka yitere yoghukungi gha ni fika no kuni tura ni kare mundhira dhokughororoka, yira mukatughuru yu ghana kuyenda gha kavate kadeya kendi, yira mwenga yu hana kukureka mupristeri thikoroni kumutwi wendi. Thika di ka kuritha kaye yinu yoyiyu, yira thikwinino kukuritha nanda, kemo naNyambi mbo ghana tendi ghuhungami nodifumanekero no kughorora mitara dhomatunga ghomahe.

Mañando ghaNyambi

Responsorial Psalm

Dimbokatji Luk. 1:46-50. 53-54

R:

Mudhimu wange ghukuye Nyambi

No moyo wange kuna kushamberera mwaNyambi ghomughamweni wange; ghana kumakufupipethero gha mu pikendi; yoyi mone eshi kutunda kudyarero mako ghomahe mbana ni ti eshi mukaruvigha.

R:

Mudhimu…

Aye mukangcamu dhodhihe, ghana ni tendera yinu yoyikuru.

Dyapongoka Dina dyendi. Aye gha neghedha thiñeke thendi kutunda kwawanahoka kate kwawaneghani awa ha mu kutekera.

R:

Mudhimu…

Hakakufa ndhara gha wekutitha no yitapa yoyiwa, no hatungi awa gha tjidha nyara-nyara. Ghana ghamwena mupikendi Isragheli no thighayara thomaturekero ghothiñeke.

SECOND READING

Thitoya thoghuwadi 1 Thes. 5:16-24

Mumbapira dhokutanga dhaMupostoli Paghulusi kwawaka Tesalonika.

Mu shamberere roruheya. Murapere rwingi. Mu kare muyinu yoyiheya ghutumera. Yoyishi, yo gha tu taterera Nyambi kukwenu mwaKristusi Jesusi mbadi mwakona kwimanena muMupepo ghoKupongoka. Mbadi mwakona kunyatha yighamba yawa pumbi. Ene, mukengurure yoyihe no mukwate po yoyiwa. Mutunde kuyinu yoyimango yoyihe. Nyambi gho divetu-vetu dyothiraro thothihe gha mupe ghuyara wendi ghoghuhe ghokukwendi no gha mu kunge muyoyihe yokumupepo, kumudhimu no kuyirama. Eshi, mwakupire ghuyi apa mbo gheya Hekudyetu Jesusi Kristusi! Oyu gha mwitha, mbo ghana yitendi yoyishi gha mu kurupera.

Mañando ghaNyambi

Gospel Acclamation

Hallelujah Jes. 61:1.

Mupepo waFumu papange ghu di yoyishi aye gha ni wetha niyuvithe hahepwe mbudhi dhodhiwa.

Hallelujah!

Evangelium

Jn.1:6-8.19-28

Marundwerero ghoyitjanga yaJohannesi

Mukatji kenu munemana ghumwe yu mwadhira kudimuka oyu ne yo gha kwiya munyima dhange

Pakarire murume oyu gha pwire kutuma kwaNyambi. Dina dyendi ne Johannesi. Gheyire kukunongonona munyenge eshi, wahe ngo ha ghudimuke no kughutawa. Aye thinda mbadi gha karire munyenge, ene gha konine kunongonona yamunyenge. Hajuda ha tumine hapristeri naWalevita ho muJerusalema kwaJohannesi ha ka mwipure eshi: “Yowe dye? Aye gha kunongonona, mbadi gha kananine, gha kunongononine eshi: “Kadi yame Kristusi.” Ha mwipura kwawo eshi: “Yowe dye ne? Yowe Eliya ndi?” Aye gha huthire eshi: “Kadi yame” “Gho muporofeta ndi?” Dyo gha huthire eshi: “Kadi kemo.” Munyima gha mu thundire shime eshi: “Yowe dye ne? Gho kudhira kuhutha mepwero ghetu, tu ka wa dimbwerere awa hana tu tumu. Ngepi wa kutoyanga ghothinda?” Ha hutha eshi: “Ame ne nodiywi dyokukuyerera mumamboreya eshi: “Mughororokithe ndhira dhaFumu,” Thika di gha ningire muporofeta Jesaya. Mwa wa ha pwire kutuma gha karire mo nawaFarasayi. No kumwipura kwawo eshi: “Nye ghuna kuyoyereranga, ngeshi kadi yowe Kristusi ngambi Eliya ngambi muporofeta?” Johannesi gha wa huthire ngeno: “Ame ne kuyogha no meyu keho, ene mukatji kenu mu nemana ghumweya yu mwa dhira kudimuka.

Oyu ne yo ghana kwiya munyima dhange, oyu na dhira kufumana me kushutura tukanda to makuha ghendi.” Yoyiheya yi yakarire muBetaniya thambo diya dhaJordani omu gha yoghangire Johannesi.

Mañando ghoEvangelium

FOURTH SUNDAY OF ADVENT

Shundaha ghoghune ghoMataterero

FIRST READING

Thitoya thokutanga 2 Sam. 7:1-5. 8-12.14.1

Mumbapira dhoghuwadi dhaSamuel

Dighumbo dyaDavita mbo dina kara kehe pano kumakungero ghaNyambi

Apa gha ka kumine Davita kudighumbo dyendi, Nyambi gha mu pa eshi: “Gha turumuthe kwawa nyathi wendi wahe awa ha mu dhingumutwedherire.” Fumu gha ghambire na muporofeta Nathani eshi: “Kenge ame ne kutunga nakutunga mundhugho dhodhiwa dhokunuka thiwe mwene oku dimbangu dyo ghundambo dyaNyambi ne hana ditura mutende.” “Ko kuhutha Nathani kwaFumu eshi: Yende ndani ghokatende yoyihe eyi yidi mumaghano ghoye, ene Nyambi noye ghadi.” Kurunguro roro rofotji ñando dhaNyambi dheyire kwaNathani eshi: “Yende ghukatongwere hapikange Davita eshi, Nyambi ghana kughamba eshi, owe ne yowe ghomurume yu wa kunitendera ndhugho omu mbo ni tunga ndi?” Na kuthetuka mumughambo oku owe ne pakuditha ndjwi eshi, ngo waku kare ghomupiterithi ghohaguva wange muIsragheli; noye na kara mundhira dhoye dhodhihe; nakutunditha hanyathi ghoye wahe kukoye. Ñanyi mbo ni kupe madikitero ghomakuru ghokupita kana kaye kokahe. Mbo na tapa dyango kwawaguva wange waIsragheli; ñanyi mbo ni kawakune mo ndani ñanyi mbo haka tunge mo mbadiko yu mbo gha kawa henerera karo, no mbadiko thi mbo thikawa yongaritha karo thika di ha tendire, Mumayuwa apa na negheri hapangura kwawaguva waIsragheli; mbo na wapa maturumuthero kwawanyathi wawo waheya. Nyambi mbo ghana mupa thighaghudhi no kumutenda mukare yira dhondhugho dhendi. Ndani apa mbo gha pwa mayuwa ghenu ghopakaye mbana mutura mukaturumuthe nawakerekandongo wenu pofotji, mbona kungu hanahoka wenu, no ghuFumu wendi mbo na ghukungu. Mbana kara no wihe aye mbo ghana kara yo mwanange. Ndhugho dhoye no ghu fumu ghoye mbo yinemana kumakungero ghange ndani mbara dhoye mbona dhitendi karo roruheya.

Mañando ghaNyambi

Responsorial Psalm

Dimbokatji Ps.89:2-5. 27. 29.

R:

Ame, mbo nembera roruheya yitenda yaFumu yoruhakitho.

Ame, mbo nembera roruhaya yitenda yaFumu yoruhakitho, ndhika dhendi dhoghushemwa, mbo na dhi yuvitha kwawanahoka wa mbeya. Kuninga nakuninga me eshi: “Ruhakitho roye no thinga thoye thoghushemwa, mbadi wa kukunyinga-nyunga, oyo ne ya tanara roruhe mudiwiru no pamuve.”

R:

Ame ne…

Owe wa ningire eshi: “Ame na nungu ghundambo nawa na torora, gho na tendi methero kwamukareri wange Davita eshi: Ame mbo na kupa hanahoka kuroruheya no dipuna dyoye, mbo na di tanaritha kwakehe mwanahoka ghoye.

R:

Ame ne…

Aye mbo ghana nitha no mañando eshi: “Yowe Tate, ghoNyambi wange nodiwe dyomaghamweno ghange.” Ghushemwa wange, mbo ghuna karapo kuroruhe papendi, gho manungu ghundambo thikuma nendi.

SECOND READING

Thitoya thoghuwadi Rom. 16:25-27

Mumbapira dhaMupostoli Paghulusi kwawakaRoma

Nyambi gha kara nongcamu dhokumutanaritha, thika di nayuvitha mbudhi dhodhiwa dhaJesusi Kristusi pofotji no yihokora yothithithatero. Pakare-kare, yakarire mughudhindo. Ene pañanyi-ñanyi ne yina hokoka. Payitjanga yawapumbi no pamarawero gha Nyambi ghomukaroruhe yapwa kudimukitha kumarudhi ghomahe.

Eshi ha kone kutawa mwaNyambi no kukara ghutawedhi kukwendi. Kukwendi pithendi Nyambi ghomukakudimuka yoyihe, difumanekero paJesusi Kristusi kate! Amen.

Mañando ghaNyambi

Gospel Acclamation

Hallelujah Luk. 1:38

Ko kuhutha Maria eshi: “No mupika Nyambi me.” Yikare thika kenge di ghuna ghamba.”

Hallelujah

Evangelium

Luk. 1:26-38

Marundwerero ghoyitjanga yaLukasi

Mukaghonda koghukwoko no ghofotji koghuremu waElisabeti, kokutuma Nyambi muengeli Gabriyeli kwambuyama ghomuNasareti muditunga dyaGalileya. Mbuyama ghamwandekerire Josefu, murume ghomwanahoka waDavita. Dina dya mbuyama ne Maria. Apa gha kakumine muengeli kukwendi gha mu ningire eshi: “Ghurumere, wa yara ñeke! Fumu noye gha di.” Aye ghatutukwire kumañando gha, no ghatetukire eshi, nye dina kuninga dirumeritho di. Muengeli gha mu tongwerire eshi: “Wa yapa, Maria, yoyi ghuna wana ñeke kwaNyambi. Mone, ghuna kukara mudira, no mbo ghuna shamuruka mukaye katughuru, ho mbo mute dina dyendi eshi Jesusi. Mbo ghana pupana no mbana muti eshi Mwana Shokuru. Fumu Nyambi mbo ghana mupa dipuna dyakarekandongo wendi Davita. Mbo ghana raghura mundhugho dhaJakopu yira Fumu kuroruheya. GhuFumu wendi mbadi mbo ghuhura.” Maria gha ningire kwamuengeli eshi: “Ngepi mbo yi kara, ame ni shi kara nomurume?” Muengeli gha mu huthire eshi: “Mupepo ghoKupongoka ghana kwiya kukoye. Nongcamu dha shokuru dhina kutembera peghuru dhoye. Yodigho oyu mbo ghu shamuruka, mbana muti eshi mupongoki m

MwanaNyambi. Ghu mone eshi, Elisabeti ghomwapoye, naye karo ngawana katughuru ghana mughukurukadhi wendi, oyu ha tire eshi mbumi. Kaghonda kano ko kaghonda kendi koghukwoko noghofotji. Yoyishi kwaNyambi ne mbadiko thokumukanga.” Kokuhutha Maria eshi: “No mupika Nyambi me. Yikare thika kenge di ghuna ghamba.” Ko kudhongonoka muengeli tarara.

Mañando ghoEvangelium

THE SEASON OF CHRISTMAS

25 December

NAVITY OF OUR LORD A,B,C

Dimisa dyoghuthiku

FIRST READING

Thitoya thokutanga Jes. 62: 1-5 Mumbapira dhaMuporofeta Jesaya

Fumu gha kumenyamenyenine

Pamurundu waSiyoni mbadi mbo ni ghamba no pamurandu waJerusalema mbadi mbo ni porera, kate mbo ghu pwe ghuhungami wendiyira thishe no ghukomononi wendi yira ramba gho kutumbuka. No mako mbo ghana mono ghuhungami ghoye no hafumu wahe mbo hana mono difumanekero dyoye, no mbo ghuna wana dina dyodipya edi gha kuta Fumu. No mbo ghuna kara thipuna thokuyenga munyara dhaFumu no tuku ghoghufumu ghomunyara dhaNyambi. Mbadi mba kuta karo mukanyima, no ditunga dyoye mbadi mba di to ya muthitu. Ene mbana kuti mukutekeri wange no ditunga dyoye mukuruperi, yoyi Fumu gha kumenyamenyena no ditunga dyoye ne mbo din a kara noyishamberera. Yoyishi thika di dya yekanga ditjaha mushengeteya kemo dyo mbo ha kukurupera hanoye noyira mukawenga oyu ghana kughombotha kemo mbo ghashamberera Nyambi kukoye.

Mañando ghaNyambi

Responsorial Psalm

Dimbokatji Ps.89:4-5. 16-17. 27. 29.

R:

Ame, mbo nembera roruheya yitenda yaFumu yoruhakitho.

Ame na nungu ghundambo nawa na torora, gho na tenda medhero kwamukareri wange Davita eshi: Ame mbo na kupa hanahoko kuroruheya no dipuna dyoye, mbo na ditanaritha kwakehe mwanahoka ghoye.

R:

Ame…

Yarogha thikuma nodiko edi dya kona kuyambaghukera fuma dhoye, no di dya para muthishe thoye ghoFumu. Awo hana kwimbera Dina dyoye diyuwa dyodihe, no kukugha yitenda yoye yomaghamweno.

R:

Ame…

Aye mbo ghana nitha noñanndo eshi: “Yowe Tate ghoNyambi no diwe dyomaghamweno ghange. Ghushemwa wange, mbo ghuna kara po kuroruhe papendi, gho na nungu ghundambo thikuma nendi.

SECOND READING

Thitoya thoghuwadi Yit 13:16-17. 22-25

Mumbapira dhoYitenda yaWapostoli

Ko kwimana Paghulusi, gha wa rave nonyara thiwana ghuninga eshi: “MwaIsraghelite, namwe mwa yapa Nyambi, mu tegherere! Nyambi ghodiko dino dyaIsragheli, yo gha tororire hakakerendongo wetu, no gha wa tendire diko dyodikuru, apa ha karire yira hanumaghana muEgiptena. Gha wa tundithire mo nodyoko dyendi dyongcamu. Eyi gha mu tundithire Nyambi muthirughana thendi, ko kupaka Davita gha kare fumu wawo. Kukwendi gha ningire Nyambi eshi: ‘Na wana Davita ghomwana Isayi. Murume yu ghanitwa kumutjima wange. Yo mbo gha rundurura yirughana yange.’ Mwawanahoka wamurume yu, mo mbo ghatunda Nyambi, Jesusi, gha kare mushuturi wawaIsragheli, thika dig ha yi wa turekerire. Kughutho ghomwiyero waJesusi, Johannesi yo ghethire diko dyodihe dyaIsragheli kumapirukero no kudiyoghero. Ene pa gha kokerire Johannesi paghuhura ghoyipara yendi, gha ningire eshi: ‘Yame dye muna kunighayara mwe? Ame ne kadi yame. Mumone, munyima dhange ghana kwiya. Name temba mbadi na fumana kushutura makuha ghendi.

Mañando ghaNyambi

Gospel Acclamation

Hallelujah

Peghundha mbo ghana kara mahurero gho maharwero kaye ndani mushuturi gho kaye mbo ghana kara fumu wetu.

Hallelujah

Evangelium

Mtt 1:1-25

Marundwerero ghoyitjanga yaMateghusi.

Agha ne gho mashamurukero ghaJesusi Kristusi ghomwana Davita, mwana Abrahamu: Abrahamu wiha Isaka, Isaka wiha Jakopu, Jakopu wiha Juda nawaminendi. Juda wiha Peresi, naSiraga Tamara, Peresi wiha Esromi, Esromi wiha Arami, Arami wiha Amminadabu, Amminadabu wiha Nagsoni, Nagsoni wiha Salmoni, Salmoni wiha Boghasi paRagabu, Boghasi wiha Obeti paRuti, Obeti wiha Isayi, Isayi wiha Fumu Davita. Davita wiha Salomo pamuna Uriya, Salomo wiha Rehabeghamu, Rehabeghamu wiha Abiya, Abiya wiha Asa, Asa wiha Josafati, Josafati wiha Jorami, Jorami wiha Ussiya, Ussiya wiha Jotami, Jotami wiha Agasi, Agasi wiha Hiskisiya, Hiskisiya wiha Manese, Manse wiha Amosi, Amosi wiha Josiya, Josiya wiha Jegonya nawaminendi.

Popo kokuditwara diko kumukwato ghomuBabilioni.

Munyima dhoñwato dhomuBabiloni ya karire ngeno: Jegonya wiha Seghaltilli, Seghaltilli wiha Serubbabeli, Serubbabeli wiha Abiyudi, Abiyudi wiha Eliyakimu, Eliyakimu wiha Asori, Asori wiha Sadoki, Sadoki wiha Agimu, Agimu wiha Eliyudi, Eliyudi wiha Eleyasari, Eleyasari wiha Mattani, Mattani wiha Jakopu, Jokopu wiha Josefu ghomuna Maria oyu gha shamurukire Jesusi oyu ha toya eshi Jesusi Kristusi. Hanahoka wahe kutunderera kwaAbrahamu kata kwaDavita ne mako dikumi nomane, no kwaDavita kate kuñotwa dhawakaBabiloni mako dikumi nomane, no kutunderera kuñotwa dhawakaBabiloni kate paKristusi mako dikumi nomane. Apa no kuna kuranda ko mbudhi dhomashamurukero ghaJesusi Kristusi.

Oku shime ha kwandekerera haJosefu naMaria ghonyina Jesusi, awo no kukuyeka temba kokukara ghuremu. Ghuremu ghu kwatundire kwaMupepo ghoKupongoka. Josefu gho mbandeki dhendi, gha karire mughuhunga no ghashwenine kumuhokora.

Gha ghayarire eshi gha mu thiye mughudhindo. Oku shime ha ghayadhara, ko kumuhokokera muengeli waFumu muyirota ghuninga eshi: Josefu ghomwana Davita wayapa kumughombotha Maria ghomunu ghoye. Yoyishi eyi yi mudi paMupepo ghoKupongoka ya tunda. Mbo ghana reta katughuru mukaye, ho mbo ghu mute eshi Jesusi. Aye yo mbo gha komonona diko dyendi kumaharwero ghadyo. Yoyiheya yi yahokokire eshi, dhirikanye ñando dhaFumu edhi gha ghambire pamuporfeta wendi eshi: Mbuyama mbo ghana kara mudira no mbo ghana reta katughuru mukaye, no mbo ghana muti eshi Emanuel. Dina, dina kuninga eshi Nyambi Nyambi netu ghadi. Apa gha pindukire Josefu muturo, gha tendire thika di ghayimurawere muengeli waFumu no gha ghombothire mukamadi wendi. Ene mbadi gha mu pirukerire oku mbadi ghana shamuruka mwanendi mukaye. Ko kumuta kwendi eshi Jesusi.

Mañando ghoEvangelium

MASS AT MIDNIGHT

Dimisa dyoghuthiku

FIRST READING

Thitoya thokutanga Jes.9:2-6 (Hebr.1:1-6)

Mumbapira dhaMuporofeta Jesaya

Mwanuke ne ha na mu tupa

Diko edi dya kara mumakokore dina mono thishe thishokuru,

Edi dya tunga mumvura ghokufa, thawa sheghenyena thishe.

Yowe wa vuritha diko wa kuruperitha thiraro thawo, awo ne hana shamberera kughutho ghorupara roye yira munu ghokushamberera munu pakukesha,

Yira munu ghokushamberera pakukutapera ghushwa.

Yoyishi djoko edhi wa wa dimbekire, no katondo aka kawendamine pamapeghe, mahumbithero ghawahayi ghuna wawo ghuna yi tunditha po yira mudiyuwa dyaMidiani.

Yoyishi kehe dikuha dyomushurundate edi dina kupita ghudjatera, no thitere ethi thinapu kuyowa mumanyinga, yitere yawo yoyihe mbo yinpu kutumekera.

Yoyishi mwanuke ne yatwe ha mu shamurukera ka tughuru ne hamutupire, no ghuFumu ghoghuheya ne padipeghe dyendi mbana mu ti eshi. Muteturi, Mupanguri Nyambi ghongcamu, Wiha ghororuheya Fumu ghothiraro.

Kate ku mavurithero ghoghuFumu wendi no kate kuthiraro thokupira ghuhura pathipuna thaDavita no kughufumu wendi mu kuwana no mu kuyitanaritha mughuwa noghuhunga,

Kutunda pano kate kuroruheya. Ghu toghoro waNyambi ghoFumu ghotushumba gho mbo ghu yi tenda.

Mañando ghaNyambi

Responsorial Psalm

Dimbokatji Ps.1-2a; 2b; 3; 11-12; 13(Ps.96)

R:

Dyarero ghana pu kushamuruka mukaruviya Kristusi ghoFumu.

Mwimbe kate kudifumanekero dyaNyambi dimbo dyodipya,

Mwimbe kughutho waFumu, muve ghoghuhe! Mwimbe kate kudifumamanekero dyaFumu. Mukughe dina dyendi.

R:

Dyarero…

Ninge dishamberere diwiru nomuve, ninge dikuruviya di pughume nongcamu dhadyo dhodhihe. Ninge muthitu ghushamberere noyoyihe eyi ya kara mo. Ndani mbo yi shamberera yitondo yomudiputa. Kughutho ghorupara rwaFumu mbo gha neya kukupangura kaye, mbo ghana pangura kaye mughuhungami nomako kumakurupero ghendi.

SECOND READING

Thitoya thoghuwadi Titus 2:11-14

Mumbapira dhaMupostoli Paghulusi kwaTitusi

Thiñeke thaNyambi tha hokokire kwawanu wahe

Thiñeke kutuhonga tu thiye ghumango, madovo ghopakaye no kutuhonga tukare thiwana no ghuhunga muno mukaye.

Muruvedhe mu tudi mumataterero mumakurupero ghoyipara no mahokokero ghomwiyero waNyambi wetu shokuru no Mukomononi wetu Jesusi Kristusi.

Oyu gha ku tapire pamurandu wetu gha tu kushukithe tu kare diko dyendi thinda ghomutoghoro mukurughana yoyiwa.

Mañando ghaNyambi

Gospel Acclamation

Hallelujah Luk.2:10-11

Ame kuna muretera mbudhi dhodhiwa, edhi mbo dhi shambereritha waheya: dyarero ghana pu kumushamuruka Mushuturi ku dighumbo dyaDavita. Aye ne Kristusi ghoFumu.

Hallelujah

Evangelium

Luk.2:1-14

Marundwerero ghoyitjanga yaLukasi

Dyarero ghana pu kumushamurukera mukaruvigha

Mumayuwa gha ko kuragha fumu shokuru Augustinusi muragho eshi ha tjange mena ghawapikendi wahe.

Agha matjangero ghokutanga gha karire oku Sirinusi komisare waSiraya. Waheya hayendire haka tjangithe mena ghawo keheyu kudighumbo dyodiko dyendi.

Na Josefu naye ghayendire ko.Gha tundire mudighumbo dyaNasareti dyomuditunga dyaGalileya no gha yendire kuditunga dyaJudeya. kuBetlehema kudighumbo dyaDavita

Yoyishi ye gha karire mwapa Davita, no mwana hoka wendi.

Na mbandeki dhendi Maria oyu ghakarire ghuremu mudira, gha yendire pofotji nendi kuditjango.

Gha shamuruka mwana ghokatughuru gho mbendi dhendi, hamudhingi no mahina nokumurangeka muwato ghokudyera ngombe, yoyi mbadi ha wanine maturo mudighumbo.

Pamukunda ghodighumbo ne pa karire hakakuditha awa hakungire mitanga dhawo paghuthiku.Kokuhokoka Muengeli waFumu, nothishe thaNyambi ko kuwarwedhimena. Awo ne kokutukuwa thikuma.

Muengeli gha watongwerire eshi: “Mwayapa mumone eshi na kumuretera mbudhi dhodhiwa, edhi mbo dhi shambereritha waheya.”

Dyarero ghana pu kushamuruka Mushuturi mudighumbo dyaDav- ita. Aye ne Kristusi ghoFumu Thokumu dimukitha mwene thino eshi, muna kawana kakeke kokupwa kudhinga nomahina no kurara muwato ghokudyera ngombe.

Ko kuhokoka kwaMuengeli yu tushumba tomudiwiru otu twa shogherire Nyambi pofotji ghuninga eshi: “Difumanekero kwaNyambi muwiru nothiraro pamuve kwawanu awa ghamenyamenyena ye.”

Mañando ghoEvangelium

EARLY MORNING MASS

Dimisa dyomakyakuthiku

FIRST READING

Thitoya thokutanga Jes.62:11-12

Mumbapira dhaMuporofeta Jesaya

Mone mushuturi ne ghana kumu

Mumone Fumu ne ghana kuyuva kate kughuhura ghokaye.

Tongwere hana ghoMbara dhaSiyoni eshi, mukenge Mukomononi wenu ghana kwiya.

Ndjambi dhendi ne kukoye no kughutho wendi. Mbona wati eshi Diko dyoKupongoka,’ ‘Fumu gha dikomonona.’ Jerusalema mbana kuti eshi Mbara, edhi mbo hadhira kudhimba.

Mañando ghaNyambi

Responsorial Psalm

Dimbokatji Ps.1-6, 11-12

R:

Thishe thina kuturwedhimena dyarero “yoyishi Fumu ne ha na mu tu shamurukera.

Nyambi ne Fumu ninge kashamberere kaye; ninge yirudhi yoyihe yishamberere. Diwiru dina kuyuvitha ghunongo waFumu, nomako ghomahe ghana kumona dikuto dyendi.

R:

Thishe thina…

Thishe thina kuhokokera kwawanongo noyishamberera kwawakushuki mitjima. Mwahunga mushamberere mwaFumu, no mukughe dina dyendi dyokupongoka dyoku pira kuvurama.

SECOND READING

Thitoya thoghuwadi Titus 3:4-7

Mumbapira dha mupostoli Paghulusi kwaTitusi

Pathiñeke thendi ghatu ghamwenine

Ene pa wa tu hokokerire ghunongo waNyambi ghoHekudyetu ghomukomononi wetu, gho wa tu paritha kadishi. payitenda yendi yoyiwa, ene ghunongo wendi vene yo gha tu paritha.padiyoghero omu gha tu shamuruka paruwadi Mupepo ghokupongoka yu gha tu pa yirama yoyipya.

Mupepo ghoKupongoka yu Nyambi ha mu tu shuruthera mwaHekudyetu Jesusi Kristusi ghomukomononi wetu eshi, gha tu hungeke muthiñeke thendi eshi twa kukare twapingi ghomoyo ghororuheya oghu tuna kutaterera.

Mañando gha Nyambi

Gospel Acclamation

Hallelujah Luk.2:15-20

“Difumanekero kwaNyambi muwiru nothiraro pamuve kwawanu awa gha menyamenyena ye.”

Hallelujah

Evangelium Luk.2; 15-20

Marundwerero ghoyitjanga yaLukasi

Apa gha wa thighire muengeli gha huke kudiwuru, ko kughamba- thana haka kuditha eshi: “Tu yende ku Bethlehema tu ka momne eyi yina hokoka ko no yi ghana tudimukitha Fumu.”

Ha tambukire ko no ha ka wanine Maria naJosefu na mwanuke gho kurara muwato. Apa ha mu monine, ko kuthimwetwedha eyi gha wa tongwerire muengeli yokwamwanuke yu.

Ene waheya wa hayuvire mbudhi dhi kwa wakakuditha hatetukire yo mañando ghawo. Maria gha pungurire mañando ghomaheya gha, no kughavuruka mumutjima wendi. Hakakuditha ha hukire ghukugha thika di ha yi wa tongwerire.

Mañando ghoEvangelium

MASS DURING THE DAY

Dimisa dyomutenya

FIRST READING

Thitoya thokutanga Jes.52:7-10

Mumbapira dhaMuporofeta Jesaya

Mahurero ghokaye mbo gha na mono makomweneno ghaNyambi wetu

Ngepi kughuwa pa kumona munu ghana kureta mbudhi dhodhiwa, mbudhi dhothiraro!

Aye ghana kuyuvitha Nyambi no ghana kutongwera kwaSiyoni!

Mwingene mushogherere nomushamberere thikuma mwayimbanda ghuki waJerusalema.

Fumu mbo ghana rughanitha ngcamu dhendi dhokupongoka kughutho ghomako ghomahe, noghuhura ghokaye mbo ghu na mono makomweneno ghaNyambi.

Mañando ghaNyambi

Responsorial Psalm

Dimbokatji Ps. 98:1; 2-3ab; 3cd; 4; 5-6

R:

Ghuhura ghoghuhe ghokaye wa monine makomweneno ghaNyambi wetu.

Mwimbe dimbo dyodipya kate kumakughero ghaFumu, yoyishi gha tendire yitetu dyoko dyendi dyorudyo dyokupongoka edi dya mughamwenine.

R:

Ghuhura…

Fumu ghaneghedhire makomweneno ghendi, ghuhunga wendi gha ghu hokorire kughutho ghomeho ghomako. Aye ne gha ghayarire kughunongo wendi no makurupero ghokundhugho dha Isragheli.

R:

Ghuhura…

Ghuhura ghoghuhe ghokaye wa monine makomweneno ghaNyambi wetu. Mushamberere kughutho waFumu, kaye kokahe mwingene no mu mwimbere maPisalemi!

R:

Ghuhura…

Membo gho maPisalemi nothivandjero, no kuhumwerera tukadikadi. Mu shogherere nomarumbendo mushamberere kughutho ghorupara rwaFumu Nyambi.

SECOND READING

Thitoya thoghuwadi Heb.1:1-6

Mumbapira kwawaHeburayi

Nyambi ne ghambire netu mwamwanendi

Pakare-kare Nyambi nga ghambanga nawakuru wetu rorwingi pamihingo dhokukutjaka-tjaka mutunwa twawaporofeta.

Ene muno mumaruvedhe ghano ghokuhurera, kuna kutu tongwera Mwanendi, oyu ghana ningire Nyambi ghakare mupingi ghoyoyiheya omu ka kara kaye kokahe.

Ghukenu waNyambi ghororuheya, gho wa mukenitha ghupongoki waNyambi mungcamu dhodhihe.

Mwana mu gha kurithire dina dyendi kupita haengeli

Nyambi mbadi gha tongorire kwakehe muengeli wendi eshi: Owe ne gho Mwanange dyarero nakureta. Ndi eshi, ame mbo na kara noWiho, Mbo ghuna kara mwanange. Apa gha tumine Nyambi mwanendi pakaye, gha ghambire eshi: ‘Haengeli wahe waNyambi ha mu kanderere.’

Mañando ghaNyambi

Gospel Acclamation

Hallelujah

Diyuwa dyokupongoka dinatuyandhurikera dyarero, mwiye mwamako no mu kanderere kwaFumu, dyarero thinaghu thishe pakaye thothikuru.

Hallelujah

Evangelium

Jn.1:1-18

Marundwerero ghoyitjanga yaJohannesi.

Ñando dha karire munu

Pakutanga dha karire Ñando, no Ñando dhine Nyambi thinda.

Ghakarire pamutango naNyambi.

Papendi yapwire kuvareka yoyihe no mbadiko thi tha pwire kutenda kupira ye. Mumwendi wa karire moyo, no moyo wa karire munyenge wawanu. Mumnyenge ghuna kumunekera makokore, makokore mbadi gha konine kudhimitha munyenge.

Pa karire murume oyu ghapwire kutuma kwaNyambi. Dina dyendi ne Johannesi.

Ghe yire kukunongonona munyenge eshi, wahe ngoha ghu dimuke no kughutawa.

Aye thinda mbadi gha karire munyenge, ene gha konine kunongonona munyenge. Munyenge ghoshemwa ghokukona kumunekera kehe munu wa karire mukwiya pakaye, mbadi kamudimukire. Gheyire kuyimuna yendi, hakadiko dyendi ne mbadi hamu – tamburire. Ene wahewa hamutamburire ni hamu tamburire kuduna dyendi.

Gha wa pire ngcamu dho kukara hanaNyambi. Ne mbadi hakarire hana Nyambi pamushamurukero ghokudi Wihe vene. Nyambi thinda yo gha karire wihawo. Ñando dhakarire munu no dha tungire pakatji ketu. Atwe twa monine ghuFumu wendi, ghufumu wendi yira Mwana ghopithendi oyu gha tunda mwawihe gha yara thiñeke thoghushemwa.

Johannesi ghana kunongonona ye, no ghana kukuyerera ghuninga eshi: Yodighe yu na mu tongwerire eshi, oyu ghana kwiya munyima dhange ghanipiterera me yoyishi yomutangotango,ndani me. Mughuhunga wendi twa tambura twahe marudhi ghoñeke.

Nyambi gha tapira muragho kwaMosesi, ñeke noghushemwa yeyire mwaJesusi Kristusi. No ghofotji temba yu gha monine Nyambi panganyi. GhoNyambi thinda gho Mwanendi ghopithendi gho Nyambi thinda oyu gha karire nendi no gha munongonona.

Mañando ghoEvangelium

HOLY FAMILY OF JESUS, MARY AND JOSEPH

Didhiko dyokupongoka

FIRST READING

Thitoya thokutanga Gen. 15: 1-6. 21: 1-3

Mumbapira dhoGenesisi (Mavarekero)

Ñando dhaFumu dheyire kwaAbramu muyirota, no ghuninga eshi: “Abramu, wayapa, yame no thitere thoye nondjambi dhoye ne dhikuru thikuma. Kokwipura Abramu eshi, Hekudyange, hekudyange, nye mbo ghu ni pa yoyishi ame na pira hana? Ngepi keho mbadi wa nipa hana? Apa mbo nifa kupinga ghushwi wange ne shime ngwa ne Elieseri ghomukaDamasikusi.

Mbadi wa nipa hanahoka, mupikange yo mbo gha pingere kughushwi wange. Gho gha yuvire Fumu ghana kughamba karo kukwendi eshi: Mupika yu mbadi ghakumona yimuna yoye mwanoye ghoshemwa yo mbo gha dya ghushwi ghoye. Gho gha mu shwayithire kununda dhothishashara thendi ko kumuninga eshi, dighamene kuwiru ghutare nungwedhi ngeshi ghutwethe kudhitara; ñanyi wa kukare nohanahoka ghoye hohengi yira nungwedhi dhokuwiru. Abramu gho ghakuruperire mwaFumu, naNyambi gho gha mu rikanyithire kughuhunga. Fumu gha dhingurire Sara, thika di gha mu toyedherire naFumu na tendire naSara thika di gha yi ghambire Sara gharemine, gho ghashamurukire mwana ghokatughuru waAbrahamu mughukurukadhi wendi, thika dig ha yi toyire Nyambi muruvedhe roro. Abrahamu gha tire mwana yu gha shamurukire Sara eshi Isaka- kuninga eshi, “Gho yi hekitha.”

Mañando ghaNyambi

Responsorial Psalm

Dimbokatji Ps. 104: 1-6.8-9

R:

Aye Fumu ne, Nyambi wetu, ghanunga ghundambo wendi kuroruheya.

Mum u shogherere Fumu! Mu mwithe! Mudimukithe marudhi eyi gha tendire. Mwimbe membo mwimbe kudikuto dyendi, Muyithimwetwedhe yitenda yendi yoyihe yongcamu.

R:

Aye Fumu…

Mukutekere dina dyendi dyokupongoka, ninge ha shamberere, Awa hashana ghukara po waFumu mushane maghamweno no makungero kwaFumu mushane kehe pano ghukara po wendi.

R:

Aye Fumu…

Amwe mwakona kughayara kuyitenda yendi yongcamu eyi gha yendire, kuyitetukitho yendi, kuyitenda yendi yomaghamweno yopamarawero ghendi, amwe mwanahoka waAbrahamu gho mu pikendi namwe mwanendi waJakopu oyu gha tororire.

R:

Aye Fumu…

Aye gha tanaritha ghundambo wendi roruhe, maturekero agha gha toyedherire kwawanahoka, mayovi nomayovi, ghonghundambo ghu ghanungire naAbrahamu, no methero ghendi ne kwaIsaka.

SECOND READING

Thitoya thoghuwadi Heb. 11:8.11-12.17-19

Mumbapira kwawaHeburayi

Yoyishi, Abrahamu gha tawire, ho gha yuvire apa gha mwithire Nyambi eshi, gha dhirukere kudyango edi gha mu neghedhire edi sho ghakayore. Aye ghafungurukire no mbadi ghadimukire eshi kupi ghana kutamba. Yoyishi Abrahamu ne gha tawire, gho gha wanine mwana ngambi kenge di gha kuruparire no ngambi kenge dig ha karire Sara mbumi gha wanine ngcamu dhokureta mwana .

Yoyishi aye gha kuruperire thikuma Nyambi, oyu gha yi mu toyedherire. Eyi ya hokokire kwamurume yu gha dhirire kukona kuwana mwana, mohatundire hana hohengi yira nungwedhi dhomuwiru, dho kudhira kukona kutara yira manona ghodiheke ghokumbombwa dhodikuruviya.

Pamatawero ghendi Abrahamu, gha mu yerekire esh gha yambe mwanendi Isaka. Yashemwa yoyu gha wanine maturekero nokukwendi gha ninga eshi mwaIsaka mo wa kuwana hanahoka ghoye. Naye gha kwindukire mukutupura mwanendi ghopithendi aye gha yidimukire eshi Nyambi ne gha kara nongcamu dhokutumuna mufu no ghadimukire eshi mbo ghana muhukera Isaka.

Mañando ghoEvangelium

Gospel Acclamation

Hallelujah Hebr.1:1-2

Pakare-kare gha ghambangire Nyambi, rwingi no pamihingo dhodhingi nawakerekandongo pawaporofeta. Ene pañanyi-ñanyi mumayuwa ghano ghokumanithera, kukwetu ghana kughamba pa mwanendi.

Hallelujah

Evangelium

Luk. 2:22-40

Marundwerero ghoyitjanga yaLukasi

Apa gha pwire mayuwa ghendi ghokudhirerekedha, thika di wa karire muragho waMosesi, kokumutwara kwawo muJerusalema ha ka mutupure kwaFumu. Thika di yapwire kutjanga mu muragho waFumu eshi: Kehe karughuru ghana ghombendi, gha pwe kupongwera kwaFumu. Ha twarire karo ndupu pofotji nendi thika di wa ghamba muragho waFumu eshi: Tumbogho tuwadi ngambi makutjaghana mawadi. Mumayuwa gha gha karire murume gho dina dyo Simiyoni; murume yu gha karire ghuhunga no gha yapire Nyambi, no gha taterire muhengaghuri wa wakaIsragheli naMupepo ghoKupongoka gha karire papendi. No papendi yapwire kuhokoka eshi, mbadi sho gha wane kufa oku shime mbadi ghana mono Kristusi waFumu. Na Mupepo ghoKupongoka gha mu yendithire muTembeli. No apa ha mwingerekire mwanuke Jesusi hawihe nanyina muTembeli, eshi gha tende nendi thika di wa hima muragho, gha tumburire Simiyoni mwanuke mumoko ghendi no gha kuyire Nyambi ghuninga eshi:

“Fumu, thiye mupikoye gha yende muthiraro, thika di dhaghamba ñando dhoye. Yoyi meho ghange ghana mono mushuturi ghoye. Oyu wa turekire kughutho ghomeho ghomako ghomahe. Thishe thomakenithero ghomarudhi kudifumanekero dyo diko dyaIsragheli.”

Ha wihe nanyina ha tetukire yoyinu yi gha ghambire kukwendi. Munyima ko kuwakandadheka Simiyoni, no gha tongwerire Maria ghonyina mwanuke eshi mone mwanuke yu ha mu paka po kukuwitha no kwimeka muhongi muIsragheli no kwimeka ho hengi muIsragheli. Thidimukitho thi, mbana thikanana hohengi. Ene dimende mbo dina tuyura mutjima ghoye, no yighayara ya wengi mbo yin a kokoka kuthishe. Karo pakare muporofeta ghombuyama Anna ghomwana Fanuweri gho mukadiko dya Aseri. Gha kuruparure thikuma. Apa gha mu yekire, aye mushengeteya, no gha karire na didhiko dyendi kwoko no dhiwadi. Munyima gha karire mudidhi. Mumayuwa gho gha karire nomyaka dhendi makumi kwoko no mahatu no myaka dhine. Mbadi gha tundire kuTembeli kukukarera Nyambi, pa kudhirera no pakurapera mutenya no ghuthiku. Munako dhodho naye kokwiya mo no gha tumerire Nyambi. Gha ghamba yo kwamwanuke wawahe, awa ha taterera makomweneno ghaJerusalema. Apa gha manine kurikanyitha yoyiheya thika di ya karire mu muragho waFumu, ko kuhuka kwawo kuGalileya kudighumbo dyawo dyaNasareti. Mwanuke gha kurire no gha tanarire no gha ghayarire no ghunyanyami, no ñeke dhaNyambi dha karire papendi.

Mañando ghaNyambi

Solemnity of Mary, Mother of God, 1^st January

Difeste dyaMaria, ghoNyina Nyambi.

FIRST READING

Thitoya thokutanga Num.6:22-27

Mumbapira dhoNumeri

Mbo ha netha dina dyange kwawana Isragheli, mboa na wa kandadheka

Fumu ne gha ghambire no gha ningire kwaMosesi eshi;

Ghambe naAroni eshi: ‘kemo dyo shomukandadheke hana Isragheli pakuwatongwera eshi: Fumu, mbo ghana kandadheka no mbo ghana kukungu.’

Fumu no mbo ghana kurwedhimena rupara rwendi no mbo ghana kufera ñeke.

Fumu mbo ghana kapura rupara rwendi kukoye no mbo ghana kupa thiraro.

Kemo dyo shoni dimbeke dina dyange ko hana Isragheli, ndani po mbo niwa kandadheka.

Mañando ghaNyambi

Responsorial Psalm

Dimbokatji PS.67:2-3; 5; 6, 8

R:

Nyambi ngo ghatu fereñeke no kutukandadheka.

Nyambi ngo gha tu fereñeke no kutukandadheka, ngo ru tu rwedhimene rupara rwendi! Podigho eshi hanu hopakaye hadimuke ndhira dhoye no ha yuvithe makomweneno ghoye mumako ghomahe.

R:

Nyambi ngo…

Mako mbo ghana kara noyishamberera yoyikuru , yoyi wa pangura we mako mughuhunga no kuwatwara pakaye.

R:

Nyambi ngo…

Moko mbo ghana kukughu weNyambi, mako mbo ghana kukukghu. Nyambi mbo ghana tukandadheka noghuhura ghoghuhe gho pakaye mbo ghuna mu yapa.

SECOND READING

Thitoya thoghuwadi Gal. 4: 4-7

Mumbapira dhaMupostoli Paghulusi kwawakaGalasiye

Nyambi gha tumine mwanendi oyu gha pwire kushamuruka mwambuyama

Apa rwa rikanyine ruvedhe Nyambi gha tumine Mwanendi, aye ne mukamadi gha mushamurukire, oyu gha rikanyithire no muragho,

eshi nagha komonone awa hakarire kwishi dhomuragho nokuwa pirura hakare hana Nyambi.

Mukuneghedha eshi amwene mwana Nyambi, Nyambi gha tumine mudhimu wendi wamwanendi mumitjima dhenu.mudhimu oghu ghuna kukuyerera eshi: “Abba, Tate wange.”

Podigho eshi mbadi ghomupika karo ghomwana, no ngeshi ghomwana no ngogho mupingi waNyambi mwaKristusi.

Mañando ghaNyambi

Gospel Acclamation

Hallelujah Hebr1:1

Pa kare-kare Nyambi nga ghambanga nawa kerekandongo wetu pamihingo dhokukutjaka-tjaka, mutunwa twawa porofeta ene muno mumaruvedhe ghano ghokuhurerera. Aye kuna kututongwe ra Mwanendi, oyu ghaninga Nyambi ghakare mupingi gho yoyihe mu kaye kokahe.

Hallelujah

Evangelium Luk. 2:16-21

Marundwerero ghoyitjanga yaLukasi.

Ha tambukire ko nohaka wanine mwanuke gho ku rara muwato.

Apa ha mumonine kokutanga kuthimwetwedha eyi gha wa tongwerire muengeli. YokwaMwanuke yu, ene waheya wa hayuvire mbudhi dhi kwawakakuditha, hatetukire yomañando ghawo. Maria gha pungurire mañando ghomaheya gha, nokughavuruka mumutjima wendi. Hakakuditha hahukire ghukugha Nyambi nokushogherera kuyoyi he eyi hayuvire nokumona thika di ha yi watongwerire.

Munyima dho mayuwa kwoko nomahatu pakurikanyitha nako naMwanuke ghapwire kukeña, no ha mutire dina dyendi eshi, Jesusi. Dina di gha mutire muengeli oku yene no ngaghero temba.

Mañando ghoEvangelium

SECOND SUNDAY AFTER CHRISTMAS A, B, C

Shundaha ghoghuwandi munyima dhoKrismisa

FIRST READING

Thitoya thokutannga Sr.24:1-4, 12-16 (Gr.1-2, 8-12

Mumbapira dhaEcclesiasticus

Mumaghano ghaNyambi dya karire diko dyaNyambi edi dya pwire kutorora

Maghano ghana kukukugha ghothinda mukatji kodiko dyendi pakumukutekera.

Mumbongarero dhaNyambi kuyandhurura ye kanwa kendi no kughutho ghotushumba twendi otu tuna kumukugha.

Po ghanirawerire muvareki ghoyoyihe nomuvareki wange gha tungekire matungo ghange , no gha ghambire eshi wa kona kutunga mwaJakopu nomuIsragheli wa kona kupungwera mo yipinga yoye.”

Kuroruheya ghani varekire kate,no kuroruheya mbadi mbo ni thigha.

muTabernacle ghokupongoka mona kamukanderire kughutho wendi no dyo na ka tungire muSiyoni.

Mumbara dho dhiwa, eyi ya hamenine ku kwange thiraro nomuJerusalema mwa karire ghutungi wange.

No na kamine mudhi mudiko dyodifumanekero, paghuhepwe waFumu kuyipinga yendi.

Mañando ghaNyambi

Responsorial Psalm

Dimbokatji Ps.147:12-13. 14-15. 19-20. R7 Jn 1:14

R:

Ñando dha karire munu no dha tungire pakatji ketu.

Kughe Fumu owe Jerusalema, owe Siyoni, kughe Nyambi ghoye! Ghatanaritha mushokwe gho dikorogho dyoye, gha kandadheke hanuke ghomughutho dhoye.

R:

Ñando……

Oyu ghana kutapa thiraro kumirurwani dhoye no kukwirukitha nomavumbukero mwene. Oyu ghana kutuma marawero ghendi pakaye noñando dhendi ne kutambuka thikuma.

R:

Ñando…

Kuna kushwayitha mañando ghendi kwaJakopu, yihonga yendi no miragho dhendi ne kwaIsragheli

SECOND READING

Thitoya thoghuwadi Efs.1:3-6. 15-18

Mumbapira dhaMupostoli Paghulusi kwawakaEfesusi

Aye gha tu kungire no kutushimba tukare twanendi mwaJesusi

Gha fumane Nyambi noWiha Hekudyetu dyetu Jesusi Kristusi oyu gha tukandadhekire kumipepo dhodhiheya dho kupongoka mudiwiru mwaKristusi, thika kenge di twa mutororire kughutho ghokaye mughupongoki no kukara kughutho wendi muruhakitho mukupira ghurema.

Mu kukunga kwendi gha tu shimbe tukare twanendi mwaJesusi Kristusi. Mu ghuwa ghomahimeno ghendi. Kate kudifumanekekero nomakughero ghothiñeke thendi agha gha kuhatera kumatorwero ghenu ghokutawa Fumu Jesusi noruhakitho oru mwa haka mwa hapongoki wahe. Yo na dhirire kutura Nyambi mumwenu.

Ame na kumwirukitha mumandapero ghange pakukumbera, eshi Nyambi ghoJesusi Kristusi eshi ngo ghamupe mupepo oku pakughu muhokwera Nyambi mu mu dimuke.

Ame kumuraperera eshi gha ferere no gha kapuke, mumone thishe thendi amwe karo mudimuke makurupero agha gha mwithera nomatawero ghomakuru agha ghapingithire hapongoki wendi.

Mañando ghaNyambi

Gospel Acclamation

Hallelujah 1 Tim.3:1-16

Difumanekero kukoye we Kristusi, you hayaghurire kwawahayidena; difumanekero kukoye we Kristusi, oyu katawa kaye.

Hallelujah

Evangelium Jn.1:1-18

Marundwerero ghoyitjanga yaJohannesi.

Ñando dha karire munu no dhatungire pakatji ketu

Pakutanga dha karire Ñando, Ñando dha tungire naNyambi noÑando dhi ne Nyambi thinda. Gha karire pamutango naNyambi.

Papendi yapwire kuvareka yoyihe no mbadiko thi thokutenda kupira ye. Mumwendi wa karire moyo wa karire munyenge wa wanu. Munyenge ghuna kumuneka makokore no makokore mbadi gha konine kudhimitha munyenge.

Pa karire murume oyu gha pwire kutuma kwaNyambi, Dina dyendi ne Johannesi.Gheyire kukunongonona munyenge eshi, wahe ngo haghu dimuke no kughutawa.

Aye thinda mbadi gha karire munyenge ene gha konine kunongonona munyenge.

Munyenge ghoshemwa ghokukona kumuneka ku kehe munu wa karire mukwiya pakaye.

Ghakarire pakaye no kaye kapwire kutenda papendi, ene kaye, mbadi kamudimukire.

Gheyire kuyimuna yendi, ene haka diko dyendi mbadi ha mu tamburire.

Ene wa he wa hamutamburire no ha mu tawire kudina dyendi, gha wa pire ngcamu dho kukara hana Nyambi .

Ne mbadi ha karire pamushamurukero ghoghuwiha vene. Nyambi thinda yogha karire wihawo. Ñando dha karire munu no dha tungire pakatji ketu.Atwe twa monine ghufumu wendi yira mwa mwana ghopithendi oyu gha tunda mwaWihe gha yara thiñeke thoghushemwa.

Johannesi ghana kumunongonona ye no ghana kukugherera ghuninga eshi: yodiye yu namutongwerire eshi, ghoyu ghana kwiya munyima dhange, gha nipiterera me yoyiyshi yomutangotango, ndani me. Mughuhunga wendi twa tambura kemo twahe marudhi ghothiñeke.

Nyambi gha tapire muragho gho kwaMosesi ñeke no ghushemwa yeyire mwaJesusi Kristusi. No yofotji temba yu gha monine Nyambi panganyi. GhoNyambi thinda Mwanendi gho pithendi oyu gha karire mumwendi, yo gha ni nongonone.

Mañando ghoEvangelium

THE EPIPHANY OF THE LORD

6^th January

Diyuwa dyawaFumu hahatu

FIRST READING

Thitoya thokutanga Jes. 60:1-6

Mumbapira dhaMuporofeta Jesaya

Difumanekero dyaFumu ne dyakerire papoye

Pinduke kothoroko Jerusalema yoyishi ghukushuki waFumu ne kuna kuku sheghenyena!

Mako ghamwe mbo ghana kara makokore, ene papoye mbo thina kusheghenyena thishe thaNyambi ghunyanyami ghomumwendi mbo ghu na kara koye.

Thishe thoye mbo thinetha mako ghomahe pofotji nawa Fumu kumavero ghodiyuwa dyoye dyodipya.

Kenge mumbadi dhoye no kenge eshi yinye yina kuhokoka kwa hanu hoye awa hana kongana kudighumbo dyoye!

Tutughurughana mbo tuna tunderera kokayenda, hashengeteya mbana werekanga mumughongo yira hanuke.

Mbo ghuna yimono yi nokuyara yishamberera, mbo ghuna tutuma ghushamberera ghutungi ghomako no mbana ghukuretera kutunda thambodiya dhodikuruviya oku mba tunderera hatungi.

Mangameno kutunderera kuMidiani no Elfa mbana tunderera kuSheba, mbana reta mangondo no mungongwera hanu mbana yuvitha mbudhi dhoyishamberera eyi gha tendire Fumu.

Mañando ghaNyambi

Responsorial Psalm

Dimbokatji Ps.72:1-2. 7-8. 10-13. R7 11

R:

Hafumu wahe, ha kotame kughutho wendi, nomarudhi gho maheya gha mu karere.

Hone ne keho fumu, ghoNyambi, eshi gha raghure popamahimeno ghoye, honge fumu mukutenda ghuhunga, thika di ghuna kuyihima We, eshi mbo gha tetere ndhango dhodhihunga, kudiko dyoye no kureta ghuhunga kwawakakunyanda.

R:

Hafumu wahe...

Mumayuwa ghendi mbo kuna pupana ghunongo nothiraro kate mbo ka pireko kaghonda. No mbo ghana tungu kutunda kudikuruviya kate kurware, kate kughuhura ghokaye.

R:

Hafumu wahe…

Hafumu homuTarsisi no homuyirudhi mbana tapa ghushwa haFumu hoSkeba mbana reta diketo. Hafumu wahe mbo hana munyongamena kughutho wendi, mako mbo ghana mukarera.

R:

Hafumu wahe…

Yoyishi mbo ghanetha hakakunyanda awa hana kunyanda maghamweno, nawakakunyanda awa hapira mughamweni. Mbo ghana ferañeke hahepwe, nawakakunyanda, no mudhimu dha kakunyanda mba ghana dhiparitha

SECOND READING

Thitoya thoghuwadi Efs. 3:2-3, 5-6

Mumbapira dhaMupostoli Paghulusi kwawakaEfesusi

Yina shwagha keho eshi hakayi yidenanawo, hapingi hoyi haw akuruperitha

Ame ne mwa yuvire pakare yo marawero Nyambi agha ghatapa mumwange noñeke dhendi edhi ghatambithera kukwenu no Aye muyihokora ghanipire maghano gho thithithatero thi.

Thithithatero thi thapwire kuhokora kwaMupepo kwawapostoli wendi hokupongoka nawaporofeta no kwakehe munu ghokereka ndongo ghopathihuru-huru. Kuninga eshi hahayidena hakupakerera nawaJuda muyiyora yofotji eshi hayipo yothirama thofotji no makuruperitho ghofotji, agha hawatendera mwaKristusi Jesusi muMbudhi Dhodhiwa.

Mañando ghaNyambi

Gospel Acclamation

Hallelujah Mtt.2:2b

Yoyishi twe nga tu mono ditungwedhi dyendi mudiva yo tu neyera na tu mu kanderera.

Hallelujah

Evangelium Matt.2:1-21

Marundwerero ghoyitjanga yaMateghusi.

Atwe kudiva tuna tundu kukukanderera Fumu

Munyima dhomushamurukero wendi Jesusi muBethlehema, muJudeya mumayuwa ghaFumu Herodesi, ko kwiya hafumu ghokudiva kuJerusalema. Hepurire eshi: ‘Kupi nga hamushamurukera Mwanuke Fumu wawaJuda?’ Yoyishi nga tumono ditungwedhi dyendi apa dyashwayire, yotuneyera na tutape fumwa kukwendi.

Apa gha yiyuvire Fumu Herodesi nawaJerusalema waheya, ha tutukwire thikuma.

Ko kukongwedha kwendi hapristeri hohakuru na wakamarukwaro gha wepure eshi, kupi kupi mbo hamu shamurukera Kristusi.

Ha mu hutha kwagho eshi muBethlehema muJudeya, yoyishi kemo yapwire kutjanga kwawa porofeta eshi:

‘Owe Bethlehema gho ditunga dyaJuda. kadi ghomumbiru pakatji ka wa raghuri waJuda. Yoyishi mumoye mo mbo gha shwagha mukamiti oyu mbo gha kara mudithi gho diko dyange dyaIsragheli.’

Munyima Herodesi ghethire hamoni ghoditungwedhi mughudhindo nokuwepura eshi, muthivaka munye dya hokokire ditungwedhi di.

Ha wa tumu muBethlehema nomañando eshi, muyende mukamushane thiwana mwanuke, ene ngeshi mukamuwane ho mwakunayinidimukithe.

Name hona kukone kuyenda nikamukanderere.” Pa kumana kuyuva yaFumu kokufunguruka kwawo, ene mumone kuditungwedhi di ha monine, dya wa twarire kate kashishwama pandhugho edhi gha karire mwanuke.

Apa hamonine ditungwedhi di ne hashambererire thikuma.

Ko kwingena kwagho mundhugho no hawanine Maria naMwanuke, ho hatongamenine kokumukanderera. Ha rongorora yikutu yawo no hamu kundire noghushwi ghomangondo, mingongwera, nomira, no ghawa nyangerekedhire muengeli waFumu muyirota eshi, mbadi hakona kuhuka kwaHerodesi, no

hahukire nodhira dhadho-nadho kudinga dyawo.

Mañando ghoEvangelium

THE BAPTISM OF THE LORD

Shundaha ghokutanga mumaruvedhe ghokukukarera

FIRST READING

Thitoya Thokutanga Jes 55:1-11

Mumbapira dhaMuporofeta Jesaya

Mwiye, mwaheya mwe mwa fa dinota, mwiye kumeyu: No yu gha Manyinga, henye naghaghure no gha dye; shemwa miye no mu ghure vinyu no manhwe, ene kupira manyinga no yirurwera temba. Yinye sho mu rughurwere manyinga ghenu oku mbadi ko yidya? No nye sho murughanene yirughana yenu oku mbadi muna kwikuta? Mutegherere thiwana kukwange, no mwiye namudye yoyiwa kemo sho mununithe midhimu dhenu muyishamberera. Muteye matwi ghenu no mwiye kukwange; na mutegherere no mudhimu dhenu mbo dhinatungu.

Ame nahimi kununga nenu ghundambo ghokuroruheya, no kutanaritha thiñeke ethi nakuruperithire kwaDavita. Mu mone, ame ne na mutendire kanonga komako, no mupanguri nomupanguri ghomako. Karo mako gha wa dhidhire kudimuka we, mbo ghunetha, no diko edi wadhirire kudimuka, no wahe wa wadhira kudimuka mbana tjirera kukoye, pamahimeno ghaFumu ghoNyambi ghoye, no Mupongoki waIsragheli, oyu mbo gha kufumaneka.

Mushane Fumu ngambi kumbadi munamuwana shime, mumwithe oku gha di pepi. Mukakushwena kutawa, gha thiye ndhira no muyi gha thiye yighayara yendi. No gha piruke kwaFumu. Munyima mbo ghana mufera ñeke papendi, no gha piruke kwaNyambi wetu, yoyishi aye ne ghana kumuthigherera nomutjima ghoghuhe. Yoyishi yighayara yange ne mbadi yighayara yenu, nomayira ghange ne mbadi mayira ghenu, dyo ghana kughamba Fumu. Ghuhunga, mawiru ghapiterera kaye, kemo dyo ghapiterera mayira ghange mayira ghenu, no yighayara yange yapiterera yighayara yenu.

Ghuhunga, thika yakara eshi, mvura no makerekeshe kutunda mudiwiru no yokudhira kuhuka, oku mbadi yina yuritha kaye, no katenda kapokore no kukuritha mboto dhamukuni no yidya yokudya. Kuninga eshi ñando edhi dhina kutunda mukanwa kange mbadi mbodhihuka nyara-nyara, mukupira kupitura eyi nahima no kukumithamo eyi nadhi tumena.

Mañando ghaNyambi

Responsorial Psalm.

Dimbokatji Jes. 12:2-6

R:

Noyishamberera mbo munaveti meyu mudivetu-vetu dyoruvigha.

Shemwa Nyambi ne Mushuturi wange, mbo na kurupera, mbadi mbo ni yapa: Yoyishi Hekudyange Nyambi ne ngcamu dhange, no mupisalomi wange. No yo ghana kara mushuturi wange. No yishamberera mbo munaveti meyu mudivetu-vetu dyoruvigha.

R:

Noyishamberera…

No mbo muna ningi mudiyuwa di eshi, mutumere Fumu, no mwithe dina dyendi! No mudimukithe yitenda yendi kumako!

No kuyuvitha dina dyendi eshi dya piterera.

R;

Noyishamberera…

Mwimbere mupisalemi mudikuto dyaFumu, yoyishi ghana tendi yinu yongcamu no kuyidimukitha mukaye kokahe. Mu shogherere, no muyumbaghuke, yoyishi mupongoki waIsraeli ne mukuru mukatji kenu.

SECOND READING

Thitoya thoghuwadi 1 Jn. 5:1-9

Mumbapira dhokutanga dhaJohannesi

Kehe yu gha tawa eshi, Jesusi ne yoKristusi ghomwana Nyambi no kehe yu gha ha ka wihe, gha ha ka karo hanendi. Po shot u dimukere natwe eshi, twahaka hana Nyambi, pakuhaka Nyambi no pakukumitha mo miragho dhendi. Ruhakitho rokwaNyambi rwa kara ghutaedhi kumuragho dhendi. Karo miragho mbadi dha kara ghukukutu mukudhikumitha mo. Yoyishi, kehe yu gha kara mwana Nyambi gha kona kwitha kaye aka kakara mudiharwero. Nane ngo dye gho kukona kuwitha kaye. Kadi yu gha tawa eshi Jesusi ne mwana Nyambi ndi. Yofotji keho yu gha thikera pameyu ghodiyoyero no manyinga ghoyifa ne, Jesusi Kristusi.

Ene mbadi gheyire no meyu pithawo, nomeyu nomanyinga gheyire. Mupepo ne yo munongononi wayo. Yoyishi Mupepo ne ghushemwa. Pohadi hahatu awa hayinongonona, Mupepo nomeyu nomanyinga, no ghushupi wa washahatu ne ha rikanyena. Atwe ne twa tambura ghushupi wawanu hahatu wa. Yoyishi ghushupi waNyambi ne wapiterera, kuninga eshi, Nyambi thinda ghana kuyinongonona, no manongweneno ghokwaMwanendi.

Mañando ghaNyambi

Gospel Acclamation

Hallelujah Jn.1:29

Mudiyuwa dyo kuranda ko, gha monine Johannesi Jesusi ghana kwiya kukwendi no gha ningire eshi: Oya ne yo ndjwighana waNyambi ghokutumbura maharwero ghawanu.

Hallelujah

Evangelium

Mark. 1:7-11

Marundwerero ghoyitjanga yaMarkusi.

Muyiyaghura yendi, Johannesi ghoMukadiyoghero ghaningire eshi: “Munyima dhange mbo gha neya mukangcamu gho kupiterera me. Na me temba mbadi na fumana eshi ni fumbere no ni shuture tukanda tomakuha ghendi. Ame na muyoghire nomeyu, aye ne mbo ghana muyogho naMupepo ghoKupongoka.” Mumayuwa gha ghatundire Jesusi muNasareti, gho mumukunda waGalileya. No gha pwire kuyogha kwaJohannesi muJordani. Apa gha kandukire mumeyu, gha monine eshi diwiru dina yandhuruka. NaMupepo ghoKupongoka gha temberire papendi muthishwi thodikutji. Ko kushwagha diywi muwiru eshi: “Yowe mwanange ghomuhakwa oyu namenyamenyena.”

Mañando ghoEvangelium

ASH WESDNESDAY

Ghuhatu ghomututwi

FIRST READING

Thitoya thokutanga Joel. 2:12-18

Mumbapira dhaMupofeta Joel

Pañanyi-ñanyi, Fumu ghana kughamba eshi, mwiye kukwange no mitjima dhenu dhodhihe. Kudhirerekedha, kudirera no kukema. Muninge dhi ndundumenitha mitjima dhenu mbadishi mudjadjaghure yishupata yenu, no mupiruke kwaFumu ghoNyambi yoyishi aye ne ghambirupitha ghupata wendi no karo aye eshi ghayara noruhakitho no thiñeke no ghakuroyithera kuthigherera.

Yidye mbo gha dimuka eshi: “Mbadi mbo gha thighuka karo, mbadi mbo ghapata, no mbadi gha kuthigha makandadhekero apa mbo ghatapa, kuyinwa endi kuyidya kwaFumu Nyambi wenu.

Shighe dipori muSiyoni no rawere kudhirerekedha, withe mukoshi pa kwitha hanu pofotji, ninge maparaghumbo ghomahe ghakare pofotji, no ninge hanuke hakare pofotji ngambi nawa hana kuyamwa.

Ninge katughuru ghokakuyeka ghathiye mararo ghendi, no mwenga ghathighe ndhugho dhendi. Mukatji komengeneno, no pa tishi ghokutupwera ndupu dhaNyambi, ninge hapristeri endi hapiterithi waFumu hakeme. Waninge haghambe! Ghamwene hanu ghoye Nyambi! No watenda hanu ghoyiyora yoye yira yinu yo thihonyi, kumañando ghoditunga. Pashanye sho hayi ghambere mukatji komako eshi: “Kupi Nyambi wawo.” Na Nyambi ghakare nonya mudyango dyodiko dyendi.

Mañando ghaNyambi

Responsorial Psalm

Dimbokatji Ps.50:3-6.12-14.17

R:

Ghu ni fere ñeke Nyambi popaghukuru ghoghunongo ghoye.

Dhimithe mirandu dhange muthiñeke thoye thothikuru! Ghu ni kushukithe kumaharwero, gho ghu yoghe ghuyi wange! Kemo, na dimuka mirandu dhange no na kundhundha roruheya maharwero ghange. Ku koye keho na harura, gho na tendi ghuyi mumeho ghoye.

R:

Ghu ni fere…

Nipe mutjima ghoghukushuki ghoNyambi, tendurure mudhimu wange no ghu ni tanarithe. Wa ni thindeka kughutho ghoye, no wa ni tunditha Mupepo ghoye ghoKupongoka!

Ghu ni fere…

Ni wanithe karo yishamberera, yoyu gha shutukire papoye, ho ninge ni kukarere karo nomakutapero ghokukoye. Gho fumu, nipe Mañando ghokuyuvitha fuma dhoye.

SECOND READING

Thitoya thoghuwadi 2 Kor. 5:20-6:2

Mumbapira dhoghuwadi dhaMupostoli Paghulusi kwawaka Korinte.

Eyi tuna kuyendera yi, yoyi twa kara twayitumi waKristusi. Nyambi yo gha tu tororire eshi, tu yi mu tendere. Atwe tuna kumukanderera mu Dina dyaKristusi eshi: “Mukushemwithane naNyambi!”

Kristusi ne gha pirire murandu. Nyambi gha mu tendire thiharuri mudyango dyetu, gha kone kututhigherera mumakupakerero ghe tu naKristusi.

Yira twakakurughana pofotji mwaNyambi, tuna kumutongwera mudimuke eshi, thiñeke thaNyambi mbadi mwa thiwana nyara-nyara. Aye ngeno ghana kughamba: Munako dhodhihunga na kuyuvire, no mudiyuwa dyomaghamweno, na kughamwenine.

Mone nako dhino ne dhodhihunga. Apa no ne dyodiyuwa dyomaghamweno.

Mañando ghaNyambi

Gospel Acclamation Ps. 50:12.14

Makughero kukoye, ghoKristusi, Fumu ghoghuparo ghororuheya

Nipe mutjima ghoghukushuki ghoNyambi, nonipe karo yishamberera yo maghamweno ghoye.

Makughero kukoye, ghoKristusi, Fumu ghoghuparo ghororuheya

Evangelium

Mtt. 6:1-6. 16-18.

Marundwerero ghoyitjanga yaMateghusi

Jesusi gha ghambire, kwawakathishongero wendi eshi: ‘Mukone mwaneghedha yitenda yoyimango kughutho wawanu eshi ha yi mone, ngo mbadi sho mu wane yiruwera kwa Wihenu ghomudiwiru.

Ninge eshi ku ghuna kughamwena hahepwe, wa shigha mumapori. Eyi ne hana kuyitenda hakadifumanekero mumasinagoge nomumikara eshi ha wa kughe hanu. Shemwa na kumutongwera: Awo ne kare ha yongaritha ghushwi wawo. Hewa kadi kemo ngeshi ku ghuna haka kutapa thinu kwawahepwe, rumoho roye mbadi rwa kona kudimuka eyi runa kutenda rudyo. Kemo sho yi kare yitenda yoye yoyihunga mughudhindo Wiho ghokumona yokunda, mbo ghana kuruwera.

Kemo shime, ngeshi ku muna kuraperera, mwa kara yira hakadifumanekero. Awo ha ha ka thikuma mumasinagoge nomumashonga ghomikara kuraperera eshi ha kone kuwamona hanu.

Shemwa na kumutongwera: Ndjambi dhawo ne kare dha yongara. Kadi kemo ngeshi ku ghuna kurapera, yende kungonda dhoye no rapere kwaWiho yu ghuna kudhira kumona yokunda ghana kukuruwera.

Ngeshi ku muna kudhireredha, mwa butathana marupara ghenu yira hakadifurumeko. Awo hana kukuthitaghura marupara ghawo eshi, ha wa dimuke hanu eshi kudhirera hana kudhirera.

Na kumutongwera ghumweya eshi yiruwera yawo ne kare ya pita. Kadi kemo ngeshi ku ghuna kudhirera, roghithe huki dhoye no yoghe rupara roye. Eshi gha dhire kukudimuka ghumweya kuyidhirerekedha yoye. Shimwengwa Wiho yu wa dhira kukona kumona, no yu Wiho ghokumona yokunda yo gha kona kukuruwera.’

Mañando ghoEvangelium

FIRST SUNDDAY OF LENT

Shundaha ghokutanga ghomakuporero

FIRST READING

Thitoya thokutanga Gen. 9:8-15

Mumbapira dhaGenesisi (Mashimwerero)

Nyambi gho gha ningire kwaNogha nohanendi hoharume eshi, “Ame nina tendi ghundambo wenge nenu nohanahoka wenu.”

No yoyiheya yoyiyumi eyi yidi nenu-yinyunyi, no yiyama yoyiheya yopakaye, noyishereka no yoyihaya eyi yina shwagha nenu mudyato, kuninga eshi yiyama yoyiheya pakaye. Ame nina kutanaritha ghundambo wange papenu; eshi yoyiheya yoyiyumi mbadi mbo yifa karo kudivavure. No mbadiko karo divavure edi mbo di dhimangedha kaye. Nyambi gha ghambire eshi, ‘Ethi ne thothidimukitho pakatji kange namwe noyoyiyumi yoyihe eyi yidi nenu kate kwawanahoka wenu. Nina paka muto wange ghomvura mumavuyi. Gho wakukara thidimukitho thoghundambo wange nokaye. Ngeshi na kungambwere mavuyi peghuru dhokaye, no kuhokoka muto ghu mumavuyi. Pana kughayara ghudambo ghu wakara pakatji kange nenu noyiyama noyoyiyumi yoyiheya ene divavure mbadi mbo diya karo kukunepitha yoyiyumi.’

Mañando ghaNyambi

Responsorial Psalm

Dimbokatji Ps.25:4-9

R:

Ruhakitho no matjimapero, ghomayira ghokuyenda Fumu pofotji nawa hakunganga ghundambo no miragho dhendi.

GhoFumu, ni dimukithe mayira ghoye, no nihonge mayira ghoye.

Tawe eshi ghushwemwa ghoye ghuni yendithe no ni kuhongeremo yoyishi, yoweNyambi wange no mughamweni wange. Mumoye na kupaka kehe diyuwa mataterero ghange.

R:

Ruhakitho no…

GhoFumu vuruke ku ruhakitho nomakuruperero, eyi waneyedha roruhe wandhundha kumaharwero no kughuyiwa nge gho kutunda kuwanuke wange. GhoFumu, ni vuruke mumatjimapero, yoyishi ghomunongo.

R:

Ruhakitho no…

Fumu ne munongo no muhunga: Thinda gha neyedha ghana kuneyedha haharuri ndhira, no hokwera haka kupira maghamweno ghuhunga no kuwahonga ndhira dhendi.

SECOND READING

Thitoya thoghuwadi 1 Pet. 3:18-22

Mumbapira thokutanga dhaMupostoli Petrusi

Aye Kristusi karo gha nyandire parofotji kumaharwero, mukakupira murandu, kwawayiharuri, mukutwara twe kwa Nyambi. Aye ha mu paghire yira munu, ene paMupepo gha karire muyumi. Kemo dyo gha yitendire kwawadhimu homuňwato, no ko gha ka yuvithire mawithero ghendi. Awa ne wodiwo wa ha karire ghuthururu kwaNyambi, awa ha kudhekerire apa ha tapire kwaNogha nako dho kutenda dyato. Awo ne hapu awa ha karire mudyato, hanu kwoko nohahatu vene muthitara, awa ha parire kumeyu, eyi ne kunegha yina kukunegha padiyoghero, apa muna pu kughamwena namwe karo pañanyi-ñanyi. Diyoghero ne mbadi dya kushura didhiro dyo payirama vene ene dya kumbera kwaNyambi ghukushuki ghoyighayara no dina dya mughamwena pamavumbukero waJesusi Kristusi. Pañanyi-ñanyi, aye ne kurudyo rwaNyambi gha di kumupa marawero ghokwamuengeli nawakamakuto nawakamangcamu no gha dhinine mudiwiru.

Mañando ghaNyambi

Gospel Acclamation Mt. 4:4

Makughero kukoye, ghoKristusi, Fumu ghoghuparo ghororuheya

Ene ye gha mu huthire eshi: “Yapwa kutjianga eshi: Munu kadi wakupara ghuroto keho, ene pakehe ñando edhi dhina kushwagha mukanwa kaNyambi.”

Makughero kukoye, ghoKristusi, Fumu ghoghuparo ghogroruheya

Evangelium

Mark. 1:12-15

Marundwerero ghoyitjanga yaMarkusi

Popo vene ko kumutwara Mupepo ghoKupongoka mumambareya. Koghaka karire Mayuwa makumi mane. No Shatani gha mu yerekire. Gha karire no yiyama no haengeli ha mu karere apa gha pwire kukwata Johannesi, ko kuyenda Jesusi kuGalileya, gha kayuvithe mbudhi dho ghuFumu waNyambi. Eshi: “Nako ne dhina rikanya, no ghuFumu waNyambi ghuna kokera. Mupiruke no mutawe Mbudhi Dhodhiwa.”

Mañando ghoEvangelium

SECOND SUNDAY OF LENT

Shundaha ghoghuwadi ghomakuporero

FIRST READING

Thitoya thokutanga Gen. 22:1-2. 9-13. 15-1 Mumbapira dhaGenesisi (Mashimwerero)

Nyambi ghaturire Abrahamu mumayerekero. “Ghamwithire eshi, ‘Abrahamu, Abrahamu!’ Ko kuhutha Abrahamu eshi, ‘Yameno.’ Nyambi ghamuningire eshi, Shimbe mwanoye yofotji ghomuhakwa Isaka, noyende kuditunga dyaMoriya, ghu ka muyambe muyambo ghokukoñerera, padirundu di sho ni kuneghedhe.’

Apa ha kumine padyango di ghamuneghedhire Nyambi, ko kutenda Abrahamu thinyaku, no ghapakire po yikunyi. Munyima Abrahamu gho gha ghangire mwanendi Isaka, no gha mu kambekire peghuru dhoyikunyi. Munyina Abrahamu ghatumburire thimende no kuyeyura dyoko dyendi eshi, ghapaghe mwanendi. Muengeli waFumu ghamwithire mudiwiru, ghuninga eshi, ‘Abrahamu, Abrahamu.’ Ko kuhutha Abrahamu eshi, ‘Yameno.’ Ko kuninga muengeli eshi, ‘Wakambeka nyara dhoye pamwanoye, no watenda thinu no kamyandhu-myandhu temba kukwendi.’ Yoyi pañanyi na dimuka eshi, “owe ne wayapa Nyambi, yoyishi mbadi ghuna shweneka mwanoye ghofotji kukwange.”

Ko kwitha muengeli waNyambi paruwadi kwaAbrahamu mudiwiru. No ghaningire eshi, “Na ku kwedhera nothinda, dyo ghana kughamba Fumu, yoyishi ghuna tendi kwamwanoye ghopithendi, oyu ghuna dhira kunishweneka, eshi mbona kupa fighaghudhi dhodhikuru, nawanahoka ghoye, mbana vuru yira nungwedhi dhokudiwiru no yira diheke dyokumbadi dhodikuruvigha. No hanahoka ghoye mbana yoro makorogho ghawanyathi wawo. No mbo ghana pu kukandadheka mako ghomahe gho pakaye kukwawo, yoyishi ghuna tegherera kudiywi dyange.”

Mañando ghaNyambi

Responsorial Psalm

Dimbokatji Ps.116:10.15-19.

R:

Ame mbo na kono kuyendaghura kughutho waFumu, muditunga dyawayumi.

Ame na tawire mumoye ngambi pa na ghayarire eshi ghuna ni shwagha, Fumu mbadi gha kengerera yifa yawa kareri wendi hondhika yame mukareri ghoye ghoFumu, Kutunda ku

mushamurukero wange, Na kara no mukareri ghoye:

R:

Ame mbo..

Yoyishi yowe wanipa horo. Ha ka kukushoyerera no muyambo ghomatumero, no nakona no nahimi kwitha dina dyaFumu.

Maturekero ghange mbo nag ha tapa kwaFumu, kughutho ghombunga dhodiko dyendi dyodihe, mudikorogho dho ndhugho dhaFumu, dyo kwingena mumoye we Jerusalema!

Mu mukughe Fumu!

SECOND READING

Thitoya thoghuwadi Rom.8:31-34

Mumbapira dha mupostoli Paghulusi kwawakaRoma

Na Nyambi kumutara wetu yidye gho kutwimanena twe? Yoyishi aye mbadi gha ghamwenine mwanendi, ene gha mu tapire kwawahe eshi gha wane maghamweno. Mbadi gha kona kutupa yinu yimweya pofotji nendi ndi? Yidye gho kukona kuheka hatorori waNyambi? Nyambi thinda gha wa hungeka. Yidye yu mbo gha tu taterera? Kristusi Jesusi yu gha fire, karo eshi: Aye gha vumbukire mwawafu ho gha hungumana kurudya rwaNyambi no ghana kutukumberera!

Mañando ghaNyambi

Gospel Acclamation Mtt.17:5

Difumanekero no makughero kukoye, ghoKristusi

Diywi dyaWihe dyshwaghire mudivuyi dyokusheghenya eshi: “Oyu ne yo Mwanange ghomuhakwa, yona menyamenyena. Mutegherere kukwendi.”

Difumanekero no makughero kukoye, ghoKristusi

Evangelium

Mark. 9: 2-10

Marundwerero ghoyitjanga yaMarkusi

Munyima dhomayuwa kwoko no dyofotji, gha yendire Jesusi nawaPetrusi naJakopusi naJohanesi, ha ka kare pithawo kudirundu.

Ko ghaka thitunukire kuthitunu meho thawo. Yivata yendi yarwedhimine yira makerekeshe, no ya kenine kupiterera yinu yimweya yo pamuve. Ko kuwahokokera Eliya naMosesi, gha kuvureke naJesusi. Gha ningi Petrusi kwaJesusi eshi: Muruti kuwakuno tudi. Ninge tughumbe yishashara yihatu. Thofotji thoye, thofotji thaMoesi no thimweya thaEliya. Ene mbadi gha dimukire eyi sho gha ghambe, yoyishi gha tutukwire munyima ghadiwathiki divuyi. Kokushwagha diywi mudiwiru eshi: Oyu ne yomwanange ghomuhakwa kukwendi sho mu tawe!” Kapupi kamanana kokutemaghura kwawo hakenge kokuhe, ene mbadi ha monine ghumweya shimwengwa Jesusi pithendi. Apa hashurukire kudirundu, gha wa ningire eshi hayitongora kwaghumweya eyi hana mono, oku shime mbadi ghana vumbuka mwanamunu mwawafu. Awo ne ha kwatire mañando gho mu mitjima dhawo, ne gha kwipudhurire eshi: “Nye yina kuninga kuvumbuka mwawafu?”

Mañando ghoEvangelium

THIRD SUNDAY OF LENT

Shundaha ghoghuhatu ghomakuporero

FIRST READING

Thitoya thokutanga Ex. 20:1-17

Mumbapira dhaExodusi (Mashwaghero)

Miragho kwadhitapire kwaMosesi

Ko kughamba Nyambi mañando ghomaheya ghano, no gha ningire eshi: “Yame Fumu Nyambi wenu oyu gha mu shwayithire muEgiptena mughupika.

Mbadi mwakona kukarera no haNyambi hahonawo pofotji nange.

Mbadi mwakona kukutendera yitjwandjo, ngambi kehe thighanekera tho kudhira kutenda kudiwiru ngambi thomwimi dhomuve ngambi thomumeyu thomwimi dhomuve.

Mbadi mwakona kutongamena kughutho wayo no kuyikarera temba; yoyishi yame, Fumu Nyambi ghoye Nyambi ghodifupa, oyu gharondononine yitenda yoyimango yawakerekandongo ghoye kutunderera kwawana kudira doghuhatu no dyo ghune awa ha no dhimbire. No name na fera ñeke kwawanu mayovi awa ha ni haka nowa ha kwata miragho dhange.”

Mbadi mwakona kutoyaghura dina dyaFumu Nyambi ghoye nyara-nyara, yoyishi Fumu mbo ghana humbitha munu yu mbo gha toyaghura dina dyendi nyara-nyara.

Ghuvuruke diyuwa dyoSabata no mudipongore ghukone kutenda yirughana yoye yoyihe mumayuwa kwoko no dyofotji, ene mudiyuwa dyo ghukwoko no ghuwadi edi ne dyaFumu Nyambi ghoye. No mudiyuwa di mbadi wakona kurughana, we nowanoye temba nawapikoye temba, noyimuna yoye temba, nomugenda ghoye temba oyu gha di mudikorogho dyoye. Yoyishi mumayuwa kwoko no dyofotji moghavarekire Fumu diwiru nomuve, no dikuruviya no yoyihe ghoyi yakara mo; mudiyuwa dyoghukwoko noghuwadi gho ghaturumuthire Fumu. Po gha kandadhekire Fumu diyuwa dyoSabata no gha di pongokithire.

Ghufumaneke wiho nanyoko mbo ghuwane ruviya nomoyo, ghokokuhe pamuve muditunga di gha kupire Fumu Nyambi ghoye.

Wapagha,

Watjora mayekero,

Wedha,

Waghamba yishewe kwamuyendhoye,

Warumbera ndhugho dhamuyendhoye, warumbera muna muyendhoye, ngambi hapikendi, noyimuna yendi yoyiheya.”

Mañando ghaNyambi

Responsorial Psalm

Dimbokatji Ps.18:8-11

R:

Ñando dhaFumu ne dhayara.

Ñando dhaFumu ne dhayara: No dhatapa moyo. Yihonga yaFumu ne yamakurupero: Ya tapa ghunyanyami kwawahadhira kuyitwera.

Miragho dhaFumu ne dhaneya mandambo no dhareta yishamberera.

R:

Ñando dha…

Yiraghura yaFumu yakena: No ya tapa maghano yihima yokukarera Fumu, yiwa no yatanara kuroruhe. Ethi gha ghatura Fumu ne thihunga: No kehe yu ghopapawo ne muhungami.

R:

Ñando…

Owo ne ha piterera mangondo ngambi ghukuru ghowingi wagho mangondo, ghuwa wawo kupiterera wingi, ngambi mere ghomuthindana.

SECOND READING

Thitoya Thoghuwadi 1 Kor. 1:22-25

Mumbapira dhokutanga dhaMupostoli Paghulusi kwawaka Korinte.

Hajuda haromba yitetukitho, Hahirika ne ghunya-nyami ha shana. Atwe ne Kristusi yu ha pamarerire yo tuna kuyuvitha kwawaJuda, thinu thin a thiyi nokwawamweya ne thithuta. Ene kwawa hapwa kwitha kwaNyambi, haJuda ngambi Hahirika, Kristusi ne ngcamu dhaNyambi noghunya-nyami waNyambi. Ethi thakara pakaye ghuthuta kwaNyambi ne thaghunya-nyami ghoghukuru kupiterera ghunya-nyami wawanu. No thi thakara pakaye thikashu, kwaNyambi ne thakara nongcamu dhodhikuru kupiterera ngcamu dhawanu.

Mañando ghaNyambi

Gospel Acclamation Jn.11:25.26

Makughero kukoye, ghoKristusi, Fumu ghoghuparo ghororuheya

Yame muvumbukero nomoyo, dyo ghana kughamba Fumu, oyu ghokutawa mumwange, mbadi mbo ghafa.

Makughero kukoye, ghoKristusi, Fumu ghoghuparo ghororuheya

Evangelium

Jn.2:13-25

Mrundwerero ghoyitjanga yaJohannesi

Paska wawaJuda ha henyine pepi, Jesusi naye po gha kandukire kuJerusalema. ha ka wana kwendi muTembeli ha ka kughuritha ngombe nondjwi nomakutji nawakutjindja manyinga, awa hahungumanine mo. Ko kurokosho kwendi tjupa dhomughodhi, no gha tjidhire wahe wa hakarire muTembeli, karo kemo ndjwi no ngombe. Manyinga gha wa kakutjindja gha mwayerire pamuve, no gha natadhakire matishi ghawo ha ka kughuritha makutji gha ningire eshi: “Muyitundithe mo yinu yenu! Mwatenda ndhugho dhaTate ndhugho maghurithero.” Hakathishongero wendi havurukire eyi yapwa kutjanga eshi: “Ghukoñomeka ghondhugho dhoye waninyikeka me. “Hajuda ha mu yodhonganine no gha mwiourire eshi: “No thitetukitho munye shoghutuneghedhe eshi wene wakona kutenda yinu yino? Jesusi gha wa huthire eshi: “Mudhingunune Tembeli no, no munyima dhomayuwa mahatu ne mbo na mutendurura me.” Ha ghamba haJuda eshi: “Myaka makumi mane no kwoko noghofotji hatendire Tembeli yu, owe ne yowe wakumutenda mumayuwa mahatu keho ndi?” Oyu Tembeli ne yirama yendi gha ghanekerire. Apa gha vumbikire mwawafu, hakathishongero wendi havurukire eshi, shemwa kemo ghayitutongwerire. Hatawa kwawo kuyitjanga no mañando agha gha ghambire Jesusi. Apa gha karire Jesusi muJerusalema mudifeste dyo Paska, ha tawire hanu hohengi kukwendi, yoyi hamonine yitetukitha yoyingi eyi gha tendire. Aye Jesusi thinda ne mbdi gha wa kuruperire, yoyishi wahe wa hawadimukire eshi ngepi di ha kara. No mbadi gha hakire eshi munu gha mu nongwenene yamuyendhendi, yoyishi thinda Jesusi gha dimukire yidimuka yawanu.

Mañando ghoEvangelium

FOURTH SUNDAY OF LENT

Shundaha ghoghune ghoMakuporero

FIRST READING

Thitoya thokutanga 2 Chro. 36:14-16.19-23

Mumbapira dhoghuwadi dhaChronicles

Hapristeri wahe, nombunga, ha yeyindithi waJuda, kwakuthire yitamenedhi yoyimango yodiko edi dya wakundurukedherire edi nga di tongamenenanga haNyambi hombango. Hayipitha Tembeli edhi gha torora thinda Fumu Nyambi. Eshi, Fumu Nyambi gha ku kandadhekire thinda muJerusalema. Fumu Nyambi wa wakerekandongo wagho, nga wangeranga pa kuwatumena tunda mutumi, yenda mutumi, thika di gha shanine kupungura mbunga nondhugho. Ene ha shererire hatumi waNyambi nokushamuna mañando ghendi, ha hekire haporofeta wendi, kate paghuhura gho ghupata waFumu Nyambi wayeyukire kumbunga no maghamweno mbadi gha karire po karo. Hanyathi wawo hatumekire Tembeli waFumu no kuhanyaghura po Jerusalema yomuhe, no kutumeka mbara, no kuyipitha yoyihe eyi yakarire mo. Awa ha parire mo hawatjirithire noNebukaneza kuBabiloni; oku gha kamurughanenine pofotji nawanahoka wendi kate pa, gha karire Persiya mughuFumu nongcamu. Dyo gha kumenenine mo mañando ghaNyambi agha gha ghambire kwaJeremiya, “Kate ditunga dya karire noyishamberera mudiyuwa dyoSabata, kate myaka makumi kwoko nomawadi agha mbo gha pita po, shime mbo hana di pongoranga diyuwa di dyoSabata.” Mumwaka ghokutanga waSirasi Fumu waPersiya, nga kuthanga maňando ghaFumu Nyambi agha gha ghambire kwaJeremiya, Fumu gha yeyurire mudhimu waSirasi Fumu waPesiya eshi, gha ghayaghure kumbunga no kughatapathana muditunga dyendi dyodihe: “Dyo ghana kughamba Sirasi Fumu waPesiya eshi, Nyambi, yoFumu ghodiwiru, gha nipa ghuFumu ghokaye kokahe; gha ni tuma eshi ni ka tende Tembeli muJerusalema, muJudeya. Kehe yu gha di mukatji kenu eshi naye mwana Nyambi, Fumu Nyambi gha kare nendi! Ninge gha mu yeyure.”

Mañando ghaNyambi

Responsorial Psalm

Dimbokatji Ps.136:1-6.

R:

No ninge rudimi rwange rukakatere kungaghayegho, ngo kadi wakukuvuruka.

Kumarware gha Babiloni, kotwa kahungumanine no twaka dire, apa twaka vurukire Siyoni. Kuyitondo yomuditunga di, ko

twakurekire yivandjero yetu.

R:

No ninge…

Pa ha twipurire awa ha tu pakire muñotwa eshi, na tu wembere dimbo, nawahatupethire, nawa hakakire yishamberera yetu haningire eshi mutwimbere dimbo dyaSiyoni.

R:

No ninge…

Ngepi keho shot u kone kwimba dimbo dyaFumu muditunga dyawanumaghana? Ngo na kuvuramine weJerusalema ninge di kare ghuhwere dyoko dyorudyo rwange.

R:

No ninge…

No ninge rudimi rwange rukakatere kungaghayegho, ngo kadi wakukuvuruka, no ngo mbadi wa karire weJerusalema yishamberera yange yoyikuru.

SECOND READING

Thitoya thoghuwadi Efs.2:4-10

Mumbapira dhaMupostoli Paghulusi kwawakaEfesiusi

Ene thiñeke thaNyambi, thikuru thikuma no gha tu ha ka thikuma.

Paghuhura ghoruhakitho rwendi, aye gha tu tumuna twe atwe twa fira pamurandu ghomaharwero ghetu pofotji naKristusi. Pa thiñeke po mwa parera mwe! Shemwa, mwaKristusi Jesusi twa tumukire mukufa pofotji nendi gha tu pa dyango dyomudiwiru. Eshi Nyambi mbo gha neghedhe karo manako ghokughutho, eshi ngepi ghukuru gho thiñeke thi thakara ghuhunga, ethi gha tu neghedha mwaKristusi Jesusi. Amwe, shemwa gha mu ghamwena muthiñeke pamatawero. Maghamweno gha ne mbadi ghatunda kukwenu mwathinda. Ethi ne thitapa thaNyambi. Mbadi ya tunda pamurandu ghoyirughana yenu. Yodigho, no yofotji temba ghopapenu yu ghokukona kunyamuna mbadi kemo,” Nyambi gha tu tendire thika di tudi pañanyi-ñanyi: MwaKristusi Jesusi gha tu varekire ye eshi tutape moyo kuyirughana yoyiwa, eyi gha tu pakera poye.

Mañando ghaNyambi

Gospel Acclamation Jn. 3:16

Difumanekero no makughero kukoye, ghoKristusi

Yoyishi Nyambi, gha hakire thikuma kaye pakutapa mwanendi ghopithendi. No kehe yu ghokutawa mumwendi, mbadi mbo gha yongara, ene mbo gha wane moyo roruheya.

Difumanekero no makughero kukoye, ghoKristusi

Evangelium

Jn.3:14-21

Marundwerero ghoyitjanga yaJohannesi

Jesusi gha ghambire kwaNikodemusi eshi:

“No thika digha kurekire Mosesi thoyoka mumamboreya, kemo sho gha kone kukureka naye Mwanamunu, eshi yo muhe ghokutawa mumwendi gha wane moyo ghororuheya kukwendi. Yoyishi Nyambi, gha hakire thikuma kaye pakutapa mwanendi ghopithendi.

No kehe yu gho kutawa mumwendi, mbadi mbo gha yongara ene mbo gha wane moyo ghororuheya Nyambi mbadi gha tumine mwanendi ku kupangura kaye, ene kaye kawane maghamweno mumwendi oyu gho kutawa mumwendi, mbadi mba mutetera ndhango; Ngeshi ghokudhira kutawa, kare gha pwa kutetera ndhango, yoyi mbadi gha tawa mwaMwana Nyambi ghopithendi.

Eyi yareta ndhango yino: “Thishe theyire pakaye, hanu ne hahakire thikuma makokore kupiterera thishe, yoyi yitenda yawo ya karire yimango. No yo muhe ghokutenda ghuyi, gha dhimba thishe no mbadi ghana kwiya kuthishe eshi, mana sho yi hokoke muyitenda yendi. Ene yu ghana kurughana mughushemwa, ghana kwiya kuthishe eshi yitenda yendi yihokoke thiwana no ghayirughanena mutumanithi gho kwaNyambi.”

Mañando ghoEvangelium

FIFTH SUNDAY OF LENT

Shundaha ghoghukwoko ghomakuporero

FIRST READING

Thitoya thokutanga Jer. 31:31-34

Mumbapira dhaMuporofeta Jeremiya

Mumone, mbo gha neya mayuwa, dyo ghana kughamba Fumu, eshi ame mbo na tendi ghundambo ghoghupya ghodiko dyaIsragheli no diko dyaJuda. Ghundambo ghune mbadi mbo ghu kara thika din a ghunungire nawakereka ndongo wawo, no diyuwa di nawakwatire padyoko no kuwashwayitha muditunga dyaEgiptena, ngambi kenge di ha tjorire ghundambo nange, Ame na karire no muraghuri wawo, dyo ghana kughamba Fumu.

Ene ghune ghundambo ghu nakununga munyima dhomayuwa nodiko dyaIsraeli, dyo ghana kughamba Fumu. Ame kuna kuwapa muragho dhi dha kara kare mumihidi dhawo, no hadhitjanga mumitjima dhawo. Ame mbona kara Nyambi wawo, nawo mbo hana kara hakadiko dyange. Nawo mbadi mb ha honga kehe yu muyendhendi, no kehe yu mwapendi ghuninga eshi, gha dimuke Fumu; yoyishi mbo hana nidimuka waheya, mwanuke ngambi mukuru gho pakatji kawo. Dyo ghana kughamba Fumu. Yoyishi ame mbona wa thigherera ngambi ghuyi wawo, no mbadi mbo ni vuruka shime maharwero ghawo.

Mañando ghaNyambi

Responsorial Psalm

Dimbokatji Ps.51:3-4. 12-15

R:

Nipe mutjima ghoghukushuki ghoNyambi.

Gha ningire eshi, ghuni fereñeke Nyambi, popaghukuru gho ghunongo ghoye, dhimithe murandu dhange muthiñeke thoye thothikuru! Ghuni kushukithe kumaharwero, gho ghuyoye ghuyi wange.

R:

Nipe mutjima…

Nipe mutjima ghoghukushuki ghoNyambi, tendurure mudhimu wange no ghuni tanarithe. Wa ni thindeka kughutho ghoye, no wa ni tunditha Mupepo ghoye ghoKupongoka! Niwanithe karo yishamberera yoyu gha shutukire papoye

R:

Nipe mutjima…

Ho ninge ni kukarere karo na makutapero ghokukoye. Ndani po nihonga hayiharuri, eyi wa taterera we kwamunu, eshi hakamaharwero, mbo ha piruke kukoye.

SECOND READING

Thitoya thoghuwadi Heb. 5:7-9

Mumbapira kwawaHeburayi

Mumoyo wendi ghoghuhe gho pakaye, ghakutupurire kwaNyambi yu gha mu tumunine mwawafu, aye gha kuhemene kwaNyambi mumandapero no mundupu no kukuyerera thikuma no maruhodhi.

No mandapero ghendi ha gha mu yuvire, pamurandu gho kukutapa thinda kwaNyambi.

Ngambi kenge dig ha karire eshi mwana, gha ku hongire ghutawedhi payinyanda yendi thinda. Apa gha yi kumithire mo, gho gha karire divetu-vetu dyoruviya kwawa hakarire ghutawedhi kukwendi.

Mañando ghaNyambi

Gospel Acclamation Jn.12:26

Difumanekero kukoye, ghoKristusi, yowe Ñando dhaNyambi

Ngeshi gha himi ghumweya kunikarera, gha ni kuthe, dyo ghana kughamba Fumu. Kehe kunidi, mupikange ko sho ghakakare naye.

Difumanekero kukoye, ghoKristusi, yowe Ñando dhaNyambi

Evangelium Jn. 12:20-33

Marundwerero ghoyitjanga yaJohannesi

Mukatji kwawaheyire kudifeste, mwakarire karo Hahirika hamweya awa heyire kukukanderera. Awo ha yendire kwaFilipusi oyu gha tundire muBesayida gho muGalileya ha ka mwipure eshi: “Mukadikuto, tunahaka shemwa kumona Jesusi.” Filipusi Ko kuyenda gha kayitongwere Andriyasi naFilipusi gha ka yimutongwerire Jesusi. Po ghawatongwerire Jesusi eshi: “Dhineya nako edhi shakutekere mwanamunu. Shemwa nakumutongwera: “Ngeshi kadi wakuwera dinona dyotumbi mumuve dishifu dina kukara dyofotji vene. Ene ngeshi gha di fu, dina kureta mukesho ghoghukuru. Mukakuhaka moyo wendi, mbo ghuna yongara, ene yu gho kudhimba moyo wendi pakaye kano, mbo ghuna pu kughunguvura kumoyo ghororuheya. Ngeshi gha himi ghumweya kunikarera gha ni kuthe. No ku ni di me, ko sho gha kare mupikange. Karo kemo ngeshi gha ni karera ghumweya mbo ghana mu kutekera Tate. Ñanyi-ñanyi, na ndundumena thikuma.” Yinye ne sho ni ghambe? Ni ghambe eshi, tate ni ghamwene muvire dhino ndi? Ene shemwa yo negherire muviri dhino. Tate kutekere dina dyoye!” Ko kushwagha diywi muwiru eshi: “Ame na kutekera dina dyange, no mbo na dikutekera.” Hanu wa hemanine po hayiyuvire no ha ningire eshi, mudikitero vene. Hamweya eshi: “Muengeli ghana kughambaghura nendi.” Ha ningi Jesusi eshi: “Diywi di mbadi dina shwayera mudina dyange, ene mudina dyenu. Ñanyi-ñanyi dhineya nako dho kupangura kaye kano. Shokuru ghokaye kano kuna kumuthindekera panunda. Ene ngeshi gha ni yeyura me pano pamuve, na kukokerera waheya kukwange.” Eyi gha yi ghamberire yi, kukudimukitha eshi yifa munye mbo yi mu dya.

Mañando ghoEvangelium

HOLY WEEK - Thivike thokupongoka

THE PASSION OF OUR LORD JESUSI CHRIST

PASSION SUNDAY (Palm Sunday)

Shundaha gho makindhu

Evangelium

Mark. 11:1-10

Marundwerero ghoyitjanga yaMarkusi

Kughutho ghokukokera kuJerusalema, kokukuma kwendi kuthiko thaBetfage naBetaniya kuDirundu dyoNdhwe. Ha tumu hakathishongero wendi hawadi no kuwatongwera eshi: “Muyende kudighumbo niya dina mutamba; Apa sho mu kengene mo ñanyi mukawane thidongighana thokufungerera. Mukathishuture ko, Ho mukathirete. Ngeshi gha ka mwipure ghumweya eshi, nye muna kutendera kemo, mukamuhuthe eshi: ‘Hekudyetu ghana thinyanda no ñanyi gha kathihuthe wangu.’ Nawo hayendire no hawanine thidongighana, ethi hana fungerera pathero dhodighumbo, no gha thishuturire. Kokuninga hamweya wa hemanine po eshi: “Nye mu na kushutwera thidongi thi?” Awo ghawahuthire thika di ghawarawerire Jesusi. Ko kuwathiya hakayende kokureta thidongighana kwaJesusi no gha yarire po myaye dhawo, hadhini po kwendi hanu hohengi hayarire myaye dhawo mudhira hamweya hatetire mite dhoyitondo no kudhiyara mudhira. Hakakupiterera no hakanyima hashogherere eshi: “Hosana! Gha fumane oyu ghana kwiya mudina dyange! Ghufumane ghuFumu waNyambi, oghu ghuna kwiya mudina dyaHekudyetu, ghuFumu wa Wihetu Davita! Hosanna mumawiru!”

Mañando ghoEvangelium

Padimisa

FIRST READING

Thitoya thokutanga. Jes.50:4-7

Mumbapira dhaMuporofeta Jesaya

Mbadi na korekire rupara rwange kuyitokota, na dimuka eshi mbadi mbo ni fa honyi.

Fumu ghomuraghuri gha ni tongwerire eyi sho ni ghambe, eshi ni kone kutanaritha yipara yange. Nga ni pindukanga kehe mathikuthiku eshi ni yuve eyi sho gha ni tongwere. Nyambi ne gha yandhurire Matwi ghange mbadi na kanunithire no mbadi na tundire kukwendi. Na tapire mughongo wange kwawakakunipumura no na tapire matama ghange kwawakakuteta ghuhuki. No mbadi na shingire ha ka kunishwahura no kunithipera mate murupara. Yoyi Nyambi ghoFumu ne ghana kunivatera; yo na kudhira kuwana dihudhi yodigho na tenda rupara rwange yira thitina no na dimuka eshi mbadi mbo ni fa honyi.

Mañando ghaNyambi

Responsorial Psalm

Dimbokatji Ps 22 8-9;18° 19-20;23-24

R:

Nyambi wange, Nyambi wange nye ghuna ni mwagherera?

Wahe wa hana kunimona, hana kunisherera; hana kundjumbura miromo no kupungapunga mutwi ghuninga shi yi tape mwaFumu!

Gha mu ghamwene gha mu shuture: Gha mu menyamenyena sha!

R:

Nyambi wange...

Mbunga dhoyitenda yoyi dhina ni dhingi yira mbwa dhi dhina ni dhingi. Yishokora yange ne kukona kuyimona.

R:

Nyambi wange...

Hana kutapera yitere yange no hana pepera po fungufungu.

R:

Nyambi wange...

Hekudyange, wa ni yakunuka! Wiye tambuke no ni ghamwene.

Ñanyi na kuthimwetwedhe yitenda yoye kwawapange.

Amwe mwa yapa Fumu mu mu fumaneke! Hanahoka wahe haJakopu mu mu fumaneke!

SECOND READING

Thitoya thoghuwadi Fp.2:6-11 Mumbapira dhaMupostoli Paghulusi kwawakaFilipi

Gha kumbirupitha thinda yo gha mu kutekera Nyambi.

Oyu gha karire muthishwi thaNyambi, yipara yendi ya rikanyine kwaNyambi, ene mbadi gha kupambekire kughuNyambi. Aye, gha kumbirupithire apa gha karire muthishwi thoghupika no gha karire munu vene. No apa hahokokire munu thinda gha kumbirupithire pakukara ghutawedhi kate kukufa, kemo, kufa kwapathikurushe. Yodigho Nyambi gha mu kutekerire karo thikuma no gha mu tire dina dyokupiterera mena ghomahe, eshi mudina dyaJesusi yomuhe ghomudiwiru no ghopamuve gha kuvame manwi, no kehe rudimi runongonone eshi: “Jesusi Kristusi ne Fumu!” Kudifumanekero dyaNyambi Wihe.

Mañando ghaNyambi

Gospel Acclamation Filip.2:8-9

Makughero kukoye, ghoKristusi, Fumu ghodifumanekero dyo kuroruheya

Kristusi ghakumbirupithire thinda pakutambura yifa, yifa yopakuthikurushe, podigho gha mukutekerire Nyambi no kumupa dina dyokupiterera mena ghomahe.

Makughero kukoye, ghoKristusi, Fumu ghodifumanekero dyo kuroruheya

Evangelium

Mark. 14:1-15:47

Matungekero ghomurarero Markusi.

N Kwa thigharire mayuwa mawadi kughutho ghomembero ghoPaska no dyomaghuroto ghothuthuñunyi. Haparisteri hohakuru nawakamukwaro, hashanine eshi ha mu kwate no ha mu paye Jesusi. Ene gha ningire eshi:

C “Kadi mudifeste, mana sho gha karepo memañanyeno mwaMwanamunu.”

N Apa gha karire Jesusi muBetaniya, mundhugho dhaSimoni ghomukayiñondwe kuthidyero, heya mukamadi no kawero komaghadhi ghothiwe mwene. Ko kuvukura kwendi kawero no gha terire pamutwi waJesusi. No hamweya hayitokotire no haningire eshi:

C “Pashanye ghana mwayerera maghadhi gha kemo? Yoyishi maghadhi gha ngo ghana piti manyinga mathero mahatu. No manyinga gha, hasha ngo ghakutapera hahepwe.”

N Ko kutanga kwawa kuhendadhana mukamadi yu. Jesusi ne gha huthire eshi:

J “Mu mu thiye! Nye muna kumutokomenena? Aye ne ghana tendi thitenda thothiwa kukwange. Yoyishi hahepwe ha kara roruhe nenu, oku munahimi , mwakona kuwaghamwena. Ame ne mbadi na kara nenu roruheya. Oyu ghana tendi ethi tharikanya pangcamu dhendi, yo ghana tanga kuwetha kuwetha yirama yange kumuvumbukero wange. Yashemwa na kumutongwera eshi, Kokuhe oku mba yaghura mbudhi dhino mbo ghana ghamba karo eyi gha tendire no kumuvuruka. Munyima dho kengeyo,

N Judasi Iskaliyoti, ghumweya gho pawa shadikumi no hawadi gha yendire kwawaPristeri hohakuru eshi ha ka mu hokore Jesusi kukwawo. Apa ha yi yuvire yi, hashambererire thikuma no hakuyongire eshi ha mu pe manyinga naye gha shana nako mwene dho kumuhokora. Mu diyuwa dyokutanga dyomaghuroto ghothuthuňunyi, omu ha paghangire ndjwighana ghoPaska, hamwira hakathishongero wendi eshi:

C “Kudyango munye ghunahimi oku shotukakuroyithere murarero?”

N Ko kutuma kwendi hakathishongero wendi hawadi eshi:

J “Muyende mudighumbo, muna kawana munu, oyu ghana tengena kandimbe ko meyu, gho mukamukuthe.” Momuhe omu sho gha kengene, mukepura thinda shandhugho eshi: ‘Muhongi wetu ghana kwipura eshi: Kupi sho gha dyere murarero nawakathishongero wendi?’ Ghana kamuneghedha ngonda dhokuwiru edhi dhapwa kuroyitha. Mo sho mu ka tende mwara wetu”

N Hakathishongero ha yendire mudighumbo no ha wanine yoyihe thika kenge gha yiwatongerire kokayareka kwawo murarero ghoPaska parunguro ko kwiya kwendi nawashadikumi nohawadi. Oku shime gha karera mukudya, ko kuninga Jesusi eshi: “

J Shemwa na kumutongwera eshi, yofotji gho pa penu ghana kunihokora oyu ghana kudya nange.”

N Awo ne ha tangire kundundumena no hamwipurire ghofotji ghofotji eshi:

O “Yame ndi?” Ghumweya naye paya eshi: “ Ngwa yame?”

N Aye gha wa huthire eshi:

J “Yofotji ghopapenu mwashadikumi nohawadi, oyu na kuverera nendi mukaronga. Mwana munu ghana kuyenda thika di ghayimutjangera; ene mawe kwamunu yu, ghana muhokora! Ghuhunga ne, ngo mbadi gha pwire kushamuruka.”

N Shime gha karera mukudya kokudhamuna Jesusi ghurorto, gha tumera kwaNyambi, haghuyondora no kughutapa kukwawo ghuninga eshi:

J “Mutumbure, mudye, eyi ne yirama yange.”

N Karo kemo gha tumburire thinwitho, ha tumera no kuthita pa kukwawo, nawo ha nwine mo wahe. Hawatongwera eshi: “

J Gho manyinga ghange gha, manyinga gho ghundambo gho ghupya. Agha mbo gha ndendeshera kwawanu hohengi. Shemwa na kumutongwera eshi, mbadi mbo ninwa karo mbuyo dhothitondo thovinyu, kate mudiyuwa di mbo ni kakuma mughuFumu waNyambi. Po mbo ni kanwa ko mughuhingo gho ghupya.”

N Apa ha manine kwimba dimbo dyo makuyero, hashwayire no ha yendire kudirundu dyondhwe. Mudhira gha ghambire Jesusi kukwawo eshi:

J “Mughuthiku ghuno, mwaheya muna kunimwagha.” Yoyi yapwa kutjanga eshi: ‘Na kushinya mudithi nondjwi dhina kukuharanganya.’ Ene munyima dho kuvumbuka kwange, mbo na mupiterera kuGalileya.”

N Petrusi ghavurumukire kuninga eshi:

O “Ngambi ngo ha kumwaye wahe, ame ne mbadi sho ni kumwaye:”

N Jesusi gha mu huthire eshi: “

J Shemwa na kumutongwera eshi, mughuthiku ghuno, kughutho ghokwiya ngondovoro paruwadi, ghuna kunihamura paruhatu.”

N Ene Petrusi gha thundire eshi:

O “Ngambi gha ni fu noye, mbadi na kona kukuhamura!”

N Nawaheya ha ghambire kemo. Munyima ha kumine kudyango edi ha tire eshi Getsemani. Ha ningi kwawakathishongero wendi eshi:

J “Mu hungumane mwe pano, tango niyende me, ni karapere.”

N Gha shimbi kwendi ha Petrusi naJakopusi naJohanesi. Aye ne ko kutanga kundundumena no kutoka. Ha ghamba kukwawo eshi:

J “Mudhimu wange ghuna kasha yira nife; Mukare mwe pano no murawe!”

N Apa gha henyine kamanana, kokufurumana kwendi pamuve no gha raperire eshi: “Ngo ghuhunga, ngo dhimu keruke nako dhi.” No gha kuhemine eshi:

J “Tate, yoyihe kukoye ne yiredhu tundithe thinwitho thi thoyinyanda papange; ene kadi thika di na himi me, shimwengwa pamahimeno ghoye.”

N Ko kuhuka kwendi kawawana ne muturo. Ho ha ningire kwaPetrusi eshi:

J “Simoni, ghuna rara ndi? Mbadi wa kona kurawa viri dhofotji ndi? Murawe no murapere mana sho muwere mumayerekero. Yihima ne koyidi, yirama ne yina kasha.”

N Jesusi gha yendire ko karo no ghakahukurukire ndapero dhendi. Apa gha kahukire karo kukwawo, gha wa wanine karo hana rara; yoyi meho ghawo gharemwenine, no gha pirire noňumbu kukwendi. Ha kahuka roghuhatu kukwawo no gha wa tongwerire eshi:

J “Murare ngenyu no muturumuthe. Yina rikanya; nako ne dhineya. Mu mone eshi, Mwanamunu kutapa hana kumuta pa mumoko gha wañore. Mwimane tuyende, munyathi pepi gha di.”

N Oku shime gha ghamba, ko kwiya Judasi ghopawa shadikumi nohawadi. Nendi dyeyire dikuta dyawarume edi ha tumine haPristeri hohakuru nawakamarukwaro nawamayami noyimende yawo nomamburo ghawo. Mukakumuhokora ne gha wa dimukithire eshi:

O “Oyu sho nincumite, yo sho mukwate no mwamuthiyerera:”

N Ko kuhenya Judasi kukwendi no kumurumeritha ghu ncumita eshi:

O “Ghurumere muhongi:”

N Ha mu mbandukera kwawo ha mu kwate. Yofotji gho pawendi gha shwamunine thimende thendi no kukeshura ditwi dyamupika muPristeri shokuru. Jesusi gha ghambire kumbunga eshi:

J “Amwe muneya kukunikwata noyimende yenu no miramu dhenu yira no shondoro me ndi? Kehe diyuwa na karire nenu muTembeli mukumuhonga. Ene mbadi mwanikwatire. Kemo, yirikanye eyi ya pwire kutjanga.”

N Popo kokumuthigha hakathishongero wahe hatjire. No mungaghu ghumweya gha kukavire mwaye gha kuthe Jesusi. Naye momuhamukwate. Ko kupothora kwendi, gha thighe mwaye mumoko ghawo, no kutjira thiheha. Ha mutwara Jesusi kundhuwo dhawa Pristeri shokuru omu hakukongwedhire haPristeri wahe nawamayami nawakamarukwaro. Naye Petrusi gha mu kuthire kate kukuma mumarombe gha mu Pristeri shokuru. Ho hahungumanine pofotji nawapika hayote. Hapristeri hohakru nawakadhango wahe hashanine thinongonona eshi ha mu paye Jesusi, ene mbadi ha thiwanine hengi ha nongononine mbango kukwendi, yo ha kutjakerire ha tunonga hamweya hemaňanyine ghu ghamba eshi:

C “Twa muyuvire apa gha ningire eshi: ‘Mbo na dhingununa Tembeli yu ha tendire nonyara. No munyima dhomayuwa mahatu mbo ghana shokeka ghumweya gho kudhira kutenda nonyara dhawanu.”’

N Ene ngambi pa kunongonona kemo, ha kutjakire. Ko kwimana muPristeri shokuru mukatji kawo, hepura Jesusi eshi:

O “Mbadi ghuna hutha we thinu ndi? Nye hana kunongonona wahanu yo kukoye?”

N Aye ne gha karire pore no mahuthero temba. Karo ghamwipura muPristeri shokuru eshi:

O “Yowe Kristusi ghomwana Nyambi ghokufumana thikuma ndi?”

N Jesusi gha huthire eshi:

J “Yame vene. Namwe mwahe mbo muna mono mwanamunu ghana hungumana kurudyo rwaNyambi gho mukangcamu, no po mbo gheya no mavuyi ghodiwiru.”

N Ko kupayaghura muPristeri shokuru thivata thendi ghuninga eshi:

O “Nye sho tu shanene karo hatunonga! Mu na yuvu mwathinda mashamweno ghokwaNyambi; Nye keho muna kughayarera mwe?”

N No waheya ha mu teterire ndhango eshi: “Murandu wendi, murandu ghokumu dya!” Hamweya hatangire kumuthipera mate no kufikerera rupara rwendi nokumupura nomakonye ghuninga eshi:

C “Pumbe!”

N Hapika ne pakumurambura no tutondo. Oku shime gha karera Petrusi mumarombe, ko kupita mukathipika wamuPristeri shokuru. Apa gha monine Petrusi oku ghana kukukangura gha mu rondonona ghuninga eshi:

O “Nowe karo wakarire naJesusi gho mukaNasareti.”

N Aye ne gha kananine eshi:

O “Mbadi na yidimuka no kutjathana temba eshi nye ghuna kughamba.”

N Ko kushwagha kwendi pambadha. Popo vene ko kwiya ngondovoro. Apa gha mu monine karo yu mukamadi, ko kughamba kwendi kwawahemanine po eshi:

O “Oyu ne ghumweya gho papawo.”

N Petrusi gha mu huthire karo. Kapupi kamanana ha ghamba kwawa hemanine po kwaPetrusi eshi:

C “Shemwa, owe ne gho wendi. Mbadi wakona kukanana. Nowe ghomukaGalileya!”

N Ko kutanga kwendi kututuma nokwedha kwendi eshi:

O “Munu yo muna kughamba ne, mbadi na mudimuka me!”

N Ngondovoro ko kwiya paruwadi; Petrusi gha vuruka mañando agha gha ghambire kukwendi eshi: “Kughutho ghokwiya ngondovoro paruwadi, ghuna kuni hamura ruhatu.” Ko kudira kwendi thikuma.

Murughura kokuyuva haPristeri hohakuru nawamayami nawakamarukwaro. Ko kumughanga kwawo Jesusi, ha mu tware no kumutapa kwaPilatusi. Pilatusi ghamwipurire eshi:

O “Yowe Fumu wawaJuda ndi?”

N Ha mu hutha kwendi eshi:

J “Ghuna yighamba.”

N No haPristeri hohakuru ha mu runderire yoyingi thikuma. Pilatusi ne gha mwipura karo eshi:

O “Mbadi ghuna kuhutha ndi? Mone kuyinongonona yoyingi eyi hana kukuretera.”

N Jesusi ne noñumbu temba, kate kutetuka naye Pilatusi. Mudiyuwa dyoPaska gha karire no muragho gho kushutura mukañotwa, oyu hana kumbera. Ene pa gha karire Barnabasi mudorongo pofotji nawayendhendi, awa ha payire munu muyishatana yawo. No mbunga dhakugherire nodhakumberire eshi, gha wa tendere thika di ya kara roruhe. Pilatusi gha huthire eshi:

O “Nimushuture Fumu wa waJuda ndi?”

N Yoyi gha dikukire eshi, haPristeri hohakuru ne munya hana mutapera. No haPristeri hohakuru ha tjokedhire mbunga eshi, ghuhanga ne ghawashutwere Barnabasi.Ha wahutha karo Pilatusi eshi:

O “Nye sho ni tende, no yu muna toyo eshi, Fumu waWajuda?”

N Ko kukushomonona kwawo eshi:

C “Mu mupamarere kuthikurushe!”

N Pilatusi gha wepura eshi:

O “Yishinya munye gha shinya?”

N Awo hakushomononine karo eshi:

C “Mu mupamarere kuthikurushe!”

N Yoyishi Pilatusi gha shanine kurikanyithera mbunga yihima yadho, gha wa shutwera Barnabasi; no pa gha manine kumwashura Jesusi gha mu tapa kwendi gha mu pamarere Hamashurundate ko kumutwara kwawo kumarombe gha mu panguri ghoditunga, no ha kongwedhire mbunga dhawayedhagho. Ko kumukava kwawo mwaye ghoghukihu no kudhinga ñata dhomighunga ha dhimukureke. Ha mu furumekire eshi:

C “Ghu rumere Fumu wa Wajuda!”

N Ko kumumwashura kwawo no kambu mumutwi no kumuthipera mate no kutongamena kughutho wendi, ghu mukumadheka. Apa ha manine kumusherera kemo, ha mu shuturire mwaye wendi no kumuvateka yivata yendi. Ko kuthindadheka ha mu tware kudyango dyokumupayera ko kuhangana kwawo munu ghodina dyo Simoni gho mukaSirene, wiha wawaAlesanderi naRufusi, oku ghana katunda kumapya. Yo ha thinekire eshi ha mu yakure thikurushe. Oku hana kumutwara kudyanga dyaGolgota, kuninga eshi dyango dyotuteneghere. Ha mu pa kwawo vinyu gho kuvunga no ghungongwera eshi gha nwe. Ene mbadi gha yinwine. Apa ha manine kumupamarera, ko kukutapera yivate yendi, ha tendere po fungu-fungu eshi, yingatji sho gha wane kehe yu. Omu ne munako dhoviri dho ghuhatu, apa ha mu pamarerire. No thitjanga thokumukumadhekitha thaninga ngeno eshi: Fumu waWajuda. Nendi ha pwire kupamarera karo haringi-ringi hawadi, yofotji kurudyo no ghumweya kurumoho. Kemo yapwa ku rikanyitha yipumba eyi ya ninga eshi: “Aye gha pwa kupangwera kwaringi-ringi.” Harupita ndhira ha mu shererire no ghu punga-punga mutwi dhawo eshi:

C “Ha! Yowe gho kudhingununa Tembeli no kumutenda mayuwa mahatu, kughamwene ghothinda ho ghu shurukeko kuthikurushe!”

N Hapristeri nawakamarukwaro nawo karo ha mu shererire eshi:

C “Hawo nawo hana mughamwenange, thinda ne kadi wakukughamwena. Gha shuruke keho Kristusi ghoFumu waIsraeli kuthikurushe eshi, tu yi mone no tu tawe!”

N Karo nawa hapwire kupamarera nendi ha mu shamaghurire. Apa dha rikanyine viri dho ghukwoko noyofotji ha di kara dikokore kate kunako dhoviri dho ghukwoko no ghune. Muviri dhi dhoghukwoko no ghune hakuyerera Jesusi no diywi dyo dikuru eshi:

J “Eloi, Eloi lama sabachtani?”

N Kuninga eshi, “Nyambi wange, Nyambi wange, nye ghuna ni mwayera kemo?” Hamweya awa hemanine po, hayuvire no ha ningire eshi:

C “Muyuve, Eliya ghana kwitha.”

N Ko kutjira ghumweya ghakatjavangedhe ncokwe mumasheshe no kudhikureka kukambu gha mu poporithe ko kuninga eshi:

O “Tango tu yi mone eshi, ngeshi ghana kwitha Eliya ghamwambureko.”

N Ene Jesusi gha kuyerire no diywi dyodikuru thikuma no gha hurangedhire moyo.

N No dihina dyongonda dyoTembeli dya yatukire kutunda kuwiry kate pamuve. Apa gha yi monine nduna waWamashurundate, oyu ghe manine kughutho ghothikurushe oku ghana kukuyerera Jesusi no kuhurangedha moyo wendi, ha ningi eshi:

O “Shemwa, murume yu gha karire mwana Nyambi.”

N Pa karire karo hakamadi awa hemanine ko kayenda no ha yi monine. Mukatji kawo ha karire mo haMaria Magdalena naSalome naMaria gho nyina wa waJakopusighana naJosese. Awa ha mu kuthire no kumukarera muGalileya, no hakamadi hamweya awa ha mu kuthire kuJerusalema. Parunguro rodiyuwa di ne dya kuroyitha yo kughutho ghoSabata. Heya mukandhango ghodikuto Josefu ghomukaArimateya, oyu gha tatererire naye ghuFumu waNyambi. Gha yendire kwaPilatusi gha ka yereke kukumbera mwimba waJesusi. NaPilatusi gha tetukire eshi kare nga fu; hetha kwendi nduna waWamashurundate no kumwipura eshi, kare-kare nga fu ndi? Apa gha yi yuvire yi kwanduna, ko kutapa kwendi mwimba kwaJosefu. Ko kughura kwendi mahina, hamwambura kuthikurushe no kumudhinga mumahina ha mu vumbeka mumbira dhomawe ghokushoka. Ko ku gharumuna kuthero diwe dyo kuyandheritha. Ene Maria magdalena naMria gho nyina Josese, ha monine eshi, kupi hana mu paka.

---------------------------------------------------------------------------------

(Shorter form.)

THE PASSION OF OUR LORD JESUSI CHRIST ACCORDING TO Mark.

Evangelium

Mark.15:1-39

Marundwerero ghoyitjanga yaMarkusi.

Murughura kokuyuva haPristeri hohakuru nawamayami nawakamarukwaro. Ko kumughanga kwawo Jesusi, ha mu tware no kumutapa kwaPilatusi. Pilatusi ghamwipurire eshi: “Yowe Fumu wawaJuda ndi?” Ha mu hutha kwendi eshi: “ Ghuna yighamba.” No haPristeri hohakuru ha mu runderire yoyingi thikuma. Pilatusi ne gha mwipura karo eshi: “Mbadi ghuna kuhutha ndi? Mone kuyinongonona yoyingi eyi hana kukuretera.”

Jesusi ne noñumbu temba, kate kutetuka naye Pilatusi. Mudiyuwa dyoPaska gha karire no muragho gho kushutura mukañotwa, oyu hana kumbera. Ene pa gha karire Barnabasi mudorongo pofotji nawayendhendi, awa ha payire munu muyishatana yawo. No mbunga dhakugherire nodhakumberire eshi, gha wa tendere thika di ya kara roruhe. Pilatusi gha huthire eshi: “Nimushuture Fumu wa waJuda ndi? Yoyi gha dikukire eshi, haPristeri hohakuru ne munya hana mutapera. No haPristeri hohakuru ha tjokedhire mbunga eshi, ghuhanga ne ghawashutwere Barnabasi.Ha wahutha karo Pilatusi eshi: “Nye sho ni tende, no yu muna toyo eshi, Fumu waWajuda?”

Ko kukushomonona kwawo eshi: “Mu mupamarere kuthikurushe!”

Pilatusi gha wepura eshi: “Yishinya munye gha shinya?”Awo hakushomononine karo eshi: “Mu mupamarere kuthikurushe!” Yoyishi Pilatusi gha shanine kurikanyithera mbunga yihima yadho, gha wa shutwera Barnabasi; no pa gha manine kumwashura Jesusi gha mu tapa kwendi gha mu pamarere Hamashurundate ko kumutwara kwawo kumarombe gha mu panguri ghoditunga, no ha kongwedhire mbunga dhawayedhagho. Ko kumukava kwawo mwaye ghoghukihu no kudhinga ñata dhomighunga ha dhimukureke. Ha mu furumekire eshi: “Ghu rumere Fumu wa Wajuda!”

Ko kumumwashura kwawo no kambu mumutwi no kumuthipera mate no kutongamena kughutho wendi, ghu mukumadheka. Apa ha manine kumusherera kemo, ha mu shuturire mwaye wendi no kumuvateka yivata yendi. Ko kuthindadheka ha mu tware kudyango dyokumupayera ko kuhangana kwawo munu ghodina dyo Simoni gho mukaSirene, wiha wawaAlesanderi naRufusi, oku ghana katunda kumapya. Yo ha thinekire eshi ha mu yakure thikurushe. Oku hana kumutwara kudyanga dyaGolgota, kuninga eshi dyango dyotuteneghere. Ha mu pa kwawo vinyu gho kuvunga no ghungongwera eshi gha nwe. Ene mbadi gha yinwine. Apa ha manine kumupamarera, ko kukutapera yivate yendi, ha tendere po fungu-fungu eshi, yingatji sho gha wane kehe yu. Omu ne munako dhoviri dho ghuhatu, apa ha mu pamarerire. No thitjanga thokumukumadhekitha thaninga ngeno eshi: Fumu waWajuda. Nendi ha pwire kupamarera karo haringi-ringi hawadi, yofotji kurudyo no ghumweya kurumoho. Kemo yapwa ku rikanyitha yipumba eyi ya ninga eshi: “Aye gha pwa kupangwera kwaringi-ringi.” Harupita ndhira ha mu shererire no ghu punga-punga mutwi dhawo eshi: “Ha! Yowe gho kudhingununa Tembeli no kumutenda mayuwa mahatu, kughamwene ghothinda ho ghu shurukeko kuthikurushe!”

Hapristeri nawakamarukwaro nawo karo ha mu shererire eshi: “Hawo nawo hana mughamwenange, thinda ne kadi wakukughamwena. Gha shuruke keho Kristusi ghoFumu waIsraeli kuthikurushe eshi, tu yi mone no tu tawe!”

Karo nawa hapwire kupamarera nendi ha mu shamaghurire. Apa dha rikanyine viri dho ghukwoko noyofotji ha di kara dikokore kate kunako dhoviri dho ghukwoko no ghune. Muviri dhi dhoghukwoko no ghune hakuyerera Jesusi no diywi dyo dikuru eshi: “Eloi, eloi lama sabachtani?”

Kuninga eshi, “Nyambi wange, Nyambi wange, nye ghuna ni mwayera kemo?” Hamweya awa hemanine po, hayuvire no ha ningire eshi: “Muyuve, Eliya ghana kwitha.”

Ko kutjira ghumweya ghakatjavangedhe ncokwe mumasheshe no kudhikureka kukambu gha mu poporithe ko kuninga eshi: “Tango tu yi mone eshi, ngeshi ghana kwitha Eliya ghamwambureko.”

Ene Jesusi gha kuyerire no diywi dyodikuru thikuma no gha hurangedhire moyo.

No dihina dyongonda dyoTembeli dya yatukire kutunda kuwiru kate pamuve. Apa gha yi monine nduna waWamashurundate, oyu ghe manine kughutho ghothikurushe oku ghana kukuyerera Jesusi no kuhurangedha moyo wendi, ha ningi eshi: “Shemwa, murume yu gha karire mwana Nyambi.”

Mañando ghoEvangelium

HOLY THURSDAY: CHRISM MASS

Ghune muthivike thokupongoka

Dimisa dyomawethero ghomaghadhi

SECOND READING

Thitoya thokutannga Jes.61:1-3. 6. 8-9

Mumbapira dha muporofeta Jesaya.

Nyambi ne gha ni wethire no gha ni tumine nitware mbudhi dhoyishamberera kwawahepwe, no kuwapa maghadhi ghokupongoka.

Mupepo waNyambi ne nange ghu di, yoyishi Fumu gha ni wethire ni rete mbudhi dhoyishamberera kwawahepwe. Gha ni tumine mukupakerera mitjima dhawakamadovo, mu kuretera mashutwero gha hakadorongo no kuroghithera hakaňotwa dhira.

Mu kwato mwaka gho yu gha menyamenyena Fumu nodiyuwa dyonyinya dyaNyambi wetu, mu kuhengaghure hakayitokota.

Mu kufundwera hakayitokota homuSioni eshi mbana wana mawethero ghomututwi. Ene mwe mbana mu ti haruti waFumu, kukwenu mbo hana mutoyo eshi, mwapika Nyambi! Na shwena kukara ghundambo nawashondoro hoyitenda yoyimango.

Nawakerekandongo nawo mbana wa dimuka mako nowanahoka mumako ghomahe wahe awa hana kunamona, eshi diko dyaFumu Nyambi dyokupwa kukandadheka.

Mañando ghaNyambi

Responsorial Psalm

Dimbokatji Ps. 89: 21-22; 25-27

R:

GhoFumu na himi kwimba ghunongo ghoye kuroruheya.

Na wanine mupika Davita oyu gha karire nange gho na mu wethire maghadhi ghoKupongoka.

Hanyathi mbadi mba mukona, hakakudhira kutawa mwaNyambi mbadi mba mu witha.

R:

GhoFumu...

Makurupero ghange noghunongo wange mbo yina kara nendi, no dina dyange, mbo dhina yeyuka nyiha dhendi.

Aye ne yodighe yombo gha ni toya eshi: ‘Yowe Tate Nyambi wange, diwe dyomakomweneno ghange.’

SECOND READING

Thitoya thoghuwadi Yih.1:5-8

Mumbapira dhaYihokora

Gha tu tenderire haruti nawaFumu waNyambi.

Thiñeke no thiraro dhaJesusi Kristusi mushupi ghoshemwa ghowa havumbuka mwawafu. Aye karo ne yomuraghuri ghoFumu wawakapamuve.

Jesusi Kristusi gha tu haka yo gha tu komonona nomanyinga ghendi kumaharwero ghetu pakutufera. Aye gha tu ninga eshi tu kare ghuFumu nawaPristeri, tu karere Nyambi Wihe. Difumanekero nogcamu yi kare ya Jesusi Kristusi kuroruhe nororuheya! Amen. Mu mone aye mbo gha neya mumavuyi. Waheya mbo hana mu mono nawa ha ku horeka mbana mu mono. Mako ghomahe ghopakaye mbana mudiri Amen. Ame yame Omega matangero nomahurero, dyo ghana kuninga Fumu Nyambi, Oyu gha di po noyu ghakarire po noyu mbo gheya mungcamu dhodhihe

Mañando ghaNyambi

Gospel Acclamation Jes. 61: 1( Luk 4:18)

Makughero kukoye, ghoKristusi, Fumu ghodifumanekero dyokuroruheya

Yoyishi aye gha ni wetha ni yuvithe hahepwe mbudhi dhodhiwa.

Gha ni tuma eshi nitongwere hakañotwa mashutwero, no ni monithe hakunga ho ni pake mundjewa-ndjewa hakakutokota.

Makughero kukoye, ghoKristusi, Fumu ghodifumanekero dyokuroruheya

Evangelium

Luk. 4:16-21

Marundwerero ghoyitjanga yaLukasi

Jesusi gheyire muNasara, omu gha kurerire, no thika di wakarire muhingo wendi, gha yendire mudiyuwa dyoSabbata kuSinagoge. Pakwimana gha toye yoyitjanga, ko kumupa kwawo rukwaro rokupeta rwamuporofeta Jesaya. Ha ruyandhurura no gha wanine pa ha tjanga eshi:

‘Mupepo waFumu papange ghu di yoyishi aye gha ni wetha ni yuvithe hahepwe mbudhi dhodhiwa.

Gha ni tuma eshi ni tongwere hakañotwa mashutwero, no ni monithe hakunga.

Pakuyuvitha mwaka ghothiñeke waFumu.’

Apa gha fikire rukwaro, ko kurutapa kwendi kwamupika, munyima gha yendire gha ka hungumane. No meho ghawahe awa ha karire muSinagoge, gha nungurukire papendi. Ho gha tangire kuwatongwera eshi: Yitjanga yi muna yuvu dyarero pañanyi-ñanyi ne yina pu kurikanyitha.

Mañando ghoEvangelium

HOLY THURSDAY – Ghune ghoKupongoka

Evening Mass of the Lord’s Supper

SECOND READING

Thitoya thokutanga Ex.12:1-8,11-14

Mumbapira dhaExodusi (Mashwaghero)

Mu mayuwa gha, Fumu gha ghambire kwaMosesi naAroni eshi: “Kaghonda ka ne ka mu karera kokutanga; mumwaka.” Mu tongwere mbunga dhodhihe dhaIsragheli ghuninga eshi: “Mumayuwa dikumi ghokaghonda kano, ha kona kutumbura keheyu ndjwi mudiko dyawo, ndjwighana ghopadidhiko dyawo.”

Ene ngeshi didhiko dimbiru kundjwi yu, ha kone kwitherako mundambo ghodiparaghumbo nawo ha kutapere mu kutwara muyipo yondjwi yu. Mwa kona kushana ndjwi ghondjewa-ndjewa, ene thikare thikungweghana thomwaka ghofotji.

Mwa kushimbe ndjwi ngambi ñombo. Mwa kona kuyitureka kate mumayuwa dikumi nomane ghokano kaghonda, nothigongi thombunga dhodhihe dhawaKriste homuIsragheli, ha kona kuyipagha parunguro. Ha kona kushimbako manyinga no ha kona kughukunya-kunya kumbadi dhothero no pawiru mumayugho mu ha kudyera.

No ha kona kudya nyama yu mughuthiku ghofotji, oyu ha kupona pamudiro no ha kumudye noghuroto ghothuthuñunyi no ha kona kuyidya noyiterekitha yokushamberera.

Kemo dyo mwa kona kuyidya mwa kona kukuwanga mumambunda ghenu, mwa kona kuvata makuha kumapadhi ghenu, no mamburo ghenu ne munyara dhenu. Mwa kutambukithe kudya yo paska waFumu. Yoyishi ame na kuyenda muditunga dyaEgiptena ghuthiku ghoghuhe no na kapagha hambedi wahe homuditunga dyaEgiptena, hanu noyiyama. No na ka pa mahumbithero kwawanyambi hombango homuEgiptena, ame Fumu. Ene manyinga ghana kukara thidimukitho thenu mumayugho omu mu di ngeshi pa sho ni ka wane manyinga ñanyi ni ka mu piterere ene mbadiko eyi sho yi ka mwipithe apa sho ni ka mwashure hakaEgiptena. No diyuwa dino dyakona kumukarera diyuwa dyomakurupero. No mwa kona kwimba yira difeste dyokudikuto dyaFumu. Mwa kona kudimbanga mwahanahoka kuroruhe.

Mañando ghaNyambi

Responsorial Psalm

Dimbkatji Ps.116:12-13,15 1Kor 10:16

R:

Thinwitho thi tuna kukandatheka ne ghomakurupero nomanyinga ghaKristusi.

Nye sho ni tupwere Fumu? Kughutho wendi ghokukwange?

Mbo na reta kwaFumu vinyu ghondupu, mu kumutumera mumakomweneno ghendi.

R:

Thinwitho thi…

Ngepi kuyitokota yaFumu ngeshi ha fu po mupikendi yofotji!

Ame ne no mupikoye Fumu, na kukarera thika di gha kukarerire nawe. Wa ni komononine kuyifa

R:

Thinwitho thi…

Mbo na kupa ndupu dhomatumero no kukutupwera mandapero.

Mbo na tapa makughero ghange kwaFumu mu kukara mudiko dyendi dyokuroruheya.

SECOND READING

Thitoya thoghuwadi 1 Kor.11:23-26

Mumbapira dhokutanga dhaMupostoli Paghulusi kwawaka Korinte.

Kehe pa no mbo mu dya, mbo mu nwa, mbo muna yuvitha yifa yaFumu.

Mwayendhange: Yoyishi na tamburire Fumu oyu na mu reterire namwe, eshi Fumu Jesusi mughuthiku ghu ha hetire, gha tumburire ghuroto no apa gha manine kutumera ha ghu yondora ghuninga eshi: Mu tumbure mudye yoyirama yange. Mbo mu yi tende namwe kukunivuruka. Karo kemo gha tumburire thinwitho munyima dhokudya, nomañando eshi: Thinwitho thi ne Testament ghoMupya, manyinga ghange mu yi tende, roruhe ngeshi oku muna kunwa mo, kate kunivuruka. Yoyishi roruhe oku muna kudya ghuroto ghu, no kunwa thinwitho thi, muna kuyivuruka yifa yaFumu kate mbo gha keye.

Mañando ghaNyambi.

Gospel Acclamation Jn. 13:34.

Makughero no difumanekro kukoye, ghoHekudyetu Jesusi Kristusi

Muragho ghoghupya na kumupa. Mu kuhake pofotji, thika di na mu haka me kemo sho mu kuhake namwe karo. Kemo ghana kughamba Fumu.

Makughero no difumanekro kukoye, ghoHekudyetu Jesusi Kristusi

Evangelium.

Jn.13:1-15

Marundwerero ghoyitjanga yaJohannesi.

Aye ne gha karire kare paghuhura.

Kughutho ghokuyungayungero membero ghodifeste dyoPaska, gha dimukire Jesusi eshi; dhi neya nako dhokutunda ye pano pakaye no kuhuka kwaWihe. Gha hakire hendi awa ha karire muno mukaye.

No ruhakitho rwendi gha ru horekire kate pakahero karo. Jesusi gha karire kuthidyero nawakathishongero wendi. Shatani ye kare ngeya muyighayara yaJudasi Iskariyoti, eshi gha muhete Jesusi. Jesusi gha dimukire eshi: Wihe gha tapire yoyihe munyara dhendi, no gha tunda kwaNyambi no mbo ghana huka kwaNyambi. Munyima ghamanine kuthidyero no gha shupurire mwaye wendi, ho gha tumburire mukata gha ghu kughange.

Gho gha pingwererire meyu pakaronga kokuyoghera, no gha tangire kuyogha mapadhi ghawakathishongero wendi, ho gha kuyurire mukata oghu gha kughangire. Pakukuma kwaSimon Petrusi, hepura Petrusi kukwendi eshi; Fumu ghuna haka kuyogha mapadhi ghange ndi? Jesusi gha mu huthire eshi eyi na ku tenda mbadi sho yi tjwathane pañanyi-ñanyi ene mbo yi ghuna yi tjwathana munyima. Petrusi gha ningire kukwendi eshi: Mbo ku fere eshi kuyogha mapadhi ghange we! Po gha mu tongwerire Jesusi eshi: Ngo mbadi sho ku pakerere nange. Simon Petrusi gha ningire eshi: Fumu , kadi mapadhi keho, ene nomoko norupara rwange karo. Ha mu hutha Jesusi eshi: Oyu ghana kuyoghana gha nyanda karo shime kuyogha mapadhi ghendi, yoyishi ghana kenenena. Amwe muna keni pañanyi-ñanyi gha mu hokore. Yo gha ghamberire eshi mbadi muna kenenena mwaheya. Apa gha manine kuyogha mapadhi ghawo waheya, gha kavatire karo mwaye wendi no gha hungumanine gha wa tongwere eshi: Muna yitjwathana eyi na mu tendi ndi?

Amwe muna kunitoya eshi muhongi noFumu, ene yina muhungamena. Yoyishi yame yu. Ngeshi ngoyame Fumu wenu nomuhongi wenu, gho na yogho mapadhi ghenu, mwa kona namwe kuyoghathana mapadhi ghenu. Yoyi na mupa thitamenedhi no thika di na tendi me kukwenu, kemo dyo mbo mutenda namwe.

Mañando ghoEvangelium

GOOD FRIDAY CELEBRATION OF THE LORD PASSION

Ghukwoko ghokupongoka – manyandero ghaFumu

FIRST READING

Thitoya thokutanga Jes.52:13-53:12

Mumbapira dhaMuporofeta Jesaya

Ha mu tjitjupithire pamaghuyi ghetu.

Dimbo dyoghune dyamupika Fumu. Fumu ghana kughamba eshi: Mupikange mbo ghana kono thirughana thendi no mbo ghana yeyuka kudikuto dyodikuru.

Hanu hohengi ha tutukwire apa ha mumonine; thishwi thendi tha monekire munu. Pañanyi-ñanyi mako ghomengi ghana kumutetuka. Yidye ghana tawa koyi hana tu yuvitha? No kwadye dina hokokera dyoko dyaFumu? Gha karire mahimeno ghaNyambi eshi mwanendi gha kure yira dimbuto dyomudhi dyomumuve ghorukukutu. Mbadi gha kununekire no kukuroghitha temba, mu kuyuvitha yokukwendi. Twa mu shamunine no twa muyakunukire, gha karire munu ghokunyanda no gha fumanine muyikorwa. No yofotji temba oyu gha konine kumuyundhera mbadi twa mu thoterire gha karire yira thimango. Oyu gha shimbire yinyanda notjitju dhetu, Wahe hopapetu ha karire yira ndjwi dhokuyongara, kehe yu gha yendire ndhira dhendi thinda ene Fumu ne gha withire maghuyi ghetu ghomahe. Ha mu tjitjupithire ngambi kenge ha muyakunukire no aye mbadi gha yahukire kanwa kendi yira ndjwighana yu ghana kuyenda kudyango dyomapayero no yira ndjwi ghothipuru-puru kughutho wa wakakukurura ndjwi, mbadi gha yahukire. Ha mu twarire no ha mu pangwerire kukufa. Ha mu twarire kukufa pa maharwero ghetu. Ha ka muturire nawakamaharwero, ha mu vumbekire noghutungi, yoyi mbadi gha tendire yoyiyi noghumango mbadi wa karire mukanwa kendi. Nyambi ghana kughamba eshi: Pamahimeno ghange gha nyandire, yifa yendi ya karire muyambo ghomakomweneno. Kemo dyo mbo ha mona wa hamutundakana no mbo ghana para kuroruheya no mumwendi mbo thina kono mo thitambo thange. Munyima dhoyipara yokunyanda kwendi, mbo ghana shamberera karo mbo ghana dimuka eshi mbadi gha kunyanda karo nyara-nyara.

Mupikange ghomundambo yu na menya-menyena, muyinyanda yawanu hohengi mbo ghana wa thigherera. No kemo mbo gha tapa dyango dyodikuto dyomukatji kawamanduna no mbo ghana wana ngcamu dhokutapitha ghushwi. Pamahimeno ghendi gha tapire moyo wendi no gha yakunuthire yinyanda ya wayi. Gha tumburire dyango dyawayiharuri no gha wa rapererire eshi ha wa thigherere mirandu thawo.

Mañando ghaNyambi

Responsorial Psalm

Dimbokatji Ps. 31:2,6°;12-13;15-16;17 no 25

R:

Tate, munyara dhoye na kutapa mudhimu wange.

Mumoye ghoFumu nakunda no mba na fa honyi. Ni shuture mughunongo ghoye. Munyara dhoye na kutapa mudhimu wange.

Yowe wa ni shuturire Nyambi ghomakuporero

R:

Tate, munyara...

Kehe yu gha ni vuramine ngambi kenge di na fire, ame ne yira nothinu thokumwagha. Ame na kuyuva hanyathi hohengi hana kuhohota, yitutukwa ne mumbadi dhange yi di. Awo ne hana kukuyonga yokukwange no hana kukuyonga eshi ha ni paghe

R:

Tate, munyara...

Ame kehe pano na karanga mumaghamweno ghoye ni ghamwene kwawanyathi wange nawahakakunikutha-kutha.

Mone mupikoye ghomunongo ni ghamwene muruhakitho roye roruheya

R:

Tate, munyara…

Ninge rupara roye rushenyene kwamupikoye ni shuture mughunongo. Mu tanare no mu tanarithe mitjima dhenu waheya wa hana kutanarera mwaFumu!

SECOND READING

Thitoya thoghuwadi Heb.4: 14-16,5:7-9

Mumbapira kwawaHeburayi

Gha tapire ghutawedhi kwahe awa ha karire ghutawedhi kukwendi gha karire murughani ghomukaruvigha rokuroruheya.

Mwayendhange: Ruvedhe ru tu di namuPristeri ghomukuru, kuninga eshi Jesusi mwanaNyambi, tu koñotwedhe ne keho matawero ghetu, agha twa nongonona. Atwe mbadi twa kara namuPristeri ghomukuru oyu ghokupira kuthotera ghukashu wetu, yoyishi naye kwa muyerekire yira twe, ene mbadi gha tenda murandu. Tu yende keho nomutjima dhetu dhodhihe kuthipuna thoghufu thaNyambi ghothiñeke tu ka wane ñeke dhi tu ghamwene, popa tuna dhi nyandera. Mumayuwa ghoyipara yendi gha ghambire Jesusi kwaNyambi mandapero, makwambero nomakughero ghomakuru nomahodhi, eshi gha muparithe muyifa eshi gha mu yuve mughoma wendi kwaNyambi.

Ngambi kenge gha karire Mwana, gha mu hongire ghutawedhi mukunyanda. Apa ghana rikanyithire yoyihe, yo gha karera mureti ghoyoyihe yawahamudimuka.

Mañando ghaNyambi

Gospel Acclamation Filip. 2:8-9

Difumanekero no makughero kukoye, ghoKristusi

Kristusi ghakumbirupithire thinda no kutambura yifa, yifa yothikurushe podigho gha muyeyurire Nyambi no kumupa dina dyokupiterera mene ghomahe.

Difumanekero no makughero kukoye, ghoKristusi

Evangelium Jn.18:1-40

Passion of Our Lord Jesus Christ according to St. John

Manyandero gha Jesusi Kristusi thikadi ghaghatjangire Johannesi.

Manyandero ghaHekudyetu Jesusi Kristusi.

N. Apa gha manine kughamba Jesusi yi, kokutjinaghana muronga waKedroni. Kodya karerire dipya ho ghengenine mo Jesusi nawakathishongero wendi, ene Judasi ghomunyathi wendi gha dimukire dyango di yoyishi rwingi gha yendangire mo Jesusi nawakathishongero wendi. Judasi gha shimbire mbunga dhawamashurundate nawakareripo mbunga dhawaPristeri hohakuru nawaFarasayi. Awo ha ka kumineko nominyenge noyitwa. Jesusi gha dimukire yoyihe eyi sho yiye kukwendi, ho gha henyine kughutho ghawepure eshi:

J “Yidye muna kushana?”

N Awo ha mu huthire eshi:

C “Jesusi ghomukaNasareti tuna kushana.”

N Ha wa hutha eshi:

J “Yame no.”

N Judasi ghomunyathi wendi naye ghemanine papawo. Apa gha wa tongwerire eshi: “Yame no, ko kuhuka kangaranyima ha we pamuve.” Ko kuwepura karo eshi:

J “Yidye muna kushana?”

N Awo eshi

C Jesusi ghomukaNasareti tuna kushana.

N Jesusi gha wa tongwerire eshi

J Na mana kuyimutongwera eshi yame no. Ngeshi yame muna kushana mu thighe hanu wa ha di nange ha yende.

N Kemo dyo sho dhi rikanye ňando edhi gha ghambire pakutanga eshi: Pawa wa ni pire mbadi na yongarithire po noyofotji temba.

Simon Petrusi oyu gha karire nothimende gha keshurire ditwi. Dyorudyo dyamupika muPristeri shokuru. Dina dyamupika yu ne Malkusi. Ko kuninga Jesusi kwamuPristeri eshi:

J Shwameke thimende thoye muthirungo thatho. Thinwitho thoyinyanda thi gha ni pire Tate ne, mbadi sho ni thi nwe ndi?

N Munyima mbunga dhawamashurundate namukamiti wawo, nawakareri ghomuragho wawaJuda, ha mu kwatire Jesusi no ha mu wangire. Pakutanga ha mu twarire kwaAnnasi yoyi yo gha karire hemwenya Kayifasi, oyu gha karire mumwaka muPristeri shokuru. Oyu Kayifasi yo gha tapire dighano kwaJuda eshi hasha kufera munu ghofotji diko. Simon Petrusi namukathishongero ghumweya ne hamu kuthire Jesusi. Mukathishongero yu ne gha kudimukire namuPristeri shokuru.

No ghenge nine pofotji naJesui mumarombe ghamuPristeri shokuru. Ene Petrusi panunda gha karire kuthero. Mukathishongero yu gha kudimukire namuPristeri shokuru gha shwaghire no gha ghambire namukakukunga thero no ghengenenine Petrusi. Mukadhipika yu gha kungire thero gha ningire kwaPetrusi eshi:

O “Kadi yowe ghumweya gho pawakathishngero wamurume yu ndi?”

N Aye gha huthire eshi:

O “Vame kadi yame.”

N Mupika yu nawakareri muragho hemanine ha ka kukangure kumudiroghu ha koňererire yoyi kwa karire mepo.

Petrusi ghemanine nawo pofotji gha ka kukangure naye. Mupristeri shokuru hepudhura Jesusi, yawakathishongero wendi noyoyihonga yendi. Jesusi gha mu huthire eshi

J Muyitunumeho na yi ghambire nawanu. Na wa hongire roruhe muSinagoge nomuTembeli omu ha ku kongwedhire haJuda wahe, no mbadi nayighambire mughudhindo. Nye ghuna kunipwendhera Wipudhure wa ha yuvire yi na wa tongwerire. Awo ne ha dimuka yi na wa tongwerire.

N Apa gha yi manine Jesusi kuyighamba kemo, ko kumungcambura mupika ghumweya yu ghemanine po no gha ningire eshi:

O “Kemo dyo gho kuhutha we kwamuPristeri shokuru ndi?”

N Jesusi gha mu huthire eshi:

J “Ngeshi ngo ghuyi na ghamba, shimurure yoghuyi. Ene ngeshi ngo ghuhunga ne nye ghuna kuningcambwera?”

N Annasi gha mu tumine kwamuPristeri shokuru Kayifasi oku shime gha mu ghangera. Simon Petrusi ghemanine karo gha kakukangure.

Awo ha ningire kukwendi eshi:

O “Owe ne kadi yowe ghumweya ghopawakathishongero wendi ndi?”

N Aye gha hamurire no gha ningire eshi:

O “Vame kadi yame!”

N Yofotji ghopawapika muPristeri shokuru, ghomwapa ghoyu gha keshurire Petrusi ditwi dyendi, gha ningire kukwendi eshi:

O “Mbadi na kumono nowe nendi mudipya ndi?”

N Petrusi gha hamurire popo ko kwigha ngondovoro. Ko kumutunditha kwawo Jesusi kwawa Kayifasi no ha mu twarire kumarombe ghomupanguri. Oghu ne murughura pamathikuthiku. Hathinda mbadi ha konine kwingena mumarombe, maghana sho ha kare muthidhira thokupira kudya makuyarekero ghopaska. Pilatusi gha shwagherire no gha wepurire eshi:

O “Murandu munye muna mwingenekera yu murume muno?”

N Awo ha mu huthire eshi:

C “Ngo kadi thiharuri, ngo kadi tuna mu kuretera.”

N Ha ningi Pilatusi kukwawo eshi:

O “Mu mu tumbure no mu ka mu pangure thika mumuragho wenu.”

N Hajuda ha mu huthire eshi:

C “Twapira ngcamu dhokutetera ghumweya kukufa.”

N Eyi ya hokokire kemo eshi dhi rikanye ňando dhaJesusi edhi gha ningire apa gha neghire eshi yifa munye mbo gha fa. Hengena karo Pilatusi mu marombe ghendi, no ghethire Jesusi ghamwipure Jesusi eshi:

O “Yowe Fumu wawaJuda ndi?”

N Jesusi gha muhuthire :

J “Ghothinda ghuna kuyighamba yi ndi? Endi hamweya hana yi kutongwera yokukwange?”

N Pilatusi gha mu huthire eshi:

O “Ame ne kadi nomuJuda! Diko dyoye nohaPristeri ghoye hohakuru, wo hana kutapa kukwange. Nye wa tenda?”

N Jesusi gha dimbururire eshi:

J “Owe ne ghoFumu ndi?”

N Ha hutha Jesusi eshi:

J “Ghothinda ghuna kuyighamba, noFumu ame ne ni kone kunongonona yoghushemwa. Yo na pwera kushamuruka yo neyera pano pakaye. Kehe yu ghatawa kughushemwa gha tegherere kukwange.”

N Pilatusi gha mwipurire eshi:

O “Nye ghushemwa?”

N Apa gha manine kughamba kemo karo kwawaJuda no gha wa tongwerire eshi:

O “Mbadi na kuwana murandu mumwendi. Amwe ne mwa kara nomuhingo ghokumushutwera ghumweya pa kehe difeste dyopaska. Muna haka ni mu shutwere Fumu wawaJuda ndi?”

N Ko kwandadhoka kwawo eshi:

C “Kadi yu Barabasi ndani!”

N Ene Barabasi gha karire shondoro.

Ha mutapa Pilatusi Jesusi ha mu mwashure. Hamashurundate ha thetire ňata dhomighunga, no ha dhi kurekire kumutwi wendi. Ha mu kavire mwaye ghoghukihu no handadhokire ghumuhenyena ghuninga eshi:

C “Ghu rumere fumu waWajuda!”

N No roruhe kengeyo pakumungcambura. Pilatusi gha shwaghire karo panunda no gha ningire kwawaJuda eshi:

O “Mu mone kushwaghitha nakughumu shwaghithera,” po sho mu dimuke eshi: “Yame ghokukanga eshi kuwana murandu mumwendi.”

N Jesusi gha shwaghire panunda noňata dhomighunga nomwaye ghoghukihu.

Ha ningi Pilatusi kukwawo eshi:

O “Munu po ndi?”

N Apa ha manine haPristeri hohakuru nawakareri hodhango handadhokire eshi:

C “Ghu mu pamare kuthikurushe ! ghu mu pamare kuthikurushe!”

N Pilatusi gha ningire eshi:

O “Mu mu tumbure no mu mu pamare, yoyishi mbadi na kuwana murandu mumwendi.”

N Hajuda ha mu tongwerire eshi:

C “Atwe twa kara nomuragho wetu, nomuragho wetu gha fe vene. Yoyi ghana kutendi thinda mwana Nyambi.”

N Pakuyiyuva Pilatusi gha yapire karo thikuma . Hengena karo mumarombe ghendi no ghepurire Jesusi eshi:

O “Kupi wa tunda we?”

N Jesusi ne mbadi gha mu huthire noňumbu temba.

Ko kuninga Pilatusi kukwendi eshi:

O “Mbadi ghuna kuhuka kukwange ndi? Mbadi wa dimuka eshi me ne na kara nomahimeno ghokukushutura nomahimeno ghokukupamara ndi?”

N Ha mu hutha Jesusi eshi:

J “Mbadi wa kara nongcamu kukwange, ngeshi mbadi ha kupa ngcamu kuwiru. Yodigho ghana ni tapa me kukoye, ghana kara nomurandu ghokupiterera thikuma.”

N Kutunda po gha yendire Pilatusi eshi gha ka mu thighe, Ene haJuda hakoňotwedhire eshi:

C “Ngeshi ghu mu thighe ngo kadi ghomuhakwa shokuru.”

N Pakuyiyuva Pilatusi yoyiheya yi, ko kuwathigha kwendi Jesusi panunda no gha ka hungumanine padipuna dyondhango di ha tire thumbe thomawe mumataneno, muThiheburayi eshi: Gabata. Agha ne gha karire makwindukero ghopaska, no rwa karire ruvedhe roviri kwoko nodhofotji pamathikuthiku.

Ha ningi kwawaJuda eshi:

O “Fumu wenu ne no!”

N Awo ne hadhondokire eshi:

C “Mu shwaghithe! Mu shwaghithe po! Mu pamarere.”

N Pilatusi gha wepurire eshi:

O “Nipamarere Fumu wenu ndi?”

N Hapristeri hohakuru ha huthire eshi:

C “Mbadi twa kara noFumu twe, shimengwa Fumu shokuru keho.” N Yodigho payipura yawo, ko kumuwapa eshi ha ka mupamarere.No gha shwaghire gha yende kudyango dyokatenere, thika di ha di toya muThiheburayi eshi: Golgata. Ko ha ka mu pamarerire kuthikurushe, pofotji nohanu hawonawo, Kehe yu kumutara waJesusi aye mukatji. Pilatusi gha tjangire po karo thikurutjanga pathikurushe.

Gha tjangire po eshi Jesusi ghoMukanasareti Fumu wawaJuda.

Wingi wawaJuda ha toyire thikurutjanga thi, yoyishi dyango di ha mu pamarere Jesusi dya karire pepi nombara. Thikurutjanga tha karire muThiheburayi nomuThilatina nomuThihirika.

Hapristeri wawaJuda ha ningire kwaPilatusi eshi:

C “Wa tjanga po eshi Fumu wawaJuda!”

N Pilatusi gha wa huthire eshi:

O “Eyi yina pu kutjanga -yina pu kutjanga.”

N Apa gha manine mashurundate kumupamarera Jesusi ko kutumbura mwaye wendi ha ghu kutetawere muyipindhi yine, kwakehe yu ne thipindhi. Ha tumburire karo thitere thendi thokwishi. Atho tha pirire mukungo kuwiru kate pamuve. Ha ghambathana kwawo eshi:

C “Twa thi payura.”

Mwiye tokere po hanga eshi yidye sho gha tumbure.

N Ya karire eshi yirikanye eyi ya ninga eshi: “Ha kutaperire yivata yange, nothokwishi ha pepere po wera.”

Eyi ne yo ha tendire hamashurundate. Pathikurushe thaJesusi hemanine po karo Nyina namina nyina naMaria, ghomuna Kleghofasi, naMaria Magdalena. Pakumona Jesusi nyina, namukathishongero yu gha hakire thikuma ha nemana kukwendi, gha ningire kwaNyina eshi:

J “Nawe mwanoye no.”

N Munyima gha ningire kwamukathishongero eshi:

J “Nyoko ne yo.”

N Kutunda mudiyuwa di mukathishongero gha shimbire nyina kundhugho dhendi.

Munyima gha dimukire Jesusi eshi yinarikanya yoyiheya, gha ningire eshi:

J “Nafu dinota.”

N Pakarire thitere thokuyara vinyu gho masheshe.

Hamashurundate ha tjurire ngcokwe kukatondo no ha mu turire muvinyu ghomasheshe ha mu porithe ko. Apa gha manine Jesusi kupopora vinyu ghomasheshe, gha ningire eshi:

J “Yina rikanya.”

N Ko kukoteka mutwi wendi no gha hurangedhire muňu wendi.

Edi diyuwa dyoghukwoko. Ene haJuda mbadi ha hakire eshi yirama yendi pathikurushe muSabbata. Yoyishi Sabbata ne dya karire diyuwa dyodikuru. Yo hepwerire kwaPilatusi eshi hanu wa ha namba payikurushe hapwe kutjoraghura maghuru ghawo no ha wa tundithe po.

Ko kwiya hamashurundate no ha tjoraghure maghuru ghamukakutanga, ndani ghoghuwadi oyu hambire naJesusi.

Ene pa ha henyine kwaJesusi no kumona eshi ghana fu, mbadi ha tjorire maghuru ghendi. Ghumweya ghopawamashurundate gha tuyurire matji dhendi nodighonga popo vene ko kundendesha mo manyinga nomeyu. Oyu gha yi nongononine, nomanongweneno ghendi ne ghaghushemwa.

No gha dimukire eshi ghushemwa ghana kughamba, namwe mukone kutawa. Ya karire kemo yi kone kurikanya eshi: “No thishokora temba mba tjora papendi.” Thitjanga thimweya thaghamba karo shi: “Mbana dighamena koyu ha twire. Nomunyima dhoyinu yi, Josef ghomukaArimateya oyu gha karire mukathishongero waJesusi, ghokwawaJuda no ghepurire kwaPilatusi kushimba mwimba wa Jesusi. Pilatusi gha mu tawedhire.” Josef gha yendire no gha ka kurire mwimba wendi. Nikodemusi oyu gha yendire thikandho thimwe ghuthiku waJesusi, naye gheyire no gha shimbire munde ghokuvunga vunga nokathira nomira, ho ya karire ngwa maliteri makumi kwoko. Awo ha tumburire mwimba waJesusi no ha ghu wethire nothende gho gha dhingire nomahina, thika di thakarire thitjo thawaJuda ngeshi ku hana kuvumbeka ghumweya. Padyango di ha mu pamarerire Jesusi, pa karire dipya no dipya di ne mbira dhodhipya, edhi ha dhirire kuvumbekamo ghumweya panganyi.

Mo ha vumbekire Jesusi, nodiyuwa dyoSabbata wawaJuda dya karire, mbira nadho dha karire pepi.

HOLY SATURDAY

This night is one of the Vigil for the Lord. The ceremony is arrainged in four parts.

A brief service of Light

Liturgy of the Word in which the Church recalls the wonderfull things God has done for his people.

New members of the Church are baptised and Baptism vows are renewed.

The whole Church is called to the table which the Lord prepared for his people through his death and resurrection.

THE EASTER VIGILI

DURING THE NIGHT

PART TWO: LITURGY OF THE WORD

FIRST READING

Thitoya thokutanga Gen.1:1 – 2:2

Mumbapira dhaGenesisi (Mashimwedhero)

Pakutanga Nyambi gha varekire diwiru nomuve. No muve wa karire thivunganyi no nyara-nyara; no makokore gha dimbamine pakaye ko kahe. Mupepo waNyambi wa temberire peghuru dhomeyu. Ko kuninga Nyambi eshi: “Kukene.” ho kwa kenine. Ko kumona Nyambi eshi: thishe ne thina rogho. Nyambi ne gha tendire mayakunukero ghothishe nomakokore. No gha tire Nyambi thishe eshi diyuwa no makokore gha gha tire eshi ghuthiku. No kwa karire runguro no mathikuthiku, mu diyuwa dyo kutanga. Nyambi gha ningire shi: Thikarepo thifikitho pakatji komeyu nomeyu no thitende mayakunuthero ghomeyu kumeyu. Kokutenda Nyambi thifikutho nomeyu ghokwishi dhothifikitho ghayakunuthire kumeyu kumeyu ghopeghuru dhothifikitho. Nyambi ghatire thifikitho shi diwiru. No rwakarire runguro nomathiku-thiku mudiyuwa dyoghuwadi kokuninga Nyambi shi: “Ghapoposhe meyu ghomwishi dhodiwiru mudyango dyofotji, dhikone kutjimbuka ndundu.” No yakarire kemo. Kokuta ndundu shi kaye nomapoposhero ghomeyu gha ghatire shi, dikuruvigha. Kokuyimona Nyambi shi, yinarogho. Haningi Nyambi shi: “Muve ghuhokithe muhonyi no mahako no yitonda yokwima.” Hayikara kemo. Kokuyowera kwagho meyu, kokuhoka mahako no kokukara yitondo nombuyo dhayo. Kokuyimona Nyambi shi, yinarogho. No rwakarire runguro no mathiku-thiku mudiyuwa dyo ghuhatu. Kokuninga Nyambi eshi ghakare mashanyi ku diwiru gha yakunuthe mutenya no ghuthiku yidimukitha yivaka yo mayuwa no myaka. Eshi yirwedhimange mu diwiru no yitape thishe pakaye. Ghoyakarire kengeno. Kokutenda kwendi Nyambi mashani mawadi ghomakuru. Dishanyi dyo dikuru dyo kurwedhima mutenya, Dyo dimbiru dyo kurwedhima ghuthiku, no nungwedhi nadho karo. No Nyambi gha yipakire kuthifikitho dhomuve no pakurwedhima ghithiku no mutenya, yiyakunuthe mutenya no ghuthiku. Gho ghayi monine Nyambi shi: Yinarogho. Norwakarire runguro no mathiku-thiku mudiyuwa dyoghune. Nyambi gha ningire shi: “dhiyare thi mumeyu no yinyunyi muwiru. Kokutenda Nyambi yiyama yoyikuru yomudikuruviya noyishereka yoyiyumi yokukara meyu kumarudhi kumarudhi, no yinyunyi yomando kumarudhi kumarudhi gho ghayi monine Nyambi shi yinarogho.”

Nyambi ghayikandadhekire no gha ningire shi: “Yereke no yivure noyiyarithe meyu gho mudikuvigha no yinyunyi yopamuve yivure.

No rwakarire runguro nomathiku-thiku mudiyuwa dyoghukwoko.”

No gha ghambire Nyambi shi: “Muve ghushwayithe yingandji yoyiyumi kumarudhi kumarudhi. Yiyama no ghurondodhi ghokukokawa pamuve noyishereka yo mumuthitu kumarudhi kumarudhi. Gho ya karire kemo. No Nyambi gha tendire yishereka kumarudhi no ghurondodhi ghoghuhe ghokukokawa pamuve kumarudhi kumarudhi. No Nyambi gha yi monine shi yinarogho.”

Kokuninga kwendi shi: “Tutende munu po pathishwi thetu no panungu dhetu, gharawerire thi dhomudikuruviya noyinyunyi yomuwiru no yiyama yopamuve ghoghuhe noghurondodhi ghokukokawa pamuve.”

No Nyambi gha tendire munu kunungu dhendi, gha mu tendire nungu dhaNyambi murume namukamadi, no Nyambi gha wakandadhekire no gha ningire kukwawo shi: Mukare rwererko nomuvure nomuyarithe kaye, mukamune no murawere thi dhomudikuruvigha no kuyinyunyi yomuwiru noghurondodhi ghokukokawa pamuve. No Nyambi gha ghambire shi: Mone, namupa yidya eyi yakara muhonyi gho pamuve ghokureta mbuyo no yitondo yoyihe yokukara no mbuyo kumarudhi kumarudhi, yomboyi kara yidya yenu, ene kuyishereka yoyihe yopamuve noyinyunyi yomuwiru noghurondodhi gho ghuhe ghokukokawa pamuve oghu wakara mudhimu ghoghuyumi, nokuyipa muhonyi gho wiyu yoyidya yoyidya yayo. Ghoyakarire kengeyo. Kokumona Nyambi yoyihe, eyi gha tendire eshi yinarogho thikuma. No rwakarire runguro nomathiku-thiku mudiyuwa dyo ghukwoko noghofotji. Kemo yapwire diwiru nomuve noyiyenga yayo.

No Nyambi gha rikanyithire yirughana yendi mudiyuwa dyoghukwoko noghuwadi no gha turumuthire mudiyuwa dyoghukwoko no ghuwadi muyirughana yendi eyi gha tendire.}

Mañando ghaNyambi

Reponsorial Psalm

Dimbokatji Ps. 104 or 103:1-2.5-610.12-14.24.35

R:

Tume Mupepo ghoye, ghoHekudyetu, no tendurure kaye kakare ghupya.

Shogherere Fumu ghomudhimu wange. Fumu ghoNyambi wange: Owe ghomukuru thikuma. Yowe wakara no ghufumu ghoruvigha. Yowe washupata thishe yira thivata thoye.

R:

Tume Mupepo…

Aye gha dhekire muve ghutanare ghudhire kukunyunga-nyunga kuroruheya. Owe wafikire muve yira thivata thogho. No meyu ghemanine kumituya dhomarundu.

R:

Tume Mupepo...

Aye ghaningire mavetu-vetu ghatunde mumuve noghapoposhe mumbirikatji dhomarundu. Kukwawo yatunga yinyunyi yo muwiru. Mumite yina kuyuvitha diywi dyawo.

R:

Tume Mupepo...

Aye kunakwotekitha marundu no meyu ghokushwagha muwiru no muve ghunakuyengi nombuyo dhopangcamu dhoyirughana yoye.

Ghana kumenitha muhonyi, yidya yawayishereka, noyitondo yombuyo yidya yawanu. Ghana kumenitha tumbi ghokumenitha yidya.

R:

Tume Mupepo...

Yirughana yoye yingi thikuma, ghoHekudyetu. Yoyishi mwayitendire noghunyanyami ghoghukuru. Kaye kayara noyivareka yoye. Ghukughe Nyambi ghomudhimu wange.

SECOND READING

Thitoya thoghuwadi Gen.22: 1-18

Mumbapira dhaGenesisi (Mashimwedhero)

(Apa gha turire Nyambi Abrahamu mu mayerekero. Kokumwitha eshi: ‘Abrahamu, Abrahamu,’ ghatawire eshi: “Yame no kuno” Dyo gha mu huthire. No shimbe Mwanoye, Dyo gha mu hutherire Nyambi, yowe gho mwanange pithoye Isaka, no dye wahaka we, Yende kudyango dya Moriah. No kamupe nyara-nyara noňanyi na kakuneye padirundu.)

Mudiyuwa dyokuranda ko mathiku- thiku Abrahamu gha shimbi kwendi ngameno pofotji nawapikendi hawadi namwanendi Isaka .

No gha piturire yikunyi yondupu no gha tagnire ruyendo rwendi ghayende kudyango ku gha mu rawerire Nyambi. No mudiyuwa dyo ghuhatu gha kapukire no gha monine dyango kughutho po gha ghamberire Abrahamu kwawa pikendi eshi, mukare popano nothidongi. No murumeghana no na kuyenda ni ka kenge, tuna karaperera no tuna kahuka karo kukwenu. Abrahamu gha shimbire karo yikunyi no gha yi tapire kwaIsaka, gha shimbire mudiro nothimende momughuwadi wawo hahungumanine pofotji.

Po gha ghamberire Isaka kwawihe Abrahamu eshi: ‘Tate’ dyo gha ghambire. Kokuhutha wihe eshi: ‘Kemo’ Mwanange. Kenge apa no tudi nomudiro noyikunyi, Kupighadi ramba ghonyara-nyara? Kokuhutha Abrahamu eshi, Mwanange Nyambi thinda yoghakutu pa ramba ghonyara-nyara. Momughuwadi wawo pohakayendire pofotji.

Apa ha ka kumine kudyango di hamurawerire Nyambi ha katendire Abrahamu Altare, no kuroyitha yikunyi pogha dhamwenine mwanendi Isaka no kumutura pa Altare pawiru dhoyikunyi. No gha papaterire Abrahamu thimende eshi gha payitheko mwanendi. No haengeli waNyambi haningire eshi, Abrahamu, Abrahamu, no Abrahamu gha huthire eshi yameno kuno, dyo gha huthire Abrahamu. Haengeli hamutongwerire shi wayeyura dyoko dyoye pamwanuke, no kumupagha temba, no pañanyi-ñanyi nadimuka eshi owe ne ghuna yapa Nyambi. Yodigho ghuna ni dhirera kunishweneka mwanoye. Apa gha kapukire kuwiru Abrahamu no gha monine ndjwi oyu hana kwata kudinyiha mudiputa. Abrahamu gha shimbire ndjwi yu gha mu tape nyara-nyara mudyango dya mwanendi. Po gha tire dyango di Abrahamu eshi yitapa yaNyambi, yo tuna kughambera dyarero eshi padirundu gha tapire Nyambi. Muengeli waNyambi ghethire karo Abrahamu paruwadi kutunderera mudiwiru. Nothinda na kwedha eshi Nyambi ghana yighamba yoghunayitendera, yoyishi mbadi ghuna shweneka mwanoye, ñanyi na kakuraperere noñanyi mbo ni tende hanahoka ghoye yira nungwedhi dhokuwiru no yimena kumbadi dhodikuruviya. No hanahoka ghoye mbo hana shimbi yiyora yawo kumururwani wa wanyathi wawo. No matunga ghomahe mbohana wa kandadheka hanahoka ghoye, yira yitapa yo ghu tawedhi ghoye.

Mañando ghaNyambi

Responsorial Psalm

Dimbokatji Ps.16:5.8-11

R:

Mbadiko thothiwa shimengwa kwaNyambi.

Hekudyange, yowe mukakunirera nomoyo wange.

Yoyiheya yi nakutambura, kukoye yatunda.

Fumu ne, kughutho wange gha kara roruhe, mbadi mbo ni pundadhoka, yoyishi nange gha kara roruheya.

R:

Mbadi…

Yona kushamberera nokushogherera no mbadi na ku kudhekera.

Hekudyange, wa ni tapa kukufa.

Wa tawa eshi mupikoye ghomakurupero ne, ghakume mumbira .

R:

Mbadi...

Yowe ghuna kunihonga edi sho ni pare.

Kukoye ne kwayara yishamberera . Eyi ghuna kutapa, yarogha roruhe.

THIRD READING

Thitoya thoghuhatu Ex.14:15-15:1

Mumbapira dhaExodusi (Mashwaghero)

Mumayuwa gha ghaningire Nyambi kwaMosesi eshi: Nye ghuna ku ni kumberera? Tongwere hanaIsragheli eshi hafunguruke hayende.

Owe ghuyeyure mburo dhoye no ghuneghe dyoko kudikuruvigha no ghuditete pakatji eshi hana Isragheli hakone kutjinaghana pamuve ghoghukukutu. Ghumone, Ame ñanyi ni kukutithe mitjima dhawaEgiptena, eshi hakone kuwakutha, Ame nahaka kuneghedha ngcamu dhange kwaFaragho no kwawakayita wendi wahe, kumatemba ghendi nawakatukambe wendi. NoEgiptena ñanyi hadimuke eshi Ame ne Nyambi, pakukuhokora ngcamu dhange kwaFaragho no kwa wakayita wendi no kwawakamatemba no hakatukambe.

No muengeli waNyambi oyu gha yendire kughutho ghombunga dhaIsragheli, ghatundire kughutho noghahukire kunyima dhawo.

Divuyi nadyo dyatundire kughutho nodyana, dimbamine munyima dhawo. Kemo divuyi dyakarire pakatji kombunga dhawaEgiptena no mbunga dhawaIsragheli. Divuyi dyakarire po makokore nodyakenithire ghuthiku, kumutara wawakaIsragheli, nodyapakire makokore kumutare wawaEgiptena, eshi ghuthiku ghoghuhe hadhire kukuwana. Munyima Mosesi ghaneghedhire dyoko dyendi kudikuruviya no Nyambi gha ningire dingundunga dyodikuru ditundithe meyu ghuthiku ghoghuhe no dyakukutithire dikuruviya no meyu ghakuyakunukire pakare mupowa pakatji.

No hanaIsragheli hatjinaghanine mukatji kodikuruvigha pamuve gho ghukukutu kurudyo rwawo no kurumoho. HaEgiptena hawatjidhire ghuwakuthakutha

Tukambe totuhe twa Faragho , matemba ghendi no hakatukambe hangenine mudikuruviya.

Paruvedhe romurughura Fumu mumudiro no mudivuyi, ghangenine kwawakayita waEgiptena no ghawa tendire didhongi. No gha tendire makosho ghomatemba ghawo hapatamenemo nohawanine ghukukutu pakuyenda kughutho.

Kokughamba haEgiptena eshi: tutjire tuwa thighe haIsragheli yoyishi Nyambi kuna kuwarwera. Podigho Fumu gha ghambire kwaMosesi eshi: Ghonyonone dyoko dyoye kudikuruvigha eshi meyu ghapuke ghamanithe haEgiptena no matemba ghawo nohakatukambe wawo. No Mosesi gha ghonyononine dyoko dyendi kudikuruviya no dikuruvigha dya mbandaghukire no meyu ghapukire mudyango dyagho, pakukya diyuwa no haEgiptena hatjirire no hakuhangani ne no meyu. Kemo gha manithire Nyambi haEgiptena no meyu mudikuruviya. Apa gha pukire meyu mudyango dyagho, ghaminithire matemba ghawo, hakatukambe waFaragho no hakayita wendi wahe wahatjinaghanine padikuruvigha no ghofotji temba ghopapawo oyu ghathigharirepo. Ene hanaIsragheli hatjinaghanine mudikuruviya pamuve gho ghukukutu.

No meyu gha karire kumbadi dhawo thikadikuma kurudyo rwagho no kurumoho. Kemo Nyambi gha shuturire mudiyuwa di haIsragheli munyara dhawaEgiptena. No haIsragheli hamonine mwimba dhawaEgiptena thambodiya dhodikuruviya. Karo haIsragheli hamonine yongcamu eyi ghatendire Nyambi, no dhatawire mwaNyambi no kwaMosesi mupikendi. Podigho ghembire Moses no hanaIsragheli dimbo dyo difumanekero kwaNyambi. No dimbo edi hembire ne dino: Nahaka kwimba kudifumanekero kwaNyambi yoyishi mukuru thikuma. Aye ghanaminitha hakatukambe waFaragho mudikuruviya.

Mañando ghaNyambi.

Responsorial Psalm

Dimbokatji Ex 15:1-5. 17-18

R:

Mutwimbe kudifumanekero dya Nyambi, yoyishi aye ne mukuru thikuma.

Mosesi ghembire dimbo dino kudifumanekero dya Nyambi kwawana Isragheli, no ghembire ngeno: Na haka kwimba kudifumanekero dya Nyambi, yoyishi aye ne mukuru thikuma

R:

Mutwimbere…

Tukambe nawakayita ghana yiminitha mudikuviya. Nyambi ngcamu dhange no dighumbo dyange. Aye gha kara mukakunighamwena. Aye Nyambi wange, mumwendi yakara yishamberera yange. Nyambi wa wawihetu, ghaye tuna kumukugha.

R:

Mutwimbere…

Nyambi ne mukayita, Nyambi dina dyendi ghaye ghana minitha matemba nohakayita waFaragho mudikuruvigha. No hakakutwetha kurwa wendi hanadhama mudikuruvigha dyodikuru.

R:

Mutwimbere…

Mangumbi ghomeyu ghana wa dheki. Hanadhama mumapenga yira mawe. Gho Hekudyetu rudyo roye rupwe kukutekera pangcamu dharo. Rudyo roye ghoNyambi, runakuthaghunyuna hañore.

R:

Mutwimbere…

Owe ghuna kuwareta no kutura muditunga dyomarundu dyo yipinga yoye, dyango dyoye, ghoNyambi, edi wakuroyithera ghothinda eshi dikare dyango dyoye dyororuheya dyango dyokupongoka edi watenda gho thinda no nyara dhoye, ghoNyambi. Nyambi mbo ghana raghura kuroruhe no roruheya.

FOURTH READING

Thitoya thoghune Jes.54:5-14

Mumbapira dhaMuporofeta Jesaya.

Pano muvareki ghoye yoshoghakare didhiko dyoye di na dyendi ne Hekudyoye ghomudyo, yo mupongoki waIsragheli ne yo mushuturi ghoye. Yira mukamadi ghokuyongara no kutokota kumudhimu kemo ghana ku kukwitha Nyambi, yira mukamadi ghomushengeteya yira mukamadi oyu gha karire no di shamu kemo dyo gha ghambire Nyambi. Mbadi nakushamuna muruvedhe runo, pamurandu ghoruhakitho rushokuru ñanyi no ni kushimbe karo. Pamurandu ghoghupata yo nondekera rupara rwange kukoye.

No paruhakitho rorukuru yo na ku kufera ñeke, Dyo ghana kughamba Nyambi, ghomupongoki wenu.

Pano ni di ne kuninga yira mumayuwa gha na karire naNogha apa nedhire eshi meyu gha Nogha mbadi mbo gha rowedha karo kaye.

Pano na kwedha ghupata wange kukoye eshi mbadi mbo ni tenda ghuyi ghu na tendire karo, ene marundu ku kuyakunuka no yi mbanda ghuru ku kunyunga-nyunga ene ruhatho rwange kukoye mbadi mbo rukuthigha ndani pamakuyuvero gho ruhakitho rwetu mbadi mbo rukunyunga-nyunga, dyo ghana kughamba oyu ghana ku kufera ñeke.

Mañando ghaNyambi

Responsorial Psalm

Dimbokatji Ps. 29:2, 4-6, 11-13

R:

Mbo na kufumaneka kuroruhe.

Nahaka kuvitha fuma dhoye ghoFumu, yoyishi yowe wani ghamwena no mbadi washambereritha hañore dhange pa pange.

GhoFumu, yowe waniyokorire kwawaka mwishi, ho wa ni hutherire moyo wange, apa na tambire ku kufa. Amwe mwakarera Fumu ghutjimapa,

R:

Mbona...

mwimbere dikuto dyendi, no mu fumaneke dina dyendi dyoKupongoka! Ghu ghadhi wendi, shemwa wa kapupi kamanana, ene ghuhunga wendi, wakuroruheya. Peghundha parunguro, nomahodhi nga ni kara pamathiku-thiku ne, kuheka nakuhe-heka karo.

R:

Mbona…

GhoFumu, tegherere no ni fere ñeke! Ni ghamwene ghoFumu! Muthidiro na karire, ene wa ni kinithire muyishamberera.

Wa ni shupurire yivata yange yothidiro, no wa ni shupekire yivata yodifeste. Yodigho mbo ne mbera dikuto dyoye, no mbadi mbo ni porera. Hekudyange noNyambi wange, mbo na kufumaneka kuroruheya!

FIFTH READING

Thitoya thoghukwoko Jes 55:1-11

Mumbapira dhaMuporofeta Jesaya.

Dyo ghana kughamba Nyambi shi: Mwahe muna kufa dinota mwiye kumeyu! Amwe muna piri manyinga namwe mwiye, mwiye, no mutambure mavumbukiro no mu dye: Mwiye, no kuruwera temba no paro temba,mwiye na munwe vinyu no manhwe! Nye munakurughanithera manyinga ghenu kuyinu yonyara-nyara kudhira kugharughanitha kughuroto, no yitambura yenu yomumayuwa dyoyemana mukumurikanyena munitegherere me no mbo muwane yinu yoyiwa eyi mbo mu dya no kushamberera.

Mwiye kukwange no mudheghetere thikuma, mutegherere, no mbo muwane yipara. Ñanyi mbo ni tendurure makuyuvero ghetu kuroruheya, mughuwa dyo na kuruperithere Davita. Thikadi na mu tendire gha kare mushupi kwawanu, nomupiterithi no muraghuri gho matunga, mbo ghuna moneka kumatunga gha wa dhirire kumona, no matunga gha wa dhidhire kumona mbo ghana tambukerera kukoye.

Pamurandu ghomaghuwa ghaFumu ghoye, ghomupongoki waIsraeli: oyu mbo gha kufumaneka. Shane Nyambi oku yene no kumuwana temba, mwithe oku ye ne pepi gha di. No ninge hayiharuri awa hathigha ndhira dhendi, nomurume ghothiharuri oyu ghana kughayarera no muninge ghapiruke kwaNyambi muthi ñeke, no kwaNyambi wetu, oyu ghana kutapa mathiyerero.

No yighayara yange mbadi yo yighayara yoye, no mayira ghange mbadi ghomayira ghoye Nyambi ghana kuyighamba.

Diwiru ne dire kupitakana kaye yo yina kukarera shime mayira ghange ne mare kupitakana mayira ghoye no yighayara yange ne yire kupitakana yighayara yoye. Kemo ngeshi mvura no ndaghu dhina ghu muwiru mbadi wa kuhuka oku mbadi yina vetera kaye.

No kutapa ghuyaghave ndani no ku kuritha no kutapa mbuto kwawakakukuna no kumupa ghuroto gha dye no mañando ghana kushwagha mukanwa kange mbadi wakahuka nyara-nyara kukwange no kudhira kushimba yi na shana no kawana yi namushanena.

Mañando ghaNyambi

Responsorial Psalm

Dimbokatji Ps.12:2-6

R:

Fumu ne ghapungura mataterero ghetu.

GhoFumu, ngo ghamwene yoyishi mbadi karo muporothi, no mbadiko munu ghomakurupero. Hanu ne kwangera hana kukwangera, no kuna kukupemukitha, payikuhongaghura yawo. Ene fumu, mbo ghana tunditha po yihongaghura yoyihe, nawayaghuyu tunwa,

R:

Fumu ne...

Awa hana kuninga eshi: ‘Mumarudimi ghetu, modhakara ngcamu dhetu. Miromo dhetu, ghomaghamweno ghetu. No mbadi tuna kutongamena kwamunu.” Fumu ye ne pakuninga eshi:” hakashu ne kuna kuwapetha hahepwe ne kuna kuwatokotitha. Yo na kwingenena po name, no kutapa maghamweno koyu ghana kunyanda.”

SIXTH READING

Thitoya thoghukwoko noyofotji Bar. 3:9-15. 32-4:4

Mumbapira dhaMuporofeta Baruk.

Yuve, we Isragheli, kumuragho ghoyipara tegherere, no kuhonge shi nye ghana kutongora maghano pashanye we Isragheli ghuna kukarera muditunga dya wakañore dhoye, no ghuna kuruparera mumuve ghopanunda no ghuna kuyareka yoyimango nawafu.

Nowa tawa mumowa hakara nomangcamu, yoyishi washamuna ndhugho dhoyipara. Ngowa yendire mundhira dhaNyambi, ngowa parire muthiraro kuroruhe. No kuhonge eshi ngepi maghano, no kuhonge eshi ngepi di gho kukara ghunyanyami, no ngepi gho kukara nongcamu ndani no kutjwathana: Eyi karo wakona kudimuka no ngepi ghure ghomayuwa, no yipara, no ngepi thishe thomeho no thiraro. Yidye ghawanine oku ghatunga, yidye ghengenine mundhugho dhendi dhomapungwero? Ene yu gha dimuka yoyihe yo gha mu dimuka, washimba maghano ghendi ghomahe yo gha tenderire kaye mumaruvedhe ghomahe, ndani ghamuturire gha kare mapadhi mane.

Gha tumine thishe ghothayendire, no gha mwithire, kokumukutha no ghoma, nungwedhi ne kumoneka no ghushamberera ngeshi runakumu mo ruvedhe: Ngeshi ghana dhitha, dhina kuhutha eshi yatwe no, no dhina kumoneka kwamuvareki, yodiye yo Nyambi wetu, mbadiko gho kupituritha nendi.

Gha shimba maghano ghomahe, no ghadhikuruperithire kwamupikendi Jakopu, no kwaIsragheli yu gha hakire thikuma, yoghana mushanena na moneke pakaye no kuyendaghura pofotji na watutughuru.

Edhi ne dho mbapira dhomuragho waNyambi, muragho ghu wemanena po kuroruhe, awa hakumutungeka ho mbo ha mu thigherera kate ku kufa. Piruke munyima Jakopu, dyo ghana kughamba yende nendi omu sho thi sheghenye ne thishe. No wa tapa ghuyaghave ghodifumanekero dyoye kwawamwe, no matawero ghoye kwawanu mbadi ghoye. Pamurandu ghoghupongoki waIsragheli, eyi ghatushane ni ne Nyambi yo gha shwayithire kukwetu.

Mañando ghaNyambi

Responsorial Psalm

Dimbokatji Ps.19:8-11

R:

Yihokora yaFumu ne yaghushemwa

Ñando dhaFumu ne dhayara: No dha tapa moyo. Yihonga yaFumu ne yamakurupero: Ya tapa ghunyanyami, kwawa hadhira kuyitwayera. Miragho dhaFumu ne dhanegha matambo: No dha reta yishamberera.Yiraghura yaFumu, Ya kena: No ya tapa maghano.

R:

Yihokora…

Yihima yokukarera Fumu, yiwa no ya tanara kuroruhe. Ethi gha ghatura Fumu ne thihunga: No keheyu gho papawo ne muhungami. Awo ne hapiterera mangondo, ngambi ghukuru ghowingi wagho mangondo, ghuwa wagho kupiterera wiki, ngambi mere ghomuthindana.

SEVENTH READING

Thitoya thoghukwoko noghuwadi Ez. 36:16-28

Mumbapira dha muporofeta Ezakigheli.

Mbo na mu tjakera no meyu ghomawa no mbo na mupa mitjima dhodhipya.

Ñando dha Nyambi dheyire kukwange ghuninga: Owe mwana munu hakadiko dyaIsragheli apa ha tungire muditunga dyawo, hadidhirurire payikara yawo no payitenda yawo. Yitenda yawo yakarire kughutho wange yira makukoshakoshero ghoyu ghana kara kuthidhira. Podigho nawa monithire nyinya dhange pamurandu gho kunotawera manyinga muditunga dyange, nopakudishamuna nawa nyambi wagho ghombango.

Ame nawatapire kumarudhi gha gho nawo, no gha tapathanine mumatunga, no na wapangurire payikara yawo no payitenda yawo.

Apa hakumine kumatunga oku ha yendire, hakadhirurire dina dyange, dyo kupongoka pakuwa ghambera shi: Hanu wane haka diko dya Nyambi, ene Nyambi ne gha watundithire mo muditunga dyendi. Na tjitjupire kumutjima wange padishwahu edi hashamunine dina dyange dyokupongoka hakaIsragheli mumbunga dhawahayidena omu ha karire. Podigho na tongwerire haka diko dyaIsragheli eshi: Ngeno ghana kughamba Fumu Nyambi: Ame mbadi na kurughana mudina dyenu amwe mwakadiko dyaIsragheli, ene pamurandu ghodina dyange dyoKupongoka edi mwashwahurire mukatji komako omu mwakara. Ame mbona fumaneka dina dyange dyoKupongoka edi dya pwa kushwahura mukatji komako, odi mwashwahura mukatji kawo. No mako mbo ghana dimuka shi amene no Nyambi apa nakukuneghedha mumwenu kughutho wawo, eshi ame ne no mukakupongoka. Ame mbo na dimukitha mumako no kumu kongwedha mutunde mumatunga ghomahe no mbadi namutwara kuditunga dyenu. Ndani po mbo ni mu tjakera no meyu ghomawa eshi mu kone kukushuka kuyinu yodidhiro yoyihe eyi mwatendire, no mbo na mutunditha kwawaNyambi hombango. Mbo na mupa mutjima ghoghupya, no maghano ghomapya mwimi dhenu, mbo na tunditha mumwenu mutjima ghoghukukutu yira diwe, no mbo na mupa mutjima ghoghunongo. Karo mbo namupa Mupepo wange no mbo na muningi muyendaghure mumiragho dhange no mutende marawero ghange namwe mbo munatungu muditunga edi na tapire kwawakerekandongo wenu, Amwe mbo munakara mwakadiko dyange, name mbo na kara no Nyambi wenu.

Mañando ghaNyambi

Responsorial Psalm

Dimbokatji Ps.42:3, 5.4 2:3.4

R:

Yira yu ghana kurura kumeyu kemo nakurura kukoye we Nyambi.

Ghunu wange ghoghuhe kwaNyambi ghuna kurura, kwaNyambi ghomuyumi. Mwaka munye na kuhokoka karo kughutho waNyambi?

R:

Yira…

Ngeshi ha ni mono di ghuna ku ni runduka moyo wange, nakughayara eshi, ngepi di na korerire kumatungo ghaNyambi, ho na shwayire kughutho ghotushumba niyende kundhugho dhendi, ghushogherera no mbunga dhi dhembire difeste, dhakughire no dimbo dyodikuto

R:

Yira…

Tume thishe thoye noghushemwa ghoye eshi, oyu ghana kuniyenditha, gha ni tware kudirundu dyoye dyoKupongoka no kumatungo ghoye!

R:

Yira…

Ningeneke kuthinyaku thaNyambi, Nyambi yu na hima kushamberera no kushogherera, gho ni kone kukufumaneka no thihumba ghoNyambi, ghoNyambi wange.

( Munyima kokuranda ko.)

EPISTOLA: Rom. 6:3-11

Mumbapira dhaMupostoli Paghulusi kwawakaRoma

Endi mbadi mwadimuka shi twahe atwe hayoyera mwaJesusi Kristusi eshi hatuyogha mukufa kwendi ndi?

Twapwire kuvumbeka pofotji nendi pa diyoghero mukufa eshi thika kenge di Kristusi gha vumbukire mwawafu mughufumu ghongcamu dhaWihe. Kuninga eshi natwe karo kemo sho tukone kupara mumoyo gho ghupya.

Yoyishi twa kupakerera Nendi muyifa yendi. Shemwa dyo mbo tu kara Nendi karo pamuvumbukero wendi. Atwe twa dimuka shemwa eshi mukuru wetu, pofotji naKristusi gha mu pamarire ku thikushe. Yi kone kutunda po yikara yo maharwero. Yodigho, atwe ne kadishime twapika diharwero. Munu yu gha fire, gha shutuka ku diharwero nongacmu dha dyo. Atwe twa fire pofotji naKristusi.

Yo twa tawera eshi, mbo tuna para Nendi pofotji twa dimuka twathinda eshi, Kristusi gha vumbukire mwawafu, no mbadi mbo gha kona karo kufa kufa gha pira ngcamu kuKwendi. Aye gha fire kehe pano no roruheya kudiharwero dyo kufa. Pañanyi-ñanyi kupara ghana ku para Ye kwaNyambi. Yodigho, namwe mudimuke kemo eshi, mwafire mudiharwero. KwaNyambi ne moyo. Yoyishi mwe, pofotji na Kristusi Jesusi mudi.

Mañando ghaNyambi

Reponsorial Psalm

Dimbokatji Ps.117:1-2.16-17.22-23

R:

Hallelujah, hallelujah, hallelujah!

Mumukughe Fumu mwamarudhi ghomahe, mumukughe mwamako ghomahe, yoyishi ruhakitho rwendi rokukwenu ne rwa tanara, ndhika dhaFumu dhoghushemwa ne dha pira ghuhura!

R:

Hallelujah...

Fumu ne muwithi, Fumu ne ghatenda yitenda yongcamu! Ame mbadi mbo nifa, mbo na para, no mbo na nongonona yitenda yaFumu

R:

Hallelujah...

Diwe di ha mwayire hashokeki, shemwa dyodina kara diwe dyo dishonga. Eyi ne, Fumu gha yi tendire, no ya karire thitetu mumeho ghetu!

Evangelium

Mark. 16:1-7

Marundwerero ghoyitjanga yaMarkusi.

Apa gha pwire Sabbata ha ghurire haMaria Magdalena naMaria gho nyina Jakopusighana, naSalome munde gho kukuwetha. Murughura mudiyuwa dyo kutanga muthivike, kokwiya kwawo kumbira. Ha ghamba thana kwawo eshi: “ Yidye keho sho gha tu gharumwene diwe dyo kuthero dho mbira?” Yoyishi dikuru thikuma. Apa ha kokokire k one dina gharumuka ko. Pa kwingena mo, ha monine mungaghu ghokuvata yitere yoyikenu thikuma, ghana hungumana parudyo; ko kututukwa kwawo thikuma. Aye gha wa tongwerire eshi: “Mwayapa! Jesusi gho mukaNasareti muna kushana, oyu ha pamarire pathikurushe. Ghana vumbuka! Mba di mo muno. Mu mone dyango di, ha mu pakire, ene muyende mukatongwere hakathishongero wendi naPetrusi eshi, ghana kuwapiterera kuGalileya ko mbo ha ka mu mona thika di ghawatongwerire.”

Mañando ghoEvangelium

THE SEASON OF EASTER

EASTER SUNDAY

Dimisa muShundaha ghoPaska

FIRST READING

Thitoya thokutanga Yit. 10:34. 37-43

Mumbapira dhoYitenda yaWapostoli

Twadire no kunwa nendi kunyima dhomuvumbukero wendi

Ko kukuma Petrusi paando no gha ningire eshi: Yashemwa ndani na kutjwathana eshi, Nyambi ne mbadi gha tenda makutjakero. Ene mukehe diko gha tumburire hanu wa hamukutekera, na wa ha tenda ghuhunga. Mwa dimuka karo eyi ya hokokire, muditunga dyaJudeya yomuhe. Ya tangerire muGalileya kuyuvitha munyima dhodiyoyero dyaJohanesi. Karo mwa dimuka yaJesusi ghomukaNasareti eshi, Nyambi gha mu wethire naMupepo ghoKupongoka no gha mu pire ngcamu.

Gha yendaghurire no gha tendire kokuhe yirughana yoyikuru.

No gherukithire waheya wa ha karire mungcamu dhashatani yoyishi Nyambi nendi gha karire.

Atwe ne twatunonga ghoyoyihe, eyi gha tendire muditunga dyawaJuda nomuJerusalema. Awo ha mu paghire no papendi ha mwambire kuthikurushe. Ene Nyambi gha mu tamburire mudiyuwa dyoghuhatu mwawafu no gha mu hokorire. Kadi kudiko dyodihe ene kukwetu twe gha tororire Nyambi eshi tu kare twashupi ghoyinu yi. Atwe twadire no kunwa nendi, munyima dhomuvumbukero wendi mwawafu. Aye gha tu yuvithe ghutanarithi kudiko eshi ye ne gha tupire Nyambi gha kare Mupanguri, wawayumi nawafu.

Papendi ha nongonona haporofeta wahe eshi, ghokutawa mumwendi, ghana kuwana mathigherero ghomaharwero mudina dyendi.

Mañando gha Nyambi

Responsorial Psalm

Dimbokatji Ps.118:1-2.16-17.22-23

R:

Fumu ne gha tenda yitenda yongcamu.

Mu mu kughe Fumu, yoyishi aye ne munongo, ruhakitho rwendi ne rwa pira ghuhura! Isragheli gha kona kunongonona eshi: Ruhakitho rwendi ne rwa pira ghuhura.

R:

Funu ne…

Fumu ne muwithi, Fumu ne gha tenda yitenda yongcamu. Ame mbadi mbo ni fa, mbo na para no mbo na nongonona yitenda yaFumu.

R:

Fumu ne…

Diwe di hamwayire hashokeki, shemwa dyo dina kara diwe dyodishonga. Eyi ne Fumu gha yi tendire, no gha karire thitetu mumeho ghetu!

SECOND READING

Thitoya thoghuwadi Kol.3:1-4

Mumbapira dhaMupostoli Paghulusi kwawakaKolose

Ngeshi pofotji mwa vumbukire naKristusi, mu shane yinu yomudiwiru, oku gha kara Kristusi no gha hungumana kurudyo rwaNyambi. Mu ghayare yinu yomudiwiru, kadi yopamuve.

Yoyishi mwa fire no moyo wenu wapwa kundeka pofotji naKristusi mwaNyambi. Apa mbo gha hokoka Kristusi ghomoyo wenu, namwe mbo muna hokoka pofotji nendi mughuFumu.

Mañando ghaNyambi

Gospel Acclamation

Hallelujah 1 Kor.5:7-8

Ndjwighana wetu ghoPaska ne ha mu tu paghera: Aye yoKristusi.

twimbe ne keho difeste, mwaFumu.

Hallelujah

Evangelium

Jn. 20:1-9

Marundwerero ghoyitjanga yaJohannesi

Ghakona kuvumbuka mwawafu

Murughura pamathiku mushundaha, oku shime ka karera ka vundu-vundu heya Maria Magdalena kumbira no gha wanine diwe dyokumbira dina pu kugharumuna ko. Ko kutjira kwendi kwaSimon Petrusi no kwamukathishongero oyu gha hakire thikuma Jesusi, gha ka wa tongwerire eshi hana mana kutunditha Fumu mumbira, no mbadi tuna mudimuka eshi kupi hana mu paka.

Ko kushwagha Petrusi namukathishongero ghumweya yu, ha yende kumbira. Mughuwadi wawo hadhondokire pofotji, ene mukathishongero ghumweya yu gha pitererire Petrusi mukutjiara no gha ka tangire kakuma kumbira. Apa gha kokokire mo gha mono kwendi mahina gha, ghana pundumana.

Ene mbadi hengenine mo Munyima dhendi heya Simon Petrusi aye ne hengenine mumbira no gha monine mo mahina vene, no tuku yu gha vivire Jesusi kumutwi wendi.

Tuku yu mbadi gha karire pamahina ghamweya, ne gha karire pamutara ghopithagho, oku gha pwa kupeta. Po ghengenine mumbira mukathishongero yu gha tangire kukuma kumbira, no gha tawire pakuyimona. Yoyishi mbadi ha tjwathanine yitjanga eshi, Jesusi ne gha kona kuvumbuka mwawafu.

Mañando ghoEvangelium

SECOND SUNDAY OF EASTER

Shundaha ghoghuwadi ghoPaska

FIRST READING

Thitoya thokutanga Yit. 4:32-35

Mumbapira dhoYitenda yaWapostoli.

Wingi wa watawire, hakarire no mutjima ghofotji no mudhimu ghofotji. Mbadi ko yu gha ningire eshi kanu ko payimuna yendi ne ka kare kendi. Ene ha yi kutaperire waheya pofotji. Hapostoli ha nongononine no yitenda yongcamu eshi, Fumu Jesusi ne gha vumbukire mwawafu. Noñeke dhaNyambi dha kurire papawo wahe. Karo, no yofotji temba yu gha nyandire pakatji kawo. Yoyishi yu gha karire no dipya, ngambi ndhugho, gha yi ghurithire po. Eyi ya shwayire po gha kayiretire, no gha yitapire kwawapostoli. Awo ne ha yitapire kwakeyu thika di gha nyanda.

Mañando ghaNyambi

Responsorial Psalm

Dimbokatji Ps.118:2-4.15-18.22-24

R:

Mu mukughe Fumu, yoyishi aye ne munongo, ruhakitho rwendi rwa pira ghuhura!

Israeli gha kona kunongonona eshi: “Ruhakitho rwendi ne rwa pira ghuhura.” Ha ka diko dya Aroni ha kona kunongonona eshi: “Ruhakitho rwendi ne rwa pira ghuhura.” Ha ka kukarera Fumu ha nongonone nawo eshi: “Ruhakitho rwendi ne rwa pira ghuhura.”

R:

Mu mukughe…

Mu yuve kutuyoghototo tomumatende ghawakakuyuvitha eshi: “Fumu ne gha tenda yitenda yongcamu, Fumune mudithi, Fumu gha tenda yitenda yongcamu!” Ame mbadi mbo ni fa, mbo na para, no mbona nongonona yitenda ya Fumu. Fumu ne gha ni humbitha thikuma, ene mbadi gha ni tapire kukufa.

R:

Mu mukughe…

Diwe di ha hanyatire hashokeki, shemwa dyo dina kara diew dyodishonga. Eyi ne, Fumu gha tendire, no ya karire thitetu mumeho ghetu! Edi, dyodiyuwa di gha tendire Fumu, mu tu himwerere no tu shamberere.

SECOND READING

Thitoya thoghuwadi 1 Jn. 5:1-6

Mumbapira dhokutanga dhaMupostoli Johannesi

Kehe yu gha tawa eshi Jesusi ne yo Kristusi gho mwana Nyambi no kehe yu gha haka wihe gha haka karo hanendi. Po shot u dimukere na twe eshi, twahaka hana Nyambi, pa kuhaka Nyambi no pakukumitha mo miragho dhendi. Ruhakitho ro kwaNyambi, rwa kara ghutawedhi kumiragho dhendi karo miragho mbadi dha kara ghukukutu mukudhikumitha mo. Yoyishi, kehe yu gha kara mwaNyambi, gha kona kuwitha kaye aka ka kara mudiharwero. Na ne ngodye gho kukona kuwitha kaye. Kadi yu gha tawa eshi, Jesusi ne mwanaNyambi ndi? Yofotji keho yu gha thikera pa meyu ghodiyoghero no manyinga gho yi fa ne, Jesusi Kristusi. Ene mbadi gheyire no meyu pithawo no meyu no manyinga gheyire. Mupepo ne yo munongononi wayo. Yoyishi Mupepo ne ghushemwa.

Mañando ghaNyambi

Gospel Acclamation

Hallelujah Jn.20:29

Ha mu tongwera Jesusi eshi: “Ghuna tawa keho yoyi ghuna ni mono? Hakaruvigha hakakudhira kumona, ene ha tawa.”

Hallelujah

Evangelium

Jn.20:19-31

Marundwerero ghoyitjanga ya Johannesi

Mushundaha yu parunguro ha ka kukongwedhire hakathishongero pofotji. Ngambi kenge ha yandherire thero, pamurandu gho ghoma ghokwawaJuda, ghengenine Jesusi no ghemanine pakatji kawo no gha ningire kukwawo eshi: “Thiraro thikare nenu!” Pakumana kughamba kemo, ko kuwaneghedha makandeke ghendi no matji dhendi. Hakathishongero ha shamberire thikuma pakumona Fumu. Ha wa tongwera karo eshi: “Thiraro thikare nenu! Thika dig ha ni tumine Tate, kemo dyo na kumutuma namwe.” Munyima dho kughamba kemo, ko kuwahetherera eshi: “Mutambure Mupepo ghoKupongoka! Ngeshi mbo mu thigherere hanu maharwero ghawo, ghana pu kuwathigherera kwaNyambi. Ngeshi kadi wa kuwathigherera, naNyambi temba mbadi mbo gha wa thigherera.” Tomasi yofotji ghopawashadikumi no hawadi oyu ha toyire karo eshi Didimusi, mbadi gha karire papawo apa gheyire Jesusi. Hakathishongero hamweya, ha mu tongwerire eshi: “Tuna mono Fumu!” Ene ye gha wa huthire eshi; “Ngeshi mbadi sho ni mone yitombo yo mamboha mumakandeke ghendi, no kutjura munwe wange muyitombo yo mamboha no kwingeneka dyoko dyange mu thitombo thendi thomumatji, ngo mbadi sho nit awe no kamanana temba.” Thivike tho munyima ko kukongedha karo hakathishongero waJesusi pofotji naTomasi naye po. Karo ngambi kenge gha tjaperire thero gha kumine Jesusi no ghamanine pakatji kawo no gha ningire eshi: “Thiraro thikare nenu!” Rete munwe ghoye kuno, no kenge kumakandeke ghange, ho rete dyoko dyoye no ghudingeneke mumatji dhange. No watamangera shime mumatawero, ene ghutawe.” Tomasi gha ningire kukwendi eshi: “Hekudyange no Nyambi wange!” Ha mu tongera Jesusi eshi: “Ghu na tawa keho yoyi ghuna ni mono? Hakaruvigha hakakudhira kumona, ene hatawa.” NaJesusi gha tendire shime yitetukitho yoyingi, eyi ha dhira kutjanga murukwaro runo kuthitunumeho thawakathishingero wendi. Ene yi tetukitho yino, ha yi tjange eshi mukone kutawa eshi Jesusi ne yo Kristusi, mwanaNyambi, no pakutawa mukone kuwana moyo mumwendi.

Mañando ghoEvangelium

THIRD SUNDAY OF EASTER

Shundaha ghoghuhatu ghoPaska

FIRST READING

Thitoya thokutanga Yit. 3:13-15.17-19

Mumbapira dhoYitenda yaWapostoli.

Petrusi gha ghambire kwawanu eshi: ‘Nyambi waAbrahamu naIsaka naJakopu, nawakerekandongo wetu, yo ghana yi tendi eshi, ghana- tapa kwaJesusi gho mupikendi, fuma dho ghuNyambi. Oyu mwatapire no yu mwanyathire kughutho waPilatusi, Apa gha himine kumushutura. Aye gha karire mupongoki no muhunga ene mwe mwamunyathire no mwamukumberire eshi, mu fere ñeke mupayi. Kemo mwamutundithire moyo mukamiti pakumupagha. Ne Nyambi, gha mu tumunine mwawafu. Eyi ne yatwe twa tunonga wayo. Pañanyi-ñanyi mwayendhange, na dimuka eshi mughuthuta mwayitendire yira hakuruwenu. Shemwa Nyambi gha yi yuvithire pakare-kare pa tunwa twawaporofeta eshi, Kristusi ne mbo ghana nyanda yo ghana yi hokwera popano. Yodigho, mupiruke no mundhundhe eshi, gha pwe kuthigherera maharwero ghenu.

Mañando ghaNyambi

Responsorial Psalm

Dimbokatji Ps.4:2.4.7.9.

R:

Gho Fumu, mawe tu yadhime karo maghamweno ghoye ghomawa.

Gho Nyambi, owe wa ni tendera yoyiwa ngeshi kukoye na kukuyerera ni huthe. Apa ya ni pupire wa yi ni yaghayetherire ni fere ňeke karo pañanyi-ñanyi no yuve ndapero dhange!

R:

Gho Fumu...

Mu dimuke eshi, Fumu ne yitetukitho gha tendire, kwawahamutjimapire. Name ngeshi gha ni kuyerera kwaFumu, ghana ku ni yuva.

R:

Gho Fumu…

Hengi hana kuninga eshi: “Yidye mbo gha tu paka karo mughuwa? Gho Fumu, mawe tu yadhimeko karo maghamweno ghoye ghomawa.”

R:

Gho Fumu…

Apa no ne, kurara na kurara mukupira maghamweno ho ni kaporokere muturo, ghoFumu, yoyishi pithoye gho kuni tungeka mundjewa-ndjewa.

SECOND READING

Thitoya thoghuwadi 1 Jn.2:1-5

Mumbapira dhokutanga dhaMupostoli Johannesi.

Eyi ne yo na kumutjangera amwe, mwahanange homwahakwa eshi, mbadi mwa kona kuharura. Ene ngeshi ha harura yofotji gho papetu, atwe ne twa kara naJesusi Kristusi ghomuhunga no mughambwereri wetu kwawihe. Aye yo mashemwathanitho ghomaharwero ghetu. Keho ne, ka di ghetu pithowo no wahanu waheya. Ngeshi gha tu kara mughutawedhi kumiragho dhaNyambi twa kona kudimuka eshi twa mu dimuka naye. Oyu gho kuninga eshi: “Ame ne na mudimuka,” No mbadi ghana ku kara ghutawedhi kumiragho dhendi, aye ne mukambango yo no ghushemwa ne mbadi mo mumwendi. Oyu gho kutawerera kuñando dhendi-ruhakitho rwaNyambi ne mumwendi rwakara, no gha kumenena ku thighayara thendi tho kuyara.

Mañando ghoNyambi

Gospel Acclamation

Hallelujah Luk. 24:32

Ha ghamba thana kwawo eshi: “Mbadi dhina yumbaghuka mitjima dhetu apa tuna ghambaghura nendi mundhira, no apa gha tu tjwathanitha yitjanga ndi?”

Hallelujah

Evangelium

Luk. 24:35-48

Marundwerero ghoyitjanga yaLukasi.

Hakathishongero wa hathimwetwedhire eyi ha monine mundhira, no ngepi di gha kudimukithire kukwawo pa kuyondora ghuroto. Oku shime ha karera mukughamba ghura yinu yi, ko kwimana Jesusi mukatji kawo, no gha ningire kukwawo eshi: “Thiraro thikare nenu!” Awo ha tutukwire no ha yapire thikuma ho ha ghayarire eshi thirumba hana kumona. Ha wa tongwera eshi: “Nye muna kwomapera kenge, no nye dhina kutamangerera mitjima dhenu? Mu mone mumakandeke no mumapadhi ghange yo yame no thinda yu. Muni kwate no mumone. Yoyishi thirumba mbadi tha kara no yi po no yi shokora, thika kenge di muna kunimona me.” Oku shime gha karera mukughamba kemo, ko kuwaneghedha makandeke ghendi no mapadhi ghendi. Ene muyishamberera yawo no muyitetuka, mbadi ha konine kutawa shime. Aye ha wa tongwera eshi: “Ko thidi kukwenu tho kudya ndi?” Ko kumu pa kwawo kathi ko kupona. Naye gha tumburire no gha tendire kuthitunumeho thawo. Popo ko kuwatongwera eshi: “Ethi ne tho thidimukitho thoñando agha na mu tongwerire apa na karire nenu. Eshi yoyihe yipwe ku yaritha eyi ha tjangire kukwange mumuragho waMosesi nawaporofeta nomumapisalemi.” Ko kuvishura maghano ghawo eshi gha kone kutjwathana yitjanga. Munyima hawatongwera eshi: “Kemo yapwa kutjanga: Kristusi gha nyande, no mudiyuwa dyo ghuhatu mbo ghana vumbuka mwawafu. Mudina dyendi mbana yuvitha mapirukero no mathiyerero ghomaharwero, kumako ghomahe, kundera kuJerusalema nokumweya. Amwe ne yamwe mwatunonga ho yinu yino.

Mañando ghoEvangelium

FOURTH SUNDAY OF EASTER

Shundaha ghoghune ghoPaska

FIRST READING

Thitoya thokutanga Yit. 4:8-12

Mumbapira dhoYitenda yaWapostoli.

Edi ne dyodina keho vene edi dyo ku kona ku tu ghamwena.

Ko kumuyara Petrusi Mupepo ghoKupongoka, no kuwatongwera eshi: “Mwakamuragho, namwe mwamayami ghodiko. Dyarero munakutupangura kuthitenda thothiwa tho kwamukatjitju, no ngepi di gha neruka. Mwaheya mwe no diko dyodihe dyaIsragheli, mudimuke eshi yinu yine mudina dyaJesusi Kristusi gho mukaNasareti, po gha ne manena yu muna kumona kughutho wenu mundjewa-ndjewa. Jesusi yu mwa pamarire. Ene gha mu tumunine Nyambi mwawafu. Aye ne, ‘Yo diwe di ha yondorire hashokeki wenu. Shemwa yo ghana kara kashemandhugho.’ Yo gha reta makomweneno, mbadi ko ghumweya. No mbadi ko karo dina di ha tapa pano pamuve kwawanu, omu twawana makomonokero.”

Mañando gha Nyambi

Responsorial Psalm

Dimbokatji Ps. 117: 1.8-9.21-23.26.28-29

R:

Diwe di hamwayire hashokeki, shemwa dyo dina kara diwe dyodishonga.

Mu mukughe Fumu, Yoyishi aye ne munongo, ruhakitho rwendi rwapira ghuhura!

R:

Diwe…

Mu kunda, kwaFumu, ku piterera makurupero gho kwawanu mu kunda kwaFumu ku piterera makurupero gho kwawakamakuto.

R:

Diwe…

Na haka kukushogherera, yoyishi wa ni yuverire ndapero dhange, no wani ghamwenine. Diwe di ha mwayire ha shokeki shemwa dyodina kara diwe dyo dishonga. Eyi ne, Fumu gha yi tendire, no ya karire thitetu mumeho ghetu!

R:

Diwe…

Gha fumane oyu ghana kwiya mudina dyaFumu! Atwe tuna kumukandadheka no makandadhekero gho mundhugho dhaFumu.

R:

Diwe…

Owe, yowe Nyambi wange, na himi kukushogherera, Nyambi wange na himi kukwimbera ghukuru ghoye. Mu mukughe Fumu, yoyishi aye munongo, no ruhakitho rwendi rwa pira ghuhura.

SECOND READING

Thitoya thoghuwadi 1 Jn.3:1-2

Mumbapira dhokutanga dhaMupostoli Johannesi.

Mu mone kuruhakitho rorukuru oru gha tu neyedha wihetu: Aye kutoya ghana kututoya eshi twana Nyambi. Ene shemwa yatwe twanendi. No kaye mbadi ku tudimuka, yoyishi, mbadi kamudimuka naye. Mwahakwa pañanyi-ñanyi, twana Nyambi tu di twe . Apano mbadi yina hokoka eshi ngepi di mbo tu kara. Ene tuna dimuka eshi, apa mbo gheya Jesusi mbo tuna kara thika ye. No mbo tuna ka mumona thika di gha kara.

Mañando ghaNyambi

Gospel Acclamation

Hallelujah Jn.10:14

“Yame mudithi gho munongo. Na dimuka ndjwi dhange, nondjwi dhange, dha ni dimuka nadho me.”

Hallelujah

Evangelium

Jn: 11-18

Marundwerero ghoyitjanga yaJohannesi

“Yame no mukakuditha gho munongo. Mukakuditha gho munongo, ghana ku kambeka moyo wendi pandjwi. Mu kamarisa ka di yo mukakuditha, no karo ndjwi ne ka di dhendi. Ngeshi ha mono dimbungu di na kwiya ghana kutjira no kuthiya ndjwi. Dimbungu ne dina kukwata ndjwi no kuharanganya mumutanga. Aye ne mukamarisa vene, no mbadi ghana kukudhekera yo kundjwi. “Yame mudithi gho munongo na dimuka ndjwi dhange, no ndjwi dhange, dha ni dimuka nadho me, kenge di gha ni dimuka Tate, name ho hana dimuka tate no na kambeka moyo wange pandjwi. Na kara karo nondjwi dhimweya edhi dha dhira kukara muhambo dhino. Nadho ni kone kudhiditha, no mbo dhina yuvu kudiywi dyange. Munyina ne mbo ghuna kara mutanga ghofotji no mudithi ghofotji. “Tate gha ni ha ka me, yoyishi na tapa moyo wange, munyima ho mbo ghu ni hukere karo. No yofotji mbo gha ghu ni tumbura. Ene no thinda na kughuta pa na kara nongcamu dho kughuta pa, no na kara nongcamu dho kughuhutha karo. Eyi ne yoyiragha eyi na tambura kwaTate.”

Mañando ghoEvangelium

FIFTH SUNDAY OF EASTER

Shunda ghoghukwoko ghoPaska

FIRST READING

Thitoya thokutanga Yit. 9:26-31

Mumbapira dhoYitenda yaWapostoli.

Saghulusi gha yendire kuJerusalema, no gha shanine kukununga kwawakathishngero waJesusi. Waheya ne hayapire kukwendi. Yoyi mbadi ha tawire eshi ye ne mukathishongero waJesusi. Barnabasi, gha mu fererire ñeke no gha mu twarire kwawapostoli. Aye gha kawathimwetwedhire eshi, ngepi di gha monine Fumu mundhira no Fumu gha ghambaghurire nendi. No ngepi gha di gha yaghurire muthishwaghameho mudina dyaJesusi. Ko kuyendaghura nawo Saghulusi kokuhe muJerusalema, no gha yaghurire muthishwaghameho mudina dyaFumu. Gha ghambaghurire ghondimi dhothihirika no gha wa koghaghurire. Awo ne ha yerekire eshi ha mu paye. Pa kuyidimuka ha ka kutawa, ko kumutwara kwawo kuSesareya. Kutunda po ko kumutuma kwawo kuTarsusi. Ndani popo ko kuwana ngirishe munako dho maturumuthero no thiraro, muJudeya yo muhe no muGalileya no muSamariya. Dha tanarire no dha parire mughutwedhi gho kwaFumu. Nkirishe dha pwire kutanaritha paMupepo ghoKupongoka no dha vurire.

Mañando gha Nyambi.

Responsorial Psalm

Dimbokatji Ps. 21:26-28.30-32

R:

Dimbo dyange dyo makughero, dyo mbo ngarero dhi shokuru kukwendi dyatunda.

Dimbo dyange dyo makughero, dyo mbo ngarero dhi shokuru, kukwendi dya tunda. No medhero ghange, mbo na tendi ghushemwa, kwawahamukarera. Munyima hahepwe mbana wa yokudya nawahashana Fumu, mbo hana mukughu. Tawe eshi mbo ha pare roruhe mundjewa-ndjewa. Ha ka kaye waheya mbo hana yi kuyongo no mbo hana piruka kwaFumu. Mako ghomahe mbo ghana mu dimuka yiraFumu.

R:

Dimbo…

Ngambi hatungi ho pakaye mbana di nendi, no kumudimuka yira Fumu. Nawafu wahe wa hayongaritha moyo dhawo, mbo hana tongameno kughutho wendi. Hanahoka wendi mbo hana mu karera, no mbo hana thimwetwedha kwawanahoka wawo yo kwaFumu. Awa ne, wo mbo ha nongonona yitenda yo maghamweno ghendi, kwawa mba shamuruka eshi yo gha yi tendire.

SECOND READING

Thitoya thoghuwadi 1 Jn.3:18-24

Mumbapira dhokutanga dhaMupostoli Johannesi.

Mwanange ho mwahakwa, ruhakitho rwenu mbadi rwa kona kukara pañando no pamiromo keho. Ene twa kona kuruhokora no yitenda yetu no mughuhunga. Apano po twa kona kuyidimukera karo eshi atwe twa kundama kwaNyambi ghoshemwa, no mitjima dhetu dhikone kuhedhumuka thiwana kughutho wendi. Ngeshi ha yi tu teterera yighayara yetu-Nyambi ne gha piterera yighayara yetu. No gha dimuka yoyiheya. Mwahakwa, ngeshi hayidhiri kututaterera yighayara yetu, twa kara no matjimapero gho kuyenda kwaNyambi. No eyi tuna kukumbera tuna kuyiwana kukwendi. Yoyishi twa kara no ghutawedhi kumiragho dhendi no kutenda eyi yamuroghera. Muragho wendi ne ghuno eshi: Twakona kutawa mwaMwanendi Jesusi Kristusi, no tukuhake gho tukupakerere mumuragho oghu gha tu pire ye. Oyu gho kukara ghutwedhi kumiragho dhendi mwanaNyambi gha kara naNyambi ne mumwendi. Twa kona kuyidimuka pano eshi mumwetu gha kara: Yoyishi Mupepo wendi gha tu pa.

Mañando ghaNyambi

Gospel Acclamation

Hallelujah Jn.15: 4.5

Amwe mukare mumwange, name ni kare mumwenu. Keheyu gho kukara mumwange name mumwendi.

Hallelujah

Evangelium

Jn.15:1-8

Marundwerero ghoyitjanga yaJohannesi.

Jesusi gha ghambire kwawakathishongero wendi eshi: “Yame thitondo thovinyu thoshemwa, naTate ne ndjimi. Kehe mute wange oghu ghuna kudhira kwima ghana kughuteta ko ye. Ene kehe ghu ghokwima mbuyo, ghana kughuteta thiwana eshi mbo ghu kone shime kwima mbuyo dhodhingi. Amwe ne kare mwapa kuteta thiwana, pañando ghange gha na mutongwera. Amwe mu kare mumwange name mumwenu. Mute pithawo mbadi wa kukona kwima mbuyo oku mbadi wa ghughama kuthitondo thovinyu. Kemo karo namwe ngeshi mbadi mwakara mumwange. “Ame ne yame thitondo thovinyu amwe ne mwamite. Oyu gha kukara mumwange, name mumwendi, ghana kwima mbuyo dho dhingi. Yoyishi kupira me mbadi ko thi mwakona kutenda. Ngeshi ha dhiri kukara mumwange, ghana kupwa kumwagha yira mute no ghana kukutera. Hanu hana kukongwedhanga mite dho kengeyo no kudhivukumena mumudiro, ha kadhi koñerere. Amwe ngeshi ha mu kara mumwange, nomañando ghange ha kara mumwenu, mukumbere vene yi mwahima no mbo muna yi wana. Shemwa pa shamufumanekere Tate eshi mwene, mwema mbuyo dhodhingi, no mwakathishongero wange.

Mañando ghoEvangelium

SIXTH SUNDAY OF EASTER

Shundaha ghoghukwoko noyofotji ghoPaska

FIRST READING

Thitaya thokutanga Yit.10:25-26 34-35. 44-48

Mumbapira dhoYitenda yaWapostoli.

Pakwingena Petrusi mundhugho, Ko kumuthingawera Kornelighusi no kutongamena kughutho wendi ghumukutekera. Ene Petrusi gha mwimekire ghuninga eshi: “Wimane! Name no thinda karo nomunu.” Ko kukuma Petrusi pañando no gha ningire eshi: “Yashemwa, ndani na kutjwathana eshi, Nyambi ne mbadi gha tenda makutjakero. Ene mukehe diko, gha tambura hanu wa ghu mukutekera, nawa ha tenda ghuhunga. Oku shime ha ghamba Petrusi, Ko kushuruka Mupepo ghoKupongoka kwawahaya wa ha teghererire ku ñando dhi. Hatawi wa waJuda awa heyire naPetrusi, ha tetukire thikuma. Eshi Nyambi ne gha tape karo Mupepo ghoKupongoka kwawanu wa hadhirire kukara Hajuda. Yoyi ha yuvire edi hana kughamba hanu mandimi no kukugha Nyambi. Ha ningi Petrusi eshi: “Hanu wane thika di twa tamburire natwe Mupepo ghoKupongoka. Nye sho yi wa shinye kukuwayogha no meyu?” Ko kuraghura kwendi eshi ghapwe kuyogha mudina dyaJesusi Kristusi. Munyima ha mu kumberire gha kare mayuwa gho mapu kukwawo.

Mañando ghaNyambi

Responsorial Psalm

Dimbokatji Ps.98:1-4

R:

Fumu gha dimukithire mawithero ghendi kumako.

Mwimbe dimbo dyodipya kufuma dhaFumu, yoyishi, aye yitenda yongcamu gha tenda. Pa ghutanavu no ngcamu dhendi dho ghuNyambi, po gha withera ye.

R:

Fumu gha…

Fumu gha dimukithire mawithero ghendi, kumako, gha hokorire yitenda yendi yo makomweneno. Ku diko dyaIsraeli, gha tanarithire karo ruhakitho rwendi no ghushemwa wendi.

R:

Fumu gha…

Kaye kokahe kamonine eshi, Nyambi wetu yo ghana wana mawithero. Mu humwerere kudikuto dyaFumu, mwakaye mwahe, mushamberere, muhumwerere no mwimbe.

SECOND READING

Thitoya thoghuwadi 1 Jn.4:7-10

Mumbapira dhokutanga dhaMupostoli Johannesi

Mwahakwa, tukuhake. Yoyishi ruhakitho ne kwaNyambi rwa tunda. No kehe yu gha kara no ruhakitho yo mwanaNyambi no gha dikuma Nyambi. Oyu gha pira ruhakitho, mbadi gha dikuka Nyambi. Yoyishi Nyambi ne yo ruhakitho. Muyinu yino mo gha tu hokwera Nyambi ruhakitho rwendi eshi: “Pakutuma mwanendi gho pithendi mukaye tukone kuwana moyo papendi. Ruhakitho ro shemwa runo: Kadi ruhakitho ro kwaNyambi. Ene ruhakitho rug- ha tu neghedha pakututumena mwanendi, yira mashemwathanitho ghomaharwero ghetu.”

Mañando ghaNyambi

Gospel Acclamation

Hallelujah Jn. 14:23

Ko kumuhutha Jesusi eshi: “Mukakunihaka ghana kukunga mañando ghange mumutjima wendi, naTate ghana kumuhaka no mbo tuna yendi kukwendi no kutunga nendi.”

Hallelujah

Evangelium

Jn.15:9-17

Marundwerero ghoyitjanga yaJohannesi.

Thika di gha ni haka Tate, kemo na muhaka name. Mukare muruhakitho rwange. Ngeshi gha ni tendi yiraghura yange, mbo mu na kara muruhakitho rwange, thika din a tenda muyiraghura ya tate no na kara muruhakitho rwendi. “Eyi na kuyimutongwerera yi, yishamberera yange yikare mumwenu, no yishamberera yenu yi yirikanyenene. Yo yi raghura yange yino: Mukuhake pofotji, thika di na mu haka me. Mbadi ko yu gha kara no ruhakitho rokupiterera yira runo, rokutapera hayendhendi moyo wendi. Amwe ne mwahakwa wange, ngeshi gha mu tendi eyi na kumurawera. Mbadi na kumutoya shime eshi mwapika, yoyishi mupika kadi wa kudimuka eyi ghana kutenda Hekudyendi. Ame ne kumutoya eshi mwahakwa wange, yoyi na mudimukitha yoyiheya yin a yuvire kwaTate. Amwe mbadi mwanitorora yame na mutorora, yo na mu pakera po eshi muyende, ho mu keme mbuyo, mbuyo dhi mbo dhi karerera. Kemo gha mu pa Tate thothiheya thi, mbo mu kumbera mudina dyange. Eyi ne yo na kumurawera mukuhake pofotji.

Mañando ghoEvangelium

THE ASCESION OF THE LORD

Diyuwa dyomudhineno dya Jesusi Kristusi

FIRST READING

Thitoya thokutanga Yit.1:1-11

Mumbapira dhoyitenda yaWapostoli

Owe Theofilusi, mumbapira dhange dho kutanga na tjangire mo yoyihe eyi gha tendire Jesusi no yi gha hongire kutunda pakutanga, kate pamudhineno wendi ghomudiwiru, kugutho ghomudhineno wendi, gharawerire paMupepo ghoKupongoka harume wa ha tororire eshi hapostoli. Munyima dhokufa kwendi gha wa neghedhire yidimukitha yoyingi eshi yene muyumi. Mumayuwa makumi mane, gha hokokore kehe pano kukwawo, no gha ghambire nowo yoghuFumu waNyambi.

Apa gha karire nowo rumweya muthidyero, gha wa tongwerire eshi: Mwatunda mo muJerusalema ene mutaterere tongo yitapa eyi gha mu toyedhere tate thika di mwa yuvire kukwange Johannesi nomeyu gha mu yoyire. Ene mwe mumayuwa ghomapu mbo mu na yogho naMupepo ghoKupongoka.

Apa ha kukongwedhire parumweya karo ha mwipure Jesusi eshi: Hekudyetu, dhonako dhino shotumune ghuFumu waIsraeli ndi? Ko kuwahutha kwendi eshi eyi na kadi yenu yokudimuka manako noyivaka eyi gha dimuka thinda tate nongcamu dhendi.

Amwe ne mbo mu na tambura ngcamu dhaMupepo ghoKupongoka, apa mbo gheya kukwenu. No mbo muna kara twa tunonga twange hokuJerusalema, no muditunga dyodiheya dyaJudeya nodyaSamariya, kate kuyiyeyeka muto yopakaye.

Apa gha manine kughamba kemo, ko kudhina kwendi kudiwiru, oku wo pa kumona, divuyi dyamungambwerire eshi ha dhire kumumona shime. Oku shime hadhine awo pakumudighamena ghumunungurukera. Popa vene kokuwemanena harume hawadi hoyivata yoyikenu. Awo ha ningire kukwendi eshi; Mwakagalileya, nye mu nemanena ghudighamena kudiwiru?

Jesusi yu ghana tundu kukwenu no ghana dhini kudiwiru, kemo mbo gha kahuka thika di muna mu mono ghana kudhina kudiwiru.

Mañando ghaNyambi

Responsorial Psalm

Dimbokatji Ps. 46:2-3,6-7,8-9

R:

Nyambi ne matjirero ghetu no mukungi.

Gha kwindukire roruheya mukughamwena muyinyanda.

Yodigho mbadi twa kona kuyapa, ngambi ha ka tapa kaye dhira, no marudhi ha ghahenyena pakahandha kodikuruviya,

R:

Nyambi ne…

Mbara mbadi mbo dhi kiña-kiña, yoyishi poghadi Nyambi.

Nyambi mbo ghana mughamwena, oku nokuvata temba diyuwa.

Marudhi ne gha yoghotere vene, ngeshi pa mbo gha yuvitha Nyambi diywi dyendi, mbo ghuna tutuma ghuFumu ghoghuheya, no kaye mbo kana dhongonoka tarara.

R:

Nyambi ne…

Fumu ghomukangcamu dhodhihe netu gha kara, NaNyambi waJakopu ne yomukungi wetu. Mwiye na mu mo ne eyi gha tenda Nyambi, yitetukitha munye ghatendire ye pamuve.

SECOND READING

Thitoya thoghuwadi

Efs. 4:1-13

Mumbapira dhaMuposotli Paghulusi kwawakaEfesiusi.

Ame ne kutuywera na kuyimutuywera mumutjima dhenu, no mukañotwa me pamurandu gho kukarera Fumu: Muninge yipara yenu yi kupakerere pofotji no methero gha mwawanine kwaNyambi. Mu kumbirupithe kehe pano mukare no ghunongo no ghudhughutjiama no mukudhidhimekerange muruhakitho. Amwe mu koñomeke ghufotji ghu gha mu pa Mupepo mukatji kenu eshi, mukare no thiraro mukatji kenu. Yirama ne yofotji noMupepo ghofotji, thika di gha kara po makurupero ghofotji agha gha mwithera Nyambi. Fumu ne yofotji matawero ghofoptji no diyoghero dyofotji. Nyambi ne yofotji no yoWiha wawahe. Oyu gha piterera wahe noyu gha rughanene wahe no gha ghatunga mwawahe. Kwakehe yu gho papenu oyu gha wana thitapa thoñeke thika di gha tapire Jesusi Kristusi yitapa yendi kwawahe. Yoyina kuningera yitjanga ngeno: “Apa gha dhinine kuwiru, gha shimbire hakañotwa no gha taperire yitapa kwawanu.” Ñando dhi dho kuninga eshi: “Aye gha dhinine” Kuninga dhina kuninga eshi, Aye ne gha shurukire pa kutanga kwawakamwishi kuninga shi pamuve. Oyu gha shurukire pamuve, yoyu gha dhinine karo, kundagha-ndagha dhodiwiru dyodihe eshi, gha yarithe yoyihe papendi. No eyi ne “yoyitapa” Eyi “gha tapire ye” Hapostoli haporofeta, ha yuvitha mbudhi dhodhiwa, nawadithi nawakungi nawahongi. Thitambo thendi tha karire eshi, gha royithere ha tawi kuyirughana yawo no thokutenda yirama yaKristusi. Kemo kate mbo tu kakume kughufotji gho ghushemwa mumatawero ghetu no yidimuka ya mwanaNyambi.

Mañando ghaNyambi

Gospel Acclamation

Hallelujah Mt.28:19.20

“Muyende kumarudhi ghomahe, no mukatende hanu hakathishongero wange. Mukawahonge mukukwata yoyiheya yi na murawera. No mudimuke eshi: Ame ne nenu ni di mayuwa ghomahe, kate paghuhura ghokaye.”

Hallelujah

Evangelium

Mark.16:15-20

Marundwerero ghoyitjanga yaMarkusi.

Ko kuwatongwera eshi: “Muyende mumatunga ghomahe ho mukayuvithe hanu wahe mbudhi dhange. Oyu mbo gha tawa no kupwa kuyogha, mbo ghana wana maghamweno. Ene oyu ghokushwena kutawa, mbo ghana pu kutetera ndhango. Hakakutawa mbo hana tendi yitetukitho yino mudina dyange eshi, kushwayitha hashatani no mbana ghamba mandimi ghomapya. Mbana kwata yiyoka ngambi kunwa ghuhungu kadi ha ka kufa. No mbana kambeka moko ghawo ghawakakukorwa awo ne mba neruka.” Apa gha manine kughamba nagho Fumu Jesusi yi gha dhinine kudiwiru no gha ka hungumanine kurudyo rwaNyambi. Awo ne hayendire no hakahongire kokuhe. NaFumu gha karire nawo no gha tanarithire mañando ghawo payitetukitha yi gha watendithire.

Mañando ghoEvangelium

SEVENTH SUNDAY OF EASTER

Shundaha ghoghukwoko noghuwadi ghoPaska

FIRSTT READING

Thitoya thokutanga Yit.1:15-17. 20-26.

Mumbapira dhoyitenda yaWapostoli

Mumayuwa gha, gha karire makonganeno gha wakambunga ho kurikanya dithere no makumi mawadi. Petrusi gha karire kukwendi no gha ningire eshi: “Mwayendhange, yitjanga yipwe kurikanyitha eyi gha pumbire Mupepo ghoKupongoka mukanwa kaDavita, yokwaJudasi oyu gha karire mukamiti wawahakwatire Jesusi. Yoyishi gha pwire kutara kuthitara thetu no gha pwire kutorora mukuyerana kuyitenda yetu. Ene yo gha karire mukamiti wa wahakwatire Jesusi. “Yoyishi mumbapira dhomaPisalomi yemana mo eshi: ‘Muthiye dyango dyendi nyara-nyara, mwatoperera eshi ghatunge mo ghumweya, no ghumweya waye naye gha hangere muthirughana thendi.’ “Po sho tu wedherere po ghumweya, gha kare ghushupi ghomuvumbukero waJesusi netu. Aye gha kara ndani ghumweya gho mwawarume, awa twa karire nawo rure oru twa yendaghurire naFumu Jesusi, muthishaghameho. Ku tunda pa kumuyogha Johanesi, kate gha tundire kukwetu gha dhine mudiwiru.” Nawo ko kureta hawadi kughutho: Josefu oyu ha tire karo eshi Barasabasi ngambi Justusi naMatiyasi. Ko kurepera kwawo eshi: “GhoFumu, owe wa dimuka mutjima dhawahe. Neghe po ghumweya gho pawawadi wa ghuna torora. Eshi gha kare muPostoli mukukarera, mudyango di ghana thighi Judasi mukunguru, gho ghatambire oku ya mutambera.” Munyima ha tendire fungu-fungu, no Fungu-fungu dha kwatekire Matiyasi.

Ko kumutorora gha kare mupostoli gho dikumi nohawadi.

Mañando ghaNyambi.

Responsorial Psalm

Dimbokatji Ps.103:1-2.11-12.19-20

R:

Fumu gha tanaritha dipuna dyendi mudiwiru.

Amen a haka kushogherera Fumu, na ha ka kushogherera dina dyendi dyokupongoka, mughuparo wange ghoghuhe. Amen a ha ka kushogherera Fumu no mbadi mbo ni vuramako thinu thofotji, pa yitenda yendi yoyiwa.

R:

Fumu…

Yoyishi thika di dya kara diwiru kayenda thikuma nomuve, kemo rwakara ruhakitho rwendi rorukuru thikuma, kwawakakumukarera.

Thika kayenda ko diva no ditokera, kemo gha tu yakunuka natwe kumaghuyi ghetu.

R:

Fumu…

Fumu gha tanaritha dipuna dyendi mudiwiru, ghuraghuri wendi wakara kuyoyihe no kwawahe. Mushogherere Fumu, muengeli ghongcamu, amwe muna kurundurura yirughana yendi, no ghutumanithi kuyiraghura yendi.

SECOND READING

Thitoya thoghuwadi 1 Jn.4:11-16

Mumbapira dhokutanga dhaMupostoli Johannesi.

Mwahakwa, thika dig ha tu neyedha Nyambi ruhakitho, kemo sho tu kuhake natwe karo. Noyofotji temba yu gha mone Nyambi. Ene ngeshi ha tukuhaka, ghana kukara Nyambi mumwetu no yihima yo ruhakitho rwendi yina kuyarera mumwetu. Yodigho tu dimuke eshi mumwendi tu di, naye mumwetu yoyishi, Mupepo wendi gha tu tumena. Natwe twayimona no twayinongonona eshi wihe gha tuma mwana gha kare mughamweni ghokaye. Oyu ghokunongonona eshi, Jesusi ne mwanaNyambi- Nyambi gha kara mumwendi, naye mwaNyambi gha kara. Natwe twadimuka ruhakitho rwaNyambi rokukwetu no twarutawa. Nyambi ne ruhakitho, no yu gha kara muruhakitho mwaNyambi gha kara, naNyambi mumwendi gha kara.

Mañando ghaNyambi

Gospel Acclamation

Hallelujah Jn. 14: 18

Mbadi mbo ni muthigha yira hathighana, mbo ni neya karo kukwenu, no mutjima dhenu mbo dhina yara no yishamberera.

Hallelujah

Evangelium

Jn. 17:11-19

Marundwerero ghoyitjanga yaJohannesi.

Mbadi na kukara roruhe mukaye. Ko koye na kwiya. Ene gho hana kukara shime mukaye. “Tate ghoKupongoka, ghu wa kunge mudina dyoye edi wa nipa eshi gha kare yira yofotji thika twe. Apa na karire nawo na wakungire mudina dyoye edi wa ni pire. Na wakungire ene mbadi pa yongarire no yofotji temba, shimengwa yu thiyongari pithendi eshi, yipwe ku rikanyitha yitjanga. “ Ene pañanyi-ñanyi nakumu kukoye. No nakughamba yi oku shime na karera mukaye, eshi ha wane yishamberera yange yoyiheya eyi na kara nayo. Nawapire ñando dhoye, kaye ne kawadhimba, yoyishi wone kaadi ha ka kaye kano, thika din a dhira kukara name no mukakaye kano. Mbadi na kuraperera eshi ghuwatundithe pakaye, ne ghuwakunge kughuyi. Awo ne kadi ha ka kaye kano, thika kenge di na dhira kukara me eshi kadi no muka kaye kano.

Wa pongwere kukoye paghushemwa. Ñando dhoye ne dhaghushemwa. Thika di wa ni tumine me mukaye, kemo dyo nawatuma name mukaye. No papawo na kupongwera me kukoye, kemo nawo shakupongwere kukoye paghushemwa.

Mañando ghoEvangelium

PENTECOST SUNDAY

Shundaha ghoPendekoste.

Mass during the Day

FIRST READING

Thitoya thokutanga Yit. 2:1-11

Mumbapira dhoYitenda ya Wapostoli.

Apa dya rikanyine diyuwa dyo difeste dyo Pentecoste ha karire waheya pofotji mundhugho. Kapupi kamanana, kokutunda mavuma muwiru gho kuninga yira dingundunga. No gha vurire mudyango dyo diheya di ha karire. Gho ha monine thinu thokuninga yira maretha ghomudiro no thatapathanie kwa yomuhe gho papawo. Waheya hayarire naMupepo ghoKupongoka,no hatangire kughamba madimi ghagho-nagho, thika kenge gha yi wa pire Mupepo ghoKupongoka. MuJerusalema, mwa kairre haJuda ho hahunga, awa ha tundire mumarudhi ghomahe gho pakaye.

Apa ha yuvire hanu mavuma, ko kukongosha mbunga dho dhikuru pofotji. Ene pa hayuvire eshi keheyu gho papagho ndimi dhendi ghana kughamba, mbadi ha dikuire eshi ngepi di ha nayi wana. Ko kuyoghotera no ghutetuka waheya ghuninga eshi awa hanu hana kughamba ne meshi waheya hakaGalileya. Ngepi di ghana kukuyuvera kehe yu gho papetu ndimi dhendi thinda? Twa kaParthians, Medes nawaElamites nanu homuMesopotamiya, HakaJudeya naKapadosiya, Pontusi naAsia, haFrigiya, naPamufiliya hakaEgiptena no dihenda dya Libiya Kuserene nawanu ho kutunda kuRoma, haJuda nawahayidena awa ha tumbura matawero gha waJuda, hakaKretans no hakaArabiya. Twa heya twayuvire edi hana kughamba mumandimi ghetu twathinda, yinu yoyikuru eyi gha tendire Nyambi.

Mañando ghaNyambi

Responsorial Psalm

Dimbokatji Ps. 104:1.24.29-31.34

R:

Tume Mupepo ghoye ghoHekudyetu no tende kaye ka kare ghupya.

Amen a ha ka kushogherera Fumu! Fumu, Nyambi wange, owe gho mukuru thikuma, wapwa kuyenge no ghuFumu ghoghuwa.

GhoFumu, yinu yoyingi wa tendire, muve,wayara ko yi watendire we, ene shemwa, yoyiheya mughunyanyami wayitenderire.

R:

Tume…

Ene ngeshi ho kuhonyo we, yina ku fa, no ngeshi ho shwayitha miňu dhayo yina kupwa po no yina kuhukera karo kurukungu. Owe ghuna kutapa muňu ghomoyo, nagho ghuna kukara po, ngambi muve karo, wahokitha mo moyo ghoghupya.

R:

Tume…

Dikuto dyaFumu di pire mahurero. Muninge yi mushambererithe Fumu yirughana yendi. Ninge yindhundha yange yimumenyamenyithe! Ame na wana yishamberera mwaFumu.

SECOND READING

Thitoya thoghuwadi Gal. 5:16-25

Mumbapira dhaMupostoli Paghulusi kwawakaGalasiye.

Eyi na kuninga ne yino eshi, muninge yipara yenu gha yi yarithe Mupepo waNyambi. Ndani mbo mudhira kutawa kuyirumbera yenu yoyirama. Eyi ya rumbera yirama yetu, yakutjaka no yi wahima Mupepo. No yi wa hima Mupepo yakutjaka no yi yarumbera yirama. Yinu yiwadi yi ne pofotji. Yodigho, mbadi mwakona kutenda thika di mwahima. Ene amwe, ngeshi Mupepo ghuna kumuoiteritha, mbadi mu di shime kwishi dhomuragho. Yirughana yo yirama ya kunegha yathinda. Ayo ne yino eshi: Rungu, kupira ghukushuki, dishawana, kukarera haNyambi hombango noghurodhi, ghunyathi, thidhimbo, nya ghupata nomvo, makuyakunukero no makuharanganyeno, nya ghudakwi, mandunda kuyinu yo rungu no yinu yimweya yokemo. Ame kushinga na kumushinga kuyinu yi, thika di na mushingire pakutanga: Oyu gho kutenda yinu yi mbadi mbo gha yora ghutungi waNyambi. Mbuyo dhaMupepo ne, ruhakitho, yishamberera, thiraro, ghudhughutjima, ghunongo, thiñeke, makurupero, kukumbirupitha no makurawero ghoye ghothinda. Ku yinu yokenge yi, muragho mbadi wa tenda po thinu! Awa ha hatera kwaKristusi Jesusi, ha pamarera dirura dyomitjima dhawo no yi rumbera yawo. Atwe twapara naMupepo, Mupepo ghu pake po karo yikaritha yetu.

Mañando ghaNyambi

Gospel Acclamation

Hallelujah

Wiye Mupepo ghoKupongoka no yarithe mitjima dhawatawi ghoye no pingwerere mo mudiro gho ruhakitho.

Hallelujah

Evangelium.

Jn.15:26-27; 16:12-15

Marundwerero ghoyitjanga yaJohannesi.

Jesusi gha ghambire kwawakathishongero wendi eshi:

“Apa mbo gheya mughambwereri oyu mbo ghatunda kwaTate, oyu mbo ni mu tumena, Mupepo gho ghushemwa, yo mbo gha ni nongonona. Namwe karo mbo mukone kunongonona, yoyishi nange mwakara kutunda kumatangero. Na kara noyinu yoyingi yo kumutongwera. Ene ngo mbadi sho mu yi tjwathane. Pa kwiya Mupepo ghoshemwa, mbo ghana mu yenditha mughushemwa gho ghuhe. Yoyishi aye mbo ghana tongora, kadi ya mumwendi thinda. Mbo ghana tongora vene eyi gha yuva, no mbo ghana muyuvitha yo kughutho. Mbo ghana ni fumaneka, yoyishi eyi mbo gha tambura kukwange, mbo ghana yi muyuvitha. Yoyiheya yi yakara yaTate ne yange karo. Yona ghambera eshi: Eyi mbo gha tambura kukwange, mbo ghana yi muyuvitha.”

Mañando ghoEvangelium.

SUNDAY AFTER PENTECOST

THE MOST HOLLY TRINITY B

Shundaha munyima dhoPendecoste. Difeste dyomwimbero waNyambi mwawahatu yofotji

FIRST READING

Thitoya thokutanga Deurt. 4:32-34.39-40

Mumbapira dhaDeteronomi.

Mosesi gha ghambire nawanu eshi: Mwipure keho yo mamyaka ghaya ghana kapita, kughutho wenu. Kutunda pa gha varekire Nyambi munu pakaye. Dha karire ñando dhokupiterera, kutunda kughuhura ghodiwiru kate kuyinu yimwe ndi? Endi koyidi yinu yimweya yi mwayuvire ndi? Endi hanu ha yuva diywi dyaNyambi gho muyumi dina kughamba pakatji ko mudiro, thika di mwayiyuva, no kupara ndi? Endi kwakarire Nyambi ghombango ghomandorwerera, oyu gha shimbire ditunga dyofotji mikatji ko matunga ghamwe paghukukutu no payitetukitho, payita yoyikukutu endi pamukungu, pawoma, yoyihe yi gha tendire Fumu Nyambi wenu muEgiputena muthitunu meho thenu? Muyitwathane yi dyarero no muyiture mumitjima dhenu eshi: Fumu ne yo Nyambi ghoghushemwa, mudiwiru nopamuve, yo yiye pithendi mbadi ko karo ghumweya. Mukuthe miragho dhendi thika di na kudhimu pa me mudyarero. Podigho eshi namwe nohanenu mbo muparerure muditunga di gha mu pa Fumu Nyambi wenu kuroruheya.

Mañando ghaNyambi

Responsorial Psalm

Dimbokatji Ps.33:4-6.9.18-20.22

R:

Yarogha kwawanu wa hakara eshi, Nyambi ne Fumu wawo. No diko di gha torora eshi, dyendi.

Yoyishi, yina kuhokoka yi ghana kuninga Fumu, no yoyiheya yi ghana kutenda ne, ya tanara. Aye ne gha haka ghuhunga no ghuwa, yidimukitho yaFumu yo makurupero ghoruhakitho rwendi, ya yara kaye kokahe.

R:

Yarogha…

Fumu, gha tendire diwiru nomañando ghendi no yoyihe yo padiwiru, pamarawero ghendi ya kara po. Yoyishi gha ghambire, ho ya karire kemo, gha raghurire, nayo gha yikara po.

R:

Yarogha…

Oyu ne Hekudyetu, yo gha kunga waheya hakakumukarera, nawa ha kurupera ngcamu dhendi. Yo ghokuwaghamwena, no kukunga moyo dhawo kudiyerenge.

R:

Yarogha..

Tu kurupere paFumu mbo ghana tu ghamwena nokutukunga. Gho Fumu, kare nongcamu dhoye gho mughamweni wetu, yoyishi, mumoye twa paka makurupero ghetu.

SECOND READING

Thitoya thoghuwadi Rom. 8:14-17

Mumbapira dhaMupostoli Paghulusi kwawakaRoma.

Wahe wa wayenditha Mupepo waNyambi ne, hana Nyambi. Mupepo ghu ha mu pire mbadi wamutenda ghupika no mbadi ghuna kumuparitha muwoma, kadi kemo. Amwe mwatamburire Mupepo ghu wamutenda hana Nyambi, no ghu watwithithanga Nyambi eshi: “Abba”. Kuninga eshi: “ Tate”. Mupepo ghu wanongonona pofotji no midhimu dhetu eshi twanaNyambi twe. No ngeshi twanendi twe, ngo natwe karo twakakuyora. Atwe ne twakakuyora yaNyambi, pofotji naKristusi. Kuninga eshi ngeshi gha tu nyanda pofotji nendi, mbo tuna fumana karo pofotji nendi.

Mañando ghaNyambi

Gospel Acclamation

Hallelujah Yit. 1:8

Difumanekero kwaWihe, no kwaMwana, nokwaMupepo ghoKupongoka, oyu gha kara noyu gha karire no yu mbo gheya, mukangcamu dhodhihe.

Hallelujah

Evangelium.

Mtt.28:16-20

Marundwerero ghoyitjanga yaMateghusi.

Hakathishongero dikumi noyofotji, ha yendire kuGalileya kudirundu di ghawarawerire Jesusi eshi, ko sho hayende. Apa ha mu monine, ha mu kandererire ngambi kenge ha mu tamangerire hamweya. Jesusi gha henyine pepi no ghawatongwerire eshi: “Ku kwange ha tapa ngcamu dhodhihe mudiwiru nopamuve. Muyende kumarudhi ghomahe, no mukatende hanu hakathishongero wange. Mukawayoghe mudina dyaWihe nodyaMwana nodyaMupepo ghoKupongoka. Mukawahonge mukukwata yoyiheya yi na murawera. No mudimuke eshi: Ame ne nenu ni di mumayuwa ghomahe, kate paghuhura ghokaye.”

Mañando ghoEvangelium.

THURSDAY AFTER TRINITY SUNDAY C

THE BODY AND BLOOD OF CHRIST

Ghune munyima dho shundaha ghoPendecoste

Yirama no manyinga gha Jesusi Kristusi

FIRST READING

Thitoya thokutanga Ex. 24:3-8

Mumbapira dha Exodusi (Mashwaghero)

Agha ne ghomanyinga ghoghundambo agha gha tendire Fumu Nyambi mumwenu.

Ko kwiya Mosesi no gha tongwerire diko mañando ghaFumu, no miragho dhendi dhodhihe. Ene waheya ha mu huthire pofotji eshi: “Mañando ghomaheya agha ghana ghamba Fumu mbo tu na ghatendi.” Mosesi gho gha tjangire mañando ghaFumu ghomahe, ko kuroyitha kwendi mathiku-thiku, no gha kashokekire thinyaku mwimi dhodirundu, dhomawe dikumi no mawadi gho kunenekanya gho thivurukitho thika di gha karire mako dikumi no mawadi gha Isragheli. Ko kutuma kwendi hangughu waIsragheli, awo haka yambire muyambo ghokukoñerera, no gha payerire po mandwedho ghukare muyambo ghomatumero ghokwaFumu. NaMosesi gho ghatupurire manyinga gho gha pakire muturonga; manyinga gha gha thigharire po gho ghatjakerire kuthinyaku. Munyima gha ghatumburire rukwaro roghundambo ko kudhitoya kwendi kughutho wawanu. Awo ha huthire eshi, “Yoyiheya yi ghana kughamba Fumu mbo tu na yitendi no kuyitegherera.” Mosesi gha shimbire karo manyinga no gha tjakerire hanu no gha nikire eshi, “Agha ne manyinga ghoghundambo waFumu oghu ghana nungu Nyambi nomañando ghomaheya gha.”

Mañando ghaNyambi

Responsorial Psalm

Dimbokatji Ps.116:12-13.15-18

R:

Nomuyambo ghoyinwa, mbo na nongonona maghamweno ghendi, no netha dina dyendi Fumu.

Ngepi di mbo ni murawera Fumu, kuyitenda yendi yoyihunga yoyihe? No muyambo ghoyinwa, mbo na nongonona maghamweno ghendi, no mbo netha dina dyendi Fumu.

R:

Nomuyambo…

Fumu mbadi gha kengerera yi fa yawakareri wendi ho ndhika.

Yame mukareri ghoye ghoFumu, kutunda kumushamurukero wange, na kara no mukareri ghoye: Yoyishi yowe wanipa horo.

R:

Nomuyambo…

Na haka kukushogherera nomuyambo gho matumero, no na himi kwitha dina dyaFumu. Maturekero ghange mbo na gha tapa kwaFumu, kughutho ghombunga ghodiko dyendi dyodihe.

SECOND READING

Thitoya thoghuwadi Heb. 9:11-15

Mumbapira kwawaHeburayi.

Ene Kristusi kare gheya, Aye ne muPristeri shokuru, ghoyitenda yoyiwa eyi yi di po pañanyi-ñanyi. Aye mukareri ghotende dhoghundambo dhokupiterera, no dhayara edhi gha dhira kutenda munu. Kuninga eshi, mbadi dhopakaye kano. Mutende dhoKupongoka dhi, parofotji hengenine mo Kristusi no manyinga ghendi thinda, mbadi nomanyinga ghoñombo no ghomandana temba. Kuninga eshi, gharikanyithererire makomweneno ghororuheya. Ene apa hakashire hakakupira ghukushuki nomanyinga no ghomandwedho no- mututwi ghomandema, ha kushukire shemwa. Pa rungatji ne keho sho gha tu kushukithe Kristusi, kuyighayara yoyitenda yetu yokututwara kuku fa eshi, tukone kukarera Nyambi ghomuyumi. Payinu yi po gha karerire thinda Kristusi muyambo ghokuyara paMupepo ghoKupongoka pa kukuyamba kwaNyambi. Yodigho, aye ne yokatji koghundambo gho ghupya aye gha fire mukukomonona hanu maharwero ghawo, kughutho ghoghundambo ghoghukurukuru eshi, awa hapwa kwitha mbo ha kone kuyora maturekero ghororuheya.

Mañando ghaNyambi

Gospel Acclamation

Hallelujah Jn.6:51-52

Yame ghuroto gho ghuyumi ghu washurukire mudiwiru. Ngeshi hadi ghumweya ghuroto ghuno, mbo ghana para kuroruheya.

Hallelujah

Evangelium.

Mrk.14:12-16.22-26

Marundwerero ghoyitjanga yaMarkusi.

Mudiyuwa dyo kutanga dyomaghuroto ghothuthuñunyi, omu ha paghangire ndjwighana ghoPaska, ha mwipura hakathishongero wendi eshi: “Ku dyango munye ghunahimi oku sho tu kakuroyithere murarero?” Ko kutuma kwendi hakathishongero hawadi eshi: “Muyende mudighumbo, muna kawana munu, oyu gha tangena kandimbe komeyu, ho mu kamukuthe. Momuhe omu sho gha kangene mukepure thinda shandhugho eshi: ‘Muhongi wetu ghana kwipura eshi: Kupi sho gha dyere murarero nawakathishongero wendi?’ Ghana kamuneghedha ngonda dhokuwiru edhi dhapwa kuroyitha. Mo sho mukatende mwara wetu.” Hakathishongero hayendire mudighumbo no hakawanine yoyihe thika kenge di gha yiwatongwerire. Ko kayareka kwawo murarero ghoPaska. Shime ha karera mukudya, ko kudhamuna Jesusi ghuroto, gha tumera kwaNyambi ha ghu yondora no kughutapa kukwawo ghuninga eshi: “Mutumbure, mudye, eyi ne yirama yange.” Karo kemo ghatumburire thinwitho, hatumera no kuthita pa kukwawo, nawo ha nwine mo wahe. Hawatongwera eshi: “Ghomanyinga ghange gha, manyinga ghoghundambo ghoghupya. Agha mbo gha mu ndendeshera kwawanu hohengi. Shemwa na kumutongwera eshi, mbadi mbo ninwa karo mbuyo dhothitondo thovinyu, kate mudiyuwa di mbo ni ka kuma mughuFumu waNyambi. Po mbo ni kanwa ko mughuhingo ghoghupya.” Apa ha manine kwimba dimbo dyo makughero, hashwayire no gha yendire kudirundu dyondhwe.

Mañando ghoEvangelium

Friday after the second Sunday after pentecost

THE SACRED HEART OF JESUS. B

FIRST READING

Thitoya thokutanga Hos.11:1.3-4.8-9

Mumbapira dhaMuporofeta Hosiya.

Fumu gha ningire eshi: “Apa gha karire Isragheli shime mwanuke, na muhakire, no apa namushwayithire muEgiptena, na mutoyire eshi mwanange. Ene yame Fumu Nyambi no thinda na hongire Efrayimu kuyenda, no nawayangatire mumoko ghange; ene mbadi gha dimukire eshi yame yu nakuwerukitha. Gho nawakokire nomiya dhoghunongo, no matumo ghoruhakitho. No nakarire yira yu ghana kuwaghora thitondo mumomotji dhawo. No natonamenine kughutho wawo no kuwakorera. Ngepi sho ni kutape we, Efrayimu? No we, Isragheli? No ngepi sho ni muyipithe we, yira Adima? No kurukanyitha yira Seboyimu? Mutjima wange ne ghuna kuhonyo mumwange, no muna shangumuna karo yitokota yange. Ame mbadi mbo ni pata karo thikuma kughutho, no mbadi mbo ni dhidhimeka karo, Efrayimu, yoyishi ame ne noNyambi ghoKupongoka, no mbadi no munu oyu gha di mukatji kenu. No karo mbadi mbo niya kukwenu noghukenya.

Mañando ghaNyambi

Responsorial Psalm

Dimbokatji Is.12:2-6.

R:

No mbo muna veti meyu noyishamberera mudivetu-vetu dyoruviya.

Shemwa Nyambi ne mushuturi wange, mbadi mbo niyapa: Yoyishi Hekudyange Nyambi ne ngcamu dhange, nomuPisalomi wange.

No yo ghana kara mushuturi wange. No mbo muna veti meyu noyishamberera mudivetu-vetu dyoruviya.

R:

No mbo…

No mbo muna ningi mudiyuwa di eshi, “Mutumere Fumu, no mwithe dina dyendi! No mbo mudimukithe yitenda yendi kumako! No kuyuvitha dina dyendi eshi dya piterera.

R:

No mbo…

Mwimbere muPisalemi kudikuto dyaFumu, yoyishi ghana tendi yinu yongcamu no kuyidimukitha mukaye kokaheya.

Mushogherere, no muyambaghuke amwe mwatunga muSiyoni, yoyishi Mupongoki waIsraeli ne mukuru mukatji kenu.”

SECOND READING

Thitoya thoghuwadi Efs. 3:8-12.14-19

Mumbapira dhaMupostoli Paghulusi kwawakaEfesiusi.

Ngambi kenge di na kara no mumbiru kwatawi wahe. Aye gha ni pire thitapa eshi, ni yuvithe mbudhi dhokudhira kughutungi waKristusi. Ame nakona kuyuvitha waheya eshi Nyambi ghomuvareki ghoyinu yoyihe, ngepi di ghana kurughanitha pañanyi-ñanyi dighano dyendi dyokunda, kutunda pa shadyundeka mumyaka mathere no mathere. Ene pañanyi-ñanyi Nyambi, ghana hokora ghonyanyami wendi ghoghukuru pangirishe dhendi, kwaraghuri no kumangcamu ghodiwiru. Thika di ghayiturekire thinda roruheya pakare eshi paKristusi Jesusi, ghoHekudyetu, po mbo thirikanyena mo thitambo thendi. Makupakerero pofotji nendi, no pamatawero ghetu ghomumwendi, atwe twakona kuyenda kwaNyambi, no kupira no ghoma temba no ghukurupera. Yoyidigho na kutongamena kughutho waTate. Oku gha tunda mambunga ghomahe ghawatawi ghomudiwiru no ghopamuve. Ame kurapera na kurapera eshi, paMupepo wendi mutungi wendi ghoghuFumu mbo ha mupe ngcamu dhokumutanaritha. Eshi Kristusi mbo gha tunge mumutjima dhenu pamatawero ghenu no mbo muhoke muruhakitho no kutanara. Ame na kumukanderera eshi, mutanare pofotji nawatawi wahe, ho muwatjwathanithe ghuyaghuyu no kayenda no ghure noghudhungi ghoruhakitho rwaKristusi eshi, papetu rwahura. Mudimuke ruhakitho rwendi. Ruhakitho ru rwapiterera maghano ghetu. No ghuyara waNyambi ghu muyarere shemwa.

Mañando ghaNyambi

Gospel Acclamation

Hallelujah Mt. 11:29.

Mukukambeke djoko dhange no mukuhongere kukwange. Yoyishi ame ne nomukamutjima ghoghuporothi noghokukufupipitha.

Hallelujah

Evangelium

Jn. 19:31-37

Marundwerero ghoyitjanga yaJohannesi.

Edi ne diyuwa dyoghukwoko dyomakuroghithero ghoPaska. Ene Hajuda mbadi gha hakire eshi yirama ne yambe pathikushe muSabbata. Yoyishi Sabbata ne dyakarire diyuwa dyodikuru. Yo hepwerire kwaPilatusi eshi, hanu wa hanamba payikurushe, hapwe kutjoraghura maghuru ghawo no hawatundithe po. Ko kwiya hamashurundate no hatjoraghure maghuru ghamukakutanga, ndani ghoghuwadi awa hambire pofotji naJesusi. Apa ha henyine kwaJesusi no kumona eshi ghana fu, mbadi hatjorire maghuru ghendi. Ghumweya ghopawamashurundate, gha tuyurire matji dhendi nodighonga, popo vene ko kundendesha mo manyinga nomeyu. Oyu gha yo monine, gha yi nongononine, no manongweneno ghendi ne gha ghushemwa. No gha dimukire eshi ghishemwa ghana kughamba, namwe mukone kutawa. Ya karire kemo yikone kurikanya yi tjanga eshi: “No thishokora temba mba tjora papendi.” Thitjanga thimweya thaghamba karo eshi: “Mbana dighamena koyu ha twire.”

Mañando ghoEvangelium.

SECOND SUNDAY IN ORDINARY TIME B

Shundaha ghoghuwadi mumaruvedhe ghokukukarera

FIRST READING

Thitoya thokutanga 1 Sam.3:3-10.19

Mumbapira dhokutanga dhaSamuel

Samuel ghararire mundhugho dhokupongoka dhaFumu, omu thakarire Thimbangu thoghundambo naNyambi, apa gha mwithire Fumu eshi: “Samuel, Samuel!” Ghahutha eshi; ‘yameno’ munyima ghatjira kwendi kwa Eli. Kokaghamba eshi: yameno oyu ghunetha, aye Eli gha muhutha eshi: “mbadi na kwitha me, yende ghu karare.” Munyima Samuel ko kuhuka gha karare. Paruwadi Fumu gha mwitha karo, “Samuel, Samuel!” Kokupinda Samuel ghayende kwa Eli, no kaghamba eshi, yameno oyu ghunetha. Eli kokuhutha eshi mbadi na kwitha mwanange, yende ghu karare. Samuel mbadi ghakarire no dighano dyaFumu, no ñando dhaFumu okushime mbadi gha dhiyuva rumweya. Paruhatu Fumu gha mwitha karo. Aye shime ko kupinduka ghayende kwa Eli, no kaghamba eshi, “yameno oyu ghunetha.” Munyima Eli poghatjwathanine eshi, nane Fumu ghna kwithanga murumeghana yu. Eli kokutongwera Samuel eshi, yende ghukarare, ene ngeshi ghakwithe karo, huthe eshi: ghmbe Fumu mupikoye kuna kukutegherera. Munyima Fumu pogheyire no kuna mwimanena, no kumwitha thikadi ghamwithire pakutanga, Samuel, Samuel! Samuel kokuhutha eshi, “ghambe Fumu mupikoye kuna ku kutegherera. Samuel ghakurire, naFumu nendi ghakarire, no kuninga eshi, ňando dhendi mbadi dhiwere pa muve.

Mañando ghaNyambi

Responsorial Psalm

Dimbokatji Ps. 40:2. 4. 7-10.

Yameno, Fumu! Neya kukutenda mahimeno ghoye.

GhoFumu, amen e na rurire kumaghamweno ghoye. Naye gha fumberire kukwange, no gha yuvire yikumbera yomaghamweno ghange. Gha ni pakire dimbo dyodipya mukanwa, edi ne difumanekero kwaNyambi wetu.

R:

Yameno…

Mbadi wa haka muyambo gho kupagha, ngambi ghoyidya, endi gho kukoñerera, ngambi gho maharwero mbadi wa ghukumbera, eyi wa hima we ne ghutawedhi. Yona ghamberire eshi ‘yameno.’

R:

Yameno…

Thika di ha yi ni tjangerire pakare-kare, murukwaro rokupeta. Nyambi wange kutenda mahimeno ghoye ne, thothirumbera thange thokutanga, ñando dhoye ne moyo wange ghoghuhe.

R:

Yameno…

Na ghmbire noyishamberera yoyikuru muthigongi eshi: Yowe wa ni porerire, wa yidimuka ghoFumu.

SECOND READING

Thitoya thoghuwadi 1 Kor.6:13-15. 17-20

Mumbapira dhokutanga dhaMupostoli Paghulusi kwawaka Korinte.

“Yidya ne yadira, no dira ne dyayidya.” Ghuhunga, Nyambi ne mbo ghana dhongonona yoyiheya yi. Yirama yamunu, mbadi yayirumberitha yorungu. Ene yaNyambi yu gha kara Fumu, no Fumu karo peghuru dhoyirama yetu. Nyambi gha tumunine Fumu nongcamu dhendi mukufa, naFumu yu dyo mbo ghatutumuna natwe. Mbadi mwadimuka eshi, yirama yenu ne yipo yaKristusi ndi? Ni tumbure thipo tha Kristusi gho ni thitende mukadhi ghorungu ndi? Kadi kemo! Ene yu ghokukakatera naFumu, gha kara nomudhimughofotji nendi. Muthighe yipara yorungu. Kehe diharwero di ghna kutenda munu, kadi dya kuyirama yendi, ene yu ghana kupara murungu, ghana kuharura kuyirama yendi thinda. Karo mbadi mwa dimuka eshi, yirama yenu ne Tembeli waMupepo ghoKupongoka, oyu gha tunga mumwenu noyu mwa wanine kwaNambi, ene kadi mumwenu mwathinda. Amwe ne mwapwa kughura. No paro dhapwa kuruwera. Yodigho mu fumaneke Nyambi muyirama yenu.

Mañando ghaNyambi

Gospel Acclamation

Hallelujah 1 Sam 3:9; Jn 6:68

Ghambe Fumu, mupikoye ne kuna kutegherera: yowe wa kara no mbudhi dho moyo ghororuheya.

Hallelujah

Evangelium

Jn.1:35-42

Marundwerero ghoyitjanga yaJohannesi

Eyi dya vire ko, ha yendi ko karo Johannesi nawakathishongero wendi hawadi. Apa gha monine Jesusi ghana kupita, ha ningi Johannesi eshi: “Oya ne yoNdjwighana waNyambi!” hakathishongero hawadi ha yi yuvire oku ghana kuyighamba, no ha kuthire Jesusi. Pakuthetuka Jesusi no gha monine oku hana kumukutha, gha wepurire eshi: “Yinye muna kushana?” Awo ha huthire eshi: ‘Rabbi’ (kuninga eshi Muhongi) “kupi ku watunga?” Ha watongwera eshi: “Na tuyende, mu kamone ko.” Nawo hayendire no ha ka monine ku gha karire. Nako dhi dh karire yira muviri dhodikumi pamathiku-thiku, no ha ghondhire kukwendi diyuwa dyodiheya. Andriyasi ghomina Simon Petrusi, yoghopawa hashawadi awa ha kuthire Jesusi pakumana kuyuva kwaJohannesi. Andriyasi ko kushana pakutanga mukurwendi Simon no gha mutongwerire eshi: “Tuna mu wana twe Mesiya” kuninga eshi, ‘Kristus.’ Ha mutwara kwendi kwaJesusi. Ngenyu gha mudemine gha mu kenge , ha ningi eshi: Yowe Simon ghomwana Johannesi. Mbana kutoyo eshi, ‘Kefasi,’ kuninga eshi, ‘Diwe.’

THIRD SUNDAY IN ORDINARY TIME

Shundaha ghoghuhatu mumaruvedhe ghokukukarera

FIRST READING

Thitoya thokutanga Jonah 3:1-5. 10

Mumbapira dhaMuporofeta Jonah

Ñando dha Fumu dheyire kwaJonah: ‘wimane!’ dyo gha ghambire, “Yende kuthitata thothikuru thaNinive, no ka wa yawere thikadi na kutongerire.’ Jonah kokumatuka no ghayendire kuNinive paghutawedhi wendi ku ñando dhaFumu. Ninive kwa karire thitata thothikuru kupiterera: tha shimbire mayuwa mahatu mukuthi tjinaghana. Jonah gha shimbire ruyendo ro diyuwa dyofotji gha yende muthitata. Gha yaghurire mu mañando gha, “Kuna thighara mayuwa makumi mane, na Ninive gho kapwe kuyipitha. Hanu ho mu Ninive hatawire mwaNyambi; no ha hanyithire mbudhi dho madhirerekero, no havatire yishaka, kutunda kwawakuru kate kwawanuke. Nyambi gha monine makondjero ghawo gho kuthigha yikara yoyiyi, no gha shaghekire kuwapa mahumbithero.

Mañando ghaNyambi

Responorial Psalm

Dimbokatji Ps.25: 4-9.

R:

Fumu, ni dimukithe mayira ghoye.

Fumu, ni dimukithe mayira ghoye, no ni honge mayira ghoye. Tawe eshi, ghushemwa ghoye ghu ni yendithe, no ni kuhongere mo, yoyishi yowe Nyambi ghumukomononi wange.

R:

Fumu…

GhoFumu, vuruke thiñeke no ruhakitho eyi wa neghedhire kare. GhoFumu ni vuruke mu ruhakitho roye, yoyishi owe ne gho munongo.

R:

Fumu…

Fumu ne munongo no muhunga: thinda gha neghedha hayiharuri ndhira, no ku yenditha haka kukufupitha mundhira dhodhihunga. Ghahonga ndhira dhendi kwawahepwe.

SECOND READING

Thitoya thoghuwadi 1 Kor.7:29-31

Mumbapira dhokutanga dhaMupostoli Paghulusi kwawaka Korinte

Eyi na kuyighambera mwayendhange, yoyishi nako ne dhifupi. Yoyi, kutunda pañanyi-ñanyi, hakakuyeka mbo hana para yira hadhike. No hakakuyokoya, yira mbadi hatokota, hakakushmberera, yira mbadi hana kushamberera. Hakaghura yira mbadi hana kumuna. Shemwa, awa ha rughanitha yinu yokaye kemo, ha kona kupara yira mbadiko thi thi wa di. Yoyishi, thika di twa kadimuka kaye kemo, kutunda kana kutunda po.

Mañando ghaNyambi

Gospel Acclamation

Hallelujah Mk.1:15

Eshi: “Nako ne dhina rikanya, no ghuFumu waNyambi ghuna kokera. Mupiruke no mutawe Mbudhi Dhodhiwa.”

Hallelujah

Evangelium

Mk. 1:14-20

Marundwerero ghoyitjanga yaMarkusi.

Apa gha pwire kukwata Johannesi, Ko kuyenda Jesusi kuGalileya, gha ka yuvithe mbudhi dho ghuFumu waNyambi. Eshi: “Nako ne dhina rikanya, no ghuFumu waNyambi ghuna kokera. Mupiruke no mutawe mbudhi dhodhiwa. Oku shime ngahokwera mukuyenda kumbadi dhodikuruviya dyaGalileya, ko kumona kwendi Simoni namunendi Andreyasi, Awo ne pa kuteya dikwe dyawo. Yoyishi awo ne harupagha thi. Haningi Jesusi kukwawo eshi: “Mwiye munikuthe, mbo na mu tendi mwaruteya hanu.” Wangu popo kop kuthigha makwe ghawo ha mu kuthe. Oku shime ha yendi kughutho gha monine Jakopusi ghomwana Sebedeghusi naminendi Johannesi, oku hana kuroghitha makwe ghawo muwato. Hawetha kwendi, awo ne hathighire Wihawo Sebedeghusi nawarukwati thi wendi muwato, no ha mu kuthire.

Mañando ghoEvangelium.

FOURTH SUNDAY IN ORDINARY TIME

Shundaha ghoghune

FIRST READING

Thitoya thokutanga Deut. 18:15-20

Mumbapira dhaDeteronomi.

Mosesi gha ghambire nawanu eshi: ‘Nyambi wenu mbo ghana tapa muporofeta gho kupitura yira me, mukatji kenu, mukatji kawaminenu, kukwendi ko mbo mutegherera. Thika di mwepurire mwathinda Fumu Nyambi wenu muHoreb mudiyuwa dyathigongi thishokuru eshi: Ame mbadi wa kukona karo kutegherera. ‘Dyo ghuna kughamba’ Diywi dyaFumu Nyambi wange, no kumona temba mudiro ghushokuru, eshi mbo ni fe’ Nyambi gha ghambire nange eshi, ‘Yoyiheya yi hana kughamba yinarogho. Mbo na tapa muporofeta yira we mumwawo no kwawaminawo; mbo na mupa ñando dhange mukanwa kendi, aye yo mbo ghawatongwera yoyiheya yo mañando ghange agha na murawera. Munu yu gho kudhira kutegherera kumañando ghange agha ghana kughamba mudina dyange, mbadi mbo ghakakona kahutha kukwange kuyinu yi. Ene muporofeta yu mbo gha kununeka kughamba mudina dyange mañando gha nadhiri kumurawera eshi ngo gha ghambe, endi kughambera mudina dyange mo hanyambi hombango, muporofeta yo mbo ghana fu.”

Mañando ghaNyambi

Responsorial Psalm

Dimbokatji Ps.94:1-2.6-9.

R:

Oku ha ka ni yundhaghurire hakerekandongo wenu no kuniyereka, ngambi kenge di ha monine eyi na tendire.

Mwiye na yumbaghuke kufuma dhaFumu, mutuhumwerere kudiwe, oku twana wana twe maghamweno. Mutuyende twe kukwendi no ghushamberera, gho tu mu humwerere no membo ghomatumero.

R:

Oku ha ka...

Mwiye na tu kuvame, tu neghedhe fuma kughutho wendi, mwiye na tukotame, mwiye na tu tongamene kughutho waFumu gho muvareki wetu.

R:

Oku ha ka...

Aye ne Nyambi wetu, atwe twadiko dyendi, mutanga wendi, ndjwi dhendi, edhi ghana kukorera panyara dhendi. Ngeshi ngo munahaka kutegherera kudiywi dyendi dyarero!

R:

Oku ha ka...

Mwakukuta mitjima dhenu yira dhoMeriba, no yira mudiyuwa dyokuMasa mumamboreya, oku ha ka ni yundhaghurire hakerekandongo wenu no kuniyerera, ngambi kenge di ha monine eyi na tendire.

SECOND READING

Thitoya thoghuwadi 2 Kor. 7:32-35

Mumbapira dhkutanga dhaMupostoli Paghulusi kwawaka Korinte.

Ame na haka eshi mwakudhekera. Murume gho kuyeka gha kone ndani kutokomena yinu yaFumu eshi, ngepi di gha kona kuhaka Fumu. Murume gho kuyeka gha thotera karo kuyinu yokaye. Eshi ngepi di sho gha kone kuhaka mundambo wendi. No mathotero ghakutjaka. No karo kwamukamadi ghomudhike no kwamushengeteya gha kutapa kuyinu yaFumu eshi, yirama no mudhimu. Ene mukamadi ghokuyeka gha thotera yinu yokaye eshi, ngepi di sho ghahake munu wendi.Yino kunakuyighambera me kumahimeno ghange. Mbadi na haka eshi, mukare mughukukutu. Nahaka eshi, mupare mudikuto no mumakupakerero ghomakutupwero gho kwaFumu.

Mañando ghaNyambi

Gospel Acclamation

Hallelujah Mt. 11:25

Munako dhi gha ningire Jesusi eshi: ‘Na kukugha we Tate, Fumu ghodiwiru no ghomuve, yoyishi wa horekire yinu yi kwawa nyanyami no kwawakakukuhonga, no wayihokorire kwawanu vene.’

Hallelujah

Evangelium

Mark. 1:21-28

Marundwerero ghoyitjanga yaMarkusi.

Jesusi nawakathishongero wendi hayendire kayenda kuthiko thaKafarnaghumu. No mudiyuwa dyoSabbata hengenine Jesusi muSinagoge no gha tangire kuhonga. Wahe hatetukire kuyihonga yendi, yoyi gha hongire yira mukadikuto. Kadi yira hakamarukwaro. Musinagoge wawo, mwakarire mukamandengure gho kuyara mupepo ghoghumango, oyu gharumukire eshi: ‘Porere keho! Nye sho tu tende noye twe ghoJesusi ghomukaNasareti? Kutushinya ghuneya ndi? Na kudimuka eshi, yowe dye. Ghomupongoki waNyambi we!’ Jesusi gha mu rawerire eshi: ‘Porere ko, no ghushwaye mumwendi!’ NoMupepo gho ghumango, wamukashithire apa gha shayire mumwendi ghukuyerera. Nowahe hatetukire kate kukwipudhura eshi: ‘Yinye yi? Yihonga munye yoyipya yi? Oyu naye gha kona kurawera kumupepo dhodhimango, eshi nadho dhimuyuve.’ No mbudhi dhi dhapupanine muGalileya yomuhe.

Mañando ghoEvangelium.

FIFTH SUNDAY IN ORDINARY TIME

Shundaha ghoghukwoko

FIRST READING

Thitoya thokutanga Jb.7:1-4.6-7 Mumbapira dhaJobu.

Jobu ko kutameka kughamba eshi:

‘Yipara yamunu kwakara yira yirughana yokuthineneka yo pathinaghukayita, awo kwakara karo yira hanu wa hakuta muyirughana yoyikukutu yira mupika, yu ghana vuruka endi kumona mumbudye ghoghutenda, yira murughani yu ghana kudhira kuvuruka; ene ndjambi dho kehe kaghonda ghana kudhini pa, mbadi ko yo kukwange ene ghuthiku ghotoko-toko. Ngeshi ha ni rara kughayara no kutetuka eshi ruvendhe munye shodive eshi, ngepi ghuthiku pamaranga!” Kupira maturumuthero ni na kughayara kate kumona nota ghana kawa. Myuwa ghange ghana pu, ndani no kushwagha no kuthigha kupira makuruperero munyima. Vuruke eshi yipara yange yira muñu, ndani no meho ghange mbadi mbo ghamona karo yishamberera.

Mañando ghaNyambi

Responsorial Psalm

Dimbokatji Ps.147:1-6.

R:

Aye gherukitha ha ka kukasha mumutjima.

Mu mukughe Fumu! Eyi ne yarogha kwimbera difumanekero dyaNyambi wetu, no ya towara mukwimba dimbo edi dina kutamba kukwendi.

R:

Aye...

Oyu ne yoFumu, oyu ghana ku tendurura karo Jerusalema no yo ghana kukongwedha Haisraeli wa hakuhanya. Aye gherukitha ha ka kukasha mumutjima, no kudhinga yitombo yawo. Karo ye gha rikanyitha thitara thonungwedhi dhodhiheya, no gha ta dina kehedinungwedhi.

R:

Aye...

Hekudyetu ne mukuru nomukangcamu, no maghano ghendi, gha pira ghuhura. Fumu gha yeyura karo wa hapira maghano, ene hakakushwena Nyambi, ghawa mbirupitha kate mumuve.

SECOND READING

Thitoya thoghuwadi 1 Kor. 9:16-19.22-23

Mumbapira dhokutanga dhaMupostoli Paghulusi kwawaka Korinte.

Ngeshi hani yuvitha mbudhi, ethi mbadi thinu thokunipa dikuto me. Ame na kuyuvitha Mbudhi, yoyishi nikone ndani kuyuvitha! Ene mwawe ngeshi na kuyitenda yi! Ngeshi ha ni yitendi kumahimeno ghange, na kona kuthuma yiruwera. Ene mbadi na kuyitenda no mahimeno ghange, ethi ne thirughana thi gha ni pa. Kupi ne yiruwera yange keho? Yiruwera yange ne yino eshi: ‘Ame no muyaghuri gho mbudhine nyara-nyara na kuyuvitha mbudhi. No mbadi na rughanitha no mahimeno ghange pa kuyuvitha no pakuyanutha miragho dho mayuvithero ghombudhi.’ Ngambi kenge di na kara horo no kuhatera temba kwamunu ghumweya, na kutendire no thinda nikare no mukareri wawaheya eshi, Kristusi ghawane hanu hohengi. Kwawakashu name nakashire eshi nishwe hakashu. Kwawaheya, na karire yoyihe yira mukughamwena hamweya. Yoyiheya yino, na yitenderanga pamurandu ghombudhi. Eshi ni hatere name kumbuyo.

Mañando ghaNyambi

Gospel Acclamation

Hallelujah Jn. 8:12

Parumweya gha ghambire Jesusi kwawanu eshi: ‘Yame munyenge ghokaye. Oyu gho kunikutha, mbadi mbo gha yendaghura mumakokore, ene mbo ghana wana munyenge ghokuta pa moyo.’

Hallelujah

Evangelium

Mark. 1:29-39

Marundwerero ghoyitjanga yaMarkusi.

Apa ha shwayire muSinagoge, ko kuyenda kwawo naJakopusi naJohannesi mundhugho dhaSimon naAndreyasi. Ngumwenya Simoni, yirama gha korwire. Ko kuyimuyuvitha naye Jesusi. Hayendi kukwendi, no ghamukwatire munyara, gha mu pinduthe. No yikorwa yamutundire popo. Mbuyama yu ko kuwayarekera kwendi. Pakutokera diyuwa, ko kumuretera kwawo hakakukorwa wahe, nawahakarire no mupepo dhodhimango. No dighumbo dyodihe dyakukongwedhire kuthero. Nawahe wa hakarire no yikorwa yayonayo hapwire kwirukitha, no gha shwayithire hashatani hohengi. Hashatani mbadi ha konine kughamba, yoyi ha mu dimukire. Murughura, oku shime no kuva temba diyuwa, ko kupinduka gha yende, kudyamgo dyopithendi, gha karapere. Simoni nawahakarire nendi, ha mu kuthire. Apa hakamuwanine hamutongwerire eshi: ‘Kushana hana kukushana waheya.” Ko kuwahutha kwendi eshi: ‘Tuyende kumaparaghumbo ghamweya, nako nikayaghureko. Eyi ne yoneghera.” Ghaye gha yendire Galileya yomuhe ghuyaghura mumasinagoge ghawo, no ghushwayitha hashatani mwawanu.

Mañando ghoEvangelium

SIXTH SUNDAY IN ORDINARY TIME

Shundaha ghoghukwoko noghofotji

FIRST READING

Thitoya thokutanga.

Lev. 13:1-2.44-46

Mumbapira dha Levitikusi

Fumu gha ghambire kwaMosesi naAroni eshi: ‘Ngeshi ghumweya hatumana pathirama thendi, endi gha di noyimburu endi mavavi ghoyiñondwe, munu gho kenge yo kumutwara kwamupristeri Aroni, endi kwakehe hapristeri awa ha kara eshi hanendi. Yoyishi munu ghoyiñondwe yu mbadi gha kushuka. Muruti ghana kumuyuvitha eshi aye ne ne mbadi gha kushuka. Aye kunakunyanda kuyiñondwe, yo mu mutwi. Munu yu gha kara noyiñondwe gha kona kuvata mudjamburo ndani huki dhendi dhidjakunuke; aye gha kona kufikerera muromo wendi ghokuwiru no kudira eshi: ‘Nanyata, nanyata!’ Thika di ghana kukara nodihamba rure ghakona kukara shi ghanyata; ndani gha kona kuyakunuka kwawahe no kutunga panunda dhomwara.

Mañando ghaNyambi

Responsorial Psalm

Dimbokatji Ps.32: 1-2. 5. 11

R:

Yowe mondo ghange ghuna kuni ghamwena koyokunitjavukera, no ghuna kunimbitha membo ghomakomweneno.

Yarogha kwamunu, oyu gha dhira kuhummbitha kughuyi wendi, noyu ha thigherera maharwero ghendi.

Yarogha thikuma kwamunu oyu ghana kudhira kuthotera Nyambi, kuyiharura yendi no kupira ghumbango kumudhimu wendi.

R:

Yowe mondo...

Gho na tongononine maharwero ghange, no mbadi na dhindire yi naharura. Na ningire eshi: ‘Na kutongonona ghuyiwange kwaFumu!” Nowe wa ni thighererire.

R:

Yowe mondo...

Mushamberere mwaFumu no mushogherere, muyambaghuke mwahunga nomwahungami.

SECOND READING

Thitoya thoghuwadi 1 Kor. 10:31-11:1

Mumbapira dhokutanga dhaMupostoli Paghulusi kwawaka Korinte.

Keheyi muna kudya, keheyi muna kunwa, keheyi muna kutenda, muyitende kudifumanekero dyaNyambi. Mwayakunuka kwawaJuda, ngambi kwawahirika ngambi kumbunga dhaNyambi. Ene thika me: Ame na yereka kuwana wahe muyoyihe. Mbadi na shana yange nothinda vene, ene yawengi hamweya eshi nawo hahepwe ndani kuwaghamwena. Mukuthe thitamenedhi thange, thika me thaKristusi.

Mañando ghaNyambi

Gospel Acclamation

Hallelujah Efs. 1: 17-18.

Na rapereranga eshi, Nyambi waHekudyetu Jesusi Kristusi, gha munekithe meho ghenu, mukone kudimuka methero ghomakurupero ghetu no ghutungi munye ghu mwakuyora, oghu ha turekera hatawi.

Hallelujah

Evangelium.

Mark. 1:40-45

Marundwerero ghoyitjanga yaMarkusi.

Mudiyuwa dimweya, gheyire mukayiñondwe kwaJesusi. Ko kutongamena kughutho wendi ghukumbera eshi: ‘Hekudyange, ngo ghu hime, ngo ghu nirukithe.” Jesusi ne gha mu fererire ñeke gha yeyura dyoko dyendi no gha mu kambekire ghuninga eshi: ‘Nahimi eshi wiruke.” Apa ha manine kumutongwera kemo, ko kwiruka kwendi popo. Munyima dhokumukoghaghura, gha mu tumine eshi: ‘Kayende.” Ko kumuragha kwendi eshi: ‘Perere poye! Wayitongora yi kwamunu ghumweya. Ne ghuyende ghukakuneghe kwamupristeri. No ghutupure thitapa thomerukero ghoye, ethi gha rayire Mosesi. Tho sho thikare thidimukitho thawo.” Ene pa gha tundire po gha thimwetwedhire kokuhe yinu yi. Pathinu thi mbadi gha konine Jesusi kwingena muthitunumeho. Ene gha karire pithendi mudingoshi, no wahe hayendire kukwendi.

Mañando ghoEvangelium

SEVENTH SUNDAY IN ORDINARY TIME

Shundah ghoghukokwo noghuwadi

FIRST READING

Thitoya thokutanga Jes. 43: 18-19. 21-22. 24-25

Mumbapira dhaMuporofeta Jesaya.

Dyo ghana kughamba Fumu eshi:

‘Mbadi ko eyi sho mu ghayarere yo kare, no kughayara temba eyi gha tendire pakutanga. Mu mone ame nina kutenda yoyipya ngambi popano ni na kwiya kuthishe mbadi muna kuyimona ndi? Kemo, ame ni na kutenda ndhira mumamboreya,no mayira mumighambo. Hanu wa na tendire kuthishwi thange, mba nembi makuyero ghange!” Jacob mbadi gha wanimwayerera me, mbadi wayipitha kukoye ghothinda, no kukwange. Ghuna nipa mupango gho maharwero ghoye, no kutapa ghukukutu mumwange. Yame yu ghokukona kushwayitha po yoyiheya no kudhira kuvuruka maharwero ghoye.

Mañando ghaNyambi

Responsorial Psalm

Dimbokatji Ps. 40:2-5.13-14

R:

Nirukithe kukoye na harura.

Yarogha kwamunu yu, ghana kutokomena mukashu. Fumu, mbo ghana mughamwena mudiyuwa dyoyinyanda.

Na ningire eshi: ‘Nifere ñeke ghoFumu! Nirukithe kukoye na harura.’

R:

Nirukithe…

Yowe wani kwaterera, yoyishi na pira murandu, no ni pake roruhe kukoye. KwaFumu Nyambi waIsraeli, ko dina kwiya difumanekero kate kumandambo gho kughutho. Amen, kemo, Amen.

SECOND READING

Thitoya thoghuwadi 2 Kor. 1:18-22

Mumbapira dhoghuwadi dhamupostoli Paghulusi kwawaka Korinte.

Shemwa ngeshi Nyambi ne mukaghuhunga, ñando dhetu ne ngo mbadi dhakupitura ku ‘Kemo’ endi ‘Kadi kemo?’ Yoyishi Jesusi Kristusi ghomwana Nyambi yu twamuyuvithire, name naSerivanusi naTimoteghusi. Mbadi ya kurikanyine kukemo endi kadi kemo. Aye ne yokemo waNyambi. Aye yo maturekero: “Ghoshemwa” GhaNyambi kuyoyihe. Yodigho papendi tuna kuninga kudifumanekero dyaNyambi eshi: ‘Amen’ Nyambi thinda yo gha tu nungitha pofotji nenu, pamuve ghoghushemwa ghuno: Eshi paKristusi. Nyambi thinda gha tu pongwera kukwendi. Gha tu tarekire tukare yira ghugavo wendi. No gha tapire Mupepo ghoKupongoka mumitjima dhetu, yira thiturekera thi mbo tu tambura.

Mañando ghaNyambi

Gospel Acclamation

Hallelujah Jn. 1:14.12

Ñando dha karire munu no dhatungire pakatji ketu. Ene wahe wa hamu tamburire no hatawire kudina dyendi, hawapire ngcamu dhokukara hanaNyambi.

Hallelujah

Evangelium.

Mark. 2:1-12

Marundwerero ghoyitjanga yaMarkusi.

Apa gha hukire Jesusi kuKaparnaghumu. No ñando dhapupanine mwawanu eshi ghana kahuka, hengi hanu hakukongwedhire no kuthiro dho ndhugho mbadi kwathigharire kambenene. Oku Jesusi ne pa kuwayuvitha mbudhi, harume hane ha muretererire thirema. Ene pamurandu gho mbunga dhawanu, mbadi gha konine kukuma kukwendi. Ko kuyora kwawo mutuya ghondhugho, mudyango di ghemanine Jesusi. Ha tupekedha kwawo thirongo no murema po. Pakumona Jesusi matawero ghawo, ha ghamba kwamurema eshi: ``Mwanange maharwero ghoye ghana pu kuthigherera.” Ko kwipudhura ha ka marukwaro hamweya wa ha karire po, mumuitjima dhawo eshi: “Nye ghana kushedhera yu murume yu Nyambi? Yidye gho kukona kuthigherera maharwero, shimwengwa yofotji, eshi Nyambi.” Jesusi ne gha dimukire eyi ha ghayarire. Ko kuwatongwera kwendi eshi: “Nye muna kwipwedhera yoyinu yino mumutjima dhenu? Nye yoyiredhu po, kutongwera murema eshi: ‘Maharwero ghoye ghana pu kuthigherera; endi kuninga eshi: ‘Wimane no ghutumbure thirongo thoye, ghukayenda? Ene mudimuke eshi, Mwanamunu gha kara nongcamu pamuve dhokuthigherera maharwero.” Yoghana ningi kwamurema eshi: “Na kukutongwera eshi: Tumbure thirongo thoye nohuke kukwenu!” Shemwa hemana kwendi wangu, no gha tumburire thirongo thendi, muthitunumeho thawahe. Hanu wahe ko kukugha Nyambi ghuninga eshi: “Thinu thokenge yo mbadi twa thimone panganyi!”

Mañando ghoEvangelium.

EIGHTH SUNDAY IN ORDINARY TIME

Shundaha ghoghukwoko noghuhatu

FIRST READING

Thitoya thokutanga Hos. 2:16-17 21-22

Mumbapira dhaMuporofeta Hoseya.

Dyo ghana kughamba Fumu:

Yodigho, mumone eshi, ame mbo na muyedhaghura, no kumutwara mumamboreya, nikakuyuve thiwana nendi.

Koko kombonikamupera mapya ghendi ghovinyu, no murango waAkori eshi thero dhomakurupero ghoyinyanda. Aye mbo ghana kahutha eshi yimupe, thika dig ha karire paghushengeteya wendi, no yira mudiyuwa di wamushwayithire muEgiptena. Ame mbo na kuyuvu noye kuroruhe; no makuyuvero ghange noye mbo ghana kara mughushemwa, no mughuhunga, nomighunongo, nomuthiñeke. Ame mbo na kunungu noye mughundambo ghomakurupero; munyima po mbo dimukera Fumu.

Mañando ghaNyambi

Responsorial Psalm.

Dimbokatji. Ps. 103:1-4.8.10.12-13

R:

Fumu ne mukathiñeke no mukañeke, mughudhutjima no gha yara ruhakitho.

Ame na ha ka kushogherera Fumu, na haka kushogherera dina dyendi dyoKupongoka, no yoyiheya eyi ni di nayo. Amen a ha ka kushogherera Fumu no mbadi mbo ni vuramako thinu thofotji, payitenda yendi yoyiwa.

R:

Fumu..

Aye, yo gha ni thigherera maharwero ghange ghomahe, no yo gha nirukitha kuyikorwa yange yoyihe, no yu gha ni ghamwena kumbira, gho gha ni yenga noruhakitho nothiñeke.

R:

Fumu..

Fumu ne mukathiñeke no mukañeke, mughudhutjima no gha yara ruhakitho.

Aye mbadi ghana kutenda netu popamaharwero ghetu no mbadi ghana kutuhuthera popaghuyi wetu.

R:

Fumu..

Thika kayenda kodiva no ditokera, kemo gha tu yakunuka natwe kumaghuyi ghetu. Thika dig ha ferañeke Wihe hanendi, kemo gha fereñekeFumu, awa ha mu karera.

SECOND READING

Thitoya thoghuwadi 2 Kor. 3:1-6

Mumbapira dhoghuwadi dhaMupostoli Paghulusi kwawaka Korinte.

Tutange karo kukugha twathinda ndi? Endi tu mu rawere pakumutjangera mbapira, yira hamweya ngambi yi mwahaka mwe? Amen e yamwe mwathinda mwambapira dhomarawero ghetu, edhi dhapwa kutjanga mumitjima dhetu. Edhi ha toye wahe no kudhitjwathana. Eyi ne kuyimonuna vene eshi, yamwe mwambapira dhaKristusi, edhi dhapwa kutjanga payikarera yetu. Kadi noingi, ene noMupepo waNyambi ghomuyumi. Kadi payikwere yomawe, ene mumitjima dhawanu. Eyi tuna kuyighambera yino, yoyishi paKristusi twawana makurupero ghokuyara kwaNyambi. Kukwetu twathinda ne, mbadi twa kona kughayarera eshi, ñanyi kushwaye thinu. Eyi ya tu fumanena ne, kwaNyambi ya tunda. Oyu gha tu tenderire yi ya tu fumanena, tukare twakareri ghoghundambo ghoghupya. Kadi pathitjanga, ene paMupepo. Thitjanga ne kupagha, Mupepo ne kuparitha.

Mañando ghaNyambi

Gospel Acclamation

Hallelujah Jn. 10:27

Ndjwi dhange dhina kutegherera kudiywi dyange; na dhidimuka nodhina kunikutha.

Hallelujah

Evangelium

Mark. 2:18-22

Marundwerero ghoyitjanga yaMarkusi.

Hakathishongero waJohannesi nawaFarasayi, ha karire mukudhirerekedha. Ko kwiya hanu hamwipure eshi: “Nye hana kudhirerekedha hakathishongero waJohanesi nawaFarasayi,ene ho ye ne mbadi hana kudhirerekedha?” Jesusi ne gha wahuthire eshi: “Kukona kudhirera hagenda ho mukandi, oku ha di nathinda shamukandi ndi? Ene mbo gha neya mayuwa, agha mbo ghawayakunutha po mukamukandi ndi. Ndani po mbo ha dhirerekedha nawo mumayuwa gha. “Mbadiko yu ghokuriveka thirivo thothipya pathivata thothikuru-kuru. Yoyishi maghana sho thitungunuke po, no shodiyaghuru pe dituywera dyatho. Karo noyofotji temba yu gho kukona kupingwerera vinyu mukandimbe kokakuru-kuru, yoyishi vinyu yu ghana kuyoghorora kandimbe ka. No kandimbe kana kuvinya no kana kuyatuka. Yodiyo vinyu kumutera mukandimbe kokapya.”

Mañando ghoEvangelium.

NINTH SUNDAY IN ORDINARY TIME

Shundaha ghoghukwoko noghune

FIRST READING

Thitoya thokutanga Deut. 5:12-15

Mumbapira dhaDeteronomi.

Dyo ghana kughamba Fumu eshi: “Muvuruke kupongora diyuwa dyoSabbata, kenge gha mu rawera Fumu Nyambi wenu. Mumayuwa kwoko nodyofotji murughane yirughana yenu, mudiyuwa dykwoko noghuwadi ne Sabbata diyuwa dyaFumu Nyambi wenu. Mbadi mwakona kurughana mudiyuwa di, ngambi hanenu ho ha kafumu, endi hakamadi, ngambi mapuru endi yidongi, endi kehe yino yimuna yenu, ngambi mugenda yu gha di mudighumbo dyendi. Hapikenu ho hakamadi no ha kafumu nawo ha kona kuturumutha thika mwe. Muvuruke eshi mwapika mwakarire muditunga dyaEgiptena yodigho naFumu Nyambi wenu gha mu tundithire mo nongcamu dhendi dhodhikuru. Pamurandu gho yoyiheya yi Fumu Nyambi wenu gha mu rawera mwe eshi muvuruke kupongora diyuwa dyoSabbata.

Mañando ghaNyambi

Responsorial Psalm

Dimbokatji Ps.81: 3-8.10-11

R:

Muyumbaghukere kudikuto dyaNyambi ghongcamu dhetu.

Mwimbe, no mushike maghoma, muyuvithe maywi ghomatowi, ghoyivandjero noghoyihumba. Mushighe mapori kukaghonda kokapya, no mukaghonda komumbandha mumafesite ghenu.

R:

Muyumbaghukere..

yoyishi ghomuragho wakara po kwawaIsraeli, no warawera Nyambi waJakopu. Aye gha yi pakire ko, kughunongononi wawanahoka waJosefu, apa gha dhirikkire muEgiputena.

R:

Muyumbaghukere..

Noyi ha dhirire kudimuka pakutanga ha yiyuvire eshi: “Ame na mutundithire mupango gho ghuremu payifudhi yenu, no mwakonine namwe, kutura yikote yo pamitwi dhenu. Mukunyanda kwenu, mwakuyererire name namughamwenine.”

R:

Muyumbaghukere..

Mbadi gha kona kukara Nyambi ghumweya kukwenu, no mbadi mwakona kutongomena kwaNyambi wayenaye. Amen e yame Fumu Nyambi wenu, oyu gha mu dhiruthire muEgiptena.

SECOND READING

Thitoya thoghuwadi 2 Kor. 4:6-11

Mumbapira dhoghuwadi dhaMupostoli Paghulusi kwawaka Korinte.

Nyambi yo gha ghambire eshi: “ Kukene”. Yo gha pakire karo thishe mumitjima dhetu. Thitumekithe maghano ghetu no yi dimuka yoyiwa yaNyambi, oyu ya shwayire mwaJesusi Kristusi. Atwe twakara noghushwi ghuno mumwetu, twakara yira tundimbe to kuyondaghuka wangu. Yoyishi ngcamu dhokupiterera ne dhashwagha kwaNyambi, kadi kukwetu. Muyoyiheya, hana kutunyandeka, ene mbadi tuna kukasherera, twafa honyi, ene mbadi twatovoha. Hana kutukutha-kutha, Nyambi ne mbadi ghana kutumwagha, kutuwithera pamuve, ene mbadi hana kutudhongonona. Yifa yaJesusi, muyirama yetu tuna kuyishimba-shimbera roruhe, kemo dyoshoghukare moyo waJesusi thishwagha meho muyirama yetu. Yoyishi roruhe gha tu tapa mukufa, atwe twakamoyo mwaJesusi. Eshi ghuhokoke moyo waJesusi muyirama yetu yo ku fa.

Mañando ghaNyambi

Gospel Acclamation

Hallelujah Jn:6: 63.68

Mupepo ne yo mukakuparitha, munu thinda vene. Yowe wa kara nomañando ghokutapa moyo ghororuheya.

Hallelujah

Evangelium

Mark. 2:23-3:6

Marundwerero ghoyitjanga yaMarkusi.

Mudiyuwa dyoSabbata, gha tjinanine Jesusi nawakathishongero wendi, mumayindha ghomapya. Hakathushongero wendi ha fenyine mbeya, ha tafune. Ko kumutongwera haFarasayi eshi: “Mone, nye ghana kutendera yinu yo kudhira kushutura muSabbata.” Aye ne gha wa huthire eshi: “Mbadi mwatoya panganyi eyi gha tendire Davita, apa gha karire mughukukutu ndi? Nawa ha karire nendi eshi ha fire ndhara. Henge nine mundhugho dhaNyambi mumayuwa ghamupristeri shokuru Abiyatari. No ha dire ghuroto ghomuyambo, oghu ha dhirekire kwakehe munu. Shimengwa hapristeri. Ene ngambi kemo, ha taperire kowahakarire nendi.” Karo ha ghamba eshi: “Sabata ne gha mu pakera po hanu kadi hanu kuSabbata. Yidiyo eshi, mwana munu ne Fumu, karo yo gho Sabbata.” Mumayuwa gha, hengenine karo musinagoge. Am one mwa karire murume ghokughara dyoko. Hamweya ha shanine kumuheta. Yodiyo ha mu konekire eshi ngwa ñanyi gha mwirukithe mudiyuwa dyoSabbata. Jesusi gha ningire kwamurume yu eshi: “Wimane mukatji kawo.” Pa gha ghamberire kukwawo eshi: “Yapwa kufundhwera muSabbata eshi, kutenda ghunongo endi ghuyi? Kupariths endi kupagha?” Aw one kupira noñumbu temba. Gha wa rerurire noghupata, no gha tokotire kughukukutu ghomitjima dhawo. Ha ghamba kwamurema yu eshi: “Gho nyonone nyara dhoye!” Aye gha ghonyononine nyara dhendi, no nyara dhendi dherukire. Ko kushwagha haFarasayi no hatendire ndhango pofotji nawakaHerodesi eshi ha mu paye Jesusi.

Mañando ghoEvangelium

TENTH SUNDAY IN ORDINARY TIME

Shundaha ghodikumi

FIRST READING

Thitoya thokutanga Gen. 3:9-15

Mumbapira dhaGenesisi (Mashimwedhero)

Pa kumana kudya Adam kuthitondo, podigho Fumu Nyambi gha mwithire eshi. “Kupi ghudi? Dyo gha mwipure. Na yuvu diywi dyoye mudipya, no gha huthire eshi: Na yapa pamurandu eshi mbadiko yitere. Yo nondera. Yi dye ghana kutongwera eshi owene mbadiko yitere dyo gha mwipurire. Munadi thitondo ethi na mushweneka kudya ndi? “Murume gha huthire eshi: Yoyu mukamadi wa ni turire nange yo ghana ni pa me mbuyo, ndani gho nadi.

Fumu Nyambi ghepura mukamadi, nye ghuna tendi? Mbuyama ko kuhutha eshi: “Shatani ghana ni hongaghura yo na dhidyera.

Fumu Nyambi gha ghambire kwa Shatani, pa murandu ghuna tendi yi. Mbo hana kurundera kupiterera yimuna no yishereka yoyiheya.

Mbo ghuna ko kawitha dira dyoye pamuve no kudya rukungu mu kehe diyuwa dyo yipara yoye ñanyi na kukutende gho munyathi gho kehe yinu no we na mukamadi hanahoka ghoye no hanahoka wendi mbo hana teti mutwi ghoye, owe ne mbo ghuna yakawera mathithina ghawo.”

Mañando ghaNyambi

Reponsorial Psalm

Dimbokatji Ps. 130

R:

Yoyishi kwaFumu, kwakara ruhakitho rorukuru, nomakomweneno ghendi ne gha ghushemwa.

Mughundhungi na kudira kukoye, ghoFumu, ni tegherere Hekudyange, yuve kudiywi dyomaghamweno ghange.

R:

Yoyishi..

Ngeshi ngo kenge kumaharwero ghetu ghoFumu, ngo dye sho gha pare shime? Ene kukoye kwakara mathiyerero, no yotwa kukareranga roruhe.

R:

Yoyishi..

Ame na kurupera mwaFumu, no makurupero ghange, gha kara papendi, na me kutaterera na kutaterera marikanyithero ghoñando dhendi. Ame, Fumu na kutaterera, kupiterera mukungi ghomurughura, no ha kungi hopamathiku-thiku.

R;

Yoyishi..

GhoIsraeli, taterere paFumu , yoyishi kwaFumu, kwakara ruhakitho rorukuru, no makomweneno ghendi ne gha ghushemwa.

Aye pithendi yo mbo gha komonona Israeli, kumaharwero ghendi ghomahe.

SECOND READING

Thitoya thoghuwadi 2 Kor. 4:13-5:1

Mumbapira dhoghuwadi dhaMupostoli Paghulusi kwawaka Korinte.

Muyitjanga yemana ngeno: “Na tawire yon a ghamberire.” Atwe, twakara noMupepo yofotji oyu gha pinditha matawero. Yo twa tawera no yo tuna kughamberanga karo. Twayidimuka eshi Nyambi yu gha tumunine Jesusi mwawafu, mbo ghana tu tumuna pofotji naJesusi no kutuhungumeka nenu kughutho ghodipuna dyendi. Yoyiheya yin e mudina dyenu tuna kuyitendera. Eshi nyeke dhaNyambi dhivure kwawengi. Po sho gha vure karo matumero, naNyambi gha wane fuma. Pathinu thino po tuna kudhira kutovohera. Ngambi kenge yina kwaña yirama yetu. Mwimi dhetu ne ghupya keho kehe diyuwa. Yidye yetu yo mumoyo ghuno ne yipu no yina kupwa. Ene yo yina kuturetera ghuwa gho kupiterera yoyihe, no mbo ghuna karerera po. Meho ghetu mbadi ghana kukambekedha yo thishwagha meho ene yokudhira kumona. Yoyishi yo kumona ne ya kapupi kamanana yo kudhira kumona ne yathitungedhi. Tuna dimuka eshi apa mbo ha dhingununa thishashara thetu thomano, mbo tuna kawana matungo ghoshemwa mudiwiru. Agha ne mbadi hanu ha gha tenda, ene Nyambi thinda. No gha kara po roruheya.

Mañando ghaNyambi

Gospel Acclamation

Hallelujah Jn. 14:23

Ko kumuhutha Jesusi eshi: “Mu kakunihaka, ghana kukunga maňando ghange mumutjima wendi, naTate ghana kumuhaka no mbo tuna yendi kukwendi no kutunga nendi.”

Hallelujah

Evangelium

Mark. 3:20-35

Marundwerero ghoyitjanga yaMarkusi.

Ko kwingana karo Jesusi nawakathishongero wendi mundhugho. No mbunga dha mukuthire nadho karo. Aye nawakathishongero wendi ha pirire nako dhokudya. Apa hayiyuvire hendi, ko kushwagha kwawo, eshi ha mu shimbe no muthineneko. Yoyi ha ghayarire eshi: “Ngwa ghana ghundumuka.” No hakamarukwaro, awa ha tundire muJerusalema, ha ningire eshi: “Ghana kara na Beelzebal! No ngcamu dhaShadipinyi shokuru ghana kutjidha hashatanighana.” Ha wetha kwandi no gha ghambire nawo mumaghanekero eshi: “Ngepi dig ha kona Shatani kutjidha Shatani muyendhendi? Kehe ghufumu ghokukutjinuna, ghufumu ghu, ghuna kupwa. No ndhugho dhokukuyakunutha dhothinda, mbadi mbo dhi kara po. Ngeshi hashatani ha kutjinuna hathinda, ngcamu dhawo ne dha kona kutanara ndi? Vadho, nadho dhina kuhura. No yofotji temba gha kona kwingena mundhugho dhandwarume, no kwidha mo yinu yendi, ngeshi mbadi ghana mughanga tango mukangcamu yu. Munyima ndani po sho gha mukungure ndhugho dhendi. “Shemwa, na kumutongwera eshi: Maharwero nomishedho dhawahe, mbo yina pu kuthigherera. Ene mukakuharura kwaMupepo ghoKupongoka, mbadi gha kona kuwana mathigherero. Ne mbo ghana wana murandu mudhango dhokuroruhe.” Eyi gha ghamberire kemo Jesusi ne, yoyi ha mu ningire eshi: “ Ha kara no Mupepo gho ghumango.” Diyuwa dimweya, ko kukwiya hapendi nanyina. Oku shime hemanena panunda kokutuma munu ghakamwithe. Mbunga ne dhamudhingire. Ko kumutongwera kwawo eshi: “Nyoko na wapoye waya hana kukushana panunda.” Aye ghawahuthire eshi: “Yidye nawa nawadye hapange?” Harerura kwendi wa ha mu dhingire, no gha ghambire eshi: “Oyu ne yon awe na wapange. Yoyishi, yomuhe gho kutenda mahimeno ghaNyambi, yon awe no ñamba dhange.”

Mañando ghoEvangelium.

ELEVENTH SUNDAY IN ORDINARY TIME

Shundaha ghodikumi noshundaha ghokutanga

FIRST READING

Thitoya thokutanga Ezek. 17:22-24

Mumbapira dhaMuporofeta Ezekiyeli.

Fumu ghana kughamba ngeno eshi: “Kutunda kundandawiru dhothitondo thokakoma thi, kate kughuhura ghomite dhatho mbo na tetiko ndani nokuthitapeka nothinda pamutuya ghodirundu. Ñanyi na kuthitapeke pamutuya ghodirundu dyaIsragheli. Mbo thina tapathana mite no kwima mbuyo. Ndani no mbo thina kara thitondo thokupiterera. No kehe hanu ko mbo ha para, no khe yishereka ko mbo yiwana maturumuthero kumite dhothitondo thi. Kehe thitondo thomudipya ko mbo thikuhongera eshi yame, Fumu, yame nothinda oyu ghana kughayara eshi thitondo thothire kukona kukuritha thitondo thothifupi, oyu gho kukona kukutitha thitondo thothiyu no kutenda thitondo thikare thiyu. Yame Fumu, nayighamba, no mbo na yitendi.

Mañando ghaNyambi

Responsorial Psalm

Dimbokatji Ps. 92:2-3.13-16.

R:

Eyi ne yarogha mukumufumaneka Fumu.

Eyi ne yarogha mukumufumaneka Fumu, no mukwimbera dina dyoye ghomuka kupiterera, mukakunongonona kehe mathiku-thiku ruhakitho roye no kunongonona kehe runguro papoye ghushemwa ghondhika dhoye.

R:

Eyi ne..

Hahunga mbo hana tanara yira yitondo yo kutukoma no yira dikungushi dyodiyu dyoMulibanoni.

R:

Eyi ne..

Awa, hana kuwana ngcamu dhawo mundhugho dhaFumu, no kukurera muTembeli waNyambi wetu. Ngambi mukukurupara kwawo, mbana kara shime nongcamu. Mbo hana nyanyuka no mbo hana kara hayumiyumi mungcamu. Kemo mbo yikara ghushemwa eshi, Fumu ne yomuhunga no kukwendi mbadiko thokutangana. Aye ne yodiwe dyange.

SECOND READING

Thitoya thoghuwadi 2 Kor.6-10

Mumbapira dhoghuwadi dhaMupostoli Paghulusi kwawaka Korinte.

Yo tuna kukarera roruhe nomatjimapero ghokuyara. Twadimuka eshi, rure ru tuna kukara muyirama shime, mbadi twatunga shime kwaFumu. Yoyishi moyo wetu ne mumatawero ghu di, kadi mukumona. Atwe ne mumatjimapero ghokuyara tu di, hasha tuthiye matungo ghoyirama, ho tu katunge kwaFumu. Ene ngambi ngotutunge muno, ngambi kuya. Twakara vene nomakurupero ghofotji ghano. Eshi tupare thika di ghayihaka ye. Ghuhunga, twahe ngo tu kone kemanakughutho ghodipuna dyondhango dhaKristusi. Eyi gha kone kuwana yomuhe popayitenda yendi yopamuve. Eshi gha karire ghuwa ndi, endi ghuyi.

Mañando ghaNyambi

Gospel Acclamation

Hallelujah Jn. 15:15

Mbadi na kumutoya shime eshi mwavareki, yoyishi muvareki kadi wakudimuka eyi ghana kutenda Hekudyendi. Amen e kuna kumutoya eshi mwahakwa wange, yoyi namudimukitha yoyiheya yi nayuvire kwaTate.

Hallelujah

Evangelium

Mark. 4:26-34

Marundwerero ghoyitjanga yaMarkusi.

Jesusi gha ghambire kumbunga eshi: “GhuFumu waNyambi, wapitura munu ghokukuna mbuto mudipya dyendi. Munyima ghana kayenda ghakarare no kupinduka ghuthiku no mutenya. Dimbuto ne dina kumena nokukura mukudhira kudidimukera naye thinda. Yoyishi kaye kareta ka thinda mbuyo. Pakutanga ne murere ndani digavo, munyima nona kudigavo. Ngeshi nona dhina kukuta, kokutanga kukesha yoyishi ghuneya mukesho.” Mumayuwa gha, gha ningire karo Jesusi eshi: “No nye twakona kuwanekera karo ghuFumu waNyambi? Ngambi no maghanekeritho munye shot u ghanekerithe? Aw one wapitura dimbuto dyoghutata. Yoyisho dyambirupa pakatji komambuto ghomahe pakudikuna. Ngeshi pakudikuna, dina kumena nodina kukura, kupiterera yitondo yimweya nomite dhodhikuru. Noyinyunyi yomuwiru yina kutenda yitunguru yayo mumwadho.” Kemo nga ghambanga kwawo mumaghanekero, eshi hakone kumutjwathana. Mbadi nga ghambanga kukwawo mukupira maghanekero. Ene hakathishongero wendi, nga wa pathwereranga pithawo.

Mañando ghoEvangelium

TWELFTH SUNDAY IN ORDINARY TIME

Shundaha ghodikumi noshundaha ghoghuwadi

FIRST READING

Thitoya thokutanga Job.3:1.8-11

Mumbapira dhaJobu

Apano po sho no gha yataghukere mangumbi ghoye.

Mumutjima wendi ghokatjimaghana Fumu gha tapire dihuthero kwaJob. Gha huthire eshi: Yidye gho kukona kumona dikuruviya munyima dhodikungu dyokuyandhera, oku dina kwiya dingundunga nongcamu ghutughuma kutunda mumuve, Yame na dikavire dikuruviya no mavuyi, no kukara dyodiheya mumakokore, yame na tura po mururwani eshi mbadi di kone kutjinaghana, ndani na ditendire wangu-wangu mururwani ghongcamu? Wiye ene kayenda, dyona kughamba, mbadi wakukona kurunduruka: Apano po sho naghayatukere mangumbi ghoye.

Mañando ghaNyambi

Responsorial Psalm

Dimbokatji Ps. 107: 23-26.28-31

R:

Mutape matumero kwaFumu, yoyishi ruhakitho rwendi rwapira ghuhunga.

Hamweya ha yendaghurire mumawato, no ha parire mumaviya. Awo ha tawire yirughana yaFumu, no yitenda yendi yoyotetu yopamatondo.

R:

Mutape matumero…

Pamarawero ghendi dya yungire dingundunga, no dya kupanganithire mangumbi. Mato gha kambararire, no gha rowerire patuhandha. Hayivuyi hapiraghikire maghano ghawo kuwoma.

R:

Mutape matumero…

Ene muyinyanda yawo, hakumberire maghamweno kwaFumu naye ghawashuturire kuyinyanda yawo. Aye gha porithire dingundunga no mangumbi ghodikuruviya gha kunyikire.

Hakamaruyendo ho mu makuruviya.

R:

Mutape matumero…

Hashambererire thikuma, kumanyikero gha. Na Nyambi ghawakumithire thiwana, kumaya ghahimine kuthekera. Awo ha konine kushogherera Fumu, kuruhakitho rwendi roshemwa, no kuyitenda yendi yo thitetu eyi gha tenda kwawanu.

SECOND READING

Thitoya thoghuwadi 2 Kor. 5:14-17

Mumbapira dhoghuwadi dhaMupostoli Paghulusi kwawaka Korinte.

Ruhakitho rwaKristusi ne kithunda runa kututhunda. Yoyi tuna dimuka eshi, rofotji gha fererire waheya. Eyi ne kuninga eshi waheya hafire pofotji nendi. Aye gha ferere waheya eshi, awa hana kupara mbadi hana kupara hathinda. Ne papendi ghawaferere, no kuwatumuna mukufa. Yo tuna kuyiningera eshi, kutunda pano, mbadi twakona kutetera ghumweya kughunu wendi. Ngambi kenge twateterire Kristusi kughunu wendi. Pan one mbadi twakona kumutetera karo. Ngeshi ghumweya hakara waKristusi, yomunu ghomupya. Yo kare-kare ne yapwa. Ghupya ghoghudi po.

Mañando ghaNyambi

Gospel Acclamation

Hallelujah Efs. 1:17.18

Na rapereranga eshi, Nyambi waHekudyetu Jesusi Kristusi ghamunekithe meho ghomaghano ghetu podigho eshi tumone makurupero agha tuturekera.

Hallelujah

Evangelium.

Mark. 4:35-41

Marundwerero ghoyitjanga yaMarkusi.

Pakutokera diyuwa, ko kuninga kwendi Jesusi kwawakathishongero wendi eshi: Tutjinane thambodiya.’ Kokuthigha kwawo mbunga, ha perame muwato nawakathishongero wendi. No mato ghamweya pofotji nawo. Munyima kokwiya dingundunga dyodikuru thikuma, no mangumbi ghashanine kurowedha wato. Aye ne gha rarire kudikadhi dyowato nokuthatera pamuthato. Aw one ha mu pindutha no kumutongwera eshi: “Hekudyetu, mbadi ghuna kuyitokotera eshi, mukufa tudi ndi?” Jesusi ne gha pindukire no gharawerire kudingundunga eshi: “ Porere, no kukare tetete!” No dingundunga dyararire, ho kwakarire nyiki kokuhe. Munyima ghaningire kukwawo eshi: “Nye muna kuyapera kemo mwapira matawero ndi?” Woma ghushokuru wawa wanine. Ko kughamba thana kwawo eshi: “Yidye yu, oyu yina kutawa kukwendi dingundunga nodikuruviya!”

Mañando ghaNyambi

THIRTEENTH SUNDAY IN ORDINARY TIME

Shundaha ghodikumi noghuhatu

FIRST READING

Thitoya thokutanga Wis.1:13-15; 2:23-24

Mumbapira dha Wisdomu (Ghunyanyami)

Ene ghupata waShatani ghowaretitha po yi fa.

Yifa mbadi yaNyambi gha tenda, mbadi wakumuhafitha ye ngeshi hakamoyo wahe hakuharanganye. Gha tendire yoyihe eshi yiwane moyo, yivareka yoyihe mukaye yiwane ghundjewa-ndjewa. No mumwayo yipire maharanganyeno ghoghuhungu. No mbadi thi mbo thikara nongcamu mukaye; no ghuhunga mbadi mbo ghushwagha po. Nyambi gha tendire munu mukukarerera po, gha mu tendire kuthishwi thendi. Ene ghupata waShatani ghowaretitha po yifa mukaye. Nawa ha mu tawa mbo hana yikumonena.

Mañando ghaNyambi

Responsorial Psalm

Dimbokatji Ps. 30:2.4-6.11-13

R:

Mbona kukughu we, Fumu, yoyishi wani ghamwena.

Nahaka kuyuvitha fuma dhoye ghoFumu, yoyishi yowe wa ni ghamwena no mbadi washambereritha haňore dhange papange.

Gho Fumu, yowe wa ni yokorire kwawaka mwishi, ho wanihutherire moyo wange apa na tambire kukufa.

R:

Mbona...

Amwe mwakarera Fumu ghumutjima pa, mwimbere dikuto dyendi, no mufumaneke dina dyendi dyoKupongoka.

Ghughadhi wendi, shemwa wakapupi kamanana, ene ghuhunga wendi, wakuroruheya. Peghundha parunguro nomahodhi ngani kara pamathiku-thiku ne, kuheka na kuheka- heka karo.

R:

Mbona…

GhoFumu, tegherere nonifere ñeke! Ni ghamwene ghoFumu! “Muthidiro na karire, ene wa ni kinithire muyishamberera wa ni shupurire yivata yange yothidiro, nowanishupekire yivata yodifeste. Yodigho mbo nembera dikuto dyoye, no mbadi mbo niporera. Hekudyange noNyambi wange, mbo na kufumaneka kuroruheya!”

SECOND READING

Thitoya thoghuwadi 2 Kor. 8:7.9.13-15

Mumbapira dhoghuwadi dhaMupostoli Paghulusi kwawaka Korinte.

Thika di mwakara kamwaghe-mwaghe muyoyiheya; matawero, thitapa thokukona kurughanitha ñando dhendi. Yidimuka, ghutoghoro ghoghukuru noruhakitho rwetu rokukwenu ne, muvurithe karo thirughana thenu thoruhakitho. Amwe ne mwadimuka thiñeke thaHekudyetu Jesusi Kristusi, ngambi kenge dig ha karire mutungi, pamurandu wenu. Mukone namwe paghuhepwe wendi kukara mwatungi. Mbadi na kuninga eshi, mukare mughuhepwe pamurandu ghokughamwena hamweya. Ene mbo yirikanye yoyiheya. Amwe mudi nayo mwakona kughamwena wa hanakunyanda. Ndani ngeshi ku hanawana wo, amwe ne mukunyanda, hakona kumughamwena nagho karo. Po sho yi rikanyenene. Yapwa kutjianga karo eshi: “Oyu gha kara no yo yingi, mbadi gha karire nayo pakutanga, no totupu ne, kadi tumanana.”

Mañando ghaNyambi

Gospel Acclamation

Hallelujah Jn. 6:63.68

Ñando dhoye ne dhathina mupepo we Fumu, no adho ne dhamoyo: wakara no mbudhi dhomoyo ghororuheya.

Hallelujah

Evangelium

Mark. 5:21-43

Marundwerero ghoyitjanga yaMarkusi.

Jesusi gha tjinanine karo thambo diya, nombunga dhodhikuru dhamukuthire. Ko kwiya nduna ghumweya ghosinagoge ghodina dyo Jayirusi. Apa gha monine Jesusi ghafurumana kumapadhi ghendi. No gha mu kanderire thikuma eshi: “Mwanange pakuhurangedha moyo ghadi. Wiye noghukambeke dyoko dyoye papendi, ñanyi gheruke no ghapare.” Hemana noghayendire nendi. Mbunga dhodhingi dhamukuthire no dhamuthunda-thundire. No mukamadi ghumweya oyu gha karire noñongoro myaka dikumi nodhiwadi naye po. Gha nyandire thikuma kwanganga pakutayera ghushwi wendi, ene nomaghamweno temba. Shimengwa kumushangumwena vene. Pakuyuva yaJesusi, ko kuthunda kwendi mbunga kate kukundama kumwaye waJesusi. Yoyishi gha ghayarire eshi, ngo nikundame kumwaye wendi ngo niruke. Kapupi kamanana, ko kughuma tushorondondo to manyinga no gha kuyuvire eshi ghaneruka. Apa gha kudimukire thinda Jesusi eshi, ngcamu mumwendi dhina shwagha, hapiruka kwendi ghepure kumbunga eshi: “Yidye yu ghana kundama kumwaye wange?” Hakathishongero wendi ne ha mu huthire eshi: “Ghuna mono eshi, mbunga ne kuthunda-thunda dhina kukuthundathunda, owe ne pakwipura, yu ghana kukundama.” Ko kuwarondonona kwendi ghamone eshi, yidye ghana yitendi yi. Mukamadi yu gha yapire nokututuma. Yoyi gha dimukire eyi ya hokokire kukwendi. Heya gha kunyumane kughutho waJesusi, nokuthimwetwedha ghushwemwa wendi ghoghuhe. Jesusi gha ningire kukwendi eshi: “Mukamadi matawero ghoye ghana kughamwena. Yende muthiraro, yikorwa yoye yinakutundu.” Oku shimbe ha ghamba Jesusi, ko kwiya hayitumi ho mundhugho dhaJayirusi, ha mu tongwere eshi: “Mwanoye ne gha fu. Nye ghunakumutwamithera karo yu mitiri!” Pakuyuva Jesusi yitongora yi, ha ningire kwaJayirusi eshi: “Wayapa, tjimape!” Ha shingi wahe eshi ha mu kutha, shimwengwa haPetrusi naJakobusi naJohanesu ghomina Jakobusi. Hengena kwendi mundhugho dhanduna ghosinagoge, no ghayuvire madiro gha wakakutokota. Ko kuwashinga kwendi eshi: “Nye muna kudirera kemo? Mwanuke ne kurara ghana rara.” Aw one ha mu hekire thikuma. Munyima gha washwayitha mo wahe. Hetha kwendi wiha nanyina mwanuke, nawaheyire nendi. Ko kupinuka kwawo kungonda dhi harangekire mwanuke. Ha kwata kwendi dyoko dyamwanuke ghughamba eshi: “Talita kumi!” Kuninga eshi: “Mukamadighana, tumuke!” He mana kwendi popo no gha tangire kuyenda, yoyi gha karire nomyaka dikumi nodhiwadi. Nawahe hayitetukire thikuma. Jesusi ne ghawashingire eshi, hayitongora kwawamweya. Ko kuwaninga eshi: “Mumupe mwanuke yidya!”

Mañando ghoEvangelium

FOURTEENTH SUNDAY IN ORDINARY TIME

Shundaha ghodikumi noghune

FIRST READING

Thitoya thokutanga Eze.2:2-5

Mumbapira dhaMuporofeta Ezekiyeli.

Mupepo waNyambi weyire mumwange no wanimekire, gho na yuvire Fumu ghana kughamba nange eshi, Mwanamunu ame kuna kukutuma kwawaIsragheli, kwawaringiringi awa hayakunuka kukwange. Kare popano awo nawakerekandongo wawo hatenda ghukore nange. Aw one mutwi mbadi ha ni fumaneka, munyima amen a kukutuma kukwawo, ghukawatongwere eshi: “Yino yo ghana kughamba Fumu.” Ngambi ha ka tegherere, ngambi ha ka shwene kutegherera, haringi-ringi mbo hana dimuka eshi muporofeta mogha di mukatji kawo.

Mañando ghaNyambi

Responsorial Psalm

Dimbokatji Ps. 123.1-4

R:

Meho ghetu ghatopera kwaHekudyendi, kate mbo gha tuneghedhe ñeke.

Kukoye na kukambura meho ghange, owe waraghura kutunderera mudiwiru. Meho ghange yira thika digha kurupera meho ghawapika, munyara dhawa fumu wawo.

R

Meho ghetu…

No thika di gha kurupera meho gha mukadhi pika munyara dhaherekadhi, kemo dyo gha kurupera meho ghetu paFumu Nyambi wetu, kate mbo gha tu fere ñeke.

R:

Meho ghetu…

Ghu tufere ñeke, Hekudyetu, ghu tufere ñeke, yoyishi twawanine dishamu dyo dikuru thikuma, no musherero ghoghukuru thikuma kwawakakukununeka, gho twapwire kushamuna kwawakadishawana.

SECOND READING

Thitoya thoghuwadi 2 Kor. 12:7-10

Mumbapira dhoghuwadi dhaMupostoli Paghulusi kwawaka Korinte.

Ngambi kemo ne kadi pamurandu ghoghukuru ghoyihokoka. Yodiyo mbadi sho ni kare nodihuna. Thofotji tha ni shingire, yoyu mukamushongwe waShatani pa kunipumura nomakonye. Paruhatu na raperire kwaFumu eshi, gha yi ni tundithe yinyanda yi. Mahuthero ghendi nee shi: “Thiñeke thange ne thakurikanya. Nongcamu dhange ne, dharughana mumoye shemwa oku ghuna kasha.” Yona kushamberera thikuma pakutanga kughukashu wange. Eshi ngcamu dhaKristusi dhikare maghamweno ghange. Po nakushamberera kughukashu, kudishamu, mukunyanda, mumakukuthakuthero no mumaghukukutu ghomahe, pamurandu waKristusi. Yoyi ngeshi ha ni kasha, ndani na kutanara keho.

Mañando ghaNyambi

Gospel Acclamation

Hallelujah Jn. 1:14.12

Ñando dhakarire munu no dhatungire pakatji ketu. Kwawahe wa, ghawapire ngcamu dhokukara hana Nyambi.

Hallelujah

Evangelium

Mark. 6:1-6

Marundwerero ghoyitjanga yaMarkusi.

Apa gha katundire kuya Jesusi, ko kuyenda kwendi kudighumbo dyendi. Nawakathishongero wendi hakamutatire. Mudiyuwa dyoSabata gha kahongire musinagoge. Nawahe awa ha mu yuvire ha tetukire. Ha ghamba thana kwawo eshi: “Kupi keho ghana kuyiwana yinu yi, no ghunyanyami munye gha mupa yu, eshi mumoko ghendi kukona kushwagha mo mangcamu ghomakuru? Oyu ne kadi muyuwi ndi? Kadi mwana Maria yu ndi? No kadi yo mina wa waJakobusi naJosese naJudasi naSimoni ndi? No haňamba dhendi ne, kadi wa hatunga netu ndi?” Yo ha mu shamwenine. Jesusi ne gha wahutha eshi: “Mbadiko muporofeta yu ghadhira ku kukutekera, shimengwa muditunga dyokakoghatji kendi, nawapendi nodiko dyendi.” Yodiyo naye temba mbadi gha konine kutenda thinu, ene gha kambekire nyara dhendi ha ka kukorwa hamweya no herukire. Jesusi gha tetukire kwawaNasareti yokupira matawero.

Mañando ghoEvangelium

FIFTEENTH SUNDAY IN ORDINARY TIME

Shundaha ghodikumi noghukwoko

FIRST READING

Thitoya thokutanga 7:12-15

Mumbapira dhaMuporofeta Amosi.

Amaziya, muruti ghomuBethel gha tongwerire Amosi “Yende we mupumbi, huke kuditunga dyaJuda mo sho ghukayuvithere mbadi tuna kushana eshi ghuyuvithere muBethel. Edi ne dyango dyo ghuFumu no Tembeli ghoditunga. Amosi ko kuhuka kwaAmaziya eshi Amen e mbadi no muporofeta, no karo mbadi na hamena kumbunga dhawaporofeta. Ame ne no mukungi no mukareri ghoyitondo yoghukuyu. Ene Fumu yo gha ni shwayithire kughukungi ghoyimuna no gha ni tongwerire niyende muIsragheli ni kayuvithe kwawaguva wendi.

Mañando ghaNyambi

Responsorial Psalm

Dimbokatji Ps. 85:9-14

R:

Ninge tumone ghoFumu ruhakitho roye, nomaghamweno ghoye.

Ame ne na haka kutegherera, ko yi ghana kughamba Fumu Nyambi, yoyishi ñando dhendi ne, dhareta thiraro kudiko dyendi, no kwawa hanamuyapa no kumukarera. No difumanekero dyendi mbodina tungu muditunga dyetu.

R:

Ninge…

Ruhakitho noghutawedhi yakuwana , ghuhungami nothiraro ya kukwatathana, ghutawedhi mbo ghuna tapathana pamuve, ene ghuhungami mbo ghuna shuruka mudiwiru.

R:

Ninge…

Fumu mbo ghana tutendi tutunge, no ditunga dyetu ne mbo dina tapa yipongora yadyo. Ghutawedhi mbo ghuna tapathana kughutho wendi, no thiraro mbo thina kuthu ndhira dhendi.

SECOND READING

Thitoya thoghuwadi Efs. 1:3-14

Mumbapira dhaMupostoli Paghulusi kwawaka Efesusi.

Makuyero kwaNyambi ghowiha Hekudyetu Jesusi Kristusi! Aye gha tu kandadheka mwaKristusi no makandadhekero ghaMupepo ghomahe agha gha di mudiwiru. Aye dyo gha tendire karo kughutho gho kuvareka kaye. Eshi twapwire kutorora mwaKristusi, tu pongoke no tu tjimape kughutho wendi. Paruhakitho rwendi, aye mbo ghana tutambwera mamahimeno ghendi ghothiñeke, thika dig ha yi pakire po eshi, tukare hanendi paJesusi Kristusi. Yodiyo tukuye Nyambi pathiňeke thendi thothikuru, pakutapa mwanendi nyara-nyara kukwetu paruhakitho rwendi. Pamanyinga gha mwanendi, gha tu shuturire no gha dhimithire murandu dhetu, pathiñeke thaNyambi thothikuru, ethi thatu pa ghunyanyami wendi ghoghuhe no thi thavuritha yidimuka yetu. Aye gha hima noghanunga eshi gha tu yuvithe thithithatero thendi. No yirikanye paKristusi munako dhi gha paka po. Yi ghayara yendi nee shi, yoyihe yomudiwiru no yo mamuve, yikare kwishi dhomutwi ghofotji, eshi kwishi dhaKristusi. PaKristusi twakarera twe diko dyaNyambi, thika di gha yi pakire po ye pamutango. Kemo dyo gha himine ye. Aye ye yu gha kona kutenda thika di gha yi hima, kudinungo dyo dighano dyendi. Yodiyo, atwe twakurupera mwaKristusi, twakona kukugha ghukuru ghoghuhunga waNyambi. PaKristusi mwakarera mwe diko dyaNyambi apa ha mu yuvithire ghushemwa, gho makomweneno ghenu. Mwadhiyuvire kate mwatawire. MwaKristusi gha mu tarekire Nyambi naMupepo ghoKupongoka, pamaturekero ghendi eshi, mukare hana Nyambi. Mupepo ghoKupongoka ne thipaka po eshi natwe mbo tuwane eyi gha tu turekera Nyambi, apa mbo gha komonona wahe wa, hakundama kukwendi. Podiyo ne, tukone kutumera ghukuru wendi.

Mañando ghaNyambi

Gospel Acclamation

Hallelujah Jn. 6:63.68

Mupepo ne yo mukakuparitha munu thinda ne vaye. Eyi namutongwera mwaMupepo ya shwagha no gha tapa moyo.

Hallelujah

Evangelium

Mark. 6:7-13

Marundwerero ghoyitjanga yaMarkusi.

Hetha kwendi hakathishongero dikumi nohawadi nokuwatuma hawadi-hawadi. No gha tapire kukwawo ngcamu dhokutjidha ha mupepo hohamango. Hawarawera eshi: “Mwashimba yidya mundhura, shimwengwa mutaha pithawo, nondjato temba, ngambi ghuroto, ngambi kakomani komanyinga. Ene mushupate makuha, no mbadi mwakona kushimba yivata yiwadi.” Kora hawarawera eshi: “Mukehe ndhugho dhi sho ha kamutambure thiwana, mukare mo kate diyuwa di, mbo mu funguruka mo. No wahe awa sho ha kamudhire kamutambura, no kushwena kumutegherera, muwathiye. Gho mukukumune rukungu kumapadhi ghenu, eshidhikare nongononi dhagho.” Nawo hayendire no hayawerire hanu eshi hapiruke. No ha shwayithire haShatani hohengi. Nawanu hohengi herukire pakuwawetha nomaghadhi.

Mañando ghoEvangelium.

SIXTEENTH SUNDAY IN ORDINARY TIME

Shundaha ghodikumi no kwoko noyofotji

FIRST READING

Thitoya thokutanga Jer. 23:1-6

Mumbapira dhaMuporofeta Jeremiya.

“Mawe kwawadithi awa mbo ha yongaritha ndjwi mumadithero ghange, no kudhiharanganya!” Dyo ghana kughamba Fumu. Dyo ghana kughamba Fumu, Nyambi waIsragheli kwawadithi wa hana kukoneka diko dyange eshi, “Amwe munaharanganya ndjwi dhange no munadhiyongaritha, no mbadi muna kudhishana. Mu mone! Ame kuna kumuhumbitha paghuyi ghoyitenda yenu, “Dyo ghana kughamba Fumu. “Ene ame nothinda mbo na kongwedha ndjwi dhange dhi dhathiyarire po, no kudhishana mumatunga ghomaheya gho mu na dhiyembwererire, no mbo na kadhihutha kuno kumadyero ghadho; no mbo ha nereka hana hohengi no mbo hana vuru. Ame mbo na wapa hadithi aw ambo hawakoneka nawo mbadi mbo ha yapa nawo no kututukwa temba, no kuyongara temba,” Dyo ghana kughamba Fumu. “Mu mone, mbo gha neya mayuwa,” Dyo ghana kughamba Fumu, “Agha mbo ni tenda, mute ghoghuhunga waDavita, mbo ghana kare Fumu, no mbo ghana pangura nomaghano no ghuhunga, no mbo ghana tendi ghuhungami muditunga. Mumayuwa ghendi, mbo ghana komonoka Juda naIsragheli mbo ghana tungu muthishe. Dina dyendi edi mbo ha muta ne dino eshi: “Fumu ghomuhungami wetu.”

Mañando ghaNyambi

Responsorial Psalm

Dimbokatji Ps. 23. 1-3.5-6

R:

Fumu ne mudithi wange, mbadi ko thi nakunyanda.

Fumu ne mudithi wange, mbadi ko thi nakunyanda. Aye ghana kuniturumuthitha, mumadyere ghomwengerere. Ghana kuni twara kukakuro, oku kudi thiraro. No ghana kunipa ngcamu dhodhipya.

R:

Fumu ne…

Ghana kunitwara mumayira ghomahunga, kudikuto dyoDina dyendi. Ngambi kunakuyenda mughudhungi ghomakokore, mbadi mbo ni yapa, yoyishi nange ghudi ghoFumu.

Na kara nondjewa-ndjewa munyara dhoye.

R:

Fumu ne..

Ni hungumeke kudiyumbu, oku pakuninungurukera wa ha ni dhimba. Ghuna kunitambura yira mugenda ghodikuto, no ghuna niyaritha muyishamberera.

R:

Fumu ne..

Ghunongo ghoye no ruhakitho roye, mbo yina kara nange mumoyo wange ghoghuhe, no mbo na kakara mundhugho dhaFumu, kate paghuhura ghomayuwa.

SECOND READING

Thitoya thoghuwadi Efs. 2:13-18

Mumbapira dhaMupostoli Paghulusi kwawaka Efesiusi.

Ene pañanyi-ñanyi, pofotji naKristusi Jesusi mu di. Amwe mwayakunukire kwaNyambi muyipara yenu, munahenyi dyarero kukwendi pamanyinga ghaKristusi. Kristusi yo thiraro thetu. Oyu gha hanganyeka hanu hawadi pofotji, muJuda, ngambi mbadi muJuda. Apa gha kutapire gha tundithire po ghukore ghuwakarire po pakutanga yira thiginditho. Muragho nomiragho dhawo dhodhihe no yipaka po yadho, gha yi tundithire po. No apa gha tendire thiraro, gha kutendire mumwendi thinda hashawadi wa, muJuda, ngambi kadi muJuda, eshi ha kare ghupya gho ghunu ghofotji. Pa kufa kwendi ko pathikurushe, gha manithire ghukore no gha shemwathanithire hashawadi naNyambi nokuwatenda yirama yofotji. Apa gheyire ye ne, mbudhi dhodhiwa gharetire dhodhithiraro: Thiraro kukwenu mwe mwakarire kayenda naNyambi. No thiraro karo kwawa hakarire pepi nendi. Yoyishi, papendi twawanena twahe paMupepo yofotji thiraro thohoro kwaWihe, Twajuda, ngambi mbadi Twajuda.

Mañando ghaNyambi

Gospel Acclamation

Hallelujah Jn. 10: 27

Ndjwi dhange dhina kunitegherera kudiywi dyange; nadhidimuka nodhina kunikutha.

Hallelujah

Evangelium

Mark. 6:30-34

Marundwerero ghoyitjanga yaMarkusi.

Mumayuwa gha ko kahuka hapostoli kwaJesusi, ha mu tongwere yoyihe eyi ha tendire no yi hahongire mudina dyendi. Haningi Jesusi kukwawo eshi: “Mwiye tuyenda, tuyakunuke kamanana pithetu, mukone kuturumutha namwe.” Yoyishi hengi awa hana kwiya ghungongosha. Ha thinda nawo hana piri nako dhokudya. Ko kuyenda kwawo nowato eshi hakashane dyango dyo kuturumuthera. No mbunga dha wa monine apa hayendire, no hengi hawadimukire. Ko kuramba thana kwawo wahe homumaghumbo no ha dyadyaverire kughutho wawo padiya. Apa gha kandukire Jesusi muwato, hamono kwendi mbunga dhi. Ko kuwafera kwendi ñeke hanu wa, yoyishi hakarire yira ndjwi dhokupira mudithi. Yodiyo hatanga kwendi kuwayawera thikuma.

Mañando ghoEvangelium.

SEVENTEENTH SUNDAY IN ORDINARY TIME

Shundaha ghodikumi no kwoko noghuwadi

FIRST READING

Thitoya thokutanga 2 Kings. 4:42-44

Mumbapira dhoghuwadi dhawaFumu.

Ñanyi hadye, no kuthiyara ko karo.

Murume ghumweya gha tundire kuBaa-shalisha, gha retire Elisha, munu waNyambi, nomitwi dhoghuroto dhokuyipokora yokutanga makumi mawadi edhi gha tenditha kutumbi nomavumbukire ghomuyangu ghoghupya.” Ko kughamba Elisha eshi ghutape kwawanu hadye, Ene mupikendi gha huthire ngeno eshi: “Ngepi di sho ni ghutapere kwawanu dithere?” “Ko kughamba karo Elisha eshi ghutapere kwawanu hadye, yoyishi Fumu kuna kughamba eshi: “Ñanyi hadye no kuthighara ko karo. ghawataperire hadire, no yathigharire ko karo thika di gha ghambire Fumu.”

Mañando ghaNyambi

Responsorial Psalm

Dimbokatji Ps. 145:10-11.15-18

R:

Owe wayandja moko ghoye, no watapa ghunongo ghoye kwawayumi wahe.

Yoyiheya yi wayivarekire, yowe yina kushogherera, ghoFum, no ha kareri ghoye hoshemwa, yowe hana kukugha! Awo, yongcamu dhoye dhoghuFumu hana kuthimwetwedha, no kunongonona yongcamu dhoye dhodhikuru.

R:

Owe..

Meho ghawahe, papoye haghakambeka, nowe ghuna kuwapa yidya munako dhagho. Owe wayandja moko ghoye, no watapa ghunongo ghoye kwawayumi wahe.

R:

Owe..

Fumu gha hungama kuyitenda yendi yoyihe, no gha kara mughushemwa kuyoyiheya yi ghatenda. Fumu gha kara pepi nawaheya wa hana kumwitha, mughuhunga.

SECOND READING

Thitoya thoghuwadi Efs. 4:1-6

Mumbapira dhaMupostoli Paghulusi kwawaka Efesiusi.

Ame ne kutuywera na kuyimutuywera mumitjima dhenu, no mukañotwa me pamurandu ghokukarera Fumu: Muninge yiparayenu yikupakerere pofotji nomethero gha mwawanine kwaNyambi. Mukumbiripithe keho pano, mukare ghunongo noghudhughutjima no mukudhidhimekerange muruhakitho. Amwe mukoñomeke ghofotji ghu ghamupa Mupepo mukatji kenu eshi, mukare nothiraro mukathi kenu. Yirame ne yofotji noMupepo ne ghofotji, thika di ghakara po makurupero ghofotji agha gha mwithera Nyambi. Fumu ne yofotji, matawero ghofotji, nodiyoghero dyofotji. Nyambi ne yofotji noyoWiha wawahe. Oyu gha piterera wahe no yu gharughanena wahe no gha tunga mwawahe.

Mañando ghaNyambi

Gospel Acclamation

Hallelujah Jn. 6:63.68

Ñando dhoye ne dhothina mupepo we, Fumu no adho ne dhamoyo: wakara no mbudhi dhoghuparo ghororuheya.

Hallelujah

Evangelium

Jn.6:1-15

Marundwerero ghoyitjanga yaJohannesi.

Kutunda po ko kutjinaghana Jesusi dikuruviya dyaGalileya, edi hatoyire karo eshi dyaTiberiyasi. Ko kumukutha mbunga dhodhingi dhawanu, yoyi hamonine yitetukitho yi gha tendire kwawaka kukorwa. Gha dhinine Jesusi kudirundu no gha kahungumanine ko nawakathishongero wendi. Difeste dyopaska waWajuda, dyahenyine pepi. Apa gha kamburire Jesusi gha monine mbunga dhodhingi edhi dhina kumwiyera, gha ningire kwaFilipusi eshi: “Kupi shot u ghure ghuroto hakone kudya hanu?” Eyi gha mwipurire kemo ne, kuyereka gha mu yerekire vene. Yoyi thinda gha dimukire eyi sho gha tende. Filipusi gha mu huthire eshi: “Maghuroto ghomarandi mathere mawadi, mbadi gha rikanya kukuwana kehe yu kamingwa.” Mukathishongero ghumweya Andreyasi ghomina Simoni Petrusi, gha tongorire kwaJesusi eshi: “Pokadi pano kamughundju, aka kandi nomaghuroto kwoko ghotumbi, eyi ne yinye kwamunu hohengi kemo?” Haningi Jesusi eshi: “Muhungumeke hanu.” Padyango di, pakarire muhonyi ghowingi nohanu ha hungumanine. Harume pithawo ngwa mayovi makwoko. Ko kutumbura Jesusi ghuroto, hatumera kwaNyambi no ha ghutapire, kwawa ha hungumanine po, nothi nadho karo thika di gha himine. Munyima dhokwikuta hanu, ghatongwerire hakathishongero wendi eshi: “Mukongwedhe yigonyo-gonyo yi yina thiyara ko eshi, kadi pakuyongara nokamanana temba.” Nawo ha yi kogha-koghire. Pakarire yikote dikumi noyiwadi ho yayarire kuyigonyo-gonyo yomaghuroto kwoko ghotumbi, oku hanu ne hana mana kudya. Apa hamonine hanu thitetu thi gha tendire Jesusi, ha ningire eshi: “Oyu ne muporofeta shemwa, oyu gha kona kwiya mukaye.” Pakuyidimuka Jesusi eshi, nomuthinene ko hana kwiya, ha mu tende Fumu wawo, Ko kuvishuka po karo pithendi gha yende kudirundu.

Mañando ghoEvangelium

EIGHTEEN SUNDAY IN ORDINARY TIME

Shundaha ghodikumi nokwoko noghuhatu

FIRRST READING

Thitoya thokutanga. Exo. 16:2-15.

Mumbapira dhaExodusi (Mashwaghero).

Ene mbunga dhodhihe dhawana Isragheli dhavungutire kwaMosesi naAroni mumamboreya. Hawatongwere eshi, “Ghuhunga ngotwafererire muEgiptena munyara dhaFumu, omu twahungumanine kutunyingu tonyama nokudya yidya yoyingi, yoyishi amwe ne munatureta kuno kumamboreya no kupagha diko dyodihe kundhara.” Mosesi gho gha ningire kwaAroni eshi, “Tongwere mbunga dhawana Isragheli eshi, “Dhihenye pepi kughutho waFumu, yoyishi ghana yuvu yitokota yenu.” Oku gha karera naAroni mukughamba kumbunga dhawana Israeli, ko kupiruka kwawo mumamboreya, kambiru-mbiru popo kokuwahokokera thishe thaFumu mudivuyi. Karo Fumu gha ningire kwaMosesi eshi,” Name, nayuvu yishivana yawana Isragheli; ne ghambe nawo nowatongwere eshi, ‘Parunguro ne munakudya nyama no pamathiku-thiku ne mwikute noyidya. No po mbo ha tawera eshi yame, Fumu Nyambi wenu.” No parunguro kokwiya mota na turere pamwara wagho, no pamathiku-thiku wawire mume mumbadi dhomwara dhawo. Apa wakavukire mume, yathiyarire yinu yimweya mumamboreya pamuve, yisha wotu notunona yira tuthirudhi. Apa hayimonine hanaIsragheli, ho gha ghambathanine eshi, “Yinye yi?” Yoyishi mbadi ha yi dimuka eshi yinye yi. Ene Mosesi ghawatongwerire eshi, “Gho ghune ghuroto oghu ghana mupa Fumu eshi mudye.”

Mañando ghaNymbi

Responsorial Psalm

Dimbokatji Ps. 78:3-4. 23-25.54

R:

Aye ghawarokwetherire mana, no ghawapire yidya yodiwiru ghadye.

Eyi twayuvire no yi twadimukire, eyi ha tu tongwerire hakereka ndongo wetu, mbadi mbo tuyi dhinda hanetu. Mbo tuna yi tongora kwawahoka, yokuyitenda yoyikuru yaFumu noyongcamu dhendi, noyitenda yendi yothitetu eyi ghatenda.

R:

Aye..

Aye gha raghurire mavuyi ghokuwiru no gha yandhurire yero yomudiwiru: Aye ghawarokwetherire mana noghawapire yidya yodiwiru hadye.

R:

Aye..

Ghuroto ghu warokwire mudiwiru, gha ghudire kehe yu. naNyambi, gha wa wedhererire yidya yawo yokurikanya.

Aye gho gha twarire diko dyendi, kuthiko thi gha pongorire, kuditunga dyomarundu, edi gha wanine nongcamu dhendi dhomawithero.

SECOND READING

Thitoya thoghuwadi Efs. 4:17.20-24

Mumbapira dhaMupostoli Paghulusi kwawaka Efesiusi.

Mudina dyaFumu na kumukanderera eshi: Mwapara shime rure yira haHayidena. Yighayara yawo, yawa twara kunyara-nyara. Gha mwene kadi kemo mwakuhonga yokwaKristusi. Amwe ne mwamuyuvire, no yoyishi mwe mwakathishongero wendi mwakarire, yo gha mu hongerire mughushwemwa ghu wakara mwaJesusi. Muthiye ne keho yipara yenu yokare-kare: Mutundithe munu mumutjima dhenu, oyu yapetha yirumbera yoyimango. Mupepo wenu noyighayara yenu, yikare mughupya. Mupare yira hanu hohapya, awa havarekire Nyambi popanungu dhendi mughuhunga wendi ghoshwemwa no mughupongoki.

Mañando ghaNyambi

Gospel Acclamation

Hallelujah Jn. 15:6

Yame ndhira noghushwemwa nomoyo. No yofotji temba ghokukuma kwaTate shimwengwa papange.

Hallelujah

Evangelium

Jn. 6:24-35

Marundwerero ghoyitjanga yaJohannesi.

Pakumona hanu eshi, Jesusi ne mbadi po nawakathishongero wendi temba, ko kuperama kwawo mumato hayende kukaFarnaghumu, kukushana Jesusi. Apa hakamuwanine thambo diya dhodikuruviya, hamwipurire eshi: “Muruti ruvedhe munye ghuna kumu kuno?” Jesusi gha wahuthire eshi: “Shemwa nakumutongwera: Mbadi muna kunishanena payiperemeka yi mwamona, ene yoyi mwadire ghuroto nomwekutire. Mwarughanena tidya yokupwa, ene murughanene yidya yokudhira kupwa noyokutapa muyo ghororuheya. Ene yine mbo ghana yimupa mwanamunu, yoyi Nyambi wihe yo gha mupa ngcamu dhokuyinu yi.” Hamwipura kwawo eshi: “Thinye sho tu rughanene Nyambi, ethi gha hima kukwetu?” Jesusi ghawahuthire eshi: “Ethi gha hima Nyambi kukwetu ne thino, kutawa mumwendi yu gha tumine ye.” Awo ha mu tongwerire eshi: “Thitetukitho munye sho ghu tende, tuthimone hotutawe mumoye? Nye sho ghu tende we? Hakerekandongo wetu hadire mana mumamboreya, thika di yapwa kutjanga eshi: ‘Ghawapire ghuroto ghomudiwiru hadye.” Hawahutha Jesusi eshi: “Shemwa kadi Mosesi gha mu pire ghuroto ghomudiwiru, ene Tate yo ghana kumupa ghuroto ghoshemwa ghomudiwiru. Yoyishi ghuroto ghu ghana kutapa Nyambi ne, yoyu gha shurukire mudiwiru no kutapa moyo mukaye.” Ghawo ha mu tongwerire eshi: “Hekudyetu ghutupange roruhe ghuroto ghu.” Hawahutha Jesusi eshi: “Yame noghuroto ghokutapa moyo. Oyu gho kwiya kukwange mbadi mbo gha fa karo ndhara, no yu ghokutawa mumwange mbadi mbo gha fa shime dinota.

Mañando ghoEvangelium.

NINETEENTH SUNDAY IN ORDINARY TIME

Shundaha ghodikumi no kwoko noghune

FIRST READING

Thitoya thokutanga 1 Kings. 19:4-8

Mumbapira dhokutanga dhawaFumu.

Eliya gha yendire mumamboreya diyuwa dyodihe, ko kuhungumana kwendi pathipumbu, gha shanine eshi ngo ghafe. Aye gha ghamba eshi: “Munyima shimbe keho moyo wange, owe Fumu ghutundithe po, yoyishi ame mbadi napiterera hakerekandongo wange.” Munyima gha rara nokuporokera muturo; Gha kuharukeko, Muengeli ghana kumunyunga nokumutongwera eshi: “Pinduke, ghudye!” Ko kuthetaghuka kwendi ko kumona thikuki kumutwi wendi, ethi hana pono padiwe dyomudiro, no kahupa komeyu. Aye kokudya nokunwa kokarara karo. Muengeli waFumu ko kumwiyera karo paruwadi ko kumunyunga nokumutongwera eshi: “Pinduke, dye, ndhira dhoye ngo ňanyi dhikare dhire kukoye.” Ko kupinduka kokutanga gha dye nokunwa, pamurandu ghongcamu ghoyidye gha yendire po mayuwa makumi mane nomithiku makumi mane kate gha kakumine muHoreb, dirundu dyaFumu.

Mañando ghaNyambi

Responsorial Psalm

Dimbkatji Ps. 34: 2-9

R:

Mwiye namumone, no munakuwana eshi, Fumu ne muhunga!

Mbo na kughu Fumu kehe pano, no fuma dhendi, mbo dhina kara roruhe pamiromo dhange. Mbo nembera dikuto dyaFumu, mukamaghukukutu, mbo ghana yi yuvu nombo ghana shamberera.

R:

Mwiye..

Mwimbe pofotji nange , yoghukuru waFumu, no tuyeyure dina dyendi pofotji. Na kuyererire kwaFumu naye gha ni huthire ho ghanikungire kuyifa yoyihe.

R:

Mwiye..

Awa hawanine ghukukutu, kukwendi gha diyamenine no ghasheghenyine kuyishamberera, no mbadi hakudhekerire kumataterero. Pawakakunyanda, pithange nakukuyererire. Ho gha ni yuvire Fumu, no ghani ghamwenine muyindhivi yange.

R:

Mwiye..

Muengeli waFumu, gha dhingumwetwedhire mondameno ghendi kwawa ha karerire Fumu no ghawaghamwenine. Mwiye na mumone, no munakuwana eshi, Fumu ne muhunga!

Yarogha thikuma kwamunu yu ghana kutunda kukwendi.

SECOND READING

Thitoya thoghuwadi Efs. 4:30 5:2

Mumbapira dhaMupostoli Paghulusi kwawaka Efesiusi.

No mwa tokotitha Mupepo ghoKupongoka waNyambi. Yoyishi aye yo gha mu tambithire eshi mukare no thitamba thaNyambi thodiyuwa dyomakomweneno. Amwe ne mbadi mwakona kupata wangu, ngambi kuvundhadhana, mwatuka endi kushamuna, mbadi mwa kona kutenda thinu thothiyi. Mukuhake no mu kuferange ñeke. No mu kuthighererange thika di gha muthighereranga mwe Nyambi mwaKristusi. Muyereke keho kutemununa Nyambi, yira hanendi wa hahaka no mukuthe Kristusi pakumuhaka thika di ghamuhaka, nokukutapa thinda kukwenu mudyango dyenu ghakare muyambo no ndupu kwaNyambi.

Mañando ghaNyambi

Gospel Acclamation

Hallelujah Jn. 14:23

Yame ghuroto ghoghuyumi ghu wa shuruka mudiwiru, dyo ghana kughamba Fumu. Kehe yu ghokudya ghuroto ghu mbo ghana para kuroruheya.

Hallelujah

Evangelium

Jn. 6:41-51

Marundwerero ghoyitjanga yaJohannesi.

Ko kuvunguta haJuda yoyi gha ghambire eshi: ‘Yame ghuroto ghu washurukire mudiwiru.’ Gho haningire eshi: “mbadi yoJesusi ghomwana Josefu yu ndi? Atwe ne twadimuka ghawihe nanyina. Pashanye sho gha ghambere kemo eshi: “Mudiwiru natunda me?” Jesusi gha wa huthire eshi: “Mwakuvungutera vungutera. No yofotji temba gha kona kwiya kukwange, ngeshi mbadi ghana mukokera kukwange Tate yu gha ni tumine; ame ne mbo namutumuna mwawafu mudiyuwa dyoghuhura. Kwamuporofeta ghumweya yapwa kutjanga eshi: “Wahe hapwa kuhonga kwaNyambi.” Kehe yu gha teghererire kwaTate, no gha kuhongire kukwendi gheye kukwange. Mbadi yina kuninga eshi ghumweya waye-naye ghamonine tate, shimengwa yu gha tunda kwaNyambi, yo gha monine tate. “Ghushemwa na kumutongwera: Oyu ghokutawa mumwange, ghana wana moyo ghororuheya. Yame ghuroto ghokuta pa moyo. Hakerekandongo wenu, mana hadire mumamboreya, ene hafire. Ghuno ne ghuroto ghokushuruka mudiwiru, ngeshi haghudi munu, mbadi gha kona kufa. Yame ghuroto ghoghuyumi ghu washurukire mudiwiru. Ngeshi ha di ghumweya ghuroto ghuno, mbo ghana para kuroruheya. Ghuroto ghune yirama yange eyi mbo ni tapa eshi, mbo kapare kaye.”

Mañando ghoEvangelium.

TWENTIETH SUNDAY IN ORDINARY TIME

Shundaha ghomakumi mawadi

FIRST READING

Thitoya thokutanga Pro. 9:1-6

Mumbapira dhaProverbs ( Mathaghano)

Mudye ghuroto wange nomunwe vinyu oyu namuroyithera.

Pamurandu gho ghunyanyami yo ghatendera thinda dighumbo. Gha yeyura maghundhi ghendi kwoko nomawadi. Aye gha pagha yimuna yendi, no kurunga vinyu. Gha yara tishi wendi, aye gha tuma hapikendi hohakamadi ndani no kuyuvithera kuwiru dhothitata: “Yidye ghana kuyinyatha? Ghemane thambo di.” Ko kughamba ye eshi, kukwenu mwe mwayimango mwiye nomudye ghuroto wange, nokunwa vinyu yu namuroyithera! Muthiye ghumango wenu po mbo mupara, muyenda mundhira dhoghuhunga.

Mañando ghaNyambi

Responsorial Psalm

Dimbokatji Ps. 34:2-3.10-15

R:

Mwiye namumone, no munakuwana eshi, Fumu ne muhunga!

Mbo na kughu Fumu kehe pano, nofuma dhendi mbo dhina kara roruhe pamiromo dhange. Mbo nembera dikuto dyaFumu, mukamaghukukutu, mbo nagha yuvitha no mbo ghana shamberera.

R:

Mwiye..

Mumukarere Fumu, amwe mwakara wendi! Mukakumukarera mbadi ghana kunyanda. Ngambi nyime naye kukara ghuhepwe no ghana kufa ndhara. Ene wa hana kukumbera maghamweno ghaFumu, mbadi hana kupira ko kanu kuyinu yoyiwa.

R:

Mwiye..

Mwiye hanuke, mutegherere kukwange! Nahaka kumuhonga eshi, ngepi di gho kukarera. Oyu gha ha ka moyo, no kurumbera kupara rure, mukudjabwana yoyiwa,

R:

Mwiye..

Ghashinge rudimi rwendi kughupata nomiromo dhendi kumbango.

Muyakunuke kughupata, no mutende yoyiwa, gho mushane thiraro nokuthikutha!

SECOND READING

Thitoya thoghuwadi Efs. 5:15-20

Mumbapira dhaMupostoli Paghulusi kwawaka Efesiusi.

Mukoneke thikuma muyipara yenu: Mwakara yira hanu hohathuta. Ene mukare nomaghano. Mutende mukehe nako yinu yoyiwa. Yoyishi, munako dhino tu di ne dhiyi. Mbadi mwakona kurughanitha yira hanu hokupira maghano. Amwe ne muyereke kudimuka eyi gha hima Fumu. Eyi ne yomwakona kutenda. Mwateghereranga! Yoyishi kutegherera ne kokwareta ghuyi. Eyi ne kadi kemo, amwe ne muyare naMupepo, nomwimbe pofotji mupisalemi, membo ghomakuyero, nomembo ghamweya ghoKupongoka. Mwimbe membo no mitjima dhenu dhodhihe, kudifumanekero dyaFumu. Mutumere Nyambi wihe kehe pano kuyoyiheya muDina dyaHekudyetu Jesusi Kristusi.

Mañando

Gospel Acclamation

Hallelujah Jn. 1:14.12

Ñando dhakarire munu no dhatungire pakatji ketu. Atwe twamonine ghuFumu wendi, ene wahe wa ha mu tamburire no hatawire kuDina dyendi, hawapire ngcamu dhokukara hana Nyambi.

Hallelujah

Evangelium

Jn. 6:51-58

Marundwerero ghoyitjanga yaJohannesi.

Yame ghuroto ghoghuyumi ghu washurukire mudiwiru. Ngeshi ha di ghumweya kughuroto ghuno, mbo ghana para kuroruheya. Ghuroto ghune yirama yange oyi mbo ni tapa eshi, mbo ka pare kaye.” Ko kukukanana haJuda eshi: “Ngepi di sho gha kone kututapera nyama dhendi kukudhidya twe?’ Hawatongwera Jesusi eshi: ‘Kemo, yashemwa na kumutongwera: Ngeshi mbadi mbo mudya yirama yamwana munu nokunwa manyinga ghendi, mwapira moyo mumwenu. Oyu gho kudya yirama yange nomanyinga ghange, ghana kuwana moyo ghororuheya, no mbo na mutumuna mwawafu mudiyuwa dyoghuhura. Yoyishi yirama yange ne yidya yoshemwa, nomanyinga ghange ne yinwa yoshemwa. Oyu ghokudya yirama yange no kunwa manyinga ghange, ghana kukara mumwange, name mumwendi. Thika dig ha nu tumine Tate ghomukamoyo, no thika di nakupara mumwendi, kemo dyo mbo gha para mukakunidya me. Ghuroto ghuno washurukire mudiwiru, mbadi wakara thika mana yu hadire hakerekandongo wendi. Awo hadire, ene hafire. Oyu ghokudya ghuroto ghuno, mbo ghana para kuroruheya.”

Mañando ghoEvangelium.

TWENTY FIRST SUNDAY IN ORDINARY TIME

Shundaha ghomakumi mawadi noyofotji

FIRST READING

Thitoya thokutanga Jos. 24:1-2.15-18

Mumbapira dhaJoshua.

Mbo tuna rughanena Nyambi yoyishi yoFumu wetu.

Joshua gha turire mako ghomaheya ghaIsragheli pofotji pa Sakamu. Ko kwitha kwendi hakuru, hayendithi, hapanguri nohapiterithi haIsragheli, munyima heya kughutho waNyambi. Munyima Joshua ko kutongwera mbunga dhodhihe eshi: “Ngeshi mbadi munakukarera Fumu Nyambi, mutorore dyarero oyu muna kushana kukarera, endi Nyambi yu ngahakareranga hakerekandongo wenu thambodiya dhorware, endi Nyambi ghomuAmoritisi mumuve ghu muna kutunga ñanyi-ñanyi. Mumwange no mundhugho dhange mbo tuna murughanena. Ko kuhutha mbunga eshi, “Mbadi tu di nodighano dyo kuthigha Fumu Nyambi wetu no kurughanena haNyambi hamweya. Nane mbadi Fumu Nyambi wetu yu gha turetire ndani nawakerekandongo wetu tushwaye muditunga dyaEgiptena, mundhugho dhoghupika, oyu gha rughanine yitetukitho yi yoyikuru kuthitunumeho thetu. Gha tu ghamwenine twe kuruyendo rwetu rorure no kwawanu wahe muruyendo rwetu roruhe. Natwe karo mbo tuna murughanena Fumu Nyambi wetu.

Mañando ghaNyambi

Responsorial Psalm

Dimbokatji Ps. 34: 2-3.16-23

R:

Mwiye namumone, nomuna kuwana eshi, Fumu ne muhunga!

Mbo na kughu Fumu keho pano, nofuma dhendi mbo dhina kara roruhe pamiromo dhange. Mbo nembera dikuto dyaFumu, mumaghukukutu, mbo nag ha yuvitha no mbo ghana shamberera.

R:

Mwiye..

Fumu, gha kenga kwawahunga no gha tegherera kuyikumbera yomaghamweno ghawo. Hapata ghana kuwemanena, no kuharanganya yighayadhara yawo yopamuve ngeshi harombo hahunga maghamweno, hana kuwayuva Fumu no ghana kuwaghamwena muyikudhekera yawo yoyihe.

R:

Mwiye..

Fumu ne pepi gha kara nawakakutokota no gha ghamwena hakakutamangera. Ngambi ha di muwana muhunga dihudhi dyokukuma papi, ghana kumughamwena Fumu kuyoyiheya. Fumu, gha kunga yirama yoyihe yamuhnga: ghupata ghu hana kutenda hakakushwena Nyambi, mahurerero ghawo hana kutenda:

R:

Mwiye..

No yi ghana kutenda kwawañore dhendi no kwawahunga, ghayikure ndani. Fumu ghana kutanda mukeya kwawaka-kumukarera. Oyu gho kunda kukwendi, mbadi mbo ha mu tenda yira mukamurandu.

SECOND READING

Thitoya thoghuwadi Efs. 5:21-32

Mumbapira dhaMupostoli Paghulusi kwawaka Efesiusi.

Mukare no makuyero ghofotji. Kemo dyo sho mufumaneke Kristusi. Mwakamadi mukare ghutawedhi kwawatutughuru wenu, thika di mwakara ghutawedhi mwaFumu. Murume yo mutwi wamukamadi, thika dig ha kara Kristusi mutwi ghoNkirishe. Kristusi yomukomononi ghoyirama, ay one dhongirishe dhendi. Thika di dhakara Nkirishe kwishi dhaKristusi, kemo dyo ha kona kukara hakamadi kwishi dhawatutughuru wawo muyoyihe. Mwarume, muhake hanuwenu thika dig ha hakire Kristusi Nkirishe dhendi no gha tapire moyo wendi. Eyi gha yi tenderire, mukutapa ngirishe kwaNyambi, munyima dho kudhipongokitha nomeyu nomañando. Eshi aye gha kone kuyaritha mukuwatambura mughuFumu wendi, kupira no dikongo temba nokamyandhu-myandhu temba, yoyiheya yi yipongoke noyipire murandu. Harume gha hake hanuwawo thika di ha hakayira yawo. No kehe yu ghahake mundambowendi, gha kuhake naye thinda. Yoyishi mbadiko munu yu ghadhimba yirama yendi. Karo ye ghana kuyikorera no kuyirera, thika di ghana kutenda Kristusi kuNkirishe dhendi. Yoyishi yoyirama yendi, atwe ne twayipo yawo. Muyitjanga yemanamo ngeno: Payinu yi katughuru ghathiye ghawihe nanyina noghapare pofotji namunuwendi. Mughuwadi wawo mbo ha kare yira munu yofotji. Ethi ne thithatero thothikuru. Ame, kwaKristusi noNkirishe dhendi nakuyikundeka.

Mañando ghaNyambi

Gospel Acclamation

Hallelujah Jn. 6:63.68

Ñando dhoye ne dhathina mupepo we, Fumu no adho ne dhamoyo: wakara no mbudhi dhomoyo ghororuheya.

Hallelujah

Evangelium

Jn. 6: 60-69

Marundwerero ghoyitjanga yaJohannesi.

Wingi wawo hakathishongero waJesusi, apa hayiyuvire haningire eshi: “Eyi ghana kughamba ñanyi-ñanyi ne yikukutu keho. Yidye ghokuyitegherera?” Jesusi ghayidimukire eshi, hakathishongero yohana kuvunguta yi ghana kughamba no gha ningire kukwawo eshi: “Amwe ne muna yi tutukwa yi ndi? Ngepi keho mbo yikara, ngeshi mbo mumone mwanamunu apa mbo hahuka ku hatungire pakutanga? Mupepo ne yomukakuparitha, munu thinda vaye. Eyi namutongwera, mwaMupepo yashwagha noghatapa moyo. Ene pohadi hamweya papenu, awa hana kudhira kutawa mumwange.” Ene Jesusi, gha dimukire kutunda kumutango eshi, yidye yu ghana kudhira kutawa, noyidye yu gha kumuhokora. Shime gha ghambire karo eshi: “Yonayimutongwerire eshi mbadi ko yu ghakona kwiya kukwange, oku mbadi gha mupa Tate.” Kutunda pashakengeyo, wingi wawakathishongero wendi hathiyaghukire no ha hukire kudighumbo, no mbadi ha yendaghurire karo pofotji nendi. Ko kumwipura Jesusi kwawashadikumi nohawadi eshi: “Mbadi muna haka namwe kuhuka ndi?” Gha muhutha Simoni Petrusi eshi: “Fumu kwadye sho tu yende? Yowe wakara nomañando ghokutapa moyo ghororuheya. Natwe twa tawa ne thikuma, no twa dimuka eshi owe ne ghoMupongoki waNyambi.”

Mañando ghoEvangelium

TWENTY-SECOND SUNDAY IN ORDINARY TIME

Shundaha ghomakumi mawadi noghoghuwadi

FIRST READING

Thitoya thokutanga Deut. 4:1-2.6-8

Mumbapira dhaDeteronomi (Muragho ghoghuwadi)

Mwakambeka ko yimwe kukoyi namurawera, mupunguro miragho dhaFumu.

Ko kughamba Mosesi kumbunga dhodhihe eshi: “Pano, Isragheli, kumithe mo miragho dhodhihe edhi nakumuhonga dyarero ndani mudhikengurure thiwana podigho eshi mbo muwane yipara ndani nokwingena no kushimba dyango dyodikuru edi ghana kumupa wihenu Fumu Nyambi. Mwakambekako yimwe kukoyi namurawera, nokutundithako temba yimwe, ene mupungure muragho dhi dhaFumu Nyambi wenu yira thika di nadhimurangekera. Mudhipungure, no kudhikengurura thiwana, mbo dhina neghedha kumbunga ghunyanyami wenu no ghudimuki wenu. apa mbo heya nokudimuka miragho dhodhiheya mbo hana ningi eshi, “Mbadi ko diko dyodinyanyami dyokukona kupiterera diko dyoditunga di.” Ene ditunga munye dyokufumana edi dyakara no haFumu wadyo pepi naFumu Nyambi wetu kukwetu kehe pano tuna kumwitha? Ndani ditunga munye di dyakara nomiragho dhokukona kupiterera miragho dhodhiheya dhi na paka po dyarero kughutho wenu.

Mañando ghaNyambi

Responsorial Psalm

Dimbokatji Ps. 15: 2-5.

R:

Fumu, yidye gha kara nomahimeno ghokwingena muTembeli ghoye?

Yidye ghokukona kuturumuthera padirundu Dyoye dyoKupongoka? Yoyu gho kuyendaghura muyipara mwene, no kutenda yoyihunga no kughamba ghushemwa no mumutjima wendi ghoghuhe.

R:

Fumu…

Mukakupira ghuhothi kadi wakupatera muyendhendi, no kupetha temba ghumweya, no yu ghokudhira kushwahura thi ghamwagha Nyambi ene, kukutekera waheya hakakukarera Fumu.

R:

Fumu…

No kurikanyitha ñando dhendi muyoyihe, mbadi wakuvuritha manyinga ghendi kumukudi, no mbadi ghana kuhepwitha ha ka kupira murandu. Oyu ghokukwata muragho dhino, mbadi mbo gha pundadhoka nokamanana temba.

SECOND READING

Thitoya thoghuwadi Jam. 1:17-18.21-22.27

Mumbapira dhaMupostoli Jakobusi.

Yoyiheya ne yiwa, yoyihe yoghuhunga, yoyi ghatupa kutunda mudiwiru; kweya kutunda mwaWihetu ghomunyenge ghoghuhe; kuwendi mbadi ko makutjakero ghomutenya nomakokore. Aye kwaturetera po kungcamu dhodhushemwa muruhakitho rwendi, munyima yotwakarera mudyo ghokuyivareka yendi yoyihe. Mutawe no mutape ñando dhendi edhi gha mu pire ndani no dhina kughamwena mudhimu dhenu. Ene mwakona kutenda eyi ghana kumutongwera maňando gha, mbadi kutegherera pithako no kukwangera mwathinda. Ngeshi ha tumu karera kughutho wendi nomitjima dhokukushuka ne ngeno: Mbo gha neya mukuna ghamwena hathiyana ndani nohadidhi ngeshi hana yinyanda, no kuyipitha temba kaye.

Mañando ghaNyambi

Gospel Acclamation

Hallelujah Jn. 6:63.68

Mupepo ne yo mukakuparitha, munu thinda vaye. Eyi na kumutongwera, mwaMupepo yashwagha no ghatapa moyo. Yowe wakara nomañando ghokutapa moyo ghororuheya.

Hallelujah

Evangelium

Mark. 7:1-8.14-15.21-23

Marundwerero ghoyitjanga yaMarkusi.

Mudiyuwa dimweya, gheyire haFarasayi nawakamarukwaro ghoJerusalema kwaJesusi. Apa hamonine eshi, hakathishongero wendi hamweya kudya hana kudya nonyara dhodidhiro kokuyinungathana kwawo. Yoyishi haFarasayi nawaJuda mbadi hakona kudya oku mbadi hana kuyogho nyara dhawo thiwana. Yoyishi hatawire ko yithimwetwedha yawakuru. Ngambi oku hana kutunda kumaghurithero, mbadi hakona kudya oku mbadi hana kuyogho. Kemo hatawire kumihingo dhodhingi edhi sho gha tende roruhe eshi, kukenitha makopi turanga noyinwitho. Poha mwipurire haFarasayi nawakamarukwaro eshi: “Nye hana kudhira kukupakerera hakathishongero ghye no kuthimwetwedha yawakuru? Aw one kudya hana kudya nonyara dhodidhiro.” Aye ne kokuwa hutha eshi: “Ghuhunga eyi gha ghambire Jesaya, kukwenu mwakadifurumeko. No gha mu yawerire thika dip wire kutjanga eshi: “Diko di dina kunifumaneka nomiromo mitjima dhawo ne kayenda nange. No nyara-nyara hana kunifumaneka me. Muyihonga eyi hana kuwahonga mumiragho dhawo.’ “Yoyishi pakuthiya mwe muragho dhaNyambi, munakutawa po yithimwetwedha yawakuru, eshi kuyogha turanga nomakopi noyinu yimweya kengeyo, yo mwa tendanga mwe thikuma.” Ko kwitha kwendi mbunga dhodhihe no gha dhitongwerire eshi: “Mutegherere kukwange nomutjwathane eshi! Mbadi ko thinu thopanunda thina kwingena mwamunu, no thina kumupa ghuyi. Ene ethi thina kushwagha mumwendi, thothina kumwipitha. Yoyishi mumutjima wamunu, moyina kushwagha yighayara yoyimango eshi, kunyanga, rungu, kupagha widhi yirumbera, ghughandhi, difurumeko, tjereha, dishamu, nya, dihuna noghuthuta. Maghuyi ghomahe gha, ghashwagha mwimi noghepitha munu.”

Mañando ghaNyambi.

TWENTY THIRD SUNDAY IN ORDINARY TIME

Shundaha ghomakumi mawadi no ghoghuhatu

FIRST READING

Thitoya thokutanga Jes. 35:4-7

Mumbapira dhaMuporofeta Jesaya.

Mutongwere ha ka kuyumbunga mutjima eshi ha tanare no hayapa! Mu mone, eshi Nyambi wenu kwiya ghana kwiya nonyinya, nongcamu dhendi nomadhimithero ghawo, ene thinda mbo gheya kukuna mushutura.” Munyima, meho ghwakunga mbo ghana yandhuruka, nomatwi ghawayipuru-puru mbo ghana thituka: No muka kuteghena mbo ghana shamba yira ngurungu; no marudimi ghokukakatera mbo ghana humwerera. Yoyishi meyu kushwagha ghana kushwagha mumamboreya no kupoposhera mumashesha. Nomuve ghokushekesha mbo ghuna kara nomeyu, noditunga dyorukukutu mbo dina kara namavetu-vetu ghomeyu. No mararo gha wa mbwawa nomuhaturumutherire, mbo muna meni muhonyi nombu nombare. Mbo pana kara ndhira dhodhikuru, nodhira dhi mbo ha toya eshi ndhira dhokupongoka. Mundhira dhi mbadi mbo muyenda ha ka kupira ghukushuki; ene dhawakushuki vene awa ho kuyendaghura mundhira dhi, ngambi hayero mbadi mbo ha yongara.

Mañando ghaNyambi

Responsorial Psalm

Dimbokatji Ps. 146: 7-10

R:

Mu mukughe Fumu! Nahaka kumukugha Fumu.

Aye gha neyedha ghuhunga kwawakakunyanda, no gha pwedhumuna hakakufa ndhara. Fumu ghakomonona hakañotwa.

R:

Mu mukughe...

No gha monitha hakunga, Fumu gha ghamwena wa hana kupetha.

No Fumu, gha haka ghahunga. Aye gha kunga hanu maghana.

R:

Mu mukughe…

No gha ghamwena hathiyana nawadidhi, ene ye ghapititha mayira ghawakakushwena Nyambi. Fumu gha raghura kuroruhe. Owe Siyoni, Nyambi ghoye gharaghura kutunda kwawanahoka kate kwawaneghani.

SECOND READING

Thitoya thoghuwadi Jam. 2:1-5

Mumbapira dhaMupostoli Jakobusi.

Nyambi gha tororire ghahepwe eshi hakare hatungi ho diwiru

Mwayendhange, mwayereka kupakerera matawero mwaJesusi Kristusi, kudifumanekero dyaFumu Nyambi wetu: Endi kwayenda kuyipara noyikara yawanu. Ngeshi ku munapongo kukona kwiya po munu yu ghana shupata kadeya ko ngorondo no kuvata thiwana, paruvedhe rofotji ko kwiya po muhepwe yu ghana vata yitere yodidhiro munyima owe ghuna kunongonona po oyu ghana vata thiwana, ko kumutongwera eshi: “Wiye kuno kutishe ghomuwa; no kutongwera muhepwe eshi, “ Wiye nohungumane pano pamuve.” “Endi wene mbadi wahungumananga pamuve apa ghana dyata mapadhi ghange.” Mbadi ghuna kudimuka eshi ne makutjakero ghoyiwana noyipara mumaghano ghoye, kutenda ghothinda ghukare ghomupanguri ndani no kupangura payikara yoyimango? Mu tegherere amwe mwayendhange: Gho gho hahepwe kukutha mukaye ho gha tororire Fumu, eshi ha kare noghutungi ghomatawero ndani eshi ha kare noghutungi ghodiwiru oghu gha kuruperithire awa ha mu haka.

Mañando ghaNyambi

Gospel Acclamation

Hallelujah Jn.6:68

Ghambe Fumu, hapikoye kuna kukutegherera: Yowe wakara nomañando ghokutapa moyo ghororuheya.

Hallelujah

Evangelium

Mark. 7:31-37

Marundwerero ghoyitjanga yaMarkusi.

Jesusi gha shwayire mumukunda waTirusi, gha tjinaghana Sidoni kate kakuma kudikuruviya dyomuGalileya, kuthiko thomambara Dekapolis. Ko kumuretera kwawo thipuru-puru thokudhira kughamba, no ha mu kumberire eshi, gha mu kambeke nyara dhendi. Aye ne gha mu tunditha mudihanga, ko kumuvuka mumatwi ghendi no minwe no kupaka mate parudimi rwendi. Gha dighamenine kudiwiru, ha tongo ghuninga kwathipuru-puru eshi: “Ephphata!” Kuninga eshi: “Ghuyandhuruke!” Podiyo popo ko kuyandhuruka matwi ghendi, no rudimu rwendi rwavishukire, no gha tangire kughamba ghuhunga. Jesusi ghawashingire eshi, kadi yakutongora kwamunu. Ene rungatji ghawashingire, aw one rwingi hayitongorire. Hatetuka wahe nohaningire eshi: “Gha tenda yoyiheya ghuhung. Gha yuvitha haka kufa matwi no gha ghambitha hayipuru-puru.”

Mañando ghoEvangelium

TWENTY-FOURTH SUNDAY IN ORDINARY TIME

Shundaha ghomakumi mawadi noghune

FIRST READING

Thitoya thokutanga Jes. 50:5-9

Mumbapira dhaMuporofeta Jesaya.

Fumu Nyambi gha yandhurura ditwi dyange. Mbadi na kananine, no mbadi nashwenine. Ame na tapire mughongo wange kwawa hani pumurire, no matama ghange kwawa hadhurire mwendo; no mbadi na horekire rupara rwange kwawa kakunituka, no kwawa kakunithipera. Ene Fumu Nyambi wange nighamwene, yoyishi mana sho ni kare mughuyi; no mana sho ni kare rupara rwenge yira diwe dyokwetha wangu, no na dimuka eshi mbadi mbo ni fitha honyi, yoyishi oyu gha nipa ghuhunga ne nange ghadi, yidye yu sho gha tange nange ndhango? Muninge tutenda pofotji. Yidye munyathi wange? Muninge gha kokere kukwange. Mone, Fumu Nyambi wange kughamwena ghana kuni ghamwena; yidye gha kona kunitetera me ndhango? Waheya mbo ha naña yira thivata; no mbo yina wa di yumbanyungu.

Mañando ghaNyambi

Responsorial Psalm

Dimbokatji Ps. 116: 1-6.8-9

R:

Ame mbo na kono kuyendaghura kughutho waFumu, muditunga dyawayumi.

Ame na hakaFumu, yoyishi, kuyuve rera ghana kuniyuverera mandapero ghange ghokumakuhemeno. Aye gha ni teghererire apa na kuteghererire kukwendi.

R:

Ame…

Maghukukutu ghoyifa, ghana ni dhingi ghoma ghokufa, ghuna ni wana, ame na tutukwa thikuma no kukudhekera.Yona kwithera dina dyaFumu eshi: “Gho Fumu, ghu ni ghamwene!”

R:

Ame…

Fumu, mukañeke no ghuhunga, Nyambi wetu gha mu fereñeke papetu. Fumu gha ghamwena hakakupira maghamweno: Amen a pirire ngcamu, ene ye gha ni ghamwenine.

R:

Ame…

Owe wa ni ghamwena mukufa, owe yowe wakuyurire mahodhi ghange, no yowe wa ni konekire eshi, mana mbo ni pundadhoka karo. Ame mbo na kono kuyendaghura kughutho waFumu muditunga dyawayumi.

SECOND READING

Thitoya thoghuwadi Jam.2:14-18

Mumbapira dhaMupostoli Jakobusi.

Nye sho yighamwene, mwayendhange, ngeshi ghumweya ha ghayara eshi aye ne ghayara no matawero, ene yitenda yendi, mbadi yina kukumenenamo. Matawero ghokemo ne kukona kumughamwena munu ghokemo ndi? Tuninge shi, ngeshi ha kara mina munu ngambi ñamba ghowira, no kufa ndhara mutenya no ghuthiku. Ene mwe mbadi muna kuwapa yokuwaparitha. Ko kutongwera ghumweya eshi, yikare thiwana nenu, muyende mukakuyenyekithe no mukakurikanyithe kudya. Oku mwe no kamanana temba ko kuwaparitha. Nye yina ghamwena yi? Kemo dyo ya kara karo mumatawero eshi, ngeshi mbadi ghana kurughana ne ghafa. Ene ghumweya ngwa gha kona kughamba eshi: ‘yofotji gha kara nomatawero no ghumweya gha kara noyitenda.’ Yiwa, ni neghedhe ne matawero ghoye ghokupira yitenda, name karo mbo na kuneghedha mataweero ghange ghokushwagha muyitenda.

Mañando ghaNyambi

Gospel Acclamation

Hallelujah Jn. 14:6

Yame ndhira noghushemwa nomoyo. No yofotji temba gho kukuma kwaTate shimengwa papange.

Hallelujah

Evangelium Mark. 8:27-35

Marundwerero ghoyitjanga yaMarkusi.

Jesusi gha yendire nawakathishongero wendi kumaghumbo gha Sesariya-Filipi. Mundhira hepurire hakathishongero wendi eshi: “Ngepi di hana kuninga hanu, eshi yame dye?” Awo ha mu hutha eshi: “Yowe Johanesi gho mukadiyoghero hamweya eshi Eliya, nohamweya eshi yofotji gho pawaporofeta.” Ko kuwepura Jesusi eshi: “Amwe ne, ngepi di mu na kunighayara, eshi yame dye?” Petrusi gha mu tongwerire eshi: “Yowe Kristusi.” Munyima ko kutanga kuwahonga honga eshi, mwanamunu mbo ghana nyanda thikuma. No mbana mumwagha haMayami nawaPristeri hohakuru nawaKamarukwaro, no mbana mupagha. Ene munyima dhomayuwa mahatu mbo ghana vumbuka. No ñando dhi mbado ghadhi hoghota-hotire kuthighamba. Apa gha yuvire kemo Petrusi, ko kumuthighurura pambadi, gha mu shinge. Ko kuthetuka Jesusi no gha ghambire Petrusi kughutho wawakathishongero eshi: “Shwaye munyima dhange Shatani! Yoyi mbadi ghuna kundhundha ñando dhaNyambi, dhawanu ndani.” Jesusi ghethire mbunga nawakathishongero wendi no ghawa tongwerire eshi: “Oyu ghana haka kunikutha, gha kushwahure thinda, no gha tumbure thikurushe thendi gha ni kuthe. Yoyishi yomuhe oyu ghana kushana kughamwena moyo wendi, mbo ghuna yongara. Ene yomuhe oyu ghana kumwagha moyo wendi papange nopañando dhaNyambi mbo ghana ghu ghamwena.

Mañando ghoEvangelium

TWENTY-FIFTH SUNDAY IN ORDINARY TIME

Shundaha ghomakumi mawadi noghoghukwoko

FIRST READING

Thitoya thokutanga. Wis.2:12.17-20

Mumbapira dha Wisdomu ( Ghunyanyami)

Muninge turombe mathiyerero kukwendi kuyifa yi twatendire

Ha nyambi hombango kughamba kukwagho hathinda eshi, muninge twangere no kutaterera murume ghomumango. Kutunda pa gha tu kandadhekire gha nepitha mayira ghoyipara, kuna tuwana twe twareya kare muragho ghoveta ndani no kutapa murandu kukwetu pamurandu ghokureya veta. Muninge tu mone eshi ngeshi yaghushemwa eyi ghana kughamba, muninge tu mone eshi mahurero munye agha mbo gha wana ye. Ngeshi munu ghomumango aye ne yomwana Nyambi, Nyambi mbo ghana shimbi yirama yendi ndani no kumughamwena kundjoronganyi dhawakañore dhendi. Muninge tu mu yereke kunyandeka no kutumeka nomarutjeno, oyo yo sho yi mu tundithe ngcamu dhendi no kukenga ghushemwa wendi. Muninge turombe mathiyerero kukwendi kuyifa yi twamutenda. Mbo ghana tu kungu nomaňando ghendi mbana kara mumwetu.

Mañando ghaNyambi

Responsorial Psalm.

Dimbokatji. Ps.54:3-6.8

R:

Fumu gha kunga moyo wange.

Gha ningi kwendi eshi, ni ghamwene nongcamu dhoye ghoNyambi, ni neghedha ghuhunga ghoye pangcamu dhoye.

Yuve ndapero dhange ghoNyambi, no tegherere kumañando ghange.

R:

Fumu…

Yoyishi ha ñore dhange ne hana nimañanyena, hakore ne moyo wange hana kushana, no mbadi hakuthotera naNyambi.

R:

Fumu…

Ene me, gha ni ghamwena Nyambi roruhe, naFumu gha kunga moyo wange. Munyima po mbo ni reta muyambo kukoye, kupiterera ghu wahima, ghoFumu, mbo na kughu Dina dyoye, yoyishi gho muhunga we.

SECOND READING

Thitoya thoghuwadi Jam.3:16-4:3

Mumbapira dhaMupostoli Jakobusi.

Keheku kwakara nya, nothitambo, ko ghokuwana karo thivunganyi no yikara yoyitenda yoyihe yoyimango; kupi ghunongo gho ghuheya ghu watunda mudiwiru no yipara yoyiwa; ndani eshi ngo thiraro thikare po, kwayara thiñeke no kuneghedha mukutenda yoyiwa; endi ko kudi thidimukitho thothiraro endi kwangera eshi awo ne hatawa. Haka kutura po thiraro, ngeshi ku ghana kuyenda ghakapake po thiraro, ghana kumona mbuto edhi mbo dhi mena muthiraro. Kupi nane yatunderera yita ndani nomarwanavu mukatji kenu mwathinda? Nane mbadi ya tunderera mumadovo ghe nu ghomamango mwathinda, agha gha kara mumaghano ghenu mwathinda? Kushana thinu thimweya ene mbadi thawana; munyima ko kutanga kupaghe. Amwe kunyanyenena, ene no thofotji temba ethi thokukona kuwana po, yo mu na kutendera yita mushimbe yinu mungcamu. Nye munakudhira kuwana eyi muna kushana, yoyishi mbadi munakuraperera kukoyi muna kushana; ene ngeshi ha ghu raperera ene mbadi ghuna kuyiwana, yoyishi mbadi ghuna raperera thiwana, ghuna raperera yimweya yirumbera yoye pithoye.

Mañando ghaNyambi.

Gospel Acclamation

Hallelujah Jn.8:12

Yame munyenge ghokaye. Oyu gho kunikutha, mbadi mbo gha yendaghura mumakokore, ene mbo ghana wana munyenge ghokutapa moyo.

Hallelujah

Evangelium

Mark. 9:30-37

Marundwerero ghoyitjanga yaMarkusi.

Apa ghatundire kwendi Jesusi nawa kathishongero wendi kudirundu dino hatjinaghane muGalileya, ene Jesusi mbadi gha hakire eshi hayidimuke hanu. Yoyishi aye ghakarire oku ghana kuhonga hakathishongero wendi eshi: “Mwanamunu, mbana mutapa mumoko ghawanu, aw one mbana mupagha, no mudiyuwa dyoghuhatu mbo ghana vumbuka.”Awo ne mbadi hatjwathanine mañando gha no hayapire kughamwipura. Apa ha kumine mukaFarnaghumu, hengenine mundhugho, hawepura Jesusi eshi: “Nye muna kuyongo mundhira?” Awo ne noñumbu temba, yoyi mundhira ha ghambaghurire eshi, yidye mukuru pakatji kawo. Apa ha ka hungumanine, hetha kwendi hashadikumi nohawadi no ghawatongwerire eshi: “Ngeshi ghumweya ghana himi eshi ghakare kughutho, yo sho gha kare munyima dhawahe no mupika wawahe.” Jesusi ghethire mwanuke no kumwimweka pakatji kawo, gha mu kwata no moko mawadi ghu ghamba eshi: “Kehe yu gho kutambura hanuke horudhi ru mudina dyange yame ghana tambura. No yo muhe ghokunitambura me, kadi yame keho ghana tambura, no yu gha ni tumine me.”

Mañando ghoEvangelium.

TWENTY-SIXTH SUNDAY IN ORDINARY TIME

Shundaha ghomakumi mawadi noyofotji

FIRST READING

Thitoya thokutanga Num.11:25-29

Mumbapira dhaNumeri.

Munyima Fumu ko kuhedhumuka kwendi mumavuyi. Ko kughamba naMosesi eshi: Tumbure Mupepo oghu wa karire mumwendi munyima gho ghutape kwawapikendi hohakuru. Apa weyire Mupepo mumwawo ko kutanga kupumba, ene mbadi ya hokokire karo. Hashawadi ho papagho hathiyarire pa mwara; ghumwe ne yoEldad no ghumweya ne Medad. Mupepo wengenine mumwawo; ngambi kenge ha dhirire kuyenda kutande maghano ghawo gha karire mukatji kawayendhawo. Ha tangire kupumba popo pamwara. Murumeghana gha dhondokire gha katongwere Mosesi yoyihe yi, “Mone,” Dyo gha ghambire. “Eldad naMedad kupumba hana kupumbera pamwara.” Ko kughamba Joshwa ghomwana Nun, yidye gha kunga Moesi kutunda kuwanuke wendi, “Fumu wange Mosesi, wimeke!” Ko kumuhuthera Mosesi eshi, “Owe ne nya ghuna kunifera kuyirughana yange ndi? Ngeshi ngo mbunga dhaNyambi dhikare haporofeta, Fumu ngo ñanyi gha kutape Mupepo mumwagho waheya.

Mañando ghaNyambi

Responsorial Psalm

Dimbokatji Ps. 19:8.10.12-14.

R:

Miragho dhaFumu ne dhashambereritha mitjima.

Ñando dhaFumu ne dha yara: No dha tapa moyo.Yihonga yaFumune yamakurupero:Yatapa ghunyanyami, kwawahadhire kuyitwayera.

R:

Miragho…

Yihima yo kukarera Fumu, yiwa no ya tanara kuroruhe. Ethi gha ghatura Fumu ne thihunga:No kehe yu gho papagho ne muhungami.

R:

Miragho…

Tawedhe ne mupikoye ghakuhonge kuyinu yi. Gho kukwata yoyiheya yi, yiruwera yendi ne yikuru. Yidye ne ghokumona thinda, yokunda yokuyongaritha.

R:

Miragho…

Nishinge kumaharwero ghange gho kuhima eshi gha dhire kuniraghura. Ngo mbadi mbo ni wana karo makoghawero, no mbo na shutuka kumaharwero.

SECOND READING

Thitoya thoghuwadi Jam.5:1-6

Mumbapira dhaMupostoli Jakobusi.

Ghutungi ghoye ghoghuhe ne kuna korwa

Dihuthero dyamutungi. Tange kudira, direre yoyiheya yi yoyimango yina kwiya kukoye. Ghutungi ghoye kuna korwa, yitere yoye yoyiheya yina pu kudya kumbenye. Ngorondo dhoye ndani Silveri dhoye kuna kukumwaghadhara, makumwaghadherero ghofotji gho mbo gha kara yinyanda yoye, no kudya yirama yoye. Kwakara yira mudiro ghokutumbuka ghu wa vukumine no kupungura mumayuwa gho kumanitha. Harughani kuna kukesha dipya dyoye ene kuna kuwangera kundjambi dhawo edhi wa pungurire, kwitha no kughayara temba eshi yinyanda yawarughani ne yina kakuma kare mumatwi ghaFumu shokuru. Pamuve wawana yipara yoyiwa thiwana, no mitjima dhenu yo mwadhithigherera mudiyuwa dyo kudhipagha. Amwe mwa pangura no mwapagha, awa hapira murandu ene mbadi ha mu hutha.

Mañando ghaNyambi.

Gospel Acclamation

Hallelujah Jn.17:17

Wa pongwere kukoye paghushemwa. Ñando dhoye ne dha ghushemwa.

Hallelujah

Evangelium

Mark.9:38-43. 45. 47-48

Marundwerero ghoyitjanga yaMarkusi.

Johannesi gha mwipurire eshi: “Muhongi, tuna mono ghokutjidha hashatani muDina dyoye, ene mbadi ghana tukuthu. Gho tuna mushingeka yoyi mbadi ghana kutukutha.” Ha ningi Jesusi eshi: “Mwamushinga, yoyishi mbadi ko yu gha wana ngcamu mudina dyange, ho gha ghambe ghuyi kunyima dhange.

Yoyishi oyu gha dhira kutudhimba ne, yowetu. Karo eshi, yomuhe ghokumu pa twiya eshi, yoyi mwakara mwakaKristusi, shemwa na kumutongwera eshi, mbadi mbo gha yongaritha ndjambi dhendi. Yomuhe oyu ghana kuharuritha hanuke hokutawa mumwange, yarikanya kukwendi eshi, ha mu ghange diwe pathingo dhendi no ha mu vukumene paditondo. No ngeshi dyoko dyoye dina kuharuritha, ditete ko.

Hasha kukoye kwingena mumoyo no dyoko dyofotji, kadi yira wa kukuma no moko mawadi kumwamwayero ghororuheya, mudiro ghushidhimana; no ngeshi ha di kuharuritha dipadhi dyoye, ditete ko. Hasha kukoye kwingena mumoyo no ghuhwere, kadi yira wa kukuma no mapadhi mawadi mumamwayero ghororuheya, mumudiro ghushidhimana; no diho dyoye dina kuharuritha, dikorongore mo. Hasha kukoye kwingena mughuFumu waNyambi no diho dyofotji, kadi yira wakukara no meho mawadi, no kukuvukumena mumudiro ghororuheya; omu gha dhira kufa mavinyo ghawo.

Mañando ghoEvangelium

TWENTY- SEVEN SUNDAY IN ORDINARY TIME

Shundaha ghomakumi mawadi nokwoko noghuwadi

FIRST READING

Thitoya thokutanga Gen.2:18-24 Mumbapira dhaGenesisi (Mashimwedhero)

Fumu Nyambi gha ningire eshi, “Mbadi ghuhunga murume kukara pithendi. Ñanyi ni mu yake ni mu tendere muhakwa wendi.” Kemo dyo ghombire Nyambi yiyama yoyiheya yomuve yomumuthitu no yinyunyi yoyiheya yokuwiru. Gho ghayitwarire kwamurume gha yi te mena; ene dina di gha tire murume kuthiyama kudyama dya karire dina dyatho. Kenge yo murume gho gha tire yiyama yoyiheya yodighumbo no yinyunyi yoyiheya, no yiyama yoyiheya yomumuthitu; keho mbadi kwa karire mushere gho kuyerana kumuyaka.

Munyima Fumu Nyambi gha rarithire murume turo totukuru; keho oku shime gha rarera, ko kumushwayitha kapatji kofotji no gha mu nungure yirama yendi-kwa mukamadi. Gho ghombire mukadhi mukapatji aka gha shimbire mwamurume keho gho gha mu twarire kukwendi. Ene murume gho gha nignire eshi: “Paghuhura ghuno oyu ne yofotji ghorudhi rwange. Thishokora ghothi tha shwayire muthishokora thange, no nyama munyama dhange. Dina dyendi ne “Mukadhi” Yoyishi gha shwayire mwamurume.” Eyi ne yoghana thigheranga murume wihe nanyina, gha kare na mukamadi, yoyishi hakara hakathipo thofotji.

Mañando ghaNyambi

Responsorial Psalm

Dimbokatji Ps. 128.

R:

Fumu ngoghakandadheke mayuwa ghomahe ghomoyo dhetu.

Ya rogha kwamunu yu gho kukarera Fumu, no kutenda mahimeno ghendi. Mbuyo dho munyara dhoye mbo dhina kushambereritha, nowe shamberere no mbo ghuna thiyaghuka.

R:

Fumu…

Mukamadi ghoye, mundhugho dhoye gha kara yira thitondo tho vinyu thoghuyaghave, no hanoye ho hatutughuru, hadhingumutwedha thidyero thoye yira kaywe ghana.

R:

Fumu…

Mone kemo dyo ghana kupwa kukandadheka murume yu gha karera Fumu. Ninge gha ku kandadheke Fumu kutunda muSiyoni, eshi mbo kone kumona kuruviya rwaJerusalema, mumayuwa ghomahe ghomoyo ghoye, no kate mbo mone haneyani ghoye. Ninge thikare thiraro naIsragheli.

SECOND READING

Thitoya thoghuwadi Hebr. 2:9-11

Mumbapira kwawaHeburayi.

Oyu tuna kumona ne Jesusi yu hayenga no dikuto no ghuFumu, munyima dho kumumbirupitha mukunyanda no payifa yendi, ha mu pitererire haengeli munako dho dhifupi vene. Eshi hafere waheya pathiñeke thaNyambi. Nyambi yu gha karera po pamurandu wendi, no papoyu yatunda yoyihe, gha haka kutwara hengi yira hanendi kughuFumu. Yodiyo yahungamine eshi, aye gha kare mukamiti gho makomweneno, gha mu rikanyithe kuyinyanda yendi. Aye mupongokithi, thika di hapongwera hanu wahe kwawihagho yofotji. Payinu yi, mbadi ghana kufa honyi Jesusi pakuwa toya eshi mwayendhange.

Mañando ghaNyambi

Gospel Acclamation

Hallelujah Jn.17:17

Ñando dhoye ne ghushemwa, ghoFumu, tukundeke kughushemwa ghoye.

Hallelujah

Evangelium

Mark. 10:2-16

Marundwerero ghoyitjanga yaMarkusi.

Ko kukwiya haFarasayi kukwendi, ha mu yereke. Hamwipura kwagho mepwero gha no eshi: “Yapwa kufudhwera kwamurume eshi gha mwaye munuwendi ndi?” Aye gha wa hutha no kuwepura eshi: “Nye gha mu rawerire Mosesi?” Awo eshi: “Mosesi gha shuturire eshi, kutjanga mbapira dhomashutwero no ku kuyakunuka.” Jesusi gha wa huthire eshi: “Pamurandu gho ghukukutu gho mutjima dhenu, yo ha mu tjangerire muragho gho. Ene pamatangero ghoyivareka, Nyambi gha tendire murume na mukamadi. Payinu yi, murume gha thiye wihe nanyina, no gha kughunguvure na munuwendi. Mughuwadi wawo hakare yirama yofotji, kadi yiwadi ene yofotji. Yodiyo eshi thinu ethi ghanunga Nyambi, mbadi gha kona kuthishutura munu.”Hakathishongero wendi nawo ha mwipurire mundhugho eshi, ngepi yoyinu yi ko kuwahutha kwendi eshi: “Kehe yu gho kumwagha munuwendi no kayeka waye, ghana tjoro mayekero kwamunu wendi.

No ngeshi mukamadi ghana shwena didhiko dyendi, no kamuyeka waye, naye ghana tjoro mayekero.” Hanu hamweya haretire hanawo kukwendi eshi, gha wa kandadheke. Ene hakathishongero wendi ha wa shingire. Apa gha yi monine Jesusi gha patire thikuma kukwawo no gha ghambire eshi: “Muthiye hanuke, heye kukwange, yoyishi wagho ghuFumu waNyambi. Shemwa na kumutongwera eshi, yo muhe ghokudhira kutambura ghuFumu waNyambi yira mwanuke, mbad mbo ghengena mo.” Ko kuyandja nyara dhendi papagho no kuwakandadheka.

Mañando ghaNyambi

TWENY-EIGHTH SUNDAY IN ORDINARY TIME

Shundaha ghomakumi mawadi nokwoko no mahatu

FIRST READING

Thitoya thokutanga Wis.7:7-11

Mumbapira dhaWisdomu ( Ghunyanyami)

Ame ku raperera, no kuyiyuva eshi nye gha ni pire. Nepurire, noMupepo gho ghuhunga weyire mumwange. Na mu thimwetwedhire mo yoyingi, ndani no ku rikanyitha, yipuna yoghuFumu nange. Mu ku kurikanyitha nendi, na karire dikuto kupitakanena, kadi ko thi nakadhirire kawana, kurikanyitha yira we, Ngorondo dhodhihe yira tuwe to muheke ndani no kumbadi ne yira Silveri. Ame na mu haka kupitakanena ghukanguki noghuwa wendi, no kurikanyitha kuramba. Shime thishe thendi mbadi thina kurara. Mangeshefa ghendi no yinu yendi yoyihe kwiya kukwange padyoko dyendi ene ghutungi mbadi wa kughutara.

Mañando ghaNyambi

Responsorial Psalm

Dimbokatji Ps.90:12-17

R:

Tuyarithe noruhakitho roye eshi tukone kushamberera.

Tuhonge edi sho tu rughanithe mayuwa ghetu, eshi tukone kukuma kughunya-nyami. Rure munye sho tu ku taterere gho Fumu, kate mbo no tughamwene. Tu fereñeke twa pikoye.

R:

Tuyarithe…

Tupe kehe diyuwa ruhakitho roye, mukamwagha-mwaghe kemo shod hi kare moyo dhenu rure mukuyumbaghuka no mukushamberera. Thika di gha vurire mayuwa gha wa tu nyandekire, no mumyaka dhodhihe omu twanyandire, kemo sho tu vurithere myaka, dho kurikanya muyishamberera.

R:

Tuyarithe…

Yirughana yoye yitu kenene, no ghukuru ghoye gho kwawanahoka wetu. Ninge tu wane ghuhungami waFumu wetu: Kwate yirughana yonyara dhetu ghutanara, kemo, kwate yirughana nonyara dhetu ghutanara.

SECOND READING

Thitoya thoghuwadi Hebr.4:12-13

Mumbapira kwawaHeburayi

Ñando dhaNyambi dha kara no moyo nongcamu. Adho ne dhitwe kupiterera kehe thimende, ethi tha kara ghutwe kuwadi no adho ne kwingena kate dhi yakunuthe mudhimu nomupepo nomakunungero gho mushukwaghongo. Adho dha tetera yitambo noyighayadhara yomumutjima. No karo mbadi ko thivareka ethi thonda kwaNyambi. Yoyiheya yi ne yakuyara vene kughutho ghomeho ghendi. No kwendi yu twakona kunongwenena yoghushemwa.

Mañando ghaNyambi

Gospel Acclamation

Hallelujah Mtt. 11:25

Na kukugha we Tate Fumu ghodiwiru nomuve, yoyishi wa horekire yinu yo thithithatero thoghufumu kwawanoye.

Hallelujah

Evangelium

Mark. 10:17-30

Marundwerero ghoyitjanga yaMarkus.

Apa gha karire Jesusi muruyendo, ko kudhondoka munu ghumweya kukwendi, no gha tongamenine kughutho wendi ghumukumbera eshi: Muhongi ghomunongo, nye sho nitende ni kawane moyo ghororuheya? Jesusi gha muhuthire eshi: Nye ghuna kunitoghera eshi, no munongo? Mbadiko ghomunongo, shimengwa yofotji keho eshi, Nyambi! Wa dimukasha miragho ndi eshi: “Wapagha, Watjora ghurugho, Wedha, Waghamba ghumbango, Wapaka nya, Ghufumaneke wiho nanyoko!” Murume yu ghahuthire eshi: “Muhongi, yinu yoyiheya yi na yi kwata kutunda kuwanuke wange.” Jesusi ne gha mukengurure thiwana noruhakitho, gho gha ningire kukwendi eshi: ‘Thinu thofotji ne hasha ghukare ghuhepwe, yende kaghurithe yoyihe, eyi ghudi nayo. No katape manyinga kwawahepwe no wiye ghunikuthe. Aye ne ghatokotire kumañando gha, no ghahukire ghundundumena, yoyishi ghakarire murume ghomutungi thikuma.

Ko kureva-reva Jesusi kokuhe no gha ningire kwawakathishongero wendi eshi: “Ngepi kughukukutu kwawatungi mukwingena mughufumu waNyambi!” Hakathishongero wendi hatutukwire kumañando gha. Jesusi gha wa hutha karo eshi: “Mwanange ngepi kughukukutu kwingena mughufumuwaNyambi! Oku ne ghuredhu kwangameno kukwena mudiho dyothong, ene ghukukutu kwamutungi kwingena mughufumu waNyambi.” Ko kututukwa kwawo thikuma, no ha ghambathanine eshi: “Yidye ne keho gha pwa kughamwena.” Jesusi gha warerurrire kokuninga kuwawo eshi: “Kwawanu ne ghukukutu, mbadi kwaNyambi, yoyishi kwaNyambi ne yoyiheya yiredhu.”

Ha mwipura Petrusi eshi: “Ngepi keho yokuhamena kukwetu, twathigha yoyihe no kukukutha?” jesusi gha huthire eshi: “Shemwa na kumutongwera eshi, yomuhe yu ghokuthigha dighumbo dyendi, hakurwendi, hañamba dhendi, wihe nanyina nawanendi ngambi ditunga dyendi, muDina dyange no dyoMbudhi Dhodhiwa oyu mbo hadhira kuruwera kupiterera dithere, kudighumbo dyendi, hakurwendi hañamba dhendi, wihe nanyina nawanendi no ditunga dyendi, no kumukutha-kutha pashadyerero no kupeghundha kate kumoyo ghororuheya.”

Mañando ghoEvangelium

TWENTY-NINTH SUNDAY IN ORDINARY TIME

Shundaha ghomakumi mawadi nokwoko nomane

FIRST READING

Thitoya thokutanga Jes.53:10-11

Mumbapira dhaMuporofeta Jesaya.

Fumu gha ningire eshi: “Ene Fumu ya muroghererire pa kumupamarera gha mu tjitjupithire; no gha tapire mudhimu wendi ghukare muyambo ghomaharwero. No mbo ghana mono hanahoka wendi; no mbo ghana repitha mayuwa ghendi; no ghumenya-menya waFumu mbo ghuna kara thiyaghudhi mumoko ghendi. Mu manako gho yinyanda yendi yoyikuru yo kumudhimu wendi, mbo ghana yi mono no mbo yina mu yarera thikuma; payidimukitha yendi mupikange gho muhunga mbo ghana tendi hahunga hohengi. No mbo ghana kukambeka mirandu dhawo.

Mañando ghaNyambi

Responsorial Psalm

Dimbokatji Ps.33:4-5.18-20.22

R:

Ninge ruhakitho roye rukare papetu, ghoFumu, thika di tuna kutura makurupero ghetu mumoye.

Yoyishi, yina kuhokoka yina kuninga Fumu, no yoyihe yi ghana kutenda ne, ya tanara. Aye ne ghahaka ghuhunga no ghuwa, yidimukitho yaFumu yo makurupero ghoruhakitho rwendi, ya yara kaye kokahe.

R:

Ninge ruhakitho...

Oyu ne Hekudyetu, yo gha kunga waheya ha ka kumukarera, nawahakurupera ngcamu dhendi. Yo gho kuwaghamwena kuyifa, no kukunga moyo dhagho kudiyerenge.

R:

Ninge ruhakitho...

Tukurupere paFumu: Mbo ghana tu ghamwena no kutukunga. GhoFumu, kare nongcamu dhoye gho mughamweni wetu, yoyishi, mumoye twapaka makurupero ghetu.

SECOND READING

Thitoya thoghuwadi Hebr. 4:14-16

Mumbapira kwawaHeburayi.

Thika di tu di pashadyarero nomupristeri shokuru, oyu gha dhinine mumawiru, Jesusi ghoMwana Nyambi, muninge tu tanarere mumatawero gha twanongonona. Mupristeri shokuru yu tu di nendi, kadi yu gha dhira kuthotera kughukashu wetu. aye naye ha mu yerekitha yatwe, ene mbadi gha harurire. Mwiye na tuyende no mutjima dhodhihunga kudipuna dyothiñeke, eshi mbo tu kawane thiñeke noñeke no mbo tupwe kukomonona munako dhodhihunga.

Mañando ghaNyambi

Gospel Acclamation

Hallelujah Jn.14:6

Yame ndhira no ghushwemwa nomoyo. No yofotji temba gho kukuma kwaTate shimwengwa papange.

Hallelujah

Evangelium

Mark.10:35-45

Marundwerero ghoyitjanga yaMarkusi.

Jakobusi naJohannesi, hana Sebedeghusi heyire kukwendi no ha mwipure eshi: “Muruti, tuna ha ka eshi, ghututendere yoyihe eyi sho tu kurombe.” Aye gha wa tongwerire eshi: Nye muna haka eyi sho ni mu tendere?” Awo ha huthire eshi: “Ghu tupe eyi sho tu kone kuhungumana mughuFumu ghoye. Yofotji kurudyo, yofotji kurumoho.” Ene Jesusi gha wa dimbwererire eshi: “Mbadi muna dimuka eyi muna kwipura. Mwakona kunwitha kuthinwitho thoyinyanda ethi na kunwitha Me, no kumuyogha diyoghero edi mbo ha ni yoyitha Me ndi?” Awo eshi: “Twa kona! “Jesusi gh wa tongwerire eshi: “Yashemwa, thinwitho thi na kunwena Me, tho mbo munwena namwe.

No diyoghero edi mba ni yoyitha Me, namwe dyo mbo ha mu yoyitha. Ene kuhungumana kurudyo Rwange no kurumoho Rwange, mbadi ya kara kuKwange eshi, ni yi wape, shimwengwa kwawa ha yi turekera. Apa ha yi yuvire hamweya dikumi, ko kutokotera kwawaJakobusi naJohannesi. Jesusi gha wethire kukwendi no gha wa yuvithire eshi: “Mu nayi dimuka eshi yomuhe oyu muna kughayara kughukuru ghodiko, gha wa rawere, no manduna ghatende mahimeno ghendi. Eyi ne mbadi ya kona kukara mumwenu, no kehe yu gho papenu, oyu ghana kuhima kukara ghukuru, ghakare mupikenu. No yo muhe gho papenu, oyu ghana kuhima kukara kughutho, gha kare mupika wawahe. Yoyishi naye mwanamunu mbadi gheyire kukurughanena, ene kukurughana no kutapa moyo wendi thikare thikomononitho thawendi.”

Mañando ghoEvangelium

THIRTIETH-SUNDAY IN ORDINARY TIME

Shundaha ghomakumi mahatu

FIRST READING

Thitoya thokutanga Jer.31:7-9

Mumbapira dhaMuporofeta Jeremiya.

Fumu ghana ghamba yino eshi: Kugherere noyishamberera kwaJakob! Rumerithe Fumu ghomako! Yuvithe! Kughe! Kugherere! ‘Fumu ghana ghamwena hapikendi, diko dyaIsragheli edi dyathighara po!’ Mone, mbona kawahutha muditunga dyoMumbunda no kuwakongwedha kutangerera kughuhura ghokaye; waheya: hakunga nawayirema, hakamadi nawanawo nawahakamadi hokunyati: mbunga dhishokuru mbo dhikahuka kuno. Hafungurukire no maruhodhi, mbona wa hengaghura apa mbo ni kawahutha; mbona wa piteritha kumuronga gho meyu, no mundhira dhodhiwa omu mbo hadhira kupunduka. Yoyishi yame wiha waIsragheli, naEphraim, ne mwanange ghombedi.

Mañando ghaNyambi

Responsorial Psalm

Dimbokatji Ps.126.

R:

Kehe yitetukitho ghaturughanena Fumu, shemwa yatu shambereritha.

Apa gha pirurire Fumu yikara yaSiyoni, ya karire yira yirota kukwetu. Twaheka hekire no twembire. Marudhi gha gha kuyongire eshi: “Fumu, ghana tendi yinu yoyikuru kwawanu wa.”

Fumu ghana tendi yinu yoyikuru kukwetu, natwe tuna shamberera.

R:

Kehe yitetukitho…

Pirure ne pañanyi-ñanyi yikara yetu, ghuFumu yira turware ghana toye totukukutu yira mughucuma, otu wathitunukithire tupupo.

Oyu gho kukuna no maruhodhi, mbo ghana keshi noyishamberera.

R:

Kehe yitetukitho…

Ngambi gha yendi ghudira noketji ghombuto pa mughongo, ghana kahuka noyishamberera, oku ghana kukambeka yiyangura yendi.

SECOND READING

Thitoya thoghuwadi Hebr.5:1-6

Mumbapira kwawaHeburayi.

Kehe mupristeri shokuru ne munu yu gha tambura hanu no ha mu paka po, mukukarera po hanu muyinu yoyihe yokuhatera kwaNyambi yira, kuyitapa nokureta muyambo ghomaharwero. Aye kukona kukupakerera nawathuta nawapemuki. Yoyishi naye thinda ne mughukashu gha dhimbama. Payinu yi, gha kona kukuyamba thinda, thika di gha yambera diko maharwero ghawo. Mbadi ko yu gho kukupa thinda ghupristeri ghushokuru. Shimwengwa yu gha pwa kutorora kwaNyambi thinda, yira Aroni. Kemo, Kristusi mbadi gha ku nunekire thinda eshi gha kare mupristeri shokuru. Nyambi thinda yo gha mu nunekire apa gha ghambire eshi: “Yowe mwanange, dyarero na kara noWiho.’ No pamango ghamweya gha ningire eshi: “Owe ne gho mupristeri kuroruheya payikara yaMelkizedeki.”

Mañando ghaNyambi

Gospel Acclamation

Hallelujah Jn.8:12

Yame munyenge ghokaye, dyo ghana kughamba Fumu, keheyu ghokunikutha, mbo ghana wana munyenge gho kutapa moyo.”

Hallelujah

Evangelium

Mark.10:46-52

Marundwerero ghoyitjanga yaMarkusi.

Pakushwagha kwendi Jesusi muJeriko nawakathishongero wendi no mbunga dhishokuru, Bartimeghusi (kuninga shi mwana Timeghusi) gho mukunga ghomukumberedhi ghahungumanine kumbadi dhondhira. Apa gha yuvire eshi Jesusi gho mukaNasareti ghana kupita, ko kutegherera kwendi eshi: “MwanaDavita, Jesusi, ghu ni fereñeke!” No hengi ha mu shingire eshi, gha porere; aye ne pakukuyerera thikuma eshi: “MwanaDavita, ghu ni fereñeke!” Ko kwimana Jesusi gha wa tongwere eshi, ha mwithe, gheye; nawo ko kwitha mukunga no kumutongwera eshi: “Tjimape! Wimane, yowe ghana kwitha.” Gha mwagha mwaye wendi no ghemanine gha yende kwaJesusi. Ko kumwipura Jesusi eshi: “Nye ghuna haka eyi sho ni kutende?” Mukunga gha mu tongwerire eshi: “Hekudyange, na ha ka eshi, nimome!” Gha mu tongwera Jesusi eshi: “Yende matawero ghoye ghana kughamwena.” Popo vene ko kumona, no gha kuthire Jesusi mundhira.

Mañando ghoEvangelium.

THIRTY- FIRST SUNDAY IN ORDINARY TIME

Shundaha ghomakumi mahatu noyofotji

FIRST READING

Thitoya thokutanga Deut. 6:2-6

Mumbapira dhaDeteronomi (Muragho ghoghuwadi)

Tegherere we Isragheli: hake Fumu Nyambi ghoye no mutjima ghoye ghoghuhe

Ko kughamba Mosesi kumbunga eshi: “Ngeshi ha mu yapa Fumu Nyambi wenu, mumayuwa gho yipara yenu ndani no kukutha miragho dhendi no mañando ghendi gha na mupa, no yipara yenu mbo yina repi. Tegherere we, Isragheli, nowe nawanoye nohekuroye mbo muyikumithe mo yoyihe ndani ya kumurogha, thika di gha yi mukuruperithire Fumu Nyambi gho wihenu, no kumupa ditunga dyomuve gho ghuyeghave. Tegherere we, Isragheli: Fumu Nyambi wetu yo Wihetu keho. Mwakona kuhaka Fumu Nyambi wenu nomutjima dhenu dhodhihe, no mudhimu dhenu, nongcamu dhenu dhodhihe. Muninge mañando gha ghakare mumwenu mushadyarero no kughatjanga mumitjima dhenu.

Mañando ghaNyambi

Responsorial Psalm

Dimbokatji Ps. 18:2-4.47.51

R:

Nakuhaka thikuma ghoFumu, yowe ngcamu dhange.

Gha ningire eshi: Na kuhaka thikuma ghoFumu, yowe ngcamu dhange. Fumu ne mondo ghange, no mughamweni wange, no dimbarawe dyange, Nyambi, dimbarawe dyange, mondo ghange, thiteve thange nomushuturi wange ghongcamu, thundo thange thokutanara, ngambi hana kuni sherera, na kukuyerera kwaFumu, shemwa ghana kuni shutura kwawañore dhange.

R:

Nakuhaka...

Fumu ne muyumi, na kumukugha yoyishi yodiwe dyange. Nakukugha Nyambi wange yu gha ni shutura. Yodiye yu, yo gha tapire mawithero kwaFumu wendi no gha neghedhire ghundambo ghomakurupero koyu gha wethire, eshi Davita nokwawanahoka wendi kuroruheya.

SECOND READING

Thitoya thoghuwadi Hebr. 7:23-28

Mumbapira kwawaHeburayi.

Po gha di karo makutjakero gha mweya eshi: Yoyishi hapristeri waLevi kwa wa ghowire kufa no mbadi ha thiyarire po. Ene pakarire hengi awa hawarandire. Yoyishi Jesusi gha kara kuroruheya, yo gha wanena ghupristeri gho kupiterera waheya. Yodiyo aye gha kona karo kupiteritha hanu papendi kwaNyambi, awa mba komonoka pashadyarero no kehe pano: Aye gha para roruhe mukuwakumitha kwaNyambi. Kukwetu kwakarire mupristeri shokuru. Oyu gha pongire. Oyu gha pirire murandu no uy gha kushukire, yoyu gha tundithire mukatji kawayiharuri no hamununekire gha piterere mawiru. Oyu gha dhirire kakara yira hapristeri hohakuru, awa nga ha yambanga miyambo diyuwa nodiyuwa. Pakutanga ha tumburangire muyambo kumaharwero gha gha hathinda, munyima dhawa hadiko. Ene ye gha tumburangire roruhe ndupu kumaharwero, apa gha ku yambire thinda. Miragho dha paka po hanu eshi ha kare hapristeri hashokuru. Hanu ne ha kara noghukashu. Keho ne ñando dhi dha tanara pa methero, edhi dheyire munyima dho muragho, dho dhapaka po mwana gha kare mupristeri shokuru kuroruheya no gho kuyara.

Mañando ghaNyambi

Gospel Acclamation

Hallelujah Jn.6:63.68

Ngeshi poghadi yu ghanihaka ghana kukutha Ñando dhange naTate mbo ghana muhaka, name mbo neya kukwendi.

Hallelujah

Evangelium

Mark.12:28-34

Marundwerero ghoyitjanga yaMarkusi.

Mukamarukwaro ghumweya gha yuvire ñanani dhawo no gha tetukire kumahuthero gha Jesusi. Yo gha mwipurire eshi: “Muragho munye gho kupiterera miragho dhodhiheya?” Ko kumuhutha Jesusi eshi: “Muragho gho kupiterera ne ghuno: “Yuve ghoIsraeli, mbadiko Nyambi ghumweya gha kara Fumu, shimwengwa Hekudyetu. Ghuhake Fumu Nyambi ghoye nomutjima ghoye ghoghuhe, no mudhimu ghoye ghoghuhe nomaghano ghoye ghomahe nongcamu dhoye dhodhihe. Oghu ne gho muragho ghokutanga. Gho ghuwadi oghu warikanya kumuragho ghune ghuno: “Ghuhake muyendhoye thika di wakuhaka ghothinda.” Mbadi ko muragho ghumweya gho kupiterera miragho dhi.” Mukamarukwaro gha huthire eshi: “Ghuhunga, muruti, ghuna ghamba ghushwemwa eshi, Nyambi ghofotji no mbadiko Nyambi waye –naye. Yodiyo kuhaka Nyambi nomutjima ghoghuhe nomaghano ghomahe nomudhimu dhodhihe nongcanu dhodhihe, no kuhaka muyendhoye thika di wakuhaka ghothinda, eyi ne ya piterera miyambo dhokukukoñerera nodhokupagha.” Apa gha yuvire Jesusi eshi ghana hutha nomaghano, gha mu tongwera eshi: “Owe ne mbadi wa kara kayenda noghufumu waNyambi.” Kutunda pa, mbadiko karo oyu gha konine kumwipura.

Mañando ghoEvangelium.

THIIRTY-SECOND SUNDAY IN ORDINARY TIME

Shundaha ghomakumi mahatu noghuwadi

FIRST READING

Thitoya thokutanga 1 King.17:10-16

Mumbapira dhokutanga dhawaFumu.

Mudidhi gha tendire thikuki tho thimbiru pamushungwa wendi no gha retire

kwaEliya

Munyima Eliya gho muporofeta gha yendi kwendi muSidoni. Apa gha kumine pathero dhothitata pakarire mudidhi yu gha kongawedhire tukunyi ko kumutongwera eshi, “Na kanderera ni ghamwene ko twiya to mukandimbe ninwe.” Gha dhamukire no gha kayendire gha katurete. Gha mwithire kunyima dhendi eshi: “Na kanderera” Ni pitwere ko kakonye koghuroto.” “Thika dig ha para Fumu Nyambi wenu” Mudidhi ko kumuhuthera eshi mbadi ni di noghuroto ene ni di vene nokamushungwa pathikote no tughadhi to kurikanya mukandimbe; yona kughongawedhera tukunyi tuno nikatereke po twange nothinda ndani namwanange gha kadye, kughutho ghokuninga eshi tufe.” Ene Eliya ko kumuhutha eshi. “Wayapa, yende ghu kayitende thika di ghuna yi ghamba; ene pakutanga kani tendere tango kakuki kange ndani ho kaniretere, ndani po sho ghu karughana yoye noyamwanoye. Dyo ghana kughamba Fumu Nyambi wa waIsragheli eshi, kamushungwa pathikote mbadi mbo ka pwapo, endi tukare thighadhi mukandimbe mbadi mbo tu tepuka mo, kughutho ghomayuwa apa gha tumine Nyambi vura pano pakaye.” Mbuyama ha yendi no gha karughanine thika dig ha yi murawerire Eliya, gha dire yidye aye thinda, namwanendi. Thikote thomushungwa mbadi thapwire nokandimbe komaghadhi mbadi katepukire. Thika di gha tongwerire Fumu Nyambi Eliya.

Mañando ghaNyambi

Responsorial Psalm

Dimbokatji Ps.146:7-10.

R:

Nahaka kukugha Fumu mumoyo wange ghoghuhe.

Fumu yogha kwata matawero kuroruheya. Aye gha neghedha ghuhunga kwawaka kunyanda, no gha pwedhumuna ha ka kufa ndhara. Fumu gha komonona hakañotwa.

R:

Nahaka…

Fumu ne yogha monitha hakunga, gha ghamwena wa hana kupetha. No Fumu, gha ha ka hahunga. Aye gha kunga hanumaghana.

R:

Nahaka…

Fumu yogha ghamwena hathiyana nohadidhi, ene ye gha pithita mayira ghawa kakushwena Nyambi. Fumu gha raghura kuroruhe. Owe Siyoni, Nyambi ghoye gha raghura kutunda kwawanahoka kate kwawaneghani.

SECOND READING

Thitoya thoghuwadi Hebr. 9:24-28

Mbapira kwawaHeburayi

Kristusi, mbadi ghengenine mundhugho dhokupongoka, edhi hatendire hanu dho thitemununitho thoghushemwa. Mbadi kemo. Aye ne mudiwiru ghengenine thinda gha kakuhokorire kughutho waNyambi pañany-ñanyi pamurandu wetu. Aye mbadi ghengenine mo kukuhukuruka kukuyamba thinda, thika di ghengenangire muPristeri shokuru kehe mwaka kungonda dhokupongokerera nomanyinga agha gha dhira kukara ghendi thinda. Ngo kemo, ngo gha Nyandire Kristusi rwingi pakare kutunda kumatangero ghokaye. Ene pano, rofotji vene yahokokire nag ha tundithe maharwero pamuyambo wendi kate paghuhura ghokaye. Munu ne gha mu himena mukufa korofotji, munyima ndani ghana kwiya mataterero. Kemo dyo ha yambire karo Kristusi parofotji mukutunditha po maharwero ghawengi. Ngo gha hokokire karo paruwadi, ngo mbadi gheyire kutunditha maharwero. Ene, ngo makomweneno gha retire kwawa ha mu taterera.

Mañando ghaNyambi

Gospel Acclamation

Hallelujah Yit 2:10

Ngambinga ku muna kufa mukare nomatawero, dyo ghana kughamba Fumu, Ame mbo na kupa ñata dhomoyo.

Hallelujah

Evangelium

Mark.12:38-44

Marundwerero ghoyitjanga yaMarkusi.

Muyihonga yendi Jesusi gha ghambire eshi: “Mukoneke kwawa kamarukwaro awa ha haka kuyendaghura noyivata yoyire no ha haka eshi hanu hawarumerithe pamambandha. No ha haka kuhungumana mumaSinagoge mumapuna ghokughutho, no mumango ghodikuto mumayuwa ghomakuru. Awo ha hakakwaňitha mayugho ghwadidhi, no kurapera mandapero ghomare kudikuto dyawo. Hanu wa, mbana wana ndhango dhodhikuru.” Ko kuhungumana Jesusi kughutho ghodimbangu dyoyitapa. Pa kukengeranga edi dhina kupaka mbunga manyinga mudimbangu dyoyitapa. Hatungi mwene hapakire mo manyinga ghomengi. Ko kwiya mudidhi ghomuhepwe na pake mo naye tunyinga tuwadi, out twamuthiyarire ko. Hetha kwendi hakathishongero wendi no ghwatongwerire eshi: “Shemwa, na kumutongwera eshi, oyu mudidhi ghomuhepwe, ghana kutapa kupiterera wahe, awa hana paka mudimbangu di. Yoyishi wahe hana tapa muwingi ghoyiwana yawo; aye ne mughuhepwe wendi, no yoyihe yi ghana wana ne makurupero ghendi ghokumuparitha.’

Mañando ghoEvangelium.

THIRTY-THIRD SUNDAY IN ORDINARY TIME

Shundaha ghomakumi mahatu noghoghuhatu

FIRST READING

Thitoya thokutanga Dan.12:1-13

Mumbapira dhaMuporofeta Daniel.

Apa mbo dhi rikanyena po nako, haguva ghoye mbo hana kuhukadhana

“Ruvedhe ro muengeli ghomukuru Mayikeri oyu gha kunga haguva ghoye mbo ghana hokoka. Munyima gho mbo pa kare ruvedhe romaghukukutu, rorumango oru rwadhira kukara po rumweya. Shime gha tamekera kukara po matunga. Apa mbo dhirikanyena po nako, haguva ghoye mbo hana kuhukadhana. Munyima waheya w ambo ha wana eshi hapwa kutjanga mumambapira, dhawa hokwangera kurara murukungu rokaye wingi wawo mbo hana para, hamweya kumoyo ghororuheya, hamweya kuhonyi ndani noghuhepwe ghororuheya. Hahongi mbo hana twadhima yira thishe thodiwiru, awa hokuhonga hanu hohengi harughane yoyihungu, mbo hana twedhima yira nungwedhi kuroruheya.

Mañando ghaNyambi

Responsorial Psalm

Dimbokatji Ps. 16:5.8-11

R:

Gho Nyambi, ngo nitambure mumaghamweno ghoye, mondo na kushana kukoye.

Hekudyange, yowe mukakunirera no moyo wange. Yoyiheya yi nakutambura kukoye yatunda. Fumu ne, kughutho wange gha kara roruhe, mbadi mbo ni pundadhoka, yoyishi nange gha kara kuroruheya.

R:

Gho Nyambi…

Yona kushamberera nokushogherera no mbadi na kukudhekera. Hekudyange, wa ni tapa kukufa. Watawa eshi mupikoye ghomakurupero ne, ghakume mumbira.

R:

Gho Nyambi…

Yowe ghuna knihonga edi sho ni pare. Kukoye ne kwayara yishamberera. Eyi ghuna kutapa, yarogha roruhe.

SECOND READING

Thitoya thoghuwadi Hebr.10:11-14.18

Mumbapira kwawaHeburayi.

No karo, kehe mupristeri ghemana muyirughana yendi kehe diyuwa muyirughana yendi yoghukareri no gha yamba kehe pano, muyambo dhorudhi rofotji, dho kudhira kukona kutunditha po maharwero. Ene Jesusi Kristusi, gha yambire muyambo parofotji kumaharwero no ghahungumana kehe pano, kurudyo rwaNyambi. Oku ghana kutaterera kate mbo withe ñore dhendi. Pamuyambo ghofotji ghu, po gha kushukithire maharwero awa hapwire kupongwera kwaNyambi kuroruhe. Yoyishi, apa pakara mathiyerero, mbadi panyanda shime miyambo.

Mañando ghaNyambi

Gospel Acclamation

Hallelujah Luk. 21:36

Ene murawe no murapere roruhe eshi, muwane ngcamu dhokushuturitha yoyihe eyi mbo yiya, po mbo mu kona kwimana kughutho waMwanamunu.

Hallelujah

Evangelium

Mark.13:24-32

Marundwerero ghoyitjanga yaMarkusi.

Jesusi gha ghambire kwawakathishongero wendi eshi: “mumayuwa gho munyima dhomahumbithero gha, diyuwa mbo dina vindiyera, no kaghonda mbadi mbo kakara mwedhi. Nungwedhi mbo dhina ghu kuwiru nomangcamu ghodiwiru mbo ghana shekesha. Munyima mbana mono mwanamunu, ghana kwiya mumavuyi nongcamu dhodhikuru nothishe thendi. No mbo ghana tumu haengeli wendi muyiko yine yokaye, ko kukongwedha awa hapwa kutorora, kutunda kuyiyegheka muto yodiwiru. “No mukuhonge kughukuyu maghanekero gha eshi: Ngeshi dhinatupa mute dhagho, no ku ghana kufufumena mahako, mudimuke eshi, ndombo ne pepi dhi di. Kemo dyo mbo mu dimuka namwe, apa mbo yihokoka yinu yi eshi, yina henyi pepi. Kuthero yi di. Shemwa na kumutongwera eshi, diko di mbadi mbo dipwa, oku mbadi yina hokoka yinu yi. Diwiru nomuve mbo yina pu, mañando ghange mbadi mbo ghapwa. “Ene diyuwa di, nonako dhi, mbadiko yu gha yi dimuka, ngambi haengeli homudiwiru, ngambi mwana, shimwengwa wihe.

Mañando ghoEvangelium.

Our Lord Jesus Christ, Universal King

( Last Sunday of Ordinary Time)

Shundaha ghomakumi mahatu noyine difeste dyodikuru dyaKristusi ghoFumu

FIRST READING

Thitoya thokutanga Dan.7:13-14

Mumbapira dhaMuporofeta Daniel

Ngcamu dhakuroruheya

Na pumbire yihokoka yoghuthiku. Ndani gho na monine yira Mwanamunu ghana kwiyera gha tunde mudivuyi. Gheyire kwawa hohakuru yahokokire yi kughutho wange. Munyima ha mupire ditunga, difumanekero nongcamu dhoghuFumu, hanu wahe homatunga, mandimi hakarire hapikendi. GhuFumu wendi ne ghuFumu ghokuroruheya, oghu mbo ghudhira kushwagha po, no mbara dhendi mbadi mbo hadhi haranganya po.

Mañando ghaNyambi.

Responsorial Psalm

Dimbokatji Ps.93:1-2.5

R:

Nyambi ne Fumu, aye ghakuyenga noghuFumu.

Nyambi ne Fumu, aye ghakuyenga noghuFumu.

Fumu ne ghakuyenga, ho ghakudhinga nongcamu.

R:

Nyambi ne…

Kaye katanara, no mbadi kana kushekesha, no dipuna dyoye dyatanara kukare-kare: Owe ne wakara po kuroruheya.

R:

Nyambi ne…

Yiraghura yoye ne yatanara thikuma. Ghupongoki, wayenga ndhugho dhoye we Fumu, kate kumahurero ghokaye.

SECOND READING

Thitoya thoghuwadi Yih.1:5-8

Mumbapira dhaYihokora.

Na Jesusi Kristusi ghokanonga ko ghutawedhi. Oyu gha tangire kushamuruka karo pakatji kawafu wahe. Mukakupiterera hafu wahe hopakaye. No kukwetu twe ghahaka Kristusi oyu gha tundendesherire manyinga ghendi, pakutushutura kumaharwero ghetu. No gha tu tendire twanduna mughuFumu wendi no twaPristeri waNyambi wihe. Kukwendi dikuto nongcamu, kuroruheya nokuroruheya. Mu mone nomavuyi ghana kwiya, nokehe diko dina kumumona ngambi wa ha mu shosherire. No mako ghomahe ghopakaye mbo ghana diri no kukudhekera. Ya shemwa, kemo sho yi kare. Yame tangero nomahurero, dyo ghana kughamba Fumu, oyu gha kara no yu ghakarire no yu mbo gheya, Mukangcamu dhodhihe.

Mañando ghaNyambi

Gospel Acclamation

Hallelujah Mark.11:9.10

Ghafumane oyu ghana kwiya muDina dyaFumu! Difumanekero dyoghuFumu oyu ghuna kwiya wawihetu Davita!

Hallelujah

Evangelium

Jn.18:33-37

Marundwerero ghoyitjanga yaJohannesi.

Hengena karo Pilatusi mumarombe ghendi, no ghethire Jesusi gha mwipure eshi: “Yowe Fumu waWajuda ndi?” Jesusi gha mu huthire eshi: “Gho thinda ghuna kuyipura yi ndi? Endi hamweya hana yi kutongwera yokukwange?” Pilatusi gha huthire eshi: “Ame ne kadi noMujuda! Diko dyoye nawaPristeri ghoye hohakuru, ho hana kutapa kukwange. Nye watenda?” Jesusi gha dimbururire eshi: “GhuFumu wange kadi wapakaye kano. Ngo wapakaye kano, ngo ha rwe hapikange no ngo mbadi sho ni pwe kutapa kwaWajuda. Yodiyo ghuFumu wange ne kadi wa pano.” Pilatusi gha mwipurire eshi: “Ene ya ghushemwa ghoFumu we?” Ha hutha Jesusi eshi: “Thika di ghuna kuyighamba, noFumu. Ame ne nikone kunongonona yoghushemwa. Yona pwera kushamuruka no yo neghera pano pakaye. Kehe yu gha tawa kughushemwa, gha tegherere kukwange.”

Mañando ghoEvangelium.